ᠬᠠᠭᠠᠳ ᠤᠨ ᠳᠡᠳ᠋ ᠬᠣᠷᠢ
ᠾᠧᠽᠧᠺᠢᠶᠠ ᠶᠢᠨ ᠡᠳᠡᠭᠡᠷᠡᠯ
1 ᠲᠡᠷᠡ ᠡᠳᠦᠷ ᠤᠳ ᠲᠤ ᠾᠧᠽᠧᠺᠢᠶᠠ ᠡᠪᠡᠳᠴᠢᠯᠡᠵᠦ ᠦᠬᠦᠬᠦ ᠣᠢᠷᠠᠲᠤᠯᠠ᠃ ᠠᠮᠣᠽ ᠤᠨ ᠬᠦᠦ ᠡᠰᠢ ᠦᠵᠡᠭᠦᠯᠦᠭᠴᠢ ᠢᠰᠠᠢᠶᠠ ᠲᠡᠭᠦᠨ ᠤᠷᠤᠭᠤ ᠢᠷᠡᠭᠡᠳ᠄ 《ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠭᠡᠷ ᠦᠨ ᠬᠢᠨ ᠳᠡᠭᠡᠨ ᠭᠡᠷᠢᠶᠡᠰ ᠦᠯᠡᠳᠡᠭᠡ᠃ ᠴᠢ ᠡᠳᠡᠭᠡᠷᠡᠬᠦ ᠦᠭᠡᠢ᠂ ᠦᠬᠦᠨᠡ〉》 ᠭᠡᠪᠡ᠃ 2 ᠾᠧᠽᠧᠺᠢᠶᠠ ᠨᠢᠭᠤᠷ ᠢᠶᠠᠨ ᠬᠠᠨᠠ ᠤᠷᠤᠭᠤ ᠬᠠᠷᠠᠭᠤᠯᠵᠤ ᠶᠣᠬᠣᠸᠠ ᠳᠤ ᠳᠠᠭᠠᠳᠬᠠᠨ᠄ 3 《ᠲᠠᠨ ᠠᠴᠠ ᠭᠤᠶᠤᠶᠠ᠂ ᠶᠣᠬᠣᠸᠠ ᠡ᠂ ᠪᠢ ᠲᠠᠨ ᠤ ᠡᠮᠦᠨᠡ ᠦᠨᠡᠨ ᠢᠶᠡᠷ᠂ ᠴᠢᠩ ᠰᠡᠳᠬᠢᠯ ᠢᠶᠠᠷ ᠢᠶᠠᠨ ᠠᠮᠢᠳᠤᠷᠠᠵᠤ᠂ ᠲᠠᠨ ᠤ ᠮᠡᠯᠮᠡᠢ ᠳᠦ ᠰᠠᠢᠨ ᠢ ᠦᠢᠯᠡᠳᠴᠦ ᠪᠠᠢᠭᠰᠠᠨ ᠢ ᠣᠳᠣ ᠰᠠᠨᠠᠭᠠᠴᠢ》 ᠭᠡᠵᠦ ᠬᠡᠯᠡᠭᠡᠳ ᠴᠤᠷᠬᠢᠷᠠᠨ ᠤᠬᠢᠯᠠᠪᠠ᠃ 4 ᠢᠰᠠᠢᠶᠠ ᠳᠤᠮᠳᠠ ᠬᠦᠷᠢᠶᠡᠨ ᠡᠴᠡ ᠴᠤ ᠭᠠᠷᠬᠤ ᠠᠴᠠ ᠡᠮᠦᠨᠡ ᠶᠣᠬᠣᠸᠠ ᠶᠢᠨ ᠦᠭᠡ ᠲᠡᠭᠦᠨ ᠳᠦ ᠢᠷᠡᠵᠦ᠄ 5 《ᠴᠢ ᠪᠤᠴᠠᠵᠤ ᠣᠴᠢᠭᠠᠳ ᠮᠢᠨᠦ ᠠᠷᠠᠳ ᠲᠦᠮᠡᠨ ᠦ ᠤᠳᠤᠷᠢᠳᠤᠭᠴᠢ ᠾᠧᠽᠧᠺᠢᠶᠠ ᠳᠤ ᠬᠡᠯᠡᠭᠲᠦᠨ᠄ ᠴᠢᠨᠦ ᠡᠪᠦᠭᠡ ᠡᠴᠢᠭᠡ ᠳ᠋ᠠᠸᠢᠳ᠋ ᠤᠨ ᠪᠤᠷᠬᠠᠨ ᠶᠣᠬᠣᠸᠠ ᠡᠢᠨ ᠬᠦ ᠠᠢᠯᠠᠳᠴᠤ ᠪᠠᠢᠨᠠ᠄ 〈ᠪᠢ ᠴᠢᠨᠦ ᠳᠠᠭᠠᠳᠬᠠᠯ ᠢ ᠰᠣᠨᠣᠰᠴᠤ᠂ ᠴᠢᠨᠦ ᠨᠢᠯᠪᠤᠰᠤ ᠶᠢ ᠬᠠᠷᠠᠯᠠ᠃ ᠬᠠᠷᠠ᠂ ᠪᠢ ᠴᠢᠮᠠᠶᠢ ᠡᠳᠡᠭᠡᠭᠡᠨᠡ︕ ᠭᠤᠷᠪᠠᠳᠠᠬᠢ ᠡᠳᠦᠷ ᠲᠡᠭᠡᠨ ᠴᠢ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡ ᠥᠭᠡᠳᠡ ᠣᠴᠢᠨᠠ᠃ 6 ᠪᠢ ᠴᠢᠨᠦ ᠡᠳᠦᠷ ᠤᠳ ᠳᠡᠭᠡᠷᠡ ᠠᠷᠪᠠᠨ ᠲᠠᠪᠤᠨ ᠵᠢᠯ ᠢ ᠨᠡᠮᠡᠶᠡ᠂ ᠪᠢ ᠴᠢᠮᠠᠶᠢ ᠪᠣᠯᠣᠨ ᠡᠨᠡ ᠬᠣᠲᠠ ᠶᠢ ᠠᠰᠢᠷᠢᠶᠠ ᠶᠢᠨ ᠬᠠᠭᠠᠨ ᠤ ᠭᠠᠷ ᠠᠴᠠ ᠠᠪᠤᠷᠠᠵᠤ᠂ ᠥᠪᠡᠷ ᠦᠨ ᠢᠶᠠᠨ ᠡᠮᠦᠨᠡ ᠡᠴᠡ ᠪᠣᠯᠣᠨ ᠮᠢᠨᠦ ᠵᠠᠷᠤᠴᠠ ᠳ᠋ᠠᠸᠢᠳ᠋ ᠤᠨ ᠡᠮᠦᠨᠡ ᠡᠴᠡ ᠡᠨᠡ ᠬᠣᠲᠠ ᠶᠢ ᠬᠠᠮᠠᠭᠠᠯᠠᠨᠠ〉》 ᠬᠡᠮᠡᠨ ᠠᠢᠯᠠᠳᠤᠯᠠ᠃ 7 ᠢᠰᠠᠢᠶᠠ᠄ 《ᠢᠨᠵᠢᠷ ᠤᠨ ᠵᠢᠭᠤᠷᠠᠮᠠᠯ ᠪᠡᠯᠡᠳᠬᠡ》 ᠭᠡᠬᠦ ᠳᠦ᠂ ᠬᠥᠮᠦᠰ ᠲᠡᠭᠦᠨ ᠢ ᠪᠡᠯᠡᠳᠬᠡᠭᠡᠳ ᠬᠠᠭᠠᠨ ᠤ ᠬᠠᠲᠠᠭᠢ ᠳᠡᠭᠡᠷᠡ ᠲᠠᠯᠪᠢᠭᠰᠠᠨ ᠳᠤ᠂ ᠾᠧᠽᠧᠺᠢᠶᠠ ᠡᠳᠡᠭᠡᠪᠡ᠃
8 ᠾᠧᠽᠧᠺᠢᠶᠠ ᠢᠰᠠᠢᠶᠠ ᠠᠴᠠ᠄ 《ᠶᠣᠬᠣᠸᠠ ᠨᠠᠮᠠᠶᠢ ᠡᠳᠡᠭᠡᠭᠡᠵᠦ᠂ ᠭᠤᠷᠪᠠᠳᠠᠬᠢ ᠡᠳᠦᠷ ᠨᠢ ᠶᠣᠬᠣᠸᠠ ᠶᠢᠨ ᠥᠷᠭᠥᠭᠡ ᠥᠭᠡᠳᠡ ᠣᠴᠢᠬᠤ ᠶᠢᠨ ᠮᠢᠨᠢ ᠲᠡᠮᠳᠡᠭ ᠶᠠᠭᠤ ᠪᠤᠢ︖》 ᠭᠡᠵᠦ ᠠᠰᠠᠭᠤᠪᠠ᠃ 9 ᠢᠰᠠᠢᠶᠠ᠄ 《ᠶᠣᠬᠣᠸᠠ ᠶᠢᠨ ᠠᠢᠯᠠᠳᠤᠭᠰᠠᠨ ᠢᠶᠠᠨ ᠪᠡᠶᠡᠯᠡᠭᠦᠯᠬᠦ ᠲᠡᠮᠳᠡᠭ ᠡᠨᠡ ᠪᠠᠢᠨᠠ᠄ ᠰᠡᠭᠦᠳᠡᠷ ᠢ ᠠᠷᠪᠠᠨ ᠠᠯᠬᠤᠮ ᠤᠷᠤᠭᠰᠢᠯᠠᠭᠤᠯᠬᠤ ᠤᠤ︖ ᠡᠰᠡᠪᠡᠯ ᠠᠷᠪᠠᠨ ᠠᠯᠬᠤᠮ ᠤᠬᠤᠷᠢᠭᠤᠯᠬᠤ ᠤᠤ︖》 ᠭᠡᠪᠡ᠃ 10 ᠾᠧᠽᠧᠺᠢᠶᠠ ᠬᠠᠷᠢᠭᠤ ᠳᠤᠨᠢ᠄ 《ᠰᠡᠭᠦᠳᠡᠷ ᠢ ᠠᠷᠪᠠᠨ ᠠᠯᠬᠤᠮ ᠤᠷᠤᠭᠰᠢᠯᠠᠭᠤᠯᠬᠤ ᠨᠢ ᠠᠮᠠᠷᠬᠠᠨ᠃ ᠲᠡᠭᠡᠬᠦ ᠦᠭᠡᠢ᠂ ᠬᠠᠷᠢᠨ ᠰᠡᠭᠦᠳᠡᠷ ᠢ ᠠᠷᠪᠠᠨ ᠠᠯᠬᠤᠮ ᠤᠬᠤᠷᠢᠭᠤᠯᠤᠭ》 ᠭᠡᠵᠦ ᠬᠡᠯᠡᠵᠡᠢ᠃ 11 ᠡᠰᠢ ᠦᠵᠡᠭᠦᠯᠦᠭᠴᠢ ᠢᠰᠠᠢᠶᠠ ᠶᠣᠬᠣᠸᠠ ᠶᠢ ᠳᠠᠭᠤᠳᠠᠨ ᠭᠤᠶᠤᠬᠤ ᠳᠤ᠂ ᠶᠣᠬᠣᠸᠠ ᠠᠬᠠᠽ ᠤᠨ ᠱᠠᠲᠤ ᠪᠠᠷ ᠥᠩᠭᠡᠷᠡᠨ ᠪᠠᠭᠤᠭᠰᠠᠨ ᠰᠡᠭᠦᠳᠡᠷ ᠢ ᠠᠷᠪᠠᠨ ᠠᠯᠬᠤᠮ ᠤᠬᠤᠷᠢᠭᠤᠯᠪᠠ᠃
ᠡᠯᠴᠢᠳ ᠲᠤ ᠦᠵᠡᠭᠦᠯᠦᠭᠰᠡᠨ ᠡᠷᠳᠡᠨᠢᠰ
12 ᠲᠡᠷᠡ ᠦᠶᠡ ᠳᠦ ᠾᠧᠽᠧᠺᠢᠶᠠ ᠶᠢᠨ ᠡᠪᠡᠳᠴᠢᠨ ᠲᠡᠢ ᠪᠠᠢᠭᠰᠠᠨ ᠢ ᠪᠠᠪᠢᠯᠣᠨ ᠤ ᠬᠠᠭᠠᠨ ᠪᠠᠯᠠᠳᠠᠨ ᠤ ᠬᠦᠦ ᠪᠧᠷᠣᠳᠠᠭ ᠪᠠᠯᠠᠳᠠᠨ ᠳᠤᠭᠤᠯᠤᠭᠠᠳ᠂ ᠲᠡᠭᠦᠨ ᠳᠦ ᠵᠠᠬᠢᠳᠠᠯ ᠪᠠ ᠪᠡᠯᠡᠭ ᠢᠯᠡᠭᠡᠪᠡ᠃ 13 ᠾᠧᠽᠧᠺᠢᠶᠠ ᠡᠯᠴᠢᠳ ᠢ ᠬᠦᠯᠢᠶᠡᠨ ᠠᠪᠤᠭᠰᠠᠨ ᠪᠥᠭᠡᠳ ᠲᠡᠳᠡᠨ ᠳᠦ ᠮᠥᠩᠭᠥ᠂ ᠠᠯᠲᠠ᠂ ᠠᠩᠬᠢᠯᠤᠮᠠ ᠦᠨᠦᠷᠲᠡᠨ᠂ ᠦᠨᠡᠲᠦ ᠲᠣᠰᠣ ᠵᠡᠷᠭᠡ ᠦᠨᠡᠲᠦ ᠵᠦᠢᠯᠡᠰ ᠦᠨ ᠬᠥᠮᠥᠷᠭᠡ᠂ ᠵᠡᠪᠰᠡᠭ ᠦᠨ ᠬᠥᠮᠥᠷᠭᠡ ᠪᠣᠯᠣᠨ ᠬᠠᠳᠠᠭᠠᠯᠠᠬᠤ ᠭᠠᠵᠠᠷ ᠲᠤ ᠪᠠᠢᠭᠠ ᠪᠦᠭᠦᠳᠡ ᠪᠡᠨ ᠦᠵᠡᠭᠦᠯᠪᠡ᠃ ᠾᠧᠽᠧᠺᠢᠶᠠ ᠢᠩᠭᠢᠵᠦ ᠥᠪᠡᠷ ᠦᠨ ᠢᠶᠠᠨ ᠣᠷᠳᠣᠨ ᠳᠤ ᠪᠠᠢᠭᠠ᠂ ᠪᠠᠰᠠ ᠡᠵᠡᠮᠰᠢᠯ ᠳᠤ ᠪᠠᠢᠭᠠ ᠪᠦᠬᠦᠨ ᠢᠶᠡᠨ ᠲᠡᠳᠡᠨ ᠳᠦ ᠦᠯᠡᠳᠡᠭᠡᠯ ᠦᠭᠡᠢ ᠦᠵᠡᠭᠦᠯᠵᠡᠢ᠃ 14 ᠡᠰᠢ ᠦᠵᠡᠭᠦᠯᠦᠭᠴᠢ ᠢᠰᠠᠢᠶᠠ ᠾᠧᠽᠧᠺᠢᠶᠠ ᠬᠠᠭᠠᠨ ᠤᠷᠤᠭᠤ ᠢᠷᠡᠵᠦ᠄ 《ᠡᠨᠡ ᠬᠥᠮᠦᠰ ᠶᠠᠭᠤ ᠶᠠᠷᠢᠭᠰᠠᠨ ᠪᠤᠢ︖ ᠲᠡᠳᠡ ᠬᠠᠮᠢᠭᠠ ᠠᠴᠠ ᠲᠠᠨ ᠢ ᠵᠣᠷᠢᠵᠤ ᠢᠷᠡᠪᠡ︖》 ᠭᠡᠵᠦ ᠠᠰᠠᠭᠤᠬᠤ ᠳᠤ᠂ ᠾᠧᠽᠧᠺᠢᠶᠠ᠄ 《ᠲᠡᠳᠡ ᠠᠯᠤᠰ ᠬᠣᠯᠠ ᠶᠢᠨ ᠣᠷᠣᠨ᠂ ᠪᠠᠪᠢᠯᠣᠨ ᠠᠴᠠ ᠢᠷᠡᠭᠰᠡᠨ》 ᠭᠡᠵᠦ ᠬᠠᠷᠢᠭᠤᠯᠪᠠ᠃ 15 ᠢᠰᠠᠢᠶᠠ᠄ 《ᠲᠡᠳᠡ ᠲᠠᠨ ᠤ ᠣᠷᠳᠣᠨ ᠳᠤ ᠶᠠᠭᠤ ᠦᠵᠡᠪᠡ︖》 ᠭᠡᠬᠦ ᠳᠦ᠂ ᠾᠧᠽᠧᠺᠢᠶᠠ᠄ 《ᠲᠡᠳᠡ ᠮᠠᠨ ᠤ ᠣᠷᠳᠣᠨ ᠳᠤ ᠪᠠᠢᠭᠠ ᠪᠦᠬᠦᠨ ᠢ ᠦᠵᠡᠭᠰᠡᠨ᠃ ᠪᠢ ᠬᠥᠮᠥᠷᠭᠡ ᠲᠡᠭᠡᠨ ᠪᠠᠢᠭᠠ ᠪᠦᠬᠦᠨ ᠢ ᠦᠯᠡᠳᠡᠭᠡᠯ ᠦᠭᠡᠢ ᠲᠡᠳᠡᠨ ᠳᠦ ᠦᠵᠡᠭᠦᠯᠦᠭᠰᠡᠨ》 ᠭᠡᠪᠡ᠃
16 ᠢᠰᠠᠢᠶᠠ ᠾᠧᠽᠧᠺᠢᠶᠠ ᠳᠤ᠄ 《ᠲᠠ ᠶᠣᠬᠣᠸᠠ ᠶᠢᠨ ᠦᠭᠡ ᠶᠢ ᠰᠣᠨᠣᠰᠣᠭᠲᠤᠨ᠄ 17 ᠶᠣᠬᠣᠸᠠ᠄ 〈ᠬᠠᠷᠠ᠂ ᠴᠢᠨᠦ ᠣᠷᠳᠣᠨ ᠳᠤ ᠪᠠᠢᠭᠠ ᠪᠦᠬᠦᠨ᠂ ᠴᠢᠨᠦ ᠡᠴᠢᠭᠡ ᠡᠪᠦᠭᠡᠳ ᠦᠨ ᠥᠨᠥᠳᠥᠷ ᠬᠦᠷᠲᠡᠯᠡ ᠴᠤᠭᠯᠠᠭᠤᠯᠤᠭᠰᠠᠨ ᠪᠦᠬᠦᠨ ᠢ ᠪᠠᠪᠢᠯᠣᠨ ᠤᠷᠤᠭᠤ ᠵᠥᠭᠡᠭᠡᠬᠦ ᠡᠳᠦᠷ ᠤᠳ ᠢᠷᠡᠵᠦ ᠪᠠᠢᠨᠠ᠂ ᠲᠡᠷᠡ ᠦᠶᠡ ᠳᠦ ᠶᠠᠭᠤ ᠴᠤ ᠦᠯᠡᠳᠡᠬᠦ ᠦᠭᠡᠢ〉 ᠭᠡᠵᠦ ᠠᠢᠯᠠᠳᠤᠨ᠂ 18 ᠪᠠᠰᠠ 〈ᠲᠠᠨ ᠠᠴᠠ ᠲᠥᠷᠥᠬᠦ ᠶᠠᠰᠤ ᠮᠢᠬᠠᠨ ᠤ ᠲᠠᠰᠤᠷᠬᠠᠢ ᠪᠣᠯᠬᠤ ᠦᠷᠡ ᠤᠳᠤᠮ ᠤᠨ ᠴᠢᠨᠢ ᠵᠠᠷᠢᠮ ᠨᠢ ᠴᠥᠯᠡᠭᠳᠡᠵᠦ᠂ ᠪᠠᠪᠢᠯᠣᠨ ᠤ ᠬᠠᠭᠠᠨ ᠤ ᠣᠷᠳᠣᠨ ᠳᠤ ᠲᠠᠢᠭᠠᠨ ᠪᠣᠯᠣᠨᠠ〉》 ᠭᠡᠬᠦ ᠳᠦ᠂ 19 ᠾᠧᠽᠧᠺᠢᠶᠠ ᠢᠰᠠᠢᠶᠠ ᠳᠤ᠄ 《ᠲᠠᠨ ᠢᠶᠠᠷ ᠬᠡᠯᠡᠭᠦᠯᠦᠭᠰᠡᠨ ᠶᠣᠬᠣᠸᠠ ᠶᠢᠨ ᠦᠭᠡ ᠰᠠᠢᠨ ᠶᠤᠮ》 ᠭᠡᠪᠡ᠃ ᠲᠡᠷᠡ᠄ 《ᠮᠢᠨᠦ ᠡᠳᠦᠷ ᠤᠳ ᠲᠤ ᠯᠠ ᠠᠮᠤᠷ ᠠᠮᠤᠭᠤᠯᠠᠩ᠂ ᠲᠣᠭᠲᠠᠭᠤᠨ ᠪᠠᠢᠪᠠᠯ ᠰᠠᠢᠨ ᠪᠢᠰᠢ ᠤᠤ︖》 ᠭᠡᠵᠦ ᠪᠣᠳᠣᠵᠠᠢ᠃
20 ᠾᠧᠽᠧᠺᠢᠶᠠ ᠶᠢᠨ ᠪᠤᠰᠤᠳ ᠶᠠᠪᠤᠳᠠᠯ᠂ ᠲᠡᠭᠦᠨ ᠦ ᠡᠷᠬᠡ ᠮᠡᠳᠡᠯ ᠬᠢᠭᠡᠳ ᠴᠥᠭᠥᠷᠥᠮ ᠪᠣᠯᠣᠨ ᠲᠦᠭᠡᠭᠡᠯ ᠤᠰᠤᠨ ᠤ ᠬᠣᠭᠣᠯᠠᠢ ᠪᠠᠢᠭᠤᠯᠵᠤ᠂ ᠬᠣᠲᠠ ᠤᠷᠤᠭᠤ ᠤᠰᠤ ᠲᠠᠲᠠᠭᠰᠠᠨ ᠵᠡᠷᠭᠡ ᠨᠢ ᠶᠦᠳᠠ ᠶᠢᠨ ᠬᠠᠭᠠᠳ ᠤᠨ ᠨᠠᠮᠲᠠᠷ ᠲᠤ ᠪᠢᠴᠢᠭᠳᠡᠭᠰᠡᠨ ᠪᠢᠰᠢ ᠤᠤ︖ 21 ᠾᠧᠽᠧᠺᠢᠶᠠ ᠡᠴᠢᠭᠡ ᠡᠪᠦᠭᠡᠳ ᠦᠨ ᠢᠶᠠᠨ ᠬᠠᠮᠲᠤ ᠨᠣᠢᠷᠰᠣᠵᠤ᠂ ᠬᠦᠦ ᠮᠠᠨᠠᠰᠧ ᠨᠢ ᠲᠡᠭᠦᠨ ᠢ ᠵᠠᠯᠭᠠᠮᠵᠢᠯᠠᠨ ᠬᠠᠭᠠᠨ ᠪᠣᠯᠪᠠ᠃