ᠶᠣᠱᠦ᠋ᠶᠠ ᠵᠢᠷᠭᠤᠭᠠ
ᠶᠧᠷᠢᠺᠣ ᠶᠢ ᠡᠵᠡᠯᠡᠪᠡ
1 ᠢᠰᠷᠧᠯᠴᠦᠳ ᠡᠴᠡ ᠪᠣᠯᠵᠤ ᠶᠧᠷᠢᠺᠣ ᠴᠢᠩᠳᠠ ᠬᠠᠭᠠᠭᠳᠠᠭᠰᠠᠨ ᠪᠥᠭᠡᠳ ᠭᠠᠷᠴᠤ ᠣᠷᠣᠬᠤ ᠬᠥᠮᠦᠨ ᠠᠯᠠᠭᠠ ᠪᠣᠯᠪᠠ᠃ 2 ᠶᠣᠬᠣᠸᠠ ᠶᠣᠱᠦ᠋ᠶᠠ ᠳᠤ᠄ 《ᠬᠠᠷᠠ᠂ ᠪᠢ ᠶᠧᠷᠢᠺᠣ ᠶᠢ ᠬᠠᠭᠠᠨ ᠲᠠᠢ ᠨᠢ᠂ ᠡᠷᠡᠯᠬᠡᠭ ᠳᠠᠢᠴᠢᠳ ᠲᠠᠢ ᠨᠢ ᠬᠠᠮᠲᠤ ᠴᠢᠨᠦ ᠭᠠᠷ ᠲᠤ ᠲᠤᠰᠢᠶᠠᠯᠠ︕ 3 ᠲᠠᠨ ᠤ ᠳᠠᠢᠴᠢᠳ ᠪᠦᠭᠦᠳᠡᠭᠡᠷ ᠢᠶᠡᠨ ᠬᠣᠲᠠ ᠶᠢ ᠨᠢᠭᠡ ᠤᠳᠠᠭᠠ ᠲᠣᠭᠣᠷᠢ᠃ ᠵᠢᠷᠭᠤᠭᠠᠨ ᠡᠳᠦᠷ ᠲᠡᠭᠡᠵᠦ ᠬᠢ᠃ 4 ᠲᠡᠭᠡᠬᠦ ᠳᠦ ᠳᠣᠯᠣᠭᠠᠨ ᠲᠠᠬᠢᠯᠴᠢ ᠬᠤᠴᠠ ᠶᠢᠨ ᠡᠪᠡᠷ ᠢᠶᠡᠷ ᠬᠢᠭᠰᠡᠨ ᠳᠣᠯᠣᠭᠠᠨ ᠪᠦᠷᠢᠶᠡ ᠪᠠᠷᠢᠨ ᠠᠪᠳᠠᠷᠠ ᠶᠢᠨ ᠡᠮᠦᠨᠡ ᠶᠠᠪᠤᠨᠠ᠃ ᠳᠣᠯᠣᠳᠠᠬᠢ ᠡᠳᠦᠷ ᠨᠢ ᠲᠠᠬᠢᠯᠴᠢᠳ ᠢ ᠪᠦᠷᠢᠶᠡ ᠦᠯᠢᠶᠡᠬᠦ ᠵᠠᠭᠤᠷᠠ ᠲᠠ ᠨᠠᠷ ᠬᠣᠲᠠ ᠶᠢ ᠳᠣᠯᠣᠭᠠᠨ ᠤᠳᠠᠭᠠ ᠲᠣᠭᠣᠷᠢ᠃ 5 ᠲᠡᠳᠡ ᠡᠪᠡᠷ ᠪᠦᠷᠢᠶᠡ ᠶᠢ ᠤᠷᠲᠤ ᠪᠠᠷ ᠬᠦᠩᠭᠢᠨᠡᠭᠦᠯᠵᠦ᠂ ᠲᠠ ᠨᠠᠷ ᠲᠤ ᠰᠣᠨᠣᠰᠬᠠᠪᠠᠯ ᠪᠦᠬᠦ ᠠᠷᠠᠳ ᠲᠦᠮᠡᠨ ᠴᠢᠩᠭ᠍ᠠ ᠪᠠᠷ ᠤᠤᠬᠠᠢᠯᠠᠨ ᠬᠠᠰᠬᠢᠷᠤᠯᠳᠤᠬᠤ ᠶᠣᠰᠣᠲᠠᠢ᠃ ᠲᠡᠭᠡᠪᠡᠯ ᠬᠣᠲᠠ ᠶᠢᠨ ᠬᠡᠷᠡᠮ ᠳᠣᠭᠣᠭᠰᠢ ᠪᠠᠨ ᠨᠤᠷᠠᠨ ᠤᠨᠠᠬᠤ ᠪᠣᠯᠣᠨᠠ᠂ ᠠᠷᠠᠳ ᠣᠯᠠᠨ ᠬᠥᠮᠦᠨ ᠪᠦᠷᠢ ᠲᠡᠰᠢ ᠪᠠᠨ ᠳᠠᠪᠰᠢᠨ ᠳᠠᠭᠠᠷᠢᠬᠤ ᠪᠣᠯᠣᠨᠠ》 ᠭᠡᠯᠡ᠃ 6 ᠨᠦᠨ ᠦ ᠬᠦᠦ ᠶᠣᠱᠦ᠋ᠶᠠ ᠲᠠᠬᠢᠯᠴᠢᠳ ᠢ ᠳᠠᠭᠤᠳᠠᠨ᠄ 《ᠲᠠ ᠨᠠᠷ ᠭᠡᠷᠡ ᠶᠢᠨ ᠠᠪᠳᠠᠷᠠ ᠶᠢ ᠳᠠᠮᠨᠠ᠃ ᠲᠠᠨ ᠤ ᠳᠣᠯᠣᠭᠠᠨ ᠲᠠᠬᠢᠯᠴᠢ ᠳᠣᠯᠣᠭᠠᠨ ᠬᠤᠴᠠ ᠶᠢᠨ ᠡᠪᠡᠷ ᠦᠨ ᠪᠦᠷᠢᠶᠡ ᠠᠪᠴᠤ᠂ ᠶᠣᠬᠣᠸᠠ ᠶᠢᠨ ᠠᠪᠳᠠᠷᠠ ᠶᠢᠨ ᠡᠮᠦᠨᠡ ᠵᠣᠭᠰᠣ》 ᠭᠡᠳ 7 ᠠᠷᠠᠳ ᠣᠯᠠᠨ ᠳᠤ᠄ 《ᠤᠷᠤᠭᠰᠢ ᠪᠠᠨ ᠶᠠᠪᠤᠵᠤ᠂ ᠬᠣᠲᠠ ᠶᠢ ᠲᠣᠭᠣᠷᠢ᠃ ᠵᠡᠪᠰᠡᠭᠯᠡᠭᠰᠡᠨ ᠡᠷᠡᠴᠦᠳ ᠨᠢ ᠶᠣᠬᠣᠸᠠ ᠶᠢᠨ ᠠᠪᠳᠠᠷᠠ ᠶᠢᠨ ᠡᠮᠦᠨᠡ ᠶᠠᠪᠤ》 ᠭᠡᠵᠦ ᠬᠡᠯᠡᠪᠡ᠃
8 ᠶᠣᠱᠦ᠋ᠶᠠ ᠠᠷᠠᠳ ᠲᠦᠮᠡᠨ ᠳᠦ ᠢᠩᠭᠢᠵᠦ ᠬᠡᠯᠡᠭᠰᠡᠨ ᠳᠦ᠂ ᠳᠣᠯᠣᠭᠠᠨ ᠬᠤᠴᠠ ᠶᠢᠨ ᠡᠪᠡᠷ ᠦᠨ ᠪᠦᠷᠢᠶᠡ ᠪᠠᠷᠢᠭᠰᠠᠨ ᠳᠣᠯᠣᠭᠠᠨ ᠲᠠᠬᠢᠯᠴᠢ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠤᠷᠤᠭᠰᠢᠯᠠᠨ ᠪᠦᠷᠢᠶᠡ ᠪᠡᠨ ᠦᠯᠢᠶᠡᠪᠡ᠃ ᠶᠣᠬᠣᠸᠠ ᠶᠢᠨ ᠭᠡᠷᠡ ᠶᠢᠨ ᠠᠪᠳᠠᠷᠠ ᠲᠡᠳᠡᠨ ᠢ ᠳᠠᠭᠠᠵᠤ ᠪᠠᠢᠯᠠ᠃ 9 ᠪᠦᠷᠢᠶᠡ ᠦᠯᠢᠶᠡᠵᠦ ᠪᠠᠢᠭᠠ ᠲᠠᠬᠢᠯᠴᠢᠳ ᠤᠨ ᠡᠮᠦᠨᠡ ᠵᠡᠪᠰᠡᠭᠯᠡᠭᠰᠡᠨ ᠡᠷᠡᠴᠦᠳ ᠶᠠᠪᠤᠵᠤ᠂ ᠠᠷᠤ ᠶᠢᠨ ᠬᠠᠮᠠᠭᠠᠯᠠᠭᠴᠢᠳ ᠲᠡᠷᠡ ᠠᠪᠳᠠᠷᠠ ᠶᠢ ᠳᠠᠭᠠᠬᠤ ᠳᠤ ᠪᠦᠷᠢᠶᠡ ᠬᠦᠩᠭᠢᠨᠡᠭᠰᠡᠭᠡᠷ ᠪᠠᠢᠯᠠ᠃ 10 ᠬᠠᠷᠢᠨ ᠶᠣᠱᠦ᠋ᠶᠠ ᠠᠷᠠᠳ ᠣᠯᠠᠨ ᠳᠤ ᠤᠷᠢᠳᠴᠢᠯᠠᠨ᠄ 《ᠲᠠ ᠨᠠᠷ ᠪᠦᠦ ᠤᠤᠬᠠᠢᠯᠠ᠂ ᠳᠠᠭᠤ ᠪᠠᠨ ᠪᠦᠦ ᠰᠣᠨᠣᠰᠬᠠ᠂ ᠠᠮᠠᠨ ᠠᠴᠠ ᠪᠠᠨ ᠦᠭᠡ ᠪᠦᠦ ᠭᠠᠷᠭᠠ᠂ ᠨᠠᠮᠠᠶᠢ 〈ᠤᠤᠬᠠᠢᠯᠠ〉 ᠭᠡᠵᠦ ᠬᠡᠯᠡᠬᠦ ᠲᠡᠷᠡ ᠡᠳᠦᠷ ᠯᠠ ᠤᠤᠬᠠᠢᠯᠠ》 ᠭᠡᠵᠦ ᠬᠡᠯᠡᠭᠰᠡᠨ ᠪᠠᠢᠪᠠ᠃ 11 ᠲᠡᠢᠨ ᠬᠦ ᠶᠣᠬᠣᠸᠠ ᠶᠢᠨ ᠠᠪᠳᠠᠷᠠ ᠬᠣᠲᠠ ᠶᠢ ᠨᠢᠭᠡ ᠤᠳᠠᠭᠠ ᠲᠣᠭᠣᠷᠢᠪᠠ᠃ ᠲᠡᠭᠡᠭᠡᠳ ᠠᠷᠠᠳ ᠣᠯᠠᠨ ᠬᠤᠸᠠᠷᠠᠨ ᠳᠠᠭᠠᠨ ᠪᠤᠴᠠᠵᠤ᠂ ᠲᠡᠨᠳᠡ ᠪᠡᠨ ᠬᠣᠨᠣᠭᠯᠠᠪᠠ᠃
12 ᠮᠠᠷᠭᠠᠰᠢ ᠨᠢ ᠶᠣᠱᠦ᠋ᠶᠠ ᠥᠷᠯᠥᠭᠡ ᠡᠷᠲᠡᠯᠡᠨ ᠪᠣᠰᠴᠤ᠂ ᠲᠠᠬᠢᠯᠴᠢᠳ ᠶᠣᠬᠣᠸᠠ ᠶᠢᠨ ᠠᠪᠳᠠᠷᠠ ᠶᠢ ᠳᠠᠮᠨᠠᠪᠠ᠃ 13 ᠳᠣᠯᠣᠭᠠᠨ ᠲᠠᠬᠢᠯᠴᠢ ᠳᠣᠯᠣᠭᠠᠨ ᠡᠪᠡᠷ ᠪᠦᠷᠢᠶᠡ ᠪᠡᠨ ᠦᠯᠢᠶᠡᠨ ᠶᠠᠪᠤᠵᠤ ᠪᠠᠢᠪᠠ᠃ ᠵᠡᠪᠰᠡᠭᠯᠡᠭᠰᠡᠨ ᠡᠷᠡᠴᠦᠳ ᠲᠡᠳᠡᠨ ᠦ ᠡᠮᠦᠨᠡ ᠶᠠᠪᠤᠵᠤ᠂ ᠠᠷᠤ ᠶᠢᠨ ᠬᠠᠮᠠᠭᠠᠯᠠᠭᠴᠢᠳ ᠶᠣᠬᠣᠸᠠ ᠶᠢᠨ ᠠᠪᠳᠠᠷᠠ ᠶᠢ ᠳᠠᠭᠠᠬᠤ ᠳᠤ ᠪᠦᠷᠢᠶᠡ ᠬᠦᠩᠭᠢᠨᠡᠭᠰᠡᠭᠡᠷ ᠪᠠᠢᠯᠠ᠃ 14 ᠲᠡᠢᠨ ᠬᠦ ᠬᠣᠶᠠᠳᠠᠬᠢ ᠡᠳᠦᠷ ᠨᠢ ᠲᠡᠳᠡ ᠬᠣᠲᠠ ᠶᠢ ᠨᠢᠭᠡ ᠲᠣᠭᠣᠷᠢᠭᠠᠳ ᠬᠤᠸᠠᠷᠠᠨ ᠳᠠᠭᠠᠨ ᠪᠤᠴᠠᠪᠠ᠃ ᠲᠡᠳᠡ ᠵᠢᠷᠭᠤᠭᠠᠨ ᠡᠳᠦᠷ ᠡᠢᠨ ᠬᠦ ᠦᠢᠯᠡᠳᠪᠡ᠃
15 ᠬᠠᠷᠢᠨ ᠳᠣᠯᠣᠳᠠᠬᠢ ᠡᠳᠦᠷ ᠨᠢ ᠲᠡᠳᠡ ᠦᠷ ᠴᠠᠢᠬᠤ ᠦᠶᠡ ᠪᠡᠷ ᠡᠷᠲᠡᠯᠡᠨ ᠪᠣᠰᠴᠤ᠂ ᠨᠥᠭᠥᠭᠡ ᠮᠠᠶ᠋ᠢᠭ ᠢᠶᠠᠷ ᠢᠶᠠᠨ ᠬᠣᠲᠠ ᠶᠢ ᠳᠣᠯᠣᠭᠠᠨ ᠤᠳᠠᠭᠠ ᠲᠣᠭᠣᠷᠢᠭᠰᠠᠨ ᠪᠥᠭᠡᠳ ᠭᠠᠭᠴᠠ ᠬᠦ ᠲᠡᠷᠡ ᠡᠳᠦᠷ ᠯᠠ ᠬᠣᠲᠠ ᠶᠢ ᠳᠣᠯᠣᠭᠠᠨ ᠤᠳᠠᠭᠠ ᠲᠣᠭᠣᠷᠢᠵᠠᠢ᠃ 16 ᠳᠣᠯᠣᠳᠠᠬᠢ ᠤᠳᠠᠭᠠ ᠲᠣᠭᠣᠷᠢᠵᠤ ᠲᠠᠬᠢᠯᠴᠢᠳ ᠪᠦᠷᠢᠶᠡ ᠪᠡᠨ ᠦᠯᠢᠶᠡᠬᠦ ᠳᠦ᠂ ᠶᠣᠱᠦ᠋ᠶᠠ ᠠᠷᠠᠳ ᠣᠯᠠᠨ ᠳᠤ ᠲᠤᠰᠢᠶᠠᠨ᠄ 《ᠤᠤᠬᠠᠢᠯᠠ︕ ᠶᠣᠬᠣᠸᠠ ᠡᠨᠡ ᠬᠣᠲᠠ ᠶᠢ ᠲᠠ ᠨᠠᠷ ᠲᠤ ᠥᠭᠭᠥᠭᠰᠡᠨ᠂ 17 ᠬᠣᠲᠠ ᠪᠣᠯᠣᠨ ᠲᠡᠭᠦᠨ ᠳᠣᠲᠣᠷᠠᠬᠢ ᠪᠦᠭᠦᠳᠡ ᠶᠢ ᠨᠢ ᠤᠰᠠᠳᠬᠠᠵᠤ᠂ ᠶᠣᠬᠣᠸᠠ ᠳᠤ ᠡᠷᠭᠦᠬᠦ ᠶᠣᠰᠣᠲᠠᠢ᠃ ᠭᠠᠭᠴᠠ ᠬᠦ ᠶᠠᠩ᠋ᠬᠠᠨ ᠡᠮᠡ ᠷᠠᠬᠠᠪ ᠢ ᠯᠠ ᠭᠡᠷ ᠲᠤᠨᠢ ᠪᠠᠢᠭᠠ ᠪᠦᠬᠦ ᠬᠥᠮᠦᠨ ᠲᠡᠢ ᠬᠠᠮᠲᠤ ᠠᠮᠢᠳᠤ ᠦᠯᠡᠳᠡᠭᠡ᠃ ᠤᠴᠢᠷ ᠨᠢ ᠲᠡᠷᠡ ᠡᠮᠡᠭᠲᠡᠢ ᠪᠢᠳᠡᠨ ᠦ ᠶᠠᠪᠤᠭᠤᠯᠤᠭᠰᠠᠨ ᠲᠤᠷᠰᠢᠭᠤᠯ ᠤᠳ ᠢ ᠨᠢᠭᠤᠵᠤ ᠥᠭᠭᠥᠭᠰᠡᠨ ᠪᠢᠯᠡ᠃ 18 ᠬᠠᠷᠢᠨ ᠲᠠ ᠨᠠᠷ ᠤᠰᠠᠳᠬᠠᠨ ᠡᠷᠭᠦᠬᠦ ᠵᠦᠢᠯ ᠡᠴᠡ ᠪᠣᠯᠭᠣᠮᠵᠢᠯᠠ᠃ ᠡᠳᠡᠭᠡᠷ ᠲᠦ ᠰᠢᠨᠤᠵᠤ ᠥᠪᠡᠷᠰᠡᠳ ᠲᠡᠭᠡᠨ ᠠᠪᠤᠪᠠᠯ᠂ ᠢᠰᠷᠧᠯ ᠤᠨ ᠬᠤᠸᠠᠷᠠᠨ ᠥᠪᠡᠷ ᠢᠶᠡᠨ ᠤᠰᠠᠳᠬᠠᠨ ᠡᠷᠭᠦᠬᠦ ᠵᠦᠢᠯ ᠪᠣᠯᠬᠤ ᠪᠥᠭᠡᠳ ᠭᠠᠢ ᠵᠣᠪᠠᠯᠠᠩ ᠳᠤ ᠤᠴᠠᠷᠠᠬᠤ ᠪᠤᠢ᠃ 19 ᠬᠠᠷᠢᠨ ᠠᠯᠢᠪᠠ ᠠᠯᠲᠠ᠂ ᠮᠥᠩᠭᠥ᠂ ᠬᠦᠷᠡᠯ ᠪᠠ ᠲᠡᠮᠦᠷ ᠦᠨ ᠡᠳ᠋ ᠵᠦᠢᠯᠡᠰ ᠢ ᠶᠣᠬᠣᠸᠠ ᠶᠢᠨ ᠲᠥᠯᠥᠭᠡ ᠲᠤᠰᠠᠭᠠᠷᠯᠠᠵᠤ᠂ ᠶᠣᠬᠣᠸᠠ ᠶᠢᠨ ᠡᠷᠳᠡᠨᠢᠰ ᠤᠨ ᠰᠠᠩ ᠳᠤ ᠣᠷᠣᠭᠤᠯ》 ᠭᠡᠪᠡ᠃ 20 ᠲᠡᠢᠨ ᠬᠦ ᠲᠠᠬᠢᠯᠴᠢᠳ ᠪᠦᠷᠢᠶᠡ ᠪᠡᠨ ᠦᠯᠢᠶᠡᠬᠦ ᠳᠦ᠂ ᠠᠷᠠᠳ ᠣᠯᠠᠨ ᠤᠤᠬᠠᠢᠯᠠᠵᠠᠭᠠᠪᠠ᠃ ᠬᠥᠮᠦᠰ ᠪᠦᠷᠢᠶᠡᠨ ᠳᠠᠭᠤ ᠶᠢ ᠰᠣᠨᠣᠰᠣᠮᠠᠭᠴᠠ ᠪᠠᠨ ᠮᠠᠰᠢ ᠴᠢᠩᠭ᠍ᠠ ᠪᠠᠷ ᠤᠤᠬᠠᠢᠯᠠᠭᠰᠠᠨ ᠳᠤ᠂ ᠬᠡᠷᠡᠮ ᠳᠣᠭᠣᠭᠰᠢ ᠪᠠᠨ ᠨᠤᠷᠠᠨ ᠤᠨᠠᠵᠠᠢ᠂ ᠠᠷᠠᠳ ᠣᠯᠠᠨ ᠬᠥᠮᠦᠨ ᠪᠦᠷᠢ ᠬᠣᠲᠠ ᠤᠷᠤᠭᠤ ᠳᠠᠪᠰᠢᠨ ᠳᠠᠭᠠᠷᠢᠵᠤ᠂ ᠬᠣᠲᠠ ᠶᠢ ᠡᠵᠡᠯᠡᠨ ᠠᠪᠤᠪᠠ᠃ 21 ᠲᠡᠳᠡ ᠬᠥᠮᠦᠰ ᠢ ᠡᠷᠡ ᠡᠮᠡ᠂ ᠬᠥᠭᠰᠢᠨ ᠵᠠᠯᠠᠭᠤ ᠢᠯᠭᠠᠯ ᠦᠭᠡᠢ᠂ ᠮᠥᠨ ᠦᠬᠡᠷ᠂ ᠬᠣᠨᠢ ᠪᠣᠯᠣᠨ ᠡᠯᠵᠢᠭᠡ ᠵᠡᠷᠭᠡ ᠬᠣᠲᠠ ᠳᠤ ᠪᠠᠢᠭᠠ ᠪᠦᠬᠦᠨ ᠢ ᠶᠣᠬᠣᠸᠠ ᠳᠤ ᠵᠣᠷᠢᠭᠤᠯᠤᠨ ᠢᠯᠳᠦᠨ ᠦ ᠢᠷ ᠢᠶᠠᠷ ᠤᠰᠠᠳᠬᠠᠭᠰᠠᠨ ᠪᠠᠢᠨᠠ᠃
ᠷᠠᠬᠠᠪ ᠤᠨ ᠭᠡᠷ ᠪᠦᠯᠢ ᠠᠪᠤᠷᠠᠭᠳᠠᠪᠠ
22 ᠶᠣᠱᠦ᠋ᠶᠠ ᠲᠡᠷᠡ ᠭᠠᠵᠠᠷ ᠢ ᠲᠠᠩᠨᠠᠭᠰᠠᠨ ᠬᠣᠶᠠᠷ ᠬᠥᠮᠦᠨ ᠳᠦ᠄ 《ᠨᠥᠭᠥᠭᠡ ᠶᠠᠩ᠋ᠬᠠᠨ ᠤ ᠭᠡᠷ ᠲᠦ ᠣᠴᠢ᠃ ᠲᠡᠭᠦᠨ ᠳᠦ ᠠᠮᠠᠯᠠᠭᠰᠠᠨ ᠶᠣᠰᠣᠭᠠᠷ ᠢᠶᠠᠨ ᠲᠡᠷᠡ ᠡᠮᠡᠭᠲᠡᠢ ᠶᠢ ᠲᠡᠭᠦᠨ ᠦ ᠳᠦ ᠪᠤᠢ ᠪᠦᠬᠦ ᠬᠥᠮᠦᠨ ᠲᠡᠢ ᠨᠢ ᠬᠠᠮᠲᠤ ᠲᠡᠨᠳᠡ ᠡᠴᠡ ᠭᠠᠷᠭᠠᠵᠤ ᠠᠪᠴᠢᠷᠠ》 ᠭᠡᠬᠦ ᠳᠦ᠂ 23 ᠲᠠᠩᠨᠠᠭᠰᠠᠨ ᠨᠥᠭᠥᠭᠡ ᠵᠠᠯᠠᠭᠤᠴᠤᠳ ᠲᠡᠰᠢ ᠣᠴᠢᠵᠤ᠂ ᠷᠠᠬᠠᠪ ᠢ ᠲᠡᠭᠦᠨ ᠦ ᠡᠴᠢᠭᠡ ᠡᠬᠡ᠂ ᠠᠬᠠ ᠳᠡᠭᠦᠦ ᠨᠠᠷ ᠬᠢᠭᠡᠳ ᠲᠡᠭᠦᠨ ᠦ ᠳᠦ ᠪᠠᠢᠭᠠ ᠪᠦᠬᠦ ᠬᠥᠮᠦᠨ ᠲᠡᠢ ᠨᠢ ᠬᠠᠮᠲᠤ ᠠᠪᠴᠢᠷᠠᠪᠠ᠃ ᠲᠡᠳᠡ ᠷᠠᠬᠠᠪ ᠤᠨ ᠪᠦᠬᠦ ᠭᠡᠷ ᠦᠨ ᠬᠢᠨ ᠢ ᠠᠪᠴᠢᠷᠠᠵᠤ᠂ ᠢᠰᠷᠧᠯ ᠤᠨ ᠬᠤᠸᠠᠷᠠᠨ ᠤ ᠭᠠᠳᠠᠨᠠ ᠲᠠᠯᠠ ᠳᠤ ᠲᠥᠪᠬᠢᠨᠡᠭᠦᠯᠪᠡ᠃ 24 ᠬᠠᠷᠢᠨ ᠲᠡᠳᠡ ᠬᠣᠲᠠ ᠶᠢ ᠳᠣᠲᠣᠷᠠᠬᠢ ᠪᠦᠬᠦ ᠵᠦᠢᠯ ᠲᠠᠢ ᠨᠢ ᠭᠠᠯᠳᠠᠨ ᠰᠢᠲᠠᠭᠠᠭᠰᠠᠨ ᠪᠠ ᠠᠯᠲᠠ᠂ ᠮᠥᠩᠭᠥ᠂ ᠬᠦᠷᠡᠯ᠂ ᠲᠡᠮᠦᠷ ᠦᠨ ᠡᠳ᠋ ᠵᠦᠢᠯᠡᠰ ᠢ ᠯᠠ ᠶᠣᠬᠣᠸᠠ ᠶᠢᠨ ᠭᠡᠷ ᠦᠨ ᠡᠷᠳᠡᠨᠢᠰ ᠤᠨ ᠰᠠᠩ ᠳᠤ ᠬᠢᠪᠡ᠃ 25 ᠶᠣᠱᠦ᠋ᠶᠠ ᠶᠠᠩ᠋ᠬᠠᠨ ᠡᠮᠡ ᠷᠠᠬᠠᠪ ᠢ ᠲᠡᠭᠦᠨ ᠦ ᠭᠡᠷ ᠦᠨ ᠬᠢᠨ ᠪᠣᠯᠣᠨ ᠲᠡᠭᠦᠨ ᠦ ᠳᠦ ᠪᠤᠢ ᠪᠦᠬᠦ ᠬᠥᠮᠦᠨ ᠲᠡᠢ ᠨᠢ ᠬᠠᠮᠲᠤ ᠠᠮᠢᠳᠤ ᠦᠯᠡᠳᠡᠭᠡᠭᠰᠡᠨ ᠪᠠᠢᠨᠠ᠃ ᠷᠠᠬᠠᠪ ᠶᠣᠱᠦ᠋ᠶᠠ ᠶᠢᠨ ᠶᠧᠷᠢᠺᠣ ᠶᠢ ᠲᠠᠩᠨᠠᠭᠤᠯᠬᠤ ᠪᠠᠷ ᠢᠯᠡᠭᠡᠭᠰᠡᠨ ᠲᠤᠷᠰᠢᠭᠤᠯ ᠤᠳ ᠢ ᠨᠢᠭᠤᠭᠰᠠᠨ ᠤᠴᠢᠷ ᠠᠴᠠ ᠣᠳᠣ ᠪᠣᠯᠲᠠᠯᠠ ᠢᠰᠷᠧᠯ ᠤᠨ ᠳᠤᠮᠳᠠ ᠠᠮᠢᠳᠤᠷᠠᠵᠤ ᠪᠤᠢ᠃
26 ᠲᠡᠷᠡ ᠦᠶᠡ ᠳᠦ ᠶᠣᠱᠦ᠋ᠶᠠ ᠲᠡᠳᠡᠨ ᠳᠦ ᠲᠠᠩ᠋ᠭᠠᠷᠢᠭᠯᠠᠨ᠄ 《ᠶᠧᠷᠢᠺᠣ ᠬᠣᠲᠠ ᠶᠢ ᠪᠠᠢᠭᠤᠯᠬᠤ ᠬᠥᠮᠦᠨ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠬᠠᠷᠢᠶᠠᠭᠳᠠᠭ ᠤᠤᠭᠠᠨ ᠬᠦᠦ ᠶᠢᠨ ᠢᠶᠠᠨ ᠠᠮᠢ ᠪᠠᠷ ᠰᠠᠭᠤᠷᠢ ᠶᠢ ᠨᠢ ᠲᠠᠯᠪᠢᠵᠤ ᠣᠳᠬᠣᠨ ᠬᠦᠦ ᠶᠢᠨ ᠢᠶᠠᠨ ᠠᠮᠢ ᠪᠠᠷ ᠬᠠᠭᠠᠯᠭᠠ ᠶᠢ ᠨᠢ ᠪᠣᠰᠬᠠᠭ》 ᠭᠡᠪᠡ᠃
27 ᠡᠢᠨ ᠬᠦ ᠶᠣᠬᠣᠸᠠ ᠶᠣᠱᠦ᠋ᠶᠠ ᠲᠠᠢ ᠬᠠᠮᠲᠤ ᠪᠠᠢᠵᠤ᠂ ᠲᠡᠭᠦᠨ ᠦ ᠠᠯᠳᠠᠷ ᠰᠤᠤ ᠪᠦᠬᠦ ᠨᠤᠲᠤᠭ ᠳᠠᠶᠠᠭᠠᠷ ᠲᠠᠷᠬᠠᠵᠠᠢ᠃