ᠶᠣᠱᠦ᠋ᠶᠠ ᠶᠢᠰᠦ
ᠭᠢᠪᠧᠶᠣᠨᠴᠤᠳ ᠤᠨ ᠪᠠᠴᠢ
1 ᠶᠣᠷᠳᠠᠨ ᠤ ᠪᠠᠷᠠᠭᠤᠨ ᠳᠠᠬᠢ ᠠᠭᠤᠯᠠᠷᠬᠠᠭ ᠨᠤᠲᠤᠭ᠂ ᠥᠷᠥᠨᠡ ᠶᠢᠨ ᠳᠣᠪᠣ ᠲᠣᠯᠣᠭᠠᠳ᠂ ᠶᠡᠬᠡ ᠲᠠᠩᠭᠢᠰ ᠤᠨ ᠬᠥᠪᠡᠭᠡ᠂ ᠯᠧᠪᠠᠨᠣᠨ ᠬᠦᠷᠲᠡᠯᠡᠬᠢ ᠭᠠᠵᠠᠷ ᠤᠳ ᠢᠶᠠᠷ ᠰᠠᠭᠤᠳᠠᠭ ᠾᠢᠲ᠋ᠴᠦᠳ᠂ ᠠᠮᠣᠷᠢᠴᠤᠳ᠂ ᠺᠠᠨᠠᠨᠴᠤᠳ᠂ ᠫᠧᠷᠢᠽᠴᠦᠳ᠂ ᠾᠢᠸᠢᠴᠦᠳ᠂ ᠶᠧᠪᠦ᠋ᠰᠴᠦᠳ ᠦᠨ ᠪᠦᠬᠦ ᠬᠠᠭᠠᠨ ᠡᠳᠡᠭᠡᠷ ᠶᠠᠪᠤᠳᠠᠯ ᠢ ᠰᠣᠨᠣᠰᠴᠠᠢ᠃ 2 ᠲᠡᠳᠡ ᠶᠣᠱᠦ᠋ᠶᠠ ᠪᠣᠯᠣᠨ ᠢᠰᠷᠧᠯ ᠤᠨ ᠡᠰᠡᠷᠭᠦ ᠳᠠᠢᠲᠤᠬᠤ ᠪᠠᠷ ᠴᠤᠭᠯᠠᠷᠠᠵᠤ᠂ ᠨᠢᠭᠡᠨ ᠳᠠᠭᠤ ᠪᠠᠷ ᠢᠷᠡᠪᠡ᠃
3 ᠬᠠᠷᠢᠨ ᠭᠢᠪᠧᠶᠣᠨ ᠤ ᠰᠠᠭᠤᠭᠠᠯᠢᠴᠢᠳ ᠶᠣᠱᠦ᠋ᠶᠠ ᠶᠢᠨ ᠶᠧᠷᠢᠺᠣ ᠪᠣᠯᠣᠨ ᠠᠢ ᠳᠤ ᠶᠠᠭᠤ ᠦᠢᠯᠡᠳᠦᠭᠰᠡᠨ ᠢ ᠰᠣᠨᠣᠰᠣᠭᠠᠳ 4 ᠠᠮᠢ ᠪᠠᠨ ᠬᠠᠮᠠᠭᠠᠯᠠᠬᠤ ᠪᠠᠷ ᠵᠠᠯᠢ ᠭᠠᠷᠭᠠᠵᠠᠢ᠃ ᠲᠡᠳᠡ ᠡᠯᠴᠢ ᠶᠢᠨ ᠳᠦᠷᠢ ᠦᠵᠡᠭᠦᠯᠵᠦ ᠬᠠᠭᠤᠴᠢᠷᠠᠭᠰᠠᠨ ᠰᠢᠭᠤᠳᠠᠢ ᠪᠣᠯᠣᠨ ᠦᠵᠢᠷᠡᠵᠦ ᠨᠥᠬᠥᠭᠰᠡᠨ ᠳᠠᠷᠠᠰᠤᠨ ᠤ ᠬᠥᠬᠦᠷ ᠢ ᠡᠯᠵᠢᠭᠡᠨ ᠳᠡᠭᠡᠷᠡ ᠠᠴᠢᠵᠤ᠂ 5 ᠬᠥᠯ ᠳᠡᠭᠡᠨ ᠦᠵᠢᠷᠡᠵᠦ ᠨᠥᠬᠥᠭᠰᠡᠨ ᠱᠠᠬᠠᠢ᠂ ᠪᠡᠶᠡ ᠳᠡᠭᠡᠨ ᠬᠠᠭᠤᠴᠢᠷᠠᠭᠰᠠᠨ ᠬᠤᠪᠴᠠᠰᠤ ᠡᠮᠦᠰᠴᠡᠢ᠃ ᠬᠦᠨᠡᠰᠦᠨ ᠦ ᠪᠣᠣᠪᠣ ᠨᠢ ᠴᠤ ᠬᠠᠲᠠᠵᠤ ᠦᠢᠷᠡᠭᠰᠡᠨ ᠪᠠᠢᠯᠠ᠃ 6 ᠲᠡᠳᠡ ᠭᠢᠯᠭᠠᠯ ᠳᠠᠬᠢ ᠬᠤᠸᠠᠷᠠᠨ ᠳᠤ ᠪᠠᠢᠭᠠ ᠶᠣᠱᠦ᠋ᠶᠠ ᠳᠡᠭᠡᠷᠡ ᠣᠴᠢᠵᠤ᠂ ᠲᠡᠭᠦᠨ ᠳᠦ ᠪᠣᠯᠣᠨ ᠢᠰᠷᠧᠯᠴᠦᠳ ᠲᠦ᠄ 《ᠪᠢᠳᠡ ᠠᠯᠤᠰ ᠬᠣᠯᠠ ᠶᠢᠨ ᠨᠤᠲᠤᠭ ᠠᠴᠠ ᠢᠷᠡᠯᠡ᠃ ᠣᠳᠣ ᠪᠢᠳᠡᠨ ᠲᠡᠢ ᠭᠡᠷᠡ ᠪᠠᠢᠭᠤᠯᠤᠨᠠ ᠤᠤ︖》 ᠭᠡᠬᠦ ᠳᠦ᠂ 7 ᠢᠰᠷᠧᠯᠴᠦᠳ ᠲᠡᠳᠡᠭᠡᠷ ᠾᠢᠸᠢᠴᠦᠳ ᠲᠦ᠄ 《ᠲᠠ ᠨᠠᠷ ᠮᠠᠨ ᠤ ᠡ᠊ᠨᠳᠡ ᠠᠮᠢᠳᠤᠷᠠᠳᠠᠭ ᠶᠤᠮ ᠰᠢᠭ᠋ ᠪᠠᠢᠨᠠ᠂ ᠪᠢᠳᠡ ᠶᠠᠭᠤᠨ ᠳᠤ ᠲᠠ ᠨᠠᠷ ᠲᠠᠢ ᠭᠡᠷᠡ ᠬᠢᠬᠦ ᠪᠤᠢ︖》 ᠭᠡᠪᠡ᠃ 8 ᠬᠠᠷᠢᠨ ᠲᠡᠳᠡ ᠶᠣᠱᠦ᠋ᠶᠠ ᠳᠤ᠄ 《ᠪᠢᠳᠡ ᠲᠠᠨ ᠤ ᠵᠠᠷᠤᠴᠠ ᠪᠢᠯᠡ》 ᠭᠡᠬᠦ ᠳᠦ᠂ ᠶᠣᠱᠦ᠋ᠶᠠ᠄ 《ᠲᠠ ᠨᠠᠷ ᠬᠡᠨ ᠪᠤᠢ︖ ᠬᠠᠮᠢᠭᠠ ᠠᠴᠠ ᠢᠷᠡᠭᠰᠡᠨ ᠪᠤᠢ︖》 ᠭᠡᠰᠡᠨ ᠳᠦ᠂ 9 ᠲᠡᠳᠡ᠄ 《ᠲᠠᠨ ᠤ ᠪᠤᠷᠬᠠᠨ ᠶᠣᠬᠣᠸᠠ ᠶᠢᠨ ᠨᠡᠷᠡ ᠠᠯᠳᠠᠷ ᠤᠨ ᠤᠯᠠᠮ ᠢᠶᠠᠷ ᠵᠠᠷᠤᠴᠠ ᠴᠢᠨᠢ ᠪᠢᠳᠡ ᠠᠯᠤᠰ ᠬᠣᠯᠠ ᠶᠢᠨ ᠨᠤᠲᠤᠭ ᠠᠴᠠ ᠢᠷᠡᠭᠰᠡᠨ ᠶᠤᠮ᠃ ᠪᠢᠳᠡ ᠲᠡᠭᠦᠨ ᠦ ᠲᠤᠬᠠᠢ ᠶᠠᠷᠢᠶᠠ ᠪᠣᠯᠣᠨ ᠲᠡᠭᠦᠨ ᠦ ᠶᠧᠵᠢᠫᠲ ᠲᠤ ᠬᠢᠭᠰᠡᠨ ᠪᠦᠬᠦᠨ ᠢ ᠰᠣᠨᠣᠰᠣᠭᠰᠠᠨ᠂ 10 ᠪᠠᠰᠠ ᠶᠣᠷᠳᠠᠨ ᠤ ᠵᠡᠭᠦᠨ ᠳᠠᠬᠢ ᠠᠮᠣᠷᠢᠴᠤᠳ ᠤᠨ ᠬᠣᠶᠠᠷ ᠬᠠᠭᠠᠨ᠂ ᠲᠤᠬᠠᠢᠯᠠᠪᠠᠯ ᠾᠧᠱᠪᠣᠨ ᠤ ᠬᠠᠭᠠᠨ ᠰᠢᠬᠣᠨ ᠬᠢᠭᠡᠳ ᠠᠱᠲ᠋ᠠᠷᠣᠲ ᠲᠤ ᠪᠠᠢᠭᠰᠠᠨ ᠪᠠᠱᠠᠨ ᠤ ᠬᠠᠭᠠᠨ ᠣᠭ ᠨᠠᠷ ᠲᠤ ᠲᠡᠭᠦᠨ ᠦ ᠦᠢᠯᠡᠳᠦᠭᠰᠡᠨ ᠪᠦᠭᠦᠳᠡ ᠶᠢ ᠴᠤ ᠰᠣᠨᠣᠰᠣᠭᠰᠠᠨ᠃ 11 ᠲᠡᠢᠮᠦ ᠡᠴᠡ ᠮᠠᠨ ᠤ ᠠᠬᠠᠯᠠᠭᠴᠢᠳ ᠪᠣᠯᠣᠨ ᠮᠠᠨ ᠤ ᠨᠤᠲᠤᠭ ᠤᠨ ᠪᠦᠬᠦ ᠰᠠᠭᠤᠭᠠᠯᠢᠴᠢᠳ ᠪᠢᠳᠡᠨ ᠳᠦ ᠵᠠᠮ ᠤᠨ ᠬᠦᠨᠡᠰᠦ ᠪᠡᠨ ᠠᠪᠴᠤ ᠶᠠᠪᠤ᠂ ᠲᠡᠳᠡᠨ ᠲᠡᠢ ᠠᠭᠤᠯᠵᠠᠵᠤ᠄ 〈ᠪᠢᠳᠡ ᠲᠠᠨ ᠤ ᠵᠠᠷᠤᠴᠠ ᠪᠢᠯᠡ᠂ ᠪᠢᠳᠡᠨ ᠲᠡᠢ ᠭᠡᠷᠡ ᠪᠠᠢᠭᠤᠯᠤᠭᠠᠴᠢ〉 ᠭᠡᠵᠦ ᠬᠡᠯᠡ ᠭᠡᠰᠡᠨ ᠶᠤᠮ᠃ 12 ᠮᠠᠨ ᠤ ᠪᠣᠣᠪᠣ ᠡᠨᠡ ᠪᠠᠢᠨᠠ᠃ ᠲᠠᠨ ᠤ ᠡᠰᠢ ᠪᠠᠨ ᠭᠠᠷᠴᠤ ᠢᠷᠡᠬᠦ ᠲᠡᠷᠡ ᠡᠳᠦᠷ ᠡᠨᠡ ᠪᠣᠣᠪᠣ ᠶᠢ ᠪᠢᠳᠡ ᠬᠦᠨᠡᠰᠦ ᠪᠣᠯᠭᠠᠨ ᠭᠡᠷ ᠭᠡᠷ ᠡᠴᠡ ᠪᠡᠨ ᠠᠪᠬᠤ ᠳᠤ᠂ ᠲᠡᠷᠡ ᠨᠢ ᠬᠠᠯᠠᠭᠤᠨ ᠪᠠᠢᠭᠰᠠᠨ᠃ ᠬᠠᠷᠢᠨ ᠣᠳᠣ ᠬᠠᠷᠠ᠂ ᠬᠠᠲᠠᠵᠤ ᠦᠢᠷᠡᠵᠡᠢ᠃ 13 ᠳᠠᠷᠠᠰᠤ ᠬᠢᠭᠰᠡᠨ ᠬᠥᠬᠦᠷ ᠤᠳ ᠮᠠᠨᠢ ᠰᠢᠨᠡ ᠪᠠᠢᠭᠰᠠᠨ ᠪᠣᠯᠪᠠᠴᠤ ᠣᠳᠣ ᠦᠵᠢᠷᠡᠵᠦ ᠤᠷᠠᠭᠲᠠᠯᠠ︕ ᠮᠥᠨ ᠪᠢᠳᠡᠨ ᠦ ᠱᠠᠬᠠᠢ᠂ ᠬᠤᠪᠴᠠᠰᠤ ᠬᠤᠨᠠᠷ ᠴᠤ ᠠᠯᠤᠰ ᠬᠣᠯᠠ ᠶᠢᠨ ᠵᠠᠮ ᠳᠤ ᠡᠯᠡᠭᠳᠡᠨ ᠬᠠᠭᠤᠴᠢᠷᠠᠯᠠ》 ᠭᠡᠪᠡ᠃ 14 ᠢᠰᠷᠧᠯᠴᠦᠳ ᠲᠡᠳᠡᠨ ᠦ ᠬᠦᠨᠡᠰᠦᠨ ᠡᠴᠡ ᠠᠪᠴᠤ ᠦᠵᠡᠭᠰᠡᠨ ᠪᠣᠯᠪᠠᠴᠤ ᠶᠣᠬᠣᠸᠠ ᠶᠢᠨ ᠰᠠᠨᠠᠭᠠ ᠶᠢ ᠯᠠᠪᠯᠠᠭᠰᠠᠨ ᠦᠭᠡᠢ᠃ 15 ᠶᠣᠱᠦ᠋ᠶᠠ ᠲᠡᠳᠡᠨ ᠢ ᠠᠮᠢᠳᠤ ᠦᠯᠡᠳᠡᠭᠡᠬᠦ ᠡᠩᠬᠡ ᠶᠢᠨ ᠭᠡᠷᠡ ᠶᠢ ᠲᠡᠳᠡᠨ ᠲᠡᠢ ᠪᠠᠢᠭᠤᠯᠵᠤ᠂ ᠴᠢᠭᠤᠯᠭᠠᠨ ᠤ ᠤᠳᠤᠷᠢᠳᠤᠭᠴᠢᠳ ᠲᠡᠳᠡᠨ ᠳᠦ ᠲᠠᠩ᠋ᠭᠠᠷᠢᠭᠯᠠᠭᠰᠠᠨ ᠪᠠᠢᠨᠠ᠃
16 ᠲᠡᠢᠨ ᠬᠦ ᠭᠡᠷᠡ ᠪᠠᠢᠭᠤᠯᠤᠭᠰᠠᠨ ᠠᠴᠠ ᠭᠤᠷᠪᠠᠨ ᠬᠣᠨᠣᠭ ᠤᠨ ᠳᠠᠷᠠᠭᠠ᠂ ᠢᠰᠷᠧᠯᠴᠦᠳ ᠨᠥᠭᠥᠭᠡ ᠬᠥᠮᠦᠰ ᠦᠨ ᠥᠪᠡᠷᠰᠡᠳ ᠦᠨ ᠬᠢᠨᠢ ᠨᠤᠲᠤᠭ ᠲᠤ ᠰᠠᠭᠤᠵᠤ ᠪᠤᠢ ᠬᠥᠷᠰᠢ ᠪᠣᠯᠬᠤ ᠶᠢ ᠰᠣᠨᠣᠰᠪᠠ᠃ 17 ᠡᠢᠮᠦ ᠡᠴᠡ ᠢᠰᠷᠧᠯᠴᠦᠳ ᠬᠥᠳᠡᠯᠦᠨ ᠭᠠᠷᠴᠤ ᠭᠤᠷᠪᠠᠳᠠᠬᠢ ᠡᠳᠦᠷ ᠢᠶᠡᠨ ᠭᠢᠪᠧᠶᠣᠨ᠂ ᠺᠧᠹᠢᠷᠠ᠂ ᠪᠧᠷᠣᠲ᠂ ᠮᠥᠨ ᠺᠢᠷᠢᠶᠠᠲ ᠶᠧᠶᠠᠷᠢᠮ ᠵᠡᠷᠭᠡ ᠲᠡᠳᠡᠨ ᠦ ᠬᠣᠲᠠ ᠨᠤᠭᠤᠳ ᠲᠤ ᠬᠦᠷᠴᠦ ᠢᠷᠡᠪᠡ᠃ 18 ᠨᠡᠢᠲᠡ ᠴᠢᠭᠤᠯᠭᠠᠨ ᠤ ᠤᠳᠤᠷᠢᠳᠤᠭᠴᠢᠳ ᠲᠡᠳᠡᠨ ᠳᠦ ᠢᠰᠷᠧᠯ ᠤᠨ ᠪᠤᠷᠬᠠᠨ ᠶᠣᠬᠣᠸᠠ ᠪᠠᠷ ᠲᠠᠩ᠋ᠭᠠᠷᠢᠭᠯᠠᠭᠰᠠᠨ ᠤᠴᠢᠷ ᠲᠡᠳᠡᠨ ᠢ ᠴᠣᠬᠢᠬᠤ ᠦᠭᠡᠢ ᠪᠣᠯᠣᠭᠰᠠᠨ ᠳᠤ᠂ ᠨᠡᠢᠲᠡ ᠴᠢᠭᠤᠯᠭᠠᠨ ᠪᠦᠭᠦᠳᠡᠭᠡᠷ ᠤᠳᠤᠷᠢᠳᠤᠭᠴᠢᠳ ᠲᠠᠭᠠᠨ ᠭᠣᠮᠣᠳᠠᠯ ᠭᠠᠷᠭᠠᠵᠠᠢ᠃ 19 ᠪᠦᠬᠦ ᠤᠳᠤᠷᠢᠳᠤᠭᠴᠢ ᠬᠠᠷᠢᠭᠤ ᠳᠤᠨᠢ᠄ 《ᠪᠢᠳᠡ ᠢᠰᠷᠧᠯ ᠤᠨ ᠪᠤᠷᠬᠠᠨ ᠶᠣᠬᠣᠸᠠ ᠪᠠᠷ ᠲᠠᠩ᠋ᠭᠠᠷᠢᠭᠯᠠᠭᠰᠠᠨ ᠲᠤᠯᠠ ᠣᠳᠣ ᠲᠡᠳᠡᠨ ᠳᠦ ᠭᠠᠷ ᠬᠦᠷᠴᠦ ᠴᠢᠳᠠᠬᠤ ᠦᠭᠡᠢ ᠪᠣᠯᠣᠭᠰᠠᠨ᠃ 20 ᠪᠢᠳᠡ ᠢᠩᠭᠢᠵᠦ ᠬᠢᠶᠡ᠂ ᠲᠡᠳᠡᠨ ᠢ ᠠᠮᠢᠳᠤ ᠦᠯᠡᠳᠡᠭᠡᠶᠡ᠂ ᠲᠡᠭᠡᠬᠦ ᠦᠭᠡᠢ ᠪᠣᠯ᠂ ᠲᠡᠳᠡᠨ ᠳᠦ ᠡᠷᠭᠦᠭᠰᠡᠨ ᠲᠠᠩ᠋ᠭᠠᠷᠢᠭ ᠠᠴᠠ ᠵᠥᠷᠢᠴᠡᠭᠰᠡᠨ ᠢᠶᠡᠷ ᠢᠶᠠᠨ ᠠᠭᠤᠷ ᠬᠢᠯᠢᠩ ᠢ ᠥᠪᠡᠷ ᠳᠡᠭᠡᠷᠡ ᠪᠡᠨ ᠪᠠᠭᠤᠯᠭᠠᠬᠤ ᠪᠤᠢ》 ᠭᠡᠪᠡ᠃ 21 ᠤᠳᠤᠷᠢᠳᠤᠭᠴᠢᠳ ᠵᠠᠯᠭᠠᠵᠤ᠄ 《ᠲᠡᠳᠡᠨ ᠢ ᠠᠮᠢᠳᠤ ᠦᠯᠡᠳᠡᠭᠡᠶᠡ᠂ ᠤᠳᠤᠷᠢᠳᠤᠭᠴᠢᠳ ᠤᠨ ᠰᠢᠢᠳᠦᠭᠰᠡᠨ ᠶᠣᠰᠣᠭᠠᠷ ᠲᠡᠳᠡ ᠬᠠᠮᠤᠭ ᠴᠢᠭᠤᠯᠭᠠᠨ ᠤ ᠤᠰᠤ ᠵᠥᠭᠡᠭᠡᠭᠴᠢ ᠪᠠ ᠲᠦᠯᠡᠭᠡᠴᠢᠨ ᠪᠠᠢᠬᠤ ᠪᠣᠯᠣᠨᠠ》 ᠭᠡᠪᠡ᠃
22 ᠶᠣᠱᠦ᠋ᠶᠠ ᠭᠢᠪᠧᠶᠣᠨᠴᠤᠳ ᠢ ᠳᠠᠭᠤᠳᠠᠨ᠄ 《ᠲᠠ ᠨᠠᠷ ᠮᠠᠨ ᠤ ᠨᠤᠲᠤᠭ ᠲᠤ ᠰᠠᠭᠤᠳᠠᠭ ᠠᠲᠠᠯᠠ ᠪᠠᠨ ᠶᠠᠭᠤᠨ ᠳᠤ᠄ 〈ᠪᠢᠳᠡ ᠲᠠ ᠨᠠᠷ ᠠᠴᠠ ᠠᠯᠤᠰ ᠬᠣᠯᠠ ᠪᠠᠢᠳᠠᠭ〉 ᠬᠡᠮᠡᠨ ᠪᠢᠳᠡᠨ ᠢ ᠮᠡᠬᠡᠯᠡᠭᠰᠡᠨ ᠪᠤᠢ︖ 23 ᠣᠳᠣ ᠲᠠ ᠨᠠᠷ ᠬᠠᠷᠢᠶᠠᠭᠳᠠᠭᠰᠠᠨ︕ ᠡᠢᠮᠦ ᠡᠴᠡ ᠲᠠ ᠨᠠᠷ ᠢᠮᠠᠭᠲᠠ ᠮᠠᠨ ᠤ ᠪᠤᠷᠬᠠᠨ ᠤ ᠭᠡᠷ ᠲᠦ ᠲᠦᠯᠡᠭᠡ ᠪᠡᠯᠡᠳᠬᠡᠵᠦ᠂ ᠤᠰᠤ ᠵᠥᠭᠡᠭᠡᠵᠦ ᠵᠠᠷᠤᠴᠠᠯᠠᠭᠳᠠᠬᠤ ᠪᠣᠯᠣᠨᠠ》 ᠭᠡᠯᠡ᠃ 24 ᠲᠡᠳᠡ ᠶᠣᠱᠦ᠋ᠶᠠ ᠳᠤ ᠬᠠᠷᠢᠭᠤᠯᠤᠨ᠄ 《ᠲᠠᠨ ᠤ ᠪᠤᠷᠬᠠᠨ ᠶᠣᠬᠣᠸᠠ ᠵᠠᠷᠤᠴᠠ ᠮᠣᠰᠧ ᠳᠡᠭᠡᠨ ᠶᠠᠭᠤ ᠲᠤᠰᠢᠶᠠᠭᠰᠠᠨ ᠢ ᠵᠠᠷᠤᠴᠠ ᠴᠢᠨᠢ ᠪᠢᠳᠡ ᠲᠣᠳᠣᠷᠬᠠᠢ ᠳᠤᠭᠤᠯᠤᠭᠰᠠᠨ᠃ ᠡᠨᠡ ᠪᠦᠬᠦ ᠨᠤᠲᠤᠭ ᠢ ᠲᠠ ᠨᠠᠷ ᠲᠤ ᠥᠭᠴᠦ᠂ ᠤᠤᠭᠠᠯ ᠨᠤᠲᠤᠭ ᠤᠨ ᠬᠢᠨ ᠢ ᠨᠢ ᠲᠠ ᠨᠠᠷ ᠤᠨ ᠡᠮᠦᠨᠡ ᠤᠰᠠᠳᠬᠠᠬᠤ ᠶᠢ ᠲᠡᠷᠡ ᠲᠠ ᠨᠠᠷ ᠲᠤ ᠲᠤᠰᠢᠶᠠᠭᠰᠠᠨ ᠤᠴᠢᠷ ᠠᠴᠠ ᠪᠢᠳᠡ ᠲᠠ ᠨᠠᠷ ᠠᠴᠠ ᠪᠣᠯᠵᠤ ᠠᠮᠢ ᠪᠠᠨ ᠠᠯᠳᠠᠬᠤ ᠠᠴᠠ ᠶᠡᠬᠡᠳᠡ ᠠᠶᠤᠭᠰᠠᠨ ᠳᠠᠭᠠᠨ ᠢᠩᠭᠢᠵᠦ ᠬᠢᠭᠰᠡᠨ ᠶᠤᠮ᠃ 25 ᠣᠳᠣ ᠪᠢᠳᠡ ᠲᠠᠨ ᠤ ᠭᠠᠷ ᠲᠤ ᠪᠠᠢᠨᠠ︕ ᠲᠠ ᠵᠥᠪ᠂ ᠵᠦᠢᠲᠡᠢ ᠭᠡᠵᠦ ᠦᠵᠡᠭᠰᠡᠨ ᠢᠶᠡᠨ ᠪᠢᠳᠡᠨ ᠳᠦ ᠦᠢᠯᠡᠳᠦᠭᠡᠴᠢ》 ᠭᠡᠰᠡᠨ ᠳᠦ᠂ 26 ᠶᠣᠱᠦ᠋ᠶᠠ ᠲᠡᠢᠨ ᠬᠦ ᠦᠢᠯᠡᠳᠦᠨ᠂ ᠲᠡᠳᠡᠨ ᠢ ᠢᠰᠷᠧᠯᠴᠦᠳ ᠦᠨ ᠭᠠᠷ ᠠᠴᠠ ᠠᠪᠤᠷᠠᠵᠤ ᠲᠡᠳᠡᠨ ᠢ ᠠᠯᠠᠭᠤᠯᠤᠭᠰᠠᠨ ᠦᠭᠡᠢ᠃ 27 ᠬᠠᠷᠢᠨ ᠲᠡᠷᠡ ᠡᠳᠦᠷ ᠶᠣᠱᠦ᠋ᠶᠠ ᠭᠢᠪᠧᠶᠣᠨᠴᠤᠳ ᠢ ᠢᠰᠷᠧᠯ ᠤᠨ ᠨᠡᠢᠲᠡ ᠴᠢᠭᠤᠯᠭᠠᠨ ᠪᠣᠯᠣᠨ ᠶᠣᠬᠣᠸᠠ ᠶᠢᠨ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠦ ᠲᠥᠯᠥᠭᠡ ᠶᠣᠬᠣᠸᠠ ᠶᠢᠨ ᠰᠣᠩ᠋ᠭᠣᠬᠤ ᠭᠠᠵᠠᠷ ᠲᠤ ᠲᠦᠯᠡᠭᠡ ᠪᠡᠯᠡᠳᠬᠡᠨ ᠤᠰᠤ ᠵᠥᠭᠡᠭᠡᠳᠡᠭ ᠵᠠᠷᠤᠴᠠ ᠪᠣᠯᠭᠠᠭᠰᠠᠨ ᠲᠤᠯᠠ ᠲᠡᠳᠡ ᠥᠨᠥ ᠬᠦᠷᠲᠡᠯᠡ ᠬᠡᠪ ᠢᠶᠡᠷ ᠢᠶᠠᠨ ᠪᠠᠢᠨᠠ᠃