ᠶᠣᠱᠦ᠋ᠶᠠ ᠳᠣᠯᠣᠭᠠ
ᠠᠢᠴᠤᠳ ᠲᠤ ᠢᠯᠠᠭᠳᠠᠪᠠ
1 ᠢᠰᠷᠧᠯᠴᠦᠳ ᠤᠰᠠᠳᠬᠠᠨ ᠡᠷᠭᠦᠬᠦ ᠵᠦᠢᠯᠡᠰ ᠦᠨ ᠲᠠᠯᠠ ᠪᠠᠷ ᠢᠲᠡᠭᠡᠮᠵᠢ ᠠᠯᠳᠠᠵᠠᠢ᠃ ᠶᠦᠳᠠ ᠣᠪᠣᠭ ᠤᠨ ᠽᠧᠷᠠ ᠶᠢᠨ ᠵᠢᠴᠢ᠂ ᠽᠠᠪᠳᠢ ᠶᠢᠨ ᠠᠴᠢ᠂ ᠺᠠᠷᠮᠢ ᠶᠢᠨ ᠬᠦᠦ ᠠᠺᠠᠨ ᠤᠰᠠᠳᠬᠠᠨ ᠡᠷᠭᠦᠬᠦ ᠵᠦᠢᠯᠡᠰ ᠡᠴᠡ ᠥᠪᠡᠷ ᠲᠡᠭᠡᠨ ᠠᠪᠤᠭᠰᠠᠨ ᠠᠴᠠ ᠪᠣᠯᠵᠤ ᠶᠣᠬᠣᠸᠠ ᠶᠢᠨ ᠠᠭᠤᠷ ᠬᠢᠯᠢᠩ ᠢᠰᠷᠧᠯᠴᠦᠳ ᠦᠨ ᠡᠰᠡᠷᠭᠦ ᠳᠦᠷᠡᠯᠵᠡᠭᠰᠡᠨ ᠪᠠᠢᠯᠠ᠃
2 ᠶᠣᠱᠦ᠋ᠶᠠ ᠶᠧᠷᠢᠺᠣ ᠠᠴᠠ ᠪᠧᠲ᠋ᠧᠯ ᠤᠨ ᠵᠡᠭᠦᠨ ᠲᠠᠯᠠ ᠳᠤ ᠪᠠᠢᠳᠠᠭ ᠪᠧᠲ ᠠᠸᠧᠨ ᠤ ᠣᠢᠷᠠᠯᠴᠠᠭᠠ ᠪᠠᠢᠭᠠ ᠠᠢ ᠤᠷᠤᠭᠤ ᠬᠥᠮᠦᠰ ᠢ ᠶᠠᠪᠤᠭᠤᠯᠤᠭᠠᠳ ᠲᠡᠳᠡᠨ ᠳᠦ᠄ 《ᠲᠡᠰᠢ ᠣᠴᠢᠭᠠᠳ᠂ ᠲᠡᠷᠡ ᠨᠤᠲᠤᠭ ᠢ ᠲᠠᠩᠨᠠ》 ᠭᠡᠰᠡᠨ ᠳᠦ᠂ ᠲᠡᠳᠡ ᠶᠠᠪᠤᠵᠤ ᠠᠢ ᠶᠢ ᠲᠠᠩᠨᠠᠪᠠ᠃ 3 ᠲᠡᠳᠡ ᠪᠤᠴᠠᠵᠤ ᠢᠷᠡᠭᠡᠳ ᠶᠣᠱᠦ᠋ᠶᠠ ᠳᠤ᠄ 《ᠪᠦᠬᠦ ᠠᠷᠠᠳ ᠣᠯᠠᠨ ᠢ ᠶᠠᠪᠤᠭᠤᠯᠬᠤ ᠬᠡᠷᠡᠭ ᠦᠭᠡᠢ᠃ ᠬᠣᠶᠠᠷ ᠭᠤᠷᠪᠠᠬᠠᠨ ᠮᠢᠩ᠋ᠭᠠᠨ ᠬᠥᠮᠦᠨ ᠶᠠᠪᠤᠭᠤᠯᠤᠭᠠᠳ ᠴᠣᠬᠢᠭᠤᠯᠪᠠᠯ ᠪᠣᠯᠴᠢᠬᠠᠨᠠ᠃ ᠠᠢ ᠬᠣᠲᠠ ᠶᠢᠨ ᠬᠢᠨ ᠴᠥᠭᠡᠬᠦᠯᠡ ᠪᠠᠢᠨᠠ᠂ ᠪᠦᠬᠦ ᠬᠥᠮᠦᠨ ᠢᠶᠡᠨ ᠲᠡᠨᠳᠡ ᠵᠦᠳᠡᠷᠡᠭᠦᠯᠬᠦ ᠬᠡᠷᠡᠭ ᠦᠭᠡᠢ》 ᠭᠡᠪᠡ᠃ 4 ᠡᠢᠨ ᠬᠦ ᠠᠷᠠᠳ ᠣᠯᠠᠨ ᠠᠴᠠ ᠭᠤᠷᠪᠠᠨ ᠮᠢᠩ᠋ᠭᠠ ᠣᠷᠴᠢᠮ ᠬᠥᠮᠦᠨ ᠲᠡᠰᠢ ᠣᠴᠢᠭᠰᠠᠨ ᠪᠣᠯᠪᠠᠴᠤ ᠠᠢᠴᠤᠳ ᠲᠤ ᠪᠤᠲᠠ ᠴᠣᠬᠢᠭᠳᠠᠵᠠᠢ᠃ 5 ᠠᠢᠴᠤᠳ ᠲᠡᠳᠡᠨ ᠡᠴᠡ ᠪᠠᠷᠤᠭ ᠭᠤᠴᠢᠨ ᠵᠢᠷᠭᠤᠭᠠᠨ ᠬᠥᠮᠦᠨ ᠢ ᠠᠯᠠᠵᠤ᠂ ᠬᠠᠭᠠᠯᠭᠠᠨ ᠠᠴᠠ ᠪᠠᠨ ᠱᠧᠪᠠᠷᠢᠮ ᠬᠦᠷᠲᠡᠯᠡ ᠬᠥᠭᠡᠭᠡᠵᠦ᠂ ᠪᠡᠯ ᠭᠠᠵᠠᠷ ᠲᠤ ᠲᠡᠳᠡᠨ ᠢ ᠴᠣᠬᠢᠭᠰᠠᠨ ᠳᠤ᠂ ᠠᠷᠠᠳ ᠣᠯᠠᠨ ᠤ ᠵᠢᠷᠦᠬᠡ ᠨᠢ ᠬᠠᠢᠯᠵᠤ ᠤᠰᠤ ᠮᠡᠲᠦ ᠪᠣᠯᠪᠠ᠃
6 ᠶᠣᠱᠦ᠋ᠶᠠ ᠬᠤᠪᠴᠠᠰᠤ ᠪᠠᠨ ᠤᠷᠠᠭᠠᠳ ᠢᠰᠷᠧᠯ ᠤᠨ ᠠᠬᠠᠮᠠᠳ ᠤᠳ ᠲᠠᠢ ᠬᠠᠮᠲᠤ ᠶᠣᠬᠣᠸᠠ ᠶᠢᠨ ᠠᠪᠳᠠᠷᠠ ᠶᠢᠨ ᠡᠮᠦᠨᠡ ᠨᠢᠭᠤᠷ ᠢᠶᠠᠨ ᠭᠠᠵᠠᠷ ᠲᠤ ᠨᠠᠭᠠᠵᠤ᠂ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠡᠨ ᠦᠨᠡᠰᠦ ᠰᠠᠴᠤᠵᠤ ᠦᠳᠡᠰᠢ ᠪᠣᠯᠲᠠᠯᠠ ᠲᠡᠨᠳᠡ ᠪᠠᠢᠪᠠ᠃ 7 ᠶᠣᠱᠦ᠋ᠶᠠ᠄ 《ᠠᠢ᠂ ᠶᠣᠬᠣᠸᠠ ᠪᠤᠷᠬᠠᠨ᠂ ᠲᠠ ᠶᠠᠭᠤᠨ ᠳᠤ ᠡᠨᠡ ᠠᠷᠠᠳ ᠣᠯᠠᠨ ᠢ ᠶᠣᠷᠳᠠᠨ ᠢ ᠭᠠᠲᠤᠯᠤᠭᠤᠯᠤᠭᠰᠠᠨ ᠤ ᠪᠠᠨ ᠳᠠᠷᠠᠭᠠ᠂ ᠠᠮᠣᠷᠢᠴᠤᠳ ᠤᠨ ᠭᠠᠷ ᠲᠤ ᠥᠭᠴᠦ᠂ ᠤᠰᠠᠳᠬᠠᠭᠤᠯᠬᠤ ᠭᠡᠵᠦ ᠪᠠᠢᠨᠠ ᠪᠤᠢ︖ ᠪᠢᠳᠡ ᠶᠣᠷᠳᠠᠨ ᠤ ᠨᠥᠭᠥᠭᠡ ᠲᠠᠯᠠ ᠳᠠᠭᠠᠨ ᠰᠡᠳᠬᠢᠯ ᠬᠠᠩ᠋ᠭᠠᠯᠤᠭᠤᠨ ᠰᠠᠭᠤᠭᠰᠠᠭᠠᠷ ᠪᠠᠢᠭᠰᠠᠨ ᠴᠤ ᠪᠣᠯᠣᠭᠠᠰᠠᠢ︕ 8 ᠡᠵᠡᠨ ᠮᠢᠨᠢ᠂ ᠢᠰᠷᠧᠯ ᠳᠠᠢᠰᠤᠨ ᠳᠠᠭᠠᠨ ᠪᠤᠲᠠ ᠴᠣᠬᠢᠭᠳᠠᠭᠰᠠᠨ ᠠᠴᠠ ᠬᠣᠢᠰᠢ ᠪᠢ ᠶᠠᠭᠤ ᠬᠡᠯᠡᠬᠦ ᠪᠢᠯᠡ︖ 9 ᠺᠠᠨᠠᠨᠴᠤᠳ ᠪᠣᠯᠣᠨ ᠡᠨᠡ ᠭᠠᠵᠠᠷ ᠤᠨ ᠪᠦᠬᠦ ᠰᠠᠭᠤᠭᠠᠯᠢᠴᠢᠳ ᠡᠭᠦᠨ ᠢ ᠰᠣᠨᠣᠰᠪᠠᠯ᠂ ᠪᠢᠳᠡᠨ ᠢ ᠪᠦᠰᠡᠯᠡᠨ᠂ ᠭᠠᠵᠠᠷ ᠳᠡᠯᠡᠬᠡᠢ ᠡᠴᠡ ᠨᠡᠷᠡ ᠶᠢ ᠮᠠᠨᠢ ᠠᠷᠴᠢᠬᠤ ᠪᠣᠯᠣᠨᠠ᠃ ᠲᠡᠭᠡᠬᠦ ᠳᠦᠨᠢ ᠲᠠ ᠠᠭᠤᠤ ᠠᠯᠳᠠᠷ ᠤᠨ ᠢᠶᠠᠨ ᠲᠥᠯᠥᠭᠡ ᠶᠠᠭᠤ ᠬᠢᠬᠦ ᠶᠤᠮ ᠪᠤᠢ︖》 ᠭᠡᠯᠡ᠃
10 ᠶᠣᠬᠣᠸᠠ ᠶᠣᠱᠦ᠋ᠶᠠ ᠳᠤ᠄ 《ᠪᠣᠰ᠂ ᠴᠢ ᠶᠠᠭᠤᠨ ᠳᠤ ᠡᠢᠨ ᠬᠦ ᠨᠢᠭᠤᠷ ᠢᠶᠠᠨ ᠨᠠᠭᠠᠭᠰᠠᠭᠠᠷ ᠪᠠᠢᠨᠠ ᠪᠤᠢ︖ 11 ᠢᠰᠷᠧᠯ ᠨᠢᠭᠦᠯ ᠦᠢᠯᠡᠳᠦᠭᠰᠡᠨ︕ ᠮᠢᠨᠦ ᠲᠤᠰᠢᠶᠠᠭᠰᠠᠨ ᠭᠡᠷᠡ ᠶᠢ ᠲᠡᠳᠡ ᠵᠥᠷᠢᠴᠡᠭᠰᠡᠨ᠃ ᠤᠰᠠᠳᠬᠠᠨ ᠡᠷᠭᠦᠬᠦ ᠵᠦᠢᠯᠡᠰ ᠡᠴᠡ ᠠᠪᠤᠭᠰᠠᠨ᠂ ᠬᠤᠯᠠᠭᠠᠢ ᠬᠢᠭᠰᠡᠨ᠂ ᠬᠠᠭᠤᠷᠮᠠᠴᠢ ᠵᠠᠩ ᠭᠠᠷᠭᠠᠭᠰᠠᠨ᠂ ᠲᠡᠭᠦᠨ ᠢ ᠡᠳ᠋ ᠵᠦᠢᠯᠡᠰ ᠦᠨ ᠢᠶᠠᠨ ᠳᠤᠮᠳᠠ ᠲᠠᠯᠪᠢᠭᠰᠠᠨ᠃ 12 ᠢᠰᠷᠧᠯᠴᠦᠳ ᠥᠪᠡᠷᠰᠡᠳ ᠢᠶᠡᠨ ᠤᠰᠠᠳᠬᠠᠨ ᠡᠷᠭᠦᠬᠦ ᠵᠦᠢᠯ ᠪᠣᠯᠣᠭᠰᠠᠨ ᠤᠴᠢᠷ ᠠᠴᠠ ᠳᠠᠢᠰᠤᠨ ᠨᠤᠭᠤᠳ ᠤᠨ ᠢᠶᠠᠨ ᠡᠮᠦᠨᠡ ᠵᠣᠭᠰᠣᠵᠤ ᠦᠯᠦ ᠴᠢᠳᠠᠨ᠂ ᠨᠢᠷᠤᠭᠤ ᠪᠠᠨ ᠬᠠᠷᠠᠭᠤᠯᠤᠨ ᠵᠢᠭᠤᠲᠠᠬᠤ ᠪᠣᠯᠣᠯᠠ᠃ ᠲᠠ ᠨᠠᠷ ᠥᠪᠡᠷᠰᠡᠳ ᠦᠨ ᠢᠶᠠᠨ ᠳᠣᠲᠣᠷᠠ ᠠᠴᠠ ᠲᠡᠷᠡ ᠬᠦ ᠤᠰᠠᠳᠬᠠᠨ ᠡᠷᠭᠦᠬᠦ ᠵᠦᠢᠯᠡᠰ ᠢ ᠪᠦᠭᠦᠳᠡ ᠶᠢ ᠤᠰᠠᠳᠬᠠᠬᠤ ᠠᠴᠠ ᠨᠠᠰᠢ ᠪᠢ ᠲᠠ ᠨᠠᠷ ᠲᠠᠢ ᠳᠠᠬᠢᠨ ᠬᠠᠮᠲᠤ ᠪᠠᠢᠬᠤ ᠦᠭᠡᠢ᠃ 13 ᠣᠳᠣ ᠴᠢ ᠶᠠᠪᠤᠵᠤ᠂ ᠠᠷᠠᠳ ᠣᠯᠠᠨ ᠢ ᠠᠷᠢᠭᠤᠰᠬᠠ᠃ ᠲᠡᠳᠡᠨ ᠳᠦ᠄ 〈ᠮᠠᠷᠭᠠᠰᠢ ᠶᠢᠨ ᠲᠥᠯᠥᠭᠡ ᠥᠪᠡᠷᠰᠡᠳ ᠢ ᠪᠠᠨ ᠠᠷᠢᠭᠤᠰᠬᠠᠵᠠᠭᠠ〉 ᠭᠡᠵᠦ ᠵᠠᠬᠢ᠃ ᠤᠴᠢᠷ ᠨᠢ ᠢᠰᠷᠧᠯ ᠤᠨ ᠪᠤᠷᠬᠠᠨ ᠶᠣᠬᠣᠸᠠ᠄ 〈ᠢᠰᠷᠧᠯ ᠡ᠂ ᠲᠠ ᠨᠠᠷ ᠤᠨ ᠳᠤᠮᠳᠠ ᠤᠰᠠᠳᠬᠠᠨ ᠡᠷᠭᠦᠬᠦ ᠵᠦᠢᠯᠡᠰ ᠪᠠᠢᠨᠠ᠂ ᠲᠡᠳᠡᠭᠡᠷ ᠢ ᠳᠣᠲᠣᠷᠠ ᠠᠴᠠ ᠪᠠᠨ ᠵᠠᠢᠯᠠᠭᠤᠯᠬᠤ ᠠᠴᠠ ᠨᠠᠰᠢ ᠲᠠ ᠨᠠᠷ ᠳᠠᠢᠰᠤᠨ ᠢᠶᠠᠨ ᠳᠡᠢᠯᠵᠦ ᠴᠢᠳᠠᠬᠤ ᠦᠭᠡᠢ〉 ᠭᠡᠵᠦ ᠬᠡᠯᠡᠭᠰᠡᠨ ᠶᠤᠮ᠃ 14 ᠥᠷᠯᠥᠭᠡ ᠲᠠ ᠨᠠᠷ ᠣᠪᠣᠭ ᠣᠪᠣᠭ ᠢᠶᠠᠷ ᠢᠶᠠᠨ ᠭᠠᠷᠴᠤ ᠢᠷᠡ᠃ ᠶᠣᠬᠣᠸᠠ ᠶᠢᠨ ᠢᠯᠭᠠᠵᠤ ᠠᠪᠬᠤ ᠣᠪᠣᠭ ᠨᠢ ᠠᠢᠮᠠᠭ ᠠᠢᠮᠠᠭ ᠢᠶᠠᠷ ᠢᠶᠠᠨ ᠢᠷᠡᠵᠦ᠂ ᠶᠣᠬᠣᠸᠠ ᠶᠢᠨ ᠢᠯᠭᠠᠵᠤ ᠠᠪᠬᠤ ᠠᠢᠮᠠᠭ ᠨᠢ ᠪᠦᠯᠢ ᠪᠦᠯᠢ ᠪᠠᠷ ᠢᠶᠠᠨ ᠢᠷᠡᠵᠦ᠂ ᠮᠥᠨ ᠶᠣᠬᠣᠸᠠ ᠶᠢᠨ ᠢᠯᠭᠠᠵᠤ ᠠᠪᠬᠤ ᠪᠦᠯᠢ ᠨᠢ ᠬᠥᠮᠦᠨ ᠨᠢᠭᠡ ᠪᠦᠷᠢ ᠪᠠᠷ ᠢᠶᠠᠨ ᠢᠷᠡᠭᠲᠦᠨ᠃ 15 ᠤᠰᠠᠳᠬᠠᠨ ᠡᠷᠭᠦᠬᠦ ᠵᠦᠢᠯᠡᠰ ᠢ ᠠᠪᠤᠭᠰᠠᠨ ᠬᠥᠮᠦᠨ᠂ ᠥᠪᠡᠷ ᠲᠡᠭᠡᠨ ᠪᠠᠢᠭᠠ ᠪᠦᠬᠦᠨ ᠦ ᠪᠠᠨ ᠬᠠᠮᠲᠤ ᠭᠠᠯ ᠳᠤ ᠰᠢᠲᠠᠭᠠᠭᠳᠠᠨᠠ᠃ ᠤᠴᠢᠷ ᠨᠢ ᠲᠡᠷᠡ ᠶᠣᠬᠣᠸᠠ ᠶᠢᠨ ᠭᠡᠷᠡ ᠶᠢ ᠵᠥᠷᠢᠴᠡᠵᠦ᠂ ᠢᠰᠷᠧᠯ ᠳᠤ ᠰᠢᠪᠰᠢᠭ ᠲᠠᠷᠢᠭᠰᠠᠨ ᠶᠤᠮ》 ᠭᠡᠯᠡ᠃
ᠠᠺᠠᠨ ᠰᠢᠳᠬᠡᠯ ᠬᠦᠯᠢᠶᠡᠭᠰᠡᠨ ᠨᠢ
16 ᠢᠩᠭᠢᠭᠡᠳ ᠶᠣᠱᠦ᠋ᠶᠠ ᠥᠷᠯᠥᠭᠡ ᠡᠷᠲᠡᠯᠡᠨ ᠪᠣᠰᠴᠤ᠂ ᠢᠰᠷᠧᠯ ᠢ ᠣᠪᠣᠭ ᠤᠳ ᠢᠶᠠᠷ ᠨᠢ ᠢᠷᠡᠭᠦᠯᠬᠦ ᠳᠦ᠂ ᠶᠦᠳᠠ ᠢᠯᠭᠠᠷᠠᠪᠠ᠃ 17 ᠶᠦᠳᠠ ᠶᠢᠨ ᠠᠢᠮᠠᠭ ᠤᠳ ᠢ ᠢᠷᠡᠭᠦᠯᠬᠦ ᠳᠦ᠂ ᠽᠧᠷᠠᠴᠤᠳ ᠢᠯᠭᠠᠷᠠᠪᠠ᠃ ᠽᠧᠷᠠᠴᠤᠳ ᠤᠨ ᠠᠢᠮᠠᠭ ᠢ ᠪᠦᠯᠢ ᠪᠦᠯᠢ ᠪᠠᠷ ᠨᠢ ᠢᠷᠡᠭᠦᠯᠬᠦ ᠳᠦ᠂ ᠽᠠᠪᠳᠢ ᠢᠯᠭᠠᠷᠠᠪᠠ᠃ 18 ᠶᠣᠱᠦ᠋ᠶᠠ ᠲᠡᠭᠦᠨ ᠦ ᠪᠦᠯᠢ ᠶᠢᠨ ᠬᠢᠨ ᠤ ᠡᠷᠡᠴᠦᠳ ᠢ ᠨᠢᠭᠡ ᠨᠢᠭᠡ ᠪᠡᠷ ᠨᠢ ᠢᠷᠡᠭᠦᠯᠬᠦ ᠳᠦ᠂ ᠶᠦᠳᠠ ᠣᠪᠣᠭ ᠤᠨ ᠽᠧᠷᠠ ᠶᠢᠨ ᠵᠢᠴᠢ᠂ ᠽᠠᠪᠳᠢ ᠶᠢᠨ ᠠᠴᠢ᠂ ᠺᠠᠷᠮᠢ ᠶᠢᠨ ᠬᠦᠦ ᠠᠺᠠᠨ ᠢᠯᠭᠠᠷᠠᠪᠠ᠃ 19 ᠶᠣᠱᠦ᠋ᠶᠠ ᠠᠺᠠᠨ ᠳᠤ᠄ 《ᠬᠦᠦ ᠮᠢᠨᠢ᠂ ᠢᠰᠷᠧᠯ ᠤᠨ ᠪᠤᠷᠬᠠᠨ ᠶᠣᠬᠣᠸᠠ ᠳᠤ ᠠᠯᠳᠠᠷ ᠮᠠᠭᠲᠠᠭᠠᠯ ᠢ ᠡᠷᠭᠦᠵᠦ᠂ ᠶᠠᠭᠤ ᠬᠢᠭᠰᠡᠨ ᠢᠶᠡᠨ ᠨᠠᠳᠠ ᠳᠤ ᠨᠢᠭᠤᠯ ᠦᠭᠡᠢ ᠬᠡᠯᠡ》 ᠭᠡᠬᠦ ᠳᠦ᠂ 20 ᠠᠺᠠᠨ ᠬᠠᠷᠢᠭᠤᠯᠤᠨ᠄ 《ᠦᠨᠡᠬᠡᠷ ᠪᠢ ᠢᠰᠷᠧᠯ ᠤᠨ ᠪᠤᠷᠬᠠᠨ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠨᠢᠭᠦᠯ ᠦᠢᠯᠡᠳᠦᠭᠰᠡᠨ᠃ ᠮᠢᠨᠦ ᠬᠢᠭᠰᠡᠨ ᠬᠡᠷᠡᠭ ᠭᠡᠪᠡᠯ᠂ 21 ᠣᠯᠵᠠᠨ ᠳᠣᠲᠣᠷᠠ ᠰᠢᠨᠠᠷ ᠤᠨ ᠭᠣᠶᠣᠮᠰᠣᠭ ᠡᠮᠦᠰᠬᠡᠯ ᠲᠡᠢ ᠬᠠᠮᠲᠤ ᠬᠣᠶᠠᠷ ᠵᠠᠭᠤᠨ ᠱᠧᠺᠧᠯ 4 ᠮᠥᠩᠭᠥ ᠪᠣᠯᠣᠨ ᠲᠠᠪᠢᠨ ᠱᠧᠺᠧᠯ 5 ᠵᠢᠩ ᠲᠠᠢ ᠠᠯᠲᠠᠨ ᠭᠤᠯᠳᠤᠮᠠᠢ ᠪᠠᠢᠬᠤ ᠶᠢ ᠦᠵᠡᠭᠡᠳ᠂ ᠰᠢᠨᠤᠬᠠᠢᠷᠠᠨ ᠲᠡᠳᠡᠭᠡᠷ ᠢ ᠠᠪᠤᠭᠰᠠᠨ᠃ ᠲᠡᠳᠡᠭᠡᠷ ᠨᠢ ᠣᠳᠣ ᠮᠢᠨᠦ ᠮᠠᠢᠬᠠᠨ ᠤ ᠱᠠᠯᠠ ᠳᠣᠣᠷᠠ ᠨᠢᠭᠤᠭᠠᠰᠤᠲᠠᠢ ᠪᠠᠢᠨᠠ᠂ ᠬᠠᠮᠤᠭ ᠤᠨ ᠳᠣᠣᠷᠠ ᠨᠢ ᠮᠥᠩᠭᠥ ᠪᠤᠢ》 ᠭᠡᠪᠡ᠃
22 ᠶᠣᠱᠦ᠋ᠶᠠ ᠮᠠᠢᠬᠠᠨ ᠤᠷᠤᠭᠤ ᠬᠥᠮᠦᠰ ᠢ ᠶᠠᠪᠤᠭᠤᠯᠵᠤ᠂ ᠲᠡᠳᠡ ᠭᠦᠶᠦᠯᠳᠦᠨ ᠣᠴᠢᠵᠤ ᠦᠵᠡᠬᠦ ᠳᠦ᠂ ᠲᠡᠳᠡᠭᠡᠷ ᠵᠦᠢᠯᠡᠰ ᠪᠦᠭᠦᠳᠡ ᠮᠠᠢᠬᠠᠨ ᠤ ᠬᠢᠨᠢ ᠱᠠᠯᠠ ᠳᠣᠣᠷᠠ ᠨᠢᠭᠤᠭᠠᠰᠤᠲᠠᠢ ᠪᠠᠢᠯᠠ᠃ ᠬᠠᠮᠤᠭ ᠤᠨ ᠳᠣᠣᠷᠠ ᠨᠢ ᠮᠥᠩᠭᠥ ᠪᠠᠢᠪᠠ᠃ 23 ᠲᠡᠳᠡ ᠮᠠᠢᠬᠠᠨ ᠠᠴᠠ ᠲᠡᠳᠡᠭᠡᠷ ᠢ ᠣᠯᠵᠤ᠂ ᠶᠣᠱᠦ᠋ᠶᠠ ᠪᠣᠯᠣᠨ ᠪᠦᠬᠦ ᠢᠰᠷᠧᠯᠴᠦᠳ ᠦᠨ ᠡᠮᠦᠨᠡ ᠠᠪᠴᠢᠷᠠᠭᠠᠳ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠠᠰᠬᠠᠪᠠ᠃ 24 ᠢᠩᠭᠢᠭᠡᠳ ᠶᠣᠱᠦ᠋ᠶᠠ ᠽᠧᠷᠠ ᠶᠢᠨ ᠬᠦᠦ ᠠᠺᠠᠨ ᠢ ᠮᠥᠩᠭᠥ᠂ ᠡᠮᠦᠰᠬᠡᠯ᠂ ᠠᠯᠲᠠᠨ ᠭᠤᠯᠳᠤᠮᠠᠢ᠂ ᠮᠥᠨ ᠲᠡᠭᠦᠨ ᠦ ᠬᠥᠪᠡᠭᠦᠳ ᠥᠬᠢᠳ᠂ ᠦᠬᠡᠷ᠂ ᠡᠯᠵᠢᠭᠡ᠂ ᠬᠣᠨᠢ᠂ ᠮᠠᠢᠬᠠᠨ ᠬᠢᠭᠡᠳ ᠲᠡᠭᠦᠨ ᠳᠦ ᠪᠠᠢᠭᠰᠠᠨ ᠪᠦᠬᠦᠨ ᠲᠡᠢ ᠨᠢ ᠬᠠᠮᠲᠤ ᠪᠠᠷᠢᠵᠤ ᠠᠪᠤᠭᠠᠳ ᠪᠦᠬᠦ ᠢᠰᠷᠧᠯ ᠢ ᠳᠠᠭᠠᠭᠤᠯᠤᠨ ᠠᠺᠣᠷ 6 ᠤᠨ ᠬᠥᠨᠳᠡᠢ ᠳᠦ ᠬᠦᠷᠪᠡ᠃ 25 ᠶᠣᠱᠦ᠋ᠶᠠ᠄ 《ᠴᠢ ᠶᠠᠭᠠᠬᠢᠨ ᠪᠢᠳᠡᠨ ᠳᠦ ᠭᠠᠢ ᠠᠪᠴᠢᠷᠠᠪᠠ︖ ᠥᠨᠥᠳᠥᠷ ᠶᠣᠬᠣᠸᠠ ᠴᠢᠮᠠ ᠳᠤ ᠭᠠᠢ ᠠᠪᠴᠢᠷᠠᠨᠠ》 ᠭᠡᠬᠦ ᠳᠦ᠂ ᠪᠦᠬᠦ ᠢᠰᠷᠧᠯ ᠲᠡᠭᠦᠨ ᠤᠷᠤᠭᠤ ᠴᠢᠯᠠᠭᠤ ᠰᠢᠳᠡᠪᠡ 7 ᠃ 26 ᠠᠺᠠᠨ ᠤ ᠳᠡᠭᠡᠷᠡ ᠲᠣᠮᠣ ᠴᠢᠯᠠᠭᠤᠨ ᠣᠪᠣᠭᠠ ᠪᠣᠰᠬᠠᠭᠰᠠᠨ ᠨᠢ ᠥᠨᠥ ᠬᠦᠷᠲᠡᠯᠡ ᠪᠠᠢᠭᠰᠠᠭᠠᠷ ᠪᠠᠢᠨᠠ᠃ ᠡᠢᠨ ᠬᠦ ᠶᠣᠬᠣᠸᠠ ᠶᠢᠨ ᠳᠣᠭᠰᠢᠨ ᠠᠭᠤᠷ ᠬᠢᠯᠢᠩ ᠨᠠᠮᠳᠠᠪᠠ᠃ ᠡᠭᠦᠨ ᠦ ᠤᠴᠢᠷ ᠢᠶᠠᠷ ᠲᠡᠷᠡ ᠭᠠᠵᠠᠷ ᠥᠨᠥᠳᠥᠷ ᠪᠣᠯᠲᠠᠯᠠ ᠠᠺᠣᠷ 8 ᠤᠨ ᠬᠥᠨᠳᠡᠢ ᠬᠡᠮᠡᠨ ᠨᠡᠷᠡᠯᠡᠭᠳᠡᠭᠰᠡᠭᠡᠷ ᠢᠷᠡᠭᠰᠡᠨ ᠪᠠᠢᠨᠠ᠃