ᠢᠯᠡᠷᠬᠡᠶᠢᠯᠡᠯᠭᠡ ᠠᠷᠪᠠᠨ ᠬᠣᠶᠠᠷ
ᠡᠮᠡᠭᠲᠡᠢ ᠬᠥᠮᠦᠨ ᠯᠤᠤ ᠬᠣᠶᠠᠷ
1 ᠲᠩᠷᠢ ᠳᠡᠭᠡᠷᠡ ᠶᠡᠬᠡ ᠲᠡᠮᠳᠡᠭ ᠦᠵᠡᠭᠳᠡᠵᠡᠢ᠄ ᠨᠠᠷᠠ ᠪᠠᠷ ᠬᠤᠪᠴᠠᠰᠤᠯᠠᠭᠰᠠᠨ᠂ ᠬᠥᠯ ᠳᠣᠣᠷᠠ ᠨᠢ ᠰᠠᠷᠠ ᠲᠠᠢ᠂ ᠲᠣᠯᠣᠭᠠᠢ ᠳᠡᠭᠡᠷᠡ ᠨᠢ ᠠᠷᠪᠠᠨ ᠬᠣᠶᠠᠷ ᠣᠳᠣᠨ ᠲᠢᠲᠢᠮ ᠲᠠᠢ ᠨᠢᠭᠡᠨ ᠡᠮᠡᠭᠲᠡᠢ ᠪᠠᠢᠪᠠ᠃ 2 ᠲᠡᠷᠡ ᠵᠢᠷᠮᠦᠰᠦᠯᠡᠵᠦ ᠬᠥᠩᠭᠡᠵᠢᠬᠦ ᠭᠡᠵᠦ ᠳᠤᠩᠰᠢᠨ ᠲᠠᠷᠴᠢᠯᠠᠭᠰᠠᠨ ᠳᠠᠭᠠᠨ ᠬᠠᠰᠬᠢᠷᠴᠤ ᠪᠠᠢᠯᠠ᠃ 3 ᠲᠡᠭᠡᠲᠡᠯᠡ ᠲᠩᠷᠢ ᠳᠡᠭᠡᠷᠡ ᠥᠭᠡᠷᠡ ᠲᠡᠮᠳᠡᠭ ᠦᠵᠡᠭᠳᠡᠵᠡᠢ᠄ ᠠᠩ᠋ᠬᠠᠷᠤᠭᠲᠤᠨ᠂ ᠳᠣᠯᠣᠭᠠᠨ ᠲᠣᠯᠣᠭᠠᠢ᠂ ᠠᠷᠪᠠᠨ ᠡᠪᠡᠷ ᠲᠡᠢ ᠲᠣᠮᠣ ᠤᠯᠠᠭᠠᠨ ᠯᠤᠤ ᠪᠠᠢᠪᠠ᠃ ᠳᠣᠯᠣᠭᠠᠨ ᠲᠣᠯᠣᠭᠠᠢ ᠳᠡᠭᠡᠷᠡ ᠨᠢ ᠳᠣᠯᠣᠭᠠᠨ ᠲᠢᠲᠢᠮ ᠪᠤᠢ᠃ 4 ᠰᠡᠭᠦᠯ ᠨᠢ ᠲᠩᠷᠢ ᠶᠢᠨ ᠣᠳᠣᠳ ᠤᠨ ᠭᠤᠷᠪᠠᠨ ᠤ ᠨᠢᠭᠡ ᠶᠢ ᠱᠦᠭᠦᠷᠳᠡᠨ ᠭᠠᠵᠠᠷ ᠬᠠᠶᠠᠵᠠᠢ᠃ ᠲᠡᠷᠡ ᠯᠤᠤ ᠬᠥᠩᠭᠡᠵᠢᠬᠦ ᠭᠡᠵᠦ ᠪᠠᠢᠭᠠ ᠡᠮᠡᠭᠲᠡᠢ ᠶᠢᠨ ᠡᠮᠦᠨᠡ ᠵᠣᠭᠰᠣᠭᠠᠳ ᠲᠡᠭᠦᠨ ᠢ ᠬᠥᠩᠭᠡᠵᠢᠮᠡᠭᠴᠡ ᠬᠡᠦᠬᠡᠳ ᠢ ᠨᠢ ᠵᠠᠯᠭᠢᠬᠤ ᠭᠡᠵᠦ ᠪᠠᠢᠯᠠ᠃ 5 ᠲᠡᠷᠡ ᠡᠮᠡᠭᠲᠡᠢ ᠬᠦᠦ ᠲᠥᠷᠥᠭᠦᠯᠵᠡᠢ᠃ ᠬᠦᠦ ᠨᠢ ᠬᠠᠮᠤᠭ ᠦᠨᠳᠦᠰᠦᠲᠡᠨ ᠢ ᠲᠡᠮᠦᠷ ᠲᠠᠶᠠᠭ ᠢᠶᠠᠷ ᠬᠠᠷᠢᠭᠤᠯᠬᠤ ᠪᠣᠯᠣᠨᠠ᠃ ᠬᠡᠦᠬᠡᠳ ᠨᠢ ᠪᠤᠷᠬᠠᠨ ᠪᠤᠶᠤ ᠲᠡᠭᠦᠨ ᠦ ᠰᠡᠨᠲᠢ ᠤᠷᠤᠭᠤ ᠠᠪᠠᠴᠢᠭᠳᠠᠵᠤ᠂ 6 ᠡᠮᠡᠭᠲᠡᠢ ᠴᠥᠯ ᠤᠷᠤᠭᠤ ᠵᠢᠭᠤᠲᠠᠯᠠ᠃ ᠲᠡᠷᠡ ᠡᠮᠡᠭᠲᠡᠢ ᠶᠢ ᠮᠢᠩ᠋ᠭᠠ ᠬᠣᠶᠠᠷ ᠵᠠᠭᠤ ᠵᠢᠷᠠᠨ ᠡᠳᠦᠷ ᠦᠨ ᠲᠤᠷᠰᠢ ᠲᠡᠵᠢᠭᠡᠬᠦ ᠶᠢᠨ ᠲᠤᠯᠠᠳᠠ ᠪᠤᠷᠬᠠᠨ ᠤ ᠪᠡᠯᠡᠳᠦᠭᠰᠡᠨ ᠭᠠᠵᠠᠷ ᠲᠡᠨᠳᠡ ᠪᠤᠢ᠃
7 ᠲᠡᠭᠡᠬᠦ ᠳᠦ᠂ ᠲᠩᠷᠢ ᠳᠡᠭᠡᠷᠡ ᠳᠠᠢᠨ ᠪᠣᠯᠵᠠᠢ᠄ ᠮᠢᠺᠠᠶᠧᠯ ᠡᠯᠴᠢ ᠲᠠᠢ ᠪᠠᠨ ᠬᠠᠮᠲᠤ ᠯᠤᠤ ᠶᠢᠨ ᠡᠰᠡᠷᠭᠦ ᠪᠠᠢᠯᠳᠤᠪᠠ᠃ ᠯᠤᠤ ᠴᠤ ᠡᠯᠴᠢᠳ ᠲᠠᠢ ᠪᠠᠨ ᠡᠰᠡᠷᠭᠦ ᠡᠴᠡ ᠨᠢ ᠪᠠᠢᠯᠳᠤᠭᠰᠠᠨ ᠪᠣᠯᠪᠠᠴᠤ 8 ᠳᠡᠢᠯᠦᠭᠰᠡᠨ ᠦᠭᠡᠢ ᠪᠥᠭᠡᠳ ᠲᠩᠷᠢ ᠳᠤ ᠣᠷᠣᠰᠢᠬᠤ ᠣᠷᠣᠨ ᠦᠭᠡᠢ ᠪᠣᠯᠵᠠᠢ᠃ 9 ᠥᠨᠥᠬᠢ ᠲᠣᠮᠣ ᠯᠤᠤ ᠪᠤᠶᠤ ᠡᠷᠲᠡᠨ ᠦ ᠮᠣᠭᠠᠢ ᠭᠠᠵᠠᠷ ᠲᠤ ᠬᠠᠶᠠᠭᠳᠠᠪᠠ᠃ ᠲᠡᠭᠦᠨ ᠢ ᠭᠦᠳᠬᠡᠭᠴᠢ᠂ ᠡᠰᠡᠪᠡᠯ ᠰᠠᠲ᠋ᠠᠨ ᠭᠡᠳᠡᠭ᠂ ᠪᠦᠬᠦ ᠳᠡᠯᠡᠬᠡᠢ ᠶᠢ ᠲᠥᠭᠡᠷᠢᠭᠦᠯᠦᠭᠴᠢ ᠲᠡᠷᠡ ᠯᠤᠤ ᠡᠯᠴᠢᠳ ᠲᠠᠢ ᠪᠠᠨ ᠭᠠᠵᠠᠷ ᠲᠤ ᠬᠠᠶᠠᠭᠳᠠᠪᠠ᠃ 10 ᠲᠩᠷᠢ ᠳᠡᠭᠡᠷᠡ ᠶᠡᠬᠡ ᠳᠠᠭᠤᠨ ᠢᠶᠠᠷ᠄ 《ᠪᠢᠳᠡᠨ ᠦ ᠪᠤᠷᠬᠠᠨ ᠤ ᠠᠪᠤᠷᠠᠯ᠂ ᠬᠦᠴᠦ ᠪᠠ ᠬᠠᠭᠠᠨᠴᠢᠯᠠᠯ ᠮᠥᠨ ᠲᠡᠭᠦᠨ ᠦ ᠾᠷᠢᠰᠲ᠋ᠣᠰ ᠤᠨ ᠡᠷᠬᠡ ᠣᠳᠣ ᠪᠡᠶᠡᠯᠡᠯᠡ︕ ᠪᠢᠳᠡᠨ ᠦ ᠠᠬᠠ ᠳᠡᠭᠦᠦᠰ ᠢ ᠵᠠᠭᠠᠯᠳᠤᠭᠴᠢ ᠪᠤᠶᠤ ᠪᠢᠳᠡᠨ ᠦ ᠪᠤᠷᠬᠠᠨ ᠤ ᠡᠮᠦᠨᠡ ᠡᠳᠦᠷ ᠰᠥᠨᠢ ᠦᠭᠡᠢ ᠵᠠᠭᠠᠯᠳᠤᠭᠴᠢ ᠨᠢ ᠬᠠᠶᠠᠭᠳᠠᠵᠠᠢ︕
11 ᠪᠢᠳᠡᠨ ᠦ ᠠᠬᠠ ᠳᠡᠭᠦᠦᠰ ᠦᠬᠦᠲᠡᠯᠡ ᠪᠡᠨ ᠠᠮᠢ ᠪᠠᠨ ᠬᠠᠢᠷᠠᠯᠠᠯ ᠦᠭᠡᠢ᠂ ᠲᠡᠭᠦᠨ ᠢ ᠬᠤᠷᠠᠭᠠᠨ ᠤ ᠴᠢᠰᠤ ᠪᠠ ᠭᠡᠷᠡᠴᠢᠯᠡᠯᠭᠡ ᠶᠢᠨ ᠢᠶᠠᠨ ᠦᠭᠡ ᠪᠡᠷ ᠢᠯᠠᠭᠰᠠᠨ ᠲᠤᠯᠠ
12 ᠪᠠᠶᠠᠷᠯᠠᠵᠠᠭᠠ᠂ ᠲᠩᠷᠢ ᠪᠠ ᠲᠡᠨᠳᠡ ᠰᠠᠭᠤᠭᠴᠢᠳ ᠡ︕ ᠬᠠᠷᠢᠨ ᠭᠠᠵᠠᠷ ᠪᠠ ᠳᠠᠯᠠᠢ ᠳᠤ ᠰᠠᠭᠤᠭᠴᠢᠳ ᠲᠤ ᠭᠠᠢ ᠪᠣᠯᠬᠤ ᠨᠢ ᠡ︕ ᠰᠠᠲ᠋ᠠᠨ ᠴᠠᠭ ᠨᠢ ᠤᠬᠤᠷ ᠪᠣᠯᠣᠭᠰᠠᠨ ᠢ ᠮᠡᠳᠡᠭᠡᠳ ᠮᠠᠰᠢ ᠠᠭᠤᠷ ᠲᠠᠢ ᠪᠠᠷ ᠲᠠ ᠨᠠᠷ ᠤᠷᠤᠭᠤ ᠪᠠᠭᠤᠭᠰᠠᠨ ᠪᠠᠢᠨᠠ》 ᠭᠡᠵᠦ ᠬᠡᠯᠡᠭᠰᠡᠨ ᠢ ᠪᠢ ᠰᠣᠨᠣᠰᠪᠠ᠃
13 ᠯᠤᠤ ᠭᠠᠵᠠᠷ ᠬᠠᠶᠠᠭᠳᠠᠭᠰᠠᠨ ᠢᠶᠠᠨ ᠦᠵᠡᠭᠡᠳ ᠬᠦᠦ ᠲᠥᠷᠥᠭᠦᠯᠦᠭᠰᠡᠨ ᠨᠥᠭᠥᠭᠡ ᠡᠮᠡᠭᠲᠡᠢ ᠶᠢ ᠨᠡᠬᠡᠪᠡ᠃ 14 ᠡᠮᠡᠭᠲᠡᠢ ᠪᠦᠷᠭᠦᠳ ᠦᠨ ᠬᠣᠶᠠᠷ ᠲᠣᠮᠣ ᠳᠠᠯᠠᠪᠴᠢ ᠶᠢ ᠣᠯᠣᠭᠠᠳ ᠴᠥᠯ ᠳᠤ ᠪᠤᠢ ᠥᠪᠡᠷ ᠦᠨ ᠢᠶᠠᠨ ᠭᠠᠵᠠᠷ ᠤᠷᠤᠭᠤ ᠨᠢᠰᠴᠦ ᠶᠠᠪᠤᠯᠠ᠃ ᠲᠡᠷᠡ ᠪᠡᠷ ᠮᠣᠭᠠᠢ ᠠᠴᠠ ᠮᠤᠯᠲᠤᠷᠠᠭᠠᠳ ᠲᠡᠨᠳᠡ ᠨᠢᠭᠡ ᠦᠶᠡ᠂ ᠬᠣᠶᠠᠷ ᠦᠶᠡ᠂ ᠬᠠᠭᠠᠰ ᠦᠶᠡ ᠲᠡᠵᠢᠭᠡᠭᠳᠡᠬᠦ ᠪᠣᠯᠣᠨᠠ᠃ 15 ᠮᠣᠭᠠᠢ ᠡᠮᠡᠭᠲᠡᠢ ᠶᠢᠨ ᠠᠷᠤ ᠠᠴᠠ ᠭᠣᠣᠯ ᠮᠡᠲᠦ ᠤᠰᠤ ᠶᠢ ᠠᠮᠠᠨ ᠠᠴᠠ ᠪᠠᠨ ᠭᠠᠷᠭᠠᠵᠤ᠂ ᠲᠡᠭᠦᠨ ᠢ ᠵᠢᠪᠪᠦᠭᠦᠯᠬᠦ ᠭᠡᠪᠡ᠃ 16 ᠬᠠᠷᠢᠨ ᠭᠠᠵᠠᠷ ᠡᠮᠡᠭᠲᠡᠢ ᠶᠢ ᠲᠤᠰᠠᠯᠠᠬᠤ ᠪᠠᠷ ᠠᠮᠠ ᠪᠠᠨ ᠨᠡᠭᠡᠭᠡᠵᠦ ᠯᠤᠤ ᠶᠢᠨ ᠠᠮᠠ ᠠᠴᠠ ᠭᠠᠷᠤᠭᠰᠠᠨ ᠭᠣᠣᠯ ᠢ ᠵᠠᠯᠭᠢᠯᠠ᠃ 17 ᠯᠤᠤ ᠥᠨᠥᠬᠢ ᠡᠮᠡᠭᠲᠡᠢ ᠳᠦ ᠬᠢᠯᠢᠩᠨᠡᠭᠡᠳ ᠲᠡᠭᠦᠨ ᠦ ᠪᠤᠰᠤᠳ ᠦᠷᠡ ᠤᠳᠤᠮ᠂ ᠲᠤᠬᠠᠢᠯᠠᠪᠠᠯ ᠪᠤᠷᠬᠠᠨ ᠤ ᠵᠠᠷᠯᠢᠭ ᠤᠳ ᠢ ᠰᠠᠬᠢᠨ᠂ ᠢᠰᠦ᠋ᠰ ᠤᠨ ᠭᠡᠷᠡᠴᠢᠯᠡᠯ ᠢ ᠪᠠᠷᠢᠮᠲᠠᠯᠠᠭᠴᠢᠳ ᠲᠠᠢ ᠪᠠᠢᠯᠳᠤᠬᠤ ᠪᠠᠷ ᠶᠠᠪᠤᠵᠤ 18 ᠳᠠᠯᠠᠢ ᠶᠢᠨ ᠬᠥᠪᠡᠭᠡᠨ ᠦ ᠡᠯᠡᠰᠦᠨ ᠳᠡᠭᠡᠷᠡ ᠵᠣᠭᠰᠣᠯᠠ᠃