ᠬᠠᠭᠠᠳ ᠤᠨ ᠳᠡᠭᠡᠳᠦ ᠭᠤᠷᠪᠠ
ᠰᠣᠯᠣᠮᠣᠨ ᠮᠡᠷᠭᠡᠨ ᠤᠬᠠᠭᠠᠨ ᠭᠤᠶᠤᠪᠠ
1 ᠰᠣᠯᠣᠮᠣᠨ ᠶᠧᠵᠢᠫᠲ ᠤᠨ ᠬᠠᠭᠠᠨ ᠹᠠᠷᠠᠣ᠋ ᠲᠠᠢ ᠨᠠᠢᠷᠠᠮᠳᠠᠵᠤ᠂ ᠲᠡᠭᠦᠨ ᠦ ᠥᠬᠢᠨ ᠢ ᠪᠠᠭᠤᠯᠭᠠᠨ ᠠᠪᠤᠪᠠ᠃ ᠰᠣᠯᠣᠮᠣᠨ ᠲᠡᠭᠦᠨ ᠢ ᠳ᠋ᠠᠸᠢᠳ᠋ ᠤᠨ ᠬᠣᠲᠠ ᠳᠤ ᠰᠠᠭᠤᠯᠭᠠᠭᠰᠠᠨ ᠪᠥᠭᠡᠳ ᠥᠪᠡᠷ ᠦᠨ ᠣᠷᠳᠣᠨ᠂ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡ ᠪᠣᠯᠣᠨ ᠶᠧᠷᠦ᠋ᠰᠠᠯᠧᠮ ᠬᠣᠲᠠ ᠶᠢᠨ ᠬᠡᠷᠡᠮ ᠢ ᠪᠠᠷᠢᠵᠤ ᠳᠠᠭᠤᠰᠬᠠᠲᠠᠯᠠ ᠲᠡᠭᠦᠨ ᠢ ᠲᠡᠨᠳᠡ ᠪᠠᠢᠯᠭᠠᠪᠠ᠃ 2 ᠲᠡᠷᠡ ᠡᠳᠦᠷ ᠪᠣᠯᠲᠠᠯᠠ ᠶᠣᠬᠣᠸᠠ ᠶᠢᠨ ᠨᠡᠷᠡ ᠳᠦ ᠵᠣᠷᠢᠭᠤᠯᠤᠨ ᠪᠣᠰᠬᠠᠭᠰᠠᠨ ᠥᠷᠭᠥᠭᠡ ᠪᠠᠢᠭᠠ ᠦᠭᠡᠢ ᠤᠴᠢᠷ ᠠᠴᠠ ᠠᠷᠠᠳ ᠲᠦᠮᠡᠨ ᠮᠥᠷᠭᠥᠯ ᠦᠨ ᠮᠠᠨᠳᠠᠯ ᠤᠳ ᠳᠡᠭᠡᠷᠡ ᠲᠠᠬᠢᠯ ᠡᠷᠭᠦᠭᠰᠡᠭᠡᠷ ᠪᠠᠢᠵᠠᠢ᠃
3 ᠰᠣᠯᠣᠮᠣᠨ ᠶᠣᠬᠣᠸᠠ ᠶᠢ ᠬᠠᠢᠷᠠᠯᠠᠨ᠂ ᠡᠴᠢᠭᠡ ᠳ᠋ᠠᠸᠢᠳ᠋ ᠤᠨ ᠢᠶᠠᠨ ᠲᠣᠭᠲᠠᠭᠠᠯ ᠤᠳ ᠢ ᠳᠠᠭᠠᠭᠰᠠᠨ ᠪᠣᠯᠪᠠᠴᠤ ᠮᠥᠷᠭᠥᠯ ᠦᠨ ᠮᠠᠨᠳᠠᠯ ᠳᠡᠭᠡᠷᠡ ᠲᠠᠬᠢᠯ ᠡᠷᠭᠦᠵᠦ ᠤᠲᠤᠯᠭᠠ ᠤᠭᠤᠭᠢᠭᠤᠯᠳᠠᠭ ᠪᠠᠢᠵᠠᠢ᠃ 4 ᠭᠢᠪᠧᠶᠣᠨ ᠳᠠᠬᠢ ᠮᠥᠷᠭᠥᠯ ᠦᠨ ᠮᠠᠨᠳᠠᠯ ᠨᠢ ᠮᠠᠰᠢ ᠲᠣᠮᠣ ᠪᠠᠢᠭᠰᠠᠨ ᠤᠴᠢᠷ ᠠᠴᠠ ᠬᠠᠭᠠᠨ ᠲᠠᠬᠢᠯ ᠡᠷᠭᠦᠬᠦ ᠪᠡᠷ ᠲᠡᠨᠳᠡ ᠣᠴᠢᠵᠠᠢ᠃ ᠰᠣᠯᠣᠮᠣᠨ ᠲᠡᠷᠡ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠮᠢᠩ᠋ᠭᠠᠨ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠡᠷᠭᠦᠵᠦ ᠪᠠᠢᠪᠠ᠃ 5 ᠲᠡᠢᠨ ᠬᠦ ᠭᠢᠪᠧᠶᠣᠨ ᠳᠤ ᠪᠠᠢᠬᠤ ᠳᠤᠨᠢ ᠶᠣᠬᠣᠸᠠ ᠨᠢᠭᠡᠨ ᠰᠥᠨᠢ ᠰᠣᠯᠣᠮᠣᠨ ᠤ ᠵᠡᠭᠦᠳᠦᠨ ᠳᠦ ᠦᠵᠡᠭᠳᠡᠪᠡ᠃ ᠪᠤᠷᠬᠠᠨ᠄ 《ᠴᠢ ᠨᠠᠳᠠ ᠠᠴᠠ ᠶᠠᠭᠤ ᠠᠪᠬᠤ ᠪᠤᠢ︖ ᠲᠡᠭᠦᠨ ᠢ ᠪᠠᠨ ᠭᠤᠶᠤ》 ᠭᠡᠵᠦ ᠠᠢᠯᠠᠳᠬᠤ ᠳᠤ᠂ 6 ᠰᠣᠯᠣᠮᠣᠨ᠄ 《ᠲᠠᠨ ᠤ ᠵᠠᠷᠤᠴᠠ᠂ ᠮᠢᠨᠦ ᠡᠴᠢᠭᠡ ᠳ᠋ᠠᠸᠢᠳ᠋ ᠲᠠᠨ ᠤ ᠡᠮᠦᠨᠡ ᠦᠨᠡᠨᠴᠢ ᠪᠠᠢᠵᠤ᠂ ᠵᠥᠪ ᠰᠢᠳᠤᠷᠭᠤ ᠰᠡᠳᠬᠢᠯ ᠢᠶᠠᠷ ᠲᠠᠨ ᠲᠠᠢ ᠬᠠᠮᠲᠤ ᠠᠯᠬᠤᠬᠤ ᠳᠤ᠂ ᠲᠠ ᠠᠭᠤᠤ ᠬᠠᠢᠷᠠ ᠡᠨᠡᠷᠢᠯ ᠢᠶᠠᠨ ᠲᠡᠭᠦᠨ ᠳᠦ ᠬᠦᠷᠲᠡᠭᠡᠭᠰᠡᠨ ᠪᠥᠭᠡᠳ ᠡᠨᠡ ᠠᠭᠤᠤ ᠬᠠᠢᠷᠠ ᠡᠨᠡᠷᠢᠯ ᠢᠶᠠᠨ ᠪᠠᠢᠯᠭᠠᠭᠰᠠᠭᠠᠷ᠂ ᠲᠡᠭᠦᠨ ᠳᠦ ᠥᠭᠭᠥᠭᠰᠡᠨ ᠬᠦᠦ ᠨᠠᠮᠠᠶᠢ ᠥᠨᠥᠳᠥᠷ ᠲᠡᠭᠦᠨ ᠦ ᠰᠡᠨᠲᠢ ᠳᠤ ᠰᠠᠭᠤᠯᠭᠠᠭᠰᠠᠨ ᠶᠤᠮ᠃ 7 ᠶᠣᠬᠣᠸᠠ ᠪᠤᠷᠬᠠᠨ ᠮᠢᠨᠢ ᠡ᠂ ᠡᠳᠦᠭᠡ ᠲᠠ ᠵᠠᠷᠤᠴᠠ ᠨᠠᠮᠠ ᠪᠠᠨ ᠡᠴᠢᠭᠡ ᠳ᠋ᠠᠸᠢᠳ᠋ ᠤᠨ ᠮᠢᠨᠢ ᠣᠷᠣᠨ ᠳᠤ ᠬᠠᠭᠠᠨ ᠪᠣᠯᠭᠠᠭᠰᠠᠨ ᠪᠣᠯᠪᠠᠴᠤ ᠪᠢ ᠵᠠᠯᠠᠭᠤ ᠪᠠᠭᠠ ᠪᠣᠯᠬᠣᠷ ᠬᠡᠷᠬᠢᠨ ᠣᠷᠣᠵᠤ ᠭᠠᠷᠬᠤ ᠪᠠᠨ ᠴᠤ ᠮᠡᠳᠡᠬᠦ ᠦᠭᠡᠢ ᠪᠢᠯᠡ᠃ 8 ᠲᠠᠨ ᠤ ᠵᠠᠷᠤᠴᠠ ᠪᠢ ᠲᠠᠨ ᠤ ᠰᠣᠩ᠋ᠭᠣᠭᠰᠠᠨ᠂ ᠲᠣᠭᠠᠯᠠᠵᠤ ᠪᠦᠷᠢᠳᠬᠡᠰᠢ ᠦᠭᠡᠢ ᠶᠡᠬᠡ ᠠᠷᠠᠳ ᠲᠦᠮᠡᠨ ᠦ ᠭᠣᠣᠯ ᠳᠤᠮᠳᠠ ᠪᠠᠢᠨᠠ᠂ 9 ᠠᠷᠠᠳ ᠲᠦᠮᠡᠨ ᠢ ᠵᠠᠬᠢᠷᠬᠤ ᠳᠠᠭᠠᠨ ᠰᠠᠢᠨ ᠮᠠᠭᠤ ᠶᠢ ᠢᠯᠭᠠᠬᠤ ᠬᠡᠷᠡᠭ ᠲᠡᠢ ᠤᠴᠢᠷ ᠠᠴᠠ ᠣᠢᠯᠠᠭᠠᠬᠤ 1 ᠤᠬᠠᠭᠠᠨ ᠢ ᠵᠠᠷᠤᠴᠠ ᠨᠠᠳᠠ ᠳᠠᠭᠠᠨ ᠰᠣᠶᠣᠷᠬᠠᠭᠠᠴᠢ᠃ ᠡᠰᠡ ᠪᠥᠭᠡᠰᠦ ᠲᠠᠨ ᠤ ᠡᠢᠮᠦ ᠠᠭᠤᠤ ᠠᠷᠠᠳ ᠲᠦᠮᠡᠨ ᠢ ᠬᠡᠨ ᠵᠠᠬᠢᠷᠴᠤ 2 ᠴᠢᠳᠠᠬᠤ ᠪᠢᠯᠡ︖》 ᠭᠡᠪᠡ᠃
10 ᠰᠣᠯᠣᠮᠣᠨ ᠤ ᠡᠨᠡ ᠬᠦ ᠭᠤᠶᠤᠯᠲᠠ ᠶᠣᠬᠣᠸᠠ ᠶᠢᠨ ᠲᠠᠭᠠᠯᠠᠯ ᠢ ᠣᠯᠪᠠ᠃ 11 ᠲᠡᠢᠮᠦ ᠡᠴᠡ ᠪᠤᠷᠬᠠᠨ ᠲᠡᠭᠦᠨ ᠳᠦ ᠠᠢᠯᠠᠳᠤᠨ᠄ 《ᠴᠢ ᠥᠪᠡᠷ ᠦᠨ ᠢᠶᠠᠨ ᠲᠥᠯᠥᠭᠡ ᠤᠷᠲᠤ ᠨᠠᠰᠤ ᠪᠤᠶᠤ ᠡᠳ᠋ ᠪᠠᠶᠠᠯᠢᠭ᠂ ᠡᠰᠡᠪᠡᠯ ᠳᠠᠢᠰᠤᠨ ᠨᠤᠭᠤᠳ ᠤᠨ ᠢᠶᠠᠨ ᠠᠮᠢ ᠶᠢ ᠠᠪᠬᠤ ᠶᠢ ᠭᠤᠶᠤᠯ ᠦᠭᠡᠢ᠂ ᠬᠠᠷᠢᠨ ᠰᠢᠳᠤᠷᠭᠤ ᠶᠣᠰᠣ ᠶᠢ ᠣᠢᠯᠠᠭᠠᠬᠤ ᠣᠢᠯᠠᠭᠠᠯᠲᠠ ᠶᠢ ᠭᠤᠶᠤᠭᠰᠠᠨ ᠪᠠᠢᠨᠠ᠃ 12 ᠬᠠᠷᠠᠭᠲᠤᠨ᠂ ᠪᠢ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠴᠢᠨᠢ ᠪᠡᠶᠡᠯᠡᠭᠦᠯᠦᠶᠡ᠃ ᠬᠠᠷᠠᠭᠲᠤᠨ᠂ ᠪᠢ ᠴᠢᠮᠠ ᠳᠤ ᠮᠡᠷᠭᠡᠨ ᠤᠬᠠᠭᠠᠨ ᠬᠢᠭᠡᠳ ᠣᠢᠯᠠᠭᠠᠯᠲᠠ ᠶᠢ ᠥᠭᠭᠥᠶᠡ︕ ᠴᠢᠮᠠ ᠲᠠᠢ ᠠᠳᠠᠯᠢ ᠬᠥᠮᠦᠨ ᠤᠷᠢᠳᠤ ᠨᠢ ᠪᠠᠢᠭᠰᠠᠨ ᠦᠭᠡᠢ᠂ ᠳᠠᠷᠠᠭᠠ ᠨᠢ ᠴᠤ ᠭᠠᠷᠬᠤ ᠦᠭᠡᠢ᠃ 13 ᠡᠭᠦᠨ ᠡᠴᠡ ᠭᠠᠳᠠᠨᠠ ᠪᠢ ᠴᠢᠨᠦ ᠭᠤᠶᠤᠭᠠ ᠦᠭᠡᠢ ᠡᠳ᠋ ᠪᠠᠶᠠᠯᠢᠭ ᠪᠣᠯᠣᠨ ᠠᠯᠳᠠᠷ ᠬᠦᠨᠳᠦ ᠶᠢ ᠴᠤ ᠴᠢᠮᠠ ᠳᠤ ᠥᠭᠭᠥᠶᠡ᠃ ᠴᠢᠨᠦ ᠠᠮᠢᠳᠤᠷᠠᠯ ᠤᠨ ᠪᠦᠬᠦ ᠡᠳᠦᠷ ᠤᠳ ᠲᠤ ᠴᠢᠮᠠ ᠲᠠᠢ ᠠᠳᠠᠯᠢ ᠬᠠᠭᠠᠨ ᠪᠠᠢᠬᠤ ᠦᠭᠡᠢ ᠪᠣᠯᠣᠨᠠ᠃ 14 ᠬᠡᠷᠪᠡ ᠴᠢ ᠡᠴᠢᠭᠡ ᠳ᠋ᠠᠸᠢᠳ᠋ ᠤᠨ ᠢᠶᠠᠨ ᠠᠯᠬᠤᠭᠰᠠᠨ ᠰᠢᠭ᠋ ᠮᠢᠨᠦ ᠲᠣᠭᠲᠠᠭᠠᠯ᠂ ᠲᠤᠰᠢᠶᠠᠯ ᠤᠳ ᠢ ᠰᠠᠬᠢᠨ᠂ ᠮᠢᠨᠦ ᠵᠠᠮ ᠢᠶᠠᠷ ᠠᠯᠬᠤᠪᠠᠯ᠂ ᠪᠢ ᠴᠢᠨᠦ ᠠᠮᠢ ᠠᠮᠢᠳᠤᠷᠠᠯ ᠢ ᠴᠤ ᠤᠷᠲᠤᠰᠬᠠᠬᠤ ᠪᠣᠯᠣᠨᠠ》 ᠭᠡᠯᠡ᠃
15 ᠲᠡᠭᠡᠭᠡᠳ ᠰᠣᠯᠣᠮᠣᠨ ᠰᠡᠷᠢᠭᠡᠳ ᠦᠵᠡᠬᠦ ᠳᠦ᠂ ᠡᠨᠡ ᠨᠢ ᠵᠡᠭᠦᠳᠦ ᠪᠠᠢᠯᠠ᠃ ᠲᠡᠷᠡ ᠶᠧᠷᠦ᠋ᠰᠠᠯᠧᠮ ᠳᠤ ᠪᠤᠴᠠᠭᠰᠠᠨ ᠤ ᠪᠠᠨ ᠳᠠᠷᠠᠭᠠ᠂ ᠶᠣᠬᠣᠸᠠ ᠶᠢᠨ ᠭᠡᠷᠡ ᠶᠢᠨ ᠠᠪᠳᠠᠷᠠ ᠶᠢᠨ ᠡᠮᠦᠨᠡ ᠵᠣᠭᠰᠣᠵᠤ᠂ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠤᠳ ᠪᠣᠯᠣᠨ ᠡᠪ ᠦᠨ ᠲᠠᠬᠢᠯ ᠤᠳ ᠢ ᠡᠷᠭᠦᠭᠡᠳ᠂ ᠪᠦᠬᠦ ᠵᠠᠷᠤᠴᠠ ᠨᠠᠷ ᠲᠠᠭᠠᠨ ᠵᠣᠷᠢᠭᠤᠯᠤᠨ ᠨᠠᠢᠷ ᠬᠢᠭᠰᠡᠨ ᠪᠠᠢᠯᠠ᠃
ᠮᠡᠷᠭᠡᠨ ᠰᠢᠭᠦᠯᠲᠡ
16 ᠡᠭᠦᠨ ᠦ ᠳᠠᠷᠠᠭᠠ᠂ ᠬᠣᠶᠠᠷ ᠶᠠᠩ᠋ᠬᠠᠨ ᠡᠮᠡᠭᠲᠡᠢ ᠬᠠᠭᠠᠨ ᠤᠷᠤᠭᠤ ᠢᠷᠡᠵᠦ᠂ ᠲᠡᠭᠦᠨ ᠦ ᠡᠮᠦᠨᠡ ᠵᠣᠭᠰᠣᠪᠠ᠃ 17 ᠨᠢᠭᠡ ᠡᠮᠡᠭᠲᠡᠢ ᠨᠢ᠄ 《ᠡᠵᠡᠨ ᠮᠢᠨᠢ᠂ ᠡᠨᠡ ᠡᠮᠡᠭᠲᠡᠢ ᠪᠢᠳᠡ ᠬᠣᠶᠠᠷ ᠨᠢᠭᠡ ᠭᠡᠷ ᠲᠦ ᠠᠮᠢᠳᠤᠷᠠᠳᠠᠭ ᠶᠤᠮ᠃ ᠡᠨᠡ ᠡᠮᠡᠭᠲᠡᠢ ᠨᠠᠳᠠ ᠲᠠᠢ ᠬᠠᠮᠲᠤ ᠭᠡᠷ ᠲᠦ ᠪᠠᠢᠬᠤ ᠳᠤ ᠪᠢ ᠬᠡᠦᠬᠡᠳ ᠲᠥᠷᠥᠭᠦᠯᠦᠭᠰᠡᠨ ᠪᠢᠯᠡ᠃ 18 ᠨᠠᠮᠠᠶᠢ ᠬᠡᠦᠬᠡᠳ ᠲᠥᠷᠥᠭᠦᠯᠦᠭᠰᠡᠨ ᠡᠴᠡ ᠬᠣᠢᠰᠢ ᠭᠤᠷᠪᠠᠨ ᠡᠳᠦᠷ ᠦᠨ ᠳᠠᠷᠠᠭᠠ ᠡᠨᠡ ᠡᠮᠡᠭᠲᠡᠢ ᠪᠠᠰᠠ ᠬᠡᠦᠬᠡᠳ ᠲᠥᠷᠥᠭᠦᠯᠵᠡᠢ᠃ ᠪᠢᠳᠡ ᠬᠠᠮᠲᠤ ᠪᠠᠢᠭᠰᠠᠨ ᠪᠥᠭᠡᠳ ᠭᠡᠷ ᠲᠦ ᠪᠢᠳᠡᠨ ᠡᠴᠡ ᠥᠭᠡᠷᠡ ᠭᠠᠳᠠᠨᠠ ᠶᠢᠨ ᠬᠥᠮᠦᠨ ᠪᠠᠢᠭᠰᠠᠨ ᠦᠭᠡᠢ᠂ ᠵᠥᠪᠬᠡᠨ ᠪᠢᠳᠡ ᠬᠣᠶᠠᠷ ᠯᠠ ᠭᠡᠷ ᠲᠦ ᠪᠠᠢᠵᠤ ᠪᠠᠢᠬᠤ ᠳᠤ᠂ 19 ᠡᠨᠡ ᠡᠮᠡᠭᠲᠡᠢ ᠤᠨᠲᠠᠵᠤ ᠪᠠᠢᠭᠠᠳ ᠬᠡᠦᠬᠡᠳ ᠢᠶᠡᠨ ᠳᠠᠷᠤᠭᠰᠠᠨ ᠢᠶᠠᠷ ᠬᠦᠦ ᠨᠢ ᠲᠡᠷᠡ ᠰᠥᠨᠢ ᠥᠩᠭᠡᠷᠡᠭᠰᠡᠨ ᠪᠢᠯᠡ᠃ 20 ᠲᠡᠭᠡᠭᠡᠳ ᠡᠨᠡ ᠡᠮᠡᠭᠲᠡᠢ ᠰᠥᠨᠢ ᠳᠤᠮᠳᠠ ᠪᠣᠰᠴᠤ᠂ ᠲᠠᠨ ᠤ ᠰᠢᠪᠡᠭᠴᠢᠨ ᠨᠠᠮᠠᠶᠢ ᠤᠨᠲᠠᠵᠤ ᠪᠠᠢᠬᠤ ᠳᠤ ᠮᠢᠨᠦ ᠬᠠᠵᠠᠭᠤ ᠠᠴᠠ ᠬᠦᠦ ᠶᠢ ᠮᠢᠨᠢ ᠠᠪᠤᠭᠠᠳ ᠥᠪᠡᠷ ᠦᠨ ᠢᠶᠠᠨ ᠡᠪᠦᠷ ᠲᠦ ᠬᠢᠵᠦ᠂ ᠥᠪᠡᠷ ᠦᠨ ᠢᠶᠠᠨ ᠦᠬᠦᠭᠰᠡᠨ ᠬᠡᠦᠬᠡᠳ ᠢ ᠮᠢᠨᠦ ᠡᠪᠦᠷ ᠲᠦ ᠬᠢᠭᠰᠡᠨ ᠪᠠᠢᠯᠠ᠃ 21 ᠥᠷᠯᠥᠭᠡ ᠪᠢ ᠬᠦᠦ ᠪᠡᠨ ᠬᠥᠬᠥᠭᠦᠯᠬᠦ ᠭᠡᠵᠦ ᠪᠣᠰᠣᠭᠠᠳ ᠬᠠᠷᠠᠬᠤ ᠳᠤ᠂ ᠲᠡᠷᠡ ᠦᠬᠦᠴᠢᠬᠡᠭᠰᠡᠨ ᠪᠠᠢᠪᠠ᠃ ᠬᠠᠷᠢᠨ ᠥᠷᠯᠥᠭᠡ ᠪᠢ ᠬᠡᠦᠬᠡᠳ ᠢ ᠯᠠᠪᠯᠠᠬᠤ ᠳᠤ᠂ ᠲᠡᠷᠡ ᠨᠢ ᠮᠢᠨᠦ ᠬᠦᠦ ᠪᠢᠰᠢ ᠪᠠᠢᠭᠰᠠᠨ》 ᠭᠡᠲᠡᠯᠡ᠂ 22 ᠨᠥᠭᠥᠭᠡ ᠡᠮᠡᠭᠲᠡᠢ᠄ 《ᠦᠭᠡᠢ︕ ᠠᠮᠢᠳᠤ ᠨᠢ ᠮᠢᠨᠦ ᠬᠦᠦ᠂ ᠦᠬᠦᠭᠰᠡᠨ ᠨᠢ ᠴᠢᠨᠦ ᠬᠦᠦ》 ᠭᠡᠵᠡᠢ᠃ ᠬᠠᠷᠢᠨ ᠡᠬᠢᠨ ᠤ ᠡᠮᠡᠭᠲᠡᠢ᠄ 《ᠦᠭᠡᠢ︕ ᠦᠬᠦᠭᠰᠡᠨ ᠨᠢ ᠴᠢᠨᠦ ᠬᠦᠦ᠂ ᠠᠮᠢᠳᠤ ᠨᠢ ᠮᠢᠨᠦ ᠬᠦᠦ》 ᠭᠡᠵᠦ ᠪᠠᠢᠯᠠ᠃ ᠲᠡᠳᠡ ᠬᠠᠭᠠᠨ ᠤ ᠡᠮᠦᠨᠡ ᠡᠢᠨ ᠬᠦ ᠬᠡᠷᠡᠭᠦᠯ ᠪᠣᠯᠵᠠᠢ᠃
23 ᠬᠠᠭᠠᠨ᠄ 《ᠨᠢᠭᠡ ᠨᠢ᠄ 〈ᠠᠮᠢᠳᠤ ᠨᠢ ᠮᠢᠨᠦ ᠬᠦᠦ᠂ ᠦᠬᠦᠭᠰᠡᠨ ᠨᠢ ᠴᠢᠨᠦ ᠬᠦᠦ〉 ᠭᠡᠵᠦ ᠬᠡᠯᠡᠵᠦ ᠪᠠᠢᠬᠤ ᠳᠤ᠂ ᠨᠥᠭᠥᠭᠡ ᠨᠢ᠄ 〈ᠦᠭᠡᠢ︕ ᠦᠬᠦᠭᠰᠡᠨ ᠨᠢ ᠴᠢᠨᠦ ᠬᠦᠦ᠂ ᠠᠮᠢᠳᠤ ᠪᠤᠢ ᠨᠢ ᠮᠢᠨᠦ ᠬᠦᠦ〉 ᠭᠡᠳ ᠪᠠᠢᠨᠠ》 ᠬᠡᠮᠡᠭᠡᠳ᠂ 24 《ᠨᠠᠳᠠ ᠳᠤ ᠢᠯᠳᠦ ᠠᠪᠤᠭᠠᠳ ᠢᠷᠡ》 ᠭᠡᠰᠡᠨ ᠳᠦ᠂ ᠲᠦᠰᠢᠮᠡᠳ ᠨᠢ ᠬᠠᠭᠠᠨ ᠳᠤ ᠢᠯᠳᠦ ᠠᠪᠴᠢᠷᠠᠪᠠ᠃ 25 ᠬᠠᠭᠠᠨ᠄ 《ᠠᠮᠢᠳᠤ ᠪᠤᠢ ᠲᠡᠷᠡ ᠬᠡᠦᠬᠡᠳ ᠢ ᠬᠣᠶᠠᠷ ᠬᠤᠪᠢᠶᠠᠭᠠᠳ᠂ ᠲᠠᠯᠠ ᠶᠢ ᠨᠢ ᠡᠨᠡ ᠡᠮᠡᠭᠲᠡᠢ ᠳᠦ᠂ ᠲᠠᠯᠠ ᠶᠢ ᠨᠢ ᠨᠥᠭᠥᠭᠡ ᠡᠮᠡᠭᠲᠡᠢ ᠳᠦ ᠥᠭᠭᠥᠭᠲᠦᠨ》 ᠭᠡᠵᠡᠢ᠃ 26 ᠠᠮᠢᠳᠤ ᠪᠤᠢ ᠬᠦᠦ ᠶᠢᠨ ᠡᠬᠡ ᠨᠢ ᠬᠦᠦ ᠪᠡᠨ ᠥᠷᠥᠪᠳᠦᠭᠰᠡᠨ ᠤᠴᠢᠷ ᠠᠴᠠ ᠬᠠᠭᠠᠨ ᠳᠤ ᠭᠤᠶᠤᠨ᠄ 《ᠥ ᠡᠵᠡᠨ ᠮᠢᠨᠢ᠂ ᠠᠮᠢᠳᠤ ᠪᠤᠢ ᠬᠡᠦᠬᠡᠳ ᠢ ᠲᠡᠷᠡ ᠡᠮᠡᠭᠲᠡᠢ ᠳᠦ ᠥᠭᠴᠢᠬᠡ᠃ ᠲᠡᠭᠦᠨ ᠢ ᠪᠦᠦ ᠯᠠ ᠠᠯᠠᠭᠠᠴᠢ︕》 ᠭᠡᠵᠦ ᠪᠠᠢᠬᠤ ᠳᠤ᠂ ᠨᠥᠭᠥᠭᠡ ᠡᠮᠡᠭᠲᠡᠢ ᠨᠢ᠄ 《ᠲᠡᠷᠡ ᠮᠢᠨᠦᠬᠢ ᠴᠤ ᠪᠣᠯᠬᠤ ᠦᠭᠡᠢ᠂ ᠴᠢᠨᠦᠬᠢ ᠴᠤ ᠪᠣᠯᠬᠤ ᠦᠭᠡᠢ᠃ ᠲᠡᠭᠦᠨ ᠢ ᠬᠤᠪᠢᠶᠠ》 ᠭᠡᠵᠦ ᠬᠡᠯᠡᠵᠡᠢ᠃ 27 ᠬᠠᠭᠠᠨ᠄ 《ᠡᠬᠢᠨ ᠤ ᠡᠮᠡᠭᠲᠡᠢ ᠳᠦ ᠠᠮᠢᠳᠤ ᠬᠡᠦᠬᠡᠳ ᠢ ᠥᠭᠭᠥᠭᠲᠦᠨ᠃ ᠬᠦᠦ ᠶᠢ ᠶᠠᠭᠠᠬᠢᠭᠰᠠᠨ ᠴᠤ ᠠᠯᠠᠵᠤ ᠪᠣᠯᠬᠤ ᠦᠭᠡᠢ᠃ ᠲᠡᠭᠦᠨ ᠦ ᠡᠬᠡ ᠨᠢ ᠲᠡᠷᠡ ᠮᠥᠨ》 ᠭᠡᠳᠡᠭ ᠬᠠᠷᠢᠭᠤ ᠥᠭᠴᠡᠢ᠃ 28 ᠪᠦᠬᠦ ᠢᠰᠷᠧᠯ ᠬᠠᠭᠠᠨ ᠤ ᠭᠠᠷᠭᠠᠭᠰᠠᠨ ᠰᠢᠢᠳᠪᠦᠷᠢ ᠶᠢ ᠰᠣᠨᠣᠰᠣᠭᠠᠳ ᠬᠠᠭᠠᠨ ᠠᠴᠠ ᠡᠮᠢᠶᠡᠪᠡ᠃ ᠭᠣᠣᠯᠴᠢ ᠪᠠᠷ ᠰᠢᠭᠦᠳᠡᠭ ᠪᠤᠷᠬᠠᠨ ᠤ ᠮᠡᠷᠭᠡᠨ ᠤᠬᠠᠭᠠᠨ ᠲᠡᠭᠦᠨ ᠳᠦ ᠪᠠᠢᠭᠠ ᠶᠢ ᠲᠡᠳᠡ ᠬᠠᠷᠠᠯᠠ᠃