ᠢᠯᠡᠷᠬᠡᠶᠢᠯᠡᠯᠭᠡ ᠠᠷᠪᠠ ᠶᠢᠰᠦ
ᠪᠠᠪᠢᠯᠣᠨ ᠤ ᠰᠦᠢᠷᠡᠯ ᠳᠦ ᠪᠠᠶᠠᠷᠯᠠᠪᠠ
1 ᠡᠳᠡᠭᠡᠷ ᠦᠨ ᠳᠠᠷᠠᠭᠠ᠂ ᠲᠩᠷᠢ ᠳᠡᠭᠡᠷᠡ ᠦᠢ ᠲᠦᠮᠡᠨ ᠦ ᠬᠢ ᠮᠡᠲᠦ ᠥᠨᠳᠥᠷ ᠳᠠᠭᠤ ᠶᠢ ᠪᠢ ᠰᠣᠨᠣᠰᠪᠠ᠃ ᠲᠡᠳᠡ᠄ 《ᠬᠠᠯᠧᠯᠦ᠋ᠶᠠ 24 ︕ ᠠᠪᠤᠷᠠᠯ᠂ ᠠᠯᠳᠠᠷ ᠪᠠ ᠡᠷᠬᠡ ᠮᠡᠳᠡᠯ ᠪᠢᠳᠡᠨ ᠦ ᠪᠤᠷᠬᠠᠨ ᠤ ᠬᠢ᠃ 2 ᠲᠡᠭᠦᠨ ᠦ ᠰᠢᠭᠦᠯᠲᠡ ᠦᠨᠡᠨ ᠪᠥᠭᠡᠳ ᠵᠥᠪ︕ ᠵᠠᠪᠬᠠᠢᠷᠠᠯ ᠢᠶᠠᠷ ᠢᠶᠠᠨ ᠭᠠᠵᠠᠷ ᠢ ᠪᠤᠵᠠᠷᠯᠠᠵᠤ ᠪᠠᠢᠭᠠ ᠶᠡᠬᠡ ᠶᠠᠩ᠋ᠬᠠᠨ ᠢ ᠲᠡᠷᠡ ᠰᠢᠳᠬᠡᠵᠦ᠂ ᠵᠠᠷᠤᠴᠠ ᠨᠠᠷ ᠤᠨ ᠢᠶᠠᠨ ᠴᠢᠰᠤᠨ ᠥᠰᠢᠶᠡ ᠶᠢ ᠲᠡᠷᠡ ᠡᠮᠡᠭᠲᠡᠢ ᠶᠢᠨ ᠭᠠᠷ ᠠᠴᠠ ᠠᠪᠴᠠᠢ》 ᠭᠡᠵᠡᠭᠡᠪᠡ᠃ 3 ᠲᠡᠳᠡ ᠳᠠᠬᠢᠨ᠄ 《ᠬᠠᠯᠧᠯᠦ᠋ᠶᠠ︕ ᠲᠡᠭᠦᠨ ᠦ ᠤᠲᠤᠭᠠ ᠥᠨᠢ ᠮᠥᠩᠬᠡ ᠲᠡᠭᠦᠨ ᠡᠴᠡ ᠰᠤᠭᠤᠨᠠᠭᠯᠠᠭᠰᠠᠭᠠᠷ ᠪᠠᠢᠬᠤ ᠪᠣᠯᠣᠨᠠ》 ᠭᠡᠬᠦ ᠳᠦ᠂ 4 ᠰᠡᠨᠲᠢ ᠶᠢᠨ ᠳᠡᠭᠡᠷᠡ ᠵᠠᠯᠠᠷᠠᠭᠴᠢ ᠪᠤᠷᠬᠠᠨ ᠤ ᠡᠮᠦᠨᠡ ᠬᠣᠷᠢᠨ ᠳᠥᠷᠪᠡᠨ ᠠᠬᠠᠯᠠᠭᠴᠢ ᠪᠠ ᠳᠥᠷᠪᠡᠨ ᠠᠮᠢᠳᠤ ᠪᠡᠶᠡᠲᠡᠨ ᠡᠯᠢᠭᠡᠳᠡᠨ ᠤᠨᠠᠵᠤ ᠮᠥᠷᠭᠥᠨ᠄ 《ᠠᠮᠧᠨ᠂ ᠬᠠᠯᠧᠯᠦ᠋ᠶᠠ︕》 ᠭᠡᠯᠡ᠃
5 ᠲᠡᠭᠡᠬᠦ ᠳᠦ ᠰᠡᠨᠲᠢ ᠡᠴᠡ ᠳᠠᠭᠤ ᠭᠠᠷᠴᠤ᠄ 《ᠪᠢᠳᠡᠨ ᠦ ᠪᠤᠷᠬᠠᠨ ᠢ ᠮᠠᠭᠲᠠᠭᠲᠤᠨ︕ ᠲᠡᠭᠦᠨ ᠦ ᠬᠠᠮᠤᠭ ᠵᠠᠷᠤᠴᠠ ᠡ᠂ ᠲᠡᠭᠦᠨ ᠡᠴᠡ ᠡᠮᠢᠶᠡᠭᠴᠢ ᠶᠡᠬᠡ ᠪᠠᠭᠠ ᠦᠭᠡᠢ ᠪᠦᠭᠦᠳᠡ ᠡ︕》 ᠭᠡᠵᠦ ᠪᠠᠢᠪᠠ᠃
6 ᠦᠢ ᠲᠦᠮᠡᠨ ᠦ ᠳᠠᠭᠤ ᠮᠡᠲᠦ᠂ ᠶᠡᠬᠡ ᠤᠰᠤᠨ ᠤ ᠳᠠᠭᠤ ᠮᠡᠲᠦ᠂ ᠬᠦᠴᠦᠲᠦ ᠠᠶᠤᠩ᠋ᠭᠠ ᠶᠢᠨ ᠨᠦᠷᠬᠢᠶᠡᠨ ᠮᠡᠲᠦ ᠳᠠᠭᠤ ᠶᠢ ᠪᠢ ᠰᠣᠨᠣᠰᠪᠠ᠃ ᠳᠠᠭᠤ ᠨᠢ᠄ 《ᠬᠠᠯᠧᠯᠦ᠋ᠶᠠ︕ ᠲᠡᠭᠦᠰ ᠬᠦᠴᠦᠲᠡᠨ᠂ ᠪᠢᠳᠡᠨ ᠦ ᠡᠵᠡᠨ ᠪᠤᠷᠬᠠᠨ ᠬᠠᠭᠠᠨᠴᠢᠯᠠᠬᠤ ᠪᠣᠯᠣᠯᠠ᠃
7 ᠪᠠᠶᠠᠷᠯᠠᠨ ᠬᠥᠭᠡᠷᠴᠦ ᠠᠯᠳᠠᠷ ᠢ ᠲᠡᠭᠦᠨ ᠳᠦ ᠡᠷᠭᠦᠵᠡᠭᠡᠶᠡ ᠬᠤᠷᠠᠭᠠᠨ ᠤ ᠬᠤᠷᠢᠮ ᠪᠣᠯᠵᠠᠢ ᠰᠢᠨᠡ ᠪᠡᠷᠢ ᠨᠢ ᠪᠡᠯᠡᠬᠡᠨ ᠪᠠᠢᠨᠠ》 ᠭᠡᠪᠡ᠃
8 ᠲᠡᠭᠡᠲᠡᠯᠡ ᠰᠢᠨᠡ ᠪᠡᠷᠢ ᠳᠤ ᠲᠡᠭᠦᠨ ᠦ ᠡᠮᠦᠰᠬᠦ ᠭᠡᠷᠡᠯᠲᠦ ᠴᠡᠪᠡᠷ ᠨᠠᠷᠢᠨ ᠣᠯᠣᠰᠣᠨ ᠬᠤᠪᠴᠠᠰᠤ ᠰᠣᠶᠣᠷᠬᠠᠭᠳᠠᠵᠠᠢ᠂ ᠣᠯᠣᠰᠣᠨ ᠬᠤᠪᠴᠠᠰᠤ ᠨᠢ ᠠᠷᠢᠭᠤᠨ ᠬᠥᠮᠦᠰ ᠦᠨ ᠵᠥᠪ ᠦᠢᠯᠡᠰ ᠪᠢᠯᠡ᠃
9 ᠲᠩᠷᠢ ᠡᠯᠴᠢ ᠨᠠᠳᠠ ᠳᠤ᠄ 《〈ᠬᠤᠷᠠᠭᠠᠨ ᠤ ᠬᠤᠷᠢᠮ ᠳᠤ ᠤᠷᠢᠭᠳᠠᠭᠰᠠᠳ ᠨᠢ ᠪᠤᠶᠠᠨ ᠲᠠᠢ〉 ᠬᠡᠮᠡᠨ ᠪᠢᠴᠢᠭᠲᠦᠨ》 ᠭᠡᠵᠦ ᠪᠠᠰᠠ᠄ 《ᠡᠳᠡᠭᠡᠷ ᠨᠢ ᠪᠤᠷᠬᠠᠨ ᠤ ᠦᠨᠡᠨ ᠦᠭᠡᠰ ᠮᠥᠨ》 ᠭᠡᠰᠡᠨ ᠳᠦ᠂ 10 ᠪᠢ ᠲᠡᠭᠦᠨ ᠳᠦ ᠮᠥᠷᠭᠥᠬᠦ ᠪᠡᠷ ᠬᠥᠯ ᠦᠨ ᠬᠢᠨᠢ ᠡᠮᠦᠨᠡ ᠬᠥᠰᠡᠷ ᠤᠨᠠᠪᠠ᠃ ᠲᠡᠭᠡᠲᠡᠯᠡ ᠲᠡᠷᠡ ᠨᠠᠳᠠ ᠳᠤ᠄ 《ᠪᠣᠯᠢ᠂ ᠪᠢ ᠴᠤ ᠴᠢᠮᠠ ᠲᠠᠢ ᠠᠳᠠᠯᠢᠬᠠᠨ ᠵᠠᠷᠤᠴᠠ ᠶᠤᠮ᠂ ᠴᠢ ᠪᠤᠶᠤ ᠢᠰᠦ᠋ᠰ ᠤᠨ ᠭᠡᠷᠡᠴᠢᠯᠡᠯ 25 ᠲᠠᠢ ᠥᠭᠡᠷᠡ ᠠᠬᠠ ᠳᠡᠭᠦᠦ ᠨᠠᠷ ᠲᠠᠢ ᠴᠢᠨᠢ ᠠᠳᠠᠯᠢᠬᠠᠨ᠃ ᠪᠤᠷᠬᠠᠨ ᠳᠤ ᠯᠠ ᠮᠥᠷᠭᠥᠭᠲᠦᠨ᠂ ᠤᠴᠢᠷ ᠨᠢ᠂ ᠢᠰᠦ᠋ᠰ ᠤᠨ ᠭᠡᠷᠡᠴᠢᠯᠡᠯ 26 ᠨᠢ ᠡᠰᠢ ᠦᠵᠡᠭᠦᠯᠦᠭᠴᠢ ᠰᠦᠨᠡᠰᠦᠨ ᠦ ᠠᠵᠢᠯᠯᠠᠭᠠ ᠶᠤᠮ》 ᠭᠡᠯᠡ᠃
ᠴᠠᠭᠠᠨ ᠮᠣᠷᠢ ᠤᠨᠤᠭᠴᠢ
11 ᠲᠩᠷᠢ ᠨᠡᠭᠡᠭᠡᠭᠳᠡᠭᠡᠰᠦᠲᠡᠢ ᠪᠠᠢᠬᠤ ᠶᠢ ᠪᠢ ᠬᠠᠷᠠᠪᠠ᠃ ᠠᠩ᠋ᠬᠠᠷᠤᠭᠲᠤᠨ᠂ ᠲᠡᠨᠳᠡ ᠴᠠᠭᠠᠨ ᠮᠣᠷᠢ ᠪᠠᠢᠵᠠᠢ᠂ ᠤᠨᠤᠭᠴᠢ ᠨᠢ 《ᠢᠲᠡᠭᠡᠮᠵᠢᠲᠦ ᠪᠥᠭᠡᠳ ᠦᠨᠡᠨ》 ᠭᠡᠭᠳᠡᠳᠡᠭ᠃ ᠲᠡᠷᠡ ᠵᠥᠪ ᠰᠢᠭᠦᠵᠦ ᠪᠠᠢᠯᠳᠤᠳᠠᠭ᠃ 12 ᠮᠡᠯᠮᠡᠢ ᠨᠢ ᠭᠠᠯ ᠤᠨ ᠳᠥᠯᠥ ᠮᠡᠲᠦ᠂ ᠲᠡᠷᠢᠭᠦᠨ ᠳᠡᠭᠡᠷᠡ ᠨᠢ ᠣᠯᠠᠨ ᠲᠢᠲᠢᠮ ᠪᠤᠢ᠂ ᠪᠡᠶᠡ ᠳᠡᠭᠡᠷᠡ ᠨᠢ ᠥᠪᠡᠷ ᠡᠴᠡ ᠨᠢ ᠥᠭᠡᠷᠡ ᠬᠡᠨ ᠴᠤ ᠲᠠᠨᠢᠬᠤ ᠦᠭᠡᠢ ᠨᠡᠷᠡ ᠪᠢᠴᠢᠭᠡᠰᠦᠲᠡᠢ ᠪᠠᠢᠳᠠᠭ᠃ 13 ᠲᠡᠷᠡ ᠴᠢᠰᠤᠨ ᠳᠤ ᠳᠦᠷᠦᠭᠰᠡᠨ ᠬᠤᠪᠴᠠᠰᠤ ᠲᠠᠢ ᠪᠥᠭᠡᠳ 《ᠪᠤᠷᠬᠠᠨ ᠤ ᠦᠭᠡ》 ᠬᠡᠮᠡᠬᠦ ᠨᠡᠷᠡ ᠲᠠᠢ᠃ 14 ᠴᠡᠪᠡᠷᠬᠡᠨ ᠴᠠᠭᠠᠨ ᠣᠯᠣᠰᠣᠨ ᠬᠤᠪᠴᠠᠰᠤ ᠡᠮᠦᠰᠦᠭᠰᠡᠨ ᠲᠩᠷᠢ ᠶᠢᠨ ᠴᠡᠷᠢᠭ ᠤᠳ ᠴᠠᠭᠠᠨ ᠮᠣᠷᠢ ᠤᠨᠤᠵᠤ ᠲᠡᠭᠦᠨ ᠢ ᠳᠠᠭᠠᠵᠤ ᠪᠠᠢᠯᠠ᠃ 15 ᠲᠡᠭᠦᠨ ᠦ ᠠᠮᠠᠨ ᠠᠴᠠ ᠬᠤᠷᠴᠠ ᠰᠡᠯᠡᠮᠡ ᠭᠠᠷᠳᠠᠭ᠃ ᠲᠡᠭᠦᠨ ᠢᠶᠡᠷ ᠲᠡᠷᠡ ᠦᠨᠳᠦᠰᠦᠲᠡᠨ ᠨᠦᠭᠦᠳ ᠢ ᠴᠣᠬᠢᠨ᠂ ᠲᠡᠮᠦᠷ ᠲᠠᠶᠠᠭ ᠢᠶᠠᠷ ᠲᠡᠳᠡᠨ ᠢ ᠬᠠᠷᠢᠭᠤᠯᠵᠤ᠂ ᠲᠡᠭᠦᠰ ᠬᠦᠴᠦᠲᠦ ᠪᠤᠷᠬᠠᠨ ᠤ ᠠᠭᠤᠷ ᠬᠢᠯᠢᠩ ᠲᠠᠢ ᠠᠷᠢᠬᠢᠨ ᠤ ᠰᠢᠬᠠᠭᠤᠷ ᠢ ᠭᠢᠰᠬᠢᠨᠡ᠃ 16 ᠬᠤᠪᠴᠠᠰᠤ ᠪᠠ ᠭᠤᠶᠠᠨ ᠳᠡᠭᠡᠷᠡ ᠨᠢ 《ᠬᠠᠭᠠᠳ ᠤᠨ ᠬᠠᠭᠠᠨ᠂ ᠡᠵᠡᠳ ᠦᠨ ᠡᠵᠡᠨ》 ᠭᠡᠵᠦ ᠪᠢᠴᠢᠭᠰᠡᠨ ᠨᠡᠷᠡ ᠪᠤᠢ᠃
ᠠᠷᠢᠶᠠᠲᠠᠨ ᠪᠠ ᠬᠠᠭᠤᠷᠮᠠᠭ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠤᠨ ᠡᠴᠦᠰ
17 ᠨᠠᠷᠠᠨ ᠤ ᠳᠣᠲᠣᠷᠠ ᠨᠢᠭᠡᠨ ᠲᠩᠷᠢ ᠡᠯᠴᠢ ᠵᠣᠭᠰᠣᠵᠤ ᠪᠠᠢᠬᠤ ᠶᠢ ᠪᠢ ᠬᠠᠷᠠᠪᠠ᠃ ᠲᠡᠷᠡ ᠣᠭᠲᠠᠷᠭᠤᠢ ᠪᠠᠷ ᠨᠢᠰᠴᠦ ᠪᠤᠢ ᠠᠯᠢᠪᠠ ᠰᠢᠪᠠᠭᠤᠳ ᠲᠤ ᠶᠡᠬᠡ ᠳᠠᠭᠤᠨ ᠢᠶᠠᠷ ᠬᠠᠰᠬᠢᠷᠤᠨ᠄ 《ᠨᠠᠰᠢ ᠪᠠᠨ᠂ ᠪᠤᠷᠬᠠᠨ ᠤ ᠶᠡᠬᠡ ᠨᠠᠢᠷ ᠲᠤ ᠴᠤᠭᠯᠠᠷᠠᠵᠠᠭᠠ︕ 18 ᠬᠠᠭᠠᠳ ᠤᠨ ᠮᠢᠬᠠ᠂ ᠵᠠᠩᠵᠤᠨ ᠨᠠᠷ ᠤᠨ ᠮᠢᠬᠠ᠂ ᠬᠦᠴᠦᠲᠡᠳ ᠦᠨ ᠮᠢᠬᠠ᠂ ᠮᠣᠷᠢᠳ ᠪᠠ ᠮᠣᠷᠢᠲᠠᠳ ᠤᠨ ᠮᠢᠬᠠ᠂ ᠡᠷᠬᠡ ᠴᠢᠯᠥᠭᠡᠲᠡᠨ᠂ ᠪᠣᠭᠣᠯ ᠬᠢᠭᠡᠳ ᠶᠡᠬᠡ ᠪᠠᠭᠠ ᠪᠦᠬᠦ ᠬᠥᠮᠦᠨ ᠦ ᠮᠢᠬᠠ ᠶᠢ ᠢᠳᠡᠭᠲᠦᠨ》 ᠭᠡᠪᠡ᠃ 19 ᠲᠡᠭᠡᠬᠦ ᠳᠦ᠂ ᠠᠷᠢᠶᠠᠲᠠᠨ᠂ ᠳᠡᠯᠡᠬᠡᠢ ᠶᠢᠨ ᠬᠠᠭᠠᠳ ᠪᠠ ᠲᠡᠳᠡᠨ ᠦ ᠴᠡᠷᠢᠭ ᠤᠳ ᠴᠤᠭᠯᠠᠷᠠᠭᠠᠳ ᠴᠠᠭᠠᠨ ᠮᠣᠷᠢ ᠤᠨᠤᠭᠴᠢ ᠨᠢᠭᠡᠨ ᠪᠠ ᠲᠡᠭᠦᠨ ᠦ ᠴᠡᠷᠢᠭ ᠲᠠᠢ ᠪᠠᠢᠯᠳᠤᠬᠤ ᠭᠡᠵᠦ ᠪᠠᠢᠭᠠ ᠶᠢ ᠪᠢ ᠬᠠᠷᠠᠪᠠ᠃ 20 ᠬᠠᠷᠢᠨ ᠥᠨᠥᠬᠢ ᠠᠷᠢᠶᠠᠲᠠᠨ ᠪᠠᠷᠢᠭᠳᠠᠵᠠᠢ᠃ ᠪᠠᠰᠠ ᠲᠡᠭᠦᠨ ᠦ ᠡᠮᠦᠨᠡ ᠡᠴᠡ ᠰᠢᠳᠢ ᠲᠡᠮᠳᠡᠭ ᠦᠢᠯᠠᠳᠴᠤ᠂ ᠠᠷᠢᠶᠠᠲᠠᠨ ᠤ ᠲᠠᠮᠠᠭᠠ ᠲᠠᠢ ᠬᠥᠮᠦᠰ ᠪᠠ ᠠᠷᠢᠶᠠᠲᠠᠨ ᠤ ᠬᠥᠷᠥᠭ ᠲᠦ ᠮᠥᠷᠭᠥᠭᠴᠢ ᠬᠥᠮᠦᠰ ᠢ ᠲᠥᠭᠡᠷᠢᠭᠦᠯᠦᠭᠰᠡᠨ ᠬᠠᠭᠤᠷᠮᠠᠭ ᠡᠰᠢ ᠦᠵᠡᠭᠦᠯᠦᠭᠴᠢ ᠴᠤ ᠬᠠᠮᠲᠤ ᠪᠠᠷ ᠪᠠᠷᠢᠭᠳᠠᠪᠠ᠃ ᠲᠡᠳᠡ ᠬᠣᠶᠠᠭᠤᠯᠠ ᠬᠦᠬᠦᠷ ᠰᠢᠲᠠᠵᠤ ᠪᠤᠢ ᠭᠠᠯᠲᠤ ᠨᠠᠭᠤᠷ ᠲᠤ ᠠᠮᠢᠳᠤ ᠪᠠᠷ ᠬᠠᠶᠠᠭᠳᠠᠵᠠᠢ᠃ 21 ᠪᠤᠰᠤᠳ ᠨᠢ ᠴᠠᠭᠠᠨ ᠮᠣᠷᠢ ᠤᠨᠤᠭᠴᠢ ᠶᠢᠨ ᠠᠮᠠᠨ ᠠᠴᠠ ᠭᠠᠷᠤᠭᠰᠠᠨ ᠰᠡᠯᠡᠮᠡ ᠳᠦ ᠠᠯᠠᠭᠳᠠᠭᠰᠠᠨ᠃ ᠬᠠᠮᠤᠭ ᠰᠢᠪᠠᠭᠤ ᠲᠡᠳᠡᠨ ᠦ ᠮᠢᠬᠠ ᠪᠠᠷ ᠴᠠᠳᠴᠠᠢ᠃