ᠬᠠᠭᠠᠳ ᠤᠨ ᠳᠡᠳ᠋ ᠬᠣᠷᠢᠨ ᠬᠣᠶᠠᠷ
ᠣᠯᠳᠠᠭᠰᠠᠨ ᠬᠠᠤᠯᠢ ᠶᠢᠨ ᠨᠣᠮ
1 ᠶᠣᠰᠢᠶᠠ ᠨᠠᠢ᠌ᠮᠠᠨ ᠨᠠᠰᠤᠲᠠᠢ ᠳᠠᠭᠠᠨ ᠬᠠᠭᠠᠨ ᠪᠣᠯᠣᠭᠠᠳ ᠶᠧᠷᠦ᠋ᠰᠠᠯᠧᠮ ᠳᠤ ᠭᠤᠴᠢᠨ ᠨᠢᠭᠡᠨ ᠵᠢᠯ ᠬᠠᠭᠠᠨᠴᠢᠯᠠᠪᠠ᠃ ᠡᠬᠡ ᠨᠢ ᠪᠣᠽᠺᠠᠲ ᠬᠥᠮᠦᠨ ᠠᠳᠠᠢᠶᠠ ᠶᠢᠨ ᠥᠬᠢᠨ ᠶᠧᠳᠢᠳᠠ ᠪᠠᠢᠪᠠ᠃ 2 ᠶᠣᠰᠢᠶᠠ ᠶᠣᠬᠣᠸᠠ ᠶᠢᠨ ᠮᠡᠯᠮᠡᠢ ᠳᠦ ᠵᠥᠪ ᠢ ᠦᠢᠯᠡᠳᠦᠨ᠂ ᠵᠡᠭᠦᠨᠰᠢ ᠪᠠᠷᠠᠭᠤᠨᠰᠢ ᠬᠠᠵᠠᠢᠯ ᠦᠭᠡᠢ᠂ ᠡᠪᠦᠭᠡ ᠡᠴᠢᠭᠡ ᠳ᠋ᠠᠸᠢᠳ᠋ ᠤᠨ ᠢᠶᠠᠨ ᠪᠦᠬᠦ ᠵᠠᠮ ᠢᠶᠠᠷ ᠠᠯᠬᠤᠭᠰᠠᠨ ᠶᠤᠮ᠃
3 ᠶᠣᠰᠢᠶᠠ ᠬᠠᠭᠠᠨ ᠬᠠᠭᠠᠨᠴᠢᠯᠠᠯ ᠤᠨ ᠢᠶᠠᠨ ᠠᠷᠪᠠᠨ ᠨᠠᠢ᠌ᠮᠠᠳᠤᠭᠠᠷ ᠵᠢᠯ ᠳᠤ ᠮᠧᠱᠦ᠋ᠯᠠᠮ ᠤᠨ ᠠᠴᠢ ᠠᠽᠠᠯᠢᠶᠠ ᠶᠢᠨ ᠬᠦᠦ ᠪᠢᠴᠢᠭᠡᠴᠢ ᠱᠠᠹᠠᠨ ᠢ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡ ᠤᠷᠤᠭᠤ ᠢᠯᠡᠭᠡᠨ᠄ 4 《ᠲᠠ ᠲᠡᠷᠢᠭᠦᠨ ᠲᠠᠬᠢᠯᠴᠢ ᠾᠢᠯᠺᠢᠶᠠ ᠳᠡᠭᠡᠷᠡ ᠣᠴᠢᠵᠤ᠂ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠳᠦ ᠠᠷᠠᠳ ᠲᠦᠮᠡᠨ ᠦ ᠠᠪᠴᠢᠷᠠᠭᠰᠠᠨ ᠮᠥᠩᠭᠥ ᠶᠢ᠂ ᠲᠤᠬᠠᠢᠯᠠᠪᠠᠯ ᠬᠠᠭᠠᠯᠭᠠᠴᠢᠳ ᠤᠨ ᠲᠡᠳᠡᠨ ᠡᠴᠡ ᠴᠤᠭᠯᠠᠭᠤᠯᠤᠭᠰᠠᠨ ᠮᠥᠩᠭᠥ ᠶᠢ ᠲᠡᠭᠦᠨ ᠢᠶᠡᠷ ᠲᠣᠭᠠᠯᠠᠭᠤᠯᠵᠤ᠂ 5 ᠲᠡᠷᠡ ᠮᠥᠩᠭᠥ ᠶᠢ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡ ᠶᠢᠨ ᠬᠠᠷᠠᠭᠠᠯᠵᠠᠭᠴᠢᠳ ᠤᠨ ᠭᠠᠷ ᠲᠤ ᠲᠤᠰᠢᠶᠠᠭᠠᠷᠠᠢ᠃ ᠲᠡᠭᠡᠪᠡᠯ ᠲᠡᠳᠡ ᠲᠡᠷᠡ ᠮᠥᠩᠭᠥ ᠪᠡᠷ ᠥᠷᠭᠥᠭᠡᠨ ᠦ ᠡᠪᠳᠡᠷᠡᠯ ᠢ ᠵᠠᠰᠠᠪᠤᠷᠢᠯᠠᠬᠤ ᠪᠠᠷ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠳᠦ ᠠᠵᠢᠯᠯᠠᠵᠤ ᠪᠤᠢ ᠬᠥᠮᠦᠰ᠂ 6 ᠮᠣᠳᠣᠨ ᠳᠠᠷᠬᠠᠳ᠂ ᠪᠠᠷᠢᠯᠭᠠᠴᠢᠳ ᠪᠣᠯᠣᠨ ᠴᠢᠯᠠᠭᠤᠴᠢᠳ ᠲᠤ ᠴᠠᠯᠢᠩ ᠥᠭᠴᠦ᠂ ᠮᠣᠳᠣ ᠪᠠ ᠵᠠᠰᠠᠭᠰᠠᠨ ᠴᠢᠯᠠᠭᠤ ᠶᠢ ᠬᠤᠳᠠᠯᠳᠤᠵᠤ ᠠᠪᠤᠭᠠᠳ ᠥᠷᠭᠥᠭᠡ ᠶᠢ ᠵᠠᠰᠠᠪᠤᠷᠢᠯᠠᠬᠤ ᠪᠣᠯᠣᠨᠠ᠃ 7 ᠲᠡᠳᠡ ᠢᠲᠡᠭᠡᠮᠵᠢ ᠲᠠᠢ ᠠᠵᠢᠯᠯᠠᠳᠠᠭ ᠲᠤᠯᠠ ᠲᠡᠳᠡᠨ ᠳᠦ ᠳᠠᠭᠠᠭᠠᠯᠭᠠᠭᠰᠠᠨ ᠮᠥᠩᠭᠥᠨ ᠦ ᠲᠠᠢᠯᠤᠨ ᠲᠣᠭᠠᠴᠠᠭᠠ ᠶᠢ ᠲᠡᠳᠡᠨ ᠡᠴᠡ ᠨᠡᠬᠡᠬᠦ ᠬᠡᠷᠡᠭ ᠦᠭᠡᠢ》 ᠭᠡᠵᠦ ᠬᠡᠯᠡᠵᠡᠢ᠃
8 ᠲᠡᠷᠢᠭᠦᠨ ᠲᠠᠬᠢᠯᠴᠢ ᠾᠢᠯᠺᠢᠶᠠ ᠪᠢᠴᠢᠭᠡᠴᠢ ᠱᠠᠹᠠᠨ ᠳᠤ᠄ 《ᠪᠢ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠡᠴᠡ ᠬᠠᠤᠯᠢ ᠶᠢᠨ ᠨᠣᠮ ᠣᠯᠣᠯᠠ》 ᠭᠡᠪᠡ᠃ ᠾᠢᠯᠺᠢᠶᠠ ᠲᠡᠷᠡ ᠨᠣᠮ ᠢ ᠱᠠᠹᠠᠨ ᠳᠤ ᠥᠭᠴᠦ ᠤᠩ᠋ᠰᠢᠭᠤᠯᠪᠠ᠃ 9 ᠪᠢᠴᠢᠭᠡᠴᠢ ᠱᠠᠹᠠᠨ ᠬᠠᠭᠠᠨ ᠳᠤ ᠪᠠᠷᠠᠭᠠᠯᠬᠠᠵᠤ᠂ ᠲᠡᠭᠦᠨ ᠳᠦ ᠦᠭᠡ ᠤᠯᠠᠮᠵᠢᠯᠠᠨ᠄ 《ᠲᠠᠨ ᠤ ᠵᠠᠷᠤᠴᠠ ᠨᠠᠷ ᠥᠷᠭᠥᠭᠡᠨ ᠳᠦ ᠪᠠᠢᠭᠰᠠᠨ ᠮᠥᠩᠭᠥ ᠶᠢ ᠴᠤᠭᠯᠠᠭᠤᠯᠵᠤ᠂ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡᠨ ᠦ ᠠᠵᠢᠯᠯᠠᠭᠴᠢᠳ ᠬᠢᠭᠡᠳ ᠬᠠᠷᠠᠭᠠᠯᠵᠠᠭᠴᠢᠳ ᠤᠨ ᠭᠠᠷ ᠲᠤ ᠲᠤᠰᠢᠶᠠᠯᠠ》 ᠭᠡᠪᠡ᠃ 10 ᠪᠢᠴᠢᠭᠡᠴᠢ ᠱᠠᠹᠠᠨ ᠬᠠᠭᠠᠨ ᠳᠤ᠄ 《ᠲᠠᠬᠢᠯᠴᠢ ᠾᠢᠯᠺᠢᠶᠠ ᠨᠠᠳᠠ ᠳᠤ ᠨᠢᠭᠡ ᠨᠣᠮ ᠥᠭᠭᠥᠭᠰᠡᠨ》 ᠭᠡᠵᠦ ᠮᠡᠳᠡᠭᠦᠯᠦᠭᠡᠳ ᠲᠡᠷᠡ ᠨᠣᠮ ᠢ ᠬᠠᠭᠠᠨ ᠤ ᠡᠮᠦᠨᠡ ᠤᠩ᠋ᠰᠢᠵᠠᠢ᠃
11 ᠬᠠᠭᠠᠨ ᠲᠡᠷᠡ ᠬᠦ ᠬᠠᠤᠯᠢ ᠶᠢᠨ ᠨᠣᠮ ᠤᠨ ᠦᠭᠡᠰ ᠢ ᠰᠣᠨᠣᠰᠣᠭᠠᠳ ᠬᠤᠪᠴᠠᠰᠤ ᠪᠠᠨ ᠤᠷᠠᠵᠠᠢ᠃ 12 ᠬᠠᠭᠠᠨ ᠪᠡᠷ ᠲᠠᠬᠢᠯᠴᠢ ᠾᠢᠯᠺᠢᠶᠠ᠂ ᠱᠠᠹᠠᠨ ᠤ ᠬᠦᠦ ᠠᠾᠢᠺᠠᠮ᠂ ᠮᠢᠺᠠᠢᠶᠠ ᠶᠢᠨ ᠬᠦᠦ ᠠᠺᠪᠣᠷ᠂ ᠪᠢᠴᠢᠭᠡᠴᠢ ᠱᠠᠹᠠᠨ ᠪᠣᠯᠣᠨ ᠬᠠᠭᠠᠨ ᠤ ᠵᠠᠷᠤᠴᠠ ᠠᠰᠠᠢᠶᠠ ᠨᠠᠷ ᠲᠤ ᠵᠠᠬᠢᠨ᠄ 13 《ᠣᠯᠳᠠᠭᠰᠠᠨ ᠨᠣᠮ ᠳᠤ ᠪᠢᠴᠢᠭᠳᠡᠭᠰᠡᠨ ᠦᠭᠡᠰ ᠦᠨ ᠲᠤᠬᠠᠢ ᠮᠢᠨᠦ ᠡᠮᠦᠨᠡ ᠡᠴᠡ᠂ ᠮᠥᠨ ᠠᠷᠠᠳ ᠲᠦᠮᠡᠨ ᠪᠣᠯᠣᠨ ᠪᠦᠬᠦ ᠶᠦᠳᠠ ᠶᠢᠨ ᠡᠮᠦᠨᠡ ᠡᠴᠡ ᠶᠣᠬᠣᠸᠠ ᠠᠴᠠ ᠠᠰᠠᠭᠤᠬᠤ ᠪᠠᠷ ᠲᠠ ᠨᠠᠷ ᠶᠠᠪᠤᠵᠠᠭᠠ᠃ ᠪᠢᠳᠡᠨ ᠦ ᠡᠴᠢᠭᠡ ᠡᠪᠦᠭᠡᠳ ᠡᠨᠡ ᠨᠣᠮ ᠤᠨ ᠦᠭᠡᠰ ᠢ ᠳᠠᠭᠠᠭᠠ ᠦᠭᠡᠢ᠂ ᠪᠢᠳᠡᠨ ᠦ ᠲᠥᠯᠥᠭᠡ ᠪᠢᠴᠢᠭᠰᠡᠨ ᠪᠦᠬᠦᠨ ᠦ ᠳᠠᠭᠠᠤ ᠪᠡᠶᠡᠯᠡᠭᠦᠯᠦᠭᠡ ᠦᠭᠡᠢ ᠤᠴᠢᠷ ᠠᠴᠠ ᠪᠢᠳᠡᠨ ᠦ ᠳᠡᠭᠡᠷᠡ ᠶᠣᠬᠣᠸᠠ ᠶᠢᠨ ᠦᠯᠡᠮᠵᠢ ᠠᠭᠤᠷ ᠬᠢᠯᠢᠩ ᠳᠦᠷᠡᠯᠵᠡᠭᠰᠡᠨ ᠪᠠᠢᠨᠠ》 ᠭᠡᠪᠡ᠃
14 ᠲᠠᠬᠢᠯᠴᠢ ᠾᠢᠯᠺᠢᠶᠠ᠂ ᠠᠾᠢᠺᠠᠮ᠂ ᠠᠺᠪᠣᠷ᠂ ᠱᠠᠹᠠᠨ᠂ ᠠᠰᠠᠢᠶᠠ ᠨᠠᠷ ᠱᠠᠯᠦ᠋ᠮ ᠤᠨ ᠡᠬᠡᠨᠡᠷ ᠡᠰᠢ ᠦᠵᠡᠭᠦᠯᠦᠭᠴᠢ ᠾᠦᠯᠳᠠ ᠤᠷᠤᠭᠤ ᠣᠴᠢᠪᠠ᠃ ᠱᠠᠯᠦ᠋ᠮ ᠪᠣᠯ ᠬᠠᠷᠬᠠᠰ ᠤᠨ ᠠᠴᠢ᠂ ᠲᠢᠺᠸᠠ ᠶᠢᠨ ᠬᠦᠦ ᠪᠠᠢᠵᠤ᠂ ᠣᠷᠳᠣᠨ ᠤ ᠬᠤᠪᠴᠠᠰᠤ ᠬᠤᠨᠠᠷ ᠢ ᠬᠠᠳᠠᠭᠠᠯᠠᠭᠴᠢ ᠪᠥᠭᠡᠳ ᠾᠦᠯᠳᠠ ᠶᠧᠷᠦ᠋ᠰᠠᠯᠧᠮ ᠤᠨ ᠬᠣᠶᠠᠳᠤᠭᠠᠷ ᠳᠡᠭᠦᠷᠭᠡ ᠳᠦ ᠰᠠᠭᠤᠵᠤ ᠪᠠᠢᠪᠠ᠃ ᠲᠡᠳᠡ ᠲᠡᠭᠦᠨ ᠲᠡᠢ ᠶᠠᠷᠢᠯᠴᠠᠬᠤ ᠳᠤ᠂ 15 ᠾᠦᠯᠳᠠ ᠲᠡᠳᠡᠨ ᠳᠦ᠄ 《ᠢᠰᠷᠧᠯ ᠤᠨ ᠪᠤᠷᠬᠠᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠂ ᠥᠪᠡᠷᠰᠡᠳ ᠢ ᠴᠢᠨᠢ ᠨᠠᠳᠠ ᠤᠷᠤᠭᠤ ᠢᠯᠡᠭᠡᠭᠰᠡᠨ ᠬᠥᠮᠦᠨ ᠳᠦ ᠬᠡᠯᠡᠵᠡᠭᠡ᠃ 16 ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠬᠠᠷᠠ᠂ ᠪᠢ ᠡᠨᠡ ᠭᠠᠵᠠᠷ ᠲᠤ ᠪᠣᠯᠣᠨ ᠡ᠊ᠨᠳᠡᠬᠢ ᠶᠢᠨ ᠰᠠᠭᠤᠭᠠᠯᠢᠴᠢᠳ ᠳᠡᠭᠡᠷᠡ ᠭᠠᠢ ᠵᠣᠪᠠᠯᠠᠩ ᠠᠪᠴᠢᠷᠠᠵᠤ᠂ ᠶᠦᠳᠠ ᠶᠢᠨ ᠬᠠᠭᠠᠨ ᠤ ᠤᠩ᠋ᠰᠢᠭᠰᠠᠨ ᠨᠣᠮ ᠳᠤ ᠪᠢᠴᠢᠭᠳᠡᠭᠰᠡᠨ ᠪᠦᠬᠦᠨ ᠢ ᠪᠡᠶᠡᠯᠡᠭᠦᠯᠬᠦ ᠭᠡᠵᠦ ᠪᠠᠢᠨᠠ︕ 17 ᠲᠡᠳᠡ ᠨᠠᠮᠠᠶᠢ ᠣᠷᠬᠢᠨ᠂ ᠥᠭᠡᠷᠡ ᠪᠤᠷᠬᠠᠳ ᠲᠤ ᠤᠲᠤᠯᠭᠠ ᠤᠭᠤᠭᠢᠭᠤᠯᠵᠤ᠂ ᠭᠠᠷ ᠢᠶᠠᠷ ᠢᠶᠠᠨ ᠬᠢᠭᠰᠡᠨ ᠠᠯᠢᠪᠠ ᠰᠢᠲᠦᠭᠡᠨ ᠢᠶᠡᠷ ᠨᠠᠮᠠᠶᠢ ᠬᠢᠯᠢᠩᠨᠡᠭᠦᠯᠦᠭᠰᠡᠨ ᠤᠴᠢᠷ ᠠᠴᠠ ᠤᠨᠲᠠᠷᠠᠰᠢ ᠦᠭᠡᠢ ᠠᠭᠤᠷ ᠬᠢᠯᠢᠩ ᠮᠢᠨᠢ ᠡᠨᠡ ᠭᠠᠵᠠᠷ ᠳᠡᠭᠡᠷᠡ ᠳᠦᠷᠡᠯᠵᠡᠬᠦ ᠪᠣᠯᠣᠨᠠ᠂〉 18 ᠬᠠᠷᠢᠨ ᠶᠣᠬᠣᠸᠠ ᠠᠴᠠ ᠠᠰᠠᠭᠤᠯᠭᠠᠬᠤ ᠪᠠᠷ ᠥᠪᠡᠷᠰᠡᠳ ᠢ ᠴᠢᠨᠢ ᠢᠯᠡᠭᠡᠭᠰᠡᠨ ᠶᠦᠳᠠ ᠶᠢᠨ ᠬᠠᠭᠠᠨ ᠳᠤ ᠲᠠ ᠨᠠᠷ ᠡᠭᠦᠨ ᠢ ᠬᠡᠯᠡᠭᠲᠦᠨ᠄ ᠢᠰᠷᠧᠯ ᠤᠨ ᠪᠤᠷᠬᠠᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠴᠢᠨᠦ ᠰᠣᠨᠣᠰᠣᠭᠰᠠᠨ ᠦᠭᠡᠰ ᠦᠨ ᠲᠤᠬᠠᠢ ᠬᠡᠯᠡᠵᠦ ᠥᠭᠭᠥᠶᠡ᠂ 19 ᠡᠨᠡ ᠭᠠᠵᠠᠷ ᠪᠣᠯᠣᠨ ᠰᠠᠭᠤᠭᠠᠯᠢᠴᠢᠳ ᠤᠨ ᠬᠢᠨᠢ ᠲᠤᠬᠠᠢ 〈ᠡᠵᠡᠭᠦᠢᠷᠡᠵᠦ᠂ ᠬᠠᠷᠢᠶᠠᠯ ᠤᠨ ᠦᠭᠡ ᠪᠣᠯᠣᠨᠠ〉 ᠭᠡᠰᠡᠨ ᠮᠢᠨᠦ ᠦᠭᠡ ᠶᠢ ᠴᠢ ᠰᠣᠨᠣᠰᠣᠭᠠᠳ ᠵᠢᠷᠦᠬᠡ ᠪᠡᠨ ᠵᠥᠭᠡᠯᠡᠷᠡᠭᠦᠯᠵᠦ᠂ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠥᠪᠡᠷ ᠢ ᠪᠠᠨ ᠳᠠᠷᠤᠤ ᠪᠣᠯᠭᠠᠨ᠂ ᠬᠤᠪᠴᠠᠰᠤ ᠪᠠᠨ ᠤᠷᠠᠵᠤ᠂ ᠤᠬᠢᠯᠠᠭᠰᠠᠨ ᠤᠴᠢᠷ ᠠᠴᠠ ᠪᠢ ᠴᠤ ᠴᠢᠨᠦᠬᠢ ᠶᠢ ᠰᠣᠨᠣᠰᠣᠯᠠ᠂ ᠶᠣᠬᠣᠸᠠ ᠶᠢᠨ ᠦᠭᠡ ᠡᠨᠡ ᠪᠠᠢᠨᠠ᠂ 20 ᠲᠡᠢᠮᠦ ᠡᠴᠡ ᠠᠩ᠋ᠬᠠᠷᠤᠭᠲᠤᠨ᠂ ᠪᠢ ᠴᠢᠮᠠ ᠶᠢ ᠡᠴᠢᠭᠡ ᠡᠪᠦᠭᠡᠳ ᠥᠭᠡᠳᠡ ᠴᠢᠨᠢ ᠣᠴᠢᠭᠤᠯᠵᠤ᠂ ᠴᠢ ᠪᠤᠯᠠᠰᠢᠨ ᠳᠠᠭᠠᠨ ᠠᠮᠤᠷ ᠲᠠᠢᠪᠤᠩ ᠢᠶᠠᠷ ᠣᠷᠣᠬᠤ ᠪᠣᠯᠣᠨᠠ᠃ ᠡᠨᠡ ᠭᠠᠵᠠᠷ ᠳᠡᠭᠡᠷᠡ ᠮᠢᠨᠦ ᠠᠪᠴᠢᠷᠠᠬᠤ ᠠᠯᠢᠪᠠ ᠭᠠᠢ ᠵᠣᠪᠠᠯᠠᠩ ᠢ ᠴᠢ ᠨᠢᠳᠦ ᠪᠡᠷ ᠢᠶᠠᠨ ᠦᠵᠡᠬᠦ ᠦᠭᠡᠢ〉》 ᠭᠡᠪᠡ᠃ ᠢᠩᠭᠢᠭᠡᠳ ᠲᠡᠳᠡ ᠬᠠᠷᠢᠭᠤ ᠦᠭᠡ ᠶᠢ ᠬᠠᠭᠠᠨ ᠳᠤ ᠠᠪᠴᠢᠷᠠᠪᠠ᠃