ᠢᠯᠡᠷᠬᠡᠶᠢᠯᠡᠯᠭᠡ ᠠᠷᠪᠠᠨ ᠨᠠᠢ᠌ᠮᠠ
ᠶᠡᠬᠡ ᠬᠣᠲᠠ ᠪᠠᠪᠢᠯᠣᠨ ᠤ ᠰᠦᠢᠷᠡᠯ
1 ᠡᠳᠡᠭᠡᠷ ᠦᠨ ᠳᠠᠷᠠᠭᠠ ᠶᠡᠬᠡ ᠡᠷᠬᠡ ᠮᠡᠳᠡᠯ ᠲᠡᠢ ᠥᠭᠡᠷᠡ ᠨᠢᠭᠡᠨ ᠲᠩᠷᠢ ᠡᠯᠴᠢ ᠶᠢᠨ ᠲᠩᠷᠢ ᠡᠴᠡ ᠪᠠᠭᠤᠬᠤ ᠶᠢ ᠪᠢ ᠬᠠᠷᠠᠪᠠ᠃ ᠲᠡᠭᠦᠨ ᠦ ᠴᠣᠭ ᠵᠢᠪᠬᠤᠯᠠᠩ ᠭᠠᠵᠠᠷ ᠳᠡᠯᠡᠬᠡᠢ ᠶᠢ ᠭᠡᠷᠡᠯᠲᠦᠭᠦᠯᠪᠡ᠃ 2 ᠲᠡᠷᠡ ᠬᠦᠴᠦᠲᠡᠢ ᠳᠠᠭᠤᠨ ᠢᠶᠠᠷ᠄ 《ᠨᠤᠷᠠᠵᠠᠢ᠂ ᠶᠡᠬᠡ ᠪᠠᠪᠢᠯᠣᠨ ᠨᠤᠷᠠᠭᠠᠳ ᠴᠢᠳᠬᠥᠷ ᠤᠳ ᠤᠨ ᠭᠡᠷ ᠠᠯᠢᠪᠠ ᠪᠤᠵᠠᠷ ᠰᠦᠨᠡᠰᠦᠨ ᠦ ᠭᠢᠨᠳᠠᠨ ᠠᠯᠢᠪᠠ ᠪᠤᠵᠠᠷ ᠵᠢᠭᠰᠢᠭᠦᠷᠢᠲᠡᠢ ᠰᠢᠪᠠᠭᠤᠨ ᠤ ᠭᠢᠨᠳᠠᠨ ᠪᠣᠯᠵᠠᠢ᠃
3 ᠤᠤᠯ ᠨᠢ ᠬᠠᠮᠤᠭ ᠦᠨᠳᠦᠰᠦᠲᠡᠨ ᠲᠡᠭᠦᠨ ᠲᠡᠢ ᠵᠠᠪᠬᠠᠢᠷᠠᠨ᠂ ᠠᠭᠤᠷ ᠬᠢᠯᠢᠩ ᠤᠨ ᠳᠠᠷᠠᠰᠤ ᠤᠤᠭᠤᠵᠤ ᠪᠠᠢᠭᠰᠠᠨ ᠭᠠᠵᠠᠷ ᠤᠨ ᠬᠠᠭᠠᠳ ᠲᠡᠭᠦᠨ ᠲᠡᠢ ᠵᠠᠪᠬᠠᠢᠷᠠᠵᠤ ᠭᠠᠵᠠᠷ ᠤᠨ ᠬᠤᠳᠠᠯᠳᠤᠭᠠᠴᠢᠳ ᠲᠠᠩᠰᠤᠭ ᠠᠮᠢᠳᠤᠷᠠᠯ ᠤᠨ ᠬᠢᠨᠢ ᠬᠦᠴᠦᠨ ᠳᠦ ᠪᠠᠶᠠᠵᠢᠵᠤ ᠪᠠᠢᠭᠰᠠᠨ》 ᠭᠡᠵᠦ ᠬᠠᠰᠬᠢᠷᠤᠯᠠ᠃
4 ᠲᠩᠷᠢ ᠡᠴᠡ ᠥᠭᠡᠷᠡ ᠨᠢᠭᠡ ᠳᠠᠭᠤ ᠭᠠᠷᠬᠤ ᠶᠢ ᠪᠢ ᠰᠣᠨᠣᠰᠪᠠ᠃ ᠲᠡᠷᠡ᠄ 《ᠮᠢᠨᠦ ᠠᠷᠠᠳ ᠲᠦᠮᠡᠨ ᠡ᠂ ᠲᠡᠨᠳᠡ ᠡᠴᠡ ᠭᠠᠷᠤᠭᠠᠳ ᠢᠷᠡ︕ ᠲᠡᠭᠦᠨ ᠦ ᠨᠢᠭᠦᠯ ᠳᠦ ᠪᠦᠦ ᠣᠷᠣᠯᠴᠠ᠂ ᠲᠡᠭᠦᠨ ᠦ ᠭᠠᠮᠰᠢᠭ ᠲᠤ ᠪᠦᠦ ᠥᠷᠲᠥ᠃
5 ᠲᠡᠭᠦᠨ ᠦ ᠨᠢᠭᠦᠯ ᠲᠩᠷᠢ ᠳᠤ ᠲᠤᠯᠪᠠ ᠲᠡᠭᠦᠨ ᠦ ᠵᠥᠪ ᠪᠤᠰᠤ ᠦᠢᠯᠡᠰ ᠢ ᠪᠤᠷᠬᠠᠨ ᠦᠯᠦ ᠮᠠᠷᠲᠠᠪᠠ᠃
6 ᠥᠭᠭᠥᠭᠰᠡᠨ ᠶᠣᠰᠣ ᠪᠠᠷ ᠨᠢ ᠲᠡᠭᠦᠨ ᠳᠦ ᠥᠭ᠂ ᠦᠢᠯᠡᠳᠦᠭᠰᠡᠨ ᠢ ᠨᠢ ᠲᠡᠭᠦᠨ ᠳᠦ ᠳᠠᠬᠢᠨ ᠢᠶᠠᠷ ᠦᠢᠯᠡᠳᠴᠦ ᠬᠤᠨᠳᠠᠭᠠᠯᠠᠭᠰᠠᠨ ᠢ ᠨᠢ ᠲᠡᠭᠦᠨ ᠳᠦ ᠳᠠᠬᠢᠨ ᠢᠶᠠᠷ ᠬᠤᠨᠳᠠᠭᠠᠯᠠᠵᠤ ᠥᠭ᠃
7 ᠥᠪᠡᠷ ᠢ ᠪᠠᠨ ᠳᠡᠭᠡᠳᠦᠯᠡᠨ ᠲᠠᠩᠰᠤᠭᠯᠠᠭᠰᠠᠨ ᠤ ᠬᠢᠨᠢ ᠬᠠᠷᠢᠭᠤ ᠳᠤ ᠤᠢ ᠭᠠᠰᠢᠭᠤᠨ ᠪᠠ ᠲᠠᠷᠴᠢᠯᠠᠯ ᠢ ᠲᠡᠭᠦᠨ ᠳᠦ ᠥᠭ᠂ 〈ᠪᠢ ᠬᠠᠲᠤᠨ ᠬᠠᠭᠠᠨ ᠤ ᠰᠢᠷᠡᠭᠡᠨ ᠳᠦ ᠰᠠᠭᠤᠵᠤ ᠪᠠᠢᠨᠠ ᠪᠢ ᠪᠡᠯᠪᠡᠰᠦᠨ ᠪᠢᠰᠢ ᠪᠣᠯᠬᠣᠷ ᠤᠢ ᠭᠠᠰᠢᠭᠤ ᠶᠢ ᠶᠡᠷᠦ ᠦᠵᠡᠬᠦ ᠦᠭᠡᠢ〉 ᠭᠡᠵᠦ ᠲᠡᠷᠡ ᠵᠢᠷᠦᠬᠡᠨ ᠳᠡᠭᠡᠨ ᠬᠡᠯᠡᠳᠡᠭ ᠲᠤᠯᠠ
8 ᠲᠡᠭᠦᠨ ᠦ ᠳᠡᠭᠡᠷᠡ ᠭᠠᠮᠰᠢᠭ ᠤᠳ ᠪᠤᠶᠤ ᠦᠬᠦᠯ᠂ ᠤᠢ ᠭᠠᠰᠢᠭᠤᠨ ᠪᠠ ᠥᠯᠥᠰᠬᠥᠯᠡᠩ ᠨᠢᠭᠡᠨ ᠡᠳᠦᠷ ᠦᠨ ᠳᠣᠲᠣᠷᠠ ᠪᠠᠭᠤᠵᠤ ᠲᠡᠷᠡ ᠭᠠᠯ ᠳᠤ ᠰᠢᠲᠠᠭᠠᠭᠳᠠᠬᠤ ᠪᠣᠯᠣᠨᠠ᠂ ᠲᠡᠭᠦᠨ ᠢ ᠰᠢᠭᠦᠭᠴᠢ ᠪᠤᠷᠬᠠᠨ ᠬᠦᠴᠦᠲᠡᠢ ᠪᠢᠯᠡ》
ᠭᠡᠪᠡ᠃ 9 ᠲᠡᠭᠦᠨ ᠲᠡᠢ ᠰᠠᠳᠤᠷᠯᠠᠵᠤ ᠲᠠᠩᠰᠤᠭᠯᠠᠭᠰᠠᠨ ᠭᠠᠵᠠᠷ ᠤᠨ ᠬᠠᠭᠠᠳ ᠲᠡᠭᠦᠨ ᠢ ᠰᠢᠲᠠᠭᠠᠵᠤ ᠪᠤᠢ ᠭᠠᠯ ᠤᠨ ᠤᠲᠤᠭᠠ ᠶᠢ ᠬᠠᠷᠠᠭᠠᠳ ᠤᠬᠢᠯᠠᠵᠤ ᠴᠡᠭᠡᠵᠢ ᠪᠠᠨ ᠳᠡᠯᠡᠳᠦᠨᠡ᠃ 10 ᠲᠡᠳᠡ ᠲᠠᠷᠴᠢᠯᠠᠯ ᠠᠴᠠ ᠨᠢ ᠠᠶᠤᠭᠰᠠᠨ ᠳᠠᠭᠠᠨ ᠵᠠᠢᠳᠠᠭᠤᠬᠠᠨ ᠵᠣᠭᠰᠣᠭᠠᠳ᠄ 〈ᠶᠡᠬᠡ ᠬᠣᠲᠠ ᠪᠠᠪᠢᠯᠣᠨ᠂ ᠬᠦᠴᠦᠷᠬᠡᠭ ᠬᠣᠲᠠ ᠡ᠂ ᠴᠢᠮᠠ ᠳᠤ ᠭᠠᠢ ᠪᠣᠯᠣᠯᠠ᠂ ᠭᠠᠢ ᠪᠣᠯᠣᠯᠠ︕ ᠭᠠᠭᠴᠠᠬᠠᠨ ᠴᠠᠭ ᠤᠨ ᠬᠣᠭᠣᠷᠣᠨᠳᠣ ᠰᠢᠳᠬᠡᠯ ᠴᠢᠨᠢ ᠬᠦᠷᠴᠦ ᠢᠷᠡᠵᠡᠢ〉 ᠭᠡᠵᠡᠭᠡᠨᠡ᠃
11 ᠭᠠᠵᠠᠷ ᠳᠠᠬᠢ ᠬᠤᠳᠠᠯᠳᠤᠭᠠᠴᠢᠳ ᠲᠡᠭᠦᠨ ᠦ ᠲᠥᠯᠥᠭᠡ ᠤᠬᠢᠯᠠᠵᠤ ᠭᠠᠰᠢᠭᠤᠳᠠᠨᠠ᠃ ᠤᠴᠢᠷ ᠨᠢ ᠲᠡᠳᠡᠨ ᠦ ᠪᠠᠷᠠᠭᠠ ᠶᠢ ᠬᠡᠨ ᠴᠤ ᠬᠤᠳᠠᠯᠳᠤᠨ ᠠᠪᠬᠤ ᠦᠭᠡᠢ ᠪᠣᠯᠣᠯᠠ᠃ 12 ᠪᠠᠷᠠᠭᠠ ᠨᠢ ᠭᠡᠪᠡᠯ᠂ ᠠᠯᠲᠠ᠂ ᠮᠥᠩᠭᠥ᠂ ᠡᠷᠳᠡᠨᠢ ᠶᠢᠨ ᠴᠢᠯᠠᠭᠤ᠂ ᠰᠤᠪᠤᠳ᠂ ᠨᠠᠷᠢᠨ ᠣᠯᠣᠰᠣᠨ ᠪᠥᠰ᠂ ᠨᠢᠯ ᠶᠠᠭᠠᠨ ᠪᠥᠰ᠂ ᠲᠣᠷᠭᠠ᠂ ᠴᠢᠰ ᠤᠯᠠᠭᠠᠨ ᠬᠤᠪᠴᠠᠰᠤ᠂ ᠲᠥᠷᠥᠯ ᠪᠦᠷᠢ ᠶᠢᠨ ᠠᠩᠬᠢᠯᠤᠭᠤᠨ ᠮᠣᠳᠣ᠂ ᠲᠥᠷᠥᠯ ᠪᠦᠷᠢ ᠶᠢᠨ ᠵᠠᠭᠠᠨ ᠤ ᠰᠣᠶᠣᠭᠠᠨ ᠪᠦᠲᠦᠭᠡᠭᠳᠡᠬᠦᠨ᠂ ᠦᠨᠡ ᠲᠠᠢ ᠮᠣᠳᠣ᠂ ᠵᠡᠰ᠂ ᠲᠡᠮᠦᠷ ᠪᠠ ᠭᠠᠨᠲᠢᠭ ᠴᠢᠯᠠᠭᠤ ᠪᠠᠷ ᠦᠢᠯᠡᠳᠦᠭᠰᠡᠨ ᠲᠥᠷᠥᠯ ᠪᠦᠷᠢ ᠶᠢᠨ ᠡᠳ᠋ᠯᠡᠯ᠂ 13 ᠭᠠᠪᠢᠷᠠ᠂ ᠠᠮᠲᠠᠯᠢᠭ᠂ ᠬᠦᠵᠢ᠂ ᠠᠩᠬᠢᠯᠤᠭᠤᠨ ᠲᠣᠰᠣ᠂ ᠭᠦᠭᠦᠯ᠂ ᠦᠵᠦᠮ ᠦᠨ ᠠᠷᠢᠬᠢ᠂ ᠴᠢᠳᠦᠨ ᠲᠣᠰᠣ᠂ ᠭᠤᠯᠢᠷ᠂ ᠪᠤᠭᠤᠳᠠᠢ᠂ ᠦᠬᠡᠷ ᠤᠳ᠂ ᠬᠣᠨᠢᠳ᠂ ᠮᠣᠷᠢᠳ᠂ ᠲᠡᠷᠭᠡ ᠨᠦᠭᠦᠳ᠂ ᠬᠥᠮᠦᠨ ᠦ ᠪᠡᠶᠡ ᠪᠠ ᠰᠦᠨᠡᠰᠦ ᠨᠦᠭᠦᠳ ᠪᠢᠯᠡ᠃ 14 《ᠬᠦᠰᠡᠭᠰᠡᠨ ᠵᠢᠮᠢᠰ ᠴᠢᠨᠢ ᠴᠢᠮᠠ ᠠᠴᠠ ᠬᠣᠯᠠᠳᠠᠭᠰᠠᠨ᠂ ᠠᠮᠲᠠᠲᠤ ᠰᠠᠢᠬᠠᠨ ᠵᠦᠢᠯᠡᠰ ᠴᠢᠨᠢ ᠠᠯᠳᠠᠭᠳᠠᠵᠤ ᠠᠬᠢᠨ ᠬᠡᠵᠢᠶᠡ ᠴᠤ ᠤᠯᠳᠠᠰᠢ ᠦᠭᠡᠢ ᠪᠣᠯᠵᠠᠢ᠃》 15 ᠡᠳᠡᠭᠡᠷ ᠪᠠᠷᠠᠭᠠ ᠶᠢ ᠬᠤᠳᠠᠯᠳᠤᠵᠤ᠂ ᠲᠡᠷᠡ ᠡᠮᠡᠭᠲᠡᠢ ᠶᠢᠨ ᠠᠴᠢ ᠪᠠᠷ ᠪᠠᠶᠠᠵᠢᠭᠰᠠᠨ ᠬᠤᠳᠠᠯᠳᠤᠭᠠᠴᠢᠳ ᠲᠡᠭᠦᠨ ᠦ ᠲᠠᠷᠴᠢᠯᠠᠯ ᠠᠴᠠ ᠠᠶᠤᠭᠰᠠᠨ ᠳᠠᠭᠠᠨ ᠵᠠᠢᠳᠠᠭᠤᠬᠠᠨ ᠵᠣᠭᠰᠣᠭᠠᠳ ᠤᠬᠢᠯᠠᠨ ᠭᠠᠰᠢᠭᠤᠳᠠᠵᠤ᠄
16 《ᠶᠡᠬᠡ ᠬᠣᠲᠠ ᠡ᠂ ᠴᠢᠮᠠ ᠳᠤ ᠭᠠᠢ ᠪᠣᠯᠣᠯᠠ︕ ᠨᠠᠷᠢᠨ ᠣᠯᠣᠰᠣᠨ ᠪᠥᠰ᠂ ᠨᠢᠯ ᠶᠠᠭᠠᠨ ᠪᠠ ᠴᠢᠰ ᠤᠯᠠᠭᠠᠨ ᠢᠶᠠᠷ ᠬᠤᠪᠴᠠᠰᠤᠯᠠᠨ ᠠᠯᠲᠠ᠂ ᠡᠷᠳᠡᠨᠢ ᠶᠢᠨ ᠴᠢᠯᠠᠭᠤ ᠰᠤᠪᠤᠳ ᠢᠶᠠᠷ ᠴᠢᠮᠡᠭᠰᠡᠨ ᠴᠢ
17 ᠲᠡᠢᠮᠦ ᠪᠠᠶᠠᠨ ᠪᠠᠢᠭᠰᠠᠨ ᠢᠶᠠᠨ ᠭᠠᠭᠴᠠᠬᠠᠨ ᠴᠠᠭ ᠤᠨ ᠬᠣᠭᠣᠷᠣᠨᠳᠣ ᠬᠣᠭᠣᠰᠣᠷᠠᠵᠠᠢ》
ᠭᠡᠯᠴᠡᠨᠡ᠃ ᠠᠯᠢᠪᠠ ᠣᠩ᠋ᠭᠣᠴᠠᠨ ᠤ ᠳᠠᠷᠤᠭᠠ᠂ ᠠᠯᠢᠪᠠ ᠠᠶᠠᠨᠴᠢᠨ᠂ ᠤᠰᠤᠴᠢᠳ ᠪᠠ ᠳᠠᠯᠠᠢ ᠶᠢ ᠲᠦᠰᠢᠵᠦ ᠠᠮᠢ ᠵᠢᠭᠤᠳᠠᠭ ᠬᠥᠮᠦᠨ ᠪᠦᠬᠦᠨ ᠵᠠᠢᠳᠠᠭᠤᠬᠠᠨ ᠵᠣᠭᠰᠣᠵᠤ᠂ 18 ᠬᠣᠲᠠ ᠶᠢ ᠰᠢᠲᠠᠭᠠᠵᠤ ᠪᠤᠢ ᠭᠠᠯ ᠤᠨ ᠤᠲᠤᠭᠠ ᠶᠢ ᠬᠠᠷᠠᠭᠠᠳ ᠴᠢᠩᠭ᠍ᠠ ᠳᠠᠭᠤᠨ ᠢᠶᠠᠷ᠄ 〈ᠡᠢᠮᠦ ᠶᠡᠬᠡ ᠬᠣᠲᠠ ᠬᠠᠮᠢᠭᠠ ᠠᠴᠠ ᠣᠯᠳᠠᠬᠤ ᠪᠢᠯᠡ︖〉 ᠭᠡᠯᠴᠡᠵᠦ ᠪᠠᠢᠪᠠ᠃ 19 ᠲᠡᠳᠡ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠡᠨ ᠰᠢᠷᠣᠢ ᠰᠠᠴᠤᠭᠠᠳ ᠤᠬᠢᠯᠠᠨ ᠭᠠᠰᠢᠭᠤᠳᠠᠵᠤ ᠴᠢᠩᠭ᠍ᠠ ᠳᠠᠭᠤᠨ ᠢᠶᠠᠷ᠄ 《ᠶᠡᠬᠡ ᠬᠣᠲᠠ ᠡ᠂ ᠴᠢᠮᠠ ᠳᠤ ᠭᠠᠢ ᠪᠣᠯᠣᠯᠠ᠂ ᠭᠠᠢ ᠪᠣᠯᠣᠯᠠ︕ ᠳᠠᠯᠠᠢ ᠳᠡᠭᠡᠷᠡ ᠣᠩ᠋ᠭᠣᠴᠠ ᠲᠠᠢ ᠪᠣᠯᠭᠠᠨ ᠢ ᠡᠳ᠋ ᠪᠠᠶᠠᠯᠢᠭ ᠢᠶᠠᠷ ᠢᠶᠠᠨ ᠪᠠᠶᠠᠵᠢᠭᠤᠯᠤᠭᠰᠠᠨ ᠴᠢ ᠭᠠᠭᠴᠠᠬᠠᠨ ᠴᠠᠭ ᠤᠨ ᠬᠣᠭᠣᠷᠣᠨᠳᠣ ᠬᠣᠭᠣᠰᠣᠷᠠᠵᠠᠢ᠃
20 ᠲᠩᠷᠢ᠂ ᠠᠷᠢᠭᠤᠨ ᠲᠦᠮᠡᠨ᠂ ᠰᠢᠳᠠᠷ ᠱᠠᠪᠢ ᠨᠠᠷ᠂ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠡ᠂ ᠲᠡᠭᠦᠨ ᠦ ᠳᠡᠭᠡᠷᠡ ᠪᠠᠶᠠᠷᠯᠠᠵᠠᠭᠠ︕ ᠲᠠ ᠨᠠᠷ ᠤᠨ ᠥᠰᠢᠶᠡ ᠶᠢ ᠪᠤᠷᠬᠠᠨ ᠲᠡᠭᠦᠨ ᠡᠴᠡ ᠠᠪᠴᠠᠢ》 ᠭᠡᠪᠡ᠃
21 ᠲᠡᠭᠡᠬᠦ ᠳᠦ᠂ ᠬᠦᠴᠦᠲᠦ ᠨᠢᠭᠡᠨ ᠲᠩᠷᠢ ᠡᠯᠴᠢ ᠲᠣᠮᠣ ᠲᠡᠭᠡᠷᠮᠡ ᠮᠡᠲᠦ ᠴᠢᠯᠠᠭᠤ ᠶᠢ ᠳᠠᠯᠠᠢ ᠤᠷᠤᠭᠤ ᠬᠠᠶᠠᠵᠤ᠄ 《ᠶᠡᠬᠡ ᠬᠣᠲᠠ ᠪᠠᠪᠢᠯᠣᠨ ᠡᠨᠡ ᠮᠡᠲᠦ ᠬᠦᠴᠦᠲᠡᠢ ᠬᠠᠶᠠᠭᠳᠠᠵᠤ ᠠᠬᠢᠨ ᠬᠡᠵᠢᠶᠡ ᠴᠤ ᠣᠯᠳᠠᠬᠤ ᠦᠭᠡᠢ᠃
22 ᠶᠠᠲᠤᠭᠠᠴᠢᠳ᠂ ᠬᠥᠭᠵᠢᠮᠴᠢᠳ᠂ ᠪᠢᠰᠬᠢᠭᠦᠷᠴᠢᠳ᠂ ᠪᠦᠷᠢᠶᠡᠴᠢᠳ ᠤᠨ ᠳᠠᠭᠤ ᠴᠢᠨᠦ ᠳᠣᠲᠣᠷᠠ ᠠᠬᠢᠨ ᠬᠡᠵᠢᠶᠡ ᠴᠤ ᠰᠣᠨᠣᠰᠳᠠᠬᠤ ᠦᠭᠡᠢ᠂ ᠠᠯᠢ ᠴᠤ ᠲᠥᠷᠥᠯ ᠦᠨ ᠳᠠᠷᠬᠠᠳ ᠴᠢᠨᠦ ᠳᠣᠲᠣᠷᠠ ᠠᠬᠢᠨ ᠬᠡᠵᠢᠶᠡ ᠴᠤ ᠣᠯᠳᠠᠬᠤ ᠦᠭᠡᠢ ᠲᠡᠭᠡᠷᠮᠡ ᠤᠨ ᠳᠠᠭᠤ ᠴᠢᠨᠦ ᠳᠣᠲᠣᠷᠠ ᠠᠬᠢᠨ ᠬᠡᠵᠢᠶᠡ ᠴᠤ ᠰᠣᠨᠣᠰᠳᠠᠬᠤ ᠦᠭᠡᠢ᠃
23 ᠳ᠋ᠧᠩ ᠤᠨ ᠭᠡᠷᠡᠯ ᠴᠢᠨᠦ ᠳᠣᠲᠣᠷᠠ ᠭᠡᠷᠡᠯᠲᠦᠬᠦ ᠪᠡᠨ ᠪᠣᠯᠢᠨᠠ ᠰᠢᠨᠡ ᠬᠦᠷᠭᠡᠨ᠂ ᠰᠢᠨᠡ ᠪᠡᠷᠢ ᠶᠢᠨ ᠳᠠᠭᠤ ᠴᠢᠨᠦ ᠳᠣᠲᠣᠷᠠ ᠰᠣᠨᠣᠰᠳᠠᠬᠤ ᠪᠠᠨ ᠪᠣᠯᠢᠨᠠ᠃ ᠤᠴᠢᠷ ᠨᠢ ᠴᠢᠨᠦ ᠬᠤᠳᠠᠯᠳᠤᠭᠠᠴᠢᠳ ᠭᠠᠵᠠᠷ ᠤᠨ ᠨᠣᠶᠠᠳ ᠪᠣᠯᠵᠤ ᠴᠢᠨᠦ ᠤᠪᠠᠳᠢᠰ ᠬᠠᠮᠤᠭ ᠦᠨᠳᠦᠰᠦᠲᠡᠨ ᠢ ᠮᠡᠬᠡᠯᠡᠭᠰᠡᠨ ᠪᠥᠭᠡᠳ
24 ᠡᠰᠢ ᠦᠵᠡᠭᠦᠯᠦᠭᠴᠢᠳ᠂ ᠠᠷᠢᠭᠤᠨ ᠬᠥᠮᠦᠰ ᠬᠢᠭᠡᠳ ᠭᠠᠵᠠᠷ ᠳᠡᠭᠡᠷᠡ ᠠᠯᠠᠭᠳᠠᠭᠰᠠᠨ ᠪᠦᠭᠦᠳᠡ ᠶᠢᠨ ᠴᠢᠰᠤ ᠴᠢᠨᠦ ᠳᠣᠲᠣᠷᠠ ᠠᠴᠠ ᠣᠯᠳᠠᠭᠰᠠᠨ ᠶᠤᠮ》 ᠭᠡᠪᠡ᠃