ᠬᠠᠭᠠᠳ ᠤᠨ ᠳᠡᠳ᠋ ᠵᠢᠷᠭᠤᠭᠠ
ᠤᠰᠤᠨ ᠳᠡᠭᠡᠷᠡ ᠬᠥᠪᠪᠥᠭᠰᠡᠨ ᠰᠦᠬᠡ
1 ᠡᠰᠢ ᠦᠵᠡᠭᠦᠯᠦᠭᠴᠢ ᠱᠠᠪᠢ ᠨᠠᠷ ᠡᠯᠢᠱᠠ ᠳᠤ ᠬᠠᠨᠳᠤᠨ᠄ 《ᠬᠠᠷᠠ᠂ ᠲᠠ ᠪᠢᠳᠡᠨ ᠦ ᠰᠠᠭᠤᠵᠤ ᠪᠠᠢᠭᠠ ᠭᠠᠵᠠᠷ ᠳᠠᠪᠴᠢᠭᠤ ᠪᠠᠢᠨᠠ᠃ 2 ᠪᠢᠳᠡ ᠶᠣᠷᠳᠠᠨ ᠤᠷᠤᠭᠤ ᠶᠠᠪᠤᠶᠠ᠃ ᠬᠥᠮᠦᠨ ᠪᠣᠯᠭᠠᠨ ᠲᠡᠨᠳᠡ ᠡᠴᠡ ᠨᠢᠷᠤᠭᠤ ᠮᠣᠳᠣ ᠠᠪᠴᠤ᠂ ᠥᠪᠡᠷᠰᠡᠳ ᠦᠨ ᠢᠶᠠᠨ ᠣᠷᠣᠨ ᠰᠠᠭᠤᠴᠠ ᠶᠢ ᠲᠡᠨᠳᠡ ᠪᠠᠷᠢᠶᠠ》 ᠭᠡᠯᠴᠡᠭᠰᠡᠨ ᠳᠦ᠂ ᠲᠡᠷᠡ᠄ 《ᠶᠠᠪᠤᠵᠠᠭᠠ》 ᠭᠡᠵᠦ ᠬᠠᠷᠢᠭᠤᠯᠵᠠᠢ᠃ 3 ᠨᠢᠭᠡ ᠨᠢ᠄ 《ᠲᠠ ᠪᠠᠰᠠ ᠵᠠᠷᠤᠴᠠ ᠨᠠᠷ ᠲᠠᠢ ᠪᠠᠨ ᠬᠠᠮᠲᠤ ᠶᠠᠪᠤᠬᠤ ᠦᠭᠡᠢ ᠤᠤ︖》 ᠭᠡᠰᠡᠨ ᠳᠦ᠂ ᠡᠯᠢᠱᠠ᠄ 《ᠪᠢ ᠶᠠᠪᠤᠨᠠ》 ᠭᠡᠳ 4 ᠲᠡᠳᠡᠨ ᠲᠡᠢ ᠬᠠᠮᠲᠤ ᠶᠠᠪᠤᠵᠠᠢ᠃ ᠲᠡᠳᠡ ᠶᠣᠷᠳᠠᠨ ᠳᠤ ᠬᠦᠷᠴᠦ ᠮᠣᠳᠣ ᠴᠠᠪᠴᠢᠵᠤ ᠡᠬᠢᠯᠡᠪᠡ᠃ 5 ᠨᠢᠭᠡ ᠨᠢ ᠨᠢᠷᠤᠭᠤ ᠤᠨᠠᠭᠠᠵᠤ ᠪᠠᠢᠲᠠᠯᠠ ᠰᠦᠬᠡᠨ ᠦ ᠬᠢᠨᠢ ᠲᠣᠯᠣᠭᠠᠢ ᠤᠰᠤᠨ ᠳᠤ ᠤᠨᠠᠪᠠ᠃ ᠲᠡᠷᠡ᠄ 《ᠶᠠᠭᠠᠬᠢᠨᠠ ᠪᠤᠢ︖ ᠡᠵᠡᠨ ᠮᠢᠨᠢ᠂ ᠡᠭᠦᠨ ᠢ ᠵᠢᠭᠡᠯᠡᠭᠰᠡᠨ ᠶᠤᠮ》 ᠭᠡᠵᠦ ᠤᠤᠯᠭᠠ ᠠᠯᠳᠠᠵᠠᠢ᠃ 6 ᠪᠤᠷᠬᠠᠨ ᠤ ᠬᠥᠮᠦᠨ᠄ 《ᠰᠦᠬᠡ ᠴᠢᠨᠢ ᠬᠠᠮᠢᠭᠠ ᠤᠨᠠᠭᠰᠠᠨ ᠪᠤᠢ︖》 ᠭᠡᠬᠦ ᠳᠦ᠂ ᠲᠡᠷᠡ ᠬᠥᠮᠦᠨ ᠲᠡᠷᠡ ᠭᠠᠵᠠᠷ ᠢ ᠵᠢᠭᠠᠵᠤ ᠥᠭᠪᠡ᠃ ᠡᠯᠢᠱᠠ ᠮᠣᠳᠣᠨ ᠰᠠᠯᠠᠭᠠ ᠳᠠᠭᠠᠷᠢᠵᠤ ᠲᠡᠰᠢ ᠪᠠᠨ ᠰᠢᠳᠡᠨ᠂ ᠨᠥᠭᠥᠭᠡ ᠲᠡᠮᠦᠷ ᠰᠦᠬᠡ ᠶᠢ ᠬᠥᠪᠪᠥᠭᠦᠯᠦᠭᠡᠳ᠄ 7 《ᠭᠠᠷᠭᠠᠵᠤ ᠠᠪ》 ᠭᠡᠪᠡ᠃ ᠢᠩᠭᠢᠭᠡᠳ ᠲᠡᠷᠡ ᠬᠥᠮᠦᠨ ᠭᠠᠷ ᠢᠶᠠᠨ ᠰᠤᠩ᠋ᠭᠠᠨ ᠰᠦᠬᠡ ᠪᠡᠨ ᠠᠪᠴᠠᠢ᠃
ᠡᠯᠢᠱᠠ ᠬᠢᠭᠡᠳ ᠠᠷᠠᠮ ᠤᠨ ᠴᠡᠷᠢᠭ
8 ᠠᠷᠠᠮ ᠤᠨ ᠬᠠᠭᠠᠨ ᠢᠰᠷᠧᠯ ᠲᠠᠢ ᠪᠠᠢᠯᠳᠤᠵᠤ ᠪᠠᠢᠯᠠ᠃ ᠲᠡᠷᠡ ᠲᠦᠰᠢᠮᠡᠳ ᠲᠡᠢ ᠪᠡᠨ ᠵᠥᠪᠯᠡᠯᠳᠦᠨ᠄ 《ᠪᠢ ᠡᠢᠮᠦ ᠡᠢᠮᠦ ᠭᠠᠵᠠᠷ ᠤᠳ ᠲᠤ ᠬᠤᠸᠠᠷᠠᠩᠨᠠᠬᠤ ᠪᠣᠯᠣᠨᠠ》 ᠭᠡᠪᠡ᠃ 9 ᠬᠠᠷᠢᠨ ᠪᠤᠷᠬᠠᠨ ᠤ ᠬᠥᠮᠦᠨ ᠢᠰᠷᠧᠯ ᠤᠨ ᠬᠠᠭᠠᠨ ᠳᠤ ᠦᠭᠡ ᠢᠯᠡᠭᠡᠨ᠄ 《ᠪᠣᠯᠭᠣᠮᠵᠢᠲᠠᠢ ᠪᠠᠢ᠂ ᠠᠷᠠᠮᠴᠤᠳ ᠡᠨᠡ ᠡᠨᠡ ᠭᠠᠵᠠᠷ ᠲᠤ ᠪᠠᠭᠤᠬᠤ ᠲᠤᠯᠠ ᠲᠠ ᠲᠡᠷᠡ ᠭᠠᠵᠠᠷ ᠢᠶᠠᠷ ᠪᠢᠲᠡᠭᠡᠢ ᠥᠩᠭᠡᠷᠡ》 ᠭᠡᠵᠦ ᠬᠡᠯᠡᠭᠦᠯᠪᠡ᠃ 10 ᠢᠰᠷᠧᠯ ᠤᠨ ᠬᠠᠭᠠᠨ ᠪᠤᠷᠬᠠᠨ ᠤ ᠬᠥᠮᠦᠨ ᠦ ᠰᠠᠨᠠᠭᠤᠯᠤᠭᠰᠠᠨ ᠲᠡᠷᠡ ᠭᠠᠵᠠᠷ ᠤᠷᠤᠭᠤ ᠬᠥᠮᠦᠨ ᠢᠯᠡᠭᠡᠪᠡ᠃ ᠲᠡᠢᠨ ᠬᠦ ᠬᠠᠭᠠᠨ ᠡᠯᠢᠱᠠ ᠶᠢᠨ ᠰᠠᠨᠠᠭᠤᠯᠤᠭᠰᠠᠨ ᠭᠠᠵᠠᠷ ᠤᠳ ᠢ ᠬᠠᠮᠠᠭᠠᠯᠠᠭᠤᠯᠳᠠᠭ ᠪᠠᠢᠵᠠᠢ᠃ ᠡᠨᠡ ᠮᠡᠲᠦ ᠪᠡᠷ ᠭᠠᠭᠴᠠ ᠬᠣᠶᠠᠷ ᠤᠳᠠᠭᠠ ᠪᠢᠰᠢ ᠪᠣᠯᠬᠤ ᠳᠤ᠂ 11 ᠠᠷᠠᠮ ᠤᠨ ᠬᠠᠭᠠᠨ ᠠᠭᠤᠷᠯᠠᠭᠠᠳ ᠵᠠᠷᠤᠴᠠ ᠨᠠᠷ ᠢᠶᠠᠨ ᠳᠠᠭᠤᠳᠠᠨ᠂ ᠲᠡᠳᠡᠨ ᠳᠦ᠄ 《ᠮᠠᠨ ᠤ ᠬᠡᠨ ᠨᠢ ᠢᠰᠷᠧᠯ ᠤᠨ ᠬᠠᠭᠠᠨ ᠤ ᠲᠠᠯᠠ ᠳᠤ ᠪᠠᠢᠭᠠ ᠶᠢ ᠨᠠᠳᠠ ᠳᠤ ᠬᠡᠯᠡᠬᠦ ᠦᠭᠡᠢ ᠤᠤ︖》 ᠭᠡᠪᠡ᠃ 12 ᠲᠦᠰᠢᠮᠡᠳ ᠦᠨ ᠬᠢᠨᠢ ᠨᠢᠭᠡ ᠨᠢ᠄ 《ᠦᠭᠡᠢ᠂ ᠡᠵᠡᠨ ᠬᠠᠭᠠᠨ ᠮᠢᠨᠢ᠂ ᠢᠰᠷᠧᠯ ᠳᠤ ᠪᠠᠢᠭᠠ ᠡᠰᠢ ᠦᠵᠡᠭᠦᠯᠦᠭᠴᠢ ᠡᠯᠢᠱᠠ ᠲᠠᠨ ᠤ ᠤᠨᠲᠠᠯᠭᠠ ᠶᠢᠨ ᠥᠷᠥᠭᠡᠨ ᠳᠡᠭᠡᠨ ᠶᠠᠷᠢᠭᠰᠠᠨ ᠦᠭᠡ ᠶᠢ ᠬᠦᠷᠲᠡᠯᠡ ᠢᠰᠷᠧᠯ ᠤᠨ ᠬᠠᠭᠠᠨ ᠳᠤ ᠬᠡᠯᠡᠳᠡᠭ ᠶᠤᠮ》 ᠬᠡᠮᠡᠨ ᠠᠢᠯᠠᠳᠬᠠᠪᠠ᠃ 13 ᠠᠷᠠᠮ ᠤᠨ ᠬᠠᠭᠠᠨ᠄ 《ᠲᠠ ᠨᠠᠷ ᠶᠠᠪᠤᠵᠤ᠂ ᠲᠡᠭᠦᠨ ᠦ ᠬᠠᠮᠢᠭᠠ ᠪᠠᠢᠭᠠ ᠶᠢ ᠮᠡᠳᠡᠵᠦ ᠠᠪ᠃ ᠪᠢ ᠬᠥᠮᠦᠨ ᠶᠠᠪᠤᠭᠤᠯᠵᠤ ᠲᠡᠭᠦᠨ ᠢ ᠪᠠᠷᠢᠭᠤᠯᠤᠶᠠ》 ᠭᠡᠯᠡ᠃ ᠬᠡᠨ ᠨᠢᠭᠡ ᠨᠢ ᠬᠠᠭᠠᠨ ᠳᠤ᠄ 《ᠬᠠᠷᠠ᠂ ᠲᠡᠷᠡ ᠳ᠋ᠣᠲ᠋ᠠᠨ ᠳᠤ ᠪᠠᠢᠨᠠ》 ᠭᠡᠵᠦ ᠳᠤᠭᠤᠯᠭᠠᠬᠤ ᠳᠤ᠂ 14 ᠲᠡᠷᠡ ᠪᠡᠷ ᠲᠡᠰᠢ ᠪᠠᠨ ᠮᠣᠷᠢᠳ᠂ ᠲᠡᠷᠭᠡ ᠨᠦᠭᠦᠳ ᠪᠣᠯᠣᠨ ᠶᠡᠬᠡ ᠴᠡᠷᠢᠭ ᠢᠯᠡᠭᠡᠵᠡᠢ᠃ ᠲᠡᠳᠡ ᠰᠥᠨᠢ ᠪᠠᠷ ᠢᠷᠡᠵᠦ᠂ ᠬᠣᠲᠠ ᠶᠢ ᠪᠦᠰᠡᠯᠡᠪᠡ᠃
15 ᠪᠤᠷᠬᠠᠨ ᠤ ᠬᠥᠮᠦᠨ ᠦ ᠵᠠᠷᠤᠴᠠ ᠡᠷᠲᠡ ᠪᠣᠰᠣᠭᠠᠳ ᠭᠠᠳᠠᠭᠰᠢ ᠭᠠᠷᠴᠤ ᠦᠵᠡᠬᠦ ᠳᠦ᠂ ᠲᠡᠷᠭᠡ ᠮᠣᠷᠢᠳ ᠲᠠᠢ ᠶᠡᠬᠡ ᠴᠡᠷᠢᠭ ᠬᠣᠲᠠ ᠶᠢ ᠪᠦᠰᠡᠯᠡᠭᠡᠳ ᠪᠠᠢᠪᠠ︕ ᠵᠠᠷᠤᠴᠠ ᠨᠢ ᠡᠯᠢᠱᠠ ᠳᠤ᠄ 《ᠶᠠᠭᠠᠬᠢᠨᠠ ᠪᠤᠢ︖ ᠡᠵᠡᠨ ᠮᠢᠨᠢ᠂ ᠪᠢᠳᠡ ᠶᠠᠭᠠᠬᠢᠬᠤ ᠪᠢᠯᠡ︖》 ᠭᠡᠬᠦ ᠳᠦ᠂ 16 ᠲᠡᠷᠡ᠄ 《ᠪᠦᠦ ᠠᠶᠤ᠃ ᠪᠢᠳᠡᠨ ᠲᠡᠢ ᠬᠠᠮᠲᠤ ᠪᠠᠢᠭᠴᠢᠳ ᠨᠢ ᠲᠡᠳᠡᠨ ᠲᠡᠢ ᠬᠠᠮᠲᠤ ᠪᠠᠢᠭᠴᠢᠳ ᠠᠴᠠ ᠣᠯᠠᠨ ᠶᠤᠮ》 ᠭᠡᠪᠡ᠃ 17 ᠡᠯᠢᠱᠠ ᠳᠠᠭᠠᠳᠬᠠᠨ᠄ 《ᠶᠣᠬᠣᠸᠠ᠂ ᠨᠢᠳᠦ ᠶᠢ ᠨᠢ ᠨᠡᠭᠡᠭᠡᠵᠦ ᠲᠡᠭᠦᠨ ᠳᠦ ᠬᠠᠷᠠᠭᠤᠯᠤᠭᠠᠴᠢ》 ᠭᠡᠵᠦ ᠭᠤᠶᠤᠬᠤ ᠳᠤ᠂ ᠶᠣᠬᠣᠸᠠ ᠵᠠᠷᠤᠴᠠ ᠶᠢᠨ ᠬᠢᠨᠢ ᠨᠢᠳᠦ ᠶᠢ ᠨᠡᠭᠡᠭᠡᠵᠦ ᠬᠠᠷᠠᠭᠤᠯᠤᠯᠠ᠃ ᠲᠡᠷᠡ ᠦᠵᠡᠬᠦ ᠳᠦ᠂ ᠭᠠᠯᠲᠤ ᠮᠣᠷᠢᠳ ᠪᠣᠯᠣᠨ ᠲᠡᠷᠭᠡ ᠨᠦᠭᠦᠳ ᠡᠯᠢᠱᠠ ᠶᠢ ᠬᠦᠷᠢᠶᠡᠯᠡᠨ ᠪᠦᠬᠦ ᠲᠣᠯᠣᠭᠠᠳ ᠢ ᠳᠦᠭᠦᠷᠭᠡᠭᠰᠡᠨ ᠪᠠᠢᠯᠠ︕
18 ᠲᠡᠳᠡ ᠥᠪᠡᠷ ᠤᠷᠤᠭᠤ ᠨᠢ ᠣᠢᠷᠠᠲᠤᠨ ᠢᠷᠡᠬᠦ ᠳᠦ᠂ ᠡᠯᠢᠱᠠ ᠶᠣᠬᠣᠸᠠ ᠳᠤ ᠳᠠᠭᠠᠳᠬᠠᠨ᠄ 《ᠡᠨᠡ ᠬᠥᠮᠦᠰ ᠦᠨ ᠨᠢᠳᠦ ᠶᠢ ᠬᠠᠭᠠᠭᠠᠴᠢ》 ᠭᠡᠵᠦ ᠭᠤᠶᠤᠭᠰᠠᠨ ᠳᠤ᠂ ᠶᠣᠬᠣᠸᠠ ᠡᠯᠢᠱᠠ ᠶᠢᠨ ᠦᠭᠡ ᠪᠡᠷ ᠲᠡᠳᠡᠨ ᠦ ᠨᠢᠳᠦ ᠶᠢ ᠬᠠᠭᠠᠵᠠᠢ᠃ 19 ᠡᠯᠢᠱᠠ ᠲᠡᠳᠡᠨ ᠳᠦ᠄ 《ᠡᠨᠡ ᠴᠢᠨᠢ ᠲᠡᠷᠡ ᠵᠠᠮ ᠪᠢᠰᠢ᠂ ᠲᠡᠷᠡ ᠬᠣᠲᠠ ᠴᠤ ᠪᠢᠰᠢ᠃ ᠨᠠᠮᠠᠶᠢ ᠳᠠᠭᠠᠭᠠᠴᠢ᠂ ᠬᠠᠢᠵᠤ ᠪᠤᠢ ᠲᠡᠷᠡ ᠬᠥᠮᠦᠨ ᠤᠷᠤᠭᠤ ᠴᠢᠨᠢ ᠪᠢ ᠲᠠ ᠨᠠᠷ ᠢ ᠠᠪᠠᠴᠢᠶᠠ》 ᠭᠡᠳ ᠲᠡᠳᠡᠨ ᠢ ᠰᠠᠮᠠᠷᠢᠶᠠ ᠤᠷᠤᠭᠤ ᠠᠪᠠᠴᠢᠪᠠ᠃ 20 ᠲᠡᠳᠡ ᠰᠠᠮᠠᠷᠢᠶᠠ ᠳᠤ ᠣᠷᠣᠭᠰᠠᠨ ᠤ ᠳᠠᠷᠠᠭᠠ᠂ ᠡᠯᠢᠱᠠ᠄ 《ᠶᠣᠬᠣᠸᠠ᠂ ᠡᠨᠡ ᠬᠥᠮᠦᠰ ᠦᠨ ᠨᠢᠳᠦ ᠶᠢ ᠨᠡᠭᠡᠭᠡᠵᠦ ᠲᠡᠳᠡᠨ ᠳᠦ ᠬᠠᠷᠠᠭᠤᠯᠤᠭᠠᠴᠢ》 ᠭᠡᠬᠦ ᠳᠦ᠂ ᠶᠣᠬᠣᠸᠠ ᠲᠡᠳᠡᠨ ᠦ ᠨᠢᠳᠦ ᠶᠢ ᠨᠡᠭᠡᠭᠡᠵᠦ ᠲᠡᠳᠡᠨ ᠳᠦ ᠬᠠᠷᠠᠭᠤᠯᠵᠠᠢ᠃ ᠲᠡᠳᠡ ᠦᠵᠡᠬᠦ ᠳᠦ᠂ ᠥᠪᠡᠷᠰᠡᠳ ᠢᠶᠡᠨ ᠰᠠᠮᠠᠷᠢᠶᠠ ᠶᠢᠨ ᠭᠣᠣᠯ ᠳᠤᠮᠳᠠ ᠪᠠᠢᠯᠠ︕ 21 ᠢᠰᠷᠧᠯ ᠤᠨ ᠬᠠᠭᠠᠨ ᠲᠡᠳᠡᠨ ᠢ ᠬᠠᠷᠠᠭᠠᠳ ᠡᠯᠢᠱᠠ ᠠᠴᠠ᠄ 《ᠡᠴᠢᠭᠡ ᠮᠢᠨᠢ᠂ ᠪᠢ ᠲᠡᠳᠡᠨ ᠢ ᠠᠯᠠᠬᠤ ᠤᠤ︖ ᠲᠡᠳᠡᠨ ᠢ ᠠᠯᠠᠬᠤ ᠤᠤ︖》 ᠭᠡᠪᠡ᠃ 22 ᠡᠯᠢᠱᠠ᠄ 《ᠠᠯᠠᠵᠤ ᠪᠣᠯᠬᠤ ᠦᠭᠡᠢ᠃ ᠲᠠ ᠲᠡᠳᠡᠨ ᠢ ᠥᠪᠡᠷ ᠦᠨ ᠢᠶᠠᠨ ᠢᠯᠳᠦ᠂ ᠥᠪᠡᠷ ᠦᠨ ᠢᠶᠠᠨ ᠨᠤᠮᠤ ᠰᠤᠮᠤ ᠪᠠᠷ ᠣᠯᠵᠠᠯᠠᠭᠰᠠᠨ ᠶᠤᠮ ᠤᠤ︖ ᠶᠠᠭᠤᠨ ᠳᠤ ᠲᠡᠳᠡᠨ ᠢ ᠠᠯᠠᠬᠤ ᠪᠤᠢ︖ ᠲᠡᠳᠡᠨ ᠦ ᠡᠮᠦᠨᠡ ᠪᠣᠣᠪᠣ᠂ ᠤᠮᠳᠠᠭᠠᠨ ᠲᠠᠯᠪᠢᠵᠤ ᠢᠳᠡᠭᠦᠯᠵᠦ ᠤᠤᠭᠤᠭᠤᠯᠭᠠᠭᠠᠳ ᠡᠵᠡᠨ ᠤᠷᠤᠭᠤ ᠨᠢ ᠪᠤᠴᠠᠭᠠᠭᠲᠤᠨ》 ᠭᠡᠵᠡᠢ᠃ 23 ᠲᠡᠷᠡ ᠲᠡᠳᠡᠨ ᠦ ᠲᠥᠯᠥᠭᠡ ᠶᠡᠬᠡ ᠨᠠᠢᠷ ᠪᠡᠯᠡᠳᠬᠡᠭᠰᠡᠨ ᠪᠥᠭᠡᠳ ᠲᠡᠳᠡ ᠢᠳᠡᠵᠦ᠂ ᠤᠤᠭᠤᠵᠠᠭᠠᠯᠠ᠃ ᠡᠭᠦᠨ ᠦ ᠳᠠᠷᠠᠭᠠ ᠲᠡᠳᠡᠨ ᠢ ᠶᠠᠪᠤᠭᠤᠯᠤᠭᠰᠠᠨ ᠳᠤ᠂ ᠲᠡᠳᠡ ᠡᠵᠡᠨ ᠤᠷᠤᠭᠤ ᠪᠠᠨ ᠪᠤᠴᠠᠪᠠ᠃ ᠢᠩᠭᠢᠭᠡᠳ ᠠᠷᠠᠮᠴᠤᠳ ᠤᠨ ᠳᠡᠭᠡᠷᠡᠮ ᠦᠨ ᠪᠦᠯᠦᠭ ᠤᠳ ᠢᠰᠷᠧᠯ ᠤᠨ ᠨᠤᠲᠤᠭ ᠤᠷᠤᠭᠤ ᠬᠠᠯᠳᠠᠵᠤ ᠣᠷᠣᠬᠤ ᠪᠠᠨ ᠪᠣᠯᠢᠭᠰᠠᠨ ᠪᠠᠢᠨᠠ᠃
ᠰᠠᠮᠠᠷᠢᠶᠠ ᠶᠢᠨ ᠶᠡᠬᠡ ᠥᠯᠥᠰᠬᠥᠯᠡᠩ
24 ᠬᠡᠰᠡᠭ ᠬᠤᠭᠤᠴᠠᠭᠠᠨ ᠤ ᠳᠠᠷᠠᠭᠠ᠂ ᠠᠷᠠᠮ ᠤᠨ ᠬᠠᠭᠠᠨ ᠪᠧᠨ ᠬᠠᠳᠠᠳ᠋ ᠪᠦᠬᠦ ᠴᠡᠷᠢᠭ ᠢᠶᠠᠨ ᠳᠠᠢᠴᠢᠯᠠᠨ ᠢᠷᠡᠵᠦ ᠰᠠᠮᠠᠷᠢᠶᠠ ᠶᠢ ᠪᠦᠰᠡᠯᠡᠭᠰᠡᠨ ᠳᠦ᠂ 25 ᠰᠠᠮᠠᠷᠢᠶᠠ ᠳᠤ ᠶᠡᠬᠡ ᠥᠯᠥᠰᠬᠥᠯᠡᠩ ᠪᠣᠯᠪᠠ᠃ ᠲᠡᠳᠡ ᠬᠣᠲᠠ ᠶᠢ ᠪᠦᠰᠡᠯᠡᠭᠡᠳ ᠪᠠᠢᠬᠤ ᠳᠤ᠂ ᠡᠯᠵᠢᠭᠡᠨ ᠲᠣᠯᠣᠭᠠᠢ ᠨᠠᠶᠠᠨ ᠮᠥᠩᠭᠥᠨ ᠱᠧᠺᠧᠯ 9 ᠂ ᠺᠠᠪ 10 ᠤᠨ ᠳᠥᠷᠪᠡᠨ ᠦ ᠨᠢᠭᠡ ᠶᠢᠨ ᠲᠠᠭᠲᠠᠭᠠᠨ ᠤ ᠪᠠᠭᠠᠰᠤ 11 ᠲᠠᠪᠤᠨ ᠮᠥᠩᠭᠥᠨ ᠱᠧᠺᠧᠯ 12 ᠬᠦᠷᠴᠦ ᠪᠠᠢᠪᠠ᠃ 26 ᠢᠰᠷᠧᠯ ᠤᠨ ᠬᠠᠭᠠᠨ ᠬᠡᠷᠡᠮ ᠳᠡᠭᠡᠭᠦᠷ ᠶᠠᠪᠤᠵᠤ ᠪᠠᠢᠲᠠᠯᠠ᠂ ᠨᠢᠭᠡᠨ ᠡᠮᠡᠭᠲᠡᠢ ᠲᠡᠭᠦᠨ ᠤᠷᠤᠭᠤ ᠬᠠᠰᠬᠢᠷᠴᠤ᠄ 《ᠮᠢᠨᠦ ᠡᠵᠡᠨ᠂ ᠬᠠᠭᠠᠨᠲᠠᠨ᠂ ᠲᠤᠰᠠᠯᠠᠭᠠᠴᠢ︕》 ᠭᠡᠪᠡ᠃ 27 ᠬᠠᠭᠠᠨ᠄ 《ᠶᠣᠬᠣᠸᠠ ᠴᠢᠮᠠ ᠳᠤ ᠲᠤᠰᠠᠯᠠᠬᠤ ᠦᠭᠡᠢ ᠪᠠᠢᠬᠤ ᠳᠤ᠂ ᠪᠢ ᠬᠠᠮᠢᠭᠠ ᠠᠴᠠ ᠶᠠᠭᠤᠮᠠ ᠣᠯᠵᠤ ᠴᠢᠮᠠ ᠳᠤ ᠲᠤᠰᠠᠯᠠᠬᠤ ᠪᠤᠢ︖ ᠦᠲᠦᠷᠮᠡ ᠡᠴᠡ ᠤᠤ︖ ᠡᠰᠡᠪᠡᠯ ᠦᠵᠦᠮ ᠦᠨ ᠰᠢᠬᠠᠭᠤᠷᠭᠠ ᠠᠴᠠ ᠤᠤ︖》 ᠭᠡᠵᠡᠢ᠃ 28 ᠬᠠᠭᠠᠨ ᠲᠡᠭᠦᠨ ᠳᠦ᠄ 《ᠴᠢᠮᠠ ᠳᠤ ᠶᠠᠮᠠᠷ ᠬᠡᠷᠡᠭ ᠲᠣᠬᠢᠶᠠᠯᠳᠤᠭᠰᠠᠨ ᠪᠤᠢ︖》 ᠭᠡᠬᠦ ᠳᠦ᠂ ᠲᠡᠷᠡ᠄ 《ᠡᠨᠡ ᠡᠮᠡᠭᠲᠡᠢ ᠨᠠᠳᠠ ᠳᠤ᠄ 〈ᠴᠢ ᠬᠦᠦ ᠪᠡᠨ ᠥᠭᠭᠥᠭᠡᠴᠢ᠃ ᠥᠨᠥᠳᠥᠷ ᠪᠢᠳᠡ ᠴᠢᠨᠦ ᠬᠦᠦ ᠶᠢ ᠢᠳᠡᠵᠦ᠂ ᠮᠠᠷᠭᠠᠰᠢ ᠮᠢᠨᠦ ᠬᠦᠦ ᠶᠢ ᠢᠳᠡᠵᠡᠭᠡᠶᠡ〉 ᠭᠡᠵᠦ ᠬᠡᠯᠡᠭᠰᠡᠨ ᠲᠤᠯᠠ 29 ᠪᠢᠳᠡ ᠮᠢᠨᠦ ᠬᠦᠦ ᠶᠢ ᠴᠢᠨᠠᠵᠤ ᠢᠳᠡᠭᠰᠡᠨ ᠶᠤᠮ᠃ ᠳᠠᠷᠠᠭᠠ ᠡᠳᠦᠷ ᠨᠢ ᠪᠢ ᠲᠡᠭᠦᠨ ᠳᠦ᠄ 〈ᠬᠦᠦ ᠪᠡᠨ ᠥᠭ᠃ ᠪᠢᠳᠡ ᠲᠡᠭᠦᠨ ᠢ ᠢᠳᠡᠵᠡᠭᠡᠶᠡ〉 ᠭᠡᠬᠦ ᠳᠦ᠂ ᠲᠡᠷᠡ ᠬᠦᠦ ᠪᠡᠨ ᠨᠢᠭᠤᠴᠢᠬᠠᠭᠰᠠᠨ》 ᠭᠡᠪᠡ᠃ 30 ᠬᠠᠭᠠᠨ ᠲᠡᠭᠦᠨ ᠦ ᠦᠭᠡ ᠶᠢ ᠰᠣᠨᠣᠰᠣᠭᠠᠳ᠂ ᠬᠤᠪᠴᠠᠰᠤ ᠪᠠᠨ ᠤᠷᠠᠵᠠᠢ᠃ ᠡᠢᠮᠦ ᠡᠴᠡ ᠲᠡᠭᠦᠨ ᠢ ᠬᠡᠷᠡᠮ ᠳᠡᠭᠡᠭᠦᠷ ᠥᠩᠭᠡᠷᠡᠵᠦ ᠪᠠᠢᠬᠤ ᠳᠤ᠂ ᠠᠷᠠᠳ ᠲᠦᠮᠡᠨ ᠲᠡᠭᠦᠨ ᠦ ᠪᠡᠶᠡ ᠳᠡᠭᠡᠨ ᠡᠮᠦᠰᠦᠭᠰᠡᠨ ᠲᠠᠭᠠᠷ ᠢ ᠬᠠᠷᠠᠪᠠ᠃ 31 ᠬᠠᠷᠢᠨ ᠲᠡᠷᠡ᠄ 《ᠱᠠᠹᠠᠲ ᠤᠨ ᠬᠦᠦ ᠡᠯᠢᠱᠠ ᠶᠢᠨ ᠲᠣᠯᠣᠭᠠᠢ ᠶᠢ ᠥᠨᠥᠳᠥᠷ ᠮᠥᠷᠥᠨ ᠳᠡᠭᠡᠷᠡ ᠨᠢ ᠦᠯᠡᠳᠡᠭᠡᠪᠡᠯ ᠪᠤᠷᠬᠠᠨ ᠨᠠᠮᠠᠶᠢ ᠬᠠᠲᠠᠭᠤ ᠰᠢᠳᠬᠡᠬᠦ ᠪᠣᠯᠲᠤᠭᠠᠢ︕》 ᠭᠡᠪᠡ᠃
32 ᠲᠡᠷᠡ ᠦᠶᠡ ᠳᠦ ᠡᠯᠢᠱᠠ ᠭᠡᠷ ᠲᠡᠭᠡᠨ ᠰᠠᠭᠤᠵᠤ ᠪᠠᠢᠯᠠ᠂ ᠠᠬᠠᠯᠠᠭᠴᠢᠳ ᠴᠤ ᠲᠡᠭᠦᠨ ᠲᠡᠢ ᠬᠠᠮᠲᠤ ᠰᠠᠭᠤᠵᠤ ᠪᠠᠢᠵᠠᠢ᠃ ᠬᠠᠭᠠᠨ ᠪᠠᠢᠭᠠ ᠭᠠᠵᠠᠷ ᠠᠴᠠ ᠪᠠᠨ ᠡᠯᠴᠢ ᠢᠯᠡᠭᠡᠭᠰᠡᠨ ᠪᠥᠭᠡᠳ ᠡᠯᠴᠢ ᠢᠷᠡᠬᠦ ᠡᠴᠡ ᠡᠮᠦᠨᠡ ᠡᠯᠢᠱᠠ ᠠᠬᠠᠯᠠᠭᠴᠢᠳ ᠲᠤ᠄ 《ᠥᠨᠥᠬᠢ ᠠᠯᠠᠭᠤᠷᠴᠢᠨ ᠤ ᠬᠦᠦ ᠮᠢᠨᠦ ᠲᠣᠯᠣᠭᠠᠢ ᠶᠢ ᠠᠪᠤᠭᠤᠯᠬᠤ ᠪᠠᠷ ᠬᠥᠮᠦᠨ ᠢᠯᠡᠭᠡᠭᠰᠡᠨ ᠢ ᠲᠠ ᠨᠠᠷ ᠮᠡᠳᠡᠵᠦ ᠪᠠᠢᠨᠠ ᠤᠤ︖ ᠬᠠᠷᠠ᠂ ᠲᠡᠷᠡ ᠡᠯᠴᠢ ᠢᠷᠡᠬᠦ ᠳᠦ ᠲᠠ ᠨᠠᠷ ᠬᠠᠭᠠᠯᠭᠠ ᠪᠠᠨ ᠬᠠᠭᠠᠵᠤ᠂ ᠲᠡᠭᠦᠨ ᠢ ᠬᠠᠭᠠᠯᠭᠠ ᠪᠠᠷ ᠣᠷᠣᠭᠤᠯᠬᠤ ᠦᠭᠡᠢ ᠪᠠᠢᠭᠠᠷᠠᠢ᠃ ᠲᠡᠭᠦᠨ ᠦ ᠠᠷᠤ ᠳᠤ ᠡᠵᠡᠨ ᠦ ᠬᠢᠨᠢ ᠬᠥᠯ ᠦᠨ ᠴᠢᠮᠡᠭᠡ ᠪᠠᠢᠭᠠ ᠪᠢᠰᠢ ᠤᠤ︖》 ᠭᠡᠪᠡ᠃ 33 ᠲᠡᠭᠦᠨ ᠢ ᠠᠬᠠᠯᠠᠭᠴᠢᠳ ᠲᠠᠢ ᠶᠠᠷᠢᠯᠴᠠᠵᠤ ᠪᠠᠢᠲᠠᠯᠠ ᠥᠨᠥᠬᠢ ᠡᠯᠴᠢ ᠲᠡᠭᠦᠨ ᠤᠷᠤᠭᠤ ᠢᠷᠡᠯᠡ︕ ᠬᠠᠭᠠᠨ᠄ 《ᠬᠠᠷᠠ᠂ ᠡᠨᠡ ᠭᠠᠢ ᠭᠠᠮᠰᠢᠭ ᠶᠣᠬᠣᠸᠠ ᠠᠴᠠ ᠢᠷᠡᠭᠰᠡᠨ︕ ᠪᠢ ᠶᠠᠭᠠᠬᠢᠨ ᠶᠣᠬᠣᠸᠠ ᠳᠤ ᠨᠠᠢᠳᠠᠭᠠᠳ ᠯᠠ ᠪᠠᠢᠵᠤ ᠪᠣᠯᠬᠤ ᠪᠢᠯᠡ︖》 ᠭᠡᠵᠡᠢ᠃