ᠬᠠᠭᠠᠳ ᠤᠨ ᠳᠡᠳ᠋ ᠠᠷᠪᠠ
ᠠᠬᠠᠪ ᠤᠨ ᠭᠡᠷ ᠮᠥᠬᠥᠪᠡ
1 ᠠᠬᠠᠪ ᠤᠨ ᠳᠠᠯᠠᠨ ᠬᠦᠦ ᠰᠠᠮᠠᠷᠢᠶᠠ ᠳᠤ ᠪᠠᠢᠪᠠ᠃ ᠶᠧᠾᠦ᠋ ᠵᠠᠬᠢᠳᠠᠯ ᠪᠢᠴᠢᠵᠦ᠂ ᠰᠠᠮᠠᠷᠢᠶᠠ ᠳᠠᠬᠢ ᠶᠧᠽᠷᠧᠯ ᠤᠨ ᠨᠣᠶᠠᠳ ᠪᠣᠯᠣᠨ ᠠᠬᠠᠯᠠᠭᠴᠢᠳ᠂ ᠮᠥᠨ ᠠᠬᠠᠪ ᠤᠨ ᠬᠡᠦᠬᠡᠳ ᠤᠳ ᠤᠨ ᠬᠠᠷᠠᠭᠠᠯᠵᠠᠭᠴᠢᠳ ᠤᠷᠤᠭᠤ ᠢᠯᠡᠭᠡᠨ᠄ 2 《ᠲᠠ ᠨᠠᠷ ᠲᠤ ᠡᠵᠡᠨ ᠦ ᠪᠠᠨ ᠬᠥᠪᠡᠭᠦᠳ ᠡᠴᠡ ᠭᠠᠳᠠᠨᠠ ᠲᠡᠷᠭᠡ᠂ ᠮᠣᠷᠢᠳ᠂ ᠪᠡᠬᠢᠯᠡᠯᠲᠡᠲᠦ ᠬᠣᠲᠠ ᠪᠣᠯᠣᠨ ᠵᠡᠷ ᠵᠡᠪᠰᠡᠭ ᠴᠤ ᠪᠠᠢᠭᠠ᠂ ᠣᠳᠣ ᠡᠨᠡ ᠵᠠᠬᠢᠳᠠᠯ ᠢ ᠣᠯᠣᠩ᠋ᠭᠤᠲᠠ 3 ᠲᠠ ᠨᠠᠷ ᠡᠵᠡᠨ ᠦ ᠪᠠᠨ ᠬᠥᠪᠡᠭᠦᠳ ᠡᠴᠡ ᠬᠠᠮᠤᠭ ᠤᠨ ᠰᠠᠢᠨ᠂ ᠬᠠᠮᠤᠭ ᠤᠨ ᠵᠣᠬᠢᠰᠲᠠᠢ ᠶᠢ ᠰᠣᠩ᠋ᠭᠣᠵᠤ᠂ ᠡᠴᠢᠭᠡ ᠶᠢᠨ ᠬᠢᠨᠢ ᠬᠠᠭᠠᠨ ᠰᠢᠷᠡᠭᠡᠨ ᠳᠦ ᠰᠠᠭᠤᠯᠭᠠᠨ᠂ ᠡᠵᠡᠨ ᠦ ᠪᠠᠨ ᠭᠡᠷ ᠦᠨ ᠲᠥᠯᠥᠭᠡ ᠲᠡᠮᠡᠴᠡᠭᠲᠦᠨ》 ᠭᠡᠵᠡᠢ᠃ 4 ᠬᠠᠷᠢᠨ ᠲᠡᠳᠡ ᠠᠰᠤᠷᠤ ᠶᠡᠬᠡ ᠠᠢᠳᠠᠰ ᠲᠤ ᠠᠪᠲᠠᠵᠤ᠄ 《ᠬᠠᠷᠠ᠂ ᠬᠣᠶᠠᠷ ᠬᠠᠭᠠᠨ ᠬᠦᠷᠲᠡᠯᠡ ᠲᠡᠭᠦᠨ ᠦ ᠡᠮᠦᠨᠡ ᠵᠣᠭᠰᠣᠵᠤ ᠴᠢᠳᠠᠭᠠ ᠦᠭᠡᠢ ᠪᠠᠢᠬᠤ ᠳᠤ᠂ ᠪᠢᠳᠡ ᠬᠡᠷᠬᠢᠨ ᠵᠣᠭᠰᠣᠵᠤ ᠴᠢᠳᠠᠬᠤ ᠪᠤᠢ︖》 ᠭᠡᠵᠡᠭᠡᠨ᠂ 5 ᠣᠷᠳᠣᠨ ᠤ ᠳᠠᠭᠠᠭᠠᠮᠠᠯ᠂ ᠬᠣᠲᠠ ᠶᠢᠨ ᠵᠠᠬᠢᠷᠤᠭᠴᠢ᠂ ᠠᠬᠠᠯᠠᠭᠴᠢᠳ ᠪᠣᠯᠣᠨ ᠬᠠᠷᠠᠭᠠᠯᠵᠠᠭᠴᠢᠳ ᠪᠦᠭᠦᠳᠡᠭᠡᠷ ᠶᠧᠾᠦ᠋ ᠳᠤ ᠬᠡᠯᠡ ᠢᠯᠡᠭᠡᠵᠦ᠄ 《ᠪᠢᠳᠡ ᠪᠣᠯ ᠲᠠᠨ ᠤ ᠵᠠᠷᠤᠴᠠ ᠪᠢᠯᠡ᠃ ᠪᠢᠳᠡᠨ ᠳᠦ ᠬᠡᠯᠡᠬᠦ ᠪᠦᠭᠦᠳᠡ ᠶᠢ ᠲᠠᠨᠢ ᠪᠢᠳᠡ ᠭᠦᠢᠴᠡᠳᠬᠡᠨᠡ᠃ ᠪᠢᠳᠡ ᠶᠠᠮᠠᠷ ᠴᠤ ᠬᠥᠮᠦᠨ ᠢ ᠬᠠᠭᠠᠨ ᠢᠶᠠᠷ ᠡᠷᠭᠦᠮᠵᠢᠯᠡᠬᠦ ᠦᠭᠡᠢ᠂ ᠲᠠ ᠥᠪᠡᠷ ᠦᠨ ᠢᠶᠠᠨ ᠲᠠᠭᠠᠯᠠᠯ ᠳᠤ ᠨᠡᠢᠴᠡᠭᠰᠡᠨ ᠵᠦᠢᠯ ᠢ ᠦᠢᠯᠡᠳᠦᠭᠡᠴᠢ》 ᠭᠡᠪᠡ᠃ 6 ᠶᠧᠾᠦ᠋ ᠬᠣᠶᠠᠳᠠᠬᠢ ᠤᠳᠠᠭᠠ ᠪᠠᠨ ᠲᠡᠳᠡᠨ ᠳᠦ ᠵᠠᠬᠢᠳᠠᠯ ᠪᠢᠴᠢᠵᠦ᠄ 《ᠬᠡᠷᠪᠡ ᠲᠠ ᠨᠠᠷ ᠮᠢᠨᠦ ᠲᠠᠯᠠ ᠳᠤ ᠣᠷᠣᠵᠤ ᠮᠢᠨᠦᠬᠢ ᠶᠢ ᠳᠠᠭᠠᠶᠠ ᠭᠡᠪᠡᠯ᠂ ᠡᠵᠡᠨ ᠦ ᠪᠠᠨ ᠬᠥᠪᠡᠭᠦᠳ ᠦᠨ ᠲᠣᠯᠣᠭᠠᠢ ᠶᠢ ᠠᠪᠴᠤ᠂ ᠮᠠᠷᠭᠠᠰᠢ ᠶᠢᠨ ᠡᠳᠦᠢ ᠳᠦ ᠶᠧᠽᠷᠧᠯ ᠳᠤ ᠨᠠᠳᠠ ᠤᠷᠤᠭᠤ ᠢᠷᠡᠭᠲᠦᠨ》 ᠭᠡᠵᠡᠢ᠃ ᠲᠡᠷᠡ ᠦᠶᠡ ᠳᠦ ᠬᠣᠲᠠ ᠶᠢᠨ ᠤᠳᠤᠷᠢᠳᠤᠭᠴᠢ ᠬᠥᠮᠦᠰ ᠳᠠᠯᠠᠨ ᠬᠠᠨ ᠬᠦᠦ ᠶᠢ ᠬᠠᠷᠭᠠᠯᠵᠠᠵᠤ ᠪᠠᠢᠭᠰᠠᠨ ᠪᠣᠯᠪᠠᠴᠤ 7 ᠵᠠᠬᠢᠳᠠᠯ ᠢᠷᠡᠩᠭᠦᠲᠡ ᠳᠠᠯᠠᠨ ᠬᠠᠨ ᠬᠦᠦ ᠶᠢ ᠪᠠᠷᠢᠵᠤ ᠠᠯᠠᠭᠠᠳ ᠲᠣᠯᠣᠭᠠᠢ ᠨᠤᠭᠤᠳ ᠢ ᠨᠢ ᠰᠠᠭᠰᠤᠨ ᠳᠤ ᠬᠢᠵᠦ᠂ ᠶᠧᠽᠷᠧᠯ ᠳᠤ ᠪᠤᠢ ᠶᠧᠾᠦ᠋ ᠤᠷᠤᠭᠤ ᠢᠯᠡᠭᠡᠵᠡᠢ᠃ 8 ᠡᠯᠴᠢ ᠢᠷᠡᠭᠡᠳ᠂ ᠶᠧᠾᠦ᠋ ᠳᠤ᠄ 《ᠲᠡᠳᠡ ᠬᠠᠨ ᠬᠥᠪᠡᠭᠦᠳ ᠦᠨ ᠲᠣᠯᠣᠭᠠᠢ ᠶᠢ ᠠᠪᠴᠢᠷᠠᠯᠠ》 ᠭᠡᠵᠦ ᠳᠤᠭᠤᠯᠭᠠᠬᠤ ᠳᠤ᠂ ᠶᠧᠾᠦ᠋᠄ 《ᠥᠷᠯᠥᠭᠡ ᠪᠣᠯᠲᠠᠯᠠ ᠲᠡᠳᠡᠭᠡᠷ ᠢ ᠬᠣᠲᠠ ᠶᠢᠨ ᠬᠠᠭᠠᠯᠭᠠᠨ ᠤ ᠡᠮᠦᠨᠡ ᠬᠣᠶᠠᠷ ᠬᠡᠰᠡᠭ ᠪᠣᠯᠭᠠᠨ ᠣᠪᠣᠭᠠᠯᠠᠭᠲᠤᠨ》 ᠭᠡᠪᠡ᠃ 9 ᠥᠷᠯᠥᠭᠡ ᠨᠢ ᠶᠧᠾᠦ᠋ ᠭᠠᠳᠠᠨᠠ ᠭᠠᠷᠴᠤ ᠵᠣᠭᠰᠣᠭᠠᠳ᠂ ᠪᠦᠬᠦ ᠠᠷᠠᠳ ᠲᠦᠮᠡᠨ ᠳᠦ᠄ 《ᠲᠠ ᠨᠠᠷ ᠭᠡᠮ ᠪᠤᠷᠤᠭᠤ ᠦᠭᠡᠢ᠃ ᠬᠠᠭᠠᠨ ᠠᠴᠠ ᠪᠠᠨ ᠤᠷᠪᠠᠨ ᠬᠤᠤᠪᠢᠯᠳᠤᠵᠤ᠂ ᠲᠡᠭᠦᠨ ᠢ ᠠᠯᠠᠭᠰᠠᠨ ᠨᠢ ᠶᠠᠭ ᠪᠢ ᠮᠥᠨ᠂ ᠬᠠᠷᠢᠨ ᠡᠳᠡ ᠨᠠᠷ ᠢ ᠠᠯᠠᠭᠰᠠᠨ ᠨᠢ ᠬᠡᠨ ᠪᠤᠢ︖ 10 ᠲᠠ ᠨᠠᠷ ᠡᠭᠦᠨ ᠢ ᠮᠡᠳᠡᠵᠦ ᠠᠪ᠂ ᠠᠬᠠᠪ ᠤᠨ ᠭᠡᠷ ᠦᠨ ᠲᠠᠯᠠ ᠪᠠᠷ ᠶᠣᠬᠣᠸᠠ ᠶᠢᠨ ᠠᠢᠯᠠᠳᠤᠭᠰᠠᠨ ᠦᠭᠡᠨ ᠡᠴᠡ ᠠᠯᠢ ᠨᠢ ᠴᠤ ᠭᠠᠵᠠᠷ ᠲᠤ ᠤᠨᠠᠭᠠ ᠦᠭᠡᠢ᠃ ᠶᠣᠬᠣᠸᠠ ᠥᠪᠡᠷ ᠦᠨ ᠢᠶᠠᠨ ᠵᠠᠷᠤᠴᠠ ᠧᠯᠢᠶᠠ ᠪᠠᠷ ᠳᠠᠮᠵᠢᠭᠤᠯᠤᠨ ᠠᠢᠯᠠᠳᠤᠭᠰᠠᠨ ᠢᠶᠠᠨ ᠪᠡᠶᠡᠯᠡᠭᠦᠯᠦᠭᠰᠡᠨ ᠶᠤᠮ》 ᠭᠡᠪᠡ᠃ 11 ᠶᠧᠾᠦ᠋ ᠶᠧᠽᠷᠧᠯ ᠳᠤ ᠦᠯᠡᠳᠡᠭᠰᠡᠨ ᠠᠬᠠᠪ ᠤᠨ ᠭᠡᠷ ᠦᠨ ᠪᠦᠭᠦᠳᠡ ᠡᠴᠡ ᠭᠠᠳᠠᠨᠠ᠂ ᠰᠢᠳᠠᠷ ᠲᠦᠰᠢᠮᠡᠳ᠂ ᠳᠣᠲᠣᠨᠣ ᠶᠢᠨ ᠠᠨᠳᠠ ᠨᠠᠷ᠂ ᠲᠠᠬᠢᠯᠴᠢᠳ ᠠᠴᠠ ᠨᠢ ᠨᠢᠭᠡ ᠶᠢ ᠴᠤ ᠦᠯᠡᠳᠡᠭᠡᠯ ᠦᠭᠡᠢ ᠪᠦᠭᠦᠳᠡ ᠶᠢ ᠬᠣᠷᠣᠭᠠᠪᠠ᠃
12 ᠳᠠᠷᠠᠭᠠ ᠨᠢ ᠶᠧᠾᠦ᠋ ᠬᠥᠳᠡᠯᠵᠦ᠂ ᠰᠠᠮᠠᠷᠢᠶᠠ ᠤᠷᠤᠭᠤ ᠶᠠᠪᠤᠪᠠ᠃ ᠲᠡᠷᠡ ᠵᠠᠮ ᠳᠠᠭᠠᠨ ᠬᠣᠨᠢᠴᠢᠳ ᠤᠨ ᠨᠣᠣᠰᠣ ᠬᠢᠷᠭᠠᠬᠤ ᠭᠡᠷ ᠲᠦ᠂ 13 ᠶᠦᠳᠠ ᠶᠢᠨ ᠬᠠᠭᠠᠨ ᠠᠬᠠᠽᠢᠶᠠ ᠶᠢᠨ ᠲᠥᠷᠥᠯ ᠰᠠᠳᠤᠨ ᠨᠤᠭᠤᠳ ᠢ ᠣᠯᠵᠤ ᠬᠠᠷᠠᠪᠠ᠃ ᠲᠡᠷᠡ᠄ 《ᠲᠠ ᠨᠠᠷ ᠬᠡᠨ ᠪᠤᠢ︖》 ᠭᠡᠬᠦ ᠳᠦ᠂ ᠲᠡᠳᠡ᠄ 《ᠪᠢᠳᠡ ᠠᠬᠠᠽᠢᠶᠠ ᠶᠢᠨ ᠲᠥᠷᠥᠯ ᠰᠠᠳᠤᠨ ᠶᠤᠮ᠃ ᠪᠢᠳᠡ ᠬᠠᠭᠠᠨ ᠤ ᠬᠥᠪᠡᠭᠦᠳ ᠪᠣᠯᠣᠨ ᠡᠬᠡ ᠬᠠᠲᠤᠨ ᠤ ᠬᠥᠪᠡᠭᠦᠳ ᠦᠨ ᠮᠡᠨᠳᠦ ᠶᠢ ᠠᠰᠠᠭᠤᠬᠤ ᠭᠡᠵᠦ ᠶᠠᠪᠤᠵᠤ ᠪᠠᠢᠨᠠ》 ᠭᠡᠵᠦ ᠬᠠᠷᠢᠭᠤᠯᠪᠠ᠃ 14 ᠶᠧᠾᠦ᠋᠄ 《ᠲᠡᠳᠡᠨ ᠢ ᠠᠮᠢᠳᠤ ᠪᠠᠷ ᠨᠢ ᠪᠠᠷᠢᠭᠲᠤᠨ》 ᠭᠡᠬᠦ ᠳᠦ᠂ ᠬᠠᠮᠲᠤᠷᠠᠭᠴᠢᠳ ᠨᠢ ᠲᠡᠷᠡ ᠳᠥᠴᠢᠨ ᠬᠣᠶᠠᠷ ᠬᠥᠮᠦᠨ ᠢ ᠠᠮᠢᠳᠤ ᠪᠠᠷ ᠨᠢ ᠪᠠᠷᠢᠵᠤ᠂ ᠬᠣᠨᠢᠴᠢᠳ ᠤᠨ ᠨᠣᠣᠰᠣ ᠬᠢᠷᠭᠠᠬᠤ ᠭᠡᠷ ᠦᠨ ᠨᠦᠬᠡᠨ ᠦ ᠬᠠᠵᠠᠭᠤ ᠳᠤ ᠠᠪᠠᠴᠢᠵᠤ᠂ ᠨᠢᠭᠡ ᠶᠢ ᠨᠢ ᠴᠤ ᠦᠯᠡᠳᠡᠭᠡᠯ ᠦᠭᠡᠢ ᠪᠦᠭᠦᠳᠡ ᠶᠢ ᠬᠣᠷᠣᠭᠠᠵᠠᠢ᠃
15 ᠶᠧᠾᠦ᠋ ᠲᠡᠨᠳᠡ ᠡᠴᠡ ᠶᠠᠪᠤᠬᠤ ᠳᠠᠭᠠᠨ ᠥᠪᠡᠷ ᠲᠡᠢ ᠨᠢ ᠠᠭᠤᠯᠵᠠᠬᠤ ᠪᠠᠷ ᠢᠷᠡᠵᠦ ᠪᠤᠢ ᠷᠧᠺᠠᠪ ᠤᠨ ᠬᠦᠦ ᠶᠧᠬᠣᠨᠠᠳᠠᠪ ᠲᠠᠢ ᠲᠠᠭᠠᠷᠠᠯᠳᠤᠵᠠᠢ᠃ ᠶᠧᠾᠦ᠋ ᠲᠡᠭᠦᠨ ᠲᠡᠢ ᠮᠡᠨᠳᠦᠯᠡᠭᠡᠳ᠂ ᠲᠡᠭᠦᠨ ᠳᠦ᠄ 《ᠮᠢᠨᠦ ᠵᠢᠷᠦᠬᠡ ᠴᠢᠨᠦ ᠵᠢᠷᠦᠬᠡᠨ ᠦ ᠡᠮᠦᠨᠡ ᠰᠢᠳᠤᠷᠭᠤ ᠪᠠᠢᠬᠤ ᠶᠢᠨ ᠠᠳᠠᠯᠢ ᠴᠢᠨᠦ ᠵᠢᠷᠦᠬᠡ ᠴᠤ ᠰᠢᠳᠤᠷᠭᠤ ᠪᠠᠢᠭᠠ ᠤᠤ︖》 ᠭᠡᠬᠦ ᠳᠦ᠂ ᠶᠧᠬᠣᠨᠠᠳᠠᠪ᠄ 《ᠲᠡᠢᠮᠦ ᠪᠠᠢᠨᠠ》 ᠭᠡᠵᠦ ᠬᠠᠷᠢᠭᠤᠯᠪᠠ᠃ ᠶᠧᠾᠦ᠋᠄ 《ᠲᠡᠢᠮᠦ ᠪᠣᠯ ᠭᠠᠷ ᠢᠶᠠᠨ ᠥᠭᠭᠥᠭᠲᠦᠨ》 ᠭᠡᠬᠦ ᠳᠦ᠂ ᠶᠧᠬᠣᠨᠠᠳᠠᠪ ᠲᠡᠭᠦᠨ ᠳᠦ ᠭᠠᠷ ᠢᠶᠠᠨ ᠥᠭᠪᠡ᠃ ᠶᠧᠾᠦ᠋ ᠲᠡᠭᠦᠨ ᠢ ᠲᠡᠷᠭᠡᠨ ᠳᠡᠭᠡᠨ ᠣᠷᠣᠭᠤᠯᠤᠭᠠᠳ᠄ 16 《ᠨᠠᠳᠠ ᠲᠠᠢ ᠬᠠᠮᠲᠤ ᠶᠠᠪᠤᠵᠤ᠂ ᠶᠣᠬᠣᠸᠠ ᠶᠢᠨ ᠲᠥᠯᠥᠭᠡᠬᠢ ᠮᠢᠨᠦ ᠵᠢᠳᠬᠦᠯ ᠢ ᠬᠠᠷᠠ》 ᠭᠡᠪᠡ᠃ ᠢᠩᠭᠢᠭᠡᠳ ᠶᠧᠾᠦ᠋ ᠲᠡᠭᠦᠨ ᠢ ᠲᠡᠷᠭᠡᠨ ᠳᠡᠭᠡᠨ ᠰᠠᠭᠤᠯᠭᠠᠭᠠᠳ 17 ᠰᠠᠮᠠᠷᠢᠶᠠ ᠳᠤ ᠣᠴᠢᠵᠤ᠂ ᠲᠡᠨᠳᠡ ᠦᠯᠡᠳᠡᠭᠰᠡᠨ ᠠᠬᠠᠪ ᠤᠨ ᠬᠢᠨ ᠤ ᠪᠦᠭᠦᠳᠡ ᠶᠢ ᠴᠣᠬᠢᠵᠤ ᠤᠰᠠᠳᠬᠠᠭᠰᠠᠨ ᠳᠤ᠂ ᠡᠨᠡ ᠨᠢ ᠶᠣᠬᠣᠸᠠ ᠶᠢᠨ ᠧᠯᠢᠶᠠ ᠳᠤ ᠠᠢᠯᠠᠳᠤᠭᠰᠠᠨ ᠦᠭᠡ ᠶᠢᠨ ᠳᠠᠭᠠᠤ ᠪᠣᠯᠵᠠᠢ᠃
ᠪᠠᠯ ᠤᠨ ᠵᠠᠷᠤᠴᠠ ᠨᠠᠷ ᠮᠥᠬᠥᠪᠡ
18 ᠶᠧᠾᠦ᠋ ᠪᠦᠬᠦ ᠠᠷᠠᠳ ᠲᠦᠮᠡᠨ ᠢ ᠴᠤᠭᠯᠠᠭᠤᠯᠤᠭᠠᠳ᠂ ᠲᠡᠳᠡᠨ ᠳᠦ᠄ 《ᠠᠬᠠᠪ ᠪᠠᠯ ᠳᠤ ᠪᠠᠭᠠ ᠰᠠᠭᠠ ᠦᠢᠯᠡᠴᠢᠯᠡᠳᠡᠭ᠌ ᠪᠠᠢᠭᠰᠠᠨ ᠪᠣᠯ᠂ ᠶᠧᠾᠦ᠋ ᠪᠢ ᠶᠡᠬᠡ ᠪᠡᠷ ᠦᠢᠯᠡᠴᠢᠯᠡᠨᠡ᠃ 19 ᠡᠢᠮᠦ ᠡᠴᠡ ᠪᠠᠯ ᠤᠨ ᠪᠦᠬᠦ ᠡᠰᠢ ᠦᠵᠡᠭᠦᠯᠦᠭᠴᠢ᠂ ᠪᠦᠬᠦ ᠵᠠᠷᠤᠴᠠ ᠪᠣᠯᠣᠨ ᠪᠦᠬᠦ ᠲᠠᠬᠢᠯᠴᠢ ᠶᠢ ᠨᠠᠳᠠ ᠤᠷᠤᠭᠤ ᠴᠤᠭᠯᠠᠭᠤᠯ᠃ ᠪᠢ ᠪᠠᠯ ᠳᠤ ᠶᠡᠬᠡ ᠲᠠᠬᠢᠯ ᠡᠷᠭᠦᠬᠦ ᠲᠤᠯᠠ ᠨᠢᠭᠡ ᠶᠢ ᠨᠢ ᠴᠤ ᠪᠦᠦ ᠣᠷᠬᠢᠭᠳᠠᠭᠤᠯ᠃ ᠣᠷᠬᠢᠭᠳᠠᠭᠰᠠᠨ ᠨᠢ ᠠᠮᠢᠳᠤ ᠦᠯᠡᠳᠡᠬᠦ ᠦᠭᠡᠢ》 ᠭᠡᠪᠡ᠃ ᠬᠠᠷᠢᠨ ᠶᠧᠾᠦ᠋ ᠪᠠᠯ ᠤᠨ ᠵᠠᠷᠤᠴᠠ ᠨᠠᠷ ᠢ ᠤᠰᠠᠳᠬᠠᠬᠤ ᠶᠢᠨ ᠲᠤᠯᠠᠳᠠ ᠢᠩᠭᠢᠵᠦ ᠵᠠᠯᠢ ᠭᠠᠷᠭᠠᠵᠠᠢ᠃ 20 ᠶᠧᠾᠦ᠋᠄ 《ᠪᠠᠯ ᠳᠤ ᠵᠣᠷᠢᠭᠤᠯᠤᠨ ᠠᠷᠢᠭᠤᠨ ᠴᠢᠭᠤᠯᠭᠠᠨ ᠢ ᠲᠤᠩ᠋ᠬᠠᠭᠯᠠᠭᠲᠤᠨ》 ᠭᠡᠰᠡᠨ ᠳᠦ᠂ ᠲᠡᠳᠡ ᠲᠤᠩ᠋ᠬᠠᠭᠯᠠᠪᠠ᠃ 21 ᠶᠧᠾᠦ᠋ ᠢᠰᠷᠧᠯ ᠳᠠᠶᠠᠭᠠᠷ ᠬᠡᠯᠡ ᠶᠠᠪᠤᠭᠤᠯᠤᠭᠰᠠᠨ ᠳᠤ᠂ ᠪᠠᠯ ᠤᠨ ᠵᠠᠷᠤᠴᠠ ᠨᠠᠷ ᠪᠦᠭᠦᠳᠡ ᠢᠷᠡᠵᠦ᠂ ᠢᠷᠡᠭᠡ ᠦᠭᠡᠢ ᠬᠥᠮᠦᠨ ᠭᠠᠭᠴᠠ ᠴᠤ ᠦᠭᠡᠢ ᠪᠠᠢᠪᠠ᠃ ᠲᠡᠳᠡ ᠪᠠᠯ ᠤᠨ ᠰᠦᠮᠡ ᠳᠦ ᠣᠷᠣᠵᠤ᠂ ᠪᠠᠯ ᠤᠨ ᠰᠦᠮᠡ ᠶᠢ ᠨᠢᠭᠡ ᠵᠠᠬᠠ ᠠᠴᠠ ᠨᠢ ᠨᠥᠭᠥᠭᠡ ᠵᠠᠬᠠ ᠬᠦᠷᠲᠡᠯᠡ ᠳᠦᠭᠦᠷᠭᠡᠭᠰᠡᠨ ᠪᠠᠢᠪᠠ᠃ 22 ᠶᠧᠾᠦ᠋ ᠬᠤᠪᠴᠠᠰᠤ ᠬᠠᠮᠢᠶᠠᠷᠤᠭᠴᠢ ᠳᠤ᠄ 《ᠪᠠᠯ ᠤᠨ ᠵᠠᠷᠤᠴᠠ ᠨᠠᠷ ᠤᠨ ᠡᠮᠦᠰᠬᠦ ᠬᠤᠪᠴᠠᠰᠤ ᠶᠢ ᠠᠪᠴᠢᠷᠠ》 ᠭᠡᠰᠡᠨ ᠳᠦ᠂ ᠲᠡᠷᠡ ᠠᠪᠴᠢᠷᠠᠪᠠ᠃ 23 ᠶᠧᠾᠦ᠋ ᠷᠧᠺᠠᠪ ᠤᠨ ᠬᠦᠦ ᠶᠧᠬᠣᠨᠠᠳᠠᠪ ᠤᠨ ᠬᠠᠮᠲᠤ ᠪᠠᠯ ᠤᠨ ᠰᠦᠮᠡ ᠳᠦ ᠣᠷᠣᠭᠠᠳ ᠪᠠᠯ ᠤᠨ ᠵᠠᠷᠤᠴᠠ ᠨᠠᠷ ᠲᠤ᠄ 《ᠲᠠ ᠨᠠᠷ ᠯᠠᠪᠯᠠᠵᠤ ᠦᠵᠡ᠂ ᠡ᠊ᠨᠳᠡ ᠶᠣᠬᠣᠸᠠ ᠶᠢᠨ ᠵᠠᠷᠤᠴᠠ ᠨᠠᠷ ᠠᠴᠠ ᠨᠢᠭᠡ ᠴᠤ ᠬᠥᠮᠦᠨ ᠲᠠ ᠨᠠᠷ ᠲᠠᠢ ᠬᠠᠮᠲᠤ ᠪᠠᠢᠵᠤ ᠪᠣᠯᠬᠤ ᠦᠭᠡᠢ᠂ ᠪᠠᠯ ᠤᠨ ᠵᠠᠷᠤᠴᠠ ᠨᠠᠷ ᠯᠠ ᠪᠠᠢᠬᠤ ᠶᠣᠰᠣᠲᠠᠢ》 ᠭᠡᠪᠡ᠃ 24 ᠲᠡᠭᠡᠭᠡᠳ ᠲᠡᠳᠡ ᠡᠷᠭᠦᠯ ᠪᠣᠯᠣᠨ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠡᠷᠭᠦᠬᠦ ᠪᠡᠷ ᠳᠣᠲᠣᠭᠰᠢ ᠣᠷᠣᠪᠠ᠃ ᠤᠤᠯ ᠨᠢ ᠶᠧᠾᠦ᠋ ᠭᠠᠳᠠᠨᠠ ᠨᠠᠶᠠᠨ ᠬᠥᠮᠦᠨ ᠪᠠᠢᠷᠢᠯᠠᠭᠤᠯᠤᠨ᠄ 《ᠪᠢ ᠥᠪᠡᠷ ᠢᠶᠡᠨ ᠡᠳᠡᠭᠡᠷ ᠬᠥᠮᠦᠰ ᠢ ᠲᠠ ᠨᠠᠷ ᠤᠨ ᠭᠠᠷ ᠲᠤ ᠲᠤᠰᠢᠶᠠᠵᠤ ᠪᠠᠢᠨᠠ᠃ ᠡᠳᠡ ᠨᠠᠷ ᠠᠴᠠ ᠨᠢᠭᠡ ᠶᠢ ᠳᠤᠲᠠᠭᠠᠯᠭᠠᠭᠰᠠᠨ ᠬᠥᠮᠦᠨ ᠴᠤ ᠲᠡᠭᠦᠨ ᠦ ᠣᠷᠣᠨ ᠳᠤ ᠥᠪᠡᠷ ᠦᠨ ᠢᠶᠠᠨ ᠠᠮᠢ ᠶᠢ ᠥᠭᠭᠥᠨᠡ ᠰᠢᠦ》 ᠭᠡᠵᠦ ᠬᠡᠯᠡᠭᠰᠡᠨ ᠪᠠᠢᠪᠠ᠃ 25 ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠡᠷᠭᠦᠵᠦ ᠳᠠᠭᠤᠰᠤᠮᠠᠭᠴᠠ ᠶᠧᠾᠦ᠋ ᠲᠣᠷᠭᠠᠨ ᠴᠡᠷᠢᠭ ᠤᠳ ᠪᠣᠯᠣᠨ ᠵᠠᠩᠵᠤᠨ ᠨᠠᠷ ᠲᠠᠭᠠᠨ᠄ 《ᠳᠣᠲᠣᠭᠰᠢ ᠣᠷᠣᠵᠤ ᠲᠡᠳᠡᠨ ᠢ ᠠᠯᠠ᠃ ᠨᠢᠭᠡ ᠬᠥᠮᠦᠨ ᠢ ᠴᠤ ᠳᠤᠲᠠᠭᠠᠯᠭᠠᠵᠤ ᠪᠣᠯᠬᠤ ᠦᠭᠡᠢ》 ᠭᠡᠬᠦ ᠳᠦ᠂ ᠲᠡᠳᠡ ᠢᠯᠳᠦ ᠪᠡᠷ ᠲᠡᠳᠡᠨ ᠢ ᠠᠯᠠᠪᠠ᠃ ᠲᠣᠷᠭᠠᠨ ᠴᠡᠷᠢᠭ ᠤᠳ ᠪᠣᠯᠣᠨ ᠵᠠᠩᠵᠤᠨ ᠨᠠᠷ ᠲᠡᠳᠡᠨ ᠢ ᠭᠠᠷᠭᠠᠨ ᠬᠠᠶᠠᠵᠤ᠂ ᠪᠠᠯ ᠤᠨ ᠰᠦᠮᠡ ᠶᠢᠨ ᠳᠣᠲᠣᠭᠠᠳᠤ ᠥᠷᠥᠭᠡ ᠤᠷᠤᠭᠤ ᠣᠷᠣᠭᠠᠳ 26 ᠪᠠᠯ ᠤᠨ ᠰᠦᠮᠡ ᠶᠢᠨ ᠪᠠᠭᠠᠨᠠ ᠨᠤᠭᠤᠳ ᠢ ᠭᠠᠷᠭᠠᠨ ᠰᠢᠲᠠᠭᠠᠭᠰᠠᠨ ᠪᠥᠭᠡᠳ 27 ᠪᠠᠰᠠ ᠪᠠᠯ ᠤᠨ ᠪᠠᠭᠠᠨᠠ ᠶᠢ ᠬᠤᠭᠤᠯᠤᠨ ᠪᠠᠯ ᠤᠨ ᠰᠦᠮᠡ ᠶᠢ ᠨᠤᠷᠠᠭᠠᠵᠤ᠂ ᠵᠣᠷᠯᠣᠩ ᠪᠣᠯᠭᠠᠵᠤ ᠣᠷᠬᠢᠭᠰᠠᠨ ᠨᠢ ᠥᠨᠥᠳᠥᠷ ᠬᠦᠷᠲᠡᠯᠡ ᠪᠠᠢᠭᠠ ᠪᠢᠯᠡ᠃ 28 ᠡᠢᠨ ᠬᠦ ᠶᠧᠾᠦ᠋ ᠪᠠᠯ ᠢ ᠢᠰᠷᠧᠯ ᠡᠴᠡ ᠤᠰᠠᠳᠬᠠᠪᠠ᠃
29 ᠬᠠᠷᠢᠨ ᠶᠧᠾᠦ᠋ ᠢᠰᠷᠧᠯ ᠢᠶᠠᠷ ᠨᠢᠭᠦᠯ ᠦᠢᠯᠡᠳᠦᠭᠦᠯᠦᠭᠰᠡᠨ ᠨᠧᠪᠠᠲ ᠤᠨ ᠬᠦᠦ ᠶᠧᠷᠣᠪᠣᠶᠠᠮ ᠤᠨ ᠨᠢᠭᠦᠯ ᠡᠴᠡ ᠰᠠᠯᠤᠭᠰᠠᠨ ᠦᠭᠡᠢ ᠲᠤᠯᠠ ᠪᠧᠲ᠋ᠧᠯ ᠪᠣᠯᠣᠨ ᠳ᠋ᠠᠨ ᠳᠠᠬᠢ ᠠᠯᠲᠠᠨ ᠲᠤᠭᠤᠯ ᠤᠳ ᠦᠯᠡᠳᠡᠭᠰᠡᠭᠡᠷ ᠪᠠᠢᠯᠠ᠃ 30 ᠶᠣᠬᠣᠸᠠ ᠶᠧᠾᠦ᠋ ᠳᠤ᠄ 《ᠮᠢᠨᠦ ᠮᠡᠯᠮᠡᠢ ᠳᠦ ᠵᠥᠪ ᠢ ᠭᠦᠢᠴᠡᠳᠬᠡᠬᠦ ᠲᠠᠯᠠ ᠪᠠᠷ ᠴᠢ ᠰᠠᠢᠨ ᠬᠢᠵᠦ᠂ ᠮᠢᠨᠦ ᠰᠠᠨᠠᠭᠠᠨ ᠳᠤ ᠨᠡᠢᠴᠡᠭᠦᠯᠦᠨ ᠠᠬᠠᠪ ᠤᠨ ᠭᠡᠷ ᠲᠦ ᠦᠢᠯᠡᠳᠦᠭᠰᠡᠨ ᠲᠤᠯᠠ ᠴᠢᠨᠦ ᠦᠷᠡ ᠤᠳᠤᠮ ᠳᠥᠷᠪᠡᠳᠡᠬᠢ ᠦᠶᠡ ᠬᠦᠷᠲᠡᠯᠡ ᠪᠡᠨ ᠢᠰᠷᠧᠯ ᠤᠨ ᠬᠠᠭᠠᠨ ᠤ ᠰᠡᠨᠲᠢ ᠳᠤ ᠰᠠᠭᠤᠨᠠ》 ᠭᠡᠵᠦ ᠠᠢᠯᠠᠳᠴᠠᠢ᠃ 31 ᠬᠠᠷᠢᠨ ᠶᠧᠾᠦ᠋ ᠢᠰᠷᠧᠯ ᠤᠨ ᠪᠤᠷᠬᠠᠨ ᠶᠣᠬᠣᠸᠠ ᠶᠢᠨ ᠰᠤᠷᠭᠠᠯ ᠢ ᠪᠦᠬᠦ ᠵᠢᠷᠦᠬᠡ ᠪᠡᠷ ᠢᠶᠠᠨ ᠳᠠᠭᠠᠬᠤ ᠶᠢ ᠬᠢᠴᠢᠶᠡᠭᠰᠡᠨ ᠦᠭᠡᠢ᠂ ᠢᠰᠷᠧᠯ ᠢᠶᠠᠷ ᠨᠢᠭᠦᠯ ᠦᠢᠯᠡᠳᠦᠭᠦᠯᠦᠭᠰᠡᠨ ᠶᠧᠷᠣᠪᠣᠶᠠᠮ ᠤᠨ ᠨᠢᠭᠦᠯ ᠡᠴᠡ ᠰᠠᠯᠤᠭᠰᠠᠨ ᠦᠭᠡᠢ᠃
32 ᠲᠡᠷᠡ ᠡᠳᠦᠷ ᠤᠳ ᠲᠤ ᠶᠣᠬᠣᠸᠠ ᠢᠰᠷᠧᠯ ᠢ ᠲᠠᠰᠤᠳᠠᠵᠤ ᠡᠬᠢᠯᠡᠭᠰᠡᠨ ᠶᠤᠮ᠃ ᠬᠠᠽᠠᠶᠧᠯ ᠢᠰᠷᠧᠯᠴᠦᠳ ᠦᠨ ᠪᠦᠬᠦ ᠬᠢᠯᠢ ᠶᠢ ᠳᠠᠭᠠᠷᠢᠵᠤ᠂ 33 ᠶᠣᠷᠳᠠᠨ ᠤ ᠵᠡᠭᠦᠨᠲᠡᠬᠢ ᠭᠢᠯᠧᠶᠠᠳ᠋ ᠤᠨ ᠪᠦᠬᠦ ᠨᠤᠲᠤᠭ᠂ ᠲᠤᠬᠠᠢᠯᠠᠪᠠᠯ ᠭᠠᠳ᠋ᠴᠤᠳ᠂ ᠷᠧᠣᠪᠧᠨᠴᠤᠳ᠂ ᠮᠠᠨᠠᠰᠧᠴᠤᠳ ᠤᠨ ᠨᠤᠲᠤᠭ᠂ ᠠᠷᠨᠣᠨ ᠤ ᠬᠥᠨᠳᠡᠢ ᠳᠠᠬᠢ ᠠᠷᠣᠶᠧᠷ ᠡᠴᠡ ᠭᠢᠯᠧᠶᠠᠳ᠋ ᠢᠶᠠᠷ ᠳᠠᠭᠠᠷᠢᠨ ᠪᠠᠱᠠᠨ ᠬᠦᠷᠲᠡᠯᠡ ᠡᠵᠡᠯᠡᠭᠰᠡᠨ ᠶᠤᠮ᠃ 34 ᠶᠧᠾᠦ᠋ ᠶᠢᠨ ᠪᠤᠰᠤᠳ ᠶᠠᠪᠤᠳᠠᠯ᠂ ᠲᠡᠭᠦᠨ ᠦ ᠬᠢᠭᠰᠡᠨ ᠪᠦᠭᠦᠳᠡ᠂ ᠡᠷᠬᠡ ᠮᠡᠳᠡᠯ ᠵᠡᠷᠭᠡ ᠨᠢ ᠢᠰᠷᠧᠯ ᠤᠨ ᠬᠠᠭᠠᠳ ᠤᠨ ᠨᠠᠮᠲᠠᠷ ᠲᠤ ᠪᠢᠴᠢᠭᠳᠡᠭᠰᠡᠨ ᠪᠢᠰᠢ ᠤᠤ︖ 35 ᠶᠧᠾᠦ᠋ ᠡᠴᠢᠭᠡ ᠡᠪᠦᠭᠡᠳ ᠦᠨ ᠢᠶᠠᠨ ᠬᠠᠮᠲᠤ ᠨᠣᠢᠷᠰᠣᠭᠰᠠᠨ ᠳᠤ᠂ ᠬᠥᠮᠦᠰ ᠲᠡᠭᠦᠨ ᠢ ᠰᠠᠮᠠᠷᠢᠶᠠ ᠳᠤ ᠣᠷᠣᠰᠢᠭᠤᠯᠪᠠ᠃ ᠬᠦᠦ ᠶᠧᠬᠣᠶᠠᠬᠠᠽ ᠨᠢ ᠲᠡᠭᠦᠨ ᠢ ᠵᠠᠯᠭᠠᠮᠵᠢᠯᠠᠨ ᠬᠠᠭᠠᠨ ᠪᠣᠯᠪᠠ᠃ 36 ᠶᠧᠾᠦ᠋ ᠰᠠᠮᠠᠷᠢᠶᠠ ᠳᠤ ᠢᠰᠷᠧᠯ ᠢ ᠬᠣᠷᠢᠨ ᠨᠠᠢ᠌ᠮᠠᠨ ᠵᠢᠯ ᠵᠠᠬᠢᠷᠤᠯᠠ᠃