ᠢᠯᠡᠷᠬᠡᠶᠢᠯᠡᠯᠭᠡ ᠠᠷᠪᠠᠨ ᠭᠤᠷᠪᠠ
ᠬᠣᠶᠠᠷ ᠠᠷᠢᠶᠠᠲᠠᠨ
1 ᠳᠠᠯᠠᠢ ᠠᠴᠠ ᠨᠢᠭᠡ ᠠᠷᠢᠶᠠᠲᠠᠨ ᠭᠠᠷᠴᠤ ᠢᠷᠡᠬᠦ ᠶᠢ ᠪᠢ ᠬᠠᠷᠠᠪᠠ᠃ ᠲᠡᠷᠡ ᠠᠷᠪᠠᠨ ᠡᠪᠡᠷ ᠲᠡᠢ᠂ ᠳᠣᠯᠣᠭᠠᠨ ᠲᠣᠯᠣᠭᠠᠢ ᠲᠠᠢ ᠪᠥᠭᠡᠳ ᠡᠪᠡᠷ ᠤᠳ ᠳᠡᠭᠡᠷᠡ ᠪᠡᠨ ᠠᠷᠪᠠᠨ ᠲᠢᠲᠢᠮ ᠲᠠᠢ᠂ ᠲᠣᠯᠣᠭᠠᠢ ᠨᠤᠭᠤᠳ ᠳᠡᠭᠡᠷᠡ ᠪᠡᠨ ᠪᠤᠷᠬᠠᠨ ᠢ ᠳᠣᠷᠣᠮᠵᠢᠯᠠᠬᠤ ᠨᠡᠷᠡᠰ ᠲᠡᠢ᠃ 2 ᠮᠢᠨᠦ ᠦᠵᠡᠭᠰᠡᠨ ᠲᠡᠷᠡ ᠠᠷᠢᠶᠠᠲᠠᠨ ᠢᠷᠪᠢᠰ ᠲᠠᠢ ᠠᠳᠠᠯᠢ᠃ ᠬᠥᠯ ᠨᠢ ᠪᠠᠭᠠᠪᠠᠭᠠᠢ ᠶᠢᠨ ᠬᠢ ᠮᠡᠲᠦ᠂ ᠠᠮᠠ ᠨᠢ ᠠᠷᠰᠯᠠᠨ ᠤ ᠬᠢ ᠮᠡᠲᠦ ᠪᠠᠢᠯᠠ᠃ ᠯᠤᠤ ᠲᠡᠭᠦᠨ ᠳᠦ ᠥᠪᠡᠷ ᠦᠨ ᠢᠶᠠᠨ ᠴᠢᠳᠠᠯ᠂ ᠰᠡᠨᠲᠢ ᠪᠠ ᠶᠡᠬᠡ ᠮᠡᠳᠡᠯ ᠢ ᠬᠦᠷᠲᠡᠭᠡᠪᠡ᠃ 3 ᠨᠢᠭᠡ ᠲᠣᠯᠣᠭᠠᠢ ᠨᠢ ᠦᠬᠦᠯᠦᠭᠦᠲᠡ ᠰᠢᠷᠬᠠᠲᠤᠭᠰᠠᠨ ᠪᠣᠯᠪᠠᠴᠤ ᠦᠬᠦᠯ ᠦᠨ ᠰᠢᠷᠬᠠ ᠨᠢ ᠡᠳᠡᠭᠡᠷᠡᠭᠰᠡᠨ ᠳᠦ᠂ ᠭᠠᠵᠠᠷ ᠤᠨ ᠬᠥᠮᠦᠨ ᠪᠦᠬᠦᠨ ᠭᠠᠢᠬᠠᠨ ᠠᠷᠢᠶᠠᠲᠠᠨ ᠤ ᠬᠣᠢᠨᠠ ᠠᠴᠠ ᠳᠠᠭᠠᠵᠤ᠂ 4 ᠲᠡᠷᠡ ᠠᠷᠢᠶᠠᠲᠠᠨ ᠳᠤ ᠮᠡᠳᠡᠯ ᠥᠭᠭᠥᠭᠰᠡᠨ ᠯᠤᠤ ᠳᠤ ᠮᠥᠷᠭᠥᠪᠡ᠃ ᠲᠡᠳᠡ ᠠᠷᠢᠶᠠᠲᠠᠨ ᠳᠤ ᠴᠤ ᠮᠥᠷᠭᠥᠵᠦ᠄ 《ᠡᠨᠡ ᠠᠷᠢᠶᠠᠲᠠᠨ ᠲᠠᠢ ᠬᠡᠨ ᠠᠳᠠᠯᠢᠳᠬᠠᠬᠤ ᠪᠢᠯᠡ︖ ᠲᠡᠭᠦᠨ ᠲᠡᠢ ᠪᠠᠢᠯᠳᠤᠬᠤ ᠴᠢᠳᠠᠯ ᠲᠠᠢ ᠨᠢ ᠬᠡᠨ ᠪᠤᠢ︖》 ᠭᠡᠵᠡᠭᠡᠯᠡ᠃
5 ᠲᠣᠮᠣ ᠲᠣᠮᠣ ᠦᠭᠡ ᠬᠡᠯᠡᠵᠦ᠂ ᠪᠤᠷᠬᠠᠨ ᠢ ᠳᠣᠷᠣᠮᠵᠢᠯᠠᠬᠤ ᠠᠮᠠ ᠶᠢ ᠠᠷᠢᠶᠠᠲᠠᠨ ᠣᠯᠵᠠᠢ᠃ ᠳᠥᠴᠢᠨ ᠬᠣᠶᠠᠷ ᠰᠠᠷᠠ ᠶᠢᠨ ᠲᠤᠷᠰᠢ ᠠᠵᠢᠯᠯᠠᠭᠠ ᠶᠠᠪᠤᠭᠤᠯᠬᠤ ᠡᠷᠬᠡ ᠶᠢ ᠴᠤ ᠲᠡᠷᠡ ᠣᠯᠣᠯᠠ᠃ 6 ᠲᠡᠷᠡ ᠪᠤᠷᠬᠠᠨ ᠢ ᠳᠣᠷᠣᠮᠵᠢᠯᠠᠬᠤ ᠪᠠᠷ ᠠᠮᠠ ᠪᠠᠨ ᠨᠡᠭᠡᠭᠡᠪᠡ᠃ ᠲᠡᠷᠡ ᠪᠤᠷᠬᠠᠨ ᠤ ᠨᠡᠷᠡ᠂ ᠲᠡᠭᠦᠨ ᠦ ᠣᠷᠣᠰᠢᠬᠤ ᠭᠠᠵᠠᠷ ᠪᠠ ᠲᠩᠷᠢ ᠶᠢᠨ ᠭᠡᠷ ᠲᠦ ᠰᠠᠭᠤᠭᠴᠢᠳ ᠢ ᠳᠣᠷᠣᠮᠵᠢᠯᠠᠪᠠ᠃ 7 ᠲᠡᠷᠡ ᠠᠷᠢᠭᠤᠨ ᠬᠥᠮᠦᠰ ᠲᠡᠢ ᠪᠠᠢᠯᠳᠤᠵᠤ᠂ ᠲᠡᠳᠡᠨ ᠢ ᠢᠯᠠᠬᠤ ᠵᠥᠪᠰᠢᠶᠡᠷᠡᠯ ᠢ ᠣᠯᠵᠤ ᠣᠪᠣᠭ᠂ ᠠᠷᠠᠳ᠂ ᠬᠡᠯᠡ᠂ ᠦᠨᠳᠦᠰᠦᠲᠡᠨ ᠢ ᠵᠠᠬᠢᠷᠬᠤ ᠡᠷᠬᠡ ᠶᠢ ᠴᠤ ᠣᠯᠵᠠᠢ᠃ 8 ᠶᠢᠷᠲᠢᠨᠴᠦ ᠪᠦᠲᠦᠭᠡᠭᠳᠡᠭᠰᠡᠨ ᠡᠴᠡ ᠬᠣᠢᠰᠢ᠂ ᠨᠢᠳᠤᠯᠤᠭᠳᠠᠭᠰᠠᠨ ᠬᠤᠷᠠᠭᠠᠨ ᠤ ᠠᠮᠢ ᠶᠢᠨ ᠨᠣᠮ ᠳᠤ ᠨᠡᠷᠡ ᠪᠡᠨ ᠪᠢᠴᠢᠭᠦᠯᠦᠭᠡ ᠦᠭᠡᠢ ᠭᠠᠵᠠᠷ ᠲᠤ ᠰᠠᠭᠤᠭᠴᠢᠳ ᠴᠥᠮ ᠢᠶᠡᠷ ᠢᠶᠠᠨ ᠲᠡᠭᠦᠨ ᠳᠦ ᠮᠥᠷᠭᠥᠬᠦ ᠪᠣᠯᠣᠨᠠ᠃
9 ᠴᠢᠬᠢ ᠲᠠᠢ ᠨᠢ ᠰᠣᠨᠣᠰᠣᠭᠲᠤᠨ︕
10 ᠣᠯᠵᠠᠯᠠᠭᠳᠠᠬᠤ ᠨᠢ ᠣᠯᠵᠠᠯᠠᠭᠳᠠᠵᠤ ᠶᠠᠪᠤᠨᠠ ᠢᠯᠳᠦ ᠪᠡᠷ ᠠᠯᠠᠭᠳᠠᠬᠤ ᠨᠢ ᠢᠯᠳᠦ ᠪᠡᠷ ᠠᠯᠠᠭᠳᠠᠨᠠ ᠡᠭᠦᠨ ᠳᠦ ᠠᠷᠢᠭᠤᠨ ᠬᠥᠮᠦᠰ ᠦᠨ ᠲᠡᠪᠴᠢᠶᠡᠷᠢ ᠪᠠ ᠢᠲᠡᠭᠡᠯ ᠬᠡᠷᠡᠭ ᠲᠡᠢ᠃
11 ᠭᠠᠵᠠᠷ ᠠᠴᠠ ᠥᠭᠡᠷᠡ ᠨᠢᠭᠡᠨ ᠠᠷᠢᠶᠠᠲᠠᠨ ᠭᠠᠷᠴᠤ ᠢᠷᠡᠬᠦ ᠶᠢ ᠪᠢ ᠬᠠᠷᠠᠪᠠ᠃ ᠲᠡᠷᠡ ᠬᠤᠷᠠᠭᠠᠨ ᠤ ᠬᠢ ᠰᠢᠭ᠋ ᠬᠣᠶᠠᠷ ᠡᠪᠡᠷ ᠲᠡᠢ ᠪᠥᠭᠡᠳ ᠯᠤᠤ ᠰᠢᠭ᠋ ᠶᠠᠷᠢᠳᠠᠭ᠃ 12 ᠲᠡᠷᠡ ᠪᠡᠷ ᠠᠩ᠋ᠬᠠᠨ ᠤ ᠠᠷᠢᠶᠠᠲᠠᠨ ᠤ ᠡᠮᠦᠨᠡ ᠡᠴᠡ ᠠᠯᠢᠪᠠ ᠡᠷᠬᠡ ᠶᠢ ᠬᠡᠷᠡᠭᠵᠢᠭᠦᠯᠵᠦ᠂ ᠭᠠᠵᠠᠷ ᠪᠠ ᠲᠡᠨᠳᠡ ᠰᠠᠭᠤᠭᠴᠢᠳ ᠢ ᠦᠬᠦᠯ ᠦᠨ ᠰᠢᠷᠬᠠ ᠨᠢ ᠡᠳᠡᠭᠡᠷᠡᠭᠰᠡᠨ ᠠᠩ᠋ᠬᠠᠨ ᠤ ᠠᠷᠢᠶᠠᠲᠠᠨ ᠳᠤ ᠮᠥᠷᠭᠥᠭᠦᠯᠳᠡᠭ᠃ 13 ᠲᠡᠷᠡ ᠦᠯᠡᠮᠵᠢ ᠶᠡᠬᠡ ᠰᠢᠳᠢ ᠲᠡᠮᠳᠡᠭ ᠢ ᠦᠢᠯᠡᠳᠳᠡᠭ ᠶᠤᠮ᠂ ᠬᠥᠮᠦᠰ ᠦᠨ ᠡᠮᠦᠨᠡ ᠭᠠᠯ ᠢ ᠬᠦᠷᠲᠡᠯᠡ ᠲᠩᠷᠢ ᠡᠴᠡ ᠭᠠᠵᠠᠷ ᠲᠤ ᠪᠠᠭᠤᠯᠭᠠᠳᠠᠭ᠃ 14 ᠲᠡᠷᠡ ᠪᠡᠷ ᠠᠷᠢᠶᠠᠲᠠᠨ ᠤ ᠲᠥᠯᠥᠭᠡ ᠦᠢᠯᠡᠳᠬᠦ ᠵᠥᠪᠰᠢᠶᠡᠷᠡᠯ ᠲᠡᠢ ᠰᠢᠳᠢ ᠲᠡᠮᠳᠡᠭ ᠢᠶᠡᠷ ᠭᠠᠵᠠᠷ ᠲᠤ ᠰᠠᠭᠤᠭᠴᠢᠳ ᠢ ᠲᠥᠭᠡᠷᠢᠭᠦᠯᠦᠭᠡᠳ᠄ 《ᠢᠯᠳᠦᠨ ᠳᠦ ᠰᠢᠷᠬᠠᠲᠤᠭᠰᠠᠨ ᠪᠣᠯᠪᠠᠴᠤ ᠠᠮᠢᠳᠤ ᠪᠠᠢᠬᠤ ᠠᠷᠢᠶᠠᠲᠠᠨ ᠳᠤ ᠬᠥᠷᠥᠭ ᠬᠢᠵᠦ ᠥᠭᠭᠥᠭᠲᠦᠨ》 ᠭᠡᠵᠦ ᠵᠠᠬᠢᠯᠠ᠃ 15 ᠲᠡᠷᠡ ᠪᠡᠷ ᠮᠥᠨ ᠠᠷᠢᠶᠠᠲᠠᠨ ᠤ ᠬᠥᠷᠥᠭ ᠲᠦ ᠠᠮᠢᠰᠬᠤᠯ ᠣᠷᠣᠭᠤᠯᠤᠭᠠᠳ ᠠᠷᠢᠶᠠᠲᠠᠨ ᠤ ᠬᠥᠷᠥᠭ ᠢ ᠶᠠᠷᠢᠭᠤᠯᠵᠤ᠂ ᠠᠷᠢᠶᠠᠲᠠᠨ ᠤ ᠬᠥᠷᠥᠭ ᠲᠦ ᠮᠥᠷᠭᠥᠳᠡᠭ ᠦᠭᠡᠢ ᠬᠥᠮᠦᠨ ᠪᠣᠯᠭᠠᠨ ᠢ ᠠᠯᠠᠭᠤᠯᠬᠤ ᠵᠥᠪᠰᠢᠶᠡᠷᠡᠯ ᠢ ᠣᠯᠪᠠ᠃ 16 ᠮᠥᠨ ᠶᠡᠬᠡ ᠪᠠᠭᠠ᠂ ᠪᠠᠶᠠᠨ ᠶᠠᠳᠠᠭᠤ᠂ ᠴᠢᠯᠥᠭᠡᠲᠦ ᠪᠠ ᠵᠠᠷᠤᠴᠠ ᠭᠡᠰᠡᠨ ᠦᠭᠡᠢ᠂ ᠪᠦᠭᠦᠳᠡ ᠶᠢᠨ ᠪᠠᠷᠠᠭᠤᠨ ᠭᠠᠷ ᠪᠤᠶᠤ ᠮᠠᠩᠨᠠᠢ ᠳᠡᠭᠡᠷᠡ ᠲᠠᠮᠠᠭᠠ ᠳᠠᠷᠤᠭᠤᠯᠳᠠᠭ ᠲᠤᠯᠠ 17 ᠠᠷᠢᠶᠠᠲᠠᠨ ᠤ ᠨᠡᠷᠡ ᠪᠤᠶᠤ ᠠᠷᠢᠶᠠᠲᠠᠨ ᠤ ᠲᠣᠭᠠ ᠲᠠᠢ ᠲᠠᠮᠠᠭᠠ ᠪᠦᠬᠦᠢ ᠬᠥᠮᠦᠰ ᠡᠴᠡ ᠥᠭᠡᠷᠡ ᠬᠡᠨ ᠴᠤ ᠬᠤᠳᠠᠯᠳᠤᠨ ᠠᠪᠴᠤ ᠥᠭᠴᠦ ᠴᠢᠳᠠᠬᠤ ᠦᠭᠡᠢ᠃ 18 ᠡᠭᠦᠨ ᠳᠦ ᠮᠡᠷᠭᠡᠨ ᠤᠬᠠᠭᠠᠨ ᠪᠠᠢᠨᠠ᠃ ᠤᠬᠠᠭᠠᠨ ᠲᠠᠢ ᠨᠢ ᠠᠷᠢᠶᠠᠲᠠᠨ ᠤ ᠲᠣᠭᠠ ᠶᠢ ᠲᠣᠭᠠᠯᠠᠭᠲᠤᠨ᠂ ᠡᠨᠡ ᠪᠣᠯ ᠬᠥᠮᠦᠨ ᠦ ᠲᠣᠭᠠ ᠪᠥᠭᠡᠳ ᠲᠣᠭᠠ ᠨᠢ ᠵᠢᠷᠭᠤᠭᠠᠨ ᠵᠠᠭᠤ ᠵᠢᠷᠠᠨ ᠵᠢᠷᠭᠤᠭᠠ ᠶᠤᠮ᠃