ᠢᠯᠡᠷᠬᠡᠶᠢᠯᠡᠯᠭᠡ ᠠᠷᠪᠠ
ᠲᠩᠷᠢ ᠡᠯᠴᠢ ᠶᠢᠨ ᠪᠢᠴᠢᠬᠠᠨ ᠬᠤᠢᠯᠠᠮᠠᠯ
1 ᠥᠭᠡᠷᠡ ᠨᠢᠭᠡᠨ ᠬᠦᠴᠦᠲᠦ ᠲᠩᠷᠢ ᠡᠯᠴᠢ ᠶᠢᠨ ᠡᠭᠦᠯᠡ ᠨᠥᠮᠥᠷᠥᠨ ᠲᠩᠷᠢ ᠡᠴᠡ ᠪᠠᠭᠤᠬᠤ ᠶᠢ ᠪᠢ ᠬᠠᠷᠠᠪᠠ᠃ ᠲᠣᠯᠣᠭᠠᠢ ᠳᠡᠭᠡᠷᠡ ᠨᠢ ᠰᠣᠯᠣᠩ᠋ᠭᠠ ᠲᠠᠢ᠂ ᠨᠢᠭᠤᠷ ᠨᠢ ᠨᠠᠷᠠ ᠮᠡᠲᠦ᠂ ᠬᠥᠯ ᠨᠢ ᠭᠠᠯ ᠪᠠᠭᠠᠨᠠ ᠮᠡᠲᠦ᠂ 2 ᠭᠠᠷ ᠲᠤᠨᠢ ᠳᠡᠯᠭᠡᠭᠡᠰᠦᠲᠡᠢ ᠪᠢᠴᠢᠬᠠᠨ ᠬᠤᠢᠯᠠᠮᠠᠯ ᠲᠠᠢ ᠪᠠᠢᠪᠠ᠃ ᠲᠡᠷᠡ ᠪᠠᠷᠠᠭᠤᠨ ᠬᠥᠯ ᠢᠶᠡᠨ ᠳᠠᠯᠠᠢ ᠳᠤ᠂ ᠵᠡᠭᠦᠨ ᠬᠥᠯ ᠢᠶᠡᠨ ᠬᠠᠭᠤᠷᠠᠢ ᠭᠠᠵᠠᠷ ᠲᠤ ᠲᠠᠯᠪᠢᠵᠤ 3 ᠠᠷᠰᠯᠠᠨ ᠠᠷᠬᠢᠷᠠᠬᠤ ᠮᠡᠲᠦ ᠶᠡᠬᠡ ᠳᠠᠭᠤ ᠪᠠᠷ ᠬᠠᠰᠬᠢᠷᠪᠠ᠃ ᠲᠡᠷᠡ ᠬᠠᠰᠬᠢᠷᠬᠤ ᠳᠤ᠂ ᠳᠣᠯᠣᠭᠠᠨ ᠠᠶᠤᠩ᠋ᠭᠠ ᠲᠤᠰ ᠲᠤᠰ ᠤᠨ ᠳᠠᠭᠤ ᠪᠠᠷ ᠶᠠᠷᠢᠵᠠᠢ᠃ 4 ᠳᠣᠯᠣᠭᠠᠨ ᠠᠶᠤᠩ᠋ᠭᠠ ᠶᠠᠷᠢᠬᠤ ᠳᠤ᠂ ᠪᠢ ᠪᠢᠴᠢᠬᠦ ᠭᠡᠵᠦ ᠪᠠᠢᠲᠠᠯᠠ ᠲᠩᠷᠢ ᠡᠴᠡ ᠳᠠᠭᠤ ᠭᠠᠷᠴᠤ᠄ 《ᠳᠣᠯᠣᠭᠠᠨ ᠠᠶᠤᠩ᠋ᠭᠠ ᠶᠢᠨ ᠶᠠᠷᠢᠭᠰᠠᠨ ᠢ ᠪᠢᠲᠡᠭᠦᠮᠵᠢᠯᠡ︕ ᠲᠡᠳᠡᠭᠡᠷ ᠢ ᠪᠦᠦ ᠪᠢᠴᠢ》 ᠭᠡᠬᠦ ᠶᠢ ᠪᠢ ᠰᠣᠨᠣᠰᠣᠯᠠ᠃ 5 ᠮᠢᠨᠦ ᠦᠵᠡᠭᠰᠡᠨ ᠲᠩᠷᠢ ᠡᠯᠴᠢ ᠳᠠᠯᠠᠢ ᠪᠠ ᠭᠠᠵᠠᠷ ᠳᠡᠭᠡᠷᠡ ᠵᠣᠭᠰᠣᠭᠰᠠᠭᠠᠷ ᠪᠠᠷᠠᠭᠤᠨ ᠭᠠᠷ ᠢᠶᠠᠨ ᠲᠩᠷᠢ ᠥᠭᠡᠳᠡ ᠡᠷᠭᠦᠭᠡᠳ 6 ᠥᠨᠢ ᠮᠥᠩᠬᠡᠳᠡ ᠠᠮᠢᠳᠤᠷᠠᠭᠴᠢ᠂ ᠲᠤᠬᠠᠢᠯᠠᠪᠠᠯ ᠲᠩᠷᠢ ᠪᠠ ᠲᠡᠭᠦᠨ ᠦ ᠳᠣᠲᠣᠷᠠᠬᠢ ᠵᠦᠢᠯᠡᠰ᠂ ᠭᠠᠵᠠᠷ ᠪᠠ ᠲᠡᠭᠦᠨ ᠦ ᠳᠣᠲᠣᠷᠠᠬᠢ ᠵᠦᠢᠯᠡᠰ᠂ ᠳᠠᠯᠠᠢ ᠪᠠ ᠲᠡᠭᠦᠨ ᠦ ᠳᠣᠲᠣᠷᠠᠬᠢ ᠵᠦᠢᠯᠡᠰ ᠢ ᠪᠦᠲᠦᠭᠡᠭᠴᠢ ᠶᠢᠨ ᠨᠡᠷᠡ ᠪᠡᠷ ᠲᠠᠩ᠋ᠭᠠᠷᠢᠭᠯᠠᠨ᠄ 《ᠢᠯᠡᠭᠦᠦ ᠴᠠᠭ ᠪᠠᠢᠬᠤ ᠦᠭᠡᠢ᠂ 7 ᠳᠣᠯᠣᠳᠠᠬᠢ ᠲᠩᠷᠢ ᠡᠯᠴᠢ ᠪᠦᠷᠢᠶᠡ ᠪᠡᠨ ᠦᠯᠢᠶᠡᠬᠦ ᠭᠡᠵᠦ ᠪᠠᠢᠭᠠ ᠡᠳᠦᠷ ᠤᠳ ᠢᠶᠠᠷ ᠪᠤᠷᠬᠠᠨ ᠤ ᠥᠪᠡᠷ ᠦᠨ ᠵᠠᠷᠤᠴᠠ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠲᠤ ᠤᠯᠠᠮᠵᠢᠯᠠᠭᠰᠠᠨ ᠶᠣᠰᠣᠭᠠᠷ ᠪᠤᠷᠬᠠᠨ ᠤ ᠨᠢᠭᠤᠴᠠ ᠪᠡᠶᠡᠯᠡᠭᠳᠡᠬᠦ ᠪᠣᠯᠣᠨᠠ》 ᠭᠡᠪᠡ᠃
8 ᠮᠢᠨᠦ ᠰᠣᠨᠣᠰᠣᠭᠰᠠᠨ ᠲᠩᠷᠢ ᠡᠴᠡ ᠭᠠᠷᠬᠤ ᠳᠠᠭᠤ ᠳᠠᠬᠢᠨ᠄ 《ᠶᠠᠪᠤ᠂ ᠳᠠᠯᠠᠢ ᠪᠠ ᠭᠠᠵᠠᠷ ᠳᠡᠭᠡᠷᠡ ᠵᠣᠭᠰᠣᠵᠤ ᠪᠤᠢ ᠲᠩᠷᠢ ᠡᠯᠴᠢ ᠶᠢᠨ ᠭᠠᠷ ᠠᠴᠠ ᠳᠡᠯᠭᠡᠭᠡᠰᠦᠲᠡᠢ ᠬᠤᠢᠯᠠᠮᠠᠯ ᠢ ᠠᠪ》 ᠭᠡᠬᠦ ᠳᠦ᠂ 9 ᠪᠢ ᠲᠩᠷᠢ ᠡᠯᠴᠢ ᠳᠤ ᠣᠴᠢᠵᠤ ᠪᠢᠴᠢᠬᠠᠨ ᠬᠤᠢᠯᠠᠮᠠᠯ ᠢᠶᠠᠨ ᠥᠭᠭᠥᠭᠡᠴᠢ ᠭᠡᠵᠦ ᠬᠡᠯᠡᠪᠡ᠃ ᠲᠡᠷᠡ᠄ 《ᠴᠢ ᠡᠭᠦᠨ ᠢ ᠠᠪᠴᠤ ᠢᠳᠡᠭᠲᠦᠨ᠃ ᠭᠡᠳᠡᠰᠦᠨ ᠳᠦ ᠴᠢᠨᠢ ᠭᠠᠰᠢᠭᠤᠨ ᠪᠣᠯᠪᠠᠴᠤ ᠠᠮᠠᠨ ᠳᠤ ᠴᠢᠨᠢ ᠪᠠᠯ ᠮᠡᠲᠦ ᠠᠮᠲᠠ ᠲᠠᠢ ᠪᠣᠯᠣᠨᠠ》 ᠭᠡᠪᠡ᠃ 10 ᠪᠢ ᠲᠩᠷᠢ ᠡᠯᠴᠢ ᠶᠢᠨ ᠭᠠᠷ ᠠᠴᠠ ᠪᠢᠴᠢᠬᠠᠨ ᠬᠤᠢᠯᠠᠮᠠᠯ ᠢ ᠠᠪᠴᠤ ᠢᠳᠡᠭᠰᠡᠨ ᠳᠦ᠂ ᠠᠮᠠᠨ ᠳᠤ ᠮᠢᠨᠢ ᠪᠠᠯ ᠮᠡᠲᠦ ᠠᠮᠲᠠ ᠲᠠᠢ ᠪᠣᠯᠪᠠᠴᠤ ᠢᠳᠡᠭᠰᠡᠨ ᠦ ᠳᠠᠷᠠᠭᠠ ᠭᠡᠳᠡᠰᠦ ᠮᠢᠨᠢ ᠭᠠᠰᠢᠭᠤᠨ ᠪᠣᠯᠵᠠᠢ᠃
11 ᠪᠠᠰᠠ ᠨᠠᠳᠠ ᠳᠤ᠄ 《ᠴᠢ ᠣᠯᠠᠨ ᠠᠷᠠᠳ ᠲᠦᠮᠡᠨ᠂ ᠦᠨᠳᠦᠰᠦᠲᠡᠨ᠂ ᠬᠡᠯᠡ ᠪᠠ ᠬᠠᠭᠠᠳ ᠤᠨ ᠲᠤᠬᠠᠢ ᠡᠰᠢ ᠦᠵᠡᠭᠦᠯᠬᠦ ᠶᠣᠰᠣᠲᠠᠢ》 ᠭᠡᠪᠡ᠃