ᠢᠯᠡᠷᠬᠡᠶᠢᠯᠡᠯᠭᠡ ᠠᠷᠪᠠᠨ ᠲᠠᠪᠤ
ᠢᠯᠠᠯᠲᠠ ᠶᠢᠨ ᠳᠠᠭᠤᠤ
1 ᠲᠩᠷᠢ ᠳᠡᠭᠡᠷᠡᠬᠢ ᠠᠤᠭᠠ ᠪᠥᠭᠡᠳ ᠭᠠᠢᠬᠠᠮᠰᠢᠭ ᠲᠠᠢ ᠥᠭᠡᠷᠡ ᠨᠢᠭᠡᠨ ᠲᠡᠮᠳᠡᠭ ᠢ ᠪᠢ ᠬᠠᠷᠠᠪᠠ᠃ ᠡᠴᠦᠰ ᠦᠨ ᠳᠣᠯᠣᠭᠠᠨ ᠭᠠᠮᠰᠢᠭ ᠲᠠᠢ ᠳᠣᠯᠣᠭᠠᠨ ᠲᠩᠷᠢ ᠡᠯᠴᠢ ᠪᠠᠢᠵᠠᠢ᠃ ᠡᠳᠡᠭᠡᠷ ᠭᠠᠮᠰᠢᠭ ᠢᠶᠠᠷ ᠪᠤᠷᠬᠠᠨ ᠤ ᠠᠭᠤᠷ ᠬᠢᠯᠢᠩ ᠲᠡᠭᠦᠰᠬᠦ ᠪᠣᠯᠣᠨᠠ᠃
2 ᠪᠠᠰᠠ ᠭᠠᠯ ᠲᠠᠢ ᠬᠣᠯᠢᠯᠳᠤᠭᠰᠠᠨ ᠰᠢᠯ ᠤᠨ ᠳᠠᠯᠠᠢ ᠮᠡᠲᠦ ᠶᠠᠭᠤᠮᠠ ᠶᠢ ᠪᠢ ᠬᠠᠷᠠᠯᠠ᠃ ᠥᠨᠥᠬᠢ ᠠᠷᠢᠶᠠᠲᠠᠨ᠂ ᠠᠷᠢᠶᠠᠲᠠᠨ ᠤ ᠬᠥᠷᠥᠭ ᠱᠤᠭᠤᠮᠠᠯ ᠪᠠ ᠨᠡᠷᠡ ᠶᠢᠨ ᠲᠣᠭᠠ ᠠᠴᠠ ᠢᠯᠠᠯᠲᠠ ᠲᠠᠢ ᠭᠠᠷᠤᠭᠰᠠᠳ ᠪᠤᠷᠬᠠᠨ ᠤ ᠶᠠᠲᠤᠭᠠ ᠶᠢ ᠪᠠᠷᠢᠨ ᠰᠢᠯ ᠤᠨ ᠳᠠᠯᠠᠢ ᠳᠡᠭᠡᠷᠡ ᠵᠣᠭᠰᠣᠵᠤ ᠪᠠᠢᠪᠠ᠃ 3 ᠲᠡᠳᠡ ᠪᠤᠷᠬᠠᠨ ᠤ ᠵᠠᠷᠤᠴᠠ ᠮᠣᠰᠧ ᠶᠢᠨ ᠳᠠᠭᠤᠤ ᠬᠢᠭᠡᠳ ᠬᠤᠷᠠᠭᠠᠨ ᠤ ᠳᠠᠭᠤᠤ ᠶᠢ ᠳᠠᠭᠤᠯᠠᠨ᠄ 《ᠲᠠᠨ ᠤ ᠦᠢᠯᠡᠰ ᠠᠭᠤᠤ ᠪᠥᠭᠡᠳ ᠭᠠᠢᠬᠠᠮᠰᠢᠭ ᠲᠠᠢ ᠲᠡᠭᠦᠰ ᠬᠦᠴᠦᠲᠦ ᠡᠵᠡᠨ ᠪᠤᠷᠬᠠᠨ ᠡ︕ ᠲᠠᠨ ᠤ ᠵᠠᠮ ᠵᠥᠪ ᠪᠥᠭᠡᠳ ᠦᠨᠡᠨ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠦᠨ ᠬᠠᠭᠠᠨ ᠡ︕
4 ᠡᠵᠡᠨ ᠡ᠂ ᠲᠠᠨ ᠠᠴᠠ ᠬᠡᠨ ᠡᠮᠢᠶᠡᠬᠦ ᠦᠭᠡᠢ ᠪᠤᠢ︖ ᠲᠠᠨ ᠤ ᠨᠡᠷᠡ ᠶᠢ ᠬᠡᠨ ᠠᠯᠳᠠᠷᠰᠢᠭᠤᠯᠬᠤ ᠦᠭᠡᠢ ᠪᠤᠢ︖ ᠭᠠᠭᠴᠠ ᠬᠦ ᠲᠠ ᠯᠠ ᠠᠷᠢᠭᠤᠨ ᠲᠠᠨ ᠤ ᠵᠥᠪ ᠦᠢᠯᠡᠰ ᠢᠯᠡᠷᠬᠡᠶᠢᠯᠡᠭᠳᠡᠭᠰᠡᠨ ᠲᠤᠯᠠ ᠬᠠᠮᠤᠭ ᠦᠨᠳᠦᠰᠦᠲᠡᠨ ᠢᠷᠡᠵᠦ ᠲᠠᠨ ᠤ ᠡᠮᠦᠨᠡ ᠮᠥᠷᠭᠥᠨᠡ》 ᠭᠡᠵᠡᠭᠡᠪᠡ᠃
ᠳᠣᠯᠣᠭᠠᠨ ᠲᠠᠪᠠᠭ ᠲᠠᠢ ᠪᠤᠷᠬᠠᠨ ᠤ ᠬᠢᠯᠢᠩ
5 ᠡᠳᠡᠭᠡᠷ ᠦᠨ ᠳᠠᠷᠠᠭᠠ᠂ ᠲᠩᠷᠢ ᠳᠡᠭᠡᠷᠡ ᠥᠷᠭᠥᠭᠡ᠂ ᠲᠤᠬᠠᠢᠯᠠᠪᠠᠯ ᠭᠡᠷᠡᠴᠢᠯᠡᠯ ᠦᠨ ᠴᠠᠴᠠᠷ ᠨᠡᠭᠡᠭᠡᠭᠳᠡᠬᠦ ᠶᠢ ᠪᠢ ᠬᠠᠷᠠᠪᠠ᠃ 6 ᠳᠣᠯᠣᠭᠠᠨ ᠭᠠᠮᠰᠢᠭ ᠲᠠᠢ ᠳᠣᠯᠣᠭᠠᠨ ᠲᠩᠷᠢ ᠡᠯᠴᠢ ᠥᠷᠭᠥᠭᠡᠨ ᠡᠴᠡ ᠭᠠᠷᠤᠯᠠ᠃ ᠲᠡᠳᠡ ᠭᠢᠯᠠᠯᠵᠠᠭᠰᠠᠨ ᠴᠡᠪᠡᠷ ᠥᠷᠮᠥᠭ ᠬᠤᠪᠴᠠᠰᠤ ᠲᠠᠢ᠂ ᠴᠡᠭᠡᠵᠢᠨ ᠳᠡᠭᠡᠨ ᠠᠯᠲᠠᠨ ᠪᠦᠰᠡ ᠲᠠᠢ ᠪᠠᠢᠭᠰᠠᠨ᠃ 7 ᠲᠡᠭᠡᠬᠦ ᠳᠦ᠂ ᠳᠥᠷᠪᠡᠨ ᠠᠮᠢᠳᠤ ᠪᠡᠶᠡᠲᠡᠨ ᠦ ᠳᠤᠮᠳᠠ ᠠᠴᠠ ᠨᠢᠭᠡ ᠨᠢ ᠳᠣᠯᠣᠭᠠᠨ ᠲᠩᠷᠢ ᠡᠯᠴᠢ ᠳᠤ ᠥᠨᠢ ᠮᠥᠩᠬᠡ ᠠᠮᠢᠳᠤᠷᠠᠭᠴᠢ ᠪᠤᠷᠬᠠᠨ ᠤ ᠠᠭᠤᠷ ᠬᠢᠯᠢᠩ ᠢᠶᠠᠷ ᠳᠦᠭᠦᠷᠦᠭᠰᠡᠨ ᠳᠣᠯᠣᠭᠠᠨ ᠠᠯᠲᠠᠨ ᠲᠠᠪᠠᠭ ᠢ ᠥᠭᠪᠡ᠃ 8 ᠪᠤᠷᠬᠠᠨ ᠤ ᠠᠯᠳᠠᠷ ᠪᠠ ᠬᠦᠴᠦ ᠴᠢᠳᠠᠯ ᠤᠨ ᠤᠲᠤᠭᠠ ᠥᠷᠭᠥᠭᠡ ᠶᠢ ᠳᠦᠭᠦᠷᠭᠡᠪᠡ᠃ ᠳᠣᠯᠣᠭᠠᠨ ᠲᠩᠷᠢ ᠡᠯᠴᠢ ᠶᠢᠨ ᠳᠣᠯᠣᠭᠠᠨ ᠭᠠᠮᠰᠢᠭ ᠳᠠᠭᠤᠰᠲᠠᠯᠠ ᠬᠡᠨ ᠴᠤ ᠥᠷᠭᠥᠭᠡᠨ ᠳᠦ ᠣᠷᠣᠵᠤ ᠴᠢᠳᠠᠭᠰᠠᠨ ᠦᠭᠡᠢ᠃