ᠶᠣᠱᠦ᠋ᠶᠠ ᠬᠣᠷᠢ
ᠬᠣᠷᠭᠣᠳᠠᠬᠤ ᠬᠣᠲᠠ ᠨᠤᠭᠤᠳ
1 ᠶᠣᠬᠣᠸᠠ ᠶᠣᠱᠦ᠋ᠶᠠ ᠳᠤ ᠠᠢᠯᠠᠳᠤᠨ᠄ 2 《ᠢᠰᠷᠧᠯᠴᠦᠳ ᠲᠦ ᠵᠠᠬᠢ᠄ ᠮᠣᠰᠧ ᠪᠠᠷ ᠳᠠᠮᠵᠢᠭᠤᠯᠤᠨ ᠮᠢᠨᠦ ᠶᠠᠷᠢᠭᠰᠠᠨ ᠶᠣᠰᠣᠭᠠᠷ ᠲᠠ ᠨᠠᠷ ᠬᠣᠷᠭᠣᠳᠠᠬᠤ ᠬᠣᠲᠠ ᠲᠣᠭᠲᠠᠭᠠᠬᠤ ᠶᠣᠰᠣᠲᠠᠢ᠃ 3 ᠲᠡᠢᠨ ᠬᠦ ᠭᠡᠨᠡᠳᠲᠡ ᠶᠢᠨ᠂ ᠰᠠᠨᠠᠮᠰᠠᠷ ᠦᠭᠡᠢ ᠪᠠᠷ ᠬᠥᠮᠦᠨ ᠠᠯᠠᠭᠰᠠᠨ ᠠᠯᠢᠪᠠ ᠬᠡᠷᠡᠭᠲᠡᠨ ᠲᠡᠰᠢ ᠪᠠᠨ ᠵᠢᠭᠤᠲᠠᠵᠤ᠂ ᠴᠢᠰᠤᠨ ᠥᠰᠢᠶᠡ ᠠᠪᠤᠭᠴᠢᠳ ᠠᠴᠠ ᠪᠠᠨ ᠵᠠᠢᠯᠠᠵᠤ᠂ ᠲᠡᠨᠳᠡ ᠬᠣᠷᠭᠣᠳᠠᠬᠤ ᠭᠠᠵᠠᠷ ᠣᠯᠬᠤ ᠪᠣᠯᠣᠨᠠ᠃ 4 ᠡᠳᠡᠭᠡᠷ ᠬᠣᠲᠠ ᠶᠢᠨ ᠠᠯᠢ ᠨᠢᠭᠡ ᠤᠷᠤᠭᠤ ᠵᠢᠭᠤᠲᠠᠭᠰᠠᠨ ᠬᠥᠮᠦᠨ ᠬᠣᠲᠠ ᠶᠢᠨ ᠬᠠᠭᠠᠯᠭᠠ ᠪᠠᠷ ᠣᠷᠣᠬᠤ ᠭᠠᠵᠠᠷ ᠲᠤ ᠵᠣᠭᠰᠣᠭᠠᠳ᠂ ᠲᠡᠷᠡ ᠬᠣᠲᠠ ᠶᠢᠨ ᠠᠬᠠᠮᠠᠳ ᠤᠳ ᠲᠤ ᠪᠣᠯᠣᠭᠰᠠᠨ ᠶᠠᠪᠤᠳᠠᠯ ᠢ ᠳᠤᠭᠤᠯᠭᠠᠬᠤ ᠶᠣᠰᠣᠲᠠᠢ᠃ ᠲᠡᠭᠡᠪᠡᠯ ᠲᠡᠳᠡ ᠲᠡᠭᠦᠨ ᠢ ᠬᠣᠲᠠ ᠳᠤ ᠣᠷᠣᠭᠤᠯᠵᠤ᠂ ᠰᠠᠭᠤᠴᠠ ᠣᠯᠵᠤ ᠥᠭᠭᠥᠭᠡᠳ ᠥᠪᠡᠷᠰᠡᠳ ᠦᠨ ᠢᠶᠠᠨ ᠳᠤᠮᠳᠠ ᠰᠠᠭᠤᠯᠭᠠᠬᠤ ᠪᠣᠯᠣᠨᠠ᠃ 5 ᠴᠢᠰᠤᠨ ᠥᠰᠢᠶᠡ ᠠᠪᠤᠭᠴᠢ ᠲᠡᠭᠦᠨ ᠢ ᠨᠡᠬᠡᠵᠦ ᠢᠷᠡᠭᠰᠡᠨ ᠴᠤ ᠠᠮᠢᠨ ᠬᠡᠷᠡᠭᠲᠡᠨ ᠢ ᠲᠡᠭᠦᠨ ᠦ ᠭᠠᠷ ᠲᠤ ᠲᠤᠰᠢᠶᠠᠵᠤ ᠪᠣᠯᠬᠤ ᠦᠭᠡᠢ᠃ ᠤᠴᠢᠷ ᠨᠢ ᠲᠡᠷᠡ ᠰᠠᠨᠠᠮᠰᠠᠷ ᠦᠭᠡᠢ ᠪᠠᠷ᠂ ᠤᠷᠢᠳᠤ ᠠᠴᠠ ᠰᠠᠨᠠᠭᠰᠠᠨ ᠥᠰ ᠬᠣᠨᠵᠢᠩ ᠴᠤ ᠦᠭᠡᠢ ᠪᠠᠷ ᠬᠥᠷᠰᠢ ᠪᠠᠨ ᠴᠣᠬᠢᠭᠰᠠᠨ ᠶᠤᠮ᠃ 6 ᠲᠡᠷᠡ ᠬᠥᠮᠦᠨ ᠨᠥᠭᠥᠭᠡ ᠬᠣᠲᠠ ᠳᠤ ᠰᠠᠭᠤᠵᠤ ᠪᠠᠢᠬᠤ ᠳᠠᠭᠠᠨ ᠨᠡᠢᠲᠡ ᠶᠢᠨ ᠡᠮᠦᠨᠡ ᠵᠣᠭᠰᠣᠭᠠᠳ ᠰᠢᠭᠦᠯᠲᠡ ᠬᠦᠯᠢᠶᠡᠬᠦ ᠪᠥᠭᠡᠳ ᠲᠤᠬᠠᠢ ᠶᠢᠨ ᠦᠶᠡ ᠶᠢᠨ ᠲᠡᠷᠢᠭᠦᠨ ᠲᠠᠬᠢᠯᠴᠢ ᠥᠭᠡᠳᠡ ᠪᠣᠯᠣᠭᠰᠠᠨ ᠤ ᠳᠠᠷᠠᠭᠠ᠂ ᠥᠪᠡᠷ ᠦᠨ ᠢᠶᠠᠨ ᠬᠣᠲᠠ᠂ ᠲᠤᠬᠠᠢᠯᠠᠪᠠᠯ ᠵᠢᠭᠤᠲᠠᠨ ᠭᠠᠷᠬᠤ ᠶᠢᠨ ᠢᠶᠠᠨ ᠡᠮᠦᠨᠡ ᠪᠠᠢᠭᠰᠠᠨ ᠬᠣᠲᠠ ᠳᠠᠬᠢ ᠭᠡᠷ ᠲᠡᠭᠡᠨ ᠪᠤᠴᠠᠵᠤ ᠪᠣᠯᠣᠨᠠ》 ᠭᠡᠪᠡ᠃
7 ᠡᠢᠮᠦ ᠡᠴᠡ ᠲᠡᠳᠡ ᠨᠠᠹᠲ᠋ᠠᠯᠢ ᠶᠢᠨ ᠠᠭᠤᠯᠠᠷᠬᠠᠭ ᠨᠤᠲᠤᠭ ᠤᠨ ᠭᠠᠯᠢᠯᠠᠶᠠ ᠳᠠᠬᠢ ᠺᠧᠳᠧᠱ ᠢ᠂ ᠡᠹᠷᠠᠢᠮ ᠤᠨ ᠠᠭᠤᠯᠠᠷᠬᠠᠭ ᠨᠤᠲᠤᠭ ᠳᠠᠬᠢ ᠱᠧᠺᠧᠮ ᠪᠣᠯᠣᠨ ᠶᠦᠳᠠ ᠶᠢᠨ ᠠᠭᠤᠯᠠᠷᠬᠠᠭ ᠨᠤᠲᠤᠭ ᠳᠠᠬᠢ ᠠᠷᠪᠠ ᠬᠣᠲᠠ᠂ ᠲᠤᠬᠠᠢᠯᠠᠪᠠᠯ ᠾᠧᠪᠷᠣᠨ ᠢ ᠲᠤᠰᠠᠭᠠᠷᠯᠠᠵᠤ᠂ 8 ᠪᠠᠰᠠ ᠶᠧᠷᠢᠺᠣ ᠶᠢᠨ ᠵᠡᠭᠦᠨ ᠳᠠᠬᠢ ᠶᠣᠷᠳᠠᠨ ᠤ ᠴᠠᠭᠠᠨᠠ᠂ ᠷᠧᠣᠪᠧᠨ ᠣᠪᠣᠭ ᠠᠴᠠ ᠬᠡᠭᠡᠷᠡ ᠲᠠᠯᠠ ᠶᠢᠨ ᠴᠥᠯ ᠳᠠᠬᠢ ᠪᠧᠽᠧᠷ᠂ ᠭᠠᠳ᠋ ᠣᠪᠣᠭ ᠠᠴᠠ ᠭᠢᠯᠧᠶᠠᠳ᠋ ᠳᠠᠬᠢ ᠷᠠᠮᠣᠲ᠂ ᠮᠥᠨ ᠮᠠᠨᠠᠰᠧ ᠣᠪᠣᠭ ᠠᠴᠠ ᠪᠠᠱᠠᠨ ᠳᠠᠬᠢ ᠭᠣᠯᠠᠨ ᠢ ᠰᠣᠩ᠋ᠭᠣᠪᠠ᠃ 9 ᠡᠳᠡᠭᠡᠷ ᠨᠢ ᠢᠰᠷᠧᠯ ᠤᠨ ᠬᠡᠨ ᠨᠢᠭᠡ ᠨᠢ᠂ ᠡᠰᠡᠪᠡᠯ ᠲᠡᠳᠡᠨ ᠦ ᠳᠤᠮᠳᠠ ᠪᠠᠢᠭᠠ ᠭᠠᠳᠠᠨᠠ ᠶᠢᠨ ᠬᠡᠨ ᠨᠢᠭᠡ ᠨᠢ ᠰᠠᠨᠠᠮᠰᠠᠷ ᠦᠭᠡᠢ ᠪᠠᠷ ᠬᠥᠮᠦᠨ ᠠᠯᠠᠭᠰᠠᠨ ᠲᠣᠬᠢᠶᠠᠯᠳᠤᠯ ᠳᠤ ᠵᠢᠭᠤᠲᠠᠨ ᠣᠴᠢᠵᠤ ᠪᠣᠯᠬᠤ ᠬᠣᠲᠠ ᠨᠤᠭᠤᠳ ᠶᠤᠮ᠃ ᠲᠡᠳᠡ ᠲᠡᠨᠳᠡ ᠨᠡᠢᠲᠡ ᠶᠢᠨ ᠡᠮᠦᠨᠡ ᠵᠣᠭᠰᠣᠬᠤ ᠬᠦᠷᠲᠡᠯᠡ ᠪᠡᠨ ᠴᠢᠰᠤᠨ ᠥᠰᠢᠶᠡ ᠠᠪᠤᠭᠴᠢ ᠶᠢᠨ ᠭᠠᠷ ᠲᠤ ᠦᠬᠦᠬᠦ ᠶᠣᠰᠣ ᠦᠭᠡᠢ᠃