ᠬᠠᠭᠠᠳ ᠤᠨ ᠳᠡᠭᠡᠳᠦ ᠠᠷᠪᠠᠨ ᠳᠣᠯᠣᠭᠠ
ᠧᠯᠢᠶᠠ ᠭᠠᠩ ᠭᠠᠴᠢᠭ ᠢ ᠡᠰᠢ ᠦᠵᠡᠭᠦᠯᠪᠡ
1 ᠭᠢᠯᠧᠶᠠᠳ᠋ ᠲᠤ ᠰᠠᠭᠤᠳᠠᠭ ᠲᠢᠱᠪ ᠬᠥᠮᠦᠨ ᠧᠯᠢᠶᠠ ᠠᠬᠠᠪ ᠲᠤ᠄ 《ᠮᠢᠨᠦ ᠦᠢᠯᠡᠴᠢᠯᠡᠳᠡᠭ᠌ ᠢᠰᠷᠧᠯ ᠤᠨ ᠪᠤᠷᠬᠠᠨ ᠶᠣᠬᠣᠸᠠ ᠶᠢᠨ ᠠᠮᠢᠳᠤ ᠯᠤᠭᠠ ᠨᠢᠭᠡᠨ ᠠᠳᠠᠯᠢ ᠪᠠᠲᠤ ᠦᠨᠡᠨ ᠭᠡᠪᠡᠯ᠂ ᠨᠠᠳᠠ ᠠᠴᠠ ᠦᠭᠡ ᠭᠠᠷᠬᠤ ᠠᠴᠠ ᠨᠠᠰᠢ ᠬᠡᠳᠦᠨ ᠵᠢᠯ ᠤᠨ ᠲᠤᠷᠰᠢ ᠪᠣᠷᠣᠭᠠᠨ ᠣᠷᠣᠬᠤ ᠦᠭᠡᠢ᠂ ᠰᠢᠭᠦᠳᠡᠷᠢ ᠴᠤ ᠪᠠᠭᠤᠬᠤ ᠦᠭᠡᠢ ᠪᠣᠯᠣᠨᠠ》 ᠭᠡᠪᠡ᠃ 2 ᠶᠣᠬᠣᠸᠠ ᠶᠢᠨ ᠦᠭᠡ ᠧᠯᠢᠶᠠ ᠳᠤ ᠢᠷᠡᠵᠦ᠄ 3 《ᠴᠢ ᠡ᠊ᠨᠳᠡ ᠡᠴᠡ ᠭᠠᠷᠴᠤ᠂ ᠵᠡᠭᠦᠨᠰᠢ ᠶᠠᠪᠤ᠃ ᠶᠣᠷᠳᠠᠨ ᠭᠣᠣᠯ ᠳᠤ ᠤᠷᠤᠰᠤᠨ ᠣᠷᠣᠳᠠᠭ ᠺᠧᠷᠢᠲ ᠭᠣᠷᠣᠬᠠᠨ ᠤ ᠬᠥᠪᠡᠭᠡᠨ ᠳᠦ ᠨᠢᠭᠤᠭᠳᠠᠵᠤ᠂ 4 ᠭᠣᠷᠣᠬᠠᠨ ᠤ ᠤᠰᠤᠨ ᠠᠴᠠ ᠤᠤᠭᠤᠵᠤ ᠪᠠᠢ᠃ ᠪᠢ ᠴᠢᠮᠠᠶᠢ ᠲᠡᠨᠳᠡ ᠲᠡᠵᠢᠭᠡᠬᠦ ᠶᠢ ᠬᠡᠷᠢᠶᠡ ᠨᠦᠭᠦᠳ ᠲᠦ ᠵᠠᠬᠢᠭᠰᠠᠨ ᠶᠤᠮ》 ᠭᠡᠵᠦ ᠠᠢᠯᠠᠳᠤᠯᠠ᠃ 5 ᠧᠯᠢᠶᠠ ᠶᠣᠬᠣᠸᠠ ᠶᠢᠨ ᠦᠭᠡ ᠶᠢ ᠳᠠᠭᠠᠨ ᠶᠠᠪᠤᠵᠤ᠂ ᠶᠣᠷᠳᠠᠨ ᠳᠤ ᠤᠷᠤᠰᠤᠨ ᠣᠷᠣᠳᠠᠭ ᠺᠧᠷᠢᠲ ᠭᠣᠷᠣᠬᠠᠨ ᠤ ᠬᠥᠪᠡᠭᠡᠨ ᠳᠦ ᠰᠠᠭᠤᠷᠢᠰᠢᠪᠠ᠃ 6 ᠬᠡᠷᠢᠶᠡ ᠨᠦᠭᠦᠳ ᠲᠡᠭᠦᠨ ᠳᠦ ᠥᠷᠯᠥᠭᠡ ᠴᠤ ᠪᠣᠣᠪᠣ ᠪᠣᠯᠣᠨ ᠮᠢᠬᠠ᠂ ᠣᠷᠣᠢ ᠴᠤ ᠪᠣᠣᠪᠣ ᠪᠣᠯᠣᠨ ᠮᠢᠬᠠ ᠠᠪᠴᠢᠷᠠᠳᠠᠭ ᠪᠥᠭᠡᠳ ᠲᠡᠷᠡ ᠪᠡᠷ ᠭᠣᠷᠣᠬᠠᠨ ᠠᠴᠠ ᠤᠤᠭᠤᠳᠠᠭ ᠪᠠᠢᠪᠠ᠃ 7 ᠬᠡᠰᠡᠭ ᠬᠤᠭᠤᠴᠠᠭᠠᠨ ᠤ ᠳᠠᠷᠠᠭᠠ ᠲᠡᠷᠡ ᠭᠣᠷᠣᠬᠠ ᠬᠠᠲᠠᠵᠤ ᠰᠢᠷᠭᠢᠵᠡᠢ᠃ ᠤᠴᠢᠷ ᠨᠢ ᠲᠡᠷᠡ ᠭᠠᠵᠠᠷ ᠲᠤ ᠪᠣᠷᠣᠭᠠᠨ ᠣᠷᠣᠭᠠ ᠦᠭᠡᠢ ᠪᠠᠢᠯᠠ᠃
ᠽᠠᠷᠧᠹᠠᠲ ᠤᠨ ᠪᠡᠯᠪᠡᠰᠦᠨ ᠡᠮᠡᠭᠲᠡᠢ
8 ᠲᠡᠭᠡᠬᠦ ᠳᠦ ᠶᠣᠬᠣᠸᠠ ᠶᠢᠨ ᠦᠭᠡ ᠲᠡᠭᠦᠨ ᠳᠦ ᠢᠷᠡᠵᠦ᠄ 9 《ᠪᠣᠰ᠂ ᠰᠢᠢᠳᠣᠨ ᠨᠤᠲᠤᠭ ᠤᠨ ᠽᠠᠷᠧᠹᠠᠲ ᠤᠷᠤᠭᠤ ᠶᠠᠪᠤᠵᠤ ᠲᠡᠨᠳᠡ ᠪᠡᠨ ᠪᠠᠢ᠃ ᠬᠠᠷᠠ᠂ ᠪᠢ ᠴᠢᠮᠠᠶᠢ ᠲᠡᠵᠢᠭᠡᠬᠦ ᠶᠢ ᠲᠡᠨᠳᠡᠬᠢ ᠶᠢᠨ ᠨᠢᠭᠡ ᠪᠡᠯᠪᠡᠰᠦᠨ ᠡᠮᠡᠭᠲᠡᠢ ᠳᠦ ᠵᠠᠬᠢᠭᠰᠠᠨ ᠶᠤᠮ》 ᠭᠡᠰᠡᠨ ᠳᠦ᠂ 10 ᠧᠯᠢᠶᠠ ᠪᠣᠰᠴᠤ ᠽᠠᠷᠧᠹᠠᠲ ᠤᠷᠤᠭᠤ ᠶᠠᠪᠤᠯᠠ᠃ ᠲᠡᠷᠡ ᠪᠡᠷ ᠬᠣᠲᠠ ᠶᠢᠨ ᠬᠠᠭᠠᠯᠭᠠᠨ ᠳᠤ ᠬᠦᠷᠦᠭᠡᠳ ᠬᠠᠷᠠᠲᠠᠯᠠ ᠲᠡᠨᠳᠡ ᠨᠢᠭᠡᠨ ᠪᠡᠯᠪᠡᠰᠦᠨ ᠡᠮᠡᠭᠲᠡᠢ ᠲᠦᠯᠡᠭᠡ ᠲᠡᠭᠦᠵᠦ ᠪᠠᠢᠪᠠ᠃ ᠧᠯᠢᠶᠠ ᠲᠡᠷᠡ ᠡᠮᠡᠭᠲᠡᠢ ᠶᠢ ᠳᠠᠭᠤᠳᠠᠭᠠᠳ᠄ 《ᠨᠠᠳᠠ ᠳᠤ ᠵᠢᠭᠠᠬᠠᠨ ᠤᠤᠭᠤᠬᠤ ᠤᠰᠤ ᠰᠠᠪᠠᠨ ᠳᠤ ᠬᠢᠵᠦ ᠠᠪᠴᠢᠷᠠᠵᠤ ᠥᠭᠭᠥᠨᠡ ᠤᠤ︖》 ᠭᠡᠵᠦ ᠭᠤᠶᠤᠭᠰᠠᠨ ᠳᠤ᠂ 11 ᠲᠡᠷᠡ ᠡᠮᠡᠭᠲᠡᠢ ᠤᠰᠤ ᠠᠪᠴᠢᠷᠠᠬᠤ ᠪᠠᠷ ᠶᠠᠪᠤᠯᠠ᠃ ᠧᠯᠢᠶᠠ ᠠᠷᠤ ᠠᠴᠠ ᠨᠢ ᠳᠠᠭᠤᠳᠠᠨ᠄ 《ᠨᠠᠳᠠ ᠳᠤ ᠪᠠᠰᠠ ᠵᠦᠰᠦᠮ ᠪᠣᠣᠪᠣ ᠠᠪᠴᠢᠷᠠᠵᠤ ᠥᠭᠭᠥᠨᠡ ᠤᠤ︖》 ᠭᠡᠵᠦ ᠭᠤᠶᠤᠬᠤ ᠳᠤ᠂ 12 ᠲᠡᠷᠡ ᠡᠮᠡᠭᠲᠡᠢ ᠬᠠᠷᠢᠭᠤ ᠳᠤᠨᠢ᠄ 《ᠲᠠᠨ ᠤ ᠪᠤᠷᠬᠠᠨ ᠶᠣᠬᠣᠸᠠ ᠶᠢᠨ ᠠᠮᠢᠳᠤ ᠯᠤᠭᠠ ᠨᠢᠭᠡᠨ ᠠᠳᠠᠯᠢ ᠪᠠᠲᠤ ᠦᠨᠡᠨ ᠭᠡᠪᠡᠯ᠂ ᠨᠠᠳᠠ ᠳᠤ ᠪᠣᠣᠪᠣ ᠪᠠᠢᠬᠤ ᠦᠭᠡᠢ᠃ ᠰᠠᠪᠠᠨ ᠳᠤ ᠮᠢᠨᠢ ᠵᠢᠭᠠᠬᠠᠨ ᠭᠤᠯᠢᠷ᠂ ᠳᠣᠩᠪᠣ ᠳᠤ ᠮᠢᠨᠢ ᠵᠢᠭᠠᠬᠠᠨ ᠲᠣᠰᠣ ᠯᠠ ᠪᠤᠢ᠃ ᠬᠠᠷᠠ᠂ ᠪᠢ ᠲᠦᠯᠡᠭᠡ ᠲᠡᠭᠦᠵᠦ ᠪᠠᠢᠨᠠ᠃ ᠡᠭᠦᠨ ᠢ ᠪᠠᠨ ᠪᠢ ᠭᠡᠷ ᠲᠡᠭᠡᠨ ᠠᠪᠠᠴᠢᠵᠤ᠂ ᠥᠪᠡᠷ ᠲᠡᠭᠡᠨ ᠪᠣᠯᠣᠨ ᠬᠦᠦ ᠳᠡᠭᠡᠨ ᠵᠣᠷᠢᠭᠤᠯᠤᠨ ᠬᠣᠭᠣᠯᠠ ᠬᠢᠵᠦ ᠢᠳᠡᠨᠡ᠃ ᠳᠠᠷᠠᠭᠠ ᠨᠢ ᠪᠢᠳᠡ ᠦᠬᠦᠨᠡ》 ᠭᠡᠪᠡ᠃ 13 ᠧᠯᠢᠶᠠ ᠡᠮᠡᠭᠲᠡᠢ ᠳᠦ᠄ 《ᠪᠦᠦ ᠠᠶᠤ᠃ ᠭᠡᠷ ᠲᠡᠭᠡᠨ ᠶᠠᠪᠤᠵᠤ᠂ ᠬᠡᠯᠡᠭᠰᠡᠨ ᠢᠶᠡᠷ ᠢᠶᠠᠨ ᠬᠢ᠃ ᠬᠠᠷᠢᠨ ᠪᠠᠢᠭᠠ ᠶᠠᠭᠤᠮᠠᠨ ᠠᠴᠠ ᠪᠠᠨ ᠤᠷᠢᠳᠠᠪᠠᠷ ᠨᠠᠳᠠ ᠳᠤ ᠵᠢᠵᠢᠭᠬᠡᠨ ᠪᠣᠣᠪᠣ ᠬᠢᠵᠦ ᠠᠪᠴᠤ ᠢᠷᠡᠭᠰᠡᠨ ᠦ ᠳᠠᠷᠠᠭᠠ᠂ ᠥᠪᠡᠷ ᠲᠡᠭᠡᠨ ᠪᠣᠯᠣᠨ ᠬᠦᠦ ᠳᠡᠭᠡᠨ ᠵᠣᠷᠢᠭᠤᠯᠤᠨ ᠬᠢᠭᠲᠦᠨ᠃ 14 ᠤᠴᠢᠷ ᠨᠢ ᠢᠰᠷᠧᠯ ᠤᠨ ᠪᠤᠷᠬᠠᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ ᠶᠣᠬᠣᠸᠠ ᠡᠨᠡ ᠭᠠᠵᠠᠷ ᠳᠡᠭᠡᠷᠡ ᠪᠣᠷᠣᠭᠠᠨ ᠣᠷᠣᠭᠤᠯᠬᠤ ᠡᠳᠦᠷ ᠬᠦᠷᠲᠡᠯᠡ ᠰᠠᠪᠠᠨ ᠳᠠᠬᠢ ᠭᠤᠯᠢᠷ ᠳᠠᠭᠤᠰᠬᠤ ᠦᠭᠡᠢ᠂ ᠳᠣᠩᠪᠣ ᠳᠠᠬᠢ ᠲᠣᠰᠣ ᠳᠤᠲᠠᠬᠤ ᠦᠭᠡᠢ》 ᠭᠡᠪᠡ᠃ 15 ᠲᠡᠷᠡ ᠡᠮᠡᠭᠲᠡᠢ ᠶᠠᠪᠤᠵᠤ᠂ ᠧᠯᠢᠶᠠ ᠶᠢᠨ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠬᠢᠵᠡᠢ᠃ ᠢᠩᠭᠢᠬᠦ ᠳᠦ ᠲᠡᠷᠡ ᠡᠮᠡᠭᠲᠡᠢ᠂ ᠧᠯᠢᠶᠠ ᠪᠣᠯᠣᠨ ᠲᠡᠷᠡ ᠡᠮᠡᠭᠲᠡᠢ ᠶᠢᠨ ᠭᠡᠷ ᠦᠨ ᠬᠢᠨ ᠤᠳᠠᠭᠠᠨ ᠡᠳᠦᠷ ᠦᠨ ᠲᠤᠷᠰᠢ ᠳᠤ ᠬᠣᠭᠣᠯᠠ ᠤᠮᠳᠠ ᠲᠠᠢ ᠪᠠᠢᠭᠰᠠᠨ ᠪᠥᠭᠡᠳ 16 ᠰᠠᠪᠠᠨ ᠳᠠᠬᠢ ᠭᠤᠯᠢᠷ ᠨᠢ ᠳᠠᠭᠤᠰᠤᠭᠰᠠᠨ ᠦᠭᠡᠢ᠂ ᠳᠣᠩᠪᠣ ᠳᠠᠬᠢ ᠲᠣᠰᠣ ᠨᠢ ᠴᠤ ᠳᠤᠲᠠᠭᠰᠠᠨ ᠦᠭᠡᠢ᠃ ᠡᠨᠡ ᠨᠢ ᠶᠣᠬᠣᠸᠠ ᠶᠢᠨ ᠧᠯᠢᠶᠠ ᠪᠠᠷ ᠳᠠᠮᠵᠢᠭᠤᠯᠤᠨ ᠠᠢᠯᠠᠳᠤᠭᠰᠠᠨ ᠶᠣᠰᠣᠭᠠᠷ ᠪᠣᠯᠵᠠᠢ᠃
17 ᠡᠳᠡᠭᠡᠷ ᠶᠠᠪᠤᠳᠠᠯ ᠤᠨ ᠳᠠᠷᠠᠭᠠ᠂ ᠭᠡᠷ ᠦᠨ ᠡᠵᠡᠭᠲᠡᠢ ᠶᠢᠨ ᠬᠦᠦ ᠡᠪᠡᠳᠴᠢᠯᠠᠵᠡᠢ᠃ ᠬᠦᠦ ᠶᠢᠨ ᠡᠪᠡᠳᠴᠢᠨ ᠬᠦᠨᠳᠦᠷᠡᠭᠰᠡᠭᠡᠷ ᠪᠠᠢᠭᠠᠳ ᠡᠴᠦᠰ ᠲᠡᠭᠡᠨ ᠠᠮᠢᠰᠬᠤᠯ ᠬᠤᠷᠢᠶᠠᠭᠰᠠᠨ ᠪᠠᠢᠨᠠ᠃ 18 ᠲᠡᠷᠡ ᠡᠮᠡᠭᠲᠡᠢ ᠧᠯᠢᠶᠠ ᠳᠤ᠄ 《ᠪᠤᠷᠬᠠᠨ ᠤ ᠬᠥᠮᠦᠨ ᠡ᠂ ᠪᠢ ᠲᠠᠨ ᠳᠤ ᠶᠠᠮᠠᠷ ᠬᠠᠮᠢᠶᠠ ᠲᠠᠢ ᠪᠣᠯᠣᠭᠠᠳ ᠲᠠ ᠡ᠊ᠨᠳᠡ ᠢᠷᠡᠵᠦ ᠮᠢᠨᠦ ᠨᠢᠭᠦᠯ ᠢ ᠰᠠᠨᠠᠭᠤᠯᠤᠨ ᠬᠦᠦ ᠶᠢ ᠮᠢᠨᠢ ᠦᠬᠦᠯ ᠳᠦ ᠬᠦᠷᠭᠡᠬᠦ ᠨᠢ ᠪᠤᠢ︖》 ᠭᠡᠬᠦ ᠳᠦᠨᠢ᠂ 19 ᠧᠯᠢᠶᠠ ᠲᠡᠭᠦᠨ ᠳᠦ᠄ 《ᠬᠦᠦ ᠪᠡᠨ ᠨᠠᠳᠠ ᠳᠤ ᠠᠪᠤᠭᠠᠳ ᠢᠷᠡ》 ᠭᠡᠪᠡ᠃ ᠲᠡᠷᠡ ᠪᠡᠷ ᠡᠮᠡᠭᠲᠡᠢ ᠶᠢᠨ ᠲᠡᠪᠡᠷᠢ ᠡᠴᠡ ᠬᠦᠦ ᠶᠢ ᠨᠢ ᠠᠪᠤᠭᠠᠳ ᠥᠪᠡᠷ ᠦᠨ ᠰᠠᠭᠤᠵᠤ ᠪᠤᠢ ᠳᠡᠭᠡᠳᠦ ᠳᠠᠪᠬᠤᠷ ᠤᠨ ᠥᠷᠥᠭᠡᠨ ᠳᠦ ᠠᠪᠠᠴᠢᠵᠤ ᠣᠷᠣ ᠳᠡᠭᠡᠷᠡ ᠪᠡᠨ ᠬᠡᠪᠲᠡᠭᠦᠯᠵᠡᠢ᠃ 20 ᠲᠡᠷᠡ ᠶᠣᠬᠣᠸᠠ ᠶᠢ ᠳᠠᠭᠤᠳᠠᠨ᠄ 《ᠮᠢᠨᠦ ᠪᠤᠷᠬᠠᠨ ᠶᠣᠬᠣᠸᠠ᠂ ᠲᠠ ᠮᠢᠨᠦ ᠪᠠᠭᠤᠭᠰᠠᠨ ᠡᠨᠡ ᠭᠡᠷ ᠦᠨ ᠪᠡᠯᠪᠡᠰᠦᠨ ᠡᠮᠡᠭᠲᠡᠢ ᠳᠦ ᠴᠤ ᠭᠠᠢ ᠪᠠᠭᠤᠯᠭᠠᠵᠤ᠂ ᠬᠦᠦ ᠶᠢ ᠨᠢ ᠦᠬᠦᠯ ᠳᠦ ᠬᠦᠷᠭᠡᠭᠰᠡᠨ ᠤᠤ︖》 ᠭᠡᠯᠡ᠃ 21 ᠲᠡᠭᠡᠭᠡᠳ ᠬᠦᠦ ᠶᠢᠨ ᠳᠡᠭᠡᠷᠡ ᠭᠤᠷᠪᠠᠨᠲᠠ ᠠᠯᠳᠠᠯᠠᠨ ᠬᠡᠪᠲᠡᠭᠡᠳ ᠶᠣᠬᠣᠸᠠ ᠶᠢ ᠳᠠᠭᠤᠳᠠᠨ᠄ 《ᠮᠢᠨᠦ ᠪᠤᠷᠬᠠᠨ ᠶᠣᠬᠣᠸᠠ᠂ ᠡᠨᠡ ᠬᠦᠦ ᠶᠢᠨ ᠠᠮᠢ ᠶᠢ ᠳᠣᠲᠣᠷᠠ ᠨᠢ ᠪᠤᠴᠠᠭᠠᠨ ᠥᠭᠭᠥᠭᠡᠴᠢ》 ᠭᠡᠵᠦ ᠭᠤᠶᠤᠪᠠ᠃ 22 ᠶᠣᠬᠣᠸᠠ ᠧᠯᠢᠶᠠ ᠶᠢᠨ ᠳᠠᠭᠤ ᠶᠢ ᠰᠣᠨᠣᠰᠴᠤ᠂ ᠬᠦᠦ ᠶᠢᠨ ᠠᠮᠢ ᠶᠢ ᠳᠣᠲᠣᠷᠠ ᠨᠢ ᠪᠤᠴᠠᠭᠠᠭᠰᠠᠨ ᠳᠤ᠂ ᠬᠦᠦ ᠠᠮᠢᠯᠠᠪᠠ᠃ 23 ᠧᠯᠢᠶᠠ ᠬᠦᠦ ᠶᠢ ᠠᠪᠤᠭᠠᠳ ᠳᠡᠭᠡᠳᠦ ᠳᠠᠪᠬᠤᠷ ᠤᠨ ᠥᠷᠥᠭᠡᠨ ᠡᠴᠡ ᠪᠠᠭᠤᠨ ᠭᠡᠷ ᠲᠤᠨᠢ ᠣᠷᠣᠵᠤ᠂ ᠡᠬᠡ ᠳᠦᠨᠢ ᠥᠭᠪᠡ᠃ ᠧᠯᠢᠶᠠ᠄ 《ᠬᠠᠷᠠ᠂ ᠬᠦᠦ ᠴᠢᠨᠢ ᠠᠮᠢᠳᠤ ᠪᠠᠢᠨᠠ︕》 ᠭᠡᠬᠦ ᠳᠦ᠂ 24 ᠡᠮᠡᠭᠲᠡᠢ᠄ 《ᠣᠳᠣ ᠯᠠ ᠪᠢ ᠲᠠ ᠪᠣᠯ ᠪᠤᠷᠬᠠᠨ ᠤ ᠬᠥᠮᠦᠨ ᠭᠡᠳᠡᠭ ᠢ᠂ ᠪᠠᠰᠠ ᠲᠠᠨ ᠤ ᠠᠮᠠᠨ ᠳᠤ ᠪᠤᠢ ᠶᠣᠬᠣᠸᠠ ᠶᠢᠨ ᠦᠭᠡ ᠦᠨᠡᠨ ᠭᠡᠳᠡᠭ ᠢ ᠣᠢᠯᠠᠭᠠᠯᠠ》 ᠭᠡᠵᠦ ᠬᠡᠯᠡᠵᠡᠢ᠃