ᠬᠠᠭᠠᠳ ᠤᠨ ᠳᠡᠳ᠋ ᠬᠣᠶᠠᠷ
ᠧᠯᠢᠶᠠ ᠲᠩᠷᠢ ᠳᠤ ᠠᠪᠠᠴᠢᠭᠳᠠᠪᠠ
1 ᠶᠣᠬᠣᠸᠠ ᠧᠯᠢᠶᠠ ᠶᠢ ᠬᠤᠢ ᠰᠠᠯᠬᠢ ᠪᠠᠷ ᠲᠩᠷᠢ ᠥᠭᠡᠳᠡ ᠠᠪᠠᠴᠢᠬᠤ ᠭᠡᠵᠦ ᠪᠠᠢᠬᠤ ᠦᠶᠡᠰ᠂ ᠧᠯᠢᠶᠠ ᠡᠯᠢᠱᠠ ᠲᠠᠢ ᠬᠠᠮᠲᠤ ᠭᠢᠯᠭᠠᠯ ᠠᠴᠠ ᠭᠠᠷᠴᠤ ᠶᠠᠪᠤᠪᠠ᠃ 2 ᠧᠯᠢᠶᠠ ᠡᠯᠢᠱᠠ ᠳᠤ᠄ 《ᠴᠢ ᠡ᠊ᠨᠳᠡ ᠪᠠᠢᠵᠤ ᠪᠠᠢᠭᠠᠷᠠᠢ᠃ ᠶᠣᠬᠣᠸᠠ ᠨᠠᠮᠠᠶᠢ ᠪᠧᠲ᠋ᠧᠯ ᠤᠷᠤᠭᠤ ᠶᠠᠪᠤ ᠭᠡᠰᠡᠨ ᠶᠤᠮ》 ᠭᠡᠬᠦ ᠳᠦ᠂ ᠡᠯᠢᠱᠠ᠄ 《ᠶᠣᠬᠣᠸᠠ ᠶᠢᠨ ᠠᠮᠢᠳᠤ ᠪᠣᠯᠣᠨ ᠲᠠᠨ ᠤ ᠠᠮᠢᠳᠤ ᠯᠤᠭᠠ ᠨᠢᠭᠡᠨ ᠠᠳᠠᠯᠢ ᠪᠠᠲᠤ ᠦᠨᠡᠨ ᠭᠡᠪᠡᠯ᠂ ᠪᠢ ᠲᠠᠨ ᠠᠴᠠ ᠶᠠᠭᠠᠬᠢᠭᠰᠠᠨ ᠴᠤ ᠰᠠᠯᠬᠤ ᠦᠭᠡᠢ》 ᠭᠡᠵᠡᠢ᠃ ᠲᠡᠳᠡ ᠪᠧᠲ᠋ᠧᠯ ᠤᠷᠤᠭᠤ ᠶᠠᠪᠤᠯᠠ᠃ 3 ᠪᠧᠲ᠋ᠧᠯ ᠳᠠᠬᠢ ᠡᠰᠢ ᠦᠵᠡᠭᠦᠯᠦᠭᠴᠢ ᠱᠠᠪᠢ ᠨᠠᠷ ᠡᠯᠢᠱᠠ ᠤᠷᠤᠭᠤ ᠭᠠᠷᠴᠤ ᠢᠷᠡᠭᠡᠳ᠄ 《ᠶᠣᠬᠣᠸᠠ ᠥᠨᠥᠳᠥᠷ ᠲᠠᠨ ᠤ ᠪᠠᠭᠰᠢ ᠶᠢ ᠲᠠᠨ ᠤ ᠳᠡᠭᠡᠷᠡ ᠡᠴᠡ ᠠᠪᠠᠴᠢᠬᠤ ᠭᠡᠵᠦ ᠪᠠᠢᠭᠠ ᠶᠢ ᠲᠠ ᠮᠡᠳᠡᠨᠡ ᠤᠤ︖》 ᠭᠡᠬᠦ ᠳᠦ᠂ ᠲᠡᠷᠡ᠄ 《ᠪᠢ ᠮᠡᠳᠡᠨᠡ᠂ ᠲᠠ ᠨᠠᠷ ᠳᠠᠭᠤ ᠦᠭᠡᠢ ᠪᠠᠢ》 ᠭᠡᠯᠡ᠃
4 ᠧᠯᠢᠶᠠ ᠲᠡᠭᠦᠨ ᠳᠦ᠄ 《ᠡᠯᠢᠱᠠ ᠴᠢ ᠡ᠊ᠨᠳᠡ ᠪᠠᠢᠵᠤ ᠪᠠᠢᠭᠠᠷᠠᠢ᠃ ᠶᠣᠬᠣᠸᠠ ᠨᠠᠮᠠᠶᠢ ᠶᠧᠷᠢᠺᠣ ᠤᠷᠤᠭᠤ ᠶᠠᠪᠤ ᠭᠡᠰᠡᠨ ᠶᠤᠮ》 ᠭᠡᠬᠦ ᠳᠦ᠂ ᠡᠯᠢᠱᠠ᠄ 《ᠶᠣᠬᠣᠸᠠ ᠶᠢᠨ ᠠᠮᠢᠳᠤ ᠪᠣᠯᠣᠨ ᠲᠠᠨ ᠤ ᠠᠮᠢᠳᠤ ᠯᠤᠭᠠ ᠨᠢᠭᠡᠨ ᠠᠳᠠᠯᠢ ᠪᠠᠲᠤ ᠦᠨᠡᠨ ᠭᠡᠪᠡᠯ᠂ ᠪᠢ ᠲᠠᠨ ᠠᠴᠠ ᠶᠠᠭᠠᠬᠢᠭᠰᠠᠨ ᠴᠤ ᠰᠠᠯᠬᠤ ᠦᠭᠡᠢ》 ᠭᠡᠵᠡᠢ᠃ ᠲᠡᠳᠡ ᠶᠧᠷᠢᠺᠣ ᠳᠤ ᠣᠷᠣᠯᠠ᠃ 5 ᠶᠧᠷᠢᠺᠣ ᠳᠠᠬᠢ ᠡᠰᠢ ᠦᠵᠡᠭᠦᠯᠦᠭᠴᠢ ᠱᠠᠪᠢ ᠨᠠᠷ ᠡᠯᠢᠱᠠ ᠳᠤ ᠳᠥᠭᠥᠨ ᠢᠷᠡᠵᠦ᠄ 《ᠶᠣᠬᠣᠸᠠ ᠥᠨᠥᠳᠥᠷ ᠲᠠᠨ ᠤ ᠪᠠᠭᠰᠢ ᠶᠢ ᠲᠠᠨ ᠤ ᠳᠡᠭᠡᠷᠡ ᠡᠴᠡ ᠠᠪᠠᠴᠢᠬᠤ ᠭᠡᠵᠦ ᠪᠤᠢ ᠶᠢ ᠲᠠ ᠮᠡᠳᠡᠨᠡ ᠤᠤ︖》 ᠭᠡᠵᠦ ᠠᠰᠠᠭᠤᠬᠤ ᠳᠤ᠂ ᠲᠡᠷᠡ᠄ 《ᠪᠢ ᠮᠡᠳᠡᠨᠡ᠂ ᠲᠠ ᠨᠠᠷ ᠳᠠᠭᠤ ᠦᠭᠡᠢ ᠪᠠᠢ》 ᠭᠡᠯᠡ᠃
6 ᠧᠯᠢᠶᠠ ᠲᠡᠭᠦᠨ ᠳᠦ᠄ 《ᠴᠢ ᠡ᠊ᠨᠳᠡ ᠪᠠᠢᠵᠤ ᠪᠠᠢᠭᠠᠷᠠᠢ᠃ ᠶᠣᠬᠣᠸᠠ ᠨᠠᠮᠠᠶᠢ ᠶᠣᠷᠳᠠᠨ ᠤᠷᠤᠭᠤ ᠶᠠᠪᠤ ᠭᠡᠰᠡᠨ ᠶᠤᠮ》 ᠭᠡᠬᠦ ᠳᠦ᠂ ᠡᠯᠢᠱᠠ᠄ 《ᠶᠣᠬᠣᠸᠠ ᠶᠢᠨ ᠠᠮᠢᠳᠤ ᠪᠣᠯᠣᠨ ᠲᠠᠨ ᠤ ᠠᠮᠢᠳᠤ ᠯᠤᠭᠠ ᠨᠢᠭᠡᠨ ᠠᠳᠠᠯᠢ ᠪᠠᠲᠤ ᠦᠨᠡᠨ ᠭᠡᠪᠡᠯ᠂ ᠪᠢ ᠲᠠᠨ ᠠᠴᠠ ᠶᠠᠭᠠᠬᠢᠭᠰᠠᠨ ᠴᠤ ᠰᠠᠯᠬᠤ ᠦᠭᠡᠢ》 ᠭᠡᠪᠡ᠃ ᠲᠡᠳᠡ ᠬᠣᠶᠠᠭᠤᠯᠠ ᠴᠠᠰᠢ ᠶᠠᠪᠤᠯᠠ᠃ 7 ᠡᠰᠢ ᠦᠵᠡᠭᠦᠯᠦᠭᠴᠢ ᠱᠠᠪᠢ ᠨᠠᠷ ᠠᠴᠠ ᠴᠤ ᠲᠠᠪᠢᠨ ᠬᠥᠮᠦᠨ ᠶᠠᠪᠤᠪᠠ᠃ ᠲᠡᠳᠡ ᠶᠣᠷᠳᠠᠨ ᠤ ᠬᠥᠪᠡᠭᠡᠨ ᠳᠦ ᠵᠣᠭᠰᠣᠭᠰᠠᠨ ᠧᠯᠢᠶᠠ ᠪᠣᠯᠣᠨ ᠡᠯᠢᠱᠠ ᠶᠢᠨ ᠬᠠᠷᠠᠯᠳᠤᠭᠠ ᠵᠠᠢᠳᠠᠭᠤᠬᠠᠨ ᠵᠣᠭᠰᠣᠯᠠ᠃ 8 ᠧᠯᠢᠶᠠ ᠳᠡᠪᠡᠯ ᠢᠶᠡᠨ ᠲᠠᠢᠯᠵᠤ ᠡᠪᠬᠡᠭᠡᠳ ᠲᠡᠭᠦᠨ ᠢᠶᠡᠷ ᠢᠶᠠᠨ ᠤᠰᠤ ᠶᠢ ᠴᠣᠬᠢᠬᠤ ᠳᠤ᠂ ᠤᠰᠤ ᠬᠣᠶᠠᠷ ᠲᠡᠰᠢ ᠬᠤᠪᠢᠶᠠᠭᠳᠠᠵᠤ᠂ ᠲᠡᠳᠡ ᠬᠣᠶᠠᠭᠤᠯᠠ ᠬᠠᠭᠤᠷᠠᠢ ᠭᠠᠵᠠᠷ ᠢᠶᠠᠷ ᠭᠠᠲᠤᠯᠤᠯᠠ᠃
9 ᠲᠡᠳᠡ ᠭᠠᠲᠤᠯᠤᠭᠰᠠᠨ ᠤ ᠪᠠᠨ ᠳᠠᠷᠠᠭᠠ ᠧᠯᠢᠶᠠ ᠡᠯᠢᠱᠠ ᠳᠤ᠄ 《ᠶᠣᠬᠣᠸᠠ ᠨᠠᠮᠠᠶᠢ ᠴᠢᠮᠠ ᠠᠴᠠ ᠠᠪᠠᠴᠢᠬᠤ ᠠᠴᠠ ᠡᠮᠦᠨᠡ ᠪᠢ ᠴᠢᠨᠦ ᠲᠥᠯᠥᠭᠡ ᠶᠠᠭᠤ ᠬᠢᠵᠦ ᠥᠭᠬᠦ ᠪᠤᠢ︖ ᠨᠠᠳᠠ ᠠᠴᠠ ᠭᠤᠶᠤᠭᠲᠤᠨ》 ᠭᠡᠯᠡ᠃ ᠡᠯᠢᠱᠠ᠄ 《ᠲᠠᠨ ᠤ ᠰᠦᠨᠡᠰᠦ ᠳᠠᠬᠢᠨ ᠢᠯᠡᠭᠦᠦ ᠪᠡᠷ ᠨᠠᠳᠠ ᠳᠡᠭᠡᠷᠡ ᠪᠠᠢᠬᠤ ᠶᠢ ᠬᠦᠰᠡᠶᠡ》 ᠭᠡᠬᠦ ᠳᠦ᠂ 10 ᠲᠡᠷᠡ᠄ 《ᠴᠢ ᠬᠡᠴᠡᠭᠦᠦ ᠶᠠᠭᠤᠮᠠ ᠭᠤᠶᠤᠵᠠᠢ᠃ ᠬᠠᠷᠢᠨ ᠴᠢᠮᠠ ᠠᠴᠠ ᠠᠪᠠᠴᠢᠭᠳᠠᠵᠤ ᠪᠠᠢᠬᠤ ᠶᠢ ᠮᠢᠨᠢ ᠴᠢ ᠣᠯᠵᠤ ᠬᠠᠷᠠᠪᠠᠯ ᠴᠢᠮᠠ ᠳᠤ ᠲᠡᠢᠨ ᠬᠦ ᠪᠡᠶᠡᠯᠡᠨᠡ᠃ ᠡᠰᠡ ᠲᠡᠭᠡᠪᠡᠯ ᠪᠡᠶᠡᠯᠡᠭᠳᠡᠬᠦ ᠦᠭᠡᠢ》 ᠭᠡᠪᠡ᠃ 11 ᠲᠡᠳᠡ ᠶᠠᠷᠢᠯᠴᠠᠨ ᠶᠠᠪᠤᠵᠤ ᠪᠠᠢᠯᠠ᠂ ᠬᠠᠷᠠᠭᠲᠤᠨ᠂ ᠭᠠᠯ ᠲᠠᠢ ᠲᠡᠷᠭᠡ ᠪᠣᠯᠣᠨ ᠭᠠᠯ ᠲᠠᠢ ᠮᠣᠷᠢᠳ ᠦᠵᠡᠭᠳᠡᠵᠦ ᠲᠡᠷᠡ ᠬᠣᠶᠠᠷ ᠢ ᠰᠠᠯᠭᠠᠭᠰᠠᠨ ᠪᠥᠭᠡᠳ ᠧᠯᠢᠶᠠ ᠬᠤᠢ ᠰᠠᠯᠬᠢ ᠪᠠᠷ ᠲᠩᠷᠢ ᠥᠭᠡᠳᠡ ᠭᠠᠷᠴᠠᠢ︕ 12 ᠡᠯᠢᠱᠠ ᠡᠭᠦᠨ ᠢ ᠬᠠᠷᠠᠭᠠᠳ᠄ 《ᠠᠪᠤ ᠮᠢᠨᠢ᠂ ᠠᠪᠤ ᠮᠢᠨᠢ᠂ ᠢᠰᠷᠧᠯ ᠤᠨ ᠲᠡᠷᠭᠡ᠂ ᠮᠣᠷᠢᠲᠠᠨ ᠨᠤᠭᠤᠳ ᠢᠶᠠᠨ︕》 ᠭᠡᠵᠦ ᠬᠠᠰᠬᠢᠷᠪᠠ᠃ ᠲᠡᠷᠡ ᠪᠡᠷ ᠧᠯᠢᠶᠠ ᠶᠢ ᠳᠠᠬᠢᠨ ᠬᠠᠷᠠᠵᠤ ᠴᠢᠳᠠᠬᠤ ᠦᠭᠡᠢ ᠪᠣᠯᠣᠭᠰᠠᠨ ᠢᠶᠠᠷ ᠥᠪᠡᠷ ᠦᠨ ᠢᠶᠠᠨ ᠬᠤᠪᠴᠠᠰᠤ ᠠᠴᠠ ᠪᠠᠵᠠᠭᠳᠠᠨ ᠬᠣᠶᠠᠷ ᠬᠡᠰᠡᠭ ᠪᠣᠯᠭᠠᠨ ᠤᠷᠠᠪᠠ᠃
ᠧᠯᠢᠶᠠ ᠶᠢᠨ ᠵᠠᠯᠭᠠᠮᠵᠢᠯᠠᠭᠴᠢ ᠡᠯᠢᠱᠠ
13 ᠲᠡᠷᠡ ᠮᠥᠨ ᠧᠯᠢᠶᠠ ᠶᠢᠨ ᠤᠨᠠᠭᠠᠭᠰᠠᠨ ᠳᠡᠪᠡᠯ ᠢ ᠠᠪᠴᠤ᠂ ᠶᠣᠷᠳᠠᠨ ᠳᠤ ᠪᠤᠴᠠᠵᠤ ᠢᠷᠡᠭᠡᠳ ᠬᠥᠪᠡᠭᠡᠨ ᠳᠦᠨᠢ ᠵᠣᠭᠰᠣᠵᠤ᠂ 14 ᠧᠯᠢᠶᠠ ᠶᠢᠨ ᠤᠨᠠᠭᠠᠭᠰᠠᠨ ᠳᠡᠪᠡᠯ ᠢᠶᠡᠷ ᠤᠰᠤ ᠶᠢ ᠴᠣᠬᠢᠵᠤ᠄ 《ᠧᠯᠢᠶᠠ ᠶᠢᠨ ᠪᠤᠷᠬᠠᠨ ᠪᠣᠯᠣᠭᠰᠠᠨ ᠶᠣᠬᠣᠸᠠ ᠣᠳᠣ ᠬᠠᠮᠢᠭᠠ ᠪᠠᠢᠨᠠ ᠪᠤᠢ︖》 ᠭᠡᠵᠡᠢ᠃ ᠲᠡᠷᠡ ᠪᠠᠰᠠ ᠤᠰᠤ ᠶᠢ ᠴᠣᠬᠢᠬᠤ ᠳᠤ᠂ ᠤᠰᠤ ᠬᠣᠶᠠᠷ ᠲᠡᠰᠢ ᠬᠤᠪᠢᠶᠠᠭᠳᠠᠵᠤ ᠡᠯᠢᠱᠠ ᠭᠠᠲᠤᠯᠤᠯᠠ᠃
15 ᠭᠣᠣᠯ ᠤᠨ ᠴᠠᠭᠠᠨᠠᠬᠢ ᠶᠧᠷᠢᠺᠣ ᠳᠠᠬᠢ ᠡᠰᠢ ᠦᠵᠡᠭᠦᠯᠦᠭᠴᠢ ᠱᠠᠪᠢ ᠨᠠᠷ ᠲᠡᠭᠦᠨ ᠢ ᠬᠣᠯᠠ ᠠᠴᠠ ᠬᠠᠷᠠᠭᠠᠳ᠄ 《ᠧᠯᠢᠶᠠ ᠶᠢᠨ ᠰᠦᠨᠡᠰᠦ ᠡᠯᠢᠱᠠ ᠳᠡᠭᠡᠷᠡ ᠲᠣᠭᠲᠠᠵᠠᠢ》 ᠬᠡᠮᠡᠨ ᠲᠡᠭᠦᠨ ᠲᠡᠢ ᠠᠭᠤᠯᠵᠠᠬᠤ ᠪᠠᠷ ᠢᠷᠡᠨ᠂ ᠲᠡᠭᠦᠨ ᠦ ᠡᠮᠦᠨᠡ ᠭᠠᠵᠠᠷ ᠲᠤ ᠰᠥᠬᠥᠷᠡᠪᠡ᠃ 16 ᠲᠡᠳᠡ᠄ 《ᠬᠠᠷᠠ᠂ ᠵᠠᠷᠤᠴᠠ ᠪᠢᠳᠡ ᠨᠠᠷ ᠲᠠᠢ ᠴᠢᠨᠢ ᠬᠠᠮᠲᠤ ᠲᠠᠪᠢᠨ ᠬᠦᠴᠦᠲᠦ ᠡᠷᠡ ᠪᠠᠢᠨᠠ᠃ ᠲᠡᠳᠡᠨ ᠳᠦ ᠲᠠᠨ ᠤ ᠡᠵᠡᠨ ᠢ ᠬᠠᠢᠬᠤ ᠪᠠᠷ ᠶᠠᠪᠤᠬᠤ ᠶᠢ ᠵᠥᠪᠰᠢᠶᠡᠷᠡᠭᠡᠴᠢ᠃ ᠶᠣᠬᠣᠸᠠ ᠶᠢᠨ ᠰᠦᠨᠡᠰᠦ ᠲᠡᠭᠦᠨ ᠢ ᠡᠷᠭᠦᠨ ᠶᠠᠪᠤᠭᠠᠳ ᠠᠯᠢ ᠨᠢᠭᠡ ᠠᠭᠤᠯᠠᠨ ᠳᠡᠭᠡᠷᠡ᠂ ᠡᠰᠡᠪᠡᠯ ᠠᠯᠢ ᠨᠢᠭᠡ ᠬᠥᠨᠳᠡᠢ ᠳᠦ ᠬᠠᠶᠠᠭᠰᠠᠨ ᠪᠠᠢᠵᠤ ᠮᠠᠭᠠᠳ ᠦᠭᠡᠢ》 ᠭᠡᠯᠡ᠃ ᠡᠯᠢᠱᠠ᠄ 《ᠶᠠᠪᠤᠭᠤᠯᠬᠤ ᠬᠡᠷᠡᠭ ᠦᠭᠡᠢ》 ᠭᠡᠰᠡᠨ ᠪᠣᠯᠪᠠᠴᠤ 17 ᠲᠡᠳᠡ ᠲᠡᠭᠦᠨ ᠢ ᠢᠴᠢᠩᠭᠦᠷᠡᠲᠡᠯᠡ ᠱᠠᠯᠠᠬᠤ ᠳᠤ᠂ ᠲᠡᠷᠡ᠄ 《ᠲᠡᠭᠡᠪᠡᠯ ᠶᠠᠪᠤᠭᠤᠯ ᠳᠠ》 ᠭᠡᠵᠦ ᠬᠡᠯᠡᠯᠡ᠃ ᠲᠡᠳᠡ ᠲᠠᠪᠢᠨ ᠡᠷᠡ ᠶᠢ ᠶᠠᠪᠤᠭᠤᠯᠵᠤ ᠭᠤᠷᠪᠠᠨ ᠡᠳᠦᠷ ᠬᠠᠢᠭᠰᠠᠨ ᠪᠣᠯᠪᠠᠴᠤ ᠲᠡᠭᠦᠨ ᠢ ᠣᠯᠣᠭᠰᠠᠨ ᠦᠭᠡᠢ᠂ 18 ᠶᠧᠷᠢᠺᠣ ᠳᠤ ᠪᠠᠢᠭᠰᠠᠨ ᠡᠯᠢᠱᠠ ᠤᠷᠤᠭᠤ ᠪᠤᠴᠠᠵᠤ ᠢᠷᠡᠵᠡᠢ᠃ ᠡᠯᠢᠱᠠ ᠲᠡᠳᠡᠨ ᠳᠦ᠄ 《ᠶᠠᠪᠤᠬᠤ ᠬᠡᠷᠡᠭ ᠦᠭᠡᠢ ᠭᠡᠵᠦ ᠪᠢ ᠬᠡᠯᠡᠭᠰᠡᠨ ᠪᠢᠰᠢ ᠤᠤ︖》 ᠭᠡᠪᠡ᠃
19 ᠲᠡᠷᠡ ᠬᠣᠲᠠ ᠶᠢᠨ ᠬᠢᠨ ᠡᠯᠢᠱᠠ ᠳᠤ᠄ 《ᠡᠵᠡᠨᠲᠡᠨ ᠮᠢᠨᠢ᠂ ᠬᠠᠷᠠᠭᠠᠴᠢ᠂ ᠲᠠᠨ ᠤ ᠬᠠᠷᠠᠵᠤ ᠪᠠᠢᠭᠠ ᠲᠠᠢ ᠠᠳᠠᠯᠢ ᠪᠠᠷ ᠮᠠᠨ ᠤ ᠬᠣᠲᠠ ᠪᠠᠢᠷᠢᠰᠢᠯ ᠰᠠᠢᠲᠠᠢ ᠪᠣᠯᠪᠠᠴᠤ ᠤᠰᠤ ᠮᠠᠭᠤ ᠪᠥᠭᠡᠳ ᠭᠠᠵᠠᠷ ᠨᠢ ᠦᠷᠡᠵᠢᠯ ᠰᠢᠮᠡ 1 ᠦᠭᠡᠢ ᠶᠤᠮ》 ᠭᠡᠪᠡ᠃ 20 ᠡᠯᠢᠱᠠ᠄ 《ᠰᠢᠨᠡ ᠰᠠᠪᠠᠨ ᠳᠤ ᠳᠠᠪᠤᠰᠤ ᠬᠢᠭᠡᠳ ᠠᠪᠤᠭᠠᠳ ᠢᠷᠡ》 ᠭᠡᠰᠡᠨ ᠳᠦ᠂ ᠲᠡᠳᠡ ᠠᠪᠴᠢᠷᠠᠯᠠ᠃ 21 ᠲᠡᠷᠡ ᠪᠡᠷ ᠪᠤᠯᠠᠭ ᠤᠨ ᠡᠬᠢ ᠤᠷᠤᠭᠤ ᠣᠴᠢᠨ᠂ ᠲᠡᠰᠢ ᠪᠠᠨ ᠳᠠᠪᠤᠰᠤ ᠪᠠᠨ ᠰᠠᠴᠤᠭᠠᠳ᠄ 《ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠪᠢ ᠡᠨᠡ ᠤᠰᠤ ᠶᠢ ᠴᠡᠪᠡᠷᠰᠢᠭᠦᠯᠦᠭᠰᠡᠨ 2 ᠶᠤᠮ᠃ ᠡ᠊ᠨᠳᠡ ᠡᠴᠡ ᠳᠠᠬᠢᠭᠠᠳ ᠦᠬᠦᠯ ᠪᠤᠶᠤ ᠦᠷᠡ ᠦᠭᠡᠶᠢᠳᠡᠯ ᠭᠠᠷᠬᠤ ᠦᠭᠡᠢ ᠪᠣᠯᠣᠨᠠ〉》 ᠭᠡᠰᠡᠨ ᠢᠶᠡᠷ 22 ᠡᠯᠢᠱᠠ ᠶᠢᠨ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠲᠡᠨᠳᠡᠬᠢ ᠶᠢᠨ ᠤᠰᠤ ᠴᠡᠪᠡᠷᠰᠢᠭᠰᠡᠨ ᠪᠥᠭᠡᠳ ᠥᠨᠥᠳᠥᠷ ᠬᠦᠷᠲᠡᠯᠡ ᠲᠡᠷᠡ ᠬᠡᠪ ᠢᠶᠡᠷ ᠢᠶᠠᠨ ᠪᠠᠢᠨᠠ᠃
23 ᠡᠯᠢᠱᠠ ᠲᠡᠨᠳᠡ ᠡᠴᠡ ᠪᠧᠲ᠋ᠧᠯ ᠥᠭᠡᠳᠡ ᠶᠠᠪᠤᠪᠠ᠃ ᠲᠡᠷᠡ ᠵᠠᠮ ᠬᠥᠭᠡᠭᠡᠵᠦ ᠪᠠᠢᠲᠠᠯᠠ ᠬᠣᠲᠠ ᠠᠴᠠ ᠵᠠᠯᠠᠭᠤᠰ ᠭᠠᠷᠴᠤ ᠢᠷᠡᠭᠡᠳ᠂ ᠲᠡᠭᠦᠨ ᠢ ᠳᠣᠭᠣᠭᠢᠯᠠᠨ᠄ 《ᠬᠠᠯᠵᠠᠨ ᠡ᠂ ᠳᠡᠭᠡᠭᠰᠢ ᠪᠠᠨ ᠭᠠᠷ᠃ ᠬᠠᠯᠵᠠᠨ ᠡ᠂ ᠳᠡᠭᠡᠭᠰᠢ ᠪᠠᠨ ᠭᠠᠷ》 ᠭᠡᠵᠡᠭᠡᠪᠡ᠃ 24 ᠲᠡᠷᠡ ᠠᠷᠤᠭᠰᠢ ᠪᠠᠨ ᠬᠠᠷᠠᠵᠤ᠂ ᠶᠣᠬᠣᠸᠠ ᠶᠢᠨ ᠨᠡᠷᠡ ᠪᠡᠷ ᠲᠡᠳᠡᠨ ᠢ ᠬᠠᠷᠢᠶᠠᠭᠰᠠᠨ ᠳᠤ᠂ ᠬᠣᠶᠠᠷ ᠡᠪᠰᠢ 3 ᠣᠢ ᠠᠴᠠ ᠭᠠᠷᠴᠤ ᠢᠷᠡᠭᠡᠳ ᠲᠡᠳᠡᠨ ᠦ ᠳᠤᠮᠳᠠ ᠠᠴᠠ ᠳᠥᠴᠢᠨ ᠬᠣᠶᠠᠷ ᠵᠠᠯᠠᠭᠤ ᠶᠢ ᠲᠠᠰᠤᠳᠠᠵᠤ ᠬᠠᠶᠠᠪᠠ᠃ 25 ᠡᠯᠢᠱᠠ ᠲᠡᠨᠳᠡ ᠡᠴᠡ ᠺᠠᠷᠮᠧᠯ ᠠᠭᠤᠯᠠ ᠤᠷᠤᠭᠤ ᠶᠠᠪᠤᠵᠤ᠂ ᠳᠠᠷᠠᠭᠠ ᠨᠢ ᠰᠠᠮᠠᠷᠢᠶᠠ ᠤᠷᠤᠭᠤ ᠪᠤᠴᠠᠭᠰᠠᠨ ᠪᠠᠢᠯᠠ᠃