ᠬᠠᠭᠠᠳ ᠤᠨ ᠳᠡᠳ᠋ ᠲᠠᠪᠤ
ᠨᠠᠮᠠᠨ ᠤ ᠤᠶᠠᠮᠠᠨ ᠡᠳᠡᠭᠡᠷᠡᠪᠡ
1 ᠠᠷᠠᠮ ᠤᠨ ᠬᠠᠭᠠᠨ ᠤ ᠴᠡᠷᠢᠭ ᠤᠨ ᠵᠠᠩᠵᠤᠨ ᠨᠠᠮᠠᠨ ᠡᠵᠡᠨ ᠦ ᠪᠠᠨ ᠬᠦᠨᠳᠦᠳᠬᠡᠯ ᠢ ᠣᠯᠣᠭᠰᠠᠨ ᠠᠭᠤᠤ ᠬᠥᠮᠦᠨ ᠪᠠᠢᠯᠠ᠃ ᠤᠴᠢᠷ ᠨᠢ ᠶᠣᠬᠣᠸᠠ ᠲᠡᠭᠦᠨ ᠢᠶᠡᠷ ᠳᠠᠮᠵᠢᠭᠤᠯᠤᠨ ᠠᠷᠠᠮ ᠳᠤ ᠢᠯᠠᠯᠲᠠ ᠣᠯᠭᠣᠭᠰᠠᠨ ᠠᠵᠢ᠃ ᠡᠨᠡ ᠬᠥᠮᠦᠨ ᠬᠦᠴᠦᠲᠡᠢ ᠳᠠᠢᠴᠢᠨ ᠡᠷᠡ ᠪᠣᠯᠪᠠᠴᠤ ᠤᠶᠠᠮᠠᠨ ᠡᠪᠡᠳᠴᠢᠨ ᠲᠡᠢ ᠪᠠᠢᠪᠠ᠃ 2 ᠠᠷᠠᠮᠴᠤᠳ ᠤᠨ ᠪᠦᠯᠦᠭᠯᠡᠨ ᠳᠣᠪᠲᠣᠯᠬᠤ ᠳᠠᠭᠠᠨ ᠢᠰᠷᠧᠯ ᠤᠨ ᠨᠤᠲᠤᠭ ᠠᠴᠠ ᠤᠤᠯᠭᠠᠯᠠᠨ ᠠᠪᠴᠢᠷᠠᠭᠰᠠᠨ ᠨᠢᠭᠡᠨ ᠪᠢᠴᠢᠬᠠᠨ ᠥᠬᠢᠨ ᠨᠠᠮᠠᠨ ᠤ ᠡᠬᠡᠨᠡᠷ ᠲᠦ ᠵᠠᠷᠤᠭᠳᠠᠳᠠᠭ ᠪᠠᠢᠪᠠ᠃ 3 ᠨᠢᠭᠡᠨ ᠡᠳᠦᠷ ᠥᠬᠢᠨ ᠡᠵᠡᠭᠲᠡᠢ ᠳᠡᠭᠡᠨ᠄ 《ᠮᠠᠨ ᠤ ᠡᠵᠡᠨᠲᠡᠨ ᠰᠠᠮᠠᠷᠢᠶᠠ ᠳᠠᠬᠢ ᠡᠰᠢ ᠦᠵᠡᠭᠦᠯᠦᠭᠴᠢ ᠲᠠᠢ ᠠᠭᠤᠯᠵᠠᠬᠤ ᠴᠤ ᠪᠣᠯᠣᠭᠠᠰᠠᠢ︕ ᠲᠡᠷᠡ ᠬᠥᠮᠦᠨ ᠡᠵᠡᠨᠲᠡᠨ ᠦ ᠮᠠᠨᠢ ᠤᠶᠠᠮᠠᠨ ᠡᠪᠡᠳᠴᠢᠨ ᠢ ᠡᠳᠡᠭᠡᠭᠡᠨᠡ ᠳᠠ》 ᠭᠡᠬᠦ ᠪᠡᠷ ᠨᠢ᠂ 4 ᠨᠠᠮᠠᠨ ᠡᠵᠡᠨ ᠳᠡᠭᠡᠨ ᠣᠴᠢᠵᠤ ᠪᠠᠷᠠᠭᠠᠯᠬᠠᠨ᠂ ᠢᠰᠷᠧᠯ ᠡᠴᠡ ᠠᠪᠴᠢᠷᠠᠭᠰᠠᠨ ᠲᠡᠷᠡ ᠥᠬᠢᠨ ᠤ ᠶᠠᠷᠢᠭᠰᠠᠨ ᠢ ᠳᠤᠭᠤᠯᠭᠠᠪᠠ᠃ 5 ᠠᠷᠠᠮ ᠤᠨ ᠬᠠᠭᠠᠨ᠄ 《ᠶᠠᠪᠤ᠂ ᠶᠠᠪᠤ᠃ ᠪᠢ ᠢᠰᠷᠧᠯ ᠤᠨ ᠬᠠᠭᠠᠨ ᠳᠤ ᠵᠠᠬᠢᠳᠠᠯ ᠢᠯᠡᠭᠡᠶᠡ》 ᠭᠡᠯᠡ᠃ ᠢᠩᠭᠢᠭᠡᠳ ᠨᠠᠮᠠᠨ ᠠᠷᠪᠠᠨ ᠲᠠᠯᠠᠨᠲ 6 ᠮᠥᠩᠭᠥ᠂ ᠵᠢᠷᠭᠤᠭᠠᠨ ᠮᠢᠩ᠋ᠭᠠᠨ ᠱᠧᠺᠧᠯ 7 ᠠᠯᠲᠠ᠂ ᠠᠷᠪᠠᠨ ᠵᠠᠬᠠ ᠬᠤᠪᠴᠠᠰᠤ ᠠᠪᠴᠤ ᠬᠦᠷᠦᠭᠡᠳ 6 ᠢᠰᠷᠧᠯ ᠤᠨ ᠬᠠᠭᠠᠨ ᠳᠤ ᠨᠥᠭᠥᠭᠡ ᠵᠠᠬᠢᠳᠠᠯ ᠢ ᠭᠠᠷᠳᠠᠭᠤᠯᠪᠠ᠃ ᠵᠠᠬᠢᠳᠠᠯ ᠳᠤ᠄ 《ᠪᠢ ᠵᠠᠷᠤᠴᠠ ᠨᠠᠮᠠᠨ ᠢᠶᠠᠨ ᠡᠨᠡ ᠵᠠᠬᠢᠳᠠᠯ ᠲᠠᠢ ᠬᠠᠮᠲᠤ ᠲᠠᠨ ᠤᠷᠤᠭᠤ ᠶᠠᠪᠤᠭᠤᠯᠤᠯᠠ᠂ ᠲᠡᠭᠦᠨ ᠢ ᠲᠠ ᠤᠶᠠᠮᠠᠨ ᠡᠪᠡᠳᠴᠢᠨ ᠡᠴᠡ ᠨᠢ ᠡᠳᠡᠭᠡᠭᠡᠵᠦ ᠬᠠᠢᠷᠠᠯᠠᠨᠠ ᠤᠤ︖》 ᠭᠡᠵᠦ ᠪᠢᠴᠢᠭᠰᠡᠨ ᠪᠠᠢᠪᠠ᠃ 7 ᠢᠰᠷᠧᠯ ᠤᠨ ᠬᠠᠭᠠᠨ ᠲᠡᠷᠡ ᠵᠠᠬᠢᠳᠠᠯ ᠢ ᠤᠩ᠋ᠰᠢᠭᠠᠳ ᠬᠤᠪᠴᠠᠰᠤ ᠪᠠᠨ ᠤᠷᠠᠨ᠄ 《ᠪᠢ ᠶᠠᠮᠠᠷ ᠬᠥᠮᠦᠨ ᠢ ᠦᠬᠦᠭᠦᠯᠵᠦ ᠠᠮᠢᠳᠤᠷᠠᠭᠤᠯᠳᠠᠭ ᠪᠤᠷᠬᠠᠨ ᠶᠤᠮ ᠤᠤ︖ ᠲᠡᠷᠡ ᠶᠠᠭᠠᠬᠢᠭᠠᠳ ᠨᠠᠳᠠ ᠤᠷᠤᠭᠤ ᠬᠥᠮᠦᠨ ᠶᠠᠪᠤᠭᠤᠯᠵᠤ᠂ ᠲᠡᠭᠦᠨ ᠦ ᠤᠶᠠᠮᠠᠨ ᠡᠪᠡᠳᠴᠢᠨ ᠢ ᠨᠢ ᠡᠳᠡᠭᠡᠭᠡᠭᠡᠴᠢ ᠭᠡᠬᠦ ᠨᠢ ᠪᠤᠢ︖ ᠡᠨᠡ ᠬᠥᠮᠦᠨ ᠦ ᠬᠡᠷᠬᠢᠨ ᠰᠢᠯᠲᠠᠭ ᠡᠷᠢᠵᠦ ᠪᠠᠢᠭᠠ ᠶᠢ ᠲᠠ ᠨᠠᠷ ᠬᠠᠷᠠᠵᠠᠭᠠ》 ᠭᠡᠪᠡ᠃
8 ᠪᠤᠷᠬᠠᠨ ᠤ ᠬᠥᠮᠦᠨ ᠡᠯᠢᠱᠠ ᠢᠰᠷᠧᠯ ᠤᠨ ᠬᠠᠭᠠᠨ ᠤ ᠬᠤᠪᠴᠠᠰᠤ ᠪᠠᠨ ᠤᠷᠠᠭᠰᠠᠨ ᠢ ᠰᠣᠨᠣᠰᠣᠭᠠᠳ ᠬᠠᠭᠠᠨ ᠳᠤ ᠦᠭᠡ ᠢᠯᠡᠭᠡᠨ᠄ 《ᠲᠠ ᠶᠠᠭᠤᠨ ᠳᠤ ᠬᠤᠪᠴᠠᠰᠤ ᠪᠠᠨ ᠤᠷᠠᠬᠤ ᠶᠤᠮ ᠪᠤᠢ︖ ᠲᠡᠷᠡ ᠬᠥᠮᠦᠨ ᠢ ᠨᠠᠳᠠ ᠤᠷᠤᠭᠤ ᠶᠠᠪᠤᠭᠤᠯ᠃ ᠢᠰᠷᠧᠯ ᠳᠤ ᠡᠰᠢ ᠦᠵᠡᠭᠦᠯᠦᠭᠴᠢ ᠪᠠᠢᠳᠠᠭ ᠭᠡᠳᠡᠭ ᠢ ᠲᠡᠷᠡ ᠮᠡᠳᠡᠬᠦ ᠪᠣᠯᠣᠨᠠ》 ᠭᠡᠵᠦ ᠬᠡᠯᠡᠭᠦᠯᠦᠭᠰᠡᠨ ᠳᠦ᠂ 9 ᠨᠠᠮᠠᠨ ᠲᠡᠷᠭᠡ ᠮᠣᠷᠢᠳ ᠲᠠᠢ ᠪᠠᠨ ᠡᠯᠢᠱᠠ ᠶᠢᠨ ᠭᠡᠷ ᠦᠨ ᠡᠭᠦᠳᠡᠨ ᠳᠦ ᠢᠷᠡᠵᠦ ᠵᠣᠭᠰᠣᠪᠠ᠃ 10 ᠡᠯᠢᠱᠠ ᠡᠯᠴᠢ ᠶᠠᠪᠤᠭᠤᠯᠤᠨ ᠲᠡᠭᠦᠨ ᠳᠦ᠄ 《ᠶᠣᠷᠳᠠᠨ ᠭᠣᠣᠯ ᠳᠤ ᠣᠴᠢᠵᠤ ᠪᠡᠶᠡ ᠪᠡᠨ ᠳᠣᠯᠣᠭᠠᠨ ᠤᠳᠠᠭᠠ ᠤᠬᠢᠶᠠ᠃ ᠲᠡᠭᠡᠪᠡᠯ ᠪᠡᠶᠡ ᠴᠢᠨᠢ ᠰᠡᠷᠭᠦᠵᠦ ᠴᠡᠪᠡᠷ ᠪᠣᠯᠣᠨᠠ》 ᠭᠡᠵᠦ ᠬᠡᠯᠡᠭᠦᠯᠪᠡ᠃ 11 ᠬᠠᠷᠢᠨ ᠨᠠᠮᠠᠨ ᠠᠭᠤᠷᠯᠠᠨ ᠲᠡᠨᠳᠡ ᠡᠴᠡ ᠭᠠᠷᠴᠤ᠄ 《ᠬᠠᠷᠠ᠂ ᠪᠢ ᠲᠡᠭᠦᠨ ᠢ ᠯᠠᠪ ᠭᠠᠷᠴᠤ ᠢᠷᠡᠭᠡᠳ ᠮᠢᠨᠦ ᠡᠮᠦᠨᠡ ᠵᠣᠭᠰᠣᠵᠤ ᠥᠪᠡᠷ ᠦᠨ ᠢᠶᠠᠨ ᠪᠤᠷᠬᠠᠨ ᠶᠣᠬᠣᠸᠠ ᠶᠢᠨ ᠨᠡᠷᠡ ᠶᠢ ᠳᠠᠭᠤᠳᠠᠨ᠂ ᠡᠪᠡᠳᠴᠢᠨ ᠲᠡᠢ ᠭᠠᠵᠠᠷ ᠢ ᠮᠢᠨᠢ ᠭᠠᠷ ᠢᠶᠠᠷ ᠢᠶᠠᠨ ᠢᠯᠢᠵᠦ᠂ ᠤᠶᠠᠮᠠᠨ ᠡᠪᠡᠳᠴᠢᠨ ᠢ ᠡᠳᠡᠭᠡᠭᠡᠨᠡ ᠭᠡᠵᠦ ᠪᠣᠳᠣᠭᠰᠠᠨ ᠶᠤᠮ᠃ 12 ᠳ᠋ᠠᠮᠠᠰᠺᠦ᠋ᠰ ᠲᠤ ᠪᠠᠢᠭᠠ ᠠᠪᠠᠨᠠ᠂ ᠹᠠᠷᠫᠠᠷ ᠵᠡᠷᠭᠡ ᠭᠣᠣᠯ ᠮᠥᠷᠡᠨ ᠨᠢ ᠢᠰᠷᠧᠯ ᠤᠨ ᠠᠯᠢ ᠴᠤ ᠤᠰᠤᠨ ᠠᠴᠠ ᠳᠡᠭᠡᠷᠡ ᠪᠢᠰᠢ ᠭᠡᠵᠢ ᠤᠤ︖ ᠬᠠᠷᠢᠨ ᠲᠡᠳᠡᠭᠡᠷ ᠦᠨ ᠳᠣᠲᠣᠷᠠ ᠤᠬᠢᠶᠠᠪᠠᠯ ᠴᠡᠪᠡᠷ ᠪᠣᠯᠵᠤ ᠪᠣᠯᠬᠤ ᠦᠭᠡᠢ ᠭᠡᠵᠢ ᠤᠤ︖》 ᠬᠡᠮᠡᠨ ᠠᠭᠤᠷ ᠲᠠᠢ ᠪᠠᠷ ᠡᠷᠭᠢᠵᠦ ᠶᠠᠪᠤᠵᠠᠢ᠃ 13 ᠲᠡᠭᠡᠲᠡᠯᠡ ᠵᠠᠷᠤᠴᠠ ᠨᠠᠷ ᠨᠢ ᠳᠥᠭᠥᠨ ᠢᠷᠡᠵᠦ᠂ ᠲᠡᠭᠦᠨ ᠳᠦ᠄ 《ᠡᠴᠢᠭᠡ ᠮᠢᠨᠢ᠂ ᠬᠡᠷᠪᠡ ᠲᠡᠷᠡ ᠡᠰᠢ ᠦᠵᠡᠭᠦᠯᠦᠭᠴᠢ ᠡᠭᠦᠨ ᠡᠴᠡ ᠪᠡᠷᠬᠡ ᠵᠦᠢᠯ ᠢ ᠲᠠᠨ ᠳᠤ ᠶᠠᠷᠢᠭᠰᠠᠨ ᠴᠤ ᠲᠠ ᠲᠡᠭᠦᠨ ᠢ ᠪᠡᠶᠡᠯᠡᠭᠦᠯᠬᠦ ᠪᠢᠰᠢ ᠤᠤ︖ ᠬᠠᠷᠢᠨ᠄ 〈ᠤᠬᠢᠶᠠ᠂ ᠴᠡᠪᠡᠷᠰᠢ〉 ᠭᠡᠰᠡᠨ ᠭᠡᠳ ᠲᠠ ᠬᠢᠬᠦ ᠦᠭᠡᠢ ᠪᠠᠢᠨᠠ ᠭᠡᠵᠢ ᠤᠤ︖》 ᠭᠡᠵᠡᠭᠡᠪᠡ᠃ 14 ᠨᠠᠮᠠᠨ ᠤᠷᠤᠭᠤᠳᠠᠨ ᠶᠠᠪᠤᠵᠤ᠂ ᠪᠤᠷᠬᠠᠨ ᠤ ᠬᠥᠮᠦᠨ ᠦ ᠦᠭᠡ ᠪᠡᠷ ᠶᠣᠷᠳᠠᠨ ᠭᠣᠣᠯ ᠳᠤ ᠳᠣᠯᠣᠭᠠᠨ ᠤᠳᠠᠭᠠ ᠪᠤᠯᠬᠠᠭᠰᠠᠨ ᠳᠤ᠂ ᠲᠡᠭᠦᠨ ᠦ ᠪᠡᠶᠡ ᠵᠢᠭᠠᠯ ᠬᠡᠦᠬᠡᠳ ᠦᠨ ᠪᠡᠶᠡ ᠮᠡᠲᠦ ᠰᠡᠷᠭᠦᠵᠦ᠂ ᠴᠡᠪᠡᠷ ᠪᠣᠯᠵᠠᠢ᠃
15 ᠨᠠᠮᠠᠨ ᠪᠠᠷᠠ ᠪᠣᠯᠣᠭᠴᠢ ᠪᠦᠭᠦᠳᠡ ᠶᠢᠨ ᠢᠶᠠᠨ ᠬᠠᠮᠲᠤ ᠪᠤᠷᠬᠠᠨ ᠤ ᠬᠥᠮᠦᠨ ᠤᠷᠤᠭᠤ ᠡᠷᠭᠢᠵᠦ ᠢᠷᠡᠨ ᠲᠡᠭᠦᠨ ᠦ ᠡᠮᠦᠨᠡ ᠵᠣᠭᠰᠣᠭᠠᠳ᠄ 《ᠬᠠᠷᠠ᠂ ᠪᠢ ᠣᠳᠣ ᠮᠡᠳᠡᠯᠡ︕ ᠢᠰᠷᠧᠯ ᠡᠴᠡ ᠭᠠᠳᠠᠨᠠ ᠪᠦᠬᠦ ᠳᠡᠯᠡᠬᠡᠢ ᠳᠦ ᠥᠭᠡᠷᠡ ᠬᠠᠮᠢᠭᠠ ᠴᠤ ᠪᠤᠷᠬᠠᠨ ᠪᠠᠢᠳᠠᠭ ᠦᠭᠡᠢ ᠶᠤᠮ ᠪᠠᠢᠨᠠ᠃ ᠲᠠ ᠣᠳᠣ ᠵᠠᠷᠤᠴᠠ ᠶᠢᠨ ᠢᠶᠠᠨ ᠪᠡᠯᠡᠭ ᠢ ᠬᠦᠯᠢᠶᠡᠨ ᠠᠪᠤᠭᠠᠴᠢ》 ᠭᠡᠵᠡᠢ᠃ 16 ᠬᠠᠷᠢᠨ ᠡᠯᠢᠱᠠ᠄ 《ᠮᠢᠨᠦ ᠦᠢᠯᠡᠴᠢᠯᠡᠳᠡᠭ᠌ ᠶᠣᠬᠣᠸᠠ ᠶᠢᠨ ᠠᠮᠢᠳᠤ ᠯᠤᠭᠠ ᠨᠢᠭᠡᠨ ᠠᠳᠠᠯᠢ ᠪᠠᠲᠤ ᠦᠨᠡᠨ ᠭᠡᠪᠡᠯ᠂ ᠪᠢ ᠶᠠᠭᠤ ᠴᠤ ᠠᠪᠬᠤ ᠦᠭᠡᠢ》 ᠭᠡᠯᠡ᠃ ᠨᠠᠮᠠᠨ ᠳᠠᠬᠢᠨ ᠳᠠᠪᠲᠠᠨ ᠢᠳᠬᠠᠭᠰᠠᠨ ᠪᠣᠯᠪᠠᠴᠤ ᠲᠡᠷᠡ ᠠᠪᠬᠤ ᠦᠭᠡᠢ ᠪᠠᠢᠯᠠ᠃ 17 ᠨᠠᠮᠠᠨ᠄ 《ᠠᠪᠬᠤ ᠦᠭᠡᠢ ᠶᠤᠮ ᠪᠣᠯ᠂ ᠲᠠ ᠵᠠᠷᠤᠴᠠ ᠳᠠᠭᠠᠨ ᠬᠣᠶᠠᠷ ᠯᠠᠭᠤᠰᠠᠨ ᠳᠤ ᠠᠴᠢᠬᠤ ᠬᠡᠮᠵᠢᠶᠡᠨ ᠦ ᠰᠢᠷᠣᠢ ᠥᠭᠭᠥᠨᠡ ᠤᠤ︖ ᠣᠳᠣ ᠠᠴᠠ ᠡᠬᠢᠯᠡᠨ ᠲᠠᠨ ᠤ ᠵᠠᠷᠤᠴᠠ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠪᠤᠶᠤ ᠪᠤᠰᠤᠳ ᠲᠠᠬᠢᠯ ᠢᠶᠠᠨ ᠥᠭᠡᠷᠡ ᠪᠤᠷᠬᠠᠳ ᠲᠤ ᠡᠷᠭᠦᠬᠦ ᠦᠭᠡᠢ᠂ ᠵᠥᠪᠬᠡᠨ ᠶᠣᠬᠣᠸᠠ ᠳᠤ ᠯᠠ ᠡᠷᠭᠦᠬᠦ ᠪᠣᠯᠣᠨᠠ᠃ 18 ᠬᠠᠷᠢᠨ ᠨᠢᠭᠡ ᠶᠠᠪᠤᠳᠠᠯ ᠳᠤ ᠲᠠᠨ ᠤ ᠵᠠᠷᠤᠴᠠ ᠶᠢ ᠶᠣᠬᠣᠸᠠ ᠠᠭᠤᠴᠢᠯᠠᠬᠤ ᠪᠣᠯᠲᠤᠭᠠᠢ᠃ ᠮᠢᠨᠦ ᠡᠵᠡᠨ ᠷᠢᠮᠣᠨ ᠤ ᠳᠤᠭᠠᠩ ᠳᠤ ᠮᠥᠷᠭᠥᠯ ᠦᠢᠯᠡᠳᠬᠦ ᠪᠡᠷ ᠣᠷᠣᠬᠤ ᠦᠶᠡ ᠳᠡᠭᠡᠨ ᠮᠢᠨᠦ ᠭᠠᠷ ᠢ ᠲᠦᠰᠢᠳᠡᠭ ᠪᠣᠯᠬᠣᠷ ᠪᠢ ᠴᠤ ᠷᠢᠮᠣᠨ ᠤ ᠳᠤᠭᠠᠩ ᠳᠤ ᠪᠥᠬᠥᠢᠬᠦ ᠪᠣᠯᠳᠠᠭ ᠶᠤᠮ᠃ ᠶᠣᠬᠣᠸᠠ ᠲᠠᠨ ᠤ ᠵᠠᠷᠤᠴᠠ ᠨᠠᠮᠠᠶᠢ ᠷᠢᠮᠣᠨ ᠤ ᠳᠤᠭᠠᠩ ᠳᠤ ᠪᠥᠬᠥᠢᠬᠦ ᠶᠠᠪᠤᠳᠠᠯ ᠳᠡᠭᠡᠷᠡ ᠠᠭᠤᠴᠢᠯᠠᠬᠤ ᠪᠣᠯᠲᠤᠭᠠᠢ》 ᠭᠡᠬᠦ ᠳᠦ᠂ 19 ᠡᠯᠢᠱᠠ᠄ 《ᠠᠮᠤᠷ ᠠᠮᠤᠭᠤᠯᠠᠩ ᠶᠠᠪᠤᠭᠲᠤᠨ》 ᠭᠡᠪᠡ᠃ ᠬᠠᠷᠢᠨ ᠨᠠᠮᠠᠨ ᠬᠣᠯᠠᠳᠠᠭᠠ ᠦᠭᠡᠢ ᠪᠠᠢᠬᠤ ᠳᠤ᠂ 20 ᠪᠤᠷᠬᠠᠨ ᠤ ᠬᠥᠮᠦᠨ ᠡᠯᠢᠱᠠ ᠶᠢᠨ ᠵᠠᠷᠤᠴᠠ ᠭᠧᠬᠠᠽᠢ᠄ 《ᠬᠠᠷᠠ᠂ ᠮᠢᠨᠦ ᠡᠵᠡᠨ ᠡᠨᠡ ᠠᠷᠠᠮ ᠬᠥᠮᠦᠨ ᠨᠠᠮᠠᠨ ᠳᠤ ᠳᠡᠩᠳᠡᠭᠦᠦ ᠵᠥᠭᠡᠯᠡᠨ ᠬᠠᠨᠳᠤᠭᠰᠠᠨ ᠪᠠᠢᠨᠠ︕ ᠲᠡᠭᠦᠨ ᠦ ᠠᠪᠴᠢᠷᠠᠭᠰᠠᠨ ᠶᠠᠭᠤᠮᠠᠨ ᠠᠴᠠ ᠶᠠᠭᠤ ᠴᠤ ᠠᠪᠤᠭᠰᠠᠨ ᠦᠭᠡᠢ᠃ ᠶᠣᠬᠣᠸᠠ ᠶᠢᠨ ᠠᠮᠢᠳᠤ ᠯᠤᠭᠠ ᠨᠢᠭᠡᠨ ᠠᠳᠠᠯᠢ ᠪᠠᠲᠤ ᠦᠨᠡᠨ ᠭᠡᠪᠡᠯ᠂ ᠪᠢ ᠠᠷᠤ ᠠᠴᠠ ᠨᠢ ᠭᠦᠶᠦᠨ ᠣᠴᠢᠭᠠᠳ ᠲᠡᠭᠦᠨ ᠡᠴᠡ ᠵᠠᠪᠠᠯ ᠶᠠᠭᠤᠮᠠ ᠠᠪᠤᠶᠠ》 ᠬᠡᠮᠡᠭᠡᠳ 21 ᠨᠠᠮᠠᠨ ᠢ ᠨᠡᠬᠡᠨ ᠣᠳᠪᠠ᠃ ᠨᠠᠮᠠᠨ ᠲᠡᠭᠦᠨ ᠦ ᠭᠦᠶᠦᠵᠦ ᠢᠷᠡᠬᠦ ᠶᠢ ᠬᠠᠷᠠᠭᠠᠳ᠂ ᠲᠡᠭᠦᠨ ᠢ ᠤᠭᠲᠤᠬᠤ ᠪᠠᠷ ᠲᠡᠷᠭᠡᠨ ᠡᠴᠡ ᠪᠡᠨ ᠪᠠᠭᠤᠵᠤ᠄ 《ᠠᠮᠤᠷ ᠪᠠᠢᠨᠠ ᠤᠤ︖》 ᠭᠡᠵᠦ ᠠᠰᠠᠭᠤᠪᠠ᠃ 22 ᠭᠧᠬᠠᠽᠢ᠄ 《ᠠᠮᠤᠷ ᠪᠠᠢᠨᠠ᠃ ᠮᠢᠨᠦ ᠡᠵᠡᠨ ᠨᠠᠮᠠᠶᠢ ᠢᠯᠡᠭᠡᠵᠦ᠄ 〈ᠬᠠᠷᠠ᠂ ᠡᠹᠷᠠᠢᠮ ᠤᠨ ᠠᠭᠤᠯᠠᠷᠬᠠᠭ ᠨᠤᠲᠤᠭ ᠤᠨ ᠡᠰᠢ ᠦᠵᠡᠭᠦᠯᠦᠭᠴᠢ ᠱᠠᠪᠢ ᠨᠠᠷ ᠠᠴᠠ ᠬᠣᠶᠠᠷ ᠵᠠᠯᠠᠭᠤ ᠨᠠᠳᠠ ᠤᠷᠤᠭᠤ ᠰᠠᠶ᠋ᠢᠬᠠᠨ ᠢᠷᠡᠯᠡ᠃ ᠲᠡᠳᠡᠨ ᠳᠦ ᠨᠢᠭᠡ ᠲᠠᠯᠠᠨᠲ ᠮᠥᠩᠭᠥ ᠪᠣᠯᠣᠨ ᠬᠣᠶᠠᠷ ᠵᠠᠬᠠ ᠬᠤᠪᠴᠠᠰᠤ ᠥᠭᠭᠥᠨᠡ ᠤᠤ︖〉 ᠭᠡᠵᠦ ᠬᠡᠯᠡᠭᠦᠯᠵᠡᠢ》 ᠭᠡᠪᠡ᠃ 23 ᠨᠠᠮᠠᠨ᠄ 《ᠲᠡᠭᠡᠯ ᠦᠭᠡᠢ ᠶᠠᠭᠠᠬᠢᠬᠤ ᠪᠤᠢ᠂ ᠬᠣᠶᠠᠷ ᠲᠠᠯᠠᠨᠲ ᠠᠪᠴᠤ ᠬᠠᠢᠷᠠᠯᠠ》 ᠭᠡᠳ ᠭᠧᠬᠠᠽᠢ ᠶᠢ ᠢᠳᠬᠠᠨ᠂ ᠬᠣᠶᠠᠷ ᠲᠠᠯᠠᠨᠲ ᠮᠥᠩᠭᠥ ᠶᠢ ᠬᠣᠶᠠᠷ ᠵᠠᠬᠠ ᠬᠤᠪᠴᠠᠰᠤ ᠲᠠᠢ ᠬᠠᠮᠲᠤ ᠬᠣᠶᠠᠷ ᠤᠭᠤᠲᠠᠨ ᠳᠤ ᠬᠢᠵᠦ᠂ ᠬᠣᠶᠠᠷ ᠵᠠᠷᠤᠴᠠ ᠳᠠᠭᠠᠨ ᠡᠭᠦᠷᠦᠭᠦᠯᠦᠭᠡᠳ ᠭᠧᠬᠠᠽᠢ ᠶᠢᠨ ᠡᠮᠦᠨᠡ ᠶᠠᠪᠤᠭᠤᠯᠵᠠᠢ᠃ 24 ᠲᠡᠳᠡ ᠲᠣᠯᠣᠭᠠᠳ ᠳᠡᠭᠡᠷᠡ ᠬᠦᠷᠴᠦ ᠢᠷᠡᠬᠦ ᠳᠦ᠂ ᠭᠧᠬᠠᠽᠢ ᠡᠳᠡᠭᠡᠷ ᠵᠦᠢᠯᠡᠰ ᠢ ᠵᠠᠷᠤᠴᠠ ᠶᠢᠨ ᠭᠠᠷ ᠠᠴᠠ ᠠᠪᠴᠤ᠂ ᠭᠡᠷ ᠲᠦ ᠣᠷᠣᠭᠤᠯᠤᠭᠠᠳ ᠲᠡᠳᠡᠨ ᠢ ᠪᠤᠴᠠᠭᠠᠯᠠ᠃
25 ᠲᠡᠷᠡ ᠭᠡᠷ ᠲᠦ ᠣᠷᠣᠵᠤ ᠡᠵᠡᠨ ᠦ ᠪᠠᠨ ᠡᠮᠦᠨᠡ ᠵᠣᠭᠰᠣᠬᠤ ᠳᠤ᠂ ᠡᠯᠢᠱᠠ᠄ 《ᠭᠧᠬᠠᠽᠢ᠂ ᠴᠢ ᠬᠠᠮᠢᠭᠠ ᠪᠠᠢᠪᠠ︖》 ᠭᠡᠵᠦ ᠠᠰᠠᠭᠤᠪᠠ᠃ ᠲᠡᠷᠡ᠄ 《ᠲᠠᠨ ᠤ ᠵᠠᠷᠤᠴᠠ ᠬᠠᠮᠢᠭᠠ ᠴᠤ ᠶᠠᠪᠤᠭᠰᠠᠨ ᠦᠭᠡᠢ》 ᠭᠡᠰᠡᠨ ᠳᠦ᠂ 26 ᠡᠯᠢᠱᠠ᠄ 《ᠨᠥᠭᠥᠭᠡ ᠬᠥᠮᠦᠨ ᠴᠢᠮᠠᠶᠢ ᠤᠭᠲᠤᠬᠤ ᠪᠠᠷ ᠲᠡᠷᠭᠡᠨ ᠡᠴᠡ ᠪᠡᠨ ᠪᠠᠭᠤᠬᠤ ᠳᠤ᠂ ᠮᠢᠨᠦ ᠵᠢᠷᠦᠬᠡ ᠬᠥᠳᠡᠯᠦᠭᠡ ᠦᠭᠡᠢ 8 ᠭᠡᠵᠢ ᠤᠤ︖ ᠣᠳᠣ ᠴᠢᠨᠢ ᠮᠥᠩᠭᠥ᠂ ᠬᠤᠪᠴᠠᠰᠤ᠂ ᠴᠢᠳᠦᠨ᠂ ᠦᠵᠦᠮ ᠦᠨ ᠬᠦᠷᠢᠶᠡᠯᠡᠩ᠂ ᠬᠣᠨᠢ᠂ ᠦᠬᠡᠷ᠂ ᠡᠷᠡ ᠡᠮᠡ ᠪᠣᠭᠣᠯ ᠵᠡᠷᠭᠡ ᠶᠢ ᠠᠪᠴᠤ ᠪᠣᠯᠬᠤ ᠴᠠᠭ ᠤᠤ︖ 27 ᠨᠠᠮᠠᠨ ᠤ ᠤᠶᠠᠮᠠᠨ ᠡᠪᠡᠳᠴᠢᠨ ᠴᠢᠮᠠ ᠳᠤ ᠪᠣᠯᠣᠨ ᠴᠢᠨᠦ ᠦᠷᠡ ᠤᠳᠤᠮ ᠳᠤ ᠮᠥᠩᠬᠡᠳᠡ ᠲᠤᠰᠬᠤ ᠪᠣᠯᠲᠤᠭᠠᠢ》 ᠭᠡᠪᠡ᠃ ᠭᠧᠬᠠᠽᠢ ᠡᠯᠢᠱᠠ ᠶᠢᠨ ᠬᠠᠵᠠᠭᠤ ᠠᠴᠠ ᠭᠠᠷᠴᠤ ᠢᠷᠡᠬᠦ ᠳᠡᠭᠡᠨ ᠤᠶᠠᠮᠠᠨ ᠡᠪᠡᠳᠴᠢᠨ ᠡᠴᠡ ᠪᠣᠯᠣᠭᠠᠳ ᠴᠠᠰᠤ ᠴᠠᠭᠠᠨ ᠪᠣᠯᠣᠭᠰᠠᠨ ᠪᠠᠢᠪᠠ᠃