ᠯᠧᠸᠢ ᠬᠣᠶᠠᠷ
ᠢᠳᠡᠭᠡᠨ ᠲᠠᠬᠢᠯ
1 ᠬᠡᠨ ᠨᠢᠭᠡᠨ ᠨᠢ ᠶᠣᠬᠣᠸᠠ ᠳᠤ ᠢᠳᠡᠭᠡᠨ ᠲᠠᠬᠢᠯ ᠡᠷᠭᠦᠬᠦ ᠭᠡᠪᠡᠯ᠂ ᠲᠠᠬᠢᠯ ᠨᠢ ᠨᠠᠷᠢᠯᠢᠭ᠋ ᠭᠤᠯᠢᠷ ᠤᠨ ᠬᠢ ᠪᠠᠢᠬᠤ ᠶᠣᠰᠣᠲᠠᠢ᠃ ᠡᠷᠭᠦᠭᠴᠢ ᠨᠢ ᠲᠡᠭᠦᠨ ᠳᠡᠭᠡᠷᠡ ᠲᠣᠰᠣ ᠠᠰᠬᠠᠨ ᠳᠡᠭᠡᠷᠡ ᠨᠢ ᠭᠦᠭᠦᠯ ᠨᠡᠮᠡᠵᠦ᠂ 2 ᠠᠷᠣᠨ ᠤ ᠬᠥᠪᠡᠭᠦᠳ ᠪᠣᠯᠬᠤ ᠲᠠᠬᠢᠯᠴᠢᠳ ᠲᠤ ᠠᠪᠴᠢᠷᠠᠪᠠᠯ᠂ ᠲᠠᠬᠢᠯᠴᠢ ᠲᠣᠰᠣ ᠲᠠᠢ ᠨᠠᠷᠢᠯᠢᠭ᠋ ᠭᠤᠯᠢᠷ ᠠᠴᠠ ᠨᠢ ᠠᠳᠬᠤ ᠶᠢ᠂ ᠭᠦᠭᠦᠯ ᠢ ᠨᠢ ᠪᠦᠬᠦᠨ ᠢ ᠳᠤᠷᠠᠰᠬᠠᠯ ᠤᠨ ᠬᠤᠪᠢ ᠪᠣᠯᠭᠠᠨ ᠠᠪᠴᠤ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠰᠢᠲᠠᠭᠠᠬᠤ ᠪᠣᠯᠣᠨᠠ᠃ ᠡᠨᠡ ᠪᠣᠯ ᠶᠣᠬᠣᠸᠠ ᠳᠤ ᠲᠠᠭᠠᠯᠠᠭᠳᠠᠬᠤ ᠠᠩᠬᠢᠯᠤᠭᠤᠨ ᠦᠨᠦᠷ᠂ ᠭᠠᠯ ᠤᠨ ᠡᠷᠭᠦᠯ ᠶᠤᠮ᠃ 3 ᠢᠳᠡᠭᠡᠨ ᠲᠠᠬᠢᠯ ᠤᠨ ᠦᠯᠡᠳᠡᠪᠦᠷᠢ ᠨᠢ ᠠᠷᠣᠨ ᠪᠣᠯᠣᠨ ᠲᠡᠭᠦᠨ ᠦ ᠬᠥᠪᠡᠭᠦᠳ ᠦᠨ ᠬᠢ᠂ ᠡᠨᠡ ᠨᠢ ᠶᠣᠬᠣᠸᠠ ᠳᠤ ᠡᠷᠭᠦᠬᠦ ᠭᠠᠯ ᠤᠨ ᠡᠷᠭᠦᠯ ᠤᠳ ᠤᠨ ᠳᠣᠲᠣᠷᠠ ᠠᠷᠢᠭᠤᠨ ᠠᠴᠠ ᠠᠷᠢᠭᠤᠨ ᠪᠢᠯᠡ᠃
4 ᠴᠢ ᠵᠤᠤᠬᠠᠨ ᠳᠡᠭᠡᠷᠡ ᠰᠢᠷᠠᠭᠰᠠᠨ ᠵᠦᠢᠯ ᠢᠶᠠᠷ ᠢᠳᠡᠭᠡᠨ ᠲᠠᠬᠢᠯ ᠡᠷᠭᠦᠬᠦ ᠭᠡᠪᠡᠯ᠂ ᠨᠠᠷᠢᠯᠢᠭ᠋ ᠭᠤᠯᠢᠷ ᠤᠨ ᠢᠳᠡᠭᠡᠨ᠂ ᠲᠤᠬᠠᠢᠯᠠᠪᠠᠯ ᠲᠣᠰᠣ ᠲᠠᠢ ᠪᠠᠭᠰᠤᠷᠠᠭᠰᠠᠨ ᠢᠰᠭᠡᠭᠡ ᠦᠭᠡᠢ ᠪᠣᠭᠣᠷᠰᠣᠭ᠂ ᠡᠰᠡᠪᠡᠯ ᠢᠰᠭᠡᠭᠡ ᠦᠭᠡᠢ ᠬᠠᠭᠠᠷᠢᠭᠰᠠᠨ ᠪᠣᠣᠪᠣ ᠠᠪᠴᠤ ᠢᠷᠠ᠃ 5 ᠬᠡᠷᠪᠡ ᠬᠠᠭᠠᠷᠢᠭᠤᠯ ᠳᠡᠭᠡᠷᠡ ᠬᠢᠭᠰᠡᠨ ᠵᠦᠢᠯ ᠢᠶᠠᠷ ᠢᠳᠡᠭᠡᠨ ᠲᠠᠬᠢᠯ ᠡᠷᠭᠦᠬᠦ ᠭᠡᠪᠡᠯ᠂ ᠢᠰᠭᠡᠭᠡ ᠦᠭᠡᠢ ᠪᠥᠭᠡᠳ ᠲᠣᠰᠣ ᠲᠠᠢ ᠪᠠᠭᠰᠤᠷᠠᠭᠰᠠᠨ ᠨᠠᠷᠢᠯᠢᠭ᠋ ᠭᠤᠯᠢᠷ ᠢᠶᠠᠷ ᠪᠡᠯᠡᠳᠬᠡᠬᠦ ᠶᠣᠰᠣᠲᠠᠢ᠃ 6 ᠴᠢ ᠲᠡᠭᠦᠨ ᠢ ᠬᠡᠰᠡᠭᠯᠡᠨ ᠬᠤᠪᠢᠶᠠᠵᠤ᠂ ᠳᠡᠭᠡᠷᠡ ᠨᠢ ᠲᠣᠰᠣ ᠠᠰᠬᠠ᠃ ᠡᠨᠡ ᠨᠢ ᠢᠳᠡᠭᠡᠨ ᠲᠠᠬᠢᠯ ᠶᠤᠮ᠃ 7 ᠬᠡᠷᠪᠡ ᠲᠣᠭᠣᠭᠠᠨ ᠳᠣᠲᠣᠷᠠ ᠬᠢᠭᠰᠡᠨ ᠵᠦᠢᠯ ᠢᠶᠠᠷ ᠢᠳᠡᠭᠡᠨ ᠲᠠᠬᠢᠯ ᠡᠷᠭᠦᠬᠦ ᠭᠡᠪᠡᠯ ᠡᠭᠦᠨ ᠢ ᠲᠣᠰᠣ ᠲᠠᠢ ᠨᠠᠷᠢᠯᠢᠭ᠋ ᠭᠤᠯᠢᠷ ᠢᠶᠠᠷ ᠪᠡᠯᠡᠳᠬᠡᠬᠦ ᠶᠣᠰᠣᠲᠠᠢ᠃ 8 ᠴᠢ ᠠᠯᠢ ᠮᠠᠶ᠋ᠢᠭ ᠢᠶᠠᠷ ᠪᠡᠯᠡᠳᠬᠡᠭᠰᠡᠨ ᠴᠤ ᠲᠡᠷᠡ ᠢᠳᠡᠭᠡᠨ ᠲᠠᠬᠢᠯ ᠢ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠠᠪᠴᠢᠷᠠᠵᠤ ᠲᠠᠬᠢᠯᠴᠢ ᠳᠤ ᠥᠭᠬᠦ ᠳᠦ᠂ ᠲᠡᠷᠡ ᠲᠡᠭᠦᠨ ᠢ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠳᠦ ᠠᠪᠠᠴᠢᠨᠠ᠃ 9 ᠲᠡᠭᠡᠪᠡᠯ ᠲᠠᠬᠢᠯᠴᠢ ᠢᠳᠡᠭᠡᠨ ᠲᠠᠬᠢᠯ ᠠᠴᠠ ᠳᠤᠷᠠᠰᠬᠠᠯ ᠤᠨ ᠬᠤᠪᠢ ᠶᠢ ᠠᠪᠴᠤ᠂ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠰᠢᠲᠠᠭᠠᠬᠤ ᠪᠣᠯᠣᠨᠠ᠃ ᠡᠨᠡ ᠨᠢ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠪᠥᠭᠡᠳ ᠶᠣᠬᠣᠸᠠ ᠳᠤ ᠲᠠᠭᠠᠯᠠᠭᠳᠠᠬᠤ ᠠᠩᠬᠢᠯᠤᠭᠤᠨ ᠦᠨᠦᠷ᠂ ᠭᠠᠯ ᠤᠨ ᠡᠷᠭᠦᠯ ᠶᠤᠮ᠃ 10 ᠢᠳᠡᠭᠡᠨ ᠲᠠᠬᠢᠯ ᠤᠨ ᠦᠯᠡᠳᠡᠪᠦᠷᠢ ᠨᠢ ᠠᠷᠣᠨ ᠪᠣᠯᠣᠨ ᠲᠡᠭᠦᠨ ᠦ ᠬᠥᠪᠡᠭᠦᠳ ᠦᠨ ᠬᠢ᠂ ᠡᠨᠡ ᠨᠢ ᠶᠣᠬᠣᠸᠠ ᠳᠤ ᠡᠷᠭᠦᠬᠦ ᠭᠠᠯ ᠤᠨ ᠡᠷᠭᠦᠯ ᠤᠳ ᠤᠨ ᠳᠣᠲᠣᠷᠠ ᠠᠷᠢᠭᠤᠨ ᠠᠴᠠ ᠠᠷᠢᠭᠤᠨ ᠪᠢᠯᠡ᠃
11 ᠲᠠ ᠨᠠᠷ ᠶᠣᠬᠣᠸᠠ ᠳᠤ ᠠᠪᠴᠢᠷᠠᠬᠤ ᠢᠳᠡᠭᠡᠨ ᠲᠠᠬᠢᠯ ᠪᠣᠯᠭᠠᠨ ᠳᠠᠭᠠᠨ ᠢᠰᠭᠡᠭᠦᠷ ᠬᠢᠵᠦ ᠪᠣᠯᠬᠤ ᠦᠭᠡᠢ᠃ ᠤᠴᠢᠷ ᠨᠢ ᠲᠠ ᠨᠠᠷ ᠶᠣᠬᠣᠸᠠ ᠳᠤ ᠭᠠᠯ ᠤᠨ ᠡᠷᠭᠦᠯ ᠡᠷᠭᠦᠬᠦ ᠳᠡᠭᠡᠨ ᠶᠠᠮᠠᠷ ᠴᠤ ᠢᠰᠭᠡᠭᠦᠷ ᠪᠤᠶᠤ ᠪᠠᠯ ᠢ ᠰᠢᠲᠠᠭᠠᠵᠤ ᠪᠣᠯᠬᠤ ᠦᠭᠡᠢ᠃ 12 ᠲᠠ ᠨᠠᠷ ᠢᠰᠭᠡᠭᠦᠷ ᠪᠤᠶᠤ ᠪᠠᠯ ᠢ ᠠᠩ᠋ᠬᠠᠨ ᠤ ᠦᠷᠡ ᠵᠢᠮᠢᠰ ᠤᠨ ᠡᠷᠭᠦᠯ ᠳᠦ ᠬᠢᠵᠦ ᠪᠣᠯᠣᠨᠠ᠂ ᠬᠠᠷᠢᠨ ᠶᠣᠬᠣᠸᠠ ᠳᠤ ᠲᠠᠭᠠᠯᠠᠭᠳᠠᠬᠤ ᠠᠩᠬᠢᠯᠤᠭᠤᠨ ᠦᠨᠦᠷ ᠪᠣᠯᠭᠠᠬᠤ ᠪᠠᠷ ᠡᠳᠡᠭᠡᠷ ᠢ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠡᠷᠭᠦᠵᠦ ᠪᠣᠯᠬᠤ ᠦᠭᠡᠢ᠃ 13 ᠴᠢ ᠢᠳᠡᠭᠡᠨ ᠲᠠᠬᠢᠯ ᠪᠣᠯᠭᠠᠨ ᠳᠠᠭᠠᠨ ᠳᠠᠪᠤᠰᠤ ᠬᠢ᠃ ᠪᠤᠷᠬᠠᠨ ᠤ ᠭᠡᠷᠡ ᠶᠢ ᠰᠠᠨᠠᠭᠤᠯᠬᠤ ᠳᠠᠪᠤᠰᠤ ᠨᠢ ᠢᠳᠡᠭᠡᠨ ᠲᠠᠬᠢᠯ ᠳᠤ ᠴᠢᠨᠢ ᠣᠷᠬᠢᠭᠳᠠᠵᠤ ᠪᠣᠯᠬᠤ ᠦᠭᠡᠢ᠃ ᠠᠯᠢᠪᠠ ᠢᠳᠡᠭᠡᠨ ᠡᠷᠭᠦᠯ ᠳᠡᠭᠡᠨ ᠳᠠᠪᠤᠰᠤ ᠨᠡᠮᠡᠭᠡᠷᠡᠢ᠃
14 ᠬᠡᠷᠪᠡ ᠴᠢ ᠠᠩ᠋ᠬᠠᠨ ᠤ ᠦᠷᠡ ᠵᠢᠮᠢᠰ ᠤᠨ ᠢᠳᠡᠭᠡᠨ ᠲᠠᠬᠢᠯ ᠢ ᠶᠣᠬᠣᠸᠠ ᠳᠤ ᠪᠠᠷᠢᠬᠤ ᠭᠡᠪᠡᠯ᠂ ᠰᠢᠨᠡ ᠲᠠᠷᠢᠶᠠᠨ ᠲᠦᠷᠦᠭᠦᠦ ᠶᠢ ᠦᠢᠷᠡᠭᠦᠯᠵᠦ᠂ ᠭᠠᠯ ᠳᠡᠭᠡᠷᠡ ᠬᠠᠭᠤᠷᠤᠭᠠᠳ ᠠᠪᠴᠤ ᠢᠷᠠ᠃ 15 ᠲᠡᠭᠡᠭᠡᠳ ᠡᠷᠭᠦᠯ ᠳᠡᠭᠡᠷᠡ ᠲᠣᠰᠣ ᠠᠰᠬᠠᠨ ᠭᠦᠭᠦᠯ ᠲᠠᠯᠪᠢ᠃ ᠡᠨᠡ ᠨᠢ ᠢᠳᠡᠭᠡᠨ ᠲᠠᠬᠢᠯ ᠶᠤᠮ᠃ 16 ᠲᠠᠬᠢᠯᠴᠢ ᠨᠢ ᠦᠢᠷᠡᠭᠦᠯᠦᠭᠰᠡᠨ ᠲᠠᠷᠢᠶᠠᠨ ᠲᠦᠷᠦᠭᠦᠨ ᠡᠴᠡ᠂ ᠮᠥᠨ ᠲᠣᠰᠣᠨ ᠠᠴᠠ ᠳᠤᠷᠠᠰᠬᠠᠯ ᠤᠨ ᠬᠤᠪᠢ ᠶᠢ ᠠᠪᠴᠤ᠂ ᠡᠳᠡᠭᠡᠷ ᠢ ᠪᠦᠬᠦ ᠭᠦᠭᠦᠯ ᠦᠨ ᠬᠠᠮᠲᠤ ᠰᠢᠲᠠᠭᠠᠬᠤ ᠪᠣᠯᠣᠨᠠ᠃ ᠡᠨᠡ ᠨᠢ ᠶᠣᠬᠣᠸᠠ ᠳᠤ ᠪᠠᠷᠢᠬᠤ ᠭᠠᠯ ᠤᠨ ᠡᠷᠭᠦᠯ ᠶᠤᠮ᠃