ᠢᠯᠡᠷᠬᠡᠶᠢᠯᠡᠯᠭᠡ ᠠᠷᠪᠠᠨ ᠳᠥᠷᠪᠡ
ᠵᠣᠯᠢᠶᠠᠰᠤᠯᠠᠵᠤ ᠠᠪᠤᠭᠳᠠᠭᠰᠠᠨ ᠬᠥᠮᠦᠰ ᠦᠨ ᠳᠠᠭᠤᠤ
1 ᠠᠩ᠋ᠬᠠᠷᠤᠭᠲᠤᠨ᠂ ᠽᠢᠶᠣᠨ ᠠᠭᠤᠯᠠᠨ ᠳᠤ ᠬᠤᠷᠠᠭᠠ ᠵᠣᠭᠰᠣᠵᠤ ᠪᠤᠢ ᠶᠢ ᠪᠢ ᠬᠠᠷᠠᠯᠠ᠃ ᠲᠡᠭᠦᠨ ᠲᠡᠢ ᠬᠠᠮᠲᠤ ᠠᠷᠪᠠᠨ ᠳᠥᠷᠪᠡᠨ ᠲᠦᠮᠡ ᠳᠥᠷᠪᠡᠨ ᠮᠢᠩ᠋ᠭᠠᠨ ᠬᠥᠮᠦᠨ ᠪᠠᠢᠪᠠ᠃ ᠮᠠᠩᠨᠠᠢ ᠳᠡᠭᠡᠷᠡ ᠨᠢ ᠬᠤᠷᠠᠭᠠᠨ ᠤ ᠨᠡᠷᠡ ᠪᠠ ᠲᠡᠭᠦᠨ ᠦ ᠡᠴᠢᠭᠡ ᠶᠢᠨ ᠨᠡᠷᠡ ᠪᠢᠴᠢᠭᠡᠰᠦᠲᠡᠢ᠃ 2 ᠮᠥᠨ ᠶᠡᠬᠡ ᠤᠰᠤᠨ ᠤ ᠳᠠᠭᠤ ᠮᠡᠲᠦ᠂ ᠪᠠᠰᠠ ᠬᠦᠴᠦᠲᠦ ᠠᠶᠤᠩ᠋ᠭᠠ ᠶᠢᠨ ᠨᠦᠷᠬᠢᠶᠡᠨ ᠮᠡᠲᠦ ᠳᠠᠭᠤ ᠲᠩᠷᠢ ᠡᠴᠡ ᠭᠠᠷᠬᠤ ᠶᠢ ᠪᠢ ᠰᠣᠨᠣᠰᠣᠯᠠ᠃ ᠰᠣᠨᠣᠰᠣᠭᠰᠠᠨ ᠳᠠᠭᠤ ᠨᠢ ᠶᠠᠲᠤᠭᠠᠴᠢᠳ ᠤᠨ ᠶᠠᠲᠤᠭᠠ ᠶᠠᠲᠤᠭᠠᠳᠠᠬᠤ ᠳᠠᠭᠤ ᠮᠡᠲᠦ ᠪᠠᠢᠯᠠ᠃ 3 ᠲᠡᠳᠡ ᠰᠡᠨᠲᠢ ᠶᠢᠨ ᠡᠮᠦᠨᠡ᠂ ᠪᠠᠰᠠ ᠳᠥᠷᠪᠡᠨ ᠠᠮᠢᠳᠤ ᠪᠡᠶᠡᠲᠡᠨ ᠪᠠ ᠠᠬᠠᠯᠠᠭᠴᠢᠳ ᠤᠨ ᠡᠮᠦᠨᠡ ᠰᠢᠨᠡ ᠳᠠᠭᠤᠤ ᠳᠠᠭᠤᠯᠠᠯᠠ᠃ ᠭᠠᠵᠠᠷ ᠳᠡᠭᠡᠷᠡ ᠡᠴᠡ ᠵᠣᠯᠢᠶᠠᠰᠤᠯᠠᠵᠤ ᠠᠪᠤᠭᠰᠠᠨ ᠠᠷᠪᠠᠨ ᠳᠥᠷᠪᠡᠨ ᠲᠦᠮᠡ ᠳᠥᠷᠪᠡᠨ ᠮᠢᠩ᠋ᠭᠠᠨ ᠬᠥᠮᠦᠨ ᠡᠴᠡ ᠥᠭᠡᠷᠡ ᠬᠡᠨ ᠴᠤ ᠲᠡᠷᠡ ᠳᠠᠭᠤᠤ ᠶᠢ ᠰᠤᠷᠴᠤ ᠴᠢᠳᠠᠭᠰᠠᠨ ᠦᠭᠡᠢ᠃ 4 ᠲᠡᠳᠡ ᠪᠣᠯ ᠥᠪᠡᠷᠰᠡᠳ ᠢ ᠪᠠᠨ ᠡᠮᠡᠭᠲᠡᠢᠴᠦᠳ ᠢᠶᠡᠷ ᠪᠤᠵᠠᠷᠯᠠᠭᠤᠯᠤᠭᠠ ᠦᠭᠡᠢ ᠣᠩ᠋ᠭᠣᠨ ᠬᠥᠮᠦᠰ ᠪᠢᠯᠡ᠃ ᠬᠤᠷᠠᠭᠠ ᠬᠠᠮᠢᠭᠠᠰᠢ ᠪᠠᠨ ᠶᠠᠪᠤᠭᠰᠠᠨ ᠴᠤ ᠲᠡᠳᠡ ᠲᠡᠭᠦᠨ ᠢ ᠳᠠᠭᠠᠳᠠᠭ᠃ ᠲᠡᠳᠡ ᠪᠣᠯ ᠪᠤᠷᠬᠠᠨ ᠪᠣᠯᠣᠨ ᠬᠤᠷᠠᠭᠠᠨ ᠳᠤ ᠡᠷᠭᠦᠬᠦ ᠶᠢᠨ ᠲᠤᠯᠠ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠦ ᠳᠤᠮᠳᠠ ᠠᠴᠠ ᠵᠣᠯᠢᠶᠠᠰᠤᠯᠠᠵᠤ ᠠᠪᠤᠭᠰᠠᠨ ᠠᠩ᠋ᠬᠠᠨ ᠤ ᠳᠡᠭᠡᠵᠢ ᠶᠤᠮ᠃ 5 ᠲᠡᠳᠡᠨ ᠦ ᠠᠮᠠᠨ ᠠᠴᠠ ᠬᠤᠳᠠᠯ ᠣᠯᠳᠠᠭᠰᠠᠨ ᠦᠭᠡᠢ᠂ ᠲᠡᠳᠡ ᠭᠡᠮ ᠦᠭᠡᠢ ᠪᠠᠢᠳᠠᠭ᠃
ᠭᠤᠷᠪᠠᠨ ᠲᠩᠷᠢ ᠡᠯᠴᠢ ᠶᠢᠨ ᠲᠤᠩ᠋ᠬᠠᠭᠯᠠᠯ
6 ᠣᠭᠲᠠᠷᠭᠤᠢ ᠪᠠᠷ ᠥᠭᠡᠷᠡ ᠨᠢᠭᠡᠨ ᠲᠩᠷᠢ ᠡᠯᠴᠢ ᠨᠢᠰᠴᠦ ᠶᠠᠪᠤᠬᠤ ᠶᠢ ᠪᠢ ᠬᠠᠷᠠᠪᠠ᠃ ᠭᠠᠵᠠᠷ ᠲᠤ ᠰᠠᠭᠤᠭᠴᠢᠳ ᠪᠤᠶᠤ ᠠᠯᠢᠪᠠ ᠦᠨᠳᠦᠰᠦᠲᠡᠨ᠂ ᠣᠪᠣᠭ᠂ ᠬᠡᠯᠡ᠂ ᠠᠷᠠᠳ ᠲᠦᠮᠡᠨ ᠳᠦ ᠤᠯᠠᠮᠵᠢᠯᠠᠬᠤ ᠮᠥᠩᠬᠡ ᠶᠢᠨ ᠪᠠᠶᠠᠷ ᠤᠨ ᠮᠡᠳᠡᠭᠡ ᠲᠡᠭᠦᠨ ᠳᠦ ᠪᠤᠢ᠃ 7 ᠲᠡᠷᠡ ᠶᠡᠬᠡ ᠳᠠᠭᠤᠨ ᠢᠶᠠᠷ᠄ 《ᠪᠤᠷᠬᠠᠨ ᠠᠴᠠ ᠡᠮᠢᠶᠡᠵᠦ ᠠᠯᠳᠠᠷ ᠢ ᠲᠡᠭᠦᠨ ᠳᠦ ᠡᠷᠭᠦᠭᠲᠦᠨ᠃ ᠲᠡᠭᠦᠨ ᠦ ᠰᠢᠭᠦᠬᠦ ᠴᠠᠭ ᠢᠷᠡᠯᠡ᠃ ᠲᠩᠷᠢ ᠪᠠ ᠭᠠᠵᠠᠷ᠂ ᠳᠠᠯᠠᠢ ᠪᠠ ᠤᠰᠤᠨ ᠤ ᠡᠬᠢ ᠪᠤᠯᠠᠭ ᠤᠳ ᠢ ᠪᠦᠲᠦᠭᠡᠭᠰᠡᠨ ᠲᠡᠭᠦᠨ ᠳᠦ ᠮᠥᠷᠭᠥᠭᠲᠦᠨ》 ᠭᠡᠯᠡ᠃
8 ᠬᠣᠶᠠᠳᠠᠬᠢ ᠲᠩᠷᠢ ᠡᠯᠴᠢ ᠵᠠᠯᠭᠠᠭᠠᠳ᠄ 《ᠨᠤᠷᠠᠵᠠᠢ︕ ᠶᠡᠬᠡ ᠪᠠᠪᠢᠯᠣᠨ ᠨᠤᠷᠠᠵᠠᠢ︕ ᠲᠡᠭᠦᠨ ᠦ ᠰᠠᠳᠤᠷ ᠰᠠᠮᠠᠭᠤᠨ ᠪᠣᠯᠣᠨ ᠬᠢᠯᠢᠩ ᠪᠦᠬᠦᠢ ᠦᠵᠦᠮ ᠦᠨ ᠠᠷᠢᠬᠢ ᠶᠢ ᠲᠡᠷᠡ ᠬᠠᠮᠤᠭ ᠤᠯᠤᠰ ᠲᠤ ᠤᠤᠭᠤᠯᠭᠠᠭᠰᠠᠨ ᠪᠢᠯᠡ》 ᠭᠡᠪᠡ᠃
9 ᠭᠤᠷᠪᠠᠳᠠᠬᠢ ᠲᠩᠷᠢ ᠡᠯᠴᠢ ᠲᠡᠳᠡᠨ ᠢ ᠳᠠᠭᠠᠵᠤ ᠶᠡᠬᠡ ᠳᠠᠭᠤᠨ ᠢᠶᠠᠷ᠄ 《ᠬᠡᠨ ᠴᠤ ᠪᠠᠢ᠂ ᠠᠷᠢᠶᠠᠲᠠᠨ ᠪᠠ ᠲᠡᠭᠦᠨ ᠦ ᠬᠥᠷᠥᠭ ᠲᠦ ᠮᠥᠷᠭᠥᠨ ᠮᠠᠩᠨᠠᠢ ᠳᠡᠭᠡᠷᠡ ᠪᠡᠨ ᠪᠤᠶᠤ ᠭᠠᠷ ᠳᠡᠭᠡᠷᠡ ᠪᠡᠨ ᠲᠠᠮᠠᠭᠠᠯᠠᠭᠤᠯᠪᠠᠯ 10 ᠪᠤᠷᠬᠠᠨ ᠤ ᠬᠢᠯᠢᠩ ᠤᠨ ᠬᠤᠨᠳᠠᠭᠠᠨ ᠳᠤ ᠬᠣᠯᠢᠴᠠ ᠦᠭᠡᠢ ᠪᠠᠷ ᠬᠤᠨᠳᠠᠭᠠᠯᠠᠭᠰᠠᠨ ᠪᠤᠷᠬᠠᠨ ᠤ ᠠᠭᠤᠷ ᠲᠠᠢ ᠠᠷᠢᠬᠢᠨ ᠠᠴᠠ ᠤᠤᠭᠤᠵᠤ᠂ ᠠᠷᠢᠭᠤᠨ ᠲᠩᠷᠢ ᠡᠯᠴᠢᠳ ᠪᠠ ᠬᠤᠷᠠᠭᠠᠨ ᠤ ᠡᠮᠦᠨᠡ ᠭᠠᠯ ᠪᠠ ᠬᠦᠬᠦᠷ ᠢᠶᠡᠷ ᠲᠠᠷᠴᠢᠯᠠᠭᠠᠭᠳᠠᠬᠤ ᠪᠣᠯᠣᠨᠠ᠃ 11 ᠲᠡᠳᠡᠨ ᠦ ᠲᠠᠷᠴᠢᠯᠠᠯ ᠤᠨ ᠤᠲᠤᠭᠠ ᠥᠨᠢ ᠮᠥᠩᠬᠡᠳᠡ ᠪᠤᠷᠭᠢᠯᠤᠨᠠ᠃ ᠠᠷᠢᠶᠠᠲᠠᠨ ᠪᠠ ᠲᠡᠭᠦᠨ ᠦ ᠬᠥᠷᠥᠭ ᠲᠦ ᠮᠥᠷᠭᠥᠭᠴᠢᠳ᠂ ᠠᠷᠢᠶᠠᠲᠠᠨ ᠤ ᠨᠡᠷᠡ ᠲᠠᠢ ᠲᠠᠮᠠᠭᠠ ᠪᠠᠷ ᠲᠠᠮᠠᠭᠠᠯᠠᠭᠳᠠᠬᠤ ᠬᠥᠮᠦᠨ ᠪᠣᠯᠭᠠᠨ ᠡᠳᠦᠷ ᠴᠤ᠂ ᠰᠥᠨᠢ ᠴᠤ ᠠᠮᠠᠷᠠᠯ ᠢ ᠣᠯᠬᠤ ᠦᠭᠡᠢ》 ᠭᠡᠪᠡ᠃
12 ᠡᠭᠦᠨ ᠳᠦ ᠪᠤᠷᠬᠠᠨ ᠤ ᠵᠠᠷᠯᠢᠭ ᠤᠳ ᠢ ᠰᠠᠬᠢᠵᠤ ᠢᠰᠦ᠋ᠰ ᠲᠤ ᠢᠲᠡᠭᠡᠯ ᠲᠡᠢ ᠪᠠᠢᠳᠠᠭ ᠠᠷᠢᠭᠤᠨ ᠬᠥᠮᠦᠰ ᠦᠨ ᠲᠡᠪᠴᠢᠶᠡᠷᠢ ᠬᠡᠷᠡᠭ ᠲᠡᠢ᠃
13 ᠲᠡᠭᠡᠬᠦ ᠳᠦ᠂ ᠲᠩᠷᠢ ᠡᠴᠡ ᠳᠠᠭᠤ ᠭᠠᠷᠴᠤ᠄ 《ᠪᠢᠴᠢᠭᠲᠦᠨ᠂ ᠣᠳᠣ ᠠᠴᠠ ᠡᠬᠢᠯᠡᠨ ᠡᠵᠡᠨ ᠦ ᠳᠣᠲᠣᠷᠠ ᠦᠬᠦᠭᠴᠢᠳ ᠪᠤᠶᠠᠨ ᠲᠠᠢ》 ᠭᠡᠬᠦ ᠶᠢ ᠪᠢ ᠰᠣᠨᠣᠰᠪᠠ᠃ ᠠᠷᠢᠭᠤᠨ ᠰᠦᠨᠡᠰᠦ᠄ 《ᠲᠡᠢᠮᠦ ᠡ᠂ ᠦᠢᠯᠡᠰ ᠨᠢ ᠲᠡᠳᠡᠨ ᠢ ᠳᠠᠭᠠᠬᠤ ᠲᠤᠯᠠ ᠲᠡᠳᠡ ᠵᠦᠳᠡᠭᠦᠷᠢ ᠡᠴᠡ ᠪᠡᠨ ᠰᠠᠯᠵᠤ ᠠᠮᠠᠷᠠᠬᠤ ᠪᠣᠯᠣᠨᠠ》 ᠭᠡᠪᠡ᠃
ᠠᠪᠤᠷᠠᠯ ᠤᠨ ᠬᠤᠷᠢᠶᠠᠯᠲᠠ ᠪᠠ ᠰᠢᠳᠬᠡᠯ ᠦᠨ ᠬᠤᠷᠢᠶᠠᠯᠲᠠ
14 ᠠᠩ᠋ᠬᠠᠷᠤᠭᠲᠤᠨ᠂ ᠴᠠᠭᠠᠨ ᠡᠭᠦᠯᠡ ᠪᠠᠢᠭᠰᠠᠨ ᠪᠥᠭᠡᠳ ᠡᠭᠦᠯᠡᠨ ᠳᠡᠭᠡᠷᠡ ᠬᠥᠮᠦᠨ ᠦ ᠬᠦᠦ ᠮᠡᠲᠦ ᠨᠢᠭᠡᠨ ᠰᠠᠭᠤᠵᠤ ᠪᠤᠢ ᠶᠢ ᠪᠢ ᠬᠠᠷᠠᠯᠠ᠃ ᠲᠡᠷᠢᠭᠦᠨ ᠳᠡᠭᠡᠷᠡ ᠨᠢ ᠠᠯᠲᠠᠨ ᠲᠢᠲᠢᠮ ᠲᠠᠢ᠂ ᠮᠤᠲᠤᠷ ᠲᠤᠨᠢ ᠬᠤᠷᠴᠠ ᠬᠠᠳᠤᠭᠤᠷ ᠲᠠᠢ᠃ 15 ᠥᠭᠡᠷᠡ ᠨᠢᠭᠡᠨ ᠲᠩᠷᠢ ᠡᠯᠴᠢ ᠥᠷᠭᠥᠭᠡᠨ ᠡᠴᠡ ᠭᠠᠷᠴᠤ᠂ ᠡᠭᠦᠯᠡᠨ ᠳᠡᠭᠡᠷᠡ ᠰᠠᠭᠤᠭᠴᠢ ᠳᠤ ᠶᠡᠬᠡ ᠳᠠᠭᠤᠨ ᠢᠶᠠᠷ᠄ 《ᠬᠠᠳᠤᠭᠤᠷ ᠢᠶᠠᠷ ᠢᠶᠠᠨ ᠬᠠᠮᠤᠵᠤ ᠬᠤᠷᠢᠶᠠ︕ ᠭᠠᠵᠠᠷ ᠳᠡᠭᠡᠷᠡᠬᠢ ᠲᠠᠷᠢᠶᠠ ᠪᠣᠯᠪᠠᠰᠤᠷᠠᠵᠤ᠂ ᠬᠤᠷᠢᠶᠠᠯᠲᠠ ᠶᠢᠨ ᠴᠠᠭ ᠪᠣᠯᠣᠯᠠ》 ᠭᠡᠵᠦ ᠬᠠᠰᠬᠢᠷᠪᠠ᠃ 16 ᠲᠡᠢᠮᠦ ᠡᠴᠡ ᠡᠭᠦᠯᠡᠨ ᠳᠡᠭᠡᠷᠡ ᠰᠠᠭᠤᠭᠴᠢ ᠨᠢ ᠭᠠᠵᠠᠷ ᠳᠡᠭᠡᠭᠦᠷ ᠬᠠᠳᠤᠭᠤᠷ ᠢᠶᠠᠷ ᠢᠶᠠᠨ ᠬᠠᠮᠤᠭᠰᠠᠨ ᠳᠤ᠂ ᠭᠠᠵᠠᠷ ᠳᠡᠭᠡᠷᠡᠬᠢ ᠲᠠᠷᠢᠶᠠ ᠬᠤᠷᠢᠶᠠᠭᠳᠠᠵᠠᠢ᠃
17 ᠪᠠᠰᠠ ᠥᠭᠡᠷᠡ ᠨᠢᠭᠡᠨ ᠲᠩᠷᠢ ᠡᠯᠴᠢ ᠲᠩᠷᠢ ᠳᠡᠭᠡᠷᠡᠬᠢ ᠥᠷᠭᠥᠭᠡᠨ ᠡᠴᠡ ᠭᠠᠷᠴᠤ ᠢᠷᠡᠪᠡ᠃ ᠲᠡᠭᠦᠨ ᠳᠦ ᠴᠤ ᠬᠤᠷᠴᠠ ᠬᠠᠳᠤᠭᠤᠷ ᠪᠠᠢᠪᠠ᠃ 18 ᠪᠠᠰᠠ ᠨᠢᠭᠡ ᠲᠩᠷᠢ ᠡᠯᠴᠢ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠡᠴᠡ ᠭᠠᠷᠤᠯᠠ᠃ ᠲᠡᠭᠦᠨ ᠳᠦ ᠭᠠᠯ ᠢ ᠵᠠᠬᠢᠷᠬᠤ ᠡᠷᠬᠡ ᠪᠤᠢ᠃ ᠲᠡᠷᠡ ᠬᠤᠷᠴᠠ ᠬᠠᠳᠤᠭᠤᠷ ᠲᠠᠢ ᠲᠩᠷᠢ ᠡᠯᠴᠢ ᠶᠢ ᠶᠡᠬᠡ ᠳᠠᠭᠤᠨ ᠢᠶᠠᠷ ᠳᠠᠭᠤᠳᠠᠨ᠄ 《ᠦᠵᠦᠮ ᠪᠣᠯᠪᠠᠰᠤᠷᠠᠯᠠ᠂ ᠬᠤᠷᠴᠠ ᠬᠠᠳᠤᠭᠤᠷ ᠢᠶᠠᠨ ᠠᠪᠴᠤ᠂ ᠭᠠᠵᠠᠷ ᠳᠡᠭᠡᠷᠡᠬᠢ ᠦᠵᠦᠮ ᠦᠨ ᠮᠣᠳᠣᠨ ᠠᠴᠠ ᠪᠠᠭᠴᠠ ᠪᠠᠭᠴᠠ ᠦᠵᠦᠮ ᠢ ᠬᠤᠷᠢᠶᠠ》 ᠭᠡᠪᠡ᠃ 19 ᠡᠢᠮᠦ ᠡᠴᠡ ᠲᠩᠷᠢ ᠡᠯᠴᠢ ᠬᠠᠳᠤᠭᠤᠷ ᠢᠶᠠᠷ ᠢᠶᠠᠨ ᠭᠠᠵᠠᠷ ᠤᠷᠤᠭᠤ ᠬᠠᠮᠤᠭᠠᠳ ᠭᠠᠵᠠᠷ ᠳᠡᠭᠡᠷᠡᠬᠢ ᠦᠵᠦᠮ ᠢ ᠬᠤᠷᠢᠶᠠᠵᠤ ᠪᠤᠷᠬᠠᠨ ᠤ ᠬᠢᠯᠢᠩ ᠤᠨ ᠲᠣᠮᠣ ᠰᠢᠬᠠᠭᠤᠷ ᠤᠷᠤᠭᠤ ᠬᠠᠶᠠᠪᠠ᠃ 20 ᠬᠣᠲᠠ ᠶᠢᠨ ᠭᠠᠳᠠᠨᠠ ᠰᠢᠬᠠᠭᠤᠷ ᠭᠢᠰᠬᠢᠭᠳᠡᠬᠦ ᠳᠦ᠂ ᠰᠢᠬᠠᠭᠤᠷ ᠠᠴᠠ ᠴᠢᠰᠤ ᠭᠠᠷᠴᠤ ᠮᠣᠷᠢᠨ ᠤ ᠬᠠᠵᠠᠭᠠᠷ ᠲᠤ ᠬᠦᠷᠦᠮᠡ ᠥᠨᠳᠥᠷ ᠢᠶᠡᠷ ᠮᠢᠩ᠋ᠭᠠ ᠵᠢᠷᠭᠤᠭᠠᠨ ᠵᠠᠭᠤᠨ ᠰᠧᠲ᠋ᠠᠳᠢᠶᠣᠨ 22 ᠤᠷᠤᠰᠤᠯᠠ᠃