ᠢᠯᠡᠷᠬᠡᠶᠢᠯᠡᠯᠭᠡ ᠵᠢᠷᠭᠤᠭᠠ
ᠠᠩ᠋ᠬᠠᠨ ᠤ ᠳᠣᠯᠣᠭᠠᠨ ᠲᠠᠮᠠᠭᠠ ᠶᠢ ᠵᠠᠳᠠᠯᠤᠭᠰᠠᠨ ᠨᠢ
1 ᠬᠤᠷᠠᠭᠠ ᠳᠣᠯᠣᠭᠠᠨ ᠲᠠᠮᠠᠭᠠᠨ ᠤ ᠨᠢᠭᠡ ᠶᠢ ᠵᠠᠳᠠᠯᠬᠤ ᠶᠢ ᠪᠢ ᠬᠠᠷᠠᠪᠠ᠃ ᠮᠥᠨ ᠳᠥᠷᠪᠡᠨ ᠠᠮᠢᠳᠤ ᠪᠡᠶᠡᠲᠡᠨ ᠦ ᠨᠢᠭᠡ ᠶᠢᠨ ᠠᠶᠤᠩ᠋ᠭᠠ ᠮᠡᠲᠦ ᠳᠠᠭᠤᠨ ᠢᠶᠠᠷ᠄ 《ᠢᠷᠡ》 ᠭᠡᠬᠦ ᠶᠢ ᠰᠣᠨᠣᠰᠣᠯᠠ᠃ 2 ᠪᠢ ᠨᠢᠭᠡᠨ ᠴᠠᠭᠠᠨ ᠮᠣᠷᠢ ᠬᠠᠷᠠᠯᠠ᠃ ᠤᠨᠤᠭᠴᠢ ᠨᠢ ᠨᠤᠮᠤ ᠪᠠᠷᠢᠵᠤ ᠪᠠᠰᠠ ᠲᠡᠭᠦᠨ ᠳᠦ ᠲᠢᠲᠢᠮ ᠥᠭᠭᠥᠭᠳᠡᠭᠰᠡᠨ ᠪᠥᠭᠡᠳ ᠢᠯᠠᠨ ᠢᠯᠠᠬᠤ ᠪᠠᠷ ᠶᠠᠪᠤᠯᠠ᠃
3 ᠬᠤᠷᠠᠭᠠ ᠬᠣᠶᠠᠳᠠᠬᠢ ᠲᠠᠮᠠᠭᠠ ᠶᠢ ᠵᠠᠳᠠᠯᠬᠤ ᠳᠤ᠂ ᠬᠣᠶᠠᠳᠠᠬᠢ ᠠᠮᠢᠳᠤ ᠪᠡᠶᠡᠲᠡᠨ ᠦ᠄ 《ᠢᠷᠡ》 ᠭᠡᠬᠦ ᠶᠢ ᠪᠢ ᠰᠣᠨᠣᠰᠣᠯᠠ᠃ 4 ᠲᠡᠭᠡᠬᠦ ᠳᠦ᠂ ᠥᠭᠡᠷᠡ ᠨᠢᠭᠡ ᠭᠠᠯ ᠤᠯᠠᠭᠠᠨ ᠮᠣᠷᠢ ᠭᠠᠷᠴᠤ ᠢᠷᠡᠪᠡ᠃ ᠤᠨᠤᠭᠴᠢ ᠨᠢ ᠭᠠᠵᠠᠷ ᠠᠴᠠ ᠡᠩᠬᠡ ᠲᠠᠢᠪᠤᠩ ᠢ ᠪᠤᠯᠢᠶᠠᠵᠤ᠂ ᠬᠥᠮᠦᠰ ᠢ ᠠᠯᠠᠯᠳᠤᠭᠤᠯᠬᠤ ᠵᠥᠪᠰᠢᠶᠡᠷᠡᠯ ᠢ ᠣᠯᠪᠠ᠃ ᠪᠠᠰᠠ ᠲᠡᠭᠦᠨ ᠳᠦ ᠲᠣᠮᠣ ᠢᠯᠳᠦ ᠥᠭᠭᠥᠭᠳᠡᠵᠡᠢ᠃
5 ᠬᠤᠷᠠᠭᠠ ᠭᠤᠷᠪᠠᠳᠠᠬᠢ ᠲᠠᠮᠠᠭᠠ ᠶᠢ ᠵᠠᠳᠠᠯᠬᠤ ᠳᠤ᠂ ᠭᠤᠷᠪᠠᠳᠠᠬᠢ ᠠᠮᠢᠳᠤ ᠪᠡᠶᠡᠲᠡᠨ ᠦ᠄ 《ᠢᠷᠡ》 ᠭᠡᠬᠦ ᠶᠢ ᠪᠢ ᠰᠣᠨᠣᠰᠣᠯᠠ᠃ ᠪᠢ ᠨᠢᠭᠡᠨ ᠬᠠᠷᠠ ᠮᠣᠷᠢ ᠬᠠᠷᠠᠯᠠ᠃ ᠤᠨᠤᠭᠴᠢ ᠶᠢᠨ ᠭᠠᠷ ᠲᠤ ᠵᠢᠩᠯᠡᠭᠦᠷ ᠪᠠᠢᠪᠠ᠃ 6 ᠳᠥᠷᠪᠡᠨ ᠠᠮᠢᠳᠤ ᠪᠡᠶᠡᠲᠡᠨ ᠦ ᠳᠤᠮᠳᠠ ᠠᠴᠠ ᠳᠠᠭᠤ ᠮᠡᠲᠦ ᠴᠢᠮᠡᠭᠡ ᠭᠠᠷᠴᠤ᠄ 《ᠨᠢᠭᠡ ᠳ᠋ᠧᠨᠠᠷ 18 ᠲᠤ ᠨᠢᠭᠡ ᠯᠢᠲ᠋ᠷ ᠪᠤᠭᠤᠳᠠᠢ᠂ ᠨᠢᠭᠡ ᠳ᠋ᠧᠨᠠᠷ ᠲᠤ ᠭᠤᠷᠪᠠᠨ ᠯᠢᠲ᠋ᠷ ᠠᠷᠪᠠᠢ᠃ ᠬᠠᠷᠢᠨ ᠴᠢᠳᠦᠨ ᠮᠣᠳᠣᠨ ᠤ ᠲᠣᠰᠣ ᠪᠠ ᠦᠵᠦᠮ ᠦᠨ ᠳᠠᠷᠠᠰᠤ ᠶᠢ ᠪᠦᠦ ᠰᠦᠢᠳᠬᠡ》 ᠭᠡᠬᠦ ᠶᠢ ᠪᠢ ᠰᠣᠨᠣᠰᠣᠯᠠ᠃
7 ᠬᠤᠷᠠᠭᠠ ᠳᠥᠷᠪᠡᠳᠡᠬᠢ ᠲᠠᠮᠠᠭᠠ ᠶᠢ ᠵᠠᠳᠠᠯᠬᠤ ᠳᠤ᠂ ᠳᠥᠷᠪᠡᠳᠡᠬᠢ ᠠᠮᠢᠳᠤ ᠪᠡᠶᠡᠲᠡᠨ ᠦ᠄ 《ᠢᠷᠡ》 ᠭᠡᠬᠦ ᠳᠠᠭᠤ ᠶᠢ ᠪᠢ ᠰᠣᠨᠣᠰᠣᠯᠠ᠃ 8 ᠪᠢ ᠨᠢᠭᠡᠨ ᠵᠡᠪᠡᠬᠡᠢ ᠰᠠᠷᠠᠯ ᠮᠣᠷᠢ ᠬᠠᠷᠠᠯᠠ᠃ ᠤᠨᠤᠭᠴᠢ ᠶᠢ ᠨᠢ ᠦᠬᠦᠯ ᠭᠡᠳᠡᠭ᠃ ᠦᠬᠦᠭᠰᠡᠳ ᠦᠨ ᠣᠷᠣᠨ ᠲᠡᠭᠦᠨ ᠢ ᠳᠠᠭᠠᠵᠤ ᠪᠠᠢᠯᠠ᠃ ᠲᠡᠳᠡ ᠰᠡᠯᠡᠮᠡ᠂ ᠥᠯᠥᠰᠬᠥᠯᠡᠩ᠂ ᠦᠬᠦᠯ ᠬᠢᠭᠡᠳ ᠭᠠᠵᠠᠷ ᠤᠨ ᠠᠷᠢᠶᠠᠲᠠᠳ ᠢᠶᠠᠷ ᠭᠠᠵᠠᠷ ᠤᠨ ᠳᠥᠷᠪᠡᠨ ᠦ ᠨᠢᠭᠡ ᠨᠤᠲᠤᠭ ᠤᠨ ᠬᠢᠨ ᠢ ᠤᠰᠠᠳᠬᠠᠬᠤ ᠡᠷᠬᠡ ᠶᠢ ᠣᠯᠵᠠᠢ᠃
9 ᠬᠤᠷᠠᠭᠠ ᠲᠠᠪᠤᠳᠠᠬᠢ ᠲᠠᠮᠠᠭᠠ ᠶᠢ ᠵᠠᠳᠠᠯᠬᠤ ᠳᠤ᠂ ᠪᠤᠷᠬᠠᠨ ᠤ ᠦᠭᠡ ᠶᠢᠨ ᠲᠥᠯᠥᠭᠡ᠂ ᠮᠥᠨ ᠥᠪᠡᠷᠰᠡᠳ ᠦᠨ ᠭᠡᠷᠡᠴᠢᠯᠡᠯ ᠦᠨ ᠢᠶᠠᠨ ᠲᠥᠯᠥᠭᠡ ᠠᠯᠠᠭᠳᠠᠭᠰᠠᠨ ᠬᠥᠮᠦᠰ ᠦᠨ ᠰᠦᠨᠡᠰᠦ ᠨᠦᠭᠦᠳ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠦ ᠳᠣᠣᠷᠠ ᠪᠠᠢᠬᠤ ᠶᠢ ᠪᠢ ᠬᠠᠷᠠᠯᠠ᠃ 10 ᠲᠡᠳᠡ ᠶᠡᠬᠡ ᠳᠠᠭᠤ ᠪᠠᠷ᠄ 《ᠠᠷᠢᠭᠤᠨ ᠪᠠ ᠦᠨᠡᠨ ᠡᠵᠡᠨ ᠡ᠂ ᠲᠠ ᠬᠡᠳᠦᠢ ᠬᠦᠷᠲᠡᠯᠡ ᠭᠠᠵᠠᠷ ᠳᠡᠭᠡᠷᠡ ᠰᠠᠭᠤᠭᠴᠢᠳ ᠢ ᠰᠢᠭᠦᠬᠦ ᠦᠭᠡᠢ᠂ ᠪᠢᠳᠡᠨ ᠦ ᠴᠢᠰᠤᠨ ᠥᠰᠢᠶᠡ ᠶᠢ ᠲᠡᠳᠡᠨ ᠡᠴᠡ ᠠᠪᠬᠤ ᠦᠭᠡᠢ ᠪᠠᠢᠬᠤ ᠶᠤᠮ ᠪᠤᠢ︖》 ᠭᠡᠵᠦ ᠬᠠᠰᠬᠢᠷᠪᠠ᠃ 11 ᠲᠡᠭᠡᠬᠦ ᠳᠦ᠂ ᠲᠡᠳᠡᠨ ᠳᠦ ᠲᠤᠰ ᠪᠦᠷᠢ ᠴᠠᠭᠠᠨ ᠨᠥᠮᠥᠷᠭᠡ ᠥᠭᠭᠥᠭᠳᠡᠭᠰᠡᠨ ᠪᠥᠭᠡᠳ 《ᠲᠠ ᠨᠠᠷ ᠮᠡᠲᠦ ᠠᠯᠠᠭᠳᠠᠬᠤ ᠨᠠᠢᠵᠠ ᠵᠠᠷᠤᠴᠠ ᠨᠠᠷ ᠪᠣᠯᠣᠨ ᠠᠬᠠ ᠳᠡᠭᠦᠦᠰ ᠦᠨ ᠴᠢᠨᠢ ᠲᠣᠭᠠ ᠭᠦᠢᠴᠡᠬᠦ ᠬᠦᠷᠲᠡᠯᠡ ᠲᠠ ᠨᠠᠷ ᠲᠦᠷ ᠵᠠᠭᠤᠷᠠ ᠠᠮᠠᠷᠠᠵᠤ ᠪᠠᠢ》 ᠭᠡᠵᠦ ᠲᠡᠳᠡᠨ ᠳᠦ ᠬᠡᠯᠡᠯᠡ᠃
12 ᠬᠤᠷᠠᠭᠠ ᠵᠢᠷᠭᠤᠳᠠᠬᠢ ᠲᠠᠮᠠᠭᠠ ᠶᠢ ᠵᠠᠳᠠᠯᠬᠤ ᠶᠢ ᠪᠢ ᠬᠠᠷᠠᠯᠠ᠃ ᠭᠠᠵᠠᠷ ᠬᠦᠴᠦᠲᠡᠢ ᠬᠥᠳᠡᠯᠦᠭᠰᠡᠨ ᠳᠦ᠂ ᠨᠠᠷᠠ ᠬᠢᠯᠭᠠᠰᠤ ᠪᠠᠷ ᠨᠡᠬᠡᠭᠰᠡᠨ ᠲᠠᠭᠠᠷ ᠮᠡᠲᠦ ᠬᠠᠷᠠᠯᠠᠨ᠂ ᠰᠠᠷᠠ ᠪᠦᠬᠦᠯᠢ ᠳᠡᠭᠡᠨ ᠴᠢᠰᠤ ᠮᠡᠲᠦ ᠪᠣᠯᠵᠤ᠂ 13 ᠲᠩᠷᠢ ᠶᠢᠨ ᠣᠳᠣᠳ ᠨᠢ ᠢᠨᠵᠢᠷ ᠤᠨ ᠮᠣᠳᠣ ᠶᠡᠬᠡ ᠰᠠᠯᠬᠢᠨ ᠳᠤ ᠭᠠᠩ᠋ᠬᠤᠬᠤ ᠳᠤ ᠪᠣᠯᠪᠠᠰᠤᠷᠠᠭᠠ ᠦᠭᠡᠢ ᠵᠢᠮᠢᠰ ᠨᠢ ᠤᠨᠠᠳᠠᠭ ᠰᠢᠭ᠋ ᠭᠠᠵᠠᠷ ᠲᠤ ᠤᠨᠠᠪᠠ᠃ 14 ᠲᠩᠷᠢ ᠨᠢ ᠬᠤᠢᠯᠠᠮᠠᠯ ᠬᠤᠢᠯᠠᠭᠳᠠᠬᠤ ᠮᠡᠲᠦ ᠢᠷᠠᠭᠳᠠᠵᠤ᠂ ᠬᠠᠮᠤᠭ ᠠᠭᠤᠯᠠ ᠪᠠ ᠠᠷᠠᠯ ᠪᠠᠢᠷᠢ ᠡᠴᠡ ᠪᠡᠨ ᠰᠢᠯᠵᠢᠵᠡᠢ᠃ 15 ᠲᠡᠭᠡᠬᠦ ᠳᠦ᠂ ᠭᠠᠵᠠᠷ ᠤᠨ ᠬᠠᠭᠠᠳ᠂ ᠨᠣᠶᠠᠳ᠂ ᠵᠠᠩᠵᠤᠨ ᠨᠠᠷ᠂ ᠪᠠᠶᠠᠴᠤᠳ᠂ ᠬᠦᠴᠦᠲᠡᠳ ᠬᠢᠭᠡᠳ ᠪᠣᠭᠣᠯ ᠪᠠ ᠴᠢᠯᠥᠭᠡᠲᠦ ᠬᠥᠮᠦᠨ ᠪᠦᠭᠦᠳᠡᠭᠡᠷ ᠢᠶᠡᠨ ᠠᠭᠤᠢ ᠪᠠ ᠠᠭᠤᠯᠠ ᠬᠠᠳᠠᠨ ᠤ ᠬᠠᠪᠴᠢᠯ ᠳᠤ ᠳᠠᠯᠳᠠᠯᠠᠭᠠᠳ 16 ᠠᠭᠤᠯᠠ ᠪᠠ ᠬᠠᠳᠠᠨ ᠳᠤ᠄ 《ᠪᠢᠳᠡᠨ ᠦ ᠳᠡᠭᠡᠷᠡ ᠤᠨᠠᠭᠠᠴᠢ᠂ ᠰᠡᠨᠲᠢ ᠳᠤ ᠵᠠᠯᠠᠷᠠᠭᠴᠢ ᠶᠢᠨ ᠨᠢᠭᠤᠷ ᠪᠠ ᠬᠤᠷᠠᠭᠠᠨ ᠤ ᠬᠢᠯᠢᠩ ᠡᠴᠡ ᠪᠢᠳᠡᠨ ᠢ ᠳᠠᠯᠳᠠᠯᠠᠭᠠᠴᠢ︕ 17 ᠬᠢᠯᠢᠩ ᠤᠨ ᠶᠡᠬᠡ ᠡᠳᠦᠷ ᠢᠷᠡᠵᠡᠢ᠂ ᠬᠡᠨ ᠲᠡᠰᠴᠦ ᠴᠢᠳᠠᠬᠤ ᠪᠢᠯᠡ︖》 ᠭᠡᠵᠡᠭᠡᠪᠡ᠃