ᠢᠯᠡᠷᠬᠡᠶᠢᠯᠡᠯᠭᠡ ᠳᠣᠯᠣᠭᠠ
ᠲᠠᠮᠠᠭᠠᠯᠠᠭᠳᠠᠭᠰᠠᠨ ᠬᠥᠮᠦᠰ
1 ᠡᠭᠦᠨ ᠦ ᠳᠠᠷᠠᠭᠠ᠂ ᠪᠢ ᠳᠥᠷᠪᠡᠨ ᠲᠩᠷᠢ ᠡᠯᠴᠢ ᠶᠢ ᠬᠠᠷᠠᠪᠠ᠃ ᠲᠡᠳᠡ ᠭᠠᠵᠠᠷ ᠤᠨ ᠳᠥᠷᠪᠡᠨ ᠥᠨᠴᠥᠭ ᠲᠦ ᠵᠣᠭᠰᠣᠭᠠᠳ ᠭᠠᠵᠠᠷ ᠤᠨ ᠳᠥᠷᠪᠡᠨ ᠰᠠᠯᠬᠢ ᠶᠢ ᠪᠠᠷᠢᠵᠤ ᠭᠠᠵᠠᠷ ᠳᠡᠭᠡᠷᠡ ᠪᠤᠶᠤ ᠳᠠᠯᠠᠢ ᠳᠡᠭᠡᠷᠡ᠂ ᠠᠯᠢᠪᠠ ᠮᠣᠳᠣᠨ ᠳᠡᠭᠡᠷᠡ ᠰᠠᠯᠬᠢᠯᠠᠭᠤᠯᠬᠤ ᠦᠭᠡᠢ ᠭᠡᠵᠦ ᠪᠠᠢᠯᠠ᠃ 2 ᠲᠡᠭᠡᠬᠦ ᠳᠦ᠂ ᠥᠭᠡᠷᠡ ᠲᠩᠷᠢ ᠡᠯᠴᠢ ᠠᠮᠢᠳᠤ ᠪᠤᠷᠬᠠᠨ ᠤ ᠲᠠᠮᠠᠭᠠ ᠶᠢ ᠠᠪᠴᠤ ᠨᠠᠷᠠ ᠮᠠᠨᠳᠤᠬᠤ ᠵᠦᠭ ᠡᠴᠡ ᠭᠠᠷᠴᠤ ᠢᠷᠡᠬᠦ ᠶᠢ ᠪᠢ ᠬᠠᠷᠠᠪᠠ᠃ ᠲᠡᠷᠡ ᠪᠡᠷ ᠭᠠᠵᠠᠷ ᠪᠠ ᠳᠠᠯᠠᠢ ᠶᠢ ᠬᠣᠣᠷᠯᠠᠬᠤ ᠵᠥᠪᠰᠢᠶᠡᠷᠡᠯ ᠢ ᠣᠯᠣᠭᠰᠠᠨ ᠨᠥᠭᠥᠭᠡ ᠳᠥᠷᠪᠡᠨ ᠡᠯᠴᠢ ᠳᠤ ᠶᠡᠬᠡ ᠳᠠᠭᠤᠨ ᠢᠶᠠᠷ᠄ 3 《ᠪᠢᠳᠡ ᠪᠤᠷᠬᠠᠨ ᠤ ᠪᠠᠨ ᠵᠠᠷᠤᠴᠠ ᠨᠠᠷ ᠤᠨ ᠮᠠᠩᠨᠠᠢ ᠳᠡᠭᠡᠷᠡ ᠲᠠᠮᠠᠭᠠ ᠳᠠᠷᠤᠲᠠᠯᠠ ᠲᠠ ᠨᠠᠷ ᠭᠠᠵᠠᠷ ᠢ ᠴᠤ᠂ ᠳᠠᠯᠠᠢ ᠶᠢ ᠴᠤ᠂ ᠮᠣᠳᠣᠳ ᠢ ᠴᠤ ᠪᠦᠦ ᠰᠦᠢᠳᠬᠡ》 ᠭᠡᠵᠦ ᠬᠠᠰᠬᠢᠷᠤᠯᠠ᠃
4 ᠲᠠᠮᠠᠭᠠᠯᠠᠭᠤᠯᠤᠭᠰᠠᠨ ᠬᠥᠮᠦᠰ ᠦᠨ ᠲᠣᠭᠠ ᠶᠢ ᠪᠢ ᠰᠣᠨᠣᠰᠪᠠ᠃ ᠢᠰᠷᠧᠯᠴᠦᠳ ᠦᠨ ᠠᠯᠢᠪᠠ ᠣᠪᠣᠭ ᠤᠨ ᠳᠤᠮᠳᠠ ᠠᠴᠠ ᠲᠠᠮᠠᠭᠠᠯᠠᠭᠤᠯᠤᠭᠰᠠᠨ ᠬᠥᠮᠦᠰ ᠨᠢ ᠠᠷᠪᠠᠨ ᠳᠥᠷᠪᠡᠨ ᠲᠦᠮᠡ ᠳᠥᠷᠪᠡᠨ ᠮᠢᠩ᠋ᠭᠠ ᠪᠣᠯᠠᠢ᠃
5 ᠶᠦᠳᠠ ᠣᠪᠣᠭ ᠠᠴᠠ ᠲᠠᠮᠠᠭᠠᠯᠠᠭᠤᠯᠤᠭᠰᠠᠨ ᠨᠢ ᠲᠦᠮᠡ ᠬᠣᠶᠠᠷ ᠮᠢᠩ᠋ᠭᠠ᠂ ᠷᠧᠣᠪᠧᠨ ᠣᠪᠣᠭ ᠠᠴᠠ ᠲᠦᠮᠡ ᠬᠣᠶᠠᠷ ᠮᠢᠩ᠋ᠭᠠ᠂ ᠭᠠᠳ᠋ ᠣᠪᠣᠭ ᠠᠴᠠ ᠲᠦᠮᠡ ᠬᠣᠶᠠᠷ ᠮᠢᠩ᠋ᠭᠠ᠂
6 ᠠᠱᠧᠷ ᠣᠪᠣᠭ ᠠᠴᠠ ᠲᠦᠮᠡ ᠬᠣᠶᠠᠷ ᠮᠢᠩ᠋ᠭᠠ᠂ ᠨᠠᠹᠲ᠋ᠠᠯᠢ ᠣᠪᠣᠭ ᠠᠴᠠ ᠲᠦᠮᠡ ᠬᠣᠶᠠᠷ ᠮᠢᠩ᠋ᠭᠠ᠂ ᠮᠠᠨᠠᠰᠧ ᠣᠪᠣᠭ ᠠᠴᠠ ᠲᠦᠮᠡ ᠬᠣᠶᠠᠷ ᠮᠢᠩ᠋ᠭᠠ᠂
7 ᠰᠢᠮᠧᠶᠣᠨ ᠣᠪᠣᠭ ᠠᠴᠠ ᠲᠦᠮᠡ ᠬᠣᠶᠠᠷ ᠮᠢᠩ᠋ᠭᠠ᠂ ᠯᠧᠸᠢ ᠣᠪᠣᠭ ᠠᠴᠠ ᠲᠦᠮᠡ ᠬᠣᠶᠠᠷ ᠮᠢᠩ᠋ᠭᠠ᠂ ᠢᠰᠠᠺᠠᠷ ᠣᠪᠣᠭ ᠠᠴᠠ ᠲᠦᠮᠡ ᠬᠣᠶᠠᠷ ᠮᠢᠩ᠋ᠭᠠ᠂
8 ᠽᠧᠪᠦ᠋ᠯᠣᠨ ᠣᠪᠣᠭ ᠠᠴᠠ ᠲᠦᠮᠡ ᠬᠣᠶᠠᠷ ᠮᠢᠩ᠋ᠭᠠ᠂ ᠶᠣᠰᠧᠹ ᠣᠪᠣᠭ ᠠᠴᠠ ᠲᠦᠮᠡ ᠬᠣᠶᠠᠷ ᠮᠢᠩ᠋ᠭᠠ᠂ ᠪᠢᠨᠶᠠᠮᠢᠨ ᠣᠪᠣᠭ ᠠᠴᠠ ᠲᠦᠮᠡ ᠬᠣᠶᠠᠷ ᠮᠢᠩ᠋ᠭᠠ ᠪᠣᠯᠠᠢ᠃
ᠡᠯᠡ ᠦᠨᠳᠦᠰᠦᠲᠡᠨ ᠡᠴᠡ ᠢᠷᠡᠭᠰᠡᠨ ᠦᠢ ᠲᠦᠮᠡᠨ ᠬᠥᠮᠦᠨ
9 ᠠᠩ᠋ᠬᠠᠷᠤᠭᠲᠤᠨ᠂ ᠡᠳᠡᠭᠡᠷ ᠦᠨ ᠳᠠᠷᠠᠭᠠ ᠪᠢ ᠦᠵᠡᠬᠦ ᠳᠦ᠂ ᠦᠨᠳᠦᠰᠦᠲᠡᠨ᠂ ᠣᠪᠣᠭ᠂ ᠠᠷᠠᠳ ᠲᠦᠮᠡᠨ᠂ ᠬᠡᠯᠡ ᠪᠦᠷᠢ ᠶᠢᠨ ᠲᠣᠭᠠᠯᠠᠰᠢ ᠦᠭᠡᠢ ᠦᠢ ᠲᠦᠮᠡᠨ ᠬᠥᠮᠦᠨ ᠰᠡᠨᠲᠢ ᠶᠢᠨ ᠡᠮᠦᠨᠡ᠂ ᠬᠤᠷᠠᠭᠠᠨ ᠤ ᠡᠮᠦᠨᠡ ᠵᠣᠭᠰᠣᠵᠤ ᠪᠠᠢᠯᠠ᠃ ᠲᠡᠳᠡ ᠴᠠᠭᠠᠨ ᠬᠤᠪᠴᠠᠰᠤ ᠡᠮᠦᠰᠴᠦ᠂ ᠳ᠋ᠠᠯ ᠮᠣᠳᠣᠨ ᠤ ᠮᠥᠴᠢᠷ ᠤᠳ ᠢ ᠭᠠᠷ ᠲᠠᠭᠠᠨ ᠪᠠᠷᠢᠨ 10 ᠶᠡᠬᠡ ᠳᠠᠭᠤ ᠪᠠᠷ᠄ 《ᠰᠡᠨᠲᠢ ᠳᠤ ᠵᠠᠯᠠᠷᠠᠭᠴᠢ ᠪᠢᠳᠡᠨ ᠦ ᠪᠤᠷᠬᠠᠨ ᠪᠠ ᠬᠤᠷᠠᠭᠠᠨ ᠳᠤ ᠠᠪᠤᠷᠠᠯ ᠪᠤᠢ》 ᠭᠡᠵᠦ ᠬᠠᠰᠬᠢᠷᠴᠤ ᠪᠠᠢᠯᠠ᠃ 11 ᠰᠡᠨᠲᠢ᠂ ᠠᠬᠠᠯᠠᠭᠴᠢᠳ ᠪᠠ ᠳᠥᠷᠪᠡᠨ ᠠᠮᠢᠳᠤ ᠪᠡᠶᠡᠲᠡᠨ ᠦ ᠲᠣᠭᠣᠷᠢᠨ ᠳᠤ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠲᠩᠷᠢ ᠡᠯᠴᠢᠳ ᠰᠡᠨᠲᠢ ᠶᠢᠨ ᠡᠮᠦᠨᠡ ᠨᠢᠭᠤᠷ ᠢᠶᠠᠨ ᠭᠠᠵᠠᠷ ᠲᠤ ᠨᠠᠭᠠᠨ ᠪᠤᠷᠬᠠᠨ ᠳᠤ ᠮᠥᠷᠭᠥᠭᠡᠳ᠄ 12 《ᠠᠮᠧᠨ︕ ᠪᠢᠳᠡᠨ ᠦ ᠪᠤᠷᠬᠠᠨ ᠳᠤ ᠮᠠᠭᠲᠠᠭᠠᠯ᠂ ᠠᠯᠳᠠᠷ᠂ ᠤᠬᠠᠭᠠᠨ᠂ ᠲᠠᠯᠠᠷᠬᠠᠯ᠂ ᠬᠦᠨᠳᠦᠳᠬᠡᠯ᠂ ᠡᠷᠬᠡ ᠪᠠ ᠬᠦᠴᠦ ᠮᠥᠩᠬᠡ ᠶᠢᠨ ᠮᠥᠩᠬᠡᠳᠡ ᠪᠠᠢᠬᠤ ᠪᠣᠯᠲᠤᠭᠠᠢ᠃ ᠠᠮᠧᠨ》 ᠭᠡᠵᠡᠭᠡᠪᠡ᠃
13 ᠲᠡᠭᠡᠬᠦ ᠳᠦ᠂ ᠠᠬᠠᠯᠠᠭᠴᠢᠳ ᠤᠨ ᠨᠢᠭᠡ ᠨᠢ ᠨᠠᠳᠠ ᠠᠴᠠ᠄ 《ᠴᠠᠭᠠᠨ ᠬᠤᠪᠴᠠᠰᠤ ᠡᠮᠦᠰᠦᠭᠰᠡᠨ ᠡᠨᠡ ᠬᠥᠮᠦᠰ ᠬᠡᠨ ᠪᠤᠢ︖ ᠲᠡᠳᠡ ᠬᠠᠮᠢᠭᠠ ᠠᠴᠠ ᠢᠷᠡᠪᠡ︖》 ᠭᠡᠵᠦ ᠠᠰᠠᠭᠤᠭᠰᠠᠨ ᠳᠤ᠂ 14 ᠪᠢ᠄ 《ᠨᠣᠶᠠᠨᠲᠠᠨ ᠮᠢᠨᠢ᠂ ᠲᠠ ᠮᠡᠳᠡᠨᠡ》 ᠭᠡᠪᠡ᠃ ᠲᠡᠷᠡ ᠨᠠᠳᠠ ᠳᠤ᠄ 《ᠲᠡᠳᠡ ᠪᠣᠯ ᠶᠡᠬᠡ ᠵᠦᠳᠡᠭᠦᠷᠢ ᠡᠴᠡ ᠭᠠᠷᠴᠤ ᠢᠷᠡᠭᠰᠡᠳ ᠶᠤᠮ᠂ ᠬᠤᠷᠠᠭᠠᠨ ᠤ ᠴᠢᠰᠤ ᠪᠠᠷ ᠬᠤᠪᠴᠠᠰᠤ ᠪᠠᠨ ᠤᠬᠢᠶᠠᠵᠤ ᠴᠠᠢᠷᠠᠭᠤᠯᠤᠭᠰᠠᠨ ᠲᠤᠯᠠ 15 ᠲᠡᠳᠡ ᠪᠤᠷᠬᠠᠨ ᠤ ᠰᠡᠨᠲᠢ ᠶᠢᠨ ᠡᠮᠦᠨᠡ ᠪᠠᠢᠵᠤ᠂ ᠲᠡᠭᠦᠨ ᠦ ᠥᠷᠭᠥᠭᠡᠨ ᠳᠦ ᠡᠳᠦᠷ ᠰᠥᠨᠢ ᠦᠭᠡᠢ ᠲᠡᠭᠦᠨ ᠳᠦ ᠦᠢᠯᠡᠴᠢᠯᠡᠵᠦ ᠪᠠᠢᠨᠠ᠃ ᠰᠡᠨᠲᠢ ᠳᠤ ᠵᠠᠯᠠᠷᠠᠭᠴᠢ ᠲᠡᠳᠡᠨ ᠦ ᠳᠡᠭᠡᠭᠦᠷ ᠴᠠᠴᠠᠷ ᠢᠶᠠᠨ ᠳᠡᠯᠭᠡᠨᠡ 19 ᠃ 16 ᠲᠡᠳᠡ ᠳᠠᠬᠢᠵᠤ ᠥᠯᠥᠰᠬᠦ ᠦᠭᠡᠢ᠂ ᠳᠠᠬᠢᠵᠤ ᠴᠠᠩ᠋ᠭᠠᠬᠤ ᠦᠭᠡᠢ᠂ ᠲᠡᠳᠡᠨ ᠦ ᠳᠡᠭᠡᠷᠡ ᠡᠴᠡ ᠨᠠᠷᠠ ᠪᠤᠶᠤ ᠶᠠᠮᠠᠷ ᠴᠤ ᠬᠠᠯᠠᠭᠤᠨ ᠰᠢᠷᠠᠬᠤ ᠦᠭᠡᠢ ᠪᠣᠯᠣᠨᠠ᠃ 17 ᠤᠴᠢᠷ ᠨᠢ ᠰᠡᠨᠲᠢ ᠶᠢᠨ ᠭᠣᠣᠯ ᠳᠠᠬᠢ ᠬᠤᠷᠠᠭᠠ ᠲᠡᠳᠡᠨ ᠢ ᠬᠣᠨᠢᠴᠢᠯᠠᠵᠤ᠂ ᠠᠮᠢ ᠶᠢᠨ ᠤᠰᠤᠨ ᠤ ᠪᠤᠯᠠᠭ ᠤᠷᠤᠭᠤ ᠵᠠᠮᠴᠢᠯᠠᠵᠤ᠂ ᠪᠤᠷᠬᠠᠨ ᠲᠡᠳᠡᠨ ᠦ ᠨᠢᠳᠦᠨ ᠡᠴᠡ ᠬᠠᠮᠤᠭ ᠨᠢᠯᠪᠤᠰᠤ ᠶᠢ ᠠᠷᠴᠢᠬᠤ ᠪᠣᠯᠣᠨᠠ》 ᠭᠡᠪᠡ᠃