ᠶᠣᠱᠦ᠋ᠶᠠ ᠭᠤᠷᠪᠠ
ᠶᠣᠷᠳᠠᠨ ᠢ ᠭᠠᠲᠤᠯᠪᠠ
1 ᠶᠣᠱᠦ᠋ᠶᠠ ᠥᠷᠯᠥᠭᠡ ᠡᠷᠲᠡᠯᠡᠨ ᠪᠣᠰᠴᠤ ᠪᠦᠬᠦ ᠢᠰᠷᠧᠯᠴᠦᠳ ᠦᠨ ᠬᠠᠮᠲᠤ ᠬᠤᠸᠠᠢᠰᠠ ᠮᠣᠳᠣᠨ ᠣᠢ ᠠᠴᠠ ᠬᠥᠳᠡᠯᠦᠨ ᠶᠣᠷᠳᠠᠨ ᠳᠤ ᠬᠦᠷᠴᠦ᠂ ᠭᠠᠲᠤᠯᠬᠤ ᠠᠴᠠ ᠪᠠᠨ ᠡᠮᠦᠨᠡ ᠲᠡᠨᠳᠡ ᠪᠡᠨ ᠪᠠᠭᠤᠳᠠᠯᠯᠠᠪᠠ᠃ 2 ᠭᠤᠷᠪᠠ ᠬᠣᠨᠣᠭ ᠤᠨ ᠳᠠᠷᠠᠭᠠ ᠳᠠᠭᠠᠭᠠᠮᠠᠯ ᠤᠳ ᠬᠤᠸᠠᠷᠠᠨ ᠳᠤᠮᠳᠠᠭᠤᠷ ᠶᠠᠪᠤᠵᠤ᠂ 3 ᠠᠷᠠᠳ ᠣᠯᠠᠨ ᠳᠤ ᠵᠠᠬᠢᠨ᠄ 《ᠶᠣᠬᠣᠸᠠ ᠪᠤᠷᠬᠠᠨ ᠤ ᠴᠢᠨᠢ ᠭᠡᠷᠡ ᠶᠢᠨ ᠠᠪᠳᠠᠷᠠ ᠶᠢ ᠯᠧᠸᠢ ᠶᠢᠨ ᠲᠠᠬᠢᠯᠴᠢᠳ ᠳᠠᠮᠨᠠᠨ ᠶᠠᠪᠤᠬᠤ ᠶᠢ ᠲᠠ ᠨᠠᠷ ᠦᠵᠡᠪᠡᠯ ᠣᠷᠣᠨ ᠠᠴᠠ ᠪᠠᠨ ᠬᠥᠳᠡᠯᠵᠦ᠂ ᠠᠷᠤ ᠠᠴᠠ ᠨᠢ ᠳᠠᠭᠠᠨ ᠶᠠᠪᠤᠭᠲᠤᠨ᠃ 4 ᠲᠡᠭᠡᠪᠡᠯ ᠲᠠ ᠨᠠᠷ ᠤᠷᠢᠳᠤ ᠨᠢ ᠶᠠᠪᠤᠵᠤ ᠦᠵᠡᠭᠡ ᠦᠭᠡᠢ ᠡᠨᠡ ᠵᠠᠮ ᠢᠶᠠᠷ ᠶᠠᠭᠠᠬᠢᠵᠤ ᠶᠠᠪᠤᠬᠤ ᠪᠠᠨ ᠮᠡᠳᠡᠬᠦ ᠪᠣᠯᠣᠨᠠ᠃ ᠬᠠᠷᠢᠨ ᠠᠪᠳᠠᠷᠠ ᠪᠣᠯᠣᠨ ᠲᠠ ᠨᠠᠷ ᠤᠨ ᠬᠣᠭᠣᠷᠣᠨᠳᠣ ᠬᠣᠶᠠᠷ ᠮᠢᠩ᠋ᠭᠠ ᠣᠷᠴᠢᠮ ᠲᠣᠬᠣᠢ 2 ᠵᠠᠢ ᠪᠠᠢᠬᠤ ᠶᠣᠰᠣᠲᠠᠢ᠃ ᠲᠡᠭᠦᠨ ᠳᠦ ᠪᠦᠦ ᠣᠢᠷᠠᠲᠤ》 ᠭᠡᠪᠡ᠃
5 ᠲᠡᠭᠡᠭᠡᠳ ᠶᠣᠱᠦ᠋ᠶᠠ ᠠᠷᠠᠳ ᠣᠯᠠᠨ ᠳᠤ᠄ 《ᠥᠪᠡᠷᠰᠡᠳ ᠢ ᠪᠠᠨ ᠠᠷᠢᠭᠤᠰᠬᠠ᠃ ᠮᠠᠷᠭᠠᠰᠢ ᠶᠣᠬᠣᠸᠠ ᠲᠠ ᠨᠠᠷ ᠤᠨ ᠳᠤᠮᠳᠠ ᠭᠠᠢᠬᠠᠮᠰᠢᠭᠲᠤ ᠵᠦᠢᠯᠡᠰ ᠢ ᠬᠢᠬᠦ ᠪᠣᠯᠣᠨᠠ》 ᠭᠡᠪᠡ᠃ 6 ᠶᠣᠱᠦ᠋ᠶᠠ ᠲᠠᠬᠢᠯᠴᠢᠳ ᠲᠤ᠄ 《ᠭᠡᠷᠡ ᠶᠢᠨ ᠠᠪᠳᠠᠷᠠ ᠶᠢ ᠳᠠᠮᠨᠠᠭᠠᠳ ᠠᠷᠠᠳ ᠣᠯᠠᠨ ᠢ ᠬᠣᠰᠢᠭᠤᠴᠢᠯᠠᠨ ᠭᠣᠣᠯ ᠢ ᠭᠠᠲᠤᠯ》 ᠭᠡᠰᠡᠨ ᠳᠦ᠂ ᠲᠡᠳᠡ ᠭᠡᠷᠡ ᠶᠢᠨ ᠠᠪᠳᠠᠷᠠ ᠶᠢ ᠳᠠᠮᠨᠠᠵᠤ ᠠᠷᠠᠳ ᠣᠯᠠᠨ ᠢ ᠬᠣᠰᠢᠭᠤᠴᠢᠯᠠᠨ ᠶᠠᠪᠤᠪᠠ᠃
7 ᠶᠣᠬᠣᠸᠠ ᠶᠣᠱᠦ᠋ᠶᠠ ᠳᠤ᠄ 《ᠪᠢ ᠥᠨᠥᠳᠥᠷ ᠡᠴᠡ ᠡᠬᠢᠯᠡᠨ ᠴᠢᠮᠠᠶᠢ ᠪᠦᠬᠦ ᠢᠰᠷᠧᠯ ᠤᠨ ᠨᠢᠳᠦᠨ ᠳᠡᠭᠡᠷᠡ ᠡᠷᠭᠦᠮᠵᠢᠯᠡᠨᠡ᠃ ᠲᠡᠢᠨ ᠬᠦ ᠪᠢ ᠮᠣᠰᠧ ᠲᠠᠢ ᠬᠠᠮᠲᠤ ᠪᠠᠢᠭᠰᠠᠨ ᠤ ᠠᠳᠠᠯᠢ ᠴᠢᠮᠠ ᠲᠠᠢ ᠬᠠᠮᠲᠤ ᠪᠠᠢᠬᠤ ᠪᠣᠯᠣᠨᠠ ᠭᠡᠳᠡᠭ ᠢᠶᠡᠨ ᠲᠡᠳᠡᠨ ᠳᠦ ᠮᠡᠳᠡᠭᠦᠯᠦᠨᠡ᠃ 8 ᠬᠠᠷᠢᠨ ᠴᠢ ᠭᠡᠷᠡ ᠶᠢᠨ ᠠᠪᠳᠠᠷᠠ ᠶᠢ ᠳᠠᠮᠨᠠᠭᠰᠠᠨ ᠲᠠᠬᠢᠯᠴᠢᠳ ᠲᠤ ᠲᠤᠰᠢᠶᠠᠨ᠄ 〈ᠶᠣᠷᠳᠠᠨ ᠤ ᠤᠰᠤᠨ ᠤ ᠬᠥᠪᠡᠭᠡᠨ ᠳᠦ ᠬᠦᠷᠪᠡᠯ ᠶᠣᠷᠳᠠᠨ ᠳᠣᠲᠣᠷᠠ ᠣᠷᠣᠵᠤ ᠵᠣᠭᠰᠣ〉 ᠭᠡᠵᠦ ᠬᠡᠯᠡᠬᠦ ᠶᠣᠰᠣᠲᠠᠢ》 ᠭᠡᠯᠡ᠃ 9 ᠶᠣᠱᠦ᠋ᠶᠠ ᠢᠰᠷᠧᠯᠴᠦᠳ ᠲᠦ᠄ 《ᠨᠠᠰᠢ ᠢᠷᠠ᠂ ᠶᠣᠬᠣᠸᠠ ᠪᠤᠷᠬᠠᠨ ᠤ ᠪᠠᠨ ᠦᠭᠡ ᠶᠢ ᠰᠣᠨᠣᠰ᠂ 10 ᠠᠮᠢᠳᠤ ᠪᠤᠷᠬᠠᠨ ᠲᠠ ᠨᠠᠷ ᠤᠨ ᠳᠤᠮᠳᠠ ᠪᠠᠢᠨᠠ᠃ ᠲᠡᠷᠡ ᠲᠠ ᠨᠠᠷ ᠤᠨ ᠡᠮᠦᠨᠡ ᠺᠠᠨᠠᠨᠴᠤᠳ᠂ ᠾᠢᠲ᠋ᠴᠦᠳ᠂ ᠾᠢᠸᠢᠴᠦᠳ᠂ ᠫᠧᠷᠢᠽᠴᠦᠳ᠂ ᠭᠢᠷᠭᠠᠱᠴᠤᠳ᠂ ᠠᠮᠣᠷᠢᠴᠤᠳ ᠪᠣᠯᠣᠨ ᠶᠧᠪᠦ᠋ᠰᠴᠦᠳ ᠢ ᠯᠠᠪᠲᠠᠢ ᠬᠥᠭᠡᠭᠡᠨ ᠵᠠᠢᠯᠠᠭᠤᠯᠬᠤ ᠪᠣᠯᠣᠨᠠ︕ ᠡᠭᠦᠨ ᠢ ᠲᠠ ᠨᠠᠷ ᠣᠳᠣ ᠮᠡᠳᠡᠬᠦ ᠪᠣᠯᠣᠨᠠ》 ᠭᠡᠰᠡᠨ ᠢᠶᠡᠨ᠂ 11 《ᠬᠠᠷᠠ᠂ ᠪᠦᠬᠦ ᠭᠠᠵᠠᠷ ᠳᠡᠯᠡᠬᠡᠢ ᠶᠢᠨ ᠡᠵᠡᠨ ᠦ ᠭᠡᠷᠡ ᠶᠢᠨ ᠠᠪᠳᠠᠷᠠ ᠲᠠ ᠨᠠᠷ ᠢ ᠬᠣᠰᠢᠭᠤᠴᠢᠯᠠᠨ ᠶᠣᠷᠳᠠᠨ ᠢ ᠭᠠᠲᠤᠯᠬᠤ ᠭᠡᠵᠦ ᠪᠠᠢᠨᠠ︕ 12 ᠲᠠ ᠨᠠᠷ ᠣᠳᠣ ᠢᠰᠷᠧᠯ ᠤᠨ ᠣᠪᠣᠭ ᠪᠦᠷᠢ ᠡᠴᠡ ᠨᠢᠭᠡ ᠬᠥᠮᠦᠨ᠂ ᠪᠦᠭᠦᠳᠡ ᠠᠷᠪᠠᠨ ᠬᠣᠶᠠᠷ ᠬᠥᠮᠦᠨ ᠢ ᠰᠢᠯᠢᠵᠦ ᠭᠠᠷᠭᠠ᠃ 13 ᠪᠦᠬᠦ ᠭᠠᠵᠠᠷ ᠳᠡᠯᠡᠬᠡᠢ ᠶᠢᠨ ᠡᠵᠡᠨ ᠶᠣᠬᠣᠸᠠ ᠶᠢᠨ ᠠᠪᠳᠠᠷᠠ ᠶᠢ ᠳᠠᠮᠨᠠᠭᠰᠠᠨ ᠲᠠᠬᠢᠯᠴᠢᠳ ᠶᠣᠷᠳᠠᠨ ᠤ ᠤᠰᠤᠨ ᠳᠤ ᠬᠥᠯ ᠲᠠᠯᠪᠢᠩ᠋ᠭᠤᠲᠠ᠂ ᠶᠣᠷᠳᠠᠨ ᠤ ᠤᠷᠤᠰᠬᠠᠯ ᠲᠠᠰᠤᠯᠤᠭᠳᠠᠵᠤ ᠳᠡᠭᠡᠷᠡ ᠡᠴᠡ ᠤᠷᠤᠰᠴᠤ ᠪᠠᠢᠭᠠ ᠤᠰᠤ ᠣᠪᠣᠭᠠᠷᠠᠨ ᠲᠣᠭᠲᠠᠬᠤ ᠪᠣᠯᠣᠨᠠ》 ᠭᠡᠪᠡ᠃
14 ᠢᠩᠭᠢᠭᠡᠳ ᠠᠷᠠᠳ ᠣᠯᠠᠨ ᠶᠣᠷᠳᠠᠨ ᠢ ᠭᠠᠲᠤᠯᠬᠤ ᠪᠠᠷ ᠮᠠᠢᠬᠠᠨ ᠢᠶᠠᠨ ᠪᠠᠭᠤᠯᠭᠠᠨ ᠬᠥᠳᠡᠯᠬᠦ ᠳᠦ᠂ ᠭᠡᠷᠡ ᠶᠢᠨ ᠠᠪᠳᠠᠷᠠ ᠶᠢ ᠳᠠᠮᠨᠠᠭᠰᠠᠨ ᠲᠠᠬᠢᠯᠴᠢᠳ ᠠᠷᠠᠳ ᠲᠦᠮᠡᠨ ᠢ ᠬᠣᠰᠢᠭᠤᠴᠢᠯᠠᠨ ᠶᠠᠪᠤᠵᠤ ᠪᠠᠢᠯᠠ᠃ 15 ᠤᠷᠭᠤᠴᠠ ᠬᠤᠷᠢᠶᠠᠯᠲᠠ ᠶᠢᠨ ᠦᠶᠡ ᠪᠣᠯᠵᠤ ᠶᠣᠷᠳᠠᠨ ᠤ ᠤᠰᠤ ᠡᠷᠭᠢ ᠪᠠᠨ ᠬᠠᠯᠢᠨ ᠦᠶᠡᠷᠯᠡᠵᠦ ᠪᠠᠢᠪᠠ᠃ ᠬᠠᠷᠢᠨ ᠠᠪᠳᠠᠷᠠ ᠶᠢ ᠳᠠᠮᠨᠠᠭᠰᠠᠨ ᠲᠠᠬᠢᠯᠴᠢᠳ ᠶᠣᠷᠳᠠᠨ ᠳᠤ ᠬᠦᠷᠴᠦ ᠬᠥᠯ ᠢᠶᠡᠨ ᠤᠰᠤᠨ ᠤ ᠵᠠᠬᠠ ᠳᠤ ᠳᠦᠷᠦᠮᠡᠭᠴᠡ᠂ 16 ᠳᠡᠭᠡᠷᠡ ᠲᠠᠯᠠ ᠠᠴᠠ ᠤᠷᠤᠰᠴᠤ ᠪᠠᠢᠭᠠ ᠤᠰᠤ ᠵᠣᠭᠰᠣᠵᠤ ᠨᠡᠯᠢᠶᠡᠳ ᠬᠣᠯᠠ ᠽᠠᠷᠧᠲ᠋ᠠᠨ ᠤ ᠣᠢᠷᠠᠯᠴᠠᠭᠠ ᠣᠷᠣᠰᠢᠬᠤ ᠠᠳᠠᠮ ᠬᠣᠲᠠ ᠬᠦᠷᠲᠡᠯᠡ ᠣᠪᠣᠭᠠᠷᠠᠭᠠᠳ ᠠᠷᠠᠪᠠ᠂ ᠲᠤᠬᠠᠢᠯᠠᠪᠠᠯ ᠳᠠᠪᠤᠰᠤᠲᠤ ᠲᠠᠩᠭᠢᠰ ᠤᠷᠤᠭᠤ ᠤᠷᠤᠰᠴᠤ ᠪᠠᠢᠭᠠ ᠤᠰᠤ ᠪᠦᠷᠢᠮᠦᠰᠦᠨ ᠲᠠᠰᠤᠷᠠᠵᠠᠢ᠃ ᠲᠡᠭᠡᠭᠡᠳ ᠠᠷᠠᠳ ᠣᠯᠠᠨ ᠭᠠᠲᠤᠯᠵᠤ ᠶᠧᠷᠢᠺᠣ ᠶᠢᠨ ᠣᠢᠷᠠᠯᠴᠠᠭᠠ ᠬᠦᠷᠪᠡ᠃ 17 ᠶᠣᠬᠣᠸᠠ ᠶᠢᠨ ᠭᠡᠷᠡ ᠶᠢᠨ ᠠᠪᠳᠠᠷᠠ ᠶᠢ ᠳᠠᠮᠨᠠᠭᠰᠠᠨ ᠲᠠᠬᠢᠯᠴᠢᠳ ᠶᠣᠷᠳᠠᠨ ᠭᠣᠣᠯ ᠤᠨ ᠲᠡᠭ ᠳᠤᠮᠳᠠ ᠬᠠᠭᠤᠷᠠᠢ ᠭᠠᠵᠠᠷ ᠳᠡᠭᠡᠷᠡ ᠪᠠᠲᠤ ᠵᠣᠭᠰᠣᠵᠤ ᠪᠠᠢᠬᠤ ᠳᠤ᠂ ᠪᠦᠬᠦ ᠢᠰᠷᠧᠯ ᠬᠠᠭᠤᠷᠠᠢ ᠭᠠᠵᠠᠷ ᠢᠶᠠᠷ ᠥᠩᠭᠡᠷᠡᠵᠦ ᠪᠦᠬᠦ ᠦᠨᠳᠦᠰᠦᠲᠡᠨ ᠢᠶᠡᠷ ᠢᠶᠠᠨ ᠶᠣᠷᠳᠠᠨ ᠢ ᠭᠠᠲᠤᠯᠵᠤ ᠳᠠᠭᠤᠰᠤᠭᠰᠠᠨ ᠪᠠᠢᠨᠠ᠃