ᠢᠯᠡᠷᠬᠡᠶᠢᠯᠡᠯᠭᠡ ᠶᠢᠰᠦ
1 ᠲᠠᠪᠤᠳᠠᠬᠢ ᠲᠩᠷᠢ ᠡᠯᠴᠢ ᠪᠦᠷᠢᠶᠡ ᠪᠡᠨ ᠦᠯᠢᠶᠡᠪᠡ᠂ ᠲᠡᠭᠡᠬᠦ ᠳᠦ ᠪᠢ ᠲᠩᠷᠢ ᠡᠴᠡ ᠭᠠᠵᠠᠷ ᠲᠤ ᠤᠨᠠᠭᠰᠠᠨ ᠣᠳᠣ ᠶᠢ ᠬᠠᠷᠠᠯᠠ᠃ ᠲᠡᠷᠡ ᠪᠡᠷ ᠢᠷᠤᠭᠠᠷ ᠦᠭᠡᠢ ᠨᠦᠬᠡᠨ ᠦ ᠲᠦᠯᠬᠢᠭᠦᠷ ᠢ ᠣᠯᠣᠭᠠᠳ 2 ᠢᠷᠤᠭᠠᠷ ᠦᠭᠡᠢ ᠨᠦᠬᠡ ᠶᠢ ᠨᠡᠭᠡᠭᠡᠭᠰᠡᠨ ᠳᠦ᠂ ᠨᠦᠬᠡᠨ ᠡᠴᠡ ᠲᠣᠮᠣ ᠵᠤᠤᠬᠠᠨ ᠤ ᠤᠲᠤᠭᠠ ᠮᠡᠲᠦ ᠤᠲᠤᠭᠠ ᠪᠤᠷᠭᠢᠪᠠ᠃ ᠨᠦᠬᠡᠨ ᠦ ᠤᠲᠤᠭᠠ ᠠᠴᠠ ᠪᠣᠯᠵᠤ ᠨᠠᠷᠠ ᠪᠠ ᠣᠭᠲᠠᠷᠭᠤᠢ ᠬᠠᠷᠠᠩ᠋ᠭᠤᠢᠯᠠᠵᠠᠢ᠃ 3 ᠤᠲᠤᠭᠠᠨ ᠳᠣᠲᠣᠷᠠ ᠠᠴᠠ ᠴᠠᠷᠴᠠᠬᠠᠢ ᠨᠤᠭᠤᠳ ᠭᠠᠷᠴᠤ ᠭᠠᠵᠠᠷ ᠳᠡᠭᠡᠷᠡ ᠪᠠᠭᠤᠯᠠ᠃ ᠲᠡᠳᠡ ᠭᠠᠵᠠᠷ ᠤᠨ ᠬᠢᠯᠢᠨᠴᠡᠲᠦ ᠬᠣᠷᠣᠬᠠᠢ ᠶᠢᠨ ᠬᠦᠴᠦ ᠰᠢᠭ ᠬᠦᠴᠦ ᠶᠢ ᠣᠯᠣᠭᠰᠠᠨ ᠪᠣᠯᠪᠠᠴᠤ 4 《ᠭᠠᠵᠠᠷ ᠤᠨ ᠡᠪᠡᠰᠦ ᠪᠤᠶᠤ ᠠᠯᠢᠪᠠ ᠨᠣᠭᠣᠭᠠᠨ ᠶᠠᠭᠤᠮᠠ᠂ ᠠᠯᠢᠪᠠ ᠮᠣᠳᠣ ᠶᠢ ᠬᠣᠣᠷᠯᠠᠵᠤ ᠪᠣᠯᠬᠤ ᠦᠭᠡᠢ᠂ ᠵᠥᠪᠬᠡᠨ ᠮᠠᠩᠨᠠᠢ ᠳᠡᠭᠡᠷᠡ ᠪᠡᠨ ᠪᠤᠷᠬᠠᠨ ᠤ ᠲᠠᠮᠠᠭᠠ ᠦᠭᠡᠢ ᠬᠥᠮᠦᠰ ᠢ ᠯᠠ ᠬᠣᠣᠷᠯᠠ》 ᠭᠡᠰᠡᠨ ᠵᠠᠬᠢᠶᠠ ᠶᠢ ᠠᠪᠴᠠᠢ᠃ 5 ᠭᠡᠪᠡᠴᠦ ᠲᠡᠳᠡᠨ ᠢ ᠠᠯᠠᠬᠤ ᠪᠤᠰᠤ᠂ ᠬᠠᠷᠢᠨ ᠲᠠᠪᠤᠨ ᠰᠠᠷᠠ ᠶᠢᠨ ᠲᠤᠷᠰᠢ ᠲᠠᠷᠴᠢᠯᠠᠭᠠᠬᠤ ᠡᠷᠬᠡ ᠲᠠᠢ ᠪᠠᠢᠪᠠ᠃ ᠴᠠᠷᠴᠠᠬᠠᠢ ᠶᠢᠨ ᠲᠠᠷᠴᠢᠯᠠᠭᠠᠬᠤ ᠨᠢ ᠬᠢᠯᠢᠨᠴᠡᠲᠦ ᠬᠣᠷᠣᠬᠠᠢ ᠬᠥᠮᠦᠨ ᠢ ᠬᠠᠳᠬᠤᠵᠤ ᠲᠠᠷᠴᠢᠯᠠᠭᠠᠬᠤ ᠲᠠᠢ ᠠᠳᠠᠯᠢ᠃ 6 ᠲᠡᠷᠡ ᠡᠳᠦᠷ ᠤᠳ ᠲᠤ ᠬᠥᠮᠦᠰ ᠦᠬᠦᠯ ᠢ ᠬᠠᠢᠪᠠᠴᠤ ᠶᠡᠷᠦ ᠣᠯᠬᠤ ᠦᠭᠡᠢ᠃ ᠦᠬᠦᠬᠦ ᠶᠢ ᠬᠦᠰᠡᠪᠡᠴᠦ᠂ ᠦᠬᠦᠯ ᠲᠡᠳᠡᠨ ᠡᠴᠡ ᠵᠠᠢᠯᠠᠨᠠ᠃
7 ᠴᠠᠷᠴᠠᠬᠠᠢ ᠶᠢᠨ ᠳᠦᠷᠰᠦ ᠨᠢ ᠪᠠᠢᠯᠳᠤᠭᠠᠨ ᠳᠤ ᠭᠠᠷᠬᠤ ᠪᠠᠷ ᠪᠡᠯᠡᠳᠬᠡᠭᠳᠡᠭᠰᠡᠨ ᠮᠣᠷᠢᠳ ᠮᠡᠲᠦ᠂ ᠲᠣᠯᠣᠭᠠᠢ ᠳᠡᠭᠡᠷᠡ ᠨᠢ ᠠᠯᠲᠠᠨ ᠲᠢᠲᠢᠮ ᠮᠡᠲᠦ ᠶᠠᠭᠤᠮᠠ ᠲᠠᠢ᠂ ᠨᠢᠭᠤᠷ ᠨᠢ ᠬᠥᠮᠦᠨ ᠦ ᠨᠢᠭᠤᠷ ᠰᠢᠭ᠋᠂ 8 ᠭᠡᠵᠢᠭᠡ ᠨᠢ ᠡᠮᠡᠭᠲᠡᠢ ᠶᠢᠨ ᠭᠡᠵᠢᠭᠡ ᠮᠡᠲᠦ᠂ ᠰᠢᠳᠦ ᠨᠢ ᠠᠷᠰᠯᠠᠨ ᠤ ᠮᠡᠲᠦ ᠪᠠᠢᠪᠠ᠃ 9 ᠡᠯᠢᠭᠡᠪᠴᠢ ᠨᠢ ᠲᠡᠮᠦᠷ ᠡᠯᠢᠭᠡᠪᠴᠢ ᠮᠡᠲᠦ᠂ ᠳᠠᠯᠠᠪᠴᠢ ᠶᠢᠨ ᠬᠢᠨᠢ ᠴᠢᠮᠡᠭᠡ ᠨᠢ ᠪᠠᠢᠯᠳᠤᠭᠠᠨ ᠳᠤ ᠳᠠᠪᠬᠢᠯᠳᠤᠬᠤ ᠣᠯᠠᠨ ᠮᠣᠷᠢᠨ ᠲᠡᠷᠭᠡᠨ ᠦ ᠴᠢᠮᠡᠭᠡ ᠮᠡᠲᠦ ᠪᠠᠢᠯᠠ᠃ 10 ᠲᠡᠳᠡ ᠬᠢᠯᠢᠨᠴᠡᠲᠦ ᠬᠣᠷᠣᠬᠠᠢ ᠮᠡᠲᠦ ᠰᠡᠭᠦᠯ ᠪᠠ ᠬᠠᠳᠬᠤᠭᠤᠷ ᠲᠠᠢ᠃ ᠬᠥᠮᠦᠰ ᠢ ᠲᠠᠪᠤᠨ ᠰᠠᠷᠠ ᠶᠢᠨ ᠲᠤᠷᠰᠢ ᠬᠣᠣᠷᠯᠠᠬᠤ ᠬᠦᠴᠦ ᠲᠡᠳᠡᠨ ᠦ ᠰᠡᠭᠦᠯ ᠳᠦ ᠪᠤᠢ᠃ 11 ᠵᠠᠬᠢᠷᠤᠭᠴᠢ ᠬᠠᠭᠠᠨ ᠨᠢ ᠢᠷᠤᠭᠠᠷ ᠦᠭᠡᠢ ᠨᠦᠬᠡᠨ ᠦ ᠡᠯᠴᠢ ᠪᠣᠯᠠᠢ᠃ ᠲᠡᠭᠦᠨ ᠦ ᠨᠡᠷᠡ ᠶᠢ ᠢᠪᠷᠠᠢ ᠪᠠᠷ ᠠᠪᠠᠳᠣᠨ 20 ᠂ ᠭᠷᠧᠭ ᠢᠶᠠᠷ ᠠᠫᠣᠯᠦ᠋ᠶᠣᠨ 21 ᠭᠡᠳᠡᠭ᠃
12 ᠠᠩ᠋ᠬᠠᠨ ᠤ ᠭᠠᠢ ᠥᠩᠭᠡᠷᠡᠯᠡ᠃ ᠠᠩ᠋ᠬᠠᠷᠤᠭᠲᠤᠨ᠂ ᠡᠳᠡᠭᠡᠷ ᠦᠨ ᠳᠠᠷᠠᠭᠠ ᠪᠠᠰᠠ ᠬᠣᠶᠠᠷ ᠭᠠᠢ ᠢᠷᠡᠨᠡ︕
13 ᠵᠢᠷᠭᠤᠳᠠᠬᠢ ᠲᠩᠷᠢ ᠡᠯᠴᠢ ᠪᠦᠷᠢᠶᠡ ᠪᠡᠨ ᠦᠯᠢᠶᠡᠪᠡ᠂ ᠲᠡᠭᠡᠲᠡᠯᠡ ᠪᠤᠷᠬᠠᠨ ᠤ ᠡᠮᠦᠨᠡᠬᠢ ᠠᠯᠲᠠᠨ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠦ ᠳᠥᠷᠪᠡᠨ ᠡᠪᠡᠷ ᠡᠴᠡ ᠳᠠᠭᠤ ᠭᠠᠷᠴᠤ᠂ 14 ᠪᠦᠷᠢᠶᠡ ᠲᠠᠢ ᠵᠢᠷᠭᠤᠳᠠᠬᠢ ᠲᠩᠷᠢ ᠡᠯᠴᠢ ᠳᠤ᠄ 《ᠡᠶᠦ᠋ᠹᠷᠠᠲ᠋ᠧᠰ ᠶᠡᠬᠡ ᠮᠥᠷᠡᠨ ᠳᠦ ᠬᠦᠯᠢᠶᠡᠰᠦᠲᠡᠢ ᠪᠠᠢᠭᠠ ᠳᠥᠷᠪᠡᠨ ᠲᠩᠷᠢ ᠡᠯᠴᠢ ᠶᠢ ᠰᠤᠯᠠᠯᠠᠭᠲᠤᠨ︕》 ᠭᠡᠬᠦ ᠶᠢ ᠪᠢ ᠰᠣᠨᠣᠰᠣᠯᠠ᠃ 15 ᠲᠡᠭᠡᠭᠡᠳ ᠲᠡᠷᠡ ᠵᠢᠯ᠂ ᠲᠡᠷᠡ ᠰᠠᠷᠠ᠂ ᠲᠡᠷᠡ ᠡᠳᠦᠷ᠂ ᠲᠡᠷᠡ ᠴᠠᠭ ᠤᠨ ᠲᠥᠯᠥᠭᠡ ᠪᠡᠯᠡᠳᠬᠡᠭᠳᠡᠭᠰᠡᠨ ᠳᠥᠷᠪᠡᠨ ᠲᠩᠷᠢ ᠡᠯᠴᠢ ᠰᠤᠯᠠᠯᠠᠭᠳᠠᠵᠠᠢ᠃ ᠲᠡᠳᠡ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠦ ᠭᠤᠷᠪᠠᠨ ᠤ ᠨᠢᠭᠡ ᠶᠢ ᠠᠯᠠᠬᠤ ᠪᠣᠯᠣᠨᠠ᠃ 16 ᠮᠣᠷᠢᠲᠤ ᠴᠡᠷᠢᠭ ᠤᠨ ᠲᠣᠭᠠ ᠨᠢ ᠬᠣᠶᠠᠷ ᠲᠦᠮᠡᠨ ᠲᠦᠮᠡ ᠪᠣᠯᠠᠢ᠃ ᠪᠢ ᠲᠡᠳᠡᠨ ᠦ ᠲᠣᠭᠠ ᠶᠢ ᠰᠣᠨᠣᠰᠣᠯᠠ᠃ 17 ᠦᠵᠡᠭᠳᠡᠯ ᠦᠨ ᠳᠤᠮᠳᠠ ᠬᠠᠷᠠᠭᠰᠠᠨ ᠮᠣᠷᠢᠳ ᠪᠠ ᠤᠨᠤᠭᠴᠢᠳ ᠨᠢ ᠡᠢᠮᠦ ᠪᠣᠯᠠᠢ᠄ ᠡᠯᠢᠭᠡᠪᠴᠢ ᠨᠦᠭᠦᠳ ᠨᠢ ᠭᠠᠯ ᠤᠯᠠᠭᠠᠨ᠂ ᠭᠦᠨ ᠬᠥᠬᠡ᠂ ᠬᠦᠬᠦᠷ ᠮᠡᠲᠦ ᠰᠢᠷᠠ᠃ ᠮᠣᠷᠢᠳ ᠤᠨ ᠲᠣᠯᠣᠭᠠᠢ ᠨᠢ ᠠᠷᠰᠯᠠᠨ ᠤ ᠲᠣᠯᠣᠭᠠᠢ ᠮᠡᠲᠦ᠃ ᠮᠣᠷᠢᠳ ᠤᠨ ᠠᠮᠠᠨ ᠠᠴᠠ ᠭᠠᠯ᠂ ᠤᠲᠤᠭᠠ ᠪᠠ ᠬᠦᠬᠦᠷ ᠰᠠᠪᠰᠠᠳᠠᠭ᠃ 18 ᠠᠮᠠᠨ ᠠᠴᠠ ᠨᠢ ᠭᠠᠷᠤᠭᠰᠠᠨ ᠭᠠᠯ᠂ ᠤᠲᠤᠭᠠ ᠪᠠ ᠬᠦᠬᠦᠷ ᠵᠡᠷᠭᠡ ᠭᠤᠷᠪᠠᠨ ᠭᠠᠮᠰᠢᠭ ᠲᠤ ᠬᠥᠮᠦᠨ ᠲᠥᠷᠥᠯᠬᠢᠲᠡᠨ ᠦ ᠭᠤᠷᠪᠠᠨ ᠤ ᠨᠢᠭᠡ ᠨᠢ ᠠᠯᠠᠭᠳᠠᠵᠠᠢ᠃ 19 ᠮᠣᠷᠢᠳ ᠤᠨ ᠬᠦᠴᠦ ᠠᠮᠠ ᠪᠣᠯᠣᠨ ᠰᠡᠭᠦᠯ ᠳᠦᠨᠢ ᠪᠤᠢ᠃ ᠰᠡᠭᠦᠯ ᠨᠢ ᠮᠣᠭᠠᠢ ᠮᠡᠲᠦ ᠪᠥᠭᠡᠳ ᠲᠣᠯᠣᠭᠠᠢ ᠲᠠᠢ ᠪᠣᠯᠬᠣᠷ ᠲᠣᠯᠣᠭᠠᠢ ᠪᠠᠷ ᠢᠶᠠᠨ ᠬᠣᠣᠷᠯᠠᠳᠠᠭ᠃
20 ᠡᠳᠡᠭᠡᠷ ᠭᠠᠮᠰᠢᠭ ᠤᠳ ᠲᠤ ᠠᠯᠠᠭᠳᠠᠭᠠ ᠦᠭᠡᠢ ᠦᠯᠡᠳᠡᠭᠰᠡᠨ ᠬᠥᠮᠦᠰ ᠭᠠᠷ ᠢᠶᠠᠷ ᠢᠶᠠᠨ ᠬᠢᠭᠰᠡᠨ ᠦᠢᠯᠡᠰ ᠲᠡᠭᠡᠨ ᠭᠡᠮᠰᠢᠭᠰᠡᠨ ᠦᠭᠡᠢ᠂ ᠬᠠᠷᠢᠨ ᠴᠢᠳᠬᠥᠷ ᠤᠳ ᠪᠤᠶᠤ ᠬᠠᠷᠠᠵᠤ᠂ ᠰᠣᠨᠣᠰᠴᠤ᠂ ᠠᠯᠬᠤᠵᠤ ᠴᠢᠳᠠᠰᠢ ᠦᠭᠡᠢ ᠠᠯᠲᠠ᠂ ᠮᠥᠩᠭᠥ᠂ ᠬᠦᠷᠡᠯ᠂ ᠴᠢᠯᠠᠭᠤ᠂ ᠮᠣᠳᠣ ᠪᠠᠷ ᠬᠢᠭᠰᠡᠨ ᠰᠢᠲᠦᠭᠡᠨ ᠳᠦ ᠮᠥᠷᠭᠥᠭᠰᠡᠭᠡᠷ᠂ 21 ᠥᠪᠡᠷᠰᠡᠳ ᠦᠨ ᠢᠶᠠᠨ ᠠᠯᠠᠯᠭᠠ᠂ ᠶᠧᠯᠸᠢ᠂ ᠰᠠᠳᠤᠷ ᠰᠠᠮᠠᠭᠤᠨ᠂ ᠬᠤᠯᠠᠭᠠᠢᠯᠠᠬᠤ ᠦᠢᠯᠡᠰ ᠲᠦ ᠭᠡᠮᠰᠢᠭᠰᠡᠨ ᠦᠭᠡᠢ᠃