ᠢᠯᠡᠷᠬᠡᠶᠢᠯᠡᠯᠭᠡ ᠬᠣᠷᠢᠨ ᠬᠣᠶᠠᠷ
1 ᠲᠩᠷᠢ ᠡᠯᠴᠢ ᠨᠠᠳᠠ ᠳᠤ ᠪᠣᠯᠣᠷ ᠮᠡᠲᠦ ᠲᠤᠩ᠋ᠭᠠᠯᠠᠭ ᠠᠮᠢ ᠶᠢᠨ ᠤᠰᠤᠨ ᠤ ᠭᠣᠣᠯ ᠢ ᠦᠵᠡᠭᠦᠯᠪᠡ᠃ ᠭᠣᠣᠯ ᠨᠢ ᠪᠤᠷᠬᠠᠨ ᠪᠠ ᠬᠤᠷᠠᠭᠠᠨ ᠤ ᠰᠡᠨᠲᠢ ᠡᠴᠡ ᠭᠠᠷᠴᠤ᠂ 2 ᠬᠣᠲᠠ ᠶᠢᠨ ᠵᠡᠭᠡᠯᠢ ᠳᠤᠮᠳᠠᠭᠤᠷ ᠤᠷᠤᠰᠴᠤ ᠪᠠᠢᠯᠠ᠃ ᠭᠣᠣᠯ ᠤᠨ ᠨᠠᠭᠠᠨᠠ ᠪᠠ ᠴᠠᠭᠠᠨᠠ ᠠᠮᠢ ᠶᠢᠨ ᠮᠣᠳᠣ ᠪᠤᠢ᠂ ᠡᠨᠡ ᠮᠣᠳᠣ ᠠᠷᠪᠠᠨ ᠬᠣᠶᠠᠷ ᠲᠥᠷᠥᠯ ᠦᠨ ᠵᠢᠮᠢᠰ ᠲᠠᠢ ᠪᠥᠭᠡᠳ ᠰᠠᠷᠠ ᠪᠦᠷᠢ ᠵᠢᠮᠢᠰ ᠰᠠᠭᠤᠳᠠᠭ᠃ ᠮᠣᠳᠣᠨ ᠤ ᠨᠠᠪᠴᠢᠰ ᠨᠢ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠢ ᠡᠳᠡᠭᠡᠭᠡᠬᠦ ᠪᠣᠯᠣᠨᠠ᠃ 3 ᠴᠢᠨᠠᠭᠰᠢᠳᠠ ᠬᠠᠷᠢᠶᠠᠯ ᠭᠡᠵᠦ ᠪᠠᠢᠬᠤ ᠦᠭᠡᠢ᠃ ᠪᠤᠷᠬᠠᠨ ᠪᠠ ᠬᠤᠷᠠᠭᠠᠨ ᠤ ᠰᠡᠨᠲᠢ ᠲᠡᠨᠳᠡ ᠪᠠᠢᠬᠤ ᠪᠣᠯᠣᠨᠠ᠂ ᠵᠠᠷᠤᠴᠠ ᠨᠠᠷ ᠨᠢ ᠲᠡᠭᠦᠨ ᠳᠦ ᠦᠢᠯᠡᠴᠢᠯᠡᠵᠦ᠂ 4 ᠪᠤᠷᠬᠠᠨ ᠤ ᠨᠢᠭᠤᠷ ᠢ ᠬᠠᠷᠠᠬᠤ ᠪᠣᠯᠣᠨᠠ᠂ ᠲᠡᠳᠡᠨ ᠦ ᠮᠠᠩᠨᠠᠢ ᠳᠡᠭᠡᠷᠡ ᠪᠤᠷᠬᠠᠨ ᠤ ᠨᠡᠷᠡ ᠪᠤᠢ᠃ 5 ᠴᠢᠨᠠᠭᠰᠢᠳᠠ ᠰᠥᠨᠢ ᠭᠡᠵᠦ ᠪᠠᠢᠬᠤ ᠦᠭᠡᠢ᠃ ᠳ᠋ᠧᠩ ᠤᠨ ᠭᠡᠷᠡᠯ ᠪᠤᠶᠤ ᠨᠠᠷᠠᠨ ᠤ ᠭᠡᠷᠡᠯ ᠴᠤ ᠬᠡᠷᠡᠭ ᠦᠭᠡᠢ᠃ ᠤᠴᠢᠷ ᠨᠢ᠂ ᠡᠵᠡᠨ ᠪᠤᠷᠬᠠᠨ ᠲᠡᠳᠡᠨ ᠦ ᠳᠡᠭᠡᠷᠡ ᠭᠡᠷᠡᠯᠲᠦᠭᠦᠯᠬᠦ ᠶᠤᠮ᠃ ᠲᠡᠳᠡ ᠥᠨᠢ ᠮᠥᠩᠬᠡᠳᠡ ᠬᠠᠭᠠᠨᠴᠢᠯᠠᠨᠠ᠃
ᠡᠵᠡᠨ ᠢᠷᠡᠬᠦ
6 ᠥᠨᠥᠬᠢ ᠲᠩᠷᠢ ᠡᠯᠴᠢ ᠨᠠᠳᠠ ᠳᠤ᠄ 《ᠡᠳᠡᠭᠡᠷ ᠦᠭᠡᠰ ᠢᠲᠡᠭᠡᠮᠵᠢᠲᠦ ᠪᠥᠭᠡᠳ ᠦᠨᠡᠨ ᠶᠤᠮ᠂ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠲᠤ ᠰᠦᠨᠡᠰᠦ ᠪᠡᠨ ᠰᠣᠶᠣᠷᠬᠠᠭᠴᠢ ᠡᠵᠡᠨ ᠪᠤᠷᠬᠠᠨ ᠤᠳᠠᠯ ᠦᠭᠡᠢ ᠶᠠᠭᠤ ᠶᠠᠭᠤ ᠲᠣᠬᠢᠶᠠᠯᠳᠤᠬᠤ ᠶᠣᠰᠣᠲᠠᠢ ᠶᠢ ᠵᠠᠷᠤᠴᠠ ᠨᠠᠷ ᠲᠠᠭᠠᠨ ᠦᠵᠡᠭᠦᠯᠬᠦ ᠶᠢᠨ ᠲᠤᠯᠠᠳᠠ ᠲᠩᠷᠢ ᠡᠯᠴᠢ ᠪᠠᠨ ᠢᠯᠡᠭᠡᠭᠰᠡᠨ ᠶᠤᠮ》 ᠭᠡᠪᠡ᠃
7 《ᠠᠩ᠋ᠬᠠᠷᠤᠭᠲᠤᠨ᠂ ᠪᠢ ᠤᠳᠠᠬᠤ ᠦᠭᠡᠢ ᠢᠷᠡᠨᠡ᠂ ᠡᠨᠡ ᠨᠣᠮ ᠤᠨ ᠡᠰᠢ ᠦᠵᠡᠭᠦᠯᠦᠯᠭᠡ ᠶᠢᠨ ᠦᠭᠡᠰ ᠢ ᠰᠠᠬᠢᠭᠴᠢ ᠨᠢ ᠪᠤᠶᠠᠨ ᠲᠠᠢ︕》
8 ᠡᠳᠡᠭᠡᠷ ᠢ ᠦᠵᠡᠵᠦ ᠰᠣᠨᠣᠰᠣᠭᠴᠢ ᠨᠢ ᠶᠣᠬᠠᠨ ᠪᠢ ᠪᠠᠢᠨᠠ᠃ ᠪᠢ ᠦᠵᠡᠵᠦ ᠰᠣᠨᠣᠰᠬᠤ ᠳᠠᠭᠠᠨ᠂ ᠡᠳᠡᠭᠡᠷ ᠢ ᠨᠠᠳᠠ ᠳᠤ ᠦᠵᠡᠭᠦᠯᠦᠭᠰᠡᠨ ᠲᠩᠷᠢ ᠡᠯᠴᠢ ᠶᠢᠨ ᠬᠥᠯ ᠦᠨ ᠡᠮᠦᠨᠡ ᠡᠯᠢᠭᠡᠳᠡᠨ ᠤᠨᠠᠵᠤ ᠮᠥᠷᠭᠥᠬᠦ ᠭᠡᠵᠦ ᠪᠠᠢᠪᠠ᠃ 9 ᠬᠠᠷᠢᠨ ᠲᠡᠷᠡ ᠨᠠᠳᠠ ᠳᠤ᠄ 《ᠪᠣᠯᠢ᠂ ᠪᠢ ᠴᠤ ᠴᠢᠮᠠ ᠲᠠᠢ ᠠᠳᠠᠯᠢᠬᠠᠨ ᠵᠠᠷᠤᠴᠠ ᠶᠤᠮ᠂ ᠴᠢ ᠪᠣᠯᠣᠨ ᠴᠢᠨᠦ ᠠᠬᠠ ᠳᠡᠭᠦᠦ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠬᠢᠭᠡᠳ ᠡᠨᠡ ᠨᠣᠮ ᠤᠨ ᠦᠭᠡᠰ ᠢ ᠰᠠᠬᠢᠭᠴᠢᠳ ᠲᠠᠢ ᠠᠳᠠᠯᠢᠬᠠᠨ᠃ ᠪᠤᠷᠬᠠᠨ ᠳᠤ ᠯᠠ ᠮᠥᠷᠭᠥᠭᠲᠦᠨ》 ᠭᠡᠪᠡ᠃
10 ᠪᠠᠰᠠ ᠨᠠᠳᠠ ᠳᠤ᠄ 《ᠡᠨᠡ ᠨᠣᠮ ᠤᠨ ᠡᠰᠢ ᠦᠵᠡᠭᠦᠯᠦᠯᠭᠡ ᠶᠢᠨ ᠦᠭᠡᠰ ᠢ ᠪᠢᠲᠡᠭᠡᠢ ᠪᠢᠲᠡᠭᠦᠮᠵᠢᠯᠡ᠃ ᠴᠠᠭ ᠣᠢᠷᠠᠲᠤᠭᠰᠠᠨ ᠪᠠᠢᠨᠠ᠃ 11 ᠵᠥᠪᠲᠦ ᠪᠤᠰᠤ ᠬᠥᠮᠦᠨ ᠵᠥᠪᠲᠦ ᠪᠤᠰᠤ ᠪᠠᠨ ᠦᠢᠯᠡᠳᠦᠭ᠂ ᠪᠣᠬᠢᠷ ᠬᠥᠮᠦᠨ ᠪᠣᠬᠢᠷ ᠢᠶᠠᠨ ᠦᠢᠯᠡᠳᠦᠭ᠂ ᠵᠥᠪᠲᠦ ᠬᠥᠮᠦᠨ ᠵᠥᠪ ᠢᠶᠡᠨ ᠦᠢᠯᠡᠳᠦᠭ᠂ ᠠᠷᠢᠭᠤᠨ ᠬᠥᠮᠦᠨ ᠠᠷᠢᠭᠤᠨ ᠢᠶᠠᠨ ᠦᠢᠯᠡᠳᠦᠭ》 ᠭᠡᠪᠡ᠃
12 《ᠠᠩ᠋ᠬᠠᠷᠤᠭᠲᠤᠨ︕ ᠪᠢ ᠤᠳᠠᠬᠤ ᠦᠭᠡᠢ ᠢᠷᠡᠨᠡ︕ ᠨᠠᠳᠠ ᠳᠤ ᠱᠠᠩᠨᠠᠯ ᠪᠤᠢ᠂ ᠬᠥᠮᠦᠨ ᠪᠦᠷᠢ ᠳᠤ ᠦᠢᠯᠡᠰ ᠦᠨ ᠬᠢᠨᠢ ᠶᠣᠰᠣᠭᠠᠷ ᠥᠭᠭᠥᠨᠡ᠃ 13 ᠪᠢ ᠪᠣᠯ ᠠᠯᠹᠠ ᠪᠠ ᠣᠮᠧᠭᠠ 34 ᠂ ᠡᠬᠢᠨ ᠪᠠ ᠡᠴᠦᠰ᠂ ᠡᠬᠢᠯᠡᠯ ᠪᠠ ᠲᠡᠭᠦᠰᠬᠡᠯ ᠮᠥᠨ᠃》
14 ᠠᠮᠢ ᠶᠢᠨ ᠮᠣᠳᠣ ᠤᠷᠤᠭᠤ ᠣᠴᠢᠬᠤ ᠡᠷᠬᠡ ᠶᠢ ᠣᠯᠣᠭᠠᠳ ᠬᠠᠭᠠᠯᠭᠠ ᠪᠠᠷ ᠬᠣᠲᠠ ᠤᠷᠤᠭᠤ ᠣᠷᠣᠬᠤ ᠶᠢᠨ ᠲᠤᠯᠠᠳᠠ ᠨᠥᠮᠥᠷᠭᠡ ᠪᠡᠨ ᠤᠬᠢᠶᠠᠭᠴᠢᠳ ᠪᠤᠶᠠᠨ ᠲᠠᠢ︕ 15 ᠬᠠᠷᠢᠨ ᠨᠣᠬᠠᠳ᠂ ᠶᠢᠯᠸᠢᠴᠢᠳ᠂ ᠰᠠᠳᠤᠷᠯᠠᠭᠴᠢᠳ᠂ ᠬᠥᠮᠦᠨ ᠠᠯᠠᠭᠴᠢ᠂ ᠰᠢᠲᠦᠭᠡᠨ ᠳᠦ ᠮᠥᠷᠭᠥᠭᠴᠢᠳ ᠪᠠ ᠳᠤᠷᠠᠲᠠᠶᠠ ᠬᠤᠳᠠᠯ ᠬᠡᠯᠡᠭᠴᠢᠳ ᠭᠠᠳᠠᠨᠠ ᠪᠠᠢᠬᠤ ᠪᠣᠯᠣᠨᠠ᠃
16 《ᠢᠰᠦ᠋ᠰ ᠪᠢ ᠴᠢᠭᠤᠯᠭᠠᠨ ᠨᠤᠭᠤᠳ ᠲᠤ ᠵᠣᠷᠢᠭᠤᠯᠵᠤ᠂ ᠡᠳᠡᠭᠡᠷ ᠢ ᠲᠠ ᠨᠠᠷ ᠲᠤ ᠭᠡᠷᠡᠴᠢᠯᠡᠬᠦ ᠶᠢᠨ ᠲᠤᠯᠠᠳᠠ ᠡᠯᠴᠢ ᠪᠠᠨ ᠢᠯᠡᠭᠡᠪᠡ᠃ ᠪᠢ ᠪᠣᠯ ᠳ᠋ᠠᠸᠢᠳ᠋ ᠤᠨ ᠦᠨᠳᠦᠰᠦ ᠪᠠ ᠤᠳᠤᠮ ᠮᠥᠨ᠃ ᠪᠢ ᠪᠣᠯ ᠭᠡᠷᠡᠯᠲᠦ ᠴᠣᠯᠮᠣᠨ ᠮᠥᠨ᠃》 17 ᠠᠷᠢᠭᠤᠨ ᠰᠦᠨᠡᠰᠦ ᠪᠠ ᠰᠢᠨᠡ ᠪᠡᠷᠢ᠄ 《ᠢᠷᠡᠭᠡᠷᠡᠢ᠂ ᠲᠠ︕》 ᠭᠡᠵᠡᠭᠡᠵᠦ ᠪᠠᠢᠨᠠ᠂ ᠰᠣᠨᠣᠰᠣᠭᠴᠢ ᠨᠢ ᠴᠤ᠄ 《ᠢᠷᠡᠭᠡᠷᠡᠢ᠂ ᠲᠠ︕》 ᠭᠡᠵᠦ ᠬᠡᠯᠡᠭᠲᠦᠨ᠃ ᠴᠠᠩ᠋ᠭᠠᠭᠴᠢᠳ ᠢᠷᠡᠭᠲᠦᠨ︕ ᠠᠮᠢ ᠶᠢᠨ ᠤᠰᠤ ᠶᠢ ᠬᠦᠰᠡᠭᠴᠢᠳ ᠦᠨᠡ ᠦᠭᠡᠢ ᠪᠠᠷ ᠬᠦᠷᠲᠡᠭᠡᠷᠡᠢ︕
18 ᠡᠨᠡ ᠨᠣᠮ ᠤᠨ ᠡᠰᠢ ᠦᠵᠡᠭᠦᠯᠦᠯᠭᠡ ᠶᠢᠨ ᠦᠭᠡᠰ ᠢ ᠰᠣᠨᠣᠰᠣᠭᠴᠢ ᠪᠦᠬᠦᠨ ᠳᠦ ᠪᠢ ᠠᠩ᠋ᠬᠠᠷᠤᠭᠤᠯᠤᠶᠠ᠃ ᠬᠡᠨ ᠴᠤ ᠭᠡᠰᠡᠨ᠂ ᠡᠳᠡᠭᠡᠷ ᠦᠨ ᠳᠡᠭᠡᠷᠡ ᠨᠡᠮᠡᠪᠡᠯ ᠡᠨᠡ ᠨᠣᠮ ᠳᠤ ᠪᠢᠴᠢᠭᠳᠡᠭᠰᠡᠨ ᠭᠠᠮᠰᠢᠭ ᠤᠳ ᠢ ᠪᠤᠷᠬᠠᠨ ᠲᠡᠷᠡ ᠬᠥᠮᠦᠨ ᠦ ᠳᠡᠭᠡᠷᠡ ᠨᠡᠮᠡᠨᠡ᠃ 19 ᠬᠡᠨ ᠴᠤ ᠭᠡᠰᠡᠨ᠂ ᠡᠰᠢ ᠦᠵᠡᠭᠦᠯᠦᠯᠭᠡ ᠶᠢᠨ ᠨᠣᠮ ᠤᠨ ᠦᠭᠡᠰ ᠡᠴᠡ ᠬᠠᠰᠤᠪᠠᠯ ᠡᠨᠡ ᠨᠣᠮ ᠳᠤ ᠪᠢᠴᠢᠭᠳᠡᠭᠰᠡᠨ ᠠᠮᠢ ᠶᠢᠨ ᠮᠣᠳᠣ ᠪᠠ ᠠᠷᠢᠭᠤᠨ ᠬᠣᠲᠠ ᠠᠴᠠ ᠣᠯᠬᠤ ᠲᠡᠭᠦᠨ ᠦ ᠬᠤᠪᠢ ᠶᠢ ᠪᠤᠷᠬᠠᠨ ᠬᠠᠰᠤᠨᠠ᠃
20 ᠡᠳᠡᠭᠡᠷ ᠢ ᠭᠡᠷᠡᠴᠢᠯᠡᠭᠴᠢ ᠨᠢ᠄ 《ᠲᠡᠢᠮᠦ ᠡ᠂ ᠪᠢ ᠤᠳᠠᠬᠤ ᠦᠭᠡᠢ ᠢᠷᠡᠨᠡ》 ᠬᠡᠮᠡᠵᠦ ᠪᠠᠢᠨᠠ᠃ ᠠᠮᠧᠨ︕ ᠡᠵᠡᠨ ᠢᠰᠦ᠋ᠰ ᠡ᠂ ᠢᠷᠡᠭᠡᠴᠢ︕
21 ᠡᠵᠡᠨ ᠢᠰᠦ᠋ᠰ ᠤᠨ ᠢᠪᠡᠭᠡᠯ ᠲᠠ ᠪᠦᠬᠦᠨ ᠲᠡᠢ ᠬᠠᠮᠲᠤ ᠪᠠᠢᠬᠤ ᠪᠣᠯᠲᠤᠭᠠᠢ︕