ᠯᠧᠸᠢ ᠬᠣᠷᠢᠨ ᠳᠥᠷᠪᠡ
ᠳ᠋ᠧᠩ ᠪᠡᠯᠡᠳᠬᠡᠬᠦ
1 ᠶᠣᠬᠣᠸᠠ ᠮᠣᠰᠧ ᠳᠤ ᠠᠢᠯᠠᠳᠤᠨ᠄ 2 《ᠴᠢᠳᠦᠨ ᠡᠴᠡ ᠰᠢᠬᠠᠵᠤ ᠣᠯᠣᠭᠰᠠᠨ ᠴᠡᠪᠡᠷ ᠲᠣᠰᠣ ᠶᠢ ᠳ᠋ᠧᠩ ᠤᠨ ᠭᠡᠷᠡᠯᠲᠦᠭᠦᠯᠭᠡᠨ ᠳᠦ ᠬᠡᠷᠡᠭᠯᠡᠬᠦ ᠪᠡᠷ ᠴᠢᠮᠠ ᠳᠤ ᠠᠪᠴᠢᠷᠠᠬᠤ ᠶᠢ ᠢᠰᠷᠧᠯᠴᠦᠳ ᠲᠦ ᠲᠤᠰᠢᠶᠠ᠃ ᠡᠢᠨ ᠬᠦ ᠳ᠋ᠧᠩ ᠢ ᠪᠠᠢᠩ᠋ᠭᠤ ᠠᠰᠠᠭᠠᠯᠲᠠ ᠲᠠᠢ ᠪᠠᠢᠯᠭᠠᠬᠤ ᠶᠣᠰᠣᠲᠠᠢ᠃ 3 ᠠᠷᠣᠨ ᠠᠭᠤᠯᠵᠠᠯᠲᠠ ᠶᠢᠨ ᠴᠠᠴᠠᠷ ᠤᠨ ᠳᠣᠲᠣᠷᠠ᠂ ᠭᠡᠷᠡᠴᠢᠯᠡᠯ ᠦᠨ ᠬᠥᠰᠢᠭᠡ ᠶᠢᠨ ᠭᠠᠳᠠᠨᠠ ᠲᠠᠯᠠ ᠳᠠᠬᠢ ᠳ᠋ᠧᠩ ᠢ ᠬᠠᠷᠢᠭᠤᠴᠠᠵᠤ᠂ ᠦᠳᠡᠰᠢ ᠡᠴᠡ ᠥᠷᠯᠥᠭᠡ ᠬᠦᠷᠲᠡᠯᠡ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠪᠠᠢᠩ᠋ᠭᠤ ᠠᠰᠠᠭᠠᠯᠲᠠ ᠲᠠᠢ ᠪᠠᠢᠯᠭᠠᠬᠤ ᠶᠣᠰᠣᠲᠠᠢ᠃ ᠡᠨᠡ ᠨᠢ ᠲᠠ ᠨᠠᠷ ᠤᠨ ᠦᠶᠡ ᠶᠢᠨ ᠦᠶᠡ ᠳᠡᠭᠡᠨ ᠰᠠᠬᠢᠬᠤ ᠶᠣᠰᠣᠲᠠᠢ ᠪᠠᠢᠩ᠋ᠭᠤ ᠶᠢᠨ ᠵᠢᠷᠤᠮ ᠪᠣᠯᠣᠨᠠ᠃ 4 ᠠᠷᠣᠨ ᠴᠠᠭ ᠦᠷᠭᠦᠯᠵᠢ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠠᠯᠲᠠᠨ ᠲᠠᠯᠪᠢᠭᠤᠷ ᠤᠨ ᠳᠡᠭᠡᠷᠡᠬᠢ ᠳ᠋ᠧᠩ ᠤᠳ ᠢ ᠬᠠᠷᠢᠭᠤᠴᠠᠬᠤ ᠶᠣᠰᠣᠲᠠᠢ᠃
ᠲᠠᠪᠢᠭ ᠪᠣᠣᠪᠣ
5 ᠨᠠᠷᠢᠯᠢᠭ᠋ ᠭᠤᠯᠢᠷ ᠠᠪᠴᠤ᠂ ᠲᠡᠭᠦᠨ ᠢᠶᠡᠷ ᠠᠷᠪᠠᠨ ᠬᠣᠶᠠᠷ ᠪᠣᠣᠪᠣ ᠬᠢᠵᠦ ᠬᠠᠭᠰᠠᠭᠠ᠂ ᠪᠣᠣᠪᠣ ᠲᠤᠰ ᠪᠦᠷᠢ ᠳᠤ ᠡᠹᠠ ᠶᠢᠨ ᠠᠷᠪᠠᠨ ᠤ ᠬᠣᠶᠠᠷ ᠤᠨ ᠬᠡᠮᠵᠢᠶᠡ 20 ᠲᠠᠢ ᠭᠤᠯᠢᠷ ᠬᠡᠷᠡᠭ ᠲᠡᠢ᠃ 6 ᠡᠳᠡᠭᠡᠷ ᠢ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠰᠢᠵᠢᠷ ᠠᠯᠲᠠᠨ ᠰᠢᠷᠡᠭᠡᠨ ᠳᠡᠭᠡᠷᠡ ᠬᠣᠶᠠᠷ ᠡᠩᠨᠡᠭᠡ ᠪᠣᠯᠭᠠᠨ ᠲᠠᠯᠪᠢ᠃ ᠡᠩᠨᠡᠭᠡ ᠪᠦᠷᠢ ᠳᠦᠨᠢ ᠵᠢᠷᠭᠤᠭᠠ ᠪᠠᠢᠬᠤ ᠪᠣᠯᠣᠨᠠ᠃ 7 ᠡᠳᠡᠭᠡᠷ ᠪᠣᠣᠪᠣ ᠶᠢ ᠲᠥᠯᠥᠭᠡᠯᠡᠬᠦ ᠳᠤᠷᠠᠰᠬᠠᠯ ᠤᠨ ᠬᠤᠪᠢ᠂ ᠮᠥᠨ ᠶᠣᠬᠣᠸᠠ ᠳᠤ ᠡᠷᠭᠦᠬᠦ ᠭᠠᠯ ᠤᠨ ᠡᠷᠭᠦᠯ ᠪᠣᠯᠬᠤ ᠴᠡᠪᠡᠷ ᠭᠦᠭᠦᠯ ᠢ ᠠᠪᠴᠤ ᠡᠩᠨᠡᠭᠡ ᠪᠦᠷᠢ ᠳᠤ ᠲᠠᠯᠪᠢ᠃ 8 ᠠᠮᠠᠷᠠᠯ ᠤᠨ ᠡᠳᠦᠷ ᠪᠦᠷᠢ ᠠᠷᠣᠨ ᠡᠳᠡᠭᠡᠷ ᠪᠣᠣᠪᠣ ᠶᠢ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠪᠡᠯᠡᠳᠬᠡᠬᠦ ᠶᠣᠰᠣᠲᠠᠢ᠃ ᠡᠨᠡ ᠨᠢ ᠢᠰᠷᠧᠯᠴᠦᠳ ᠦᠨ ᠪᠠᠢᠩ᠋ᠭᠤ ᠶᠢᠨ ᠡᠭᠦᠷᠭᠡ ᠶᠤᠮ᠃ 9 ᠡᠳᠡᠭᠡᠷ ᠨᠢ ᠠᠷᠣᠨ ᠪᠣᠯᠣᠨ ᠲᠡᠭᠦᠨ ᠦ ᠬᠥᠪᠡᠭᠦᠳ ᠦᠨ ᠬᠤᠪᠢ ᠪᠥᠭᠡᠳ ᠲᠡᠭᠦᠨ ᠦ ᠬᠤᠪᠢ ᠳᠤ ᠶᠣᠬᠣᠸᠠ ᠳᠤ ᠡᠷᠭᠦᠬᠦ ᠭᠠᠯ ᠤᠨ ᠡᠷᠭᠦᠯ ᠤᠳ ᠤᠨ ᠳᠤᠮᠳᠠ ᠠᠴᠠ ᠠᠷᠢᠭᠤᠨ ᠠᠴᠠ ᠠᠷᠢᠭᠤᠨ ᠪᠠᠢᠩ᠋ᠭᠤ ᠶᠢᠨ ᠬᠤᠪᠢ ᠪᠣᠯᠬᠣᠷ ᠡᠳᠡᠭᠡᠷ ᠢ ᠲᠡᠳᠡ ᠠᠷᠢᠭᠤᠨ ᠭᠠᠵᠠᠷ ᠲᠤ ᠢᠳᠡᠬᠦ ᠪᠣᠯᠣᠨᠠ》 ᠭᠡᠯᠡ᠃
ᠪᠤᠷᠬᠠᠨ ᠢ ᠳᠣᠷᠣᠮᠵᠢᠯᠠᠭᠴᠢ ᠳᠤ ᠤᠨᠤᠭᠠᠬᠤ ᠰᠢᠳᠬᠡᠯ
10 ᠨᠢᠭᠡᠨ ᠢᠰᠷᠧᠯ ᠡᠮᠡᠭᠲᠡᠢ ᠶᠢᠨ ᠬᠦᠦ ᠢᠰᠷᠧᠯᠴᠦᠳ ᠦᠨ ᠳᠤᠮᠳᠠ ᠭᠠᠷᠴᠤ ᠢᠷᠡᠪᠡ᠂ ᠡᠴᠢᠭᠡ ᠨᠢ ᠶᠧᠵᠢᠫᠲ ᠬᠥᠮᠦᠨ ᠪᠠᠢᠯᠠ᠃ ᠬᠤᠸᠠᠷᠠᠨ ᠳᠤ ᠲᠡᠷᠡ ᠬᠥᠮᠦᠨ ᠪᠣᠯᠣᠨ ᠨᠢᠭᠡ ᠢᠰᠷᠧᠯ ᠬᠥᠮᠦᠨ ᠦ ᠬᠣᠭᠣᠷᠣᠨᠳᠣ ᠬᠡᠷᠡᠭᠦᠯ ᠪᠣᠯᠣᠭᠰᠠᠨ ᠳᠤ᠂ 11 ᠥᠨᠥᠬᠢ ᠢᠰᠷᠧᠯ ᠡᠮᠡᠭᠲᠡᠢ ᠶᠢᠨ ᠬᠦᠦ ᠶᠣᠬᠣᠸᠠ ᠶᠢᠨ ᠨᠡᠷᠡ ᠶᠢ ᠳᠣᠷᠣᠮᠵᠢᠯᠠᠨ ᠬᠠᠷᠢᠶᠠᠵᠠᠢ᠃ ᠲᠡᠭᠦᠨ ᠦ ᠡᠬᠡ ᠶᠢᠨ ᠨᠡᠷᠡ ᠶᠢ ᠱᠧᠯᠣᠮᠢᠲ ᠭᠡᠬᠦ ᠪᠥᠭᠡᠳ ᠲᠡᠷᠡ ᠡᠮᠡᠭᠲᠡᠢ ᠳ᠋ᠠᠨ ᠣᠪᠣᠭ ᠤᠨ ᠳ᠋ᠢᠪᠷᠢ ᠶᠢᠨ ᠥᠬᠢᠨ ᠪᠠᠢᠯᠠ᠃ ᠬᠥᠮᠦᠰ ᠲᠡᠷᠡ ᠬᠦᠦ ᠶᠢ ᠮᠣᠰᠧ ᠤᠷᠤᠭᠤ ᠠᠪᠴᠢᠷᠠᠵᠤ᠂ 12 ᠶᠣᠬᠣᠸᠠ ᠠᠴᠠ ᠲᠣᠳᠣᠷᠬᠠᠢ ᠲᠤᠰᠢᠶᠠᠯ ᠭᠠᠷᠲᠠᠯᠠ ᠬᠣᠷᠢᠪᠠ᠃
13 ᠶᠣᠬᠣᠸᠠ ᠮᠣᠰᠧ ᠳᠤ ᠠᠢᠯᠠᠳᠤᠨ᠄ 14 《ᠬᠠᠷᠢᠶᠠᠭᠰᠠᠨ ᠬᠥᠮᠦᠨ ᠢ ᠬᠤᠸᠠᠷᠠᠨ ᠤ ᠭᠠᠳᠠᠨᠠ ᠠᠪᠠᠴᠢ᠂ ᠲᠡᠭᠦᠨ ᠢ ᠰᠣᠨᠣᠰᠣᠭᠰᠠᠨ ᠪᠦᠬᠦᠨ ᠲᠣᠯᠣᠭᠠᠢ ᠳᠡᠭᠡᠷᠡ ᠨᠢ ᠭᠠᠷ ᠢᠶᠠᠨ ᠲᠠᠯᠪᠢᠭᠰᠠᠨ ᠤ ᠳᠠᠷᠠᠭᠠ᠂ ᠨᠡᠢᠲᠡ ᠴᠢᠭᠤᠯᠭᠠᠨ ᠤ ᠬᠢᠨ ᠲᠡᠭᠦᠨ ᠤᠷᠤᠭᠤ ᠴᠢᠯᠠᠭᠤ ᠰᠢᠳᠡᠬᠦ ᠪᠣᠯᠣᠨᠠ᠃ 15 ᠢᠰᠷᠧᠯᠴᠦᠳ ᠲᠦ ᠵᠠᠬᠢ᠄ ᠪᠤᠷᠬᠠᠨ ᠢᠶᠠᠨ ᠵᠦᠬᠡᠬᠦ ᠬᠥᠮᠦᠨ ᠪᠣᠯᠭᠠᠨ ᠨᠢᠭᠦᠯ ᠢᠶᠡᠨ ᠡᠭᠦᠷᠬᠦ ᠪᠥᠭᠡᠳ 16 ᠶᠣᠬᠣᠸᠠ ᠶᠢᠨ ᠨᠡᠷᠡ ᠶᠢ ᠳᠣᠷᠣᠮᠵᠢᠯᠠᠬᠤ ᠬᠥᠮᠦᠨ ᠵᠠᠪᠠᠯ ᠦᠬᠦᠬᠦ ᠶᠣᠰᠣᠲᠠᠢ᠃ ᠨᠡᠢᠲᠡ ᠴᠢᠭᠤᠯᠭᠠᠨ ᠤ ᠬᠢᠨ ᠲᠡᠭᠦᠨ ᠤᠷᠤᠭᠤ ᠴᠢᠯᠠᠭᠤ ᠰᠢᠳᠡᠬᠦ ᠪᠣᠯᠣᠨᠠ᠃ ᠤᠤᠭᠠᠯ ᠬᠥᠮᠦᠨ ᠴᠤ᠂ ᠬᠠᠷᠢ ᠶᠢᠨ ᠬᠥᠮᠦᠨ ᠴᠤ ᠶᠣᠬᠣᠸᠠ ᠶᠢᠨ ᠨᠡᠷᠡ ᠶᠢ ᠳᠣᠷᠣᠮᠵᠢᠯᠠᠪᠠᠯ ᠦᠬᠦᠬᠦ ᠶᠣᠰᠣᠲᠠᠢ᠃ 17 ᠬᠥᠮᠦᠨ ᠦ ᠠᠮᠢ ᠶᠢ ᠬᠣᠷᠣᠭᠠᠭᠰᠠᠨ ᠬᠥᠮᠦᠨ ᠵᠠᠪᠠᠯ ᠦᠬᠦᠬᠦ ᠶᠣᠰᠣᠲᠠᠢ᠂ 18 ᠬᠥᠮᠦᠨ ᠦ ᠮᠠᠯ ᠠᠮᠢᠲᠠᠨ ᠢ ᠬᠣᠷᠣᠭᠠᠭᠰᠠᠨ ᠬᠥᠮᠦᠨ ᠠᠮᠢ ᠶᠢ ᠠᠮᠢ ᠪᠠᠷ ᠲᠥᠯᠥᠬᠦ ᠶᠣᠰᠣᠲᠠᠢ᠂ 19 ᠬᠥᠷᠰᠢ ᠪᠠᠨ ᠭᠡᠮᠲᠦᠭᠡᠭᠰᠡᠨ ᠬᠥᠮᠦᠨ ᠦᠢᠯᠡᠳᠦᠭᠰᠡᠨ ᠦ ᠪᠠᠨ ᠶᠣᠰᠣᠭᠠᠷ ᠬᠠᠷᠢᠭᠤ ᠪᠠᠨ ᠠᠮᠰᠠᠬᠤ ᠪᠥᠭᠡᠳ 20 ᠬᠤᠭᠤᠷᠠᠯ ᠢ ᠬᠤᠭᠤᠷᠠᠯ ᠢᠶᠠᠷ᠂ ᠨᠢᠳᠦ ᠶᠢ ᠨᠢᠳᠦ ᠪᠡᠷ᠂ ᠰᠢᠳᠦ ᠶᠢ ᠰᠢᠳᠦ ᠪᠡᠷ ᠲᠥᠯᠥᠵᠦ᠂ ᠬᠥᠮᠦᠨ ᠢ ᠭᠡᠮᠲᠦᠭᠡᠭᠰᠡᠨ ᠦ ᠪᠠᠨ ᠶᠣᠰᠣᠭᠠᠷ ᠲᠡᠷᠡ ᠮᠥᠨ ᠲᠡᠭᠦᠨᠴᠢᠯᠡᠨ ᠭᠡᠮᠲᠦᠯ ᠠᠪᠬᠤ ᠪᠣᠯᠣᠨᠠ᠃ 21 ᠮᠠᠯ ᠠᠮᠢᠲᠠᠨ ᠢ ᠠᠯᠠᠭᠰᠠᠨ ᠬᠥᠮᠦᠨ ᠡᠭᠦᠨ ᠢ ᠨᠢ ᠲᠥᠯᠥᠨᠡ᠂ ᠬᠠᠷᠢᠨ ᠬᠥᠮᠦᠨ ᠠᠯᠠᠭᠰᠠᠨ ᠪᠣᠯ ᠠᠯᠠᠭᠳᠠᠬᠤ ᠶᠣᠰᠣᠲᠠᠢ᠃ 22 ᠲᠠ ᠨᠠᠷ ᠤᠨ ᠳᠤᠮᠳᠠᠬᠢ ᠬᠠᠷᠢ ᠶᠢᠨ ᠬᠢᠨ ᠳᠤ ᠴᠤ᠂ ᠤᠤᠭᠠᠯ ᠨᠤᠲᠤᠭ ᠤᠨ ᠬᠢᠨ ᠳᠤ ᠴᠤ ᠢᠯᠭᠠᠭᠠ ᠦᠭᠡᠢ ᠭᠠᠭᠴᠠᠬᠠᠨ ᠪᠠᠷᠢᠮᠵᠢᠶᠠ ᠪᠠᠢᠬᠤ ᠶᠣᠰᠣᠲᠠᠢ᠃ ᠲᠠ ᠨᠠᠷ ᠤᠨ ᠪᠤᠷᠬᠠᠨ ᠪᠣᠯ ᠶᠣᠬᠣᠸᠠ ᠪᠢ》 ᠭᠡᠪᠡ᠃ 23 ᠮᠣᠰᠧ ᠢᠰᠷᠧᠯᠴᠦᠳ ᠲᠦ ᠲᠡᠢᠨ ᠬᠦ ᠬᠡᠯᠡᠭᠰᠡᠨ ᠳᠦ᠂ ᠲᠡᠳᠡ ᠬᠠᠷᠢᠶᠠᠭᠰᠠᠨ ᠬᠥᠮᠦᠨ ᠢ ᠬᠤᠸᠠᠷᠠᠨ ᠤ ᠭᠠᠳᠠᠨᠠ ᠠᠪᠠᠴᠢᠨ ᠲᠡᠭᠦᠨ ᠤᠷᠤᠭᠤ ᠴᠢᠯᠠᠭᠤ ᠰᠢᠳᠡᠪᠡ᠃ ᠢᠰᠷᠧᠯᠴᠦᠳ ᠶᠣᠬᠣᠸᠠ ᠶᠢᠨ ᠮᠣᠰᠧ ᠳᠤ ᠲᠤᠰᠢᠶᠠᠭᠰᠠᠨ ᠶᠣᠰᠣᠭᠠᠷ ᠢᠩᠭᠢᠵᠦ ᠦᠢᠯᠡᠳᠴᠡᠢ᠃