ᠶᠣᠱᠦ᠋ᠶᠠ ᠳᠥᠷᠪᠡ
ᠳᠤᠷᠠᠰᠬᠠᠯ ᠤᠨ ᠴᠢᠯᠠᠭᠤ ᠨᠤᠭᠤᠳ
1 ᠢᠩᠭᠢᠭᠡᠳ ᠪᠦᠬᠦ ᠦᠨᠳᠦᠰᠦᠲᠡᠨ ᠢᠶᠡᠷ ᠢᠶᠠᠨ ᠶᠣᠷᠳᠠᠨ ᠢ ᠭᠠᠲᠤᠯᠵᠤ ᠳᠠᠭᠤᠰᠬᠤ ᠳᠤ᠂ ᠶᠣᠬᠣᠸᠠ ᠶᠣᠱᠦ᠋ᠶᠠ ᠳᠤ ᠠᠢᠯᠠᠳᠤᠨ᠄ 2 《ᠴᠢ ᠣᠪᠣᠭ ᠪᠦᠷᠢ ᠡᠴᠡ ᠨᠢᠭᠡ ᠬᠥᠮᠦᠨ ᠢ ᠰᠢᠯᠢᠵᠦ᠂ ᠠᠷᠠᠳ ᠲᠦᠮᠡᠨ ᠡᠴᠡ ᠨᠡᠢᠲᠡ ᠠᠷᠪᠠᠨ ᠬᠣᠶᠠᠷ ᠬᠥᠮᠦᠨ ᠠᠪ᠃ 3 ᠲᠡᠭᠡᠭᠡᠳ ᠲᠡᠳᠡᠨ ᠳᠦ᠄ 〈ᠡᠨᠡ ᠶᠣᠷᠳᠠᠨ ᠤ ᠲᠡᠭ ᠳᠤᠮᠳᠠ᠂ ᠲᠠᠬᠢᠯᠴᠢᠳ ᠤᠨ ᠬᠥᠯ ᠪᠠᠲᠤ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠭᠠᠵᠠᠷ ᠠᠴᠠ ᠠᠷᠪᠠᠨ ᠬᠣᠶᠠᠷ ᠴᠢᠯᠠᠭᠤ ᠠᠪᠴᠢᠷᠠᠭᠠᠳ᠂ ᠡᠨᠡ ᠰᠥᠨᠢ ᠶᠢᠨ ᠪᠠᠭᠤᠳᠠᠯᠯᠠᠬᠤ ᠭᠠᠵᠠᠷ ᠲᠠᠭᠠᠨ ᠲᠠᠯᠪᠢ〉 ᠭᠡᠵᠦ ᠵᠠᠬᠢ》 ᠭᠡᠵᠡᠢ᠃ 4 ᠶᠣᠱᠦ᠋ᠶᠠ ᠣᠪᠣᠭ ᠪᠦᠷᠢ ᠡᠴᠡ ᠨᠢᠭᠡ ᠬᠥᠮᠦᠨ᠂ ᠢᠰᠷᠧᠯᠴᠦᠳ ᠡᠴᠡ ᠲᠣᠮᠢᠯᠠᠭᠰᠠᠨ ᠠᠷᠪᠠᠨ ᠬᠣᠶᠠᠷ ᠬᠥᠮᠦᠨ ᠢᠶᠡᠨ ᠳᠠᠭᠤᠳᠠᠭᠠᠳ᠂ 5 ᠲᠡᠳᠡᠨ ᠳᠦ᠄ 《ᠶᠣᠬᠣᠸᠠ ᠪᠤᠷᠬᠠᠨ ᠤ ᠪᠠᠨ ᠠᠪᠳᠠᠷᠠ ᠶᠢᠨ ᠡᠮᠦᠨᠡᠭᠦᠷ ᠶᠣᠷᠳᠠᠨ ᠤ ᠲᠡᠭ ᠳᠤᠮᠳᠠ ᠣᠴᠢᠵᠤ᠂ ᠢᠰᠷᠧᠯᠴᠦᠳ ᠦᠨ ᠣᠪᠣᠭ ᠤᠨ ᠲᠣᠭᠠ ᠪᠠᠷ ᠬᠥᠮᠦᠨ ᠪᠦᠷᠢ ᠮᠥᠷᠥᠨ ᠳᠡᠭᠡᠷᠡ ᠪᠡᠨ ᠨᠢᠭᠡ ᠴᠢᠯᠠᠭᠤ ᠡᠭᠦᠷᠴᠦ ᠠᠪᠴᠢᠷᠠ᠃ 6 ᠡᠳᠡᠭᠡᠷ ᠨᠢ ᠲᠠ ᠨᠠᠷ ᠲᠤ ᠳᠤᠷᠠᠰᠬᠠᠯ ᠪᠣᠯᠣᠨᠠ᠃ ᠬᠣᠵᠢᠮ ᠲᠠᠨ ᠤ ᠬᠡᠦᠬᠡᠳ ᠤᠳ᠄ 〈ᠡᠳᠡᠭᠡᠷ ᠨᠢ ᠶᠠᠭᠤᠨ ᠤ ᠴᠢᠯᠠᠭᠤ ᠪᠤᠢ︖〉 ᠭᠡᠵᠦ ᠠᠰᠠᠭᠤᠬᠤ ᠳᠤ᠂ 7 ᠲᠠ ᠨᠠᠷ᠄ 〈ᠶᠣᠬᠣᠸᠠ ᠶᠢᠨ ᠭᠡᠷᠡ ᠶᠢᠨ ᠠᠪᠳᠠᠷᠠ ᠶᠢᠨ ᠡᠮᠦᠨᠡ ᠶᠣᠷᠳᠠᠨ ᠤ ᠤᠷᠤᠰᠬᠠᠯ ᠲᠠᠰᠤᠯᠤᠭᠳᠠᠭᠰᠠᠨ ᠶᠤᠮ᠃ ᠲᠡᠷᠡ ᠠᠪᠳᠠᠷᠠ ᠶᠣᠷᠳᠠᠨ ᠢ ᠭᠠᠲᠤᠯᠤᠨ ᠭᠠᠷᠬᠤ ᠦᠶᠡ ᠳᠦ᠂ ᠶᠣᠷᠳᠠᠨ ᠤ ᠤᠰᠤ ᠲᠠᠰᠤᠯᠤᠭᠳᠠᠭᠰᠠᠨ ᠤᠴᠢᠷ ᠠᠴᠠ ᠡᠳᠡᠭᠡᠷ ᠴᠢᠯᠠᠭᠤ ᠨᠢ ᠢᠰᠷᠧᠯᠴᠦᠳ ᠲᠦ ᠮᠥᠩᠬᠡ ᠶᠢᠨ ᠳᠤᠷᠠᠰᠬᠠᠯ ᠪᠣᠯᠣᠭᠰᠠᠨ ᠶᠤᠮ〉 ᠭᠡᠵᠦ ᠬᠡᠯᠡ》 ᠭᠡᠪᠡ᠃
8 ᠢᠰᠷᠧᠯᠴᠦᠳ ᠶᠣᠱᠦ᠋ᠶᠠ ᠶᠢᠨ ᠲᠤᠰᠢᠶᠠᠭᠰᠠᠨ ᠶᠣᠰᠣᠭᠠᠷ ᠭᠦᠢᠴᠡᠳᠬᠡᠪᠡ᠃ ᠲᠡᠳᠡ ᠶᠣᠬᠣᠸᠠ ᠶᠢᠨ ᠶᠣᠱᠦ᠋ᠶᠠ ᠳᠤ ᠠᠢᠯᠠᠳᠤᠭᠰᠠᠨ ᠶᠣᠰᠣᠭᠠᠷ ᠢᠰᠷᠧᠯᠴᠦᠳ ᠦᠨ ᠣᠪᠣᠭ ᠤᠨ ᠲᠣᠭᠠ ᠪᠠᠷ ᠶᠣᠷᠳᠠᠨ ᠤ ᠲᠡᠭ ᠳᠤᠮᠳᠠ ᠠᠴᠠ ᠠᠷᠪᠠᠨ ᠬᠣᠶᠠᠷ ᠴᠢᠯᠠᠭᠤ ᠠᠪᠴᠢᠷᠠᠵᠤ ᠪᠠᠭᠤᠳᠠᠯᠯᠠᠬᠤ ᠭᠠᠵᠠᠷ ᠲᠠᠭᠠᠨ ᠲᠠᠯᠪᠢᠪᠠ᠃ 9 ᠶᠣᠱᠦ᠋ᠶᠠ ᠶᠣᠷᠳᠠᠨ ᠤ ᠲᠡᠭ ᠳᠤᠮᠳᠠ᠂ ᠭᠡᠷᠡ ᠶᠢᠨ ᠠᠪᠳᠠᠷᠠ ᠶᠢ ᠳᠠᠮᠨᠠᠭᠰᠠᠨ ᠲᠠᠬᠢᠯᠴᠢᠳ ᠤᠨ ᠵᠣᠭᠰᠣᠵᠤ ᠪᠠᠢᠭᠰᠠᠨ ᠲᠡᠷᠡ ᠭᠠᠵᠠᠷ ᠠᠴᠠ ᠠᠷᠪᠠᠨ ᠬᠣᠶᠠᠷ ᠴᠢᠯᠠᠭᠤ ᠠᠪᠴᠢᠷᠠᠵᠤ ᠪᠣᠰᠬᠠᠭᠰᠠᠨ ᠳᠤ᠂ ᠲᠡᠳᠡᠭᠡᠷ ᠴᠢᠯᠠᠭᠤ ᠨᠢ ᠥᠨᠥ ᠪᠣᠯᠲᠠᠯᠠ ᠲᠡᠨᠳᠡ ᠪᠠᠢᠭᠠ ᠪᠢᠯᠡ᠃ 10 ᠶᠣᠬᠣᠸᠠ ᠶᠢᠨ ᠶᠣᠱᠦ᠋ᠶᠠ ᠳᠤ ᠲᠤᠰᠢᠶᠠᠨ ᠠᠷᠠᠳ ᠣᠯᠠᠨ ᠳᠤ ᠬᠡᠯᠡᠭᠦᠯᠦᠭᠰᠡᠨ ᠦᠭᠡ ᠪᠣᠯᠭᠠᠨ ᠮᠣᠰᠧ ᠶᠢᠨ ᠶᠣᠱᠦ᠋ᠶᠠ ᠳᠤ ᠵᠠᠬᠢᠭᠰᠠᠨ ᠶᠣᠰᠣᠭᠠᠷ ᠪᠡᠶᠡᠯᠡᠭᠳᠡᠵᠦ ᠳᠠᠭᠤᠰᠲᠠᠯᠠ ᠠᠪᠳᠠᠷᠠ ᠶᠢ ᠳᠠᠮᠨᠠᠭᠰᠠᠨ ᠲᠠᠬᠢᠯᠴᠢᠳ ᠶᠣᠷᠳᠠᠨ ᠤ ᠲᠡᠭ ᠳᠤᠮᠳᠠ ᠵᠣᠭᠰᠣᠭᠰᠠᠭᠠᠷ ᠪᠠᠢᠵᠤ᠂ ᠠᠷᠠᠳ ᠣᠯᠠᠨ ᠶᠠᠭᠠᠷᠠᠪᠴᠢᠯᠠᠨ ᠭᠠᠲᠤᠯᠪᠠ᠃ 11 ᠠᠷᠠᠳ ᠣᠯᠠᠨ ᠪᠦᠭᠦᠳᠡᠭᠡᠷ ᠭᠠᠲᠤᠯᠵᠤ ᠳᠠᠭᠤᠰᠤᠭᠰᠠᠨ ᠤ ᠳᠠᠷᠠᠭᠠ᠂ ᠶᠣᠬᠣᠸᠠ ᠶᠢᠨ ᠠᠪᠳᠠᠷᠠ ᠪᠠ ᠲᠠᠬᠢᠯᠴᠢᠳ ᠠᠷᠠᠳ ᠣᠯᠠᠨ ᠤ ᠨᠢᠳᠦᠨ ᠡᠮᠦᠨᠡ ᠭᠠᠲᠤᠯᠤᠨ ᠭᠠᠷᠴᠠᠢ᠃
12 ᠷᠧᠣᠪᠧᠨᠴᠤᠳ᠂ ᠭᠠᠳ᠋ᠴᠤᠳ ᠬᠢᠭᠡᠳ ᠮᠠᠨᠠᠰᠧ ᠶᠢᠨ ᠬᠠᠭᠠᠰ ᠣᠪᠣᠭ ᠤᠨ ᠬᠢᠨ ᠵᠡᠪᠰᠡᠭᠯᠠᠭᠡᠳ ᠮᠣᠰᠧ ᠶᠢᠨ ᠲᠡᠳᠡᠨ ᠳᠦ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠢᠰᠷᠧᠯᠴᠦᠳ ᠢ ᠬᠣᠰᠢᠭᠤᠴᠢᠯᠠᠨ ᠭᠠᠲᠤᠯᠤᠨ ᠭᠠᠷᠤᠭᠰᠠᠨ ᠪᠠᠢᠯᠠ᠃ 13 ᠲᠡᠳᠡᠨ ᠦ ᠳᠥᠷᠪᠡᠨ ᠲᠦᠮᠡᠨ ᠬᠥᠮᠦᠨ ᠨᠢ ᠵᠡᠪᠰᠡᠭᠯᠡᠭᠡᠳ ᠲᠡᠢᠨ ᠳᠤ ᠣᠷᠣᠯᠴᠠᠬᠤ ᠪᠠᠷ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠭᠠᠲᠤᠯᠤᠨ ᠭᠠᠷᠴᠤ ᠶᠧᠷᠢᠺᠣ ᠶᠢᠨ ᠲᠠᠯᠠ ᠳᠤ ᠬᠦᠷᠪᠡ᠃
14 ᠲᠡᠷᠡ ᠡᠳᠦᠷ ᠶᠣᠬᠣᠸᠠ ᠪᠦᠬᠦ ᠢᠰᠷᠧᠯ ᠤᠨ ᠨᠢᠳᠦᠨ ᠡᠮᠦᠨᠡ ᠶᠣᠱᠦ᠋ᠶᠠ ᠶᠢ ᠡᠷᠭᠦᠮᠵᠢᠯᠡᠭᠰᠡᠨ ᠲᠤᠯᠠ ᠠᠷᠠᠳ ᠣᠯᠠᠨ ᠮᠣᠰᠧ ᠡᠴᠡ ᠡᠮᠢᠶᠡᠭᠰᠡᠨ ᠲᠡᠢ ᠠᠳᠠᠯᠢ ᠶᠣᠱᠦ᠋ᠶᠠ ᠠᠴᠠ ᠡᠮᠢᠶᠡᠵᠦ ᠪᠠᠢᠪᠠ᠃
15 ᠶᠣᠬᠣᠸᠠ ᠶᠣᠱᠦ᠋ᠶᠠ ᠳᠤ ᠠᠢᠯᠠᠳᠤᠨ᠄ 16 《ᠭᠡᠷᠡᠴᠢᠯᠡᠯ ᠦᠨ ᠠᠪᠳᠠᠷᠠ ᠶᠢ ᠳᠠᠮᠨᠠᠭᠰᠠᠨ ᠲᠠᠬᠢᠯᠴᠢᠳ ᠲᠤ ᠶᠣᠷᠳᠠᠨ ᠠᠴᠠ ᠭᠠᠷᠴᠤ ᠢᠷᠡᠬᠦ ᠶᠢ ᠲᠤᠰᠢᠶᠠ》 ᠭᠡᠰᠡᠨ ᠳᠦ᠂ 17 ᠶᠣᠱᠦ᠋ᠶᠠ ᠲᠠᠬᠢᠯᠴᠢᠳ ᠲᠤ ᠶᠣᠷᠳᠠᠨ ᠠᠴᠠ ᠭᠠᠷᠴᠤ ᠢᠷᠡᠬᠦ ᠶᠢ ᠲᠤᠰᠢᠶᠠᠪᠠ᠃ 18 ᠶᠣᠬᠣᠸᠠ ᠶᠢᠨ ᠭᠡᠷᠡ ᠶᠢᠨ ᠠᠪᠳᠠᠷᠠ ᠶᠢ ᠳᠠᠮᠨᠠᠭᠰᠠᠨ ᠲᠠᠬᠢᠯᠴᠢᠳ ᠶᠣᠷᠳᠠᠨ ᠤ ᠲᠡᠭ ᠳᠤᠮᠳᠠ ᠠᠴᠠ ᠭᠠᠷᠴᠤ ᠢᠷᠡᠭᠡᠳ ᠬᠠᠭᠤᠷᠠᠢ ᠭᠠᠵᠠᠷ ᠲᠤ ᠬᠥᠯ ᠲᠠᠯᠪᠢᠮᠠᠭᠴᠠ ᠶᠣᠷᠳᠠᠨ ᠤ ᠤᠰᠤ ᠬᠡᠪ ᠲᠡᠭᠡᠨ ᠣᠷᠣᠵᠤ᠂ ᠤᠷᠢᠳᠤ ᠶᠢᠨ ᠢᠶᠠᠨ ᠠᠳᠠᠯᠢ ᠡᠷᠭᠢ ᠪᠠᠨ ᠬᠠᠯᠢᠨ ᠤᠷᠤᠰᠪᠠ᠃
19 ᠠᠩ᠋ᠬᠠᠳᠤᠭᠠᠷ ᠰᠠᠷᠠ ᠶᠢᠨ ᠠᠷᠪᠠᠨ ᠤ ᠡᠳᠦᠷ ᠠᠷᠠᠳ ᠣᠯᠠᠨ ᠶᠣᠷᠳᠠᠨ ᠠᠴᠠ ᠭᠠᠷᠴᠤ ᠶᠧᠷᠢᠺᠣ ᠶᠢᠨ ᠵᠡᠭᠦᠨ ᠬᠢᠵᠠᠭᠠᠷ ᠲᠤ ᠪᠤᠢ ᠭᠢᠯᠭᠠᠯ ᠳᠤ ᠪᠠᠭᠤᠳᠠᠯᠯᠠᠪᠠ᠃ 20 ᠲᠡᠳᠡᠨ ᠦ ᠶᠣᠷᠳᠠᠨ ᠠᠴᠠ ᠠᠪᠤᠭᠰᠠᠨ ᠥᠨᠥᠬᠢ ᠠᠷᠪᠠᠨ ᠬᠣᠶᠠᠷ ᠴᠢᠯᠠᠭᠤ ᠶᠢ ᠶᠣᠱᠦ᠋ᠶᠠ ᠭᠢᠯᠭᠠᠯ ᠳᠤ ᠪᠣᠰᠬᠠᠵᠠᠢ᠃ 21 ᠶᠣᠱᠦ᠋ᠶᠠ ᠢᠰᠷᠧᠯᠴᠦᠳ ᠲᠦ᠄ 《ᠬᠣᠵᠢᠮ ᠲᠠᠨ ᠤ ᠦᠷᠡ ᠬᠡᠦᠬᠡᠳ ᠤᠳ ᠡᠴᠢᠭᠡ ᠡᠬᠡ ᠡᠴᠡ ᠪᠡᠨ᠄ 〈ᠡᠳᠡᠭᠡᠷ ᠨᠢ ᠶᠠᠭᠤᠨ ᠤ ᠴᠢᠯᠠᠭᠤ ᠨᠤᠭᠤᠳ ᠪᠤᠢ︖〉 ᠭᠡᠵᠦ ᠠᠰᠠᠭᠤᠪᠠᠯ᠂ 22 ᠲᠠ ᠨᠠᠷ᠄ 〈ᠢᠰᠷᠧᠯᠴᠦᠳ ᠡᠨᠡ ᠶᠣᠷᠳᠠᠨ ᠢ ᠬᠠᠭᠤᠷᠠᠢ ᠭᠠᠵᠠᠷ ᠢᠶᠠᠷ ᠭᠠᠲᠤᠯᠤᠭᠰᠠᠨ ᠶᠤᠮ〉 ᠭᠡᠵᠦ ᠬᠡᠯᠡᠵᠦ ᠥᠭ᠃ 23 ᠲᠠᠨ ᠤ ᠪᠤᠷᠬᠠᠨ ᠶᠣᠬᠣᠸᠠ ᠲᠠ ᠨᠠᠷ ᠢ ᠭᠠᠲᠤᠯᠵᠤ ᠳᠠᠭᠤᠰᠲᠠᠯᠠ ᠶᠣᠷᠳᠠᠨ ᠤ ᠤᠰᠤ ᠶᠢ ᠲᠠ ᠨᠠᠷ ᠤᠨ ᠨᠢᠳᠦᠨ ᠡᠮᠦᠨᠡ ᠰᠢᠷᠭᠢᠭᠡᠭᠰᠡᠨ᠂ ᠡᠨᠡ ᠨᠢ ᠶᠣᠬᠣᠸᠠ ᠪᠤᠷᠬᠠᠨ ᠪᠢᠳᠡᠨ ᠢ ᠤᠯᠠᠭᠠᠨ ᠲᠠᠩᠭᠢᠰ ᠢ ᠭᠠᠲᠤᠯᠵᠤ ᠳᠠᠭᠤᠰᠲᠠᠯᠠ ᠪᠢᠳᠡᠨ ᠦ ᠡᠮᠦᠨᠡ ᠲᠡᠷᠡ ᠤᠰᠤ ᠶᠢ ᠰᠢᠷᠭᠢᠭᠡᠭᠰᠡᠨ ᠲᠡᠢ ᠠᠳᠠᠯᠢ᠃ 24 ᠡᠭᠦᠨ ᠢᠶᠡᠷ ᠭᠠᠵᠠᠷ ᠳᠡᠯᠡᠬᠡᠢ ᠶᠢᠨ ᠬᠠᠮᠤᠭ ᠦᠨᠳᠦᠰᠦᠲᠡᠨ ᠶᠣᠬᠣᠸᠠ ᠶᠢᠨ ᠬᠦᠴᠦᠷᠬᠡᠭ ᠮᠤᠲᠤᠷ ᠢ ᠮᠡᠳᠡᠬᠦ ᠪᠥᠭᠡᠳ ᠲᠠ ᠨᠠᠷ ᠶᠣᠬᠣᠸᠠ ᠪᠤᠷᠬᠠᠨ ᠠᠴᠠ ᠪᠠᠨ ᠮᠥᠩᠬᠡᠳᠡ ᠡᠮᠢᠶᠡᠬᠦ ᠪᠣᠯᠣᠨᠠ》 ᠭᠡᠪᠡ᠃