ᠬᠠᠭᠠᠳ ᠤᠨ ᠳᠡᠭᠡᠳᠦ ᠳᠣᠯᠣᠭᠠ
ᠰᠣᠯᠣᠮᠣᠨ ᠤ ᠣᠷᠳᠣᠨ ᠢ ᠪᠠᠷᠢᠪᠠ
1 ᠬᠠᠷᠢᠨ ᠰᠣᠯᠣᠮᠣᠨ ᠥᠪᠡᠷ ᠦᠨ ᠢᠶᠠᠨ ᠣᠷᠳᠣᠨ ᠢ ᠠᠷᠪᠠᠨ ᠭᠤᠷᠪᠠᠨ ᠵᠢᠯ ᠪᠠᠢᠭᠤᠯᠵᠤ ᠪᠠᠢᠵᠤ ᠪᠦᠭᠦᠳᠡ ᠶᠢ ᠨᠢ ᠳᠠᠭᠤᠰᠬᠠᠵᠠᠢ᠃
2 《ᠯᠧᠪᠠᠨᠣᠨ ᠤ ᠣᠢ》 ᠬᠡᠮᠡᠬᠦ ᠵᠠᠭᠤᠨ ᠲᠣᠬᠣᠢ ᠤᠷᠲᠤ᠂ ᠲᠠᠪᠢᠨ ᠲᠣᠬᠣᠢ ᠥᠷᠭᠡᠨ᠂ ᠭᠤᠴᠢᠨ ᠲᠣᠬᠣᠢ ᠥᠨᠳᠥᠷ ᠣᠷᠳᠣᠨ ᠢ ᠪᠠᠢᠭᠤᠯᠵᠠᠢ᠃ ᠲᠡᠭᠦᠨ ᠢ ᠳᠥᠷᠪᠡᠨ ᠮᠥᠷ ᠬᠤᠱᠢ ᠶᠢᠨ ᠪᠠᠭᠠᠨᠠ ᠳᠡᠭᠡᠷᠡ ᠬᠤᠱᠢ ᠶᠢᠨ ᠬᠥᠨᠳᠡᠯᠡᠪᠴᠢ ᠨᠦᠭᠦᠳ ᠢ ᠲᠠᠯᠪᠢᠵᠤ ᠪᠠᠷᠢᠭᠰᠠᠨ ᠪᠠᠢᠨᠠ᠃ 3 ᠮᠥᠷ ᠪᠦᠷᠢ ᠳᠦᠨᠢ ᠠᠷᠪᠠᠨ ᠲᠠᠪᠤ᠂ ᠨᠡᠢᠲᠡ ᠳᠥᠴᠢᠨ ᠲᠠᠪᠤᠨ ᠪᠠᠭᠠᠨᠠ ᠲᠠᠢ ᠪᠥᠭᠡᠳ ᠲᠡᠭᠦᠨ ᠳᠡᠭᠡᠷᠡ ᠪᠠᠢᠭᠠ ᠥᠷᠥᠭᠡ ᠨᠦᠭᠦᠳ ᠢ ᠬᠤᠱᠢ ᠪᠠᠷ ᠳᠡᠭᠡᠪᠦᠷᠢᠯᠡᠭᠰᠡᠨ ᠪᠠᠢᠪᠠ᠃ 4 ᠴᠣᠩ᠋ᠬᠣ ᠨᠤᠭᠤᠳ ᠨᠢ ᠥᠭᠡᠳᠡ ᠥᠭᠡᠳᠡ ᠡᠴᠡ ᠪᠡᠨ ᠬᠠᠷᠠᠭᠰᠠᠨ ᠭᠤᠷᠪᠠᠨ ᠡᠩᠨᠡᠭᠡ ᠪᠡᠷ ᠪᠠᠢᠷᠢᠯᠠᠭᠰᠠᠨ ᠪᠠᠢᠪᠠ᠃ 5 ᠪᠦᠬᠦ ᠴᠣᠩ᠋ᠬᠣ ᠬᠠᠭᠠᠯᠭᠠ ᠨᠢ ᠳᠥᠷᠪᠡᠯᠵᠢᠨ ᠬᠡᠯᠪᠡᠷᠢ ᠶᠢᠨ ᠬᠦᠷᠢᠶᠡ ᠲᠠᠢ ᠪᠥᠭᠡᠳ ᠴᠣᠩ᠋ᠬᠣ ᠨᠤᠭᠤᠳ ᠨᠢ ᠥᠭᠡᠳᠡ ᠥᠭᠡᠳᠡ ᠡᠴᠡ ᠪᠡᠨ ᠬᠠᠷᠠᠭᠰᠠᠨ ᠭᠤᠷᠪᠠᠨ ᠡᠩᠨᠡᠭᠡ ᠪᠡᠷ ᠪᠠᠢᠷᠢᠯᠠᠵᠠᠢ᠃
6 ᠲᠡᠷᠡ ᠪᠡᠷ ᠮᠥᠨ ᠲᠠᠪᠢᠨ ᠲᠣᠬᠣᠢ ᠤᠷᠲᠤ᠂ ᠭᠤᠴᠢᠨ ᠲᠣᠬᠣᠢ ᠥᠷᠭᠡᠨ 《ᠪᠠᠭᠠᠨᠠᠲᠤ ᠲᠠᠩᠬᠢᠮ》 ᠪᠠᠢᠭᠤᠯᠪᠠ᠃ ᠡᠮᠦᠨᠡ ᠲᠠᠯᠠ ᠳᠤᠨᠢ ᠪᠠᠭᠠᠨᠠ ᠲᠠᠢ ᠬᠣᠩᠭᠢᠯ ᠪᠠᠢᠭᠰᠠᠨ ᠪᠥᠭᠡᠳ ᠪᠠᠭᠠᠨᠠ ᠨᠤᠭᠤᠳ ᠳᠡᠭᠡᠷᠡ ᠨᠢ ᠰᠡᠭᠦᠳᠡᠷᠡᠪᠴᠢ ᠡᠯᠭᠦᠭᠡᠰᠦᠲᠠᠢ ᠪᠠᠢᠯᠠ᠃
7 ᠲᠡᠷᠡ ᠪᠡᠷ ᠰᠢᠭᠦᠯᠲᠡ ᠶᠠᠪᠤᠭᠤᠯᠬᠤ 《ᠰᠡᠨᠲᠢ ᠶᠢᠨ ᠲᠠᠩᠬᠢᠮ》᠂ ᠲᠤᠬᠠᠢᠯᠠᠪᠠᠯ ᠰᠢᠭᠦᠬᠦ ᠲᠠᠩᠬᠢᠮ ᠪᠠᠷᠢᠵᠤ᠂ ᠱᠠᠯᠠ ᠶᠢ ᠨᠢ ᠨᠢᠭᠡ ᠲᠠᠯᠠ ᠠᠴᠠ ᠨᠥᠭᠥᠭᠡ ᠲᠠᠯᠠ ᠬᠦᠷᠲᠡᠯᠡ ᠬᠤᠱᠢ ᠪᠠᠷ ᠪᠦᠷᠢᠪᠡ᠃
8 ᠰᠣᠯᠣᠮᠣᠨ ᠲᠡᠷᠡ ᠲᠠᠩᠬᠢᠮ ᠤᠨ ᠠᠷᠤ ᠲᠠᠯᠠ ᠳᠠᠬᠢ ᠥᠭᠡᠷᠡ ᠬᠠᠰᠢᠶᠠᠨ ᠳᠤ ᠥᠪᠡᠷ ᠦᠨ ᠢᠶᠠᠨ ᠰᠠᠭᠤᠬᠤ ᠣᠷᠳᠣᠨ ᠢ ᠴᠤ ᠲᠡᠷᠡ ᠮᠠᠶ᠋ᠢᠭ ᠢᠶᠠᠷ ᠪᠠᠷᠢᠵᠤ᠂ ᠥᠪᠡᠷ ᠦᠨ ᠪᠣᠭᠲᠣᠯᠠᠵᠤ ᠠᠪᠤᠭᠰᠠᠨ ᠹᠠᠷᠠᠣ᠋ ᠶᠢᠨ ᠥᠬᠢᠨ ᠳᠤ ᠴᠤ ᠲᠡᠷᠡ ᠲᠠᠩᠬᠢᠮ ᠲᠠᠢ ᠠᠳᠠᠯᠢ ᠣᠷᠳᠣᠨ ᠢ ᠪᠠᠷᠢᠵᠤ ᠥᠭᠴᠡᠢ᠃
9 ᠡᠳᠡᠭᠡᠷ ᠪᠠᠷᠢᠯᠭᠠ ᠶᠢ ᠳᠣᠲᠣᠷᠠ ᠭᠠᠳᠠᠨᠠ ᠦᠭᠡᠢ ᠰᠠᠭᠤᠷᠢ ᠡᠴᠡ ᠳᠡᠭᠡᠪᠦᠷ ᠦᠨ ᠢᠷᠮᠡᠭ ᠬᠦᠷᠲᠡᠯᠡ᠂ ᠮᠥᠨ ᠭᠠᠳᠠᠨᠠ ᠲᠠᠯᠠ ᠠᠴᠠ ᠶᠡᠬᠡ ᠬᠠᠰᠢᠶᠠ ᠬᠦᠷᠲᠡᠯᠡ ᠪᠦᠭᠦᠳᠡ ᠶᠢ ᠦᠨᠡᠲᠦ ᠴᠢᠯᠠᠭᠤ ᠪᠠᠷ ᠪᠠᠷᠢᠭᠰᠠᠨ ᠪᠠᠢᠪᠠ᠃ ᠦᠨᠡᠲᠦ ᠴᠢᠯᠠᠭᠤ ᠶᠢ ᠪᠣᠯ ᠬᠡᠮᠵᠢᠶᠡ ᠪᠡᠷ ᠨᠢ ᠴᠠᠪᠴᠢᠵᠤ ᠳᠣᠲᠣᠷᠠ ᠭᠠᠳᠠᠨᠠ ᠲᠠᠯᠠ ᠶᠢ ᠨᠢ ᠬᠢᠷᠥᠭᠡ ᠪᠡᠷ ᠵᠠᠰᠠᠵᠤ ᠪᠠᠢᠵᠤ ᠬᠡᠷᠡᠭᠯᠡᠭᠰᠡᠨ ᠪᠠᠢᠯᠠ᠃ 10 ᠰᠠᠭᠤᠷᠢ ᠶᠢ ᠨᠢ ᠴᠤ ᠦᠨᠡᠲᠦ ᠴᠢᠯᠠᠭᠤ ᠪᠠᠷ ᠲᠠᠯᠪᠢᠭᠰᠠᠨ ᠪᠥᠭᠡᠳ ᠲᠡᠳᠡᠭᠡᠷ ᠨᠢ ᠠᠷᠪᠠᠨ ᠲᠣᠬᠣᠢ᠂ ᠨᠠᠢ᠌ᠮᠠᠨ ᠲᠣᠬᠣᠢ ᠬᠡᠮᠵᠢᠶᠡ ᠲᠠᠢ ᠲᠣᠮᠣ ᠲᠣᠮᠣ ᠴᠢᠯᠠᠭᠤ ᠨᠤᠭᠤᠳ ᠪᠠᠢᠯᠠ᠃ 11 ᠳᠡᠭᠡᠷᠡ ᠨᠢ ᠴᠤ ᠬᠡᠮᠵᠢᠶᠡ ᠪᠡᠷ ᠨᠢ ᠵᠠᠰᠠᠭᠰᠠᠨ ᠦᠨᠡᠲᠦ ᠴᠢᠯᠠᠭᠤ ᠪᠣᠯᠣᠨ ᠬᠤᠱᠢ ᠮᠣᠳᠣ ᠬᠡᠷᠡᠭᠯᠡᠪᠡ᠃ 12 ᠣᠷᠳᠣᠨ ᠤ ᠶᠡᠬᠡ ᠬᠦᠷᠢᠶᠡᠨ ᠦ ᠲᠣᠭᠣᠷᠢᠨ ᠳᠤ ᠴᠤ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡ ᠪᠣᠯᠣᠨ ᠲᠡᠭᠦᠨ ᠦ ᠬᠣᠩᠭᠢᠯ ᠤᠨ ᠡᠷᠭᠢᠨ ᠲᠣᠭᠣᠷᠢᠨ ᠲᠠᠢ ᠠᠳᠠᠯᠢ ᠪᠠᠷ ᠭᠤᠷᠪᠠᠨ ᠡᠩᠨᠡᠭᠡ ᠵᠠᠰᠠᠭᠰᠠᠨ ᠴᠢᠯᠠᠭᠤ᠂ ᠨᠢᠭᠡ ᠡᠩᠨᠡᠭᠡ ᠬᠤᠱᠢ ᠶᠢᠨ ᠳ᠋ᠦᠨᠵᠡ ᠶᠢ ᠲᠠᠯᠪᠢᠵᠠᠢ᠃
ᠰᠣᠯᠣᠮᠣᠨ ᠤ ᠣᠷᠳᠣᠨ ᠢ ᠴᠢᠮᠡᠭᠯᠡᠪᠡ
13 ᠰᠣᠯᠣᠮᠣᠨ ᠬᠠᠭᠠᠨ ᠬᠥᠮᠦᠨ ᠢᠯᠡᠭᠡᠵᠦ᠂ ᠲᠢᠷ ᠡᠴᠡ ᠾᠦᠷᠠᠮ ᠢ ᠠᠪᠴᠢᠷᠠᠭᠤᠯᠪᠠ᠃ 14 ᠾᠦᠷᠠᠮ ᠪᠣᠯ ᠨᠠᠹᠲ᠋ᠠᠯᠢ ᠣᠪᠣᠭ ᠤᠨ ᠪᠡᠯᠪᠡᠰᠦᠨ ᠡᠬᠡᠨᠡᠷ ᠦᠨ ᠬᠦᠦ ᠪᠥᠭᠡᠳ ᠡᠴᠢᠭᠡ ᠨᠢ ᠲᠢᠷ ᠬᠥᠮᠦᠨ᠂ ᠬᠦᠷᠡᠯ ᠦᠨ ᠳᠠᠷᠬᠠᠨ ᠶᠤᠮ᠃ ᠾᠦᠷᠠᠮ ᠬᠦᠷᠡᠯ ᠢᠶᠡᠷ ᠬᠢᠬᠦ ᠠᠯᠢᠪᠠ ᠠᠵᠢᠯ ᠳᠤ ᠮᠡᠷᠭᠡᠨ᠂ ᠡᠷᠳᠡᠮ ᠮᠡᠷᠭᠡᠵᠢᠯ ᠲᠠᠢ ᠶᠤᠮ᠃ ᠲᠡᠷᠡ ᠰᠣᠯᠣᠮᠣᠨ ᠬᠠᠭᠠᠨ ᠤᠷᠤᠭᠤ ᠢᠷᠡᠭᠡᠳ ᠲᠡᠭᠦᠨ ᠦ ᠪᠦᠬᠦ ᠠᠵᠢᠯ ᠢ ᠭᠦᠢᠴᠡᠳᠬᠡᠬᠦ ᠪᠣᠯᠵᠠᠢ᠃
15 ᠲᠡᠷᠡ ᠪᠡᠷ ᠬᠣᠣᠰ ᠬᠦᠷᠡᠯ ᠪᠠᠭᠠᠨᠠ ᠬᠢᠪᠡ᠃ ᠲᠤᠰ ᠪᠦᠷᠢ ᠶᠢ ᠨᠢ ᠣᠯᠣᠰᠣ ᠪᠠᠷ ᠬᠡᠮᠵᠢᠪᠡᠯ ᠥᠨᠳᠥᠷ ᠨᠢ ᠠᠷᠪᠠᠨ ᠨᠠᠢ᠌ᠮᠠᠨ ᠲᠣᠬᠣᠢ᠂ ᠲᠣᠭᠣᠷᠢᠭ ᠤᠨ ᠬᠦᠷᠢᠶᠡ ᠨᠢ ᠠᠷᠪᠠᠨ ᠬᠣᠶᠠᠷ ᠲᠣᠬᠣᠢ ᠪᠠᠢᠯᠠ᠃ 16 ᠲᠡᠷᠡ ᠪᠡᠷ ᠬᠦᠷᠡᠯ ᠴᠢᠳᠬᠤᠨ ᠲᠡᠳᠡᠭᠡᠷ ᠪᠠᠭᠠᠨᠠ ᠶᠢᠨ ᠣᠷᠣᠢ ᠳᠤ ᠲᠠᠯᠪᠢᠬᠤ ᠬᠣᠣᠰ ᠪᠠᠭᠠᠨᠠ ᠶᠢᠨ ᠲᠣᠯᠣᠭᠠᠢ ᠶᠢ ᠬᠢᠵᠡᠢ᠃ ᠪᠠᠭᠠᠨᠠ ᠶᠢᠨ ᠲᠣᠯᠣᠭᠠᠢ ᠪᠦᠷᠢ ᠲᠠᠪᠤᠨ ᠲᠣᠬᠣᠢ ᠥᠨᠳᠥᠷ ᠪᠠᠢᠪᠠ᠃ 17 ᠪᠠᠭᠠᠨᠠ ᠶᠢᠨ ᠣᠷᠣᠢ ᠳᠡᠭᠡᠷᠡ ᠲᠣᠭᠲᠠᠭᠠᠭᠰᠠᠨ ᠪᠠᠭᠠᠨᠠ ᠶᠢᠨ ᠲᠣᠯᠣᠭᠠᠢ ᠶᠢ ᠴᠢᠮᠡᠭᠯᠡᠬᠦ ᠶᠢᠨ ᠲᠤᠯᠠᠳᠠ ᠲᠣᠯᠣᠭᠠᠢ ᠪᠦᠷᠢ ᠳᠤ ᠳᠣᠯᠣᠭᠠᠨ ᠡᠩᠨᠡᠭᠡ ᠵᠡᠭᠦᠯᠲᠡ ᠪᠣᠯᠣᠨ ᠭᠢᠨᠵᠢ ᠬᠢᠪᠡ᠃ 18 ᠲᠡᠷᠡ ᠪᠡᠷ ᠪᠠᠭᠠᠨᠠ ᠨᠤᠭᠤᠳ ᠢ ᠬᠢᠭᠰᠡᠨ ᠦ ᠳᠠᠷᠠᠭᠠ᠂ ᠬᠣᠶᠠᠷ ᠮᠥᠷ ᠠᠨᠠᠷ ᠬᠢᠵᠦ ᠵᠡᠭᠦᠯᠲᠡ ᠶᠢ ᠲᠣᠭᠣᠷᠢᠭᠤᠯᠤᠨ ᠪᠠᠭᠠᠨᠠ ᠶᠢᠨ ᠣᠷᠣᠢ ᠳᠠᠬᠢ ᠲᠣᠯᠣᠭᠠᠢ ᠶᠢ ᠪᠦᠲᠡᠭᠡᠪᠡ᠃ ᠨᠥᠭᠥᠭᠡ ᠲᠣᠯᠣᠭᠠᠢ ᠳᠡᠭᠡᠷᠡ ᠨᠢ ᠴᠤ ᠠᠳᠠᠯᠢᠬᠠᠨ ᠬᠢᠪᠡ᠃ 19 ᠬᠣᠩᠭᠢᠯ ᠳᠠᠬᠢ ᠪᠠᠭᠠᠨᠠ ᠶᠢᠨ ᠣᠷᠣᠢ ᠳᠡᠭᠡᠷᠡᠬᠢ ᠲᠣᠯᠣᠭᠠᠢ ᠨᠢ ᠳᠥᠷᠪᠡᠨ ᠲᠣᠬᠣᠢ ᠥᠨᠳᠥᠷ ᠪᠥᠭᠡᠳ ᠰᠠᠷᠠᠨᠠ ᠴᠡᠴᠡᠭ ᠦᠨ ᠳᠦᠷᠰᠦ ᠲᠠᠢ ᠪᠠᠢᠪᠠ᠃ ᠲᠡᠭᠦᠨ ᠢ ᠡᠭᠦᠳᠡᠨ ᠦ ᠲᠠᠩᠬᠢᠮ ᠳᠤ ᠪᠤᠢ ᠪᠠᠭᠠᠨᠠ ᠶᠢᠨ ᠣᠷᠣᠢ ᠳᠤ ᠲᠠᠯᠪᠢᠭᠰᠠᠨ ᠪᠥᠭᠡᠳ 20 ᠬᠣᠶᠠᠷ ᠪᠠᠭᠠᠨᠠ ᠶᠢᠨ ᠲᠣᠯᠣᠭᠠᠢ ᠳᠠᠬᠢ ᠵᠡᠭᠦᠯᠲᠡ ᠶᠢ ᠲᠣᠭᠣᠷᠢᠭᠤᠯᠤᠭᠰᠠᠨ ᠠᠶᠠᠭᠠᠨ ᠬᠡᠯᠪᠡᠷᠢᠲᠦ ᠬᠦᠷᠢᠶᠡ ᠶᠢᠨ ᠳᠡᠭᠡᠳᠦ ᠲᠠᠯᠠ ᠳᠤ ᠬᠣᠶᠠᠷ ᠵᠠᠭᠤᠨ ᠰᠢᠷᠬᠡᠭ ᠬᠦᠷᠡᠯ ᠠᠨᠠᠷ ᠪᠠᠢᠯᠠ᠃ 21 ᠲᠡᠷᠡ ᠪᠡᠷ ᠬᠣᠣᠰ ᠪᠠᠭᠠᠨᠠ ᠶᠢ ᠥᠷᠭᠥᠭᠡᠨ ᠦ ᠬᠣᠩᠭᠢᠯ ᠳᠤ ᠪᠣᠰᠬᠠᠭᠰᠠᠨ ᠪᠠᠢᠪᠠ᠃ ᠪᠠᠷᠠᠭᠤᠨ ᠲᠠᠯᠠ ᠶᠢᠨ ᠪᠠᠭᠠᠨᠠ ᠶᠢ ᠪᠣᠰᠬᠠᠵᠤ ᠶᠠᠺᠢᠨ 8 ᠭᠡᠵᠦ ᠨᠡᠷᠡᠯᠡᠨ᠂ ᠵᠡᠭᠦᠨ ᠲᠠᠯᠠ ᠶᠢᠨ ᠪᠠᠭᠠᠨᠠ ᠶᠢ ᠪᠣᠶᠠᠽ 9 ᠭᠡᠵᠦ ᠨᠡᠷᠡᠯᠡᠵᠡᠢ᠃ 22 ᠪᠠᠭᠠᠨᠠ ᠨᠤᠭᠤᠳ ᠤᠨ ᠣᠷᠣᠢ ᠳᠤ ᠰᠠᠷᠠᠨᠠ ᠴᠡᠴᠡᠭ ᠶᠢᠨ ᠬᠡᠯᠪᠡᠷᠢ ᠲᠠᠢ ᠴᠢᠮᠡᠭᠯᠡᠯ ᠪᠠᠢᠪᠠ᠃ ᠡᠢᠨ ᠬᠦ ᠪᠠᠭᠠᠨᠠ ᠪᠣᠰᠬᠠᠬᠤ ᠠᠵᠢᠯ ᠳᠠᠭᠤᠰᠴᠠᠢ᠃
23 ᠲᠡᠷᠡ ᠪᠡᠷ ᠲᠣᠭᠣᠷᠢᠭ ᠬᠡᠯᠪᠡᠷᠢ ᠲᠠᠢ ᠴᠢᠳᠬᠤᠮᠠᠯ 《ᠲᠠᠩᠭᠢᠰ》 ᠬᠢᠪᠡ᠃ ᠨᠢᠭᠡ ᠬᠥᠪᠡᠭᠡᠨ ᠡᠴᠡ ᠨᠢ ᠨᠥᠭᠥᠭᠡ ᠬᠥᠪᠡᠭᠡ ᠬᠦᠷᠲᠡᠯᠡ ᠠᠷᠪᠠᠨ ᠲᠣᠬᠣᠢ᠂ ᠥᠨᠳᠥᠷ ᠨᠢ ᠲᠠᠪᠤᠨ ᠲᠣᠬᠣᠢ᠂ ᠲᠣᠭᠣᠷᠢᠭ ᠤᠨ ᠬᠦᠷᠢᠶᠡ ᠨᠢ ᠭᠤᠴᠢᠨ ᠲᠣᠬᠣᠢ ᠬᠡᠮᠵᠢᠶᠡ ᠲᠠᠢ᠃ 24 ᠠᠮᠠᠰᠠᠷ ᠤᠨ ᠬᠢᠨᠢ ᠳᠣᠣᠷᠠ ᠲᠠᠩᠭᠢᠰ ᠢ ᠲᠣᠭᠣᠷᠢᠭᠤᠯᠵᠤ ᠬᠣᠶᠠᠷ ᠮᠥᠷ ᠬᠤᠯᠤ ᠬᠢᠪᠡ᠃ ᠲᠡᠷᠡ ᠪᠡᠷ ᠨᠢᠭᠡ ᠲᠣᠬᠣᠢ ᠲᠤᠲᠤᠮ ᠳᠤ ᠠᠷᠪᠠᠨ ᠬᠤᠯᠤ ᠪᠠᠢᠷᠢᠯᠠᠭᠤᠯᠵᠤ᠂ ᠲᠡᠳᠡᠭᠡᠷ ᠢ ᠲᠠᠩᠭᠢᠰ ᠲᠠᠢ ᠨᠢᠭᠡ ᠴᠣᠭᠴᠠ ᠪᠣᠯᠭᠠᠨ ᠴᠢᠳᠬᠤᠭᠰᠠᠨ ᠶᠤᠮ᠃ 25 ᠲᠠᠩᠭᠢᠰ ᠢ ᠠᠷᠪᠠᠨ ᠬᠣᠶᠠᠷ ᠦᠬᠡᠷ ᠳᠡᠭᠡᠷᠡ ᠪᠠᠢᠷᠢᠯᠠᠭᠤᠯᠤᠭᠰᠠᠨ ᠪᠠᠢᠪᠠ᠃ ᠲᠡᠳᠡᠭᠡᠷ ᠦᠨ ᠭᠤᠷᠪᠠ ᠨᠢ ᠬᠣᠢᠰᠢ᠂ ᠭᠤᠷᠪᠠ ᠨᠢ ᠪᠠᠷᠠᠭᠤᠨᠰᠢ᠂ ᠭᠤᠷᠪᠠ ᠨᠢ ᠡᠮᠦᠨᠡᠰᠢ᠂ ᠭᠤᠷᠪᠠ ᠨᠢ ᠵᠡᠭᠦᠨᠰᠢ ᠬᠠᠷᠠᠭᠰᠠᠨ ᠪᠠᠢᠵᠠᠢ᠃ ᠲᠠᠩᠭᠢᠰ ᠨᠢ ᠲᠡᠳᠡᠨ ᠦ ᠳᠡᠭᠡᠷᠡ ᠪᠠᠢᠷᠢᠯᠠᠵᠤ᠂ ᠦᠬᠡᠷ ᠦᠨ ᠤᠭᠤᠴᠠ ᠨᠢ ᠪᠦᠭᠦᠳᠡ ᠳᠣᠲᠣᠭᠰᠢ ᠪᠠᠨ ᠬᠠᠨᠳᠤᠭᠰᠠᠨ ᠪᠠᠢᠪᠠ᠃ 26 ᠡᠨᠡ ᠴᠢᠳᠬᠤᠮᠠᠯ ᠨᠢ ᠠᠯᠠᠭᠠᠨ ᠤ ᠡᠩ ᠦᠨ ᠴᠢᠨᠡᠭᠡᠨ ᠵᠤᠵᠠᠭᠠᠨ᠂ ᠠᠮᠠᠰᠠᠷ ᠨᠢ ᠠᠶᠠᠭᠠᠨ ᠤ ᠠᠮᠠᠰᠠᠷ ᠮᠡᠲᠦ ᠬᠡᠯᠪᠡᠷᠢ ᠲᠠᠢ ᠪᠤᠶᠤ ᠰᠠᠷᠠᠨᠠ ᠴᠡᠴᠡᠭ ᠦᠨ ᠳᠡᠯᠪᠢ ᠠᠳᠠᠯᠢ ᠪᠥᠭᠡᠳ ᠪᠠᠭᠲᠠᠭᠠᠮᠵᠢ ᠨᠢ ᠬᠣᠶᠠᠷ ᠮᠢᠩ᠋ᠭᠠᠨ ᠪᠠᠲ 10 ᠶᠤᠮ᠃
27 ᠲᠡᠷᠡ ᠪᠡᠷ ᠠᠷᠪᠠᠨ ᠤᠰᠤ ᠵᠥᠭᠡᠭᠡᠬᠦ ᠬᠦᠷᠡᠯ ᠲᠡᠷᠭᠡ ᠬᠢᠵᠡᠢ᠃ ᠲᠡᠷᠭᠡ ᠲᠤᠰ ᠪᠦᠷᠢ ᠳᠥᠷᠪᠡᠨ ᠲᠣᠬᠣᠢ ᠤᠷᠲᠤ᠂ ᠳᠥᠷᠪᠡᠨ ᠲᠣᠬᠣᠢ ᠥᠷᠭᠡᠨ᠂ ᠭᠤᠷᠪᠠᠨ ᠲᠣᠬᠣᠢ ᠥᠨᠳᠥᠷ ᠪᠠᠢᠯᠠ᠃ 28 ᠲᠡᠷᠭᠡ ᠨᠦᠭᠦᠳ ᠦᠨ ᠵᠠᠭᠪᠤᠷ ᠨᠢ ᠡᠢᠮᠦ ᠪᠠᠢᠪᠠ᠄ ᠲᠡᠳᠡᠭᠡᠷ ᠨᠢ ᠬᠠᠰᠢᠯᠭᠠ ᠲᠠᠢ ᠪᠥᠭᠡᠳ ᠬᠠᠰᠢᠯᠭᠠ ᠨᠤᠭᠤᠳ ᠢ ᠨᠢ ᠬᠦᠷᠢᠶᠡᠨ ᠳᠦ ᠰᠠᠭᠤᠯᠭᠠᠵᠠᠢ᠃ 29 ᠬᠦᠷᠢᠶᠡᠨ ᠳᠦ ᠰᠠᠭᠤᠯᠭᠠᠭᠰᠠᠨ ᠬᠠᠰᠢᠯᠭᠠ ᠨᠤᠭᠤᠳ ᠳᠡᠭᠡᠷᠡ ᠠᠷᠰᠯᠠᠨ᠂ ᠦᠬᠡᠷ ᠪᠣᠯᠣᠨ ᠺᠧᠷᠣᠪ ᠤᠳ ᠤᠨ ᠳᠦᠷᠰᠦ ᠪᠠᠢᠪᠠ᠃ ᠠᠷᠰᠯᠠᠨ ᠪᠣᠯᠣᠨ ᠦᠬᠡᠷ ᠦᠨ ᠳᠡᠭᠡᠷᠡ ᠲᠠᠯᠠ ᠪᠣᠯᠣᠨ ᠳᠣᠣᠷᠠ ᠲᠠᠯᠠ ᠳᠤ ᠴᠡᠴᠡᠭ ᠦᠨ ᠬᠡᠯᠬᠢᠶᠡ ᠪᠠᠢᠪᠠ᠃ 30 ᠲᠡᠷᠭᠡ ᠪᠦᠷᠢ ᠬᠦᠷᠡᠯ ᠲᠡᠩᠬᠡᠯᠢᠭ ᠲᠠᠢ᠂ ᠳᠥᠷᠪᠡᠨ ᠬᠦᠷᠡᠯ ᠳᠤᠭᠤᠢ ᠲᠠᠢ᠂ ᠳᠥᠷᠪᠡᠨ ᠲᠤᠯᠭᠠᠭᠤᠷᠢ ᠶᠢᠨ ᠳᠡᠭᠡᠷᠡ ᠪᠠᠢᠭᠠ ᠤᠬᠢᠶᠠᠯᠭᠠ ᠶᠢᠨ ᠰᠠᠪᠠ ᠶᠢᠨ ᠲᠠᠯᠠ ᠪᠦᠷᠢ ᠳᠡᠭᠡᠷᠡ ᠴᠡᠴᠡᠭ ᠦᠨ ᠬᠡᠯᠬᠢᠶᠡ ᠴᠢᠳᠬᠤᠭᠰᠠᠨ ᠪᠠᠢᠯᠠ᠃ 31 ᠲᠡᠷᠭᠡᠨ ᠳᠣᠲᠣᠷᠠ ᠨᠢᠭᠡ ᠲᠣᠬᠣᠢ ᠥᠨᠳᠥᠷ ᠴᠠᠭᠠᠷᠢᠭ ᠰᠠᠭᠤᠷᠢ ᠲᠠᠢ ᠰᠠᠪᠠ ᠪᠤᠢ᠂ ᠭᠠᠳᠠᠭᠤᠷ ᠢᠶᠠᠨ ᠰᠡᠢᠯᠪᠦᠷᠢ ᠲᠠᠢ ᠪᠥᠭᠡᠳ ᠬᠥᠨᠳᠡᠯᠡᠨ ᠢᠶᠡᠷ ᠢᠶᠠᠨ ᠨᠢᠭᠡ ᠲᠣᠬᠣᠢ ᠬᠠᠭᠠᠰ ᠪᠠᠢᠯᠠ᠃ ᠬᠠᠷᠢᠨ ᠲᠡᠷᠭᠡᠨ ᠦ ᠬᠠᠰᠢᠯᠭᠠ ᠨᠤᠭᠤᠳ ᠨᠢ ᠳᠤᠭᠤᠢ ᠪᠢᠰᠢ᠂ ᠳᠥᠷᠪᠡᠯᠵᠢᠨ ᠶᠤᠮ᠃ 32 ᠬᠠᠰᠢᠯᠭᠠ ᠶᠢᠨ ᠬᠢᠨᠢ ᠳᠣᠣᠷᠠ ᠳᠥᠷᠪᠡᠨ ᠬᠦᠷᠳᠦ ᠲᠠᠢ ᠪᠥᠭᠡᠳ ᠬᠦᠷᠳᠦᠨ ᠦ ᠲᠡᠩᠬᠡᠯᠢᠭ ᠨᠢ ᠲᠡᠷᠭᠡ ᠲᠠᠢ ᠬᠣᠯᠪᠣᠯᠳᠤᠭᠰᠠᠨ ᠪᠠᠢᠪᠠ᠃ ᠬᠦᠷᠳᠦᠨ ᠦ ᠥᠨᠳᠥᠷ ᠨᠢ ᠨᠢᠭᠡ ᠲᠣᠬᠣᠢ ᠬᠠᠭᠠᠰ ᠪᠠᠢᠵᠤ᠂ 33 ᠬᠦᠷᠳᠦᠨ ᠦ ᠬᠢᠴᠡ ᠨᠢ ᠮᠣᠷᠢᠨ ᠲᠡᠷᠭᠡᠨ ᠦ ᠬᠦᠷᠳᠦᠨ ᠦ ᠬᠢ ᠲᠠᠢ ᠠᠳᠠᠯᠢ ᠪᠠᠢᠯᠠ᠃ ᠬᠦᠷᠳᠦᠨ ᠦ ᠲᠡᠩᠬᠡᠯᠢᠭ᠂ ᠮᠥᠭᠡᠷ᠂ ᠬᠡᠭᠡᠰᠦ᠂ ᠲᠡᠩᠬᠡᠯᠢᠭ ᠤᠨ ᠪᠤᠯᠤ ᠶᠢ ᠪᠦᠭᠦᠳᠡ ᠶᠢ ᠴᠢᠳᠬᠤᠮᠠᠯ ᠲᠡᠮᠦᠷᠯᠢᠭ ᠢᠶᠠᠷ ᠬᠢᠵᠡᠢ᠃ 34 ᠲᠡᠷᠭᠡᠨ ᠦ ᠳᠥᠷᠪᠡᠨ ᠥᠨᠴᠥᠭ ᠦᠨ ᠥᠨᠴᠥᠭ ᠪᠦᠷᠢ ᠳᠤ ᠪᠠᠷᠢᠭᠤᠯ ᠬᠢᠭᠰᠡᠨ ᠪᠥᠭᠡᠳ ᠪᠠᠷᠢᠭᠤᠯ ᠤᠳ ᠨᠢ ᠲᠡᠷᠭᠡ ᠲᠠᠢ ᠬᠣᠯᠪᠣᠯᠳᠤᠭᠰᠠᠨ ᠪᠠᠢᠪᠠ᠃ 35 ᠲᠡᠷᠭᠡᠨ ᠳᠡᠭᠡᠷᠡ ᠨᠢ ᠬᠠᠭᠠᠰ ᠲᠣᠬᠣᠢ ᠥᠨᠳᠥᠷ ᠵᠢᠶᠠᠰᠠ ᠲᠠᠢ᠂ ᠲᠡᠷᠭᠡᠨ ᠳᠡᠭᠡᠷᠡᠬᠢ ᠲᠤᠯᠭᠠᠭᠤᠷᠢ ᠨᠤᠭᠤᠳ ᠪᠠ ᠲᠡᠷᠭᠡᠨ ᠬᠠᠰᠢᠯᠭᠠ ᠨᠢ ᠲᠡᠷᠭᠡ ᠲᠠᠢ ᠪᠠᠨ ᠬᠣᠯᠪᠣᠯᠳᠤᠭᠰᠠᠨ ᠪᠠᠢᠪᠠ᠃ 36 ᠾᠦᠷᠠᠮ ᠲᠡᠷᠭᠡᠨ ᠦ ᠲᠤᠯᠭᠠᠭᠤᠷᠢ ᠨᠤᠭᠤᠳ ᠪᠣᠯᠣᠨ ᠬᠠᠰᠢᠯᠭᠠ ᠨᠤᠭᠤᠳ ᠤᠨ ᠳᠡᠭᠡᠷᠡ ᠺᠧᠷᠣᠪ ᠤᠳ᠂ ᠠᠷᠰᠯᠠᠨ᠂ ᠳᠠᠯᠳᠠᠤ ᠮᠣᠳᠣ ᠶᠢ ᠴᠡᠴᠡᠭ ᠦᠨ ᠬᠡᠯᠬᠢᠶᠡ ᠲᠠᠢ ᠬᠠᠮᠲᠤ ᠵᠠᠢ ᠳᠤᠨᠢ ᠪᠠᠭᠲᠠᠭᠠᠵᠤ ᠰᠡᠢᠯᠪᠡ᠃ 37 ᠲᠡᠷᠡ ᠠᠷᠪᠠᠨ ᠲᠡᠷᠭᠡ ᠶᠢ ᠢᠩᠭᠢᠵᠦ ᠬᠢᠪᠡ᠃ ᠲᠡᠳᠡᠭᠡᠷ ᠢ ᠪᠦᠭᠦᠳᠡ ᠢᠵᠢᠯ ᠬᠡᠪ᠂ ᠢᠵᠢᠯ ᠬᠡᠮᠵᠢᠶᠡ᠂ ᠢᠵᠢᠯ ᠬᠡᠯᠪᠡᠷᠢ ᠲᠠᠢ ᠴᠢᠳᠬᠤᠵᠤ ᠬᠢᠭᠰᠡᠨ ᠪᠠᠢᠪᠠ᠃
38 ᠾᠦᠷᠠᠮ ᠠᠷᠪᠠᠨ ᠤᠬᠢᠶᠠᠯᠭᠠ ᠶᠢᠨ ᠰᠠᠪᠠ ᠶᠢ ᠴᠤ ᠬᠦᠷᠡᠯ ᠢᠶᠡᠷ ᠬᠢᠪᠡ᠃ ᠰᠠᠪᠠ ᠲᠤᠰ ᠪᠦᠷᠢ ᠳᠥᠴᠢᠨ ᠪᠠᠲ 11 ᠤᠰᠤᠨ ᠤ ᠪᠠᠭᠲᠠᠭᠠᠮᠵᠢ ᠲᠠᠢ᠂ ᠬᠥᠨᠳᠡᠯᠡᠨ ᠢᠶᠡᠷ ᠢᠶᠠᠨ ᠳᠥᠷᠪᠡᠨ ᠲᠣᠬᠣᠢ᠃ ᠲᠡᠷᠭᠡ ᠪᠦᠷᠢ ᠳᠤ ᠨᠢᠭᠡ ᠰᠠᠪᠠ ᠲᠠᠢ ᠪᠠᠢᠪᠠ᠃ 39 ᠲᠡᠷᠡ ᠪᠡᠷ ᠲᠡᠷᠭᠡᠨ ᠦ ᠲᠠᠪᠤ ᠶᠢ ᠨᠢ ᠥᠷᠭᠥᠭᠡᠨ ᠦ ᠪᠠᠷᠠᠭᠤᠨ ᠲᠠᠯᠠ ᠳᠤ᠂ ᠲᠠᠪᠤ ᠶᠢ ᠨᠢ ᠥᠷᠭᠥᠭᠡᠨ ᠦ ᠵᠡᠭᠦᠨ ᠲᠠᠯᠠ ᠳᠤ ᠪᠠᠢᠯᠭᠠᠵᠤ᠂ ᠲᠠᠩᠭᠢᠰ ᠢ ᠵᠡᠭᠦᠨ ᠡᠮᠦᠨᠡ ᠲᠠᠯᠠ ᠳᠤ ᠪᠠᠢᠷᠢᠯᠠᠭᠤᠯᠪᠠ᠃
40 ᠾᠦᠷᠠᠮ ᠮᠥᠨ ᠲᠣᠭᠣᠭᠠ᠂ ᠤᠳᠬᠤᠭᠤᠷ᠂ ᠬᠤᠯᠤ ᠠᠶᠠᠭᠠ ᠵᠡᠷᠭᠡ ᠶᠢ ᠬᠢᠪᠡ᠃ ᠲᠡᠢᠨ ᠬᠦ ᠾᠦᠷᠠᠮ ᠰᠣᠯᠣᠮᠣᠨ ᠬᠠᠭᠠᠨ ᠤ ᠲᠥᠯᠥᠭᠡ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠳᠦ ᠬᠢᠬᠦ ᠪᠦᠬᠦ ᠠᠵᠢᠯ ᠢᠶᠠᠨ ᠳᠠᠭᠤᠰᠬᠠᠵᠠᠢ᠂ 41 ᠲᠤᠬᠠᠢᠯᠠᠪᠠᠯ᠂ ᠬᠣᠣᠰ ᠪᠠᠭᠠᠨᠠ᠂ ᠲᠡᠳᠡᠭᠡᠷ ᠦᠨ ᠣᠷᠣᠢ ᠳᠤ ᠰᠠᠭᠤᠯᠭᠠᠭᠰᠠᠨ ᠬᠣᠶᠠᠷ ᠲᠣᠯᠣᠭᠠᠢ᠂ ᠮᠥᠨ ᠣᠷᠣᠢ ᠳᠤᠨᠢ ᠰᠠᠭᠤᠯᠭᠠᠭᠰᠠᠨ ᠲᠣᠯᠣᠭᠠᠢ ᠨᠤᠭᠤᠳ ᠢ ᠴᠢᠮᠡᠭᠯᠡᠬᠦ ᠪᠡᠷ ᠵᠡᠭᠦᠯᠭᠡᠭᠰᠡᠨ ᠬᠣᠶᠠᠷ ᠡᠩᠨᠡᠭᠡ ᠵᠡᠭᠦᠯᠲᠡ᠂ 42 ᠪᠠᠭᠠᠨᠠ ᠶᠢᠨ ᠣᠷᠣᠢ ᠶᠢᠨ ᠲᠣᠯᠣᠭᠠᠢ ᠳᠠᠬᠢ ᠵᠡᠭᠦᠯᠲᠡ ᠳᠦ ᠴᠢᠮᠡᠭ ᠪᠣᠯᠭᠠᠨ ᠬᠣᠶᠠᠷ ᠡᠩᠨᠡᠭᠡ ᠪᠡᠷ ᠰᠠᠭᠤᠯᠭᠠᠵᠤ ᠥᠭᠭᠥᠭᠰᠡᠨ ᠳᠥᠷᠪᠡᠨ ᠵᠠᠭᠤᠨ ᠠᠨᠠᠷ᠂ 43 ᠠᠷᠪᠠᠨ ᠲᠡᠷᠭᠡ᠂ ᠲᠡᠷᠭᠡ ᠨᠦᠭᠦᠳ ᠦᠨ ᠳᠡᠭᠡᠷᠡ ᠲᠠᠯᠪᠢᠬᠤ ᠠᠷᠪᠠᠨ ᠤᠬᠢᠶᠠᠯᠭᠠ ᠶᠢᠨ ᠰᠠᠪᠠ᠂ 44 ᠨᠢᠭᠡ ᠲᠠᠩᠭᠢᠰ ᠪᠣᠯᠣᠨ ᠲᠠᠩᠭᠢᠰ ᠤᠨ ᠳᠣᠣᠷᠠᠬᠢ ᠠᠷᠪᠠᠨ ᠬᠣᠶᠠᠷ ᠦᠬᠡᠷ᠂ 45 ᠲᠣᠭᠣᠭᠠ᠂ ᠤᠳᠬᠤᠭᠤᠷ᠂ ᠬᠤᠯᠤ ᠠᠶᠠᠭᠠ ᠵᠡᠷᠭᠡ ᠶᠢ ᠰᠣᠯᠣᠮᠣᠨ ᠬᠠᠭᠠᠨ ᠤ ᠲᠥᠯᠥᠭᠡ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠳᠦ ᠵᠣᠷᠢᠭᠤᠯᠤᠨ ᠬᠢᠭᠰᠡᠨ ᠪᠥᠭᠡᠳ ᠡᠳᠡᠭᠡᠷ ᠪᠦᠬᠦ ᠬᠡᠷᠡᠭᠰᠡᠯ ᠢ ᠥᠩᠭᠡᠯᠡᠭᠰᠡᠨ ᠬᠦᠷᠡᠯ ᠢᠶᠡᠷ ᠪᠦᠲᠦᠭᠡᠵᠡᠢ᠃ 46 ᠬᠠᠭᠠᠨ ᠰᠦᠺᠣᠲ ᠪᠠ ᠽᠠᠷᠧᠲ᠋ᠠᠨ ᠤ ᠬᠣᠭᠣᠷᠣᠨᠳᠣᠬᠢ ᠶᠣᠷᠳᠠᠨ ᠤ ᠬᠥᠨᠳᠡᠢ ᠶᠢᠨ ᠰᠢᠪᠠᠷ ᠢᠶᠠᠷ ᠬᠡᠪ ᠬᠢᠵᠦ ᠡᠳᠡᠭᠡᠷ ᠢ ᠬᠢᠯᠭᠡᠵᠡᠢ᠃ 47 ᠮᠠᠰᠢ ᠣᠯᠠᠨ ᠬᠡᠷᠡᠭᠰᠡᠯ ᠪᠠᠢᠭᠰᠠᠨ ᠲᠤᠯᠠ ᠰᠣᠯᠣᠮᠣᠨ ᠡᠳᠡᠭᠡᠷ ᠪᠦᠬᠦᠨ ᠢ ᠬᠡᠮᠵᠢᠯ ᠦᠭᠡᠢ ᠣᠷᠬᠢᠭᠰᠠᠨ ᠤ ᠤᠯᠠᠮ ᠢᠶᠠᠷ ᠬᠦᠷᠡᠯ ᠦᠨ ᠵᠢᠩ ᠢ ᠮᠡᠳᠡᠬᠦ ᠶᠢᠨ ᠠᠷᠭᠠ ᠦᠭᠡᠢ ᠪᠣᠯᠵᠠᠢ᠃
48 ᠰᠣᠯᠣᠮᠣᠨ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠦ ᠠᠯᠢᠪᠠ ᠬᠡᠷᠡᠭᠰᠡᠯ ᠢ ᠴᠤ ᠦᠢᠯᠡᠳᠴᠡᠢ᠃ ᠠᠯᠲᠠᠨ ᠲᠠᠬᠢᠯ ᠤᠨ ᠰᠢᠷᠡᠭᠡ᠂ ᠲᠠᠪᠢᠭ ᠪᠣᠣᠪᠣ᠂ ᠪᠣᠣᠪᠣ ᠲᠠᠯᠪᠢᠳᠠᠭ ᠠᠯᠲᠠᠨ ᠰᠢᠷᠡᠭᠡ᠂ 49 ᠳ᠋ᠧᠩ ᠤᠨ ᠲᠠᠯᠪᠢᠭᠤᠷ᠂ ᠲᠤᠬᠠᠢᠯᠠᠪᠠᠯ ᠳᠣᠲᠣᠭᠠᠳᠤ ᠠᠷᠢᠭᠤᠨ ᠲᠠᠩᠬᠢᠮ ᠤᠨ ᠪᠠᠷᠠᠭᠤᠨ ᠵᠡᠭᠦᠨ ᠲᠠᠯᠠ ᠳᠤ ᠲᠠᠪᠤ ᠲᠠᠪᠤ ᠪᠠᠷ ᠪᠠᠢᠷᠢᠯᠠᠭᠤᠯᠬᠤ ᠰᠢᠵᠢᠷ ᠠᠯᠲᠠᠨ ᠲᠠᠯᠪᠢᠭᠤᠷ ᠬᠢᠭᠡᠳ ᠴᠡᠴᠡᠭ ᠤᠳ᠂ ᠳ᠋ᠧᠩ ᠤᠳ᠂ ᠴᠢᠮᠬᠢᠭᠦᠷ ᠤᠳ᠂ 50 ᠮᠥᠨ ᠰᠢᠵᠢᠷ ᠠᠯᠲᠠᠨ ᠠᠶᠠᠭᠠ᠂ ᠬᠢᠮᠰᠠ᠂ ᠬᠤᠯᠤ ᠠᠶᠠᠭᠠ᠂ ᠲᠠᠪᠠᠭ᠂ ᠪᠣᠢᠫᠣᠷ ᠬᠢᠭᠡᠳ ᠳᠣᠲᠣᠭᠠᠳᠤ ᠥᠷᠭᠥᠭᠡ᠂ ᠲᠤᠬᠠᠢᠯᠠᠪᠠᠯ ᠠᠷᠢᠭᠤᠨ ᠠᠴᠠ ᠠᠷᠢᠭᠤᠨ ᠭᠠᠵᠠᠷ ᠪᠤᠶᠤ ᠥᠷᠭᠥᠭᠡᠨ ᠦ ᠭᠣᠣᠯ ᠲᠠᠩᠬᠢᠮ ᠤᠨ ᠬᠠᠭᠠᠯᠭᠠᠨ ᠳᠤ ᠬᠢᠬᠦ ᠠᠯᠲᠠᠨ ᠨᠤᠭᠤᠰᠤ ᠵᠡᠷᠭᠡ ᠶᠢ ᠦᠢᠯᠡᠳᠪᠡ᠃
51 ᠲᠡᠢᠨ ᠬᠦ ᠰᠣᠯᠣᠮᠣᠨ ᠬᠠᠭᠠᠨ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠦ ᠲᠥᠯᠥᠭᠡ ᠬᠢᠬᠦ ᠪᠦᠬᠦ ᠠᠵᠢᠯ ᠢᠶᠠᠨ ᠳᠠᠭᠤᠰᠬᠠᠪᠠ᠃ ᠰᠣᠯᠣᠮᠣᠨ ᠡᠴᠢᠭᠡ ᠳ᠋ᠠᠸᠢᠳ᠋ ᠤᠨ ᠢᠶᠠᠨ ᠡᠷᠭᠦᠭᠰᠡᠨ ᠠᠯᠲᠠ᠂ ᠮᠥᠩᠭᠥ ᠪᠣᠯᠣᠨ ᠡᠳ᠋ ᠵᠦᠢᠯᠡᠰ ᠢ ᠠᠪᠴᠢᠷᠠᠵᠤ᠂ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠦ ᠬᠥᠮᠥᠷᠭᠡ ᠳᠦ ᠣᠷᠣᠭᠤᠯᠤᠭᠰᠠᠨ ᠪᠠᠢᠯᠠ᠃