ᠬᠠᠭᠠᠳ ᠤᠨ ᠳᠡᠳ᠋ ᠳᠣᠯᠣᠭᠠ
1 ᠡᠯᠢᠱᠠ᠄ 《ᠶᠣᠬᠣᠸᠠ ᠶᠢᠨ ᠦᠭᠡ ᠶᠢ ᠰᠣᠨᠣᠰᠣᠭᠲᠤᠨ᠃ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠮᠠᠷᠭᠠᠰᠢ ᠶᠢᠨ ᠡᠳᠦᠢ ᠳᠦ ᠰᠠᠮᠠᠷᠢᠶᠠ ᠬᠣᠲᠠ ᠶᠢᠨ ᠬᠠᠭᠠᠯᠭᠠᠨ ᠳᠡᠭᠡᠷᠡ ᠨᠢᠭᠡ ᠰᠧᠶᠠ 13 ᠭᠤᠯᠢᠷ ᠢ ᠨᠢᠭᠡ ᠱᠧᠺᠧᠯ 14 ᠢᠶᠠᠷ᠂ ᠬᠣᠶᠠᠷ ᠰᠧᠶᠠ 15 ᠠᠷᠪᠠᠢ ᠶᠢ ᠨᠢᠭᠡ ᠱᠧᠺᠧᠯ ᠢᠶᠠᠷ ᠬᠤᠳᠠᠯᠳᠤᠬᠤ ᠪᠣᠯᠣᠨᠠ〉》 ᠭᠡᠪᠡ᠃ 2 ᠬᠠᠷᠢᠨ ᠬᠠᠭᠠᠨ ᠤ ᠭᠠᠷ ᠢ ᠲᠦᠰᠢᠳᠡᠭ ᠲᠦᠰᠢᠮᠡᠯ ᠪᠤᠷᠬᠠᠨ ᠤ ᠬᠥᠮᠦᠨ ᠳᠦ᠄ 《ᠬᠠᠷᠠ᠂ ᠶᠣᠬᠣᠸᠠ ᠲᠩᠷᠢ ᠶᠢᠨ ᠴᠣᠩ᠋ᠬᠣ ᠨᠤᠭᠤᠳ ᠢ ᠨᠡᠭᠡᠭᠡᠭᠰᠡᠨ ᠴᠤ ᠡᠢᠮᠦ ᠶᠠᠪᠤᠳᠠᠯ ᠪᠣᠯᠣᠨᠠ ᠭᠡᠵᠢ ᠤᠤ︖》 ᠭᠡᠵᠦ ᠬᠠᠷᠢᠭᠤᠯᠬᠤ ᠳᠤ᠂ ᠡᠯᠢᠱᠠ᠄ 《ᠬᠠᠷᠠ᠂ ᠲᠠ ᠲᠡᠭᠦᠨ ᠢ ᠨᠢᠳᠦ ᠪᠡᠷ ᠢᠶᠠᠨ ᠦᠵᠡᠬᠦ ᠪᠣᠯᠪᠠᠴᠤ ᠣᠯᠵᠤ ᠢᠳᠡᠬᠦ ᠦᠭᠡᠢ》 ᠭᠡᠵᠦ ᠬᠡᠯᠡᠪᠡ᠃
ᠭᠠᠢᠬᠠᠮᠰᠢᠭᠲᠠᠢ ᠴᠢᠯᠥᠭᠡᠯᠡᠯᠲᠡ
3 ᠬᠣᠲᠠ ᠶᠢᠨ ᠬᠠᠭᠠᠯᠭᠠᠨ ᠤ ᠲᠡᠨᠳᠡ ᠤᠶᠠᠮᠠᠨ ᠡᠪᠡᠳᠴᠢᠨ ᠲᠡᠢ ᠳᠥᠷᠪᠡᠨ ᠬᠥᠮᠦᠨ ᠪᠠᠢᠵᠠᠢ᠃ ᠲᠡᠳᠡ ᠨᠢᠭᠡ ᠨᠢᠭᠡᠨ ᠳᠡᠭᠡᠨ᠄ 《ᠪᠢᠳᠡ ᠶᠠᠭᠤᠨ ᠳᠤ ᠡ᠊ᠨᠳᠡ ᠦᠬᠦᠬᠦ ᠪᠡᠨ ᠬᠦᠯᠢᠶᠡᠵᠦ ᠰᠠᠭᠤᠬᠤ ᠪᠤᠢ︖ 4 ᠪᠢᠳᠡ ᠬᠣᠲᠠ ᠳᠤ ᠣᠷᠣᠶᠠ ᠭᠡᠰᠡᠨ ᠴᠤ ᠲᠡᠨᠳᠡ ᠥᠯᠥᠰᠬᠥᠯᠡᠩ ᠪᠣᠯᠣᠭᠰᠠᠨ ᠲᠤᠯᠠ ᠦᠬᠦᠬᠦ ᠯᠠ ᠪᠣᠯᠣᠨᠠ᠂ ᠡ᠊ᠨᠳᠡ ᠪᠡᠨ ᠰᠠᠭᠤᠵᠤ ᠪᠠᠢᠭᠰᠠᠨ ᠴᠤ ᠮᠥᠨ ᠦᠬᠦᠨᠡ᠃ ᠬᠠᠷᠢᠨ ᠪᠢᠳᠡ ᠠᠷᠠᠮᠴᠤᠳ ᠤᠨ ᠬᠤᠸᠠᠷᠠᠨ ᠤᠷᠤᠭᠤ ᠣᠴᠢᠵᠤ ᠲᠡᠳᠡᠨ ᠳᠦ ᠪᠠᠭᠤᠵᠤ ᠥᠭᠭᠥᠶᠡ᠃ ᠬᠡᠷᠪᠡ ᠲᠡᠳᠡ ᠪᠢᠳᠡᠨ ᠦ ᠠᠮᠢ ᠶᠢ ᠥᠷᠥᠰᠢᠶᠡᠪᠡᠯ ᠪᠢᠳᠡ ᠠᠮᠢᠳᠤᠷᠠᠬᠤ ᠪᠣᠯᠣᠨᠠ᠂ ᠠᠯᠠᠪᠠᠯ ᠪᠢᠳᠡ ᠦᠬᠦᠬᠦ ᠯᠠ ᠬᠡᠷᠡᠭ》 ᠭᠡᠯᠴᠡᠪᠡ᠃ 5 ᠲᠡᠳᠡ ᠦᠳᠡᠰᠢ ᠶᠢᠨ ᠪᠦᠷᠦᠢ ᠪᠠᠷ ᠪᠣᠰᠣᠭᠠᠳ ᠠᠷᠠᠮᠴᠤᠳ ᠤᠨ ᠬᠤᠸᠠᠷᠠᠨ ᠤᠷᠤᠭᠤ ᠣᠴᠢᠪᠠ᠃ ᠲᠡᠳᠡ ᠠᠷᠠᠮᠴᠤᠳ ᠤᠨ ᠬᠤᠸᠠᠷᠠᠨ ᠤ ᠵᠠᠬᠠ ᠳᠤ ᠬᠦᠷᠦᠭᠡᠳ ᠦᠵᠡᠬᠦ ᠳᠦ᠂ ᠲᠡᠨᠳᠡ ᠭᠠᠭᠴᠠ ᠴᠤ ᠬᠥᠮᠦᠨ ᠪᠠᠢᠭᠰᠠᠨ ᠦᠭᠡᠢ᠃ 6 ᠤᠤᠯ ᠨᠢ ᠡᠵᠡᠨ ᠠᠷᠠᠮᠴᠤᠳ ᠲᠤ ᠲᠡᠷᠭᠡ ᠮᠣᠷᠢᠳ ᠤᠨ ᠳᠠᠭᠤ ᠴᠢᠮᠡᠭᠡ ᠪᠣᠯᠣᠨ ᠶᠡᠬᠡ ᠴᠡᠷᠢᠭ ᠤᠨ ᠳᠠᠭᠤ ᠴᠢᠮᠡᠭᠡ ᠶᠢ ᠰᠣᠨᠣᠰᠬᠠᠭᠰᠠᠨ ᠲᠤᠯᠠ ᠲᠡᠳᠡ ᠨᠢᠭᠡ ᠨᠢᠭᠡᠨ ᠳᠡᠭᠡᠨ᠄ 《ᠬᠠᠷᠠ᠂ ᠢᠰᠷᠧᠯ ᠤᠨ ᠬᠠᠭᠠᠨ ᠪᠢᠳᠡᠨ ᠢ ᠳᠠᠭᠠᠷᠢᠬᠤ ᠪᠠᠷ ᠾᠢᠲ᠋ᠴᠦᠳ ᠦᠨ ᠬᠠᠭᠠᠳ ᠪᠣᠯᠣᠨ ᠶᠧᠵᠢᠫᠲ᠋ᠴᠦᠳ ᠦᠨ ᠬᠠᠭᠠᠳ ᠢ ᠬᠥᠯᠥᠰᠥᠯᠡᠭᠰᠡᠨ ᠪᠠᠢᠨᠠ》 ᠭᠡᠵᠡᠭᠡᠨ 7 ᠦᠳᠡᠰᠢ ᠶᠢᠨ ᠪᠦᠷᠦᠢ ᠪᠠᠷ ᠪᠣᠰᠴᠤ ᠵᠢᠭᠤᠲᠠᠭᠰᠠᠨ ᠠᠵᠢ᠃ ᠲᠡᠳᠡ ᠥᠪᠡᠷᠰᠡᠳ ᠦᠨ ᠢᠶᠠᠨ ᠮᠠᠢᠬᠠᠨ᠂ ᠮᠣᠷᠢ᠂ ᠡᠯᠵᠢᠭᠡ ᠶᠢ ᠬᠠᠶᠠᠵᠤ᠂ ᠬᠤᠸᠠᠷᠠᠨ ᠢᠶᠠᠨ ᠪᠠᠢᠭᠰᠠᠨ ᠴᠢᠭ ᠢᠶᠠᠷ ᠨᠢ ᠣᠷᠬᠢᠭᠠᠳ ᠠᠮᠢ ᠵᠤᠯᠪᠠᠬᠤ ᠪᠠᠷ ᠵᠢᠭᠤᠲᠠᠭᠰᠠᠨ ᠪᠠᠢᠯᠠ᠃ 8 ᠡᠳᠡᠭᠡᠷ ᠤᠶᠠᠮᠠᠨ ᠡᠪᠡᠳᠴᠢᠲᠡᠨ ᠬᠤᠸᠠᠷᠠᠨ ᠤ ᠵᠠᠬᠠ ᠳᠤ ᠬᠦᠷᠦᠭᠡᠳ ᠨᠢᠭᠡ ᠮᠠᠢᠬᠠᠨ ᠳᠤ ᠣᠷᠣᠵᠤ᠂ ᠢᠳᠡᠵᠦ ᠤᠤᠭᠤᠭᠠᠳ ᠲᠡᠨᠳᠡ ᠡᠴᠡ ᠠᠯᠲᠠ᠂ ᠮᠥᠩᠭᠥ᠂ ᠬᠤᠪᠴᠠᠰᠤ ᠠᠪᠴᠤ ᠶᠠᠪᠤᠭᠠᠳ ᠨᠢᠭᠤᠵᠠᠢ᠃ ᠲᠡᠳᠡ ᠪᠤᠴᠠᠵᠤ ᠢᠷᠡᠭᠡᠳ ᠥᠭᠡᠷᠡ ᠨᠢᠭᠡᠨ ᠮᠠᠢᠬᠠᠨ ᠳᠤ ᠣᠷᠣᠵᠤ᠂ ᠲᠡᠨᠳᠡ ᠡᠴᠡ ᠶᠠᠭᠤᠮᠠ ᠠᠪᠴᠤ ᠶᠠᠪᠤᠭᠠᠳ ᠨᠢᠭᠤᠵᠠᠢ᠃
9 ᠳᠠᠷᠠᠭᠠ ᠨᠢ ᠲᠡᠳᠡ ᠪᠡᠶᠡ ᠪᠡᠶᠡᠨ ᠳᠡᠭᠡᠨ᠄ 《ᠪᠢᠳᠡᠨ ᠦ ᠢᠩᠭᠢᠵᠦ ᠪᠠᠢᠬᠤ ᠨᠢ ᠵᠥᠪ ᠪᠢᠰᠢ᠃ ᠥᠨᠥᠳᠥᠷ ᠪᠣᠯ ᠪᠠᠶᠠᠷ ᠤᠨ ᠴᠢᠮᠡᠭᠡᠨ ᠦ ᠡᠳᠦᠷ ᠪᠠᠢᠲᠠᠯᠠ ᠪᠢᠳᠡ ᠳᠠᠭᠤ ᠪᠠᠨ ᠬᠤᠷᠢᠶᠠᠵᠤ ᠪᠠᠢᠨᠠ᠃ ᠬᠡᠷᠪᠡ ᠥᠷᠯᠥᠭᠡᠨ ᠦ ᠭᠡᠭᠡ ᠲᠤᠰᠲᠠᠯᠠ ᠡ᠊ᠨᠳᠡ ᠪᠡᠨ ᠪᠠᠢᠵᠤ ᠪᠠᠢᠪᠠᠯ ᠪᠢᠳᠡᠨ ᠳᠡᠭᠡᠷᠡ ᠰᠢᠳᠬᠡᠯ ᠪᠠᠭᠤᠬᠤ ᠪᠣᠯᠣᠨᠠ᠃ ᠵᠠ ᠣᠳᠣ ᠶᠠᠪᠤᠵᠤ᠂ ᠬᠠᠭᠠᠨ ᠤ ᠣᠷᠳᠣᠨ ᠤ ᠬᠢᠨ ᠳᠤ ᠮᠡᠳᠡᠭᠦᠯᠦᠶᠡ》 ᠭᠡᠵᠡᠭᠡᠨ 10 ᠲᠡᠨᠳᠡ ᠡᠴᠡ ᠣᠳᠴᠠᠢ᠃ ᠲᠡᠳᠡ ᠬᠠᠭᠠᠯᠭᠠ ᠰᠠᠬᠢᠭᠴᠢᠳ ᠢ ᠳᠠᠭᠤᠳᠠᠨ᠂ ᠲᠡᠳᠡᠨ ᠳᠦ᠄ 《ᠪᠢᠳᠡ ᠠᠷᠠᠮᠴᠤᠳ ᠤᠨ ᠬᠤᠸᠠᠷᠠᠨ ᠳᠤ ᠣᠴᠢᠵᠤ ᠦᠵᠡᠬᠦ ᠳᠦ᠂ ᠲᠡᠨᠳᠡ ᠭᠠᠭᠴᠠ ᠴᠤ ᠬᠥᠮᠦᠨ ᠠᠯᠠᠭᠠ᠂ ᠬᠥᠮᠦᠨ ᠦ ᠳᠠᠭᠤ ᠴᠤ ᠠᠯᠠᠭᠠ᠂ ᠵᠥᠪᠬᠡᠨ ᠡᠯᠵᠢᠭᠡ ᠮᠣᠷᠢᠳ ᠨᠢ ᠤᠶᠠᠭᠠ ᠲᠠᠢ᠂ ᠮᠠᠢᠬᠠᠨ ᠨᠤᠭᠤᠳ ᠨᠢ ᠴᠤ ᠪᠠᠢᠭᠰᠠᠨ ᠢᠶᠠᠷ ᠢᠶᠠᠨ ᠪᠠᠢᠪᠠ》 ᠭᠡᠵᠦ ᠮᠡᠳᠡᠭᠦᠯᠪᠡ᠃ 11 ᠬᠠᠭᠠᠯᠭᠠ ᠰᠠᠬᠢᠭᠴᠢᠳ ᠥᠨᠳᠥᠷ ᠳᠠᠭᠤ ᠪᠠᠷ ᠲᠡᠷᠡ ᠮᠡᠳᠡᠭᠡ ᠶᠢ ᠬᠠᠭᠠᠨ ᠤ ᠣᠷᠳᠣᠨ ᠤ ᠬᠢᠨ ᠳᠤ ᠮᠡᠳᠡᠭᠦᠯᠵᠡᠢ᠃ 12 ᠬᠠᠭᠠᠨ ᠰᠥᠨᠢ ᠪᠠᠷ ᠪᠣᠰᠣᠭᠠᠳ᠂ ᠲᠦᠰᠢᠮᠡᠳ ᠲᠡᠭᠡᠨ᠄ 《ᠠᠷᠠᠮᠴᠤᠳ ᠶᠠᠭᠤ ᠲᠥᠯᠥᠪᠯᠡᠭᠰᠡᠨ ᠢ ᠪᠢ ᠲᠠ ᠨᠠᠷ ᠲᠤ ᠬᠡᠯᠡᠵᠦ ᠥᠭᠭᠥᠶᠡ᠃ ᠲᠡᠳᠡ ᠪᠢᠳᠡᠨ ᠦ ᠥᠯᠥᠰᠴᠦ ᠪᠠᠢᠭᠠ ᠶᠢ ᠮᠡᠳᠡᠭᠡᠳ ᠪᠢᠳᠡᠨ ᠢ ᠬᠣᠲᠠ ᠠᠴᠠ ᠭᠠᠷᠬᠤ ᠳᠤ ᠠᠮᠢᠳᠤ ᠪᠠᠷ ᠣᠯᠵᠠᠯᠠᠭᠰᠠᠨ ᠤ ᠳᠠᠷᠠᠭᠠ ᠬᠣᠲᠠ ᠤᠷᠤᠭᠤ ᠣᠷᠣᠬᠤ ᠭᠡᠳ ᠬᠤᠸᠠᠷᠠᠨ ᠢᠶᠠᠨ ᠣᠷᠬᠢᠵᠤ᠂ ᠬᠡᠭᠡᠷᠡ ᠲᠠᠯᠠ ᠳᠤ ᠨᠢᠭᠤᠭᠳᠠᠭᠰᠠᠨ ᠪᠠᠢᠬᠠ》 ᠭᠡᠵᠦ ᠬᠡᠯᠡᠵᠡᠢ᠃ 13 ᠲᠦᠰᠢᠮᠡᠳ ᠦᠨ ᠬᠢᠨᠢ ᠨᠢᠭᠡ ᠨᠢ᠄ 《ᠡ᠊ᠨᠳᠡ ᠦᠯᠡᠳᠡᠭᠰᠡᠳ ᠦᠨ ᠲᠡᠭᠦᠰᠬᠡᠯ ᠴᠤ ᠲᠠᠯᠢᠢᠭᠴᠢᠳ ᠤᠨ ᠬᠢ ᠲᠠᠢ ᠠᠳᠠᠯᠢ ᠪᠣᠯᠣᠨᠠ᠃ ᠪᠢᠳᠡ ᠬᠥᠮᠦᠨ ᠶᠠᠪᠤᠭᠤᠯᠤᠨ ᠶᠠᠭᠤ ᠲᠣᠬᠢᠶᠠᠯᠳᠤᠭᠰᠠᠨ ᠢ ᠮᠡᠳᠡᠵᠦ ᠠᠪᠤᠶᠠ᠂ ᠲᠡᠳᠡ ᠬᠣᠲᠠ ᠳᠤ ᠦᠯᠡᠳᠡᠭᠰᠡᠨ ᠲᠠᠪᠤᠨ ᠮᠣᠷᠢ ᠶᠢ ᠠᠪᠤᠭᠠᠳ ᠶᠠᠪᠤᠭ》 ᠭᠡᠰᠡᠨ ᠳᠦ᠂ 14 ᠲᠡᠳᠡ ᠬᠣᠶᠠᠷ ᠮᠣᠷᠢᠨ ᠲᠡᠷᠭᠡ ᠰᠢᠯᠢᠵᠦ ᠠᠪᠤᠪᠠ᠂ ᠬᠠᠭᠠᠨ᠄ 《ᠶᠠᠪᠤᠵᠤ᠂ ᠶᠠᠭᠤ ᠲᠣᠬᠢᠶᠠᠯᠳᠤᠭᠰᠠᠨ ᠢ ᠮᠡᠳᠡᠵᠦ ᠠᠪ》 ᠭᠡᠳ ᠲᠡᠳᠡᠨ ᠢ ᠠᠷᠠᠮᠴᠤᠳ ᠤᠨ ᠴᠡᠷᠢᠭ ᠤᠨ ᠠᠷᠤ ᠠᠴᠠ ᠢᠯᠡᠭᠡᠵᠡᠢ᠃ 15 ᠲᠡᠳᠡ ᠠᠷᠤ ᠠᠴᠠ ᠨᠢ ᠶᠣᠷᠳᠠᠨ ᠬᠦᠷᠲᠡᠯᠡ ᠶᠠᠪᠤᠭᠰᠠᠨ ᠪᠥᠭᠡᠳ ᠵᠠᠮ ᠤᠨ ᠲᠤᠷᠰᠢ ᠠᠷᠠᠮᠴᠤᠳ ᠤᠨ ᠶᠠᠭᠠᠷᠠᠬᠤ ᠳᠠᠭᠠᠨ ᠬᠠᠶᠠᠭᠰᠠᠨ ᠬᠤᠪᠴᠠᠰᠤ ᠪᠠ ᠬᠡᠷᠡᠭᠰᠡᠯ ᠬᠦᠭᠯᠡᠷᠡᠭᠰᠡᠨ ᠪᠠᠢᠬᠤ ᠶᠢ ᠬᠠᠷᠠᠪᠠ᠃ ᠡᠯᠴᠢᠳ ᠪᠤᠴᠠᠵᠤ ᠢᠷᠡᠭᠡᠳ ᠬᠠᠭᠠᠨ ᠳᠤ ᠠᠢᠯᠠᠳᠬᠠᠪᠠ᠃
16 ᠢᠩᠭᠢᠭᠡᠳ ᠠᠷᠠᠳ ᠲᠦᠮᠡᠨ ᠶᠠᠪᠤᠵᠤ ᠠᠷᠠᠮᠴᠤᠳ ᠤᠨ ᠬᠤᠸᠠᠷᠠᠨ ᠢ ᠲᠣᠨᠣᠭᠰᠠᠭᠠᠷ ᠪᠠᠢᠭᠰᠠᠨ ᠳᠤ᠂ ᠨᠢᠭᠡ ᠰᠧᠶᠠ ᠭᠤᠯᠢᠷ ᠨᠢ ᠨᠢᠭᠡ ᠱᠧᠺᠧᠯ᠂ ᠬᠣᠶᠠᠷ ᠰᠧᠶᠠ ᠠᠷᠪᠠᠢ ᠨᠢ ᠨᠢᠭᠡ ᠱᠧᠺᠧᠯ ᠪᠣᠯᠣᠭᠰᠠᠨ ᠪᠠ ᠡᠨᠡ ᠨᠢ ᠶᠣᠬᠣᠸᠠ ᠶᠢᠨ ᠦᠭᠡ ᠶᠢᠨ ᠶᠣᠰᠣᠭᠠᠷ ᠪᠣᠯᠵᠠᠢ᠃ 17 ᠬᠠᠭᠠᠨ ᠭᠠᠷ ᠢ ᠨᠢ ᠲᠦᠰᠢᠳᠡᠭ ᠲᠦᠰᠢᠮᠡᠯ ᠢᠶᠡᠨ ᠬᠣᠲᠠ ᠶᠢᠨ ᠬᠠᠭᠠᠯᠭᠠ ᠶᠢ ᠬᠠᠷᠢᠭᠤᠴᠠᠭᠤᠯᠬᠤ ᠪᠠᠷ ᠲᠣᠮᠢᠯᠠᠭᠰᠠᠨ ᠪᠣᠯᠪᠠᠴᠤ ᠲᠡᠷᠡ ᠪᠡᠷ ᠬᠠᠭᠠᠯᠭᠠᠨ ᠤ ᠡᠮᠦᠨᠡ ᠠᠷᠠᠳ ᠣᠯᠠᠨ ᠳᠤ ᠭᠢᠰᠬᠢᠭᠳᠡᠵᠦ ᠦᠬᠦᠭᠰᠡᠨ ᠨᠢ ᠪᠤᠷᠬᠠᠨ ᠤ ᠬᠥᠮᠦᠨ ᠦ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠪᠣᠯᠵᠠᠢ᠃ ᠬᠠᠭᠠᠨ ᠪᠤᠷᠬᠠᠨ ᠤ ᠬᠥᠮᠦᠨ ᠤᠷᠤᠭᠤ ᠢᠷᠡᠬᠦ ᠳᠦ᠂ 18 ᠲᠡᠷᠡ ᠪᠡᠷ ᠬᠠᠭᠠᠨ ᠳᠤ᠄ 《ᠮᠠᠷᠭᠠᠰᠢ ᠶᠢᠨ ᠡᠳᠦᠢ ᠳᠦ ᠰᠠᠮᠠᠷᠢᠶᠠ ᠬᠣᠲᠠ ᠶᠢᠨ ᠬᠠᠭᠠᠯᠭᠠᠨ ᠳᠡᠭᠡᠷᠡ ᠨᠢᠭᠡ ᠰᠧᠶᠠ ᠭᠤᠯᠢᠷ ᠢ ᠨᠢᠭᠡ ᠱᠧᠺᠧᠯ ᠢᠶᠠᠷ᠂ ᠬᠣᠶᠠᠷ ᠰᠧᠶᠠ ᠠᠷᠪᠠᠢ ᠶᠢ ᠨᠢᠭᠡ ᠱᠧᠺᠧᠯ ᠢᠶᠠᠷ ᠬᠤᠳᠠᠯᠳᠤᠬᠤ ᠪᠣᠯᠣᠨᠠ》 ᠭᠡᠵᠦ ᠬᠡᠯᠡᠭᠰᠡᠨ ᠠᠵᠢ᠃ 19 ᠲᠡᠷᠡ ᠦᠶᠡ ᠳᠦ ᠬᠠᠭᠠᠨ ᠤ ᠲᠦᠰᠢᠮᠡᠯ ᠪᠤᠷᠬᠠᠨ ᠤ ᠬᠥᠮᠦᠨ ᠳᠦ ᠬᠠᠷᠢᠭᠤᠯᠤᠨ᠄ 《ᠬᠠᠷᠠ᠂ ᠶᠣᠬᠣᠸᠠ ᠲᠩᠷᠢ ᠶᠢᠨ ᠴᠣᠩ᠋ᠬᠣ ᠨᠤᠭᠤᠳ ᠢ ᠨᠡᠭᠡᠭᠡᠭᠰᠡᠨ ᠴᠤ ᠡᠢᠮᠦ ᠶᠠᠪᠤᠳᠠᠯ ᠪᠣᠯᠣᠨᠠ ᠭᠡᠵᠢ ᠤᠤ︖》 ᠭᠡᠬᠦ ᠳᠦ᠂ 《ᠬᠠᠷᠠ᠂ ᠲᠠ ᠲᠡᠭᠦᠨ ᠢ ᠨᠢᠳᠦ ᠪᠡᠷ ᠢᠶᠠᠨ ᠦᠵᠡᠬᠦ ᠪᠣᠯᠪᠠᠴᠤ ᠣᠯᠵᠤ ᠢᠳᠡᠬᠦ ᠦᠭᠡᠢ》 ᠭᠡᠵᠦ ᠡᠯᠢᠱᠠ ᠶᠢᠨ ᠬᠡᠯᠡᠭᠰᠡᠨ ᠨᠢ 20 ᠲᠡᠷᠡ ᠲᠦᠰᠢᠮᠡᠯ ᠳᠡᠭᠡᠷᠡ ᠪᠡᠶᠡᠯᠡᠭᠳᠡᠵᠡᠢ᠃ ᠲᠡᠷᠡ ᠪᠡᠷ ᠬᠠᠭᠠᠯᠭᠠᠨ ᠤ ᠡᠮᠦᠨᠡ ᠠᠷᠠᠳ ᠣᠯᠠᠨ ᠳᠤ ᠭᠢᠰᠬᠢᠭᠳᠡᠵᠦ ᠦᠬᠦᠭᠰᠡᠨ ᠠᠵᠢ᠃