ᠶᠣᠱᠦ᠋ᠶᠠ ᠬᠣᠶᠠᠷ
ᠶᠧᠷᠢᠺᠣ ᠳᠤ ᠲᠤᠷᠰᠢᠭᠤᠯ ᠢᠯᠡᠭᠡᠪᠡ
1 ᠨᠦᠨ ᠦ ᠬᠦᠦ ᠶᠣᠱᠦ᠋ᠶᠠ ᠬᠤᠸᠠᠢᠰᠠ ᠮᠣᠳᠣᠨ ᠣᠢ ᠠᠴᠠ ᠬᠣᠶᠠᠷ ᠲᠤᠷᠰᠢᠭᠤᠯ ᠢ ᠨᠢᠭᠤᠴᠠ ᠪᠠᠷ ᠢᠯᠡᠭᠡᠪᠡ᠃ ᠲᠡᠷᠡ᠄ 《ᠲᠡᠷᠡ ᠨᠤᠲᠤᠭ ᠲᠤ ᠣᠴᠢᠵᠤ᠂ ᠢᠯᠠᠩ᠋ᠭᠤᠶᠠ ᠶᠧᠷᠢᠺᠣ ᠶᠢ ᠲᠠᠩᠨᠠᠭᠲᠤᠨ》 ᠭᠡᠰᠡᠨ ᠳᠦ᠂ ᠲᠡᠳᠡ ᠶᠠᠪᠤᠵᠤ ᠷᠠᠬᠠᠪ ᠭᠡᠭᠴᠢ ᠶᠠᠩ᠋ᠬᠠᠨ ᠡᠮᠡᠭᠲᠡᠢ ᠶᠢᠨ ᠭᠡᠷ ᠲᠦ ᠢᠷᠡᠭᠡᠳ ᠲᠡᠨᠳᠡ ᠪᠡᠨ ᠪᠠᠢᠪᠠ᠃ 2 ᠬᠡᠨ ᠨᠢᠭᠡ ᠨᠢ ᠶᠧᠷᠢᠺᠣ ᠶᠢᠨ ᠬᠠᠭᠠᠨ ᠳᠤ᠄ 《ᠬᠠᠷᠠ᠂ ᠥᠨᠥ ᠣᠷᠣᠢ ᠢᠰᠷᠧᠯ ᠤᠨ ᠬᠡᠳᠦᠨ ᠬᠥᠮᠦᠨ ᠮᠠᠨ ᠤ ᠨᠤᠲᠤᠭ ᠢ ᠲᠠᠩᠨᠠᠬᠤ ᠪᠠᠷ ᠢᠷᠡᠭᠰᠡᠨ ᠪᠠᠢᠨᠠ︕》 ᠭᠡᠵᠦ ᠳᠤᠭᠤᠯᠭᠠᠭᠰᠠᠨ ᠳᠤ᠂ 3 ᠶᠧᠷᠢᠺᠣ ᠶᠢᠨ ᠬᠠᠭᠠᠨ ᠷᠠᠬᠠᠪ ᠲᠤ ᠬᠡᠯᠡ ᠶᠠᠪᠤᠭᠤᠯᠤᠨ᠄ 《ᠲᠠᠨ ᠤ ᠳᠤ ᠢᠷᠡᠵᠦ᠂ ᠭᠡᠷ ᠲᠦ ᠴᠢᠨᠢ ᠣᠷᠣᠭᠰᠠᠨ ᠬᠥᠮᠦᠰ ᠢ ᠭᠠᠷᠭᠠᠵᠤ ᠢᠷᠡ᠂ ᠲᠡᠳᠡ ᠮᠠᠨ ᠤ ᠪᠦᠬᠦ ᠨᠤᠲᠤᠭ ᠢ ᠲᠠᠩᠨᠠᠬᠤ ᠪᠠᠷ ᠢᠷᠡᠭᠰᠡᠨ ᠶᠤᠮ》 ᠭᠡᠯᠡ᠃ 4 ᠬᠠᠷᠢᠨ ᠥᠨᠥᠬᠢ ᠡᠮᠡᠭᠲᠡᠢ ᠬᠣᠶᠠᠷ ᠡᠷᠡ ᠶᠢ ᠨᠢᠭᠤᠵᠤ ᠳᠠᠯᠳᠠᠯᠠᠭᠰᠠᠨ ᠪᠠᠢᠯᠠ᠃ ᠲᠡᠷᠡ᠄ 《ᠬᠥᠮᠦᠰ ᠨᠠᠳᠠ ᠳᠡᠭᠡᠷᠡ ᠢᠷᠡᠭᠰᠡᠨ ᠨᠢ ᠦᠨᠡᠨ᠃ ᠭᠡᠪᠡᠴᠦ ᠬᠠᠮᠢᠭᠠ ᠠᠴᠠ ᠢᠷᠡᠭᠰᠡᠨ ᠢ ᠨᠢ ᠪᠢ ᠮᠡᠳᠡᠭᠰᠡᠨ ᠦᠭᠡᠢ᠃ 5 ᠦᠳᠡᠰᠢ ᠶᠢᠨ ᠪᠦᠷᠦᠩᠬᠦᠢ ᠪᠠᠷ ᠬᠠᠭᠠᠯᠭᠠ ᠬᠠᠭᠠᠬᠤ ᠴᠠᠭ ᠪᠣᠯᠵᠤ ᠪᠠᠢᠬᠤ ᠳᠤ ᠲᠡᠳᠡ ᠭᠠᠷᠴᠤ ᠶᠠᠪᠤᠭᠰᠠᠨ᠃ ᠲᠡᠷᠡ ᠬᠥᠮᠦᠰ ᠬᠠᠮᠢᠭᠠᠰᠢ ᠪᠠᠨ ᠶᠠᠪᠤᠭᠰᠠᠨ ᠢ ᠪᠢ ᠮᠡᠳᠡᠬᠦ ᠦᠭᠡᠢ᠃ ᠲᠡᠳᠡᠨ ᠢ ᠬᠤᠷᠳᠤᠨ ᠮᠥᠰᠬᠢᠨ ᠬᠥᠭᠡᠭᠡᠵᠡᠭᠡ᠂ ᠲᠡᠭᠡᠪᠡᠯ ᠭᠦᠢᠴᠡᠬᠦ ᠪᠤᠢ》 ᠭᠡᠯᠡ᠃ 6 ᠬᠠᠷᠢᠨ ᠲᠡᠷᠡ ᠥᠪᠡᠷ ᠢᠶᠡᠨ ᠲᠡᠳᠡᠨ ᠢ ᠳᠡᠭᠡᠪᠦᠷ ᠳᠡᠭᠡᠷᠡ ᠭᠠᠷᠭᠠᠨ᠂ ᠲᠡᠨᠳᠡ ᠳᠡᠪᠢᠰᠦᠭᠰᠡᠨ ᠮᠠᠭᠠᠯᠢᠩ᠋ᠭᠤ ᠶᠢᠨ ᠡᠰᠢᠨ ᠳᠤᠮᠳᠠ ᠨᠢᠭᠤᠭᠰᠠᠨ ᠪᠠᠢᠵᠠᠢ᠃ 7 ᠢᠩᠭᠢᠭᠡᠳ ᠮᠥᠰᠭᠢᠭ᠍ᠴᠢᠳ ᠲᠡᠷᠡ ᠬᠣᠶᠠᠷ ᠤᠨ ᠬᠣᠢᠨᠠ ᠠᠴᠠ ᠶᠣᠷᠳᠠᠨ ᠳᠤ ᠬᠦᠷᠬᠦ ᠵᠠᠮ ᠢᠶᠠᠷ ᠣᠯᠣᠮ ᠬᠦᠷᠲᠡᠯᠡ ᠮᠥᠷᠳᠡᠪᠡ᠃ ᠲᠡᠳᠡ ᠭᠠᠷᠤᠮᠠᠭᠴᠠ ᠬᠠᠭᠠᠯᠭᠠ ᠬᠠᠭᠠᠭᠳᠠᠭᠰᠠᠨ ᠪᠠᠢᠯᠠ᠃
ᠷᠠᠬᠠᠪ ᠲᠤ ᠥᠭᠭᠥᠭᠰᠡᠨ ᠠᠮᠠᠯᠠᠯᠲᠠ
8 ᠨᠥᠭᠥᠭᠡ ᠬᠣᠶᠠᠷ ᠬᠠᠵᠠᠭᠤᠯᠠᠬᠤ ᠠᠴᠠ ᠡᠮᠦᠨᠡ᠂ ᠷᠠᠬᠠᠪ ᠳᠡᠭᠡᠪᠦᠷ ᠥᠭᠡᠳᠡ ᠭᠠᠷᠴᠤ᠂ 9 ᠲᠡᠳᠡᠨ ᠳᠡᠭᠡᠷᠡ ᠢᠷᠡᠭᠡᠳ᠄ 《ᠶᠣᠬᠣᠸᠠ ᠡᠨᠡ ᠭᠠᠵᠠᠷ ᠢ ᠲᠠ ᠨᠠᠷ ᠲᠤ ᠥᠭᠭᠥᠭᠰᠡᠨ ᠢ ᠪᠢ ᠮᠡᠳᠡᠨᠡ᠂ ᠲᠠ ᠨᠠᠷ ᠠᠴᠠ ᠪᠣᠯᠵᠤ ᠮᠠᠨ ᠤ ᠬᠢᠨ ᠠᠢᠳᠠᠰ ᠲᠤ ᠠᠪᠲᠠᠭᠰᠠᠨ᠂ ᠲᠠ ᠨᠠᠷ ᠤᠨ ᠡᠮᠦᠨᠡ ᠡᠨᠡ ᠨᠤᠲᠤᠭ ᠤᠨ ᠪᠦᠬᠦ ᠰᠠᠭᠤᠭᠠᠯᠢᠴᠢᠳ ᠤᠨ ᠰᠥᠰᠥ ᠨᠢ ᠬᠡᠮᠬᠡᠷᠡᠭᠰᠡᠨ ᠪᠠᠢᠨᠠ᠃ 10 ᠤᠴᠢᠷ ᠨᠢ ᠲᠠ ᠨᠠᠷ ᠶᠧᠵᠢᠫᠲ ᠡᠴᠡ ᠭᠠᠷᠬᠤ ᠳᠤ᠂ ᠶᠣᠬᠣᠸᠠ ᠤᠯᠠᠭᠠᠨ ᠲᠠᠩᠭᠢᠰ ᠤᠨ ᠤᠰᠤ ᠶᠢ ᠲᠠ ᠨᠠᠷ ᠤᠨ ᠡᠮᠦᠨᠡ ᠬᠡᠷᠬᠢᠨ ᠰᠢᠷᠭᠢᠭᠡᠭᠰᠡᠨ᠂ ᠪᠠᠰᠠ ᠲᠠ ᠨᠠᠷ ᠶᠣᠷᠳᠠᠨ ᠤ ᠵᠡᠭᠦᠨ ᠲᠠᠯᠠ ᠳᠤ ᠠᠮᠣᠷᠢᠴᠤᠳ ᠤᠨ ᠬᠣᠶᠠᠷ ᠬᠠᠭᠠᠨ ᠰᠢᠬᠣᠨ᠂ ᠤᠭ ᠨᠠᠷ ᠢ ᠬᠡᠷᠬᠢᠨ ᠪᠦᠷᠢᠮᠦᠰᠦᠨ ᠤᠰᠠᠳᠬᠠᠭᠰᠠᠨ ᠢ ᠪᠢᠳᠡ ᠰᠣᠨᠣᠰᠣᠭᠰᠠᠨ ᠪᠢᠯᠡ᠃ 11 ᠡᠭᠦᠨ ᠢ ᠰᠣᠨᠣᠰᠣᠭᠠᠳ ᠪᠢᠳᠡᠨ ᠦ ᠬᠥᠮᠦᠨ ᠪᠣᠯᠭᠠᠨ ᠲᠠ ᠨᠠᠷ ᠠᠴᠠ ᠪᠣᠯᠵᠤ ᠵᠢᠷᠦᠬᠡ ᠦᠬᠦᠵᠦ ᠵᠣᠷᠢᠭ ᠮᠣᠬᠣᠪᠠ᠃ ᠤᠴᠢᠷ ᠨᠢ ᠳᠡᠭᠡᠷᠡ ᠲᠩᠷᠢ᠂ ᠳᠣᠣᠷᠠ ᠭᠠᠵᠠᠷ ᠳᠠᠬᠢ ᠪᠤᠷᠬᠠᠨ ᠪᠣᠯ ᠭᠠᠭᠴᠠ ᠬᠦ ᠲᠠᠨ ᠤ ᠪᠤᠷᠬᠠᠨ ᠶᠣᠬᠣᠸᠠ ᠪᠢᠯᠡ᠃
12 ᠣᠳᠣ ᠲᠠ ᠨᠠᠷ ᠠᠴᠠ ᠭᠤᠶᠤᠶᠠ᠃ ᠪᠢ ᠲᠠ ᠨᠠᠷ ᠲᠤ ᠡᠨᠡᠷᠢᠯ ᠦᠵᠡᠭᠦᠯᠦᠭᠰᠡᠨ ᠤᠴᠢᠷ ᠠᠴᠠ ᠲᠠ ᠨᠠᠷ ᠴᠤ ᠮᠠᠨ ᠤ ᠭᠡᠷ ᠦᠨ ᠬᠢᠨ ᠳᠤ ᠡᠨᠡᠷᠢᠯ ᠦᠵᠡᠭᠦᠯᠦᠨᠡ ᠭᠡᠳᠡᠭ ᠢᠶᠡᠨ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠨᠠᠳᠠ ᠳᠤ ᠲᠠᠩ᠋ᠭᠠᠷᠢᠭᠯᠠᠵᠤ᠂ ᠪᠠᠲᠤᠯᠠᠭᠠ ᠥᠭᠭᠥᠨᠡ ᠤᠤ︖ 13 ᠲᠡᠭᠡᠭᠡᠳ ᠮᠢᠨᠦ ᠡᠴᠢᠭᠡ ᠡᠬᠡ᠂ ᠠᠬᠠ ᠡᠭᠡᠴᠢ ᠳᠡᠭᠦᠦ ᠨᠠᠷ ᠪᠣᠯᠣᠨ ᠲᠡᠳᠡᠨ ᠦ ᠪᠦᠬᠦ ᠭᠡᠷ ᠦᠨ ᠬᠢᠨ ᠤ ᠠᠮᠢ ᠶᠢ ᠬᠡᠯᠲᠦᠷᠢᠭᠦᠯᠦᠨ ᠦᠬᠦᠯ ᠡᠴᠡ ᠠᠪᠤᠷᠠᠭᠠᠴᠢ》 ᠭᠡᠪᠡ᠃ 14 ᠬᠣᠶᠠᠷ ᠡᠷᠡ᠄ 《ᠲᠠ ᠨᠠᠷ ᠤᠨ ᠠᠮᠢ ᠶᠢ ᠥᠪᠡᠷ ᠦᠨ ᠢᠶᠠᠨ ᠠᠮᠢ ᠪᠠᠷ ᠪᠠᠲᠤᠯᠠᠶᠠ᠂ ᠲᠠ ᠪᠢᠳᠡᠨ ᠦ ᠬᠡᠷᠡᠭ ᠢ ᠵᠠᠳᠠᠷᠠᠭᠤᠯᠬᠤ ᠦᠭᠡᠢ ᠪᠠᠢᠪᠠᠯ ᠶᠣᠬᠣᠸᠠ ᠡᠨᠡ ᠨᠤᠲᠤᠭ ᠢ ᠪᠢᠳᠡᠨ ᠳᠦ ᠥᠭᠬᠦ ᠴᠠᠭ ᠲᠤ᠂ ᠪᠢᠳᠡ ᠲᠠ ᠨᠠᠷ ᠲᠤ ᠦᠨᠡᠨᠴᠢ ᠬᠠᠢᠷᠠ ᠪᠠᠷ ᠬᠠᠨᠳᠤᠬᠤ ᠪᠣᠯᠣᠨᠠ》 ᠭᠡᠯᠡ᠃
15 ᠲᠡᠷᠡ ᠡᠮᠡᠭᠲᠡᠢ ᠬᠣᠲᠠ ᠶᠢᠨ ᠬᠠᠨᠠᠨ ᠬᠡᠷᠡᠮ ᠦᠨ ᠳᠡᠭᠡᠷᠡ ᠠᠮᠢᠳᠤᠷᠠᠵᠤ ᠪᠠᠢᠯᠠ᠃ ᠭᠡᠷ ᠨᠢ ᠬᠡᠷᠡᠮ ᠳᠡᠭᠡᠷᠡ ᠪᠠᠢᠭᠰᠠᠨ ᠤᠴᠢᠷ ᠠᠴᠠ ᠲᠡᠷᠡ ᠲᠡᠳᠡᠨ ᠢ ᠴᠣᠩ᠋ᠬᠣ ᠪᠠᠷ ᠢᠶᠠᠨ ᠣᠯᠣᠰᠣᠨ ᠳᠡᠭᠡᠰᠦ ᠪᠡᠷ ᠳᠣᠭᠣᠭᠰᠢ ᠪᠠᠭᠤᠯᠭᠠᠵᠤ᠂ 16 ᠲᠡᠳᠡᠨ ᠳᠦ᠄ 《ᠮᠥᠰᠭᠢᠭ᠍ᠴᠢᠳ ᠲᠠᠢ ᠲᠠᠭᠠᠷᠠᠯᠳᠤᠬᠤ ᠦᠭᠡᠢ ᠶᠢᠨ ᠲᠤᠯᠠᠳᠠ ᠠᠭᠤᠯᠠ ᠥᠭᠡᠳᠡ ᠶᠠᠪᠤ᠃ ᠲᠡᠨᠳᠡ ᠭᠤᠷᠪᠠᠨ ᠬᠣᠨᠣᠭ ᠨᠢᠭᠤᠭᠳᠠᠵᠤ ᠪᠠᠢᠭᠠᠳ ᠲᠡᠳᠡᠨ ᠢ ᠬᠠᠷᠢᠭᠰᠠᠨ ᠤ ᠳᠠᠷᠠᠭᠠ ᠵᠠᠮ ᠢᠶᠠᠷ ᠢᠶᠠᠨ ᠶᠠᠪᠤᠵᠤ ᠪᠣᠯᠣᠨᠠ》 ᠭᠡᠪᠡ᠃ 17 ᠲᠡᠷᠡ ᠬᠣᠶᠠᠷ ᠲᠡᠭᠦᠨ ᠳᠦ᠄ 《ᠲᠠ ᠪᠢᠳᠡᠨ ᠢᠶᠡᠷ ᠲᠠᠩ᠋ᠭᠠᠷᠢᠭᠯᠠᠭᠤᠯᠤᠭᠰᠠᠨ ᠪᠠᠢᠨᠠ᠂ ᠬᠠᠷᠢᠨ ᠪᠢᠳᠡᠨ ᠢᠶᠡᠷ ᠡᠨᠡ ᠲᠠᠩ᠋ᠭᠠᠷᠢᠭ ᠢ ᠵᠥᠷᠢᠴᠡᠭᠰᠡᠨ ᠭᠡᠮ ᠪᠤᠷᠤᠭᠤ ᠬᠢᠯᠭᠡᠬᠦ ᠦᠭᠡᠢ ᠭᠡᠪᠡᠯ᠂ 18 ᠪᠢᠳᠡᠨ ᠢ ᠡᠨᠡ ᠨᠤᠲᠤᠭ ᠲᠤ ᠣᠷᠣᠵᠤ ᠢᠷᠡᠬᠦ ᠡᠴᠡ ᠡᠮᠦᠨᠡ᠂ ᠲᠠ ᠪᠢᠳᠡᠨ ᠢ ᠪᠠᠭᠤᠯᠭᠠᠭᠰᠠᠨ ᠴᠣᠩ᠋ᠬᠣᠨ ᠠᠴᠠ ᠪᠠᠨ ᠡᠨᠡ ᠴᠢᠰ ᠤᠯᠠᠭᠠᠨ ᠤᠶᠠᠭᠠᠰᠤ ᠶᠢ ᠤᠶᠠᠵᠤ ᠡᠴᠢᠭᠡ ᠡᠬᠡ᠂ ᠠᠬᠠ ᠳᠡᠭᠦᠦ ᠪᠣᠯᠣᠨ ᠪᠦᠬᠦᠢᠯᠡ ᠭᠡᠷ ᠪᠦᠯᠢ ᠶᠢᠨ ᠬᠢᠨ ᠢᠶᠠᠨ ᠭᠡᠷ ᠲᠡᠭᠡᠨ ᠴᠤᠭᠯᠠᠭᠤᠯᠤᠭᠠᠳ ᠪᠠᠢᠬᠤ ᠶᠣᠰᠣᠲᠠᠢ᠃ 19 ᠬᠡᠷᠪᠡ ᠬᠡᠨ ᠨᠢᠭᠡᠨ ᠨᠢ ᠭᠡᠷ ᠦᠨ ᠴᠢᠨᠢ ᠬᠠᠭᠠᠯᠭᠠ ᠪᠠᠷ ᠭᠤᠳᠤᠮᠵᠢ ᠤᠷᠤᠭᠤ ᠭᠠᠷᠪᠠᠯ᠂ ᠲᠡᠭᠦᠨ ᠦ ᠴᠢᠰᠤ ᠥᠪᠡᠷ ᠦᠨ ᠬᠢᠨᠢ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠠᠭᠤᠬᠤ ᠪᠥᠭᠡᠳ ᠪᠢᠳᠡ ᠭᠡᠮ ᠪᠤᠷᠤᠭᠤ ᠪᠠᠢᠬᠤ ᠦᠭᠡᠢ᠃ ᠭᠡᠷ ᠲᠦ ᠴᠢᠨᠢ ᠲᠠᠨ ᠲᠠᠢ ᠬᠠᠮᠲᠤ ᠪᠠᠢᠭᠠ ᠬᠡᠨ ᠨᠢᠭᠡᠨ ᠳᠦ ᠭᠠᠷ ᠬᠦᠷᠦᠭᠰᠡᠨ ᠪᠠᠢᠪᠠᠯ ᠴᠢᠰᠤ ᠨᠢ ᠪᠢᠳᠡᠨ ᠦ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠠᠭᠤᠨᠠ᠃ 20 ᠬᠠᠷᠢᠨ ᠴᠢ ᠪᠢᠳᠡᠨ ᠦ ᠡᠨᠡ ᠬᠡᠷᠡᠭ ᠢ ᠵᠠᠳᠠᠷᠠᠭᠤᠯᠪᠠᠯ ᠪᠢᠳᠡᠨ ᠢᠶᠡᠷ ᠲᠠᠩ᠋ᠭᠠᠷᠢᠭᠯᠠᠭᠤᠯᠤᠭᠰᠠᠨ ᠡᠨᠡ ᠬᠦ ᠲᠠᠩ᠋ᠭᠠᠷᠢᠭ ᠳᠡᠭᠡᠷᠡ ᠪᠢᠳᠡ ᠭᠡᠮ ᠪᠤᠷᠤᠭᠤ ᠦᠭᠡᠢ》 ᠭᠡᠪᠡ᠃ 21 ᠡᠮᠡᠭᠲᠡᠢ᠄ 《ᠲᠠ ᠨᠠᠷ ᠤᠨ ᠬᠡᠯᠡᠭᠰᠡᠨ ᠢᠶᠡᠷ ᠪᠣᠯᠣᠭ》 ᠭᠡᠳ ᠲᠡᠳᠡᠨ ᠢ ᠶᠠᠪᠤᠭᠤᠯᠪᠠ᠃ ᠲᠡᠳᠡ ᠶᠠᠪᠤᠭᠰᠠᠨ ᠤ ᠳᠠᠷᠠᠭᠠ᠂ ᠲᠡᠷᠡ ᠡᠮᠡᠭᠲᠡᠢ ᠴᠢᠰ ᠤᠯᠠᠭᠠᠨ ᠤᠶᠠᠭᠠᠰᠤ ᠶᠢ ᠴᠣᠩ᠋ᠬᠣᠨ ᠠᠴᠠ ᠪᠠᠨ ᠤᠶᠠᠪᠠ᠃
22 ᠲᠡᠷᠡ ᠬᠣᠶᠠᠭᠤᠯᠠ ᠶᠠᠪᠤᠵᠤ ᠠᠭᠤᠯᠠᠨ ᠳᠤ ᠣᠴᠢᠭᠠᠳ᠂ ᠮᠥᠰᠭᠢᠭ᠍ᠴᠢᠳ ᠢ ᠪᠤᠴᠠᠲᠠᠯᠠ ᠭᠤᠷᠪᠠᠨ ᠬᠣᠨᠣᠭ ᠲᠡᠨᠳᠡ ᠪᠡᠨ ᠪᠠᠢᠪᠠ᠃ ᠮᠥᠰᠭᠢᠭ᠍ᠴᠢᠳ ᠲᠡᠳᠡᠨ ᠢ ᠵᠠᠮ ᠲᠤᠷᠰᠢ ᠬᠠᠢᠭᠰᠠᠨ ᠪᠣᠯᠪᠠᠴᠤ ᠣᠯᠣᠭᠰᠠᠨ ᠦᠭᠡᠢ᠃ 23 ᠨᠥᠭᠥᠭᠡ ᠬᠣᠶᠠᠷ ᠬᠥᠮᠦᠨ ᠠᠭᠤᠯᠠᠨ ᠠᠴᠠ ᠪᠠᠭᠤᠨ ᠭᠣᠣᠯ ᠢ ᠭᠠᠲᠤᠯᠵᠤ᠂ ᠨᠦᠨ ᠦ ᠬᠦᠦ ᠶᠣᠱᠦ᠋ᠶᠠ ᠳᠡᠭᠡᠷᠡ ᠣᠴᠢᠭᠠᠳ ᠲᠣᠬᠢᠶᠠᠯᠳᠤᠭᠰᠠᠨ ᠪᠦᠬᠦᠨ ᠢᠶᠡᠨ ᠲᠣᠭᠠᠴᠢᠨ ᠶᠠᠷᠢᠪᠠ᠃ 24 ᠲᠡᠳᠡ ᠶᠣᠱᠦ᠋ᠶᠠ ᠳᠤ᠄ 《ᠶᠣᠬᠣᠸᠠ ᠪᠦᠬᠦ ᠨᠤᠲᠤᠭ ᠢ ᠪᠢᠳᠡᠨ ᠦ ᠭᠠᠷ ᠲᠤ ᠲᠤᠰᠢᠶᠠᠭᠰᠠᠨ ᠨᠢ ᠦᠨᠡᠨ᠃ ᠲᠡᠷᠡ ᠨᠤᠲᠤᠭ ᠤᠨ ᠪᠦᠬᠦ ᠰᠠᠭᠤᠭᠠᠯᠢᠴᠢᠳ ᠪᠢᠳᠡᠨ ᠦ ᠡᠮᠦᠨᠡ ᠰᠥᠰᠥ ᠨᠢ ᠬᠡᠮᠬᠡᠷᠡᠭᠰᠡᠨ ᠪᠠᠢᠨᠠ》 ᠭᠡᠯᠡ᠃