ᠶᠣᠱᠦ᠋ᠶᠠ ᠲᠠᠪᠤ
ᠭᠢᠯᠭᠠᠯ ᠳᠠᠬᠢ ᠬᠥᠪᠴᠢᠷᠬᠡᠢ ᠬᠥᠨᠳᠡᠯᠲᠡ
1 ᠶᠣᠬᠣᠸᠠ ᠶᠢᠨ ᠢᠰᠷᠧᠯᠴᠦᠳ ᠢ ᠭᠠᠲᠤᠯᠵᠤ ᠳᠠᠭᠤᠰᠲᠠᠯᠠ ᠨᠢ ᠶᠣᠷᠳᠠᠨ ᠤ ᠤᠰᠤ ᠶᠢ ᠰᠢᠷᠭᠢᠭᠡᠭᠰᠡᠨ ᠢ ᠶᠣᠷᠳᠠᠨ ᠤ ᠪᠠᠷᠠᠭᠤᠨ ᠲᠠᠯᠠ ᠳᠤ ᠰᠠᠭᠤᠳᠠᠭ ᠠᠮᠣᠷᠢᠴᠤᠳ ᠤᠨ ᠪᠦᠬᠦ ᠬᠠᠭᠠᠨ᠂ ᠮᠥᠨ ᠳᠠᠯᠠᠢ ᠶᠢᠨ ᠬᠥᠪᠡᠭᠡ ᠪᠡᠷ ᠰᠠᠭᠤᠳᠠᠭ ᠺᠠᠨᠠᠨᠴᠤᠳ ᠤᠨ ᠪᠦᠬᠦ ᠬᠠᠭᠠᠨ ᠰᠣᠨᠣᠰᠣᠭᠠᠳ᠂ ᠢᠰᠷᠧᠯᠴᠦᠳ ᠡᠴᠡ ᠪᠣᠯᠵᠤ ᠵᠢᠷᠦᠬᠡ ᠨᠢ ᠦᠬᠦᠵᠦ ᠵᠣᠷᠢᠭ ᠨᠢ ᠮᠣᠬᠣᠭᠰᠠᠨ ᠪᠠᠢᠨᠠ᠃
2 ᠲᠡᠷᠡ ᠦᠶᠡ ᠳᠦ ᠶᠣᠬᠣᠸᠠ ᠶᠣᠱᠦ᠋ᠶᠠ ᠳᠤ᠄ 《ᠴᠠᠬᠢᠭᠤᠷ ᠬᠢᠲᠤᠭᠠ ᠬᠢᠵᠦ᠂ ᠬᠣᠶᠠᠳᠠᠬᠢ ᠤᠳᠠᠭᠠ ᠢᠰᠷᠧᠯᠴᠦᠳ ᠦᠨ ᠬᠥᠪᠴᠢᠷᠬᠡᠢ ᠶᠢ ᠬᠥᠨᠳᠡᠭᠦᠯ》 ᠭᠡᠰᠡᠨ ᠳᠦ᠂ 3 ᠶᠣᠱᠦ᠋ᠶᠠ ᠴᠠᠬᠢᠭᠤᠷ ᠬᠢᠲᠤᠭᠠ ᠨᠤᠭᠤᠳ ᠬᠢᠵᠦ᠂ ᠭᠧᠪᠧᠶᠠᠲ ᠬᠠᠷᠠᠯᠣᠲ ᠲᠤ ᠢᠰᠷᠧᠯᠴᠦᠳ ᠢ ᠬᠥᠪᠴᠢᠷᠬᠡᠢ ᠬᠥᠨᠳᠡᠭᠦᠯᠪᠡ᠃ 4 ᠶᠣᠱᠦ᠋ᠶᠠ ᠶᠢᠨ ᠢᠩᠭᠢᠵᠦ ᠲᠡᠳᠡᠨ ᠦ ᠬᠥᠪᠴᠢᠷᠬᠡᠢ ᠶᠢ ᠬᠥᠨᠳᠡᠭᠰᠡᠨ ᠦ ᠤᠴᠢᠷ ᠭᠡᠪᠡᠯ᠂ ᠶᠧᠵᠢᠫᠲ ᠡᠴᠡ ᠭᠠᠷᠴᠤ ᠶᠠᠪᠤᠭᠰᠠᠨ ᠠᠷᠠᠳ ᠣᠯᠠᠨ ᠤ ᠳᠤᠮᠳᠠᠬᠢ ᠪᠦᠬᠦ ᠳᠠᠢᠴᠢᠨ ᠡᠷᠡᠴᠦᠳ ᠶᠧᠵᠢᠫᠲ ᠡᠴᠡ ᠭᠠᠷᠤᠭᠰᠠᠨ ᠤ ᠪᠠᠨ ᠳᠠᠷᠠᠭᠠ᠂ ᠠᠶᠠᠨ ᠵᠠᠮ ᠳᠠᠭᠠᠨ ᠴᠥᠯ ᠳᠤ ᠴᠥᠮ ᠢᠶᠡᠷ ᠢᠶᠠᠨ ᠦᠬᠦᠭᠰᠡᠨ ᠪᠣᠯᠪᠠᠴᠤ 5 ᠭᠠᠷᠬᠤ ᠦᠶᠡ ᠳᠡᠭᠡᠨ ᠪᠦᠭᠦᠳᠡᠭᠡᠷ ᠬᠥᠪᠴᠢᠷᠬᠡᠢ ᠬᠥᠨᠳᠡᠭᠦᠯᠦᠭᠡᠳ ᠪᠠᠢᠭᠰᠠᠨ᠂ ᠬᠠᠷᠢᠨ ᠶᠧᠵᠢᠫᠲ ᠡᠴᠡ ᠭᠠᠷᠴᠤ ᠶᠠᠪᠤᠭᠰᠠᠨ ᠤ ᠳᠠᠷᠠᠭᠠ᠂ ᠠᠶᠠᠨ ᠵᠠᠮ ᠳᠤ ᠴᠥᠯ ᠳᠤ ᠲᠥᠷᠥᠭᠰᠡᠨ ᠪᠦᠬᠦ ᠬᠥᠮᠦᠨ ᠬᠥᠪᠴᠢᠷᠬᠡᠢ ᠬᠥᠨᠳᠡᠭᠦᠯᠦᠭᠡ ᠦᠭᠡᠢ ᠪᠠᠢᠭᠰᠠᠨ ᠪᠠᠢᠵᠠᠢ᠃ 6 ᠶᠧᠵᠢᠫᠲ ᠡᠴᠡ ᠭᠠᠷᠴᠤ ᠶᠠᠪᠤᠭᠰᠠᠨ ᠪᠦᠬᠦ ᠠᠷᠠᠳ ᠣᠯᠠᠨ ᠤ ᠳᠠᠢᠴᠢᠨ ᠡᠷᠡᠴᠦᠳ ᠤᠰᠠᠳᠴᠤ ᠳᠠᠭᠤᠰᠲᠠᠯᠠ ᠢᠰᠷᠧᠯᠴᠦᠳ ᠴᠥᠯ ᠳᠤ ᠳᠥᠴᠢᠨ ᠵᠢᠯ ᠲᠡᠨᠦᠭᠦᠴᠢᠯᠡᠭᠰᠡᠨ ᠪᠠᠢᠨᠠ᠂ ᠲᠡᠳᠡ ᠶᠣᠬᠣᠸᠠ ᠶᠢᠨ ᠳᠠᠭᠤ ᠬᠣᠭᠣᠯᠠᠢ ᠶᠢ ᠳᠠᠭᠠᠭᠰᠠᠨ ᠦᠭᠡᠢ ᠤᠴᠢᠷ ᠠᠴᠠ ᠶᠣᠬᠣᠸᠠ ᠲᠡᠳᠡᠨ ᠳᠦ ᠥᠭᠬᠦ ᠪᠡᠷ ᠲᠡᠳᠡᠨ ᠦ ᠡᠴᠢᠭᠡ ᠡᠪᠦᠭᠡᠳ ᠲᠦ ᠠᠮᠠᠯᠠᠭᠰᠠᠨ ᠡᠨᠡ ᠭᠠᠵᠠᠷ᠂ ᠰᠦ᠋ ᠪᠠᠯ ᠢᠶᠠᠷ ᠪᠢᠯᠬᠠᠭᠰᠠᠨ ᠡᠨᠡ ᠨᠤᠲᠤᠭ ᠢ ᠲᠡᠳᠡᠨ ᠳᠦ ᠬᠠᠷᠠᠭᠤᠯᠬᠤ ᠦᠭᠡᠢ ᠭᠡᠵᠦ ᠲᠠᠩ᠋ᠭᠠᠷᠢᠭᠯᠠᠭᠰᠠᠨ ᠪᠢᠯᠡ᠃ 7 ᠶᠣᠬᠣᠸᠠ ᠶᠢᠨ ᠲᠡᠳᠡ ᠨᠠᠷ ᠤᠨ ᠣᠷᠣᠨ ᠳᠤ ᠪᠣᠰᠬᠠᠭᠰᠠᠨ ᠦᠷᠡ ᠬᠣᠢᠴᠢᠰ ᠨᠢ ᠠᠶᠠᠨ ᠵᠠᠮ ᠳᠤ ᠬᠥᠪᠴᠢᠷᠬᠡᠢ ᠬᠥᠨᠳᠡᠯᠲᠡ ᠬᠢᠭᠡ ᠦᠭᠡᠢ ᠪᠠᠢᠭᠰᠠᠨ ᠤᠴᠢᠷ ᠠᠴᠠ ᠬᠥᠪᠴᠢᠷᠬᠡᠢ ᠬᠥᠨᠳᠡᠭᠦᠯᠦᠭᠡ ᠦᠭᠡᠢ ᠬᠡᠪ ᠢᠶᠡᠷ ᠪᠠᠢᠵᠠᠢ᠃ ᠲᠡᠢᠮᠦ ᠡᠴᠡ ᠶᠣᠱᠦ᠋ᠶᠠ ᠲᠡᠳᠡᠨ ᠳᠦ ᠬᠥᠪᠴᠢᠷᠬᠡᠢ ᠬᠥᠨᠳᠡᠬᠦ ᠶᠣᠰᠣᠯᠠᠯ ᠦᠢᠯᠡᠳᠴᠡᠢ᠃
8 ᠪᠦᠬᠦ ᠦᠨᠳᠦᠰᠦᠲᠡᠨ ᠢᠶᠡᠷ ᠢᠶᠠᠨ ᠪᠦᠭᠦᠳᠡ ᠬᠥᠪᠴᠢᠷᠬᠡᠢ ᠬᠥᠨᠳᠡᠭᠦᠯᠵᠦ ᠳᠠᠭᠤᠰᠤᠭᠰᠠᠨ ᠤ ᠳᠠᠷᠠᠭᠠ᠂ ᠲᠡᠳᠡ ᠡᠳᠡᠭᠡᠷᠡᠲᠡᠯᠡ ᠪᠡᠨ ᠬᠤᠸᠠᠷᠠᠨ ᠳᠠᠬᠢ ᠪᠠᠢᠷᠢᠨ ᠳᠠᠭᠠᠨ ᠪᠠᠢᠵᠠᠭᠠᠪᠠ᠃ 9 ᠶᠣᠬᠣᠸᠠ ᠶᠣᠱᠦ᠋ᠶᠠ ᠳᠤ ᠠᠢᠯᠠᠳᠤᠨ᠄ 《ᠥᠨᠥᠳᠥᠷ ᠪᠢ ᠶᠧᠵᠢᠫᠲ ᠤᠨ ᠳᠣᠷᠣᠮᠵᠢᠯᠠᠯ ᠢ ᠲᠠ ᠨᠠᠷ ᠠᠴᠠ ᠥᠩᠬᠥᠷᠢᠭᠦᠯᠦᠨ ᠵᠠᠢᠯᠠᠭᠤᠯᠤᠯᠠ》 ᠭᠡᠪᠡ᠃ ᠡᠢᠮᠦ ᠡᠴᠡ ᠲᠡᠷᠡ ᠭᠠᠵᠠᠷ ᠥᠨᠥ ᠪᠣᠯᠲᠠᠯᠠ ᠭᠢᠯᠭᠠᠯ 3 ᠭᠡᠵᠦ ᠨᠡᠷᠡᠯᠡᠭᠳᠡᠳᠡᠭ ᠶᠤᠮ᠃
ᠭᠠᠵᠠᠷ ᠤᠨ ᠦᠷᠡ ᠰᠢᠮᠡ ᠶᠢ ᠢᠳᠡᠪᠡ
10 ᠢᠰᠷᠧᠯᠴᠦᠳ ᠭᠢᠯᠭᠠᠯ ᠳᠤ ᠪᠠᠭᠤᠳᠠᠯᠯᠠᠭᠠᠳ᠂ ᠲᠤᠰ ᠰᠠᠷᠠ ᠶᠢᠨ ᠠᠷᠪᠠᠨ ᠳᠥᠷᠪᠡᠨ ᠦ ᠡᠳᠦᠷ ᠦᠨ ᠣᠷᠣᠢ ᠶᠧᠷᠢᠺᠣ ᠶᠢᠨ ᠲᠠᠯᠠ ᠭᠠᠵᠠᠷ ᠲᠤ ᠭᠡᠲᠦᠯᠭᠡᠭᠰᠡᠨ ᠦ ᠪᠠᠶᠠᠷ ᠢ ᠲᠡᠮᠳᠡᠭᠯᠡᠵᠦ᠂ 11 ᠭᠡᠲᠦᠯᠭᠡᠭᠰᠡᠨ ᠦ ᠪᠠᠶᠠᠷ ᠤᠨ ᠳᠠᠷᠠᠭᠠ ᠡᠳᠦᠷ᠂ ᠶᠠᠭ ᠲᠡᠷᠡ ᠡᠳᠦᠷ ᠲᠡᠭᠡᠨ ᠭᠠᠵᠠᠷ ᠤᠨ ᠦᠷᠡ ᠰᠢᠮᠡ ᠡᠴᠡ ᠢᠰᠭᠡᠭᠡ ᠦᠭᠡᠢ ᠪᠣᠣᠪᠣ ᠪᠣᠯᠣᠨ ᠬᠠᠭᠤᠷᠤᠭᠰᠠᠨ ᠲᠠᠷᠢᠶᠠᠨ ᠲᠦᠷᠦᠭᠦᠦ ᠢᠳᠡᠪᠡ᠃ 12 ᠲᠡᠳᠡ ᠭᠠᠵᠠᠷ ᠤᠨ ᠦᠷᠡ ᠰᠢᠮᠡ ᠡᠴᠡ ᠢᠳᠡᠭᠰᠡᠨ ᠦ ᠳᠠᠷᠠᠭᠠ ᠡᠳᠦᠷ ᠨᠢ ᠮᠠᠨᠨᠠ ᠳᠠᠭᠤᠰᠴᠠᠢ᠃ ᠢᠰᠷᠧᠯᠴᠦᠳ ᠲᠦ ᠮᠠᠨᠨᠠ ᠳᠠᠬᠢᠨ ᠣᠯᠳᠠᠭᠰᠠᠨ ᠦᠭᠡᠢ᠃ ᠲᠡᠷᠡ ᠵᠢᠯ ᠡᠴᠡ ᠡᠬᠢᠯᠡᠨ ᠲᠡᠳᠡ ᠺᠠᠨᠠᠨ ᠨᠤᠲᠤᠭ ᠤᠨ ᠤᠷᠭᠤᠴᠠ ᠠᠴᠠ ᠢᠳᠡᠭᠰᠡᠨ ᠪᠠᠢᠯᠠ᠃
ᠶᠣᠬᠣᠸᠠ ᠶᠢᠨ ᠴᠡᠷᠢᠭ ᠤᠨ ᠵᠠᠩᠵᠤᠨ
13 ᠶᠣᠱᠦ᠋ᠶᠠ ᠶᠧᠷᠢᠺᠣ ᠶᠢᠨ ᠣᠢᠷᠠᠯᠴᠠᠭᠠ ᠪᠠᠢᠬᠤ ᠳᠠᠭᠠᠨ ᠨᠢᠳᠦ ᠡᠷᠭᠦᠨ ᠳᠡᠭᠡᠭᠰᠢ ᠬᠠᠷᠠᠲᠠᠯᠠ᠂ ᠨᠢᠭᠡ ᠬᠥᠮᠦᠨ ᠰᠤᠭᠤᠯᠤᠭᠰᠠᠨ ᠰᠡᠯᠡᠮᠡ ᠪᠡᠨ ᠭᠠᠷ ᠲᠠᠭᠠᠨ ᠪᠠᠷᠢᠨ ᠵᠣᠭᠰᠣᠵᠤ ᠪᠠᠢᠯᠠ᠃ ᠶᠣᠱᠦ᠋ᠶᠠ ᠲᠡᠰᠢ ᠣᠴᠢᠵᠤ᠂ ᠲᠡᠭᠦᠨ ᠡᠴᠡ᠄ 《ᠲᠠ ᠮᠠᠨ ᠤ ᠲᠠᠯᠠ ᠶᠢᠨ ᠬᠢ ᠤᠤ︖ ᠳᠠᠢᠰᠤᠨ ᠤ ᠲᠠᠯᠠ ᠶᠢᠨ ᠬᠢ ᠤᠤ︖》 ᠭᠡᠵᠦ ᠠᠰᠠᠭᠤᠭᠰᠠᠨ ᠳᠤ᠂ 14 ᠲᠡᠷᠡ᠄ 《ᠦᠭᠡᠢ᠂ ᠪᠢ ᠪᠣᠯ ᠶᠣᠬᠣᠸᠠ ᠶᠢᠨ ᠴᠡᠷᠢᠭ ᠤᠨ ᠵᠠᠩᠵᠤᠨ ᠪᠠᠢᠨᠠ᠂ ᠣᠳᠣ ᠪᠢ ᠢᠷᠡᠭᠰᠡᠨ》 ᠭᠡᠵᠡᠢ᠃ ᠶᠣᠱᠦ᠋ᠶᠠ ᠨᠢᠭᠤᠷ ᠢᠶᠠᠨ ᠭᠠᠵᠠᠷ ᠲᠤ ᠬᠦᠷᠭᠡᠨ ᠲᠡᠭᠦᠨ ᠳᠦ ᠮᠥᠷᠭᠥᠵᠦ᠄ 《ᠮᠢᠨᠦ ᠡᠵᠡᠨ ᠵᠠᠷᠤᠴᠠ ᠳᠠᠭᠠᠨ ᠶᠠᠭᠤ ᠬᠡᠯᠡᠬᠦ ᠰᠠᠨ ᠪᠣᠯ︖》 ᠭᠡᠬᠦ ᠳᠦ᠂ 15 ᠶᠣᠬᠣᠸᠠ ᠶᠢᠨ ᠴᠡᠷᠢᠭ ᠤᠨ ᠵᠠᠩᠵᠤᠨ ᠶᠣᠱᠦ᠋ᠶᠠ ᠳᠤ᠄ 《ᠱᠠᠬᠠᠢ ᠪᠠᠨ ᠲᠠᠢᠯ᠂ ᠵᠣᠭᠰᠣᠵᠤ ᠪᠤᠢ ᠭᠠᠵᠠᠷ ᠴᠢᠨᠢ ᠠᠷᠢᠭᠤᠨ ᠶᠤᠮ》 ᠭᠡᠪᠡ᠃ ᠶᠣᠱᠦ᠋ᠶᠠ ᠲᠡᠢᠨ ᠬᠦ ᠦᠢᠯᠡᠳᠴᠡᠢ᠃