ᠯᠧᠸᠢ ᠠᠷᠪᠠᠨ ᠨᠢᠭᠡ
 ᠴᠡᠪᠡᠷ ᠢᠳᠡᠭᠡᠨ ᠪᠠ ᠪᠤᠵᠠᠷ ᠢᠳᠡᠭᠡᠨ

1 ᠶᠣᠬᠣᠸᠠ ᠮᠣᠰᠧ᠂ ᠠᠷᠣᠨ ᠨᠠᠷ ᠲᠤ ᠠᠢᠯᠠᠳᠤᠨ᠄ 2 《ᠢᠰᠷᠧᠯᠴᠦᠳ ᠲᠦ ᠵᠠᠬᠢ᠄ ᠭᠠᠵᠠᠷ ᠳᠡᠭᠡᠷᠡᠬᠢ ᠬᠠᠮᠤᠭ ᠠᠮᠢᠲᠠᠨ ᠠᠴᠠ ᠲᠠ ᠨᠠᠷ ᠤᠨ ᠢᠳᠡᠵᠦ ᠪᠣᠯᠬᠤ ᠠᠮᠢᠲᠠᠳ ᠭᠡᠪᠡᠯ᠂ 3 ᠲᠤᠭᠤᠷᠠᠢ ᠨᠢ ᠭᠦᠢᠴᠡᠳ ᠰᠠᠯᠭᠠᠭᠳᠠᠭᠰᠠᠨ ᠠᠴᠠ ᠲᠤᠭᠤᠷᠠᠢᠲᠠᠨ᠂ ᠰᠡᠪᠡᠰᠦ ᠪᠡᠨ ᠬᠡᠪᠢᠳᠡᠭ ᠠᠯᠢᠪᠠ ᠠᠮᠢᠲᠠᠨ ᠶᠤᠮ᠃ ᠲᠠ ᠨᠠᠷ ᠲᠡᠭᠦᠨ ᠢ ᠢᠳᠡᠵᠦ ᠪᠣᠯᠣᠨ᠎ᠠ᠃ 4 ᠭᠡᠪᠡᠴᠦ ᠬᠡᠪᠢᠭᠴᠢᠳ᠂ ᠡᠰᠡᠪᠡᠯ ᠠᠴᠠ ᠲᠤᠭᠤᠷᠠᠢᠲᠠᠳ ᠤᠨ ᠳᠤᠮᠳᠠ ᠴᠤ ᠢᠳᠡᠵᠦ ᠦᠯᠦ ᠪᠣᠯᠬᠤ ᠠᠮᠢᠲᠠᠨ ᠪᠤᠢ᠃ ᠲᠤᠬᠠᠢᠯᠠᠪᠠᠯ ᠲᠡᠮᠡᠭᠡ ᠬᠡᠪᠢᠳᠡᠭ ᠪᠣᠯᠪᠠᠴᠤ ᠠᠴᠠ ᠲᠤᠭᠤᠷᠠᠢᠲᠠᠨ ᠪᠢᠰᠢ ᠪᠣᠯᠬᠣᠷ ᠲᠠ ᠨᠠᠷ ᠲᠤ ᠪᠤᠵᠠᠷ᠂ 5 ᠬᠠᠳᠠᠨ ᠤ ᠳᠣᠷᠣᠭᠣ ᠬᠡᠪᠢᠳᠡᠭ ᠪᠣᠯᠪᠠᠴᠤ ᠠᠴᠠ ᠲᠤᠭᠤᠷᠠᠢᠲᠠᠨ ᠪᠢᠰᠢ ᠪᠣᠯᠬᠣᠷ ᠲᠠ ᠨᠠᠷ ᠲᠤ ᠪᠤᠵᠠᠷ᠂ 6 ᠲᠠᠤᠯᠠᠢ ᠬᠡᠪᠢᠳᠡᠭ ᠪᠣᠯᠪᠠᠴᠤ ᠠᠴᠠ ᠲᠤᠭᠤᠷᠠᠢᠲᠠᠨ ᠪᠢᠰᠢ ᠪᠣᠯᠬᠣᠷ ᠲᠠ ᠨᠠᠷ ᠲᠤ ᠪᠤᠵᠠᠷ᠂ 7 ᠭᠠᠬᠠᠢ ᠬᠡᠳᠦᠢᠪᠡᠷ ᠲᠤᠭᠤᠷᠠᠢ ᠨᠢ ᠭᠦᠢᠴᠡᠳ ᠰᠠᠯᠠᠭ᠎ᠠ ᠲᠠᠢ ᠠᠴᠠ ᠲᠤᠭᠤᠷᠠᠢᠲᠠᠨ ᠪᠣᠯᠪᠠᠴᠤ ᠬᠡᠪᠢᠳᠡᠭ ᠦᠭᠡᠢ ᠪᠣᠯᠬᠣᠷ ᠲᠠ ᠨᠠᠷ ᠲᠤ ᠪᠤᠵᠠᠷ ᠶᠤᠮ᠃ 8 ᠡᠳᠡᠭᠡᠷ ᠦᠨ ᠮᠢᠬ᠎ᠠ ᠶᠢ ᠲᠠ ᠨᠠᠷ ᠢᠳᠡᠵᠦ ᠪᠣᠯᠬᠤ ᠦᠭᠡᠢ᠂ ᠦᠬᠦᠳᠡᠯ ᠳᠦᠨᠢ ᠬᠦᠷᠴᠦ ᠪᠣᠯᠬᠤ ᠦᠭᠡᠢ᠃ ᠲᠡᠳᠡᠭᠡᠷ ᠨᠢ ᠲᠠ ᠨᠠᠷ ᠲᠤ ᠪᠤᠵᠠᠷ ᠶᠤᠮ᠃

9 ᠤᠰᠤᠨ ᠳᠤ ᠪᠠᠢᠳᠠᠭ ᠪᠦᠬᠦᠨ ᠡᠴᠡ ᠢᠳᠡᠵᠦ ᠪᠣᠯᠬᠤ ᠵᠦᠢᠯᠡᠰ ᠭᠡᠪᠡᠯ᠂ ᠳᠠᠯᠠᠢ ᠳᠤ ᠴᠤ᠂ ᠭᠣᠣᠯ ᠳᠤ ᠴᠤ᠂ ᠤᠰᠤᠨ ᠳᠤ ᠪᠠᠢᠳᠠᠭ ᠪᠦᠬᠦᠨ ᠡᠴᠡ ᠰᠡᠷᠪᠡᠭᠡ ᠲᠠᠢ ᠪᠥᠭᠡᠳ ᠬᠠᠢᠷᠰᠤ ᠲᠠᠢ ᠶᠢ ᠨᠢ ᠲᠠ ᠨᠠᠷ ᠢᠳᠡᠵᠦ ᠪᠣᠯᠣᠨ᠎ᠠ᠃ 10 ᠤᠰᠤᠨ ᠳᠤ ᠪᠠᠢᠳᠠᠭ ᠪᠦᠬᠦ ᠠᠮᠢᠲᠠᠨ ᠠᠴᠠ ᠳᠠᠯᠠᠢ ᠳᠤ ᠪᠠᠢᠭᠰᠠᠨ ᠴᠤ᠂ ᠭᠣᠣᠯ ᠳᠤ ᠪᠠᠢᠭᠰᠠᠨ ᠴᠤ ᠰᠡᠷᠪᠡᠭᠡ ᠦᠭᠡᠢ᠂ ᠬᠠᠢᠷᠰᠤ ᠦᠭᠡᠢ ᠪᠦᠬᠦᠨ ᠨᠢ ᠲᠠ ᠨᠠᠷ ᠲᠤ ᠵᠢᠭᠰᠢᠭᠦᠷᠢᠲᠦ ᠵᠦᠢᠯᠡᠰ ᠶᠤᠮ᠃ 11 ᠲᠠ ᠨᠠᠷ ᠲᠤ ᠵᠢᠭᠰᠢᠭᠦᠷᠢᠲᠦ ᠵᠦᠢᠯ ᠪᠣᠯᠬᠣᠷ ᠲᠡᠳᠡᠭᠡᠷ ᠦᠨ ᠮᠢᠬ᠎ᠠ ᠶᠢ ᠪᠦᠦ ᠢᠳᠡ᠂ ᠰᠡᠭ ᠢ ᠨᠢ ᠴᠤ ᠵᠢᠭᠰᠢᠬᠦ ᠶᠣᠰᠣᠲᠠᠢ᠃ 12 ᠰᠡᠷᠪᠡᠭᠡ ᠦᠭᠡᠢ᠂ ᠡᠰᠡᠪᠡᠯ ᠬᠠᠢᠷᠰᠤ ᠦᠭᠡᠢ ᠤᠰᠤᠨ ᠤ ᠠᠮᠢᠲᠠᠨ ᠪᠦᠭᠦᠳᠡ ᠲᠠ ᠨᠠᠷ ᠲᠤ ᠵᠢᠭᠰᠢᠭᠦᠷᠢᠲᠦ ᠵᠦᠢᠯ ᠶᠤᠮ᠃

13 ᠰᠢᠪᠠᠭᠤᠳ ᠤᠨ ᠳᠤᠮᠳᠠ ᠠᠴᠠ ᠲᠠ ᠨᠠᠷ ᠤᠨ ᠢᠳᠡᠵᠦ ᠦᠯᠦ ᠪᠣᠯᠬᠤ᠂ ᠵᠢᠭᠰᠢᠬᠦ ᠶᠣᠰᠣᠲᠠᠢ ᠨᠢ ᠭᠡᠪᠡᠯ᠂ ᠪᠦᠷᠭᠦᠳ᠂ ᠲᠠᠰ᠂ ᠶᠣᠯᠣ᠂ 14 ᠡᠯᠢᠶ᠎ᠡ ᠪᠠ ᠱᠣᠩ᠋ᠬᠣᠷ ᠤᠨ ᠲᠥᠷᠥᠯ ᠤᠳ᠂ 15 ᠬᠡᠷᠢᠶᠡᠨ ᠦ ᠪᠦᠬᠦ ᠲᠥᠷᠥᠯ ᠤᠳ᠂ 16 ᠲᠡᠮᠡᠭᠡᠨ ᠬᠢᠷᠭᠤᠤᠯ᠂ ᠰᠢᠷ᠎ᠠ ᠰᠢᠪᠠᠭᠤ᠂ ᠴᠠᠬᠤᠯᠠᠢ ᠪᠠ ᠬᠠᠷᠴᠠᠭᠠᠢ ᠶᠢᠨ ᠲᠥᠷᠥᠯ ᠤᠳ᠂ 17 ᠣᠭᠣᠯᠢ᠂ ᠬᠠᠷ᠎ᠠ ᠭᠠᠯᠠᠭᠤ᠂ ᠴᠠᠭᠠᠨ ᠬᠦᠵᠦᠭᠦᠲᠦ ᠲᠠᠰ᠂ 18 ᠬᠤᠨ᠂ ᠬᠣᠲᠠᠨ ᠰᠢᠪᠠᠭᠤ᠂ ᠬᠦᠷᠡᠩ ᠰᠢᠪᠠᠭᠤ᠂ 19 ᠥᠷᠪᠢ ᠲᠠᠰ ᠪᠠ ᠬᠥᠬᠡ ᠳᠡᠭᠡᠯᠡᠢ ᠶᠢᠨ ᠲᠥᠷᠥᠯ ᠤᠳ᠂ ᠥᠪᠥᠭᠡᠯᠵᠢ᠂ ᠰᠠᠷᠢᠰᠤᠨ ᠪᠠᠭᠪᠠᠬᠠᠢ ᠶᠤᠮ᠃

20 ᠳᠠᠯᠠᠪᠴᠢ ᠲᠠᠢ ᠪᠥᠭᠡᠳ ᠳᠥᠷᠪᠡᠨ ᠬᠥᠯ ᠢᠶᠡᠷ ᠶᠠᠪᠤᠳᠠᠭ ᠰᠢᠪᠠᠵᠢ ᠪᠦᠬᠦᠨ ᠨᠢ ᠲᠠ ᠨᠠᠷ ᠲᠤ ᠵᠢᠭᠰᠢᠭᠦᠷᠢᠲᠦ ᠵᠦᠢᠯ ᠶᠤᠮ᠃ 21 ᠬᠠᠷᠢᠨ ᠳᠠᠯᠠᠪᠴᠢ ᠲᠠᠢ ᠪᠥᠭᠡᠳ ᠳᠥᠷᠪᠡᠨ ᠬᠥᠯ ᠢᠶᠡᠷ ᠶᠠᠪᠤᠳᠠᠭ ᠬᠠᠮᠤᠭ ᠰᠢᠪᠠᠵᠢᠨ ᠤ ᠳᠤᠮᠳᠠ ᠠᠴᠠ ᠬᠥᠯ ᠳᠡᠭᠡᠨ ᠦᠶ᠎ᠡ ᠮᠥᠴᠢ ᠲᠠᠢ ᠭᠠᠵᠠᠷ ᠳᠡᠭᠡᠭᠦᠷ ᠳᠡᠪᠬᠡᠷᠦᠭᠴᠢᠳ᠂ 22 ᠲᠤᠬᠠᠢᠯᠠᠪᠠᠯ ᠴᠠᠷᠴᠠᠬᠠᠢ ᠶᠢᠨ ᠲᠥᠷᠥᠯ ᠤᠳ᠂ ᠬᠠᠯᠵᠠᠨ ᠴᠠᠷᠴᠠᠬᠠᠢ ᠶᠢᠨ ᠲᠥᠷᠥᠯ ᠤᠳ᠂ ᠬᠦᠷᠡᠯᠵᠡᠭᠡᠨ᠎ᠡ ᠶᠢᠨ ᠲᠥᠷᠥᠯ ᠤᠳ᠂ ᠳᠡᠪᠬᠡᠷᠭᠡ ᠶᠢᠨ ᠲᠥᠷᠥᠯ ᠤᠳ ᠢ ᠲᠠ ᠨᠠᠷ ᠢᠳᠡᠵᠦ ᠪᠣᠯᠣᠨ᠎ᠠ᠃ 23 ᠬᠠᠷᠢᠨ ᠳᠠᠯᠠᠪᠴᠢ ᠲᠠᠢ ᠪᠣᠯᠪᠠᠴᠤ ᠳᠥᠷᠪᠡᠨ ᠬᠥᠯ ᠢᠶᠡᠷ ᠶᠠᠪᠤᠭᠴᠢ ᠰᠢᠪᠠᠵᠢ ᠪᠦᠬᠦᠨ ᠨᠢ ᠲᠠ ᠨᠠᠷ ᠲᠤ ᠵᠢᠭᠰᠢᠭᠦᠷᠢᠲᠦ ᠵᠦᠢᠯ ᠶᠤᠮ᠃

24 ᠲᠠ ᠨᠠᠷ ᠡᠳᠡᠭᠡᠷ ᠠᠮᠢᠲᠠᠨ ᠢᠶᠠᠷ ᠪᠤᠵᠠᠷᠲᠤᠬᠤ ᠤᠴᠢᠷ ᠲᠡᠳᠡᠭᠡᠷ ᠦᠨ ᠦᠬᠦᠳᠡᠯ ᠳᠦ ᠬᠦᠷᠦᠭᠰᠡᠨ ᠬᠥᠮᠦᠨ ᠪᠣᠯᠭᠠᠨ ᠦᠳᠡᠰᠢ ᠪᠣᠯᠲᠠᠯ᠎ᠠ ᠪᠤᠵᠠᠷᠲᠤᠭᠰᠠᠨ ᠪᠠᠢᠬᠤ ᠪᠣᠯᠣᠨ᠎ᠠ᠃ 25 ᠲᠡᠳᠡᠭᠡᠷ ᠦᠨ ᠦᠬᠦᠳᠡᠯ ᠢ ᠵᠥᠭᠡᠭᠡᠭᠰᠡᠨ ᠬᠥᠮᠦᠨ ᠪᠣᠯᠭᠠᠨ ᠬᠤᠪᠴᠠᠰᠤ ᠪᠠᠨ ᠤᠬᠢᠶᠠᠬᠤ ᠶᠣᠰᠣᠲᠠᠢ ᠪᠥᠭᠡᠳ ᠦᠳᠡᠰᠢ ᠪᠣᠯᠲᠠᠯ᠎ᠠ ᠪᠤᠵᠠᠷᠲᠤᠭᠰᠠᠨ ᠪᠠᠢᠬᠤ ᠪᠣᠯᠣᠨ᠎ᠠ᠃ 26 ᠠᠴᠠ ᠲᠤᠭᠤᠷᠠᠢᠲᠠᠨ ᠪᠣᠯᠪᠠᠴᠤ ᠲᠤᠭᠤᠷᠠᠢ ᠨᠢ ᠭᠦᠢᠴᠡᠳ ᠰᠠᠯᠭᠠᠭᠳᠠᠭ᠎ᠠ ᠦᠭᠡᠢ᠂ ᠡᠰᠡᠪᠡᠯ ᠰᠡᠪᠡᠰᠦ ᠪᠡᠨ ᠬᠡᠪᠢᠳᠡᠭ ᠦᠭᠡᠢ ᠪᠦᠬᠦ ᠠᠮᠢᠲᠠᠨ ᠲᠠ ᠨᠠᠷ ᠲᠤ ᠪᠤᠵᠠᠷ᠂ ᠲᠡᠳᠡᠭᠡᠷ ᠲᠦ ᠬᠦᠷᠦᠭᠰᠡᠨ ᠬᠥᠮᠦᠨ ᠪᠣᠯᠭᠠᠨ ᠪᠤᠵᠠᠷᠲᠤᠭᠰᠠᠨ ᠪᠠᠢᠬᠤ ᠪᠣᠯᠣᠨ᠎ᠠ᠃ 27 ᠳᠥᠷᠪᠡᠨ ᠬᠥᠯ ᠢᠶᠡᠷ ᠢᠶᠠᠨ ᠶᠠᠪᠤᠳᠠᠭ ᠪᠦᠬᠦ ᠠᠮᠢᠲᠠᠳ ᠤᠨ ᠳᠤᠮᠳᠠ ᠠᠴᠠ ᠲᠠᠪᠠᠬᠠᠢ ᠪᠠᠷ ᠢᠶᠠᠨ ᠶᠠᠪᠤᠳᠠᠭ ᠪᠦᠬᠦᠨ ᠨᠢ ᠲᠠ ᠨᠠᠷ ᠲᠤ ᠪᠤᠵᠠᠷ᠂ ᠲᠡᠳᠡᠭᠡᠷ ᠦᠨ ᠦᠬᠦᠳᠡᠯ ᠳᠦ ᠬᠦᠷᠦᠭᠰᠡᠨ ᠬᠥᠮᠦᠨ ᠪᠣᠯᠭᠠᠨ ᠦᠳᠡᠰᠢ ᠪᠣᠯᠲᠠᠯ᠎ᠠ ᠪᠤᠵᠠᠷᠲᠤᠭᠰᠠᠨ ᠪᠠᠢᠬᠤ ᠪᠣᠯᠣᠨ᠎ᠠ᠃ 28 ᠲᠡᠳᠡᠭᠡᠷ ᠦᠨ ᠦᠬᠦᠳᠡᠯ ᠢ ᠵᠥᠭᠡᠭᠡᠭᠰᠡᠨ ᠬᠥᠮᠦᠨ ᠬᠤᠪᠴᠠᠰᠤ ᠪᠠᠨ ᠤᠬᠢᠶᠠᠬᠤ ᠶᠣᠰᠣᠲᠠᠢ ᠪᠥᠭᠡᠳ ᠦᠳᠡᠰᠢ ᠪᠣᠯᠲᠠᠯ᠎ᠠ ᠪᠤᠵᠠᠷᠲᠤᠭᠰᠠᠨ ᠪᠠᠢᠬᠤ ᠪᠣᠯᠣᠨ᠎ᠠ᠃ ᠲᠡᠳᠡᠭᠡᠷ ᠨᠢ ᠲᠠ ᠨᠠᠷ ᠲᠤ ᠪᠤᠵᠠᠷ ᠠᠵᠢ᠃

29 ᠭᠠᠵᠠᠷ ᠢᠶᠠᠷ ᠮᠥᠯᠬᠥᠭᠴᠢᠳ ᠤᠨ ᠳᠤᠮᠳᠠ ᠠᠴᠠ ᠲᠠ ᠨᠠᠷ ᠲᠤ ᠪᠤᠵᠠᠷ ᠪᠣᠯᠬᠤ ᠠᠮᠢᠲᠠᠳ ᠭᠡᠪᠡᠯ᠂ ᠰᠣᠬᠣᠷ ᠨᠣᠮᠣᠨ᠂ ᠬᠤᠯᠤᠭᠠᠨ᠎ᠠ ᠪᠠ ᠲᠣᠮᠣ ᠭᠦᠷᠪᠡᠯ ᠦᠨ ᠲᠥᠷᠥᠯ ᠤᠳ᠂ 30 ᠴᠡᠩᠬᠡᠷ ᠭᠦᠷᠪᠡᠯ᠂ ᠰᠥᠨᠢ ᠶᠠᠪᠤᠭᠴᠢ ᠭᠦᠷᠪᠡᠯ᠂ ᠬᠠᠨ᠎ᠠ ᠪᠠᠷ ᠮᠥᠯᠬᠥᠭᠴᠢ ᠭᠦᠷᠪᠡᠯ᠂ ᠴᠥᠯ ᠳᠤ ᠬᠡᠪᠡᠯᠢ ᠪᠠᠷ ᠢᠶᠠᠨ ᠶᠠᠪᠤᠭᠴᠢ᠂ ᠬᠠᠮᠧᠯᠧᠶᠣᠨ 4 ᠶᠤᠮ᠃ 31 ᠮᠥᠯᠬᠥᠭᠴᠢᠳ ᠤᠨ ᠳᠤᠮᠳᠠ ᠠᠴᠠ ᠡᠳᠡᠭᠡᠷ ᠨᠢ ᠲᠠ ᠨᠠᠷ ᠲᠤ ᠪᠤᠵᠠᠷ᠂ ᠡᠳᠡᠭᠡᠷ ᠦᠨ ᠦᠬᠦᠳᠡᠯ ᠳᠦ ᠬᠦᠷᠦᠭᠰᠡᠨ ᠬᠥᠮᠦᠨ ᠪᠣᠯᠭᠠᠨ ᠦᠳᠡᠰᠢ ᠪᠣᠯᠲᠠᠯ᠎ᠠ ᠪᠤᠵᠠᠷᠲᠤᠭᠰᠠᠨ ᠪᠣᠯᠣᠨ᠎ᠠ᠃ 32 ᠡᠳᠡᠭᠡᠷ ᠦᠨ ᠦᠬᠦᠳᠡᠯ ᠶᠠᠭᠤᠨ ᠤ ᠳᠡᠭᠡᠷ᠎ᠡ ᠤᠨᠠᠪᠠᠯ ᠲᠡᠷᠡ ᠪᠤᠵᠠᠷᠲᠤᠭᠰᠠᠨ ᠪᠣᠯᠣᠨ᠎ᠠ᠃ ᠮᠣᠳᠣᠨ ᠡᠳ᠋ᠯᠡᠯ᠂ ᠬᠤᠪᠴᠠᠰᠤ ᠬᠤᠨᠠᠷ᠂ ᠠᠷᠠᠰᠤ᠂ ᠡᠰᠡᠪᠡᠯ ᠤᠭᠤᠲᠠ ᠬᠡᠦᠳᠡᠢ ᠵᠡᠷᠭᠡ ᠶᠢᠨ ᠶᠠᠮᠠᠷ ᠴᠤ ᠠᠵᠢᠯ ᠬᠢᠳᠡᠯ ᠳᠦ ᠬᠡᠷᠡᠭᠯᠡᠳᠡᠭ ᠵᠦᠢᠯ ᠲᠡᠢᠨ ᠬᠦ ᠪᠤᠵᠠᠷᠲᠤᠭᠰᠠᠨ ᠲᠣᠬᠢᠶᠠᠯᠳᠤᠯ ᠳᠤ᠂ ᠲᠡᠭᠦᠨ ᠢ ᠤᠰᠤᠨ ᠳᠤ ᠬᠢ᠃ ᠲᠡᠭᠡᠪᠡᠯ ᠲᠡᠷᠡ ᠨᠢ ᠦᠳᠡᠰᠢ ᠪᠣᠯᠲᠠᠯ᠎ᠠ ᠪᠤᠵᠠᠷᠲᠤᠭᠰᠠᠨ ᠪᠠᠢᠵᠤ᠂ ᠳᠠᠷᠠᠭ᠎ᠠ ᠨᠢ ᠴᠡᠪᠡᠷ ᠪᠣᠯᠣᠨ᠎ᠠ᠃ 33 ᠮᠥᠨ ᠲᠡᠳᠡᠭᠡᠷ ᠦᠨ ᠠᠯᠢ ᠨᠢᠭᠡ ᠨᠢ ᠠᠯᠢᠪᠠ ᠰᠢᠪᠠᠷ ᠰᠠᠪᠠᠨ ᠳᠤ ᠤᠨᠠᠪᠠᠯ ᠳᠣᠲᠣᠷ᠎ᠠ ᠨᠢ ᠪᠠᠢᠭ᠎ᠠ ᠪᠦᠬᠦ ᠵᠦᠢᠯ ᠨᠢ ᠪᠤᠵᠠᠷᠲᠤᠬᠤ ᠪᠣᠯᠬᠣᠷ ᠲᠡᠷᠡ ᠰᠠᠪᠠ ᠶᠢ ᠬᠠᠭᠠᠯᠬᠤ ᠶᠣᠰᠣᠲᠠᠢ᠃ 34 ᠲᠡᠢᠮᠦ ᠰᠠᠪᠠᠨ ᠳᠤ ᠪᠠᠢᠭᠰᠠᠨ ᠤᠰᠤ ᠶᠠᠮᠠᠷ ᠨᠢᠭᠡᠨ ᠢᠳᠡᠭᠡᠨ ᠳᠡᠭᠡᠷ᠎ᠡ ᠬᠦᠷᠪᠡᠯ ᠲᠡᠷᠡ ᠢᠳᠡᠭᠡᠨ ᠴᠤ ᠪᠤᠵᠠᠷᠲᠤᠬᠤ ᠪᠥᠭᠡᠳ ᠲᠡᠢᠮᠦ ᠰᠠᠪᠠ ᠶᠢᠨ ᠳᠣᠲᠣᠷ᠎ᠠ ᠪᠠᠢᠭᠰᠠᠨ ᠶᠠᠮᠠᠷ ᠴᠤ ᠤᠮᠳᠠᠭᠠᠨ ᠪᠤᠵᠠᠷᠲᠤᠭᠰᠠᠨ ᠪᠣᠯᠣᠨ᠎ᠠ᠃ 35 ᠲᠡᠳᠡᠭᠡᠷ ᠦᠨ ᠦᠬᠦᠳᠡᠯ ᠦᠨ ᠶᠠᠮᠠᠷ ᠨᠢᠭᠡ ᠬᠡᠰᠡᠭ ᠨᠢ ᠶᠠᠮᠠᠷ ᠨᠢᠭᠡᠨ ᠶᠠᠭᠤᠮᠠᠨ ᠳᠡᠭᠡᠷ᠎ᠡ ᠤᠨᠠᠪᠠᠯ ᠲᠡᠷᠡ ᠶᠠᠭᠤᠮ᠎ᠠ ᠪᠤᠵᠠᠷᠲᠤᠭᠰᠠᠨ ᠪᠣᠯᠣᠨ᠎ᠠ᠃ ᠲᠣᠭᠣᠭ᠎ᠠ ᠪᠣᠯᠣᠨ ᠵᠤᠤᠬ᠎ᠠ ᠪᠤᠵᠠᠷᠲᠤᠭᠰᠠᠨ ᠪᠣᠯ ᠲᠡᠭᠦᠨ ᠢ ᠬᠡᠮᠬᠡᠯᠡᠬᠦ ᠶᠣᠰᠣᠲᠠᠢ᠂ ᠲᠡᠳᠡᠭᠡᠷ ᠨᠢ ᠪᠤᠵᠠᠷ ᠪᠣᠯᠬᠣᠷ ᠲᠠ ᠨᠠᠷ ᠲᠤ ᠴᠤ ᠪᠤᠵᠠᠷ ᠶᠤᠮ᠃ 36 ᠭᠡᠪᠡᠴᠦ ᠪᠤᠯᠠᠭ᠂ ᠡᠰᠡᠪᠡᠯ ᠤᠰᠤ ᠬᠠᠳᠠᠭᠠᠯᠠᠬᠤ ᠨᠥᠭᠡᠴᠡᠯᠡᠭᠦᠷ ᠨᠢ ᠴᠡᠪᠡᠷ ᠬᠡᠪ ᠢᠶᠡᠷ ᠪᠠᠢᠬᠤ ᠪᠣᠯᠣᠨ᠎ᠠ᠃ ᠬᠠᠷᠢᠨ ᠲᠡᠳᠡᠭᠡᠷ ᠦᠬᠦᠳᠡᠯ ᠳᠦ ᠬᠦᠷᠦᠭᠰᠡᠨ ᠪᠣᠯᠭᠠᠨ ᠪᠤᠵᠠᠷ ᠪᠣᠯᠣᠨ᠎ᠠ᠃ 37 ᠲᠡᠳᠡᠭᠡᠷ ᠦᠨ ᠦᠬᠦᠳᠡᠯ ᠦᠨ ᠬᠡᠰᠡᠭ ᠨᠢ ᠲᠠᠷᠢᠮᠠᠯ ᠤᠨ ᠦᠷ᠎ᠡ ᠳᠡᠭᠡᠷ᠎ᠡ ᠤᠨᠠᠭᠰᠠᠨ ᠲᠣᠬᠢᠶᠠᠯᠳᠤᠯ ᠳᠤ᠂ ᠲᠡᠷᠡ ᠦᠷ᠎ᠡ ᠴᠡᠪᠡᠷ ᠬᠡᠪ ᠢᠶᠡᠷ ᠪᠠᠢᠬᠤ ᠪᠣᠯᠪᠠᠴᠤ 38 ᠲᠡᠳᠡᠭᠡᠷ ᠦᠷ᠎ᠡ ᠤᠨ ᠳᠡᠭᠡᠷ᠎ᠡ ᠤᠰᠤ ᠲᠠᠢ ᠪᠠᠢᠬᠤ ᠳᠤ᠂ ᠲᠡᠳᠡᠭᠡᠷ ᠦᠨ ᠦᠬᠦᠳᠡᠯ ᠦᠨ ᠬᠡᠰᠡᠭ ᠲᠡᠭᠦᠨ ᠳᠡᠭᠡᠷ᠎ᠡ ᠤᠨᠠᠪᠠᠯ ᠲᠡᠷᠡ ᠦᠷ᠎ᠡ ᠲᠠ ᠨᠠᠷ ᠲᠤ ᠪᠤᠵᠠᠷ ᠪᠣᠯᠣᠨ᠎ᠠ᠃

39 ᠲᠠ ᠨᠠᠷ ᠲᠤ ᠢᠳᠡᠰᠢ ᠪᠣᠯᠬᠤ ᠠᠮᠢᠲᠠᠨ ᠦᠬᠦᠭᠰᠡᠨ ᠲᠣᠬᠢᠶᠠᠯᠳᠤᠯ ᠳᠤ᠂ ᠲᠡᠷᠡ ᠦᠬᠦᠳᠡᠯ ᠳᠦ ᠬᠦᠷᠦᠭᠰᠡᠨ ᠬᠥᠮᠦᠨ ᠦᠳᠡᠰᠢ ᠪᠣᠯᠲᠠᠯ᠎ᠠ ᠪᠤᠵᠠᠷᠲᠤᠭᠰᠠᠨ ᠪᠣᠯᠣᠨ᠎ᠠ᠃ 40 ᠲᠡᠷᠡ ᠦᠬᠦᠳᠡᠯ ᠦᠨ ᠮᠢᠬᠠᠨ ᠠᠴᠠ ᠢᠳᠡᠭᠰᠡᠨ ᠬᠥᠮᠦᠨ ᠬᠤᠪᠴᠠᠰᠤ ᠪᠠᠨ ᠤᠬᠢᠶᠠᠬᠤ ᠶᠣᠰᠣᠲᠠᠢ ᠪᠥᠭᠡᠳ ᠦᠳᠡᠰᠢ ᠪᠣᠯᠲᠠᠯ᠎ᠠ ᠪᠤᠵᠠᠷᠲᠤᠭᠰᠠᠨ ᠪᠣᠯᠣᠨ᠎ᠠ᠃ ᠲᠡᠷᠡ ᠦᠬᠦᠳᠡᠯ ᠢ ᠵᠥᠭᠡᠭᠡᠭᠰᠡᠨ ᠬᠥᠮᠦᠨ ᠬᠤᠪᠴᠠᠰᠤ ᠪᠠᠨ ᠤᠬᠢᠶᠠᠬᠤ ᠶᠣᠰᠣᠲᠠᠢ ᠪᠥᠭᠡᠳ ᠦᠳᠡᠰᠢ ᠪᠣᠯᠲᠠᠯ᠎ᠠ ᠪᠤᠵᠠᠷᠲᠤᠭᠰᠠᠨ ᠪᠣᠯᠣᠨ᠎ᠠ᠃

41 ᠭᠠᠵᠠᠷ ᠢᠶᠠᠷ ᠮᠥᠯᠬᠥᠭᠴᠢ ᠠᠮᠢᠲᠠᠨ ᠪᠦᠷᠢ ᠨᠢ ᠵᠢᠭᠰᠢᠭᠦᠷᠢᠲᠦ ᠵᠦᠢᠯ ᠪᠣᠯᠬᠣᠷ ᠲᠡᠳᠡᠭᠡᠷ ᠢ ᠢᠳᠡᠵᠦ ᠪᠣᠯᠬᠤ ᠦᠭᠡᠢ᠃ 42 ᠬᠡᠪᠡᠯᠢ ᠪᠠᠷ ᠮᠥᠯᠬᠥᠭᠰᠡᠨ ᠴᠤ᠂ ᠳᠥᠷᠪᠡᠨ ᠬᠥᠯ ᠢᠶᠡᠷ᠂ ᠡᠰᠡᠪᠡᠯ ᠣᠯᠠᠨ ᠬᠥᠯ ᠢᠶᠡᠷ ᠮᠥᠯᠬᠥᠭᠰᠡᠨ ᠴᠤ᠂ ᠭᠠᠵᠠᠷ ᠢᠶᠠᠷ ᠮᠥᠯᠬᠥᠭᠴᠢ ᠠᠮᠢᠲᠠᠳ ᠪᠦᠭᠦᠳᠡ ᠵᠢᠭᠰᠢᠭᠦᠷᠢᠲᠦ ᠵᠦᠢᠯ ᠪᠣᠯᠬᠣᠷ ᠲᠡᠳᠡᠭᠡᠷ ᠢ ᠢᠳᠡᠵᠦ ᠪᠣᠯᠬᠤ ᠦᠭᠡᠢ᠃ 43 ᠡᠳᠡᠭᠡᠷ ᠮᠥᠯᠬᠥᠭᠴᠢ ᠠᠮᠢᠲᠠᠨ ᠢᠶᠠᠷ ᠥᠪᠡᠷᠰᠡᠳ ᠢ ᠪᠠᠨ ᠵᠢᠭᠰᠢᠭᠦᠷᠢ ᠪᠦᠦ ᠪᠣᠯᠭ᠎ᠠ᠃ ᠲᠡᠳᠡᠭᠡᠷ ᠢᠶᠡᠷ ᠥᠪᠡᠷᠰᠡᠳ ᠢ ᠪᠠᠨ ᠪᠤᠵᠠᠷᠯᠠᠭᠤᠯᠵᠤ᠂ ᠥᠪᠡᠷ ᠢᠶᠡᠨ ᠪᠤᠵᠠᠷ ᠪᠣᠯᠬᠤ ᠬᠡᠷᠡᠭ ᠦᠭᠡᠢ᠃ 44 ᠲᠠ ᠨᠠᠷ ᠤᠨ ᠪᠤᠷᠬᠠᠨ ᠪᠣᠯ ᠶᠣᠬᠣᠸᠠ ᠪᠢ ᠮᠥᠨ᠃ ᠪᠢ ᠠᠷᠢᠭᠤᠨ ᠲᠤᠯᠠ ᠲᠠ ᠨᠠᠷ ᠴᠤ ᠥᠪᠡᠷᠰᠡᠳ ᠢ ᠪᠠᠨ ᠠᠷᠢᠭᠤᠰᠬᠠᠵᠤ᠂ ᠠᠷᠢᠭᠤᠨ ᠪᠠᠢ᠃ ᠭᠠᠵᠠᠷ ᠢᠶᠠᠷ ᠮᠥᠯᠬᠥᠭᠴᠢ ᠠᠮᠢᠲᠠᠳ ᠤᠨ ᠠᠯᠢ ᠨᠢᠭᠡ ᠪᠡᠷ ᠥᠪᠡᠷᠰᠡᠳ ᠢ ᠪᠠᠨ ᠪᠤᠵᠠᠷᠯᠠᠭᠤᠯᠵᠤ ᠪᠣᠯᠬᠤ ᠦᠭᠡᠢ᠃ 45 ᠶᠣᠬᠣᠸᠠ ᠪᠢ ᠲᠠ ᠨᠠᠷ ᠤᠨ ᠪᠤᠷᠬᠠᠨ ᠪᠣᠯᠬᠤ ᠶᠢᠨ ᠲᠤᠯᠠᠳᠠ ᠲᠠ ᠨᠠᠷ ᠢ ᠶᠧᠵᠢᠫᠲ ᠡᠴᠡ ᠠᠪᠴᠢᠷᠠᠭᠰᠠᠨ ᠶᠤᠮ᠃ ᠪᠢ ᠠᠷᠢᠭᠤᠨ ᠲᠤᠯᠠ ᠲᠠ ᠨᠠᠷ ᠴᠤ ᠠᠷᠢᠭᠤᠨ ᠪᠠᠢ》 ᠭᠡᠯ᠎ᠡ᠃

46 ᠡᠳᠡᠭᠡᠷ ᠨᠢ ᠠᠮᠢᠲᠠᠨ᠂ ᠰᠢᠪᠠᠭᠤ᠂ ᠤᠰᠤᠨ ᠳᠤ ᠬᠥᠳᠡᠯᠦᠭᠴᠢ ᠠᠮᠢ ᠲᠠᠢ ᠪᠦᠬᠦᠨ᠂ ᠭᠠᠵᠠᠷ ᠢᠶᠠᠷ ᠮᠥᠯᠬᠥᠭᠴᠢ ᠪᠦᠬᠦᠨ ᠦ ᠲᠤᠬᠠᠢ᠂ 47 ᠪᠤᠵᠠᠷ ᠬᠢᠭᠡᠳ ᠴᠡᠪᠡᠷ᠂ ᠢᠳᠡᠵᠦ ᠪᠣᠯᠬᠤ ᠠᠮᠢᠲᠠᠳ ᠬᠢᠭᠡᠳ ᠢᠳᠡᠵᠦ ᠦᠯᠦ ᠪᠣᠯᠬᠤ ᠠᠮᠢᠲᠠᠳ ᠢ ᠢᠯᠭᠠᠨ ᠰᠠᠯᠭᠠᠬᠤ ᠳᠤ ᠵᠣᠷᠢᠭᠤᠯᠤᠭᠰᠠᠨ ᠬᠠᠤᠯᠢ ᠶᠤᠮ᠃