ᠯᠧᠸᠢ ᠠᠷᠪᠠᠨ ᠲᠠᠪᠤ
ᠭᠣᠭᠣᠵᠢᠳᠠᠰᠤ ᠠᠴᠠ ᠴᠡᠪᠡᠷᠰᠢᠬᠦ
1 ᠶᠣᠬᠣᠸᠠ ᠮᠣᠰᠧ᠂ ᠠᠷᠣᠨ ᠨᠠᠷ ᠲᠤ ᠶᠠᠷᠢᠨ ᠠᠢᠯᠠᠳᠤᠭᠰᠠᠨ ᠨᠢ᠄ 2 《ᠢᠰᠷᠧᠯᠴᠦᠳ ᠲᠦ ᠵᠠᠬᠢᠵᠤ ᠶᠠᠷᠢ᠄ ᠶᠠᠮᠠᠷ ᠨᠢᠭᠡ ᠬᠥᠮᠦᠨ ᠦ ᠪᠡᠶᠡ ᠡᠴᠡ ᠭᠣᠭᠣᠵᠢᠳᠠᠰᠤ ᠭᠠᠷᠪᠠᠯ᠂ ᠲᠡᠷᠡ ᠭᠣᠭᠣᠵᠢᠳᠠᠰᠤ ᠨᠢ ᠪᠤᠵᠠᠷ ᠪᠠᠢᠬᠤ ᠪᠣᠯᠣᠨᠠ᠃ 3 ᠲᠡᠭᠦᠨ ᠢ ᠶᠠᠮᠠᠷ ᠨᠥᠬᠥᠴᠡᠯ ᠳᠦ ᠪᠤᠵᠠᠷ ᠪᠣᠯᠭᠠᠳᠠᠭ ᠪᠤᠢ ᠭᠡᠪᠡᠯ᠄ ᠭᠣᠭᠣᠵᠢᠳᠠᠰᠤ ᠨᠢ ᠪᠡᠶᠡ ᠡᠴᠡ ᠨᠢ ᠭᠠᠷᠤᠭᠰᠠᠭᠠᠷ ᠪᠠᠢᠭᠰᠠᠨ ᠴᠤ᠂ ᠵᠣᠭᠰᠣᠭᠰᠠᠨ ᠪᠠᠢᠭᠰᠠᠨ ᠴᠤ ᠲᠡᠭᠦᠨ ᠡᠴᠡ ᠪᠣᠯᠵᠤ ᠲᠡᠷᠡ ᠪᠤᠵᠠᠷ ᠪᠠᠢᠬᠤ ᠪᠣᠯᠣᠨᠠ᠃ 4 ᠭᠣᠭᠣᠵᠢᠳᠠᠰᠤ ᠲᠠᠢ ᠬᠥᠮᠦᠨ ᠦ ᠬᠡᠪᠲᠡᠭᠰᠡᠨ ᠠᠯᠢᠪᠠ ᠣᠷᠣ ᠪᠤᠵᠠᠷ ᠪᠥᠭᠡᠳ ᠲᠡᠭᠦᠨ ᠦ ᠰᠠᠭᠤᠭᠰᠠᠨ ᠶᠠᠭᠤᠮᠠ ᠪᠦᠬᠦᠨ ᠪᠤᠵᠠᠷ ᠪᠠᠢᠬᠤ ᠪᠣᠯᠣᠨᠠ᠃ 5 ᠲᠡᠭᠦᠨ ᠦ ᠣᠷᠣ ᠳᠤ ᠬᠦᠷᠦᠭᠰᠡᠨ ᠬᠥᠮᠦᠨ ᠬᠤᠪᠴᠠᠰᠤ ᠪᠠᠨ ᠤᠬᠢᠶᠠᠵᠤ᠂ ᠤᠰᠤᠨ ᠳᠤ ᠪᠡᠶᠡ ᠪᠡᠨ ᠤᠬᠢᠶᠠᠬᠤ ᠶᠣᠰᠣᠲᠠᠢ᠃ ᠲᠡᠷᠡ ᠦᠳᠡᠰᠢ ᠪᠣᠯᠲᠠᠯᠠ ᠪᠤᠵᠠᠷ ᠪᠠᠢᠬᠤ ᠪᠣᠯᠣᠨᠠ᠃ 6 ᠭᠣᠭᠣᠵᠢᠳᠠᠰᠤ ᠲᠠᠢ ᠬᠥᠮᠦᠨ ᠦ ᠰᠠᠭᠤᠵᠤ ᠪᠠᠢᠭᠰᠠᠨ ᠵᠦᠢᠯ ᠳᠡᠭᠡᠷᠡ ᠰᠠᠭᠤᠭᠰᠠᠨ ᠬᠥᠮᠦᠨ ᠴᠤ ᠬᠤᠪᠴᠠᠰᠤ ᠪᠠᠨ ᠤᠬᠢᠶᠠᠵᠤ᠂ ᠤᠰᠤᠨ ᠳᠤ ᠪᠡᠶᠡ ᠪᠡᠨ ᠤᠬᠢᠶᠠᠬᠤ ᠶᠣᠰᠣᠲᠠᠢ᠃ ᠲᠡᠷᠡ ᠦᠳᠡᠰᠢ ᠪᠣᠯᠲᠠᠯᠠ ᠪᠤᠵᠠᠷ ᠪᠠᠢᠬᠤ ᠪᠣᠯᠣᠨᠠ᠃ 7 ᠭᠣᠭᠣᠵᠢᠳᠠᠰᠤ ᠲᠠᠢ ᠬᠥᠮᠦᠨ ᠦ ᠪᠡᠶᠡ ᠳᠦ ᠬᠦᠷᠦᠭᠰᠡᠨ ᠬᠥᠮᠦᠨ ᠴᠤ ᠬᠤᠪᠴᠠᠰᠤ ᠪᠠᠨ ᠤᠬᠢᠶᠠᠵᠤ᠂ ᠤᠰᠤᠨ ᠳᠤ ᠪᠡᠶᠡ ᠪᠡᠨ ᠤᠬᠢᠶᠠᠬᠤ ᠶᠣᠰᠣᠲᠠᠢ᠃ ᠲᠡᠷᠡ ᠦᠳᠡᠰᠢ ᠪᠣᠯᠲᠠᠯᠠ ᠪᠤᠵᠠᠷ ᠪᠠᠢᠬᠤ ᠪᠣᠯᠣᠨᠠ᠃ 8 ᠬᠡᠷᠪᠡ ᠭᠣᠭᠣᠵᠢᠳᠠᠰᠤ ᠲᠠᠢ ᠬᠥᠮᠦᠨ ᠴᠡᠪᠡᠷ ᠪᠠᠢᠭᠠ ᠬᠥᠮᠦᠨ ᠳᠡᠭᠡᠷᠡ ᠲᠡᠭᠦᠨ ᠢ ᠪᠠᠨ ᠬᠦᠷᠭᠡᠪᠡᠯ᠂ ᠲᠡᠷᠡ ᠬᠤᠪᠴᠠᠰᠤ ᠪᠠᠨ ᠤᠬᠢᠶᠠᠵᠤ᠂ ᠤᠰᠤᠨ ᠳᠤ ᠤᠬᠢᠶᠠᠬᠤ ᠶᠣᠰᠣᠲᠠᠢ᠃ ᠭᠡᠬᠦ ᠳᠡᠭᠡᠨ ᠲᠡᠷᠡ ᠦᠳᠡᠰᠢ ᠪᠣᠯᠲᠠᠯᠠ ᠪᠤᠵᠠᠷᠲᠤᠭᠰᠠᠨ ᠪᠠᠢᠬᠤ ᠪᠣᠯᠣᠨᠠ᠃ 9 ᠭᠣᠭᠣᠵᠢᠳᠠᠰᠤ ᠲᠠᠢ ᠬᠥᠮᠦᠨ ᠦ ᠤᠨᠤᠵᠤ ᠶᠠᠪᠤᠭᠰᠠᠨ ᠠᠯᠢᠪᠠ ᠡᠮᠡᠭᠡᠯ ᠴᠤ ᠪᠤᠵᠠᠷ ᠪᠠᠢᠬᠤ ᠪᠣᠯᠣᠨᠠ᠃ 10 ᠮᠥᠨ ᠲᠡᠭᠦᠨ ᠦ ᠳᠣᠣᠷᠠ ᠪᠠᠢᠭᠠ ᠠᠯᠢᠪᠠ ᠵᠦᠢᠯ ᠳᠤ ᠬᠦᠷᠦᠭᠰᠡᠨ ᠬᠥᠮᠦᠨ ᠪᠣᠯᠭᠠᠨ ᠦᠳᠡᠰᠢ ᠪᠣᠯᠲᠠᠯᠠ ᠪᠤᠵᠠᠷ ᠪᠠᠢᠬᠤ ᠪᠣᠯᠣᠨᠠ᠃ ᠡᠳᠡᠭᠡᠷ ᠢ ᠵᠥᠭᠡᠭᠡᠵᠦ ᠶᠠᠪᠤᠭᠰᠠᠨ ᠬᠥᠮᠦᠨ ᠴᠤ ᠬᠤᠪᠴᠠᠰᠤ ᠪᠠᠨ ᠤᠬᠢᠶᠠᠵᠤ᠂ ᠤᠰᠤᠨ ᠳᠤ ᠤᠬᠢᠶᠠᠬᠤ ᠶᠣᠰᠣᠲᠠᠢ᠃ ᠲᠡᠷᠡ ᠦᠳᠡᠰᠢ ᠪᠣᠯᠲᠠᠯᠠ ᠪᠤᠵᠠᠷ ᠪᠠᠢᠬᠤ ᠪᠣᠯᠣᠨᠠ᠃ 11 ᠭᠣᠭᠣᠵᠢᠳᠠᠰᠤ ᠲᠠᠢ ᠨᠢᠭᠡᠨ ᠨᠢ ᠭᠠᠷ ᠢᠶᠠᠨ ᠤᠰᠤᠨ ᠳᠤ ᠵᠠᠢᠯᠤᠯ ᠦᠭᠡᠢ ᠪᠠᠷ ᠬᠥᠮᠦᠨ ᠳᠦ ᠬᠦᠷᠦᠭᠰᠡᠨ ᠪᠣᠯ ᠲᠡᠷᠡ ᠬᠤᠪᠴᠠᠰᠤ ᠪᠠᠨ ᠤᠬᠢᠶᠠᠵᠤ᠂ ᠤᠰᠤᠨ ᠳᠤ ᠤᠬᠢᠶᠠᠬᠤ ᠶᠣᠰᠣᠲᠠᠢ᠃ ᠲᠡᠷᠡ ᠦᠳᠡᠰᠢ ᠪᠣᠯᠲᠠᠯᠠ ᠪᠤᠵᠠᠷ ᠪᠠᠢᠬᠤ ᠪᠣᠯᠣᠨᠠ᠃ 12 ᠭᠣᠭᠣᠵᠢᠳᠠᠰᠤ ᠲᠠᠢ ᠬᠥᠮᠦᠨ ᠦ ᠬᠦᠷᠦᠭᠰᠡᠨ ᠰᠢᠪᠠᠷ ᠰᠠᠪᠠ ᠶᠢ ᠬᠠᠭᠠᠯᠬᠤ ᠶᠣᠰᠣᠲᠠᠢ᠃ ᠬᠠᠷᠢᠨ ᠮᠣᠳᠣᠨ ᠰᠠᠪᠠ ᠶᠢ ᠨᠢ ᠤᠰᠤ ᠪᠠᠷ ᠵᠠᠢᠯᠪᠠᠯ ᠪᠣᠯᠣᠨᠠ᠃
13 ᠭᠣᠭᠣᠵᠢᠳᠠᠰᠤ ᠲᠠᠢ ᠬᠥᠮᠦᠨ ᠭᠣᠭᠣᠵᠢᠳᠠᠰᠤ ᠠᠴᠠ ᠪᠠᠨ ᠡᠳᠡᠭᠡᠷᠡᠵᠦ ᠴᠡᠪᠡᠷᠰᠢᠪᠡᠯ᠂ ᠴᠡᠪᠡᠷᠰᠢᠯᠲᠡ ᠳᠡᠭᠡᠨ ᠵᠣᠷᠢᠭᠤᠯᠤᠨ ᠳᠣᠯᠣᠭᠠ ᠬᠣᠨᠣᠭ ᠬᠦᠯᠢᠶᠡᠭᠰᠡᠨ ᠦ ᠳᠠᠷᠠᠭᠠ᠂ ᠬᠤᠪᠴᠠᠰᠤ ᠪᠠᠨ ᠤᠬᠢᠶᠠᠵᠤ ᠴᠡᠩᠭᠡᠭ ᠤᠰᠤᠨ ᠳᠤ ᠪᠡᠶᠡ ᠪᠡᠨ ᠤᠬᠢᠶᠠᠵᠤ ᠴᠡᠪᠡᠷ ᠪᠣᠯᠣᠨᠠ᠃ 14 ᠨᠠᠢ᠌ᠮᠠᠳᠠᠬᠢ ᠡᠳᠦᠷ ᠨᠢ ᠲᠡᠷᠡ ᠥᠪᠡᠷ ᠲᠡᠭᠡᠨ ᠵᠣᠷᠢᠭᠤᠯᠤᠨ ᠬᠣᠶᠠᠷ ᠬᠡᠭᠦᠷᠵᠡᠭᠡᠨᠡ᠂ ᠡᠰᠡᠪᠡᠯ ᠲᠠᠭᠲᠠᠭᠠᠨ ᠤ ᠬᠣᠶᠠᠷ ᠳᠡᠭᠳᠡᠭᠡᠬᠡᠢ ᠠᠪᠴᠤ᠂ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠠᠭᠤᠯᠵᠠᠯᠲᠠ ᠶᠢᠨ ᠮᠠᠢᠬᠠᠨ ᠤ ᠡᠭᠦᠳᠡᠨ ᠳᠡᠭᠡᠷᠡ ᠣᠴᠢᠵᠤ ᠡᠳᠡᠭᠡᠷ ᠢ ᠲᠠᠬᠢᠯᠴᠢ ᠳᠤ ᠥᠭᠭᠥᠨᠡ᠃ 15 ᠲᠠᠬᠢᠯᠴᠢ ᠡᠳᠡᠭᠡᠷ ᠢ ᠠᠪᠤᠭᠠᠳ᠂ ᠨᠢᠭᠡ ᠶᠢ ᠨᠢ ᠨᠢᠭᠦᠯ ᠦᠨ ᠲᠠᠬᠢᠯ᠂ ᠨᠥᠭᠥᠭᠡ ᠶᠢ ᠨᠢ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠪᠣᠯᠭᠠᠨ ᠡᠷᠭᠦᠵᠦ᠂ ᠲᠡᠷᠡ ᠬᠥᠮᠦᠨ ᠦ ᠡᠮᠦᠨᠡ ᠡᠴᠡ ᠭᠣᠭᠣᠵᠢᠳᠠᠰᠤ ᠶᠢᠨ ᠬᠢᠨᠢ ᠤᠯᠠᠮ ᠢᠶᠠᠷ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠬᠡᠯᠲᠦᠷᠢᠭᠦᠯᠦᠯᠭᠡ ᠶᠢ ᠬᠢᠬᠦ ᠪᠣᠯᠣᠨᠠ᠃
16 ᠬᠡᠷᠪᠡ ᠡᠷᠡ ᠬᠥᠮᠦᠨ ᠡᠴᠡ ᠦᠷᠡ ᠶᠢᠨ ᠰᠢᠩᠭᠡᠨ ᠭᠠᠷᠪᠠᠯ ᠲᠡᠷᠡ ᠪᠡᠷ ᠪᠦᠬᠦ ᠪᠡᠶᠡ ᠪᠡᠨ ᠤᠰᠤᠨ ᠳᠤ ᠤᠬᠢᠶᠠᠬᠤ ᠶᠣᠰᠣᠲᠠᠢ᠃ ᠲᠡᠷᠡ ᠪᠡᠷ ᠦᠳᠡᠰᠢ ᠪᠣᠯᠲᠠᠯᠠ ᠪᠤᠵᠠᠷ ᠪᠠᠢᠬᠤ ᠪᠣᠯᠣᠨᠠ᠃ 17 ᠦᠷᠡ ᠶᠢᠨ ᠰᠢᠩᠭᠡᠨ ᠬᠦᠷᠦᠭᠰᠡᠨ ᠠᠯᠢᠪᠠ ᠬᠤᠪᠴᠠᠰᠤ᠂ ᠡᠰᠡᠪᠡᠯ ᠠᠯᠢᠪᠠ ᠠᠷᠠᠰᠤ ᠶᠢ ᠤᠰᠤ ᠪᠠᠷ ᠤᠬᠢᠶᠠᠬᠤ ᠶᠣᠰᠣᠲᠠᠢ᠃ ᠲᠡᠳᠡᠭᠡᠷ ᠨᠢ ᠦᠳᠡᠰᠢ ᠪᠣᠯᠲᠠᠯᠠ ᠪᠤᠵᠠᠷ ᠪᠠᠢᠬᠤ ᠪᠣᠯᠣᠨᠠ᠃ 18 ᠬᠡᠷᠪᠡ ᠡᠷᠡ ᠬᠥᠮᠦᠨ ᠡᠮᠡᠭᠲᠡᠢ ᠬᠥᠮᠦᠨ ᠲᠡᠢ ᠤᠨᠲᠠᠵᠤ ᠦᠷᠡ ᠶᠢᠨ ᠰᠢᠩᠭᠡᠨ ᠭᠠᠷᠭᠠᠭᠰᠠᠨ ᠪᠠᠢᠪᠠᠯ᠂ ᠲᠡᠳᠡ ᠬᠣᠶᠠᠭᠤᠯᠠ ᠪᠠᠨ ᠤᠰᠤᠨ ᠳᠤ ᠪᠤᠯᠬᠠᠬᠤ ᠶᠣᠰᠣᠲᠠᠢ᠃ ᠲᠡᠳᠡ ᠦᠳᠡᠰᠢ ᠪᠣᠯᠲᠠᠯᠠ ᠪᠤᠵᠠᠷ ᠪᠠᠢᠬᠤ ᠪᠣᠯᠣᠨᠠ᠃
19 ᠬᠡᠷᠪᠡ ᠡᠮᠡᠭᠲᠡᠢ ᠬᠥᠮᠦᠨ ᠭᠣᠭᠣᠵᠢᠳᠠᠰᠤ ᠲᠠᠢ ᠪᠥᠭᠡᠳ ᠪᠡᠶᠡ ᠶᠢᠨ ᠭᠣᠭᠣᠵᠢᠳᠠᠰᠤ ᠨᠢ ᠴᠢᠰᠤ ᠪᠣᠯ᠂ ᠲᠡᠷᠡ ᠪᠡᠷ ᠳᠣᠯᠣᠭᠠᠨ ᠬᠣᠨᠣᠭ ᠰᠠᠷᠠ ᠶᠢᠨ ᠲᠡᠮᠳᠡᠭ ᠦᠨ ᠢᠶᠠᠨ ᠴᠡᠪᠡᠷ ᠪᠤᠰᠤ ᠪᠠᠢᠳᠠᠯ ᠲᠠᠢ᠂ ᠲᠡᠭᠦᠨ ᠳᠦ ᠬᠦᠷᠦᠭᠰᠡᠨ ᠪᠦᠬᠦᠨ ᠦᠳᠡᠰᠢ ᠪᠣᠯᠲᠠᠯᠠ ᠪᠤᠵᠠᠷ ᠪᠠᠢᠬᠤ ᠪᠣᠯᠣᠨᠠ᠃ 20 ᠲᠡᠭᠦᠨ ᠦ ᠰᠠᠷᠠ ᠶᠢᠨ ᠲᠡᠮᠳᠡᠭ ᠦᠨ ᠬᠤᠭᠤᠴᠠᠭᠠᠨ ᠳᠤ᠂ ᠲᠡᠭᠦᠨ ᠦ ᠬᠡᠪᠲᠡᠭᠰᠡᠨ ᠠᠯᠢᠪᠠ ᠵᠦᠢᠯ ᠪᠤᠵᠠᠷ᠂ ᠳᠡᠭᠡᠷᠡ ᠨᠢ ᠰᠠᠭᠤᠭᠰᠠᠨ ᠠᠯᠢᠪᠠ ᠵᠦᠢᠯ ᠴᠤ ᠪᠤᠵᠠᠷ ᠪᠠᠢᠬᠤ ᠪᠣᠯᠣᠨᠠ᠃ 21 ᠣᠷᠣ ᠳᠤᠨᠢ ᠬᠦᠷᠦᠭᠰᠡᠨ ᠬᠥᠮᠦᠨ ᠪᠦᠬᠦᠨ ᠬᠤᠪᠴᠠᠰᠤ ᠪᠠᠨ ᠤᠬᠢᠶᠠᠵᠤ᠂ ᠤᠰᠤᠨ ᠳᠤ ᠪᠡᠶᠡ ᠪᠡᠨ ᠤᠬᠢᠶᠠᠬᠤ ᠶᠣᠰᠣᠲᠠᠢ᠃ ᠲᠡᠷᠡ ᠦᠳᠡᠰᠢ ᠪᠣᠯᠲᠠᠯᠠ ᠪᠤᠵᠠᠷ ᠪᠠᠢᠬᠤ ᠪᠣᠯᠣᠨᠠ᠃ 22 ᠲᠡᠭᠦᠨ ᠦ ᠰᠠᠭᠤᠭᠰᠠᠨ ᠠᠯᠢᠪᠠ ᠵᠦᠢᠯ ᠳᠤ ᠬᠦᠷᠦᠭᠰᠡᠨ ᠬᠥᠮᠦᠨ ᠪᠦᠬᠦᠨ ᠬᠤᠪᠴᠠᠰᠤ ᠪᠠᠨ ᠤᠬᠢᠶᠠᠵᠤ᠂ ᠪᠡᠶᠡ ᠪᠡᠨ ᠤᠰᠤᠨ ᠳᠤ ᠤᠬᠢᠶᠠᠬᠤ ᠶᠣᠰᠣᠲᠠᠢ᠃ ᠲᠡᠷᠡ ᠦᠳᠡᠰᠢ ᠪᠣᠯᠲᠠᠯᠠ ᠪᠤᠵᠠᠷ ᠪᠠᠢᠬᠤ ᠪᠣᠯᠣᠨᠠ᠃ 23 ᠲᠡᠭᠦᠨ ᠦ ᠬᠡᠪᠲᠡᠭᠰᠡᠨ ᠣᠷᠣ᠂ ᠡᠰᠡᠪᠡᠯ ᠲᠡᠭᠦᠨ ᠦ ᠰᠠᠭᠤᠭᠰᠠᠨ ᠰᠠᠭᠤᠳᠠᠯ ᠳᠤ ᠬᠦᠷᠦᠭᠰᠡᠨ ᠬᠥᠮᠦᠨ ᠦᠳᠡᠰᠢ ᠪᠣᠯᠲᠠᠯᠠ ᠪᠤᠵᠠᠷ ᠪᠠᠢᠬᠤ ᠪᠣᠯᠣᠨᠠ᠃ 24 ᠬᠡᠷᠪᠡ ᠡᠷᠡ ᠬᠥᠮᠦᠨ ᠨᠥᠭᠥᠭᠡ ᠡᠮᠡᠭᠲᠡᠢ ᠲᠡᠢ ᠤᠨᠲᠠᠪᠠᠯ᠂ ᠡᠮᠡᠭᠲᠡᠢ ᠶᠢᠨ ᠴᠡᠪᠡᠷ ᠪᠤᠰᠤ ᠪᠠᠢᠳᠠᠯ ᠲᠡᠭᠦᠨ ᠳᠡᠭᠡᠷᠡ ᠬᠦᠷᠬᠦ ᠪᠠ ᠲᠡᠷᠡ ᠡᠷᠡᠭᠲᠡᠢ ᠳᠣᠯᠣᠭᠠᠨ ᠬᠣᠨᠣᠭ ᠪᠤᠵᠠᠷ ᠪᠠᠢᠬᠤ ᠪᠣᠯᠣᠨᠠ᠃ ᠲᠡᠷᠡ ᠡᠷᠡᠭᠲᠡᠢ ᠶᠢᠨ ᠬᠡᠪᠲᠡᠭᠰᠡᠨ ᠠᠯᠢᠪᠠ ᠣᠷᠣ ᠴᠤ ᠪᠤᠵᠠᠷ ᠪᠠᠢᠬᠤ ᠪᠣᠯᠣᠨᠠ᠃
25 ᠬᠡᠷᠪᠡ ᠡᠮᠡᠭᠲᠡᠢ ᠬᠥᠮᠦᠨ ᠰᠠᠷᠠ ᠶᠢᠨ ᠲᠡᠮᠳᠡᠭ ᠡᠴᠡ ᠪᠡᠨ ᠥᠭᠡᠷᠡ ᠦᠶᠡ ᠳᠦ ᠣᠯᠠᠨ ᠬᠣᠨᠣᠭ ᠴᠢᠰᠤᠨ ᠭᠣᠭᠣᠵᠢᠳᠠᠰᠤ ᠲᠠᠢ᠂ ᠡᠰᠡᠪᠡᠯ ᠲᠡᠷᠡ ᠬᠤᠭᠤᠴᠠᠭᠠᠨ ᠠᠴᠠ ᠴᠢᠨᠠᠭᠰᠢ ᠦᠷᠭᠦᠯᠵᠢᠯᠡᠨ ᠭᠣᠭᠣᠵᠢᠳᠠᠰᠤ ᠲᠠᠢ ᠪᠠᠢᠪᠠᠯ ᠪᠤᠵᠠᠷ ᠭᠣᠭᠣᠵᠢᠳᠠᠰᠤ ᠶᠢᠨ ᠢᠶᠠᠨ ᠪᠦᠬᠦ ᠡᠳᠦᠷ ᠤᠳ ᠢᠶᠠᠷ ᠲᠡᠷᠡ ᠡᠮᠡᠭᠲᠡᠢ ᠰᠠᠷᠠ ᠶᠢᠨ ᠲᠡᠮᠳᠡᠭ ᠦᠨ ᠬᠤᠭᠤᠴᠠᠭᠠᠨ ᠤ ᠬᠢ ᠰᠢᠭ᠋ ᠢᠶᠠᠨ ᠪᠤᠵᠠᠷ ᠪᠠᠢᠬᠤ ᠪᠣᠯᠣᠨᠠ᠃ 26 ᠭᠣᠭᠣᠵᠢᠳᠠᠰᠤ ᠶᠢᠨ ᠢᠶᠠᠨ ᠪᠦᠬᠦ ᠡᠳᠦᠷ ᠤᠳ ᠲᠤ ᠲᠡᠭᠦᠨ ᠦ ᠬᠡᠪᠲᠡᠭᠰᠡᠨ ᠠᠯᠢᠪᠠ ᠣᠷᠣ ᠰᠠᠷᠠ ᠶᠢᠨ ᠲᠡᠮᠳᠡᠭ ᠦᠨ ᠬᠤᠭᠤᠴᠠᠭᠠᠨ ᠤ ᠬᠢᠨᠢ ᠠᠳᠠᠯᠢ ᠪᠤᠵᠠᠷ ᠪᠥᠭᠡᠳ ᠲᠡᠭᠦᠨ ᠦ ᠰᠠᠭᠤᠭᠰᠠᠨ ᠠᠯᠢᠪᠠ ᠰᠠᠭᠤᠳᠠᠯ ᠴᠤ ᠰᠠᠷᠠ ᠶᠢᠨ ᠲᠡᠮᠳᠡᠭ ᠦᠨ ᠬᠤᠭᠤᠴᠠᠭᠠᠨ ᠤ ᠬᠢᠨᠢ ᠠᠳᠠᠯᠢ ᠪᠤᠵᠠᠷ ᠪᠠᠢᠬᠤ ᠪᠣᠯᠣᠨᠠ᠃ 27 ᠡᠳᠡᠭᠡᠷ ᠵᠦᠢᠯ ᠳᠤ ᠬᠦᠷᠦᠭᠰᠡᠨ ᠬᠥᠮᠦᠨ ᠪᠣᠯᠭᠠᠨ ᠪᠤᠵᠠᠷ ᠪᠠᠢᠬᠤ ᠪᠣᠯᠣᠨᠠ᠂ ᠲᠡᠷᠡ ᠬᠤᠪᠴᠠᠰᠤ ᠪᠠᠨ ᠤᠬᠢᠶᠠᠵᠤ᠂ ᠤᠰᠤᠨ ᠳᠤ ᠪᠡᠶᠡ ᠪᠡᠨ ᠤᠬᠢᠶᠠᠬᠤ ᠶᠣᠰᠣᠲᠠᠢ᠂ ᠦᠳᠡᠰᠢ ᠪᠣᠯᠲᠠᠯᠠ ᠪᠤᠵᠠᠷ ᠪᠠᠢᠬᠤ ᠪᠣᠯᠣᠨᠠ᠃ 28 ᠲᠡᠷᠡ ᠡᠮᠡᠭᠲᠡᠢ ᠭᠣᠭᠣᠵᠢᠳᠠᠰᠤ ᠠᠴᠠ ᠪᠠᠨ ᠡᠳᠡᠭᠡᠷᠡᠵᠦ ᠴᠡᠪᠡᠷᠰᠢᠪᠡᠯ ᠳᠣᠯᠣᠭᠠᠨ ᠬᠣᠨᠣᠭ ᠬᠦᠯᠢᠶᠡᠬᠦ ᠪᠥᠭᠡᠳ ᠡᠭᠦᠨ ᠦ ᠳᠠᠷᠠᠭᠠ ᠯᠠ ᠴᠡᠪᠡᠷ ᠪᠣᠯᠣᠨᠠ᠃ 29 ᠨᠠᠢ᠌ᠮᠠᠳᠠᠬᠢ ᠡᠳᠦᠷ ᠲᠡᠷᠡ ᠪᠡᠷ ᠬᠣᠶᠠᠷ ᠬᠡᠭᠦᠷᠵᠡᠭᠡᠨᠡ᠂ ᠡᠰᠡᠪᠡᠯ ᠲᠠᠭᠲᠠᠭᠠᠨ ᠤ ᠬᠣᠶᠠᠷ ᠳᠡᠭᠳᠡᠭᠡᠬᠡᠢ ᠶᠢ ᠠᠭᠤᠯᠵᠠᠯᠲᠠ ᠶᠢᠨ ᠮᠠᠢᠬᠠᠨ ᠤ ᠡᠭᠦᠳᠡᠨ ᠳᠦ ᠠᠪᠴᠢᠷᠠᠵᠤ ᠲᠠᠬᠢᠯᠴᠢ ᠳᠤ ᠥᠭᠭᠥᠨᠡ᠃ 30 ᠲᠠᠬᠢᠯᠴᠢ ᠨᠢᠭᠡ ᠶᠢ ᠨᠢ ᠨᠢᠭᠦᠯ ᠦᠨ ᠲᠠᠬᠢᠯ᠂ ᠨᠥᠭᠥᠭᠡ ᠶᠢ ᠨᠢ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠪᠣᠯᠭᠠᠨ ᠡᠷᠭᠦᠨᠡ᠃ ᠡᠢᠨ ᠬᠦ ᠲᠠᠬᠢᠯᠴᠢ ᠲᠡᠷᠡ ᠡᠮᠡᠭᠲᠡᠢ ᠶᠢᠨ ᠲᠥᠯᠥᠭᠡ ᠪᠤᠵᠠᠷ ᠭᠣᠭᠣᠵᠢᠳᠠᠰᠤ ᠶᠢᠨ ᠬᠢᠨᠢ ᠤᠯᠠᠮ ᠠᠴᠠ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠬᠡᠯᠲᠦᠷᠢᠭᠦᠯᠦᠯᠭᠡ ᠶᠢ ᠬᠢᠬᠦ ᠪᠣᠯᠣᠨᠠ᠃
31 ᠲᠠ ᠨᠠᠷ ᠲᠡᠢᠨ ᠬᠦ ᠢᠰᠷᠧᠯᠴᠦᠳ ᠢ ᠪᠤᠵᠠᠷ ᠠᠴᠠ ᠨᠢ ᠰᠠᠯᠭᠠ᠃ ᠲᠡᠭᠡᠭᠰᠡᠨ ᠢᠶᠡᠷ ᠲᠡᠳᠡ ᠥᠪᠡᠷᠰᠡᠳ ᠦᠨ ᠢᠶᠠᠨ ᠳᠤᠮᠳᠠᠬᠢ ᠣᠷᠣᠰᠢᠬᠤᠢ ᠶᠢᠨ ᠴᠠᠴᠠᠷ ᠢ ᠮᠢᠨᠢ ᠪᠤᠵᠠᠷᠯᠠᠭᠰᠠᠨ ᠢᠶᠠᠷ ᠢᠶᠠᠨ ᠥᠪᠡᠷᠰᠡᠳ ᠦᠨ ᠢᠶᠠᠨ ᠪᠤᠵᠠᠷ ᠲᠤ ᠦᠬᠦᠬᠦ ᠦᠭᠡᠢ ᠪᠣᠯᠣᠨᠠ》 ᠭᠡᠯᠡ᠃
32 ᠡᠳᠡᠭᠡᠷ ᠨᠢ ᠭᠣᠭᠣᠵᠢᠳᠠᠰᠤ ᠲᠠᠢ ᠬᠥᠮᠦᠰ᠂ ᠲᠤᠬᠠᠢᠯᠠᠪᠠᠯ ᠦᠷᠡ ᠶᠢᠨ ᠰᠢᠩᠭᠡᠨ ᠭᠠᠷᠭᠠᠭᠰᠠᠨ ᠪᠤᠵᠠᠷ ᠡᠷᠡᠭᠲᠡᠢ᠂ 33 ᠰᠠᠷᠠ ᠶᠢᠨ ᠲᠡᠮᠳᠡᠭ ᠢᠷᠡᠭᠰᠡᠨ ᠪᠤᠵᠠᠷ ᠡᠮᠡᠭᠲᠡᠢ᠂ ᠮᠥᠨ ᠭᠣᠭᠣᠵᠢᠳᠠᠰᠤ ᠲᠠᠢ ᠡᠷᠡᠭᠲᠡᠢ᠂ ᠡᠰᠡᠪᠡᠯ ᠡᠮᠡᠭᠲᠡᠢ ᠬᠥᠮᠦᠨ᠂ ᠪᠠᠰᠠ ᠪᠤᠵᠠᠷ ᠡᠮᠡᠭᠲᠡᠢ ᠲᠡᠢ ᠤᠨᠲᠠᠭᠰᠠᠨ ᠡᠷᠡᠭᠲᠡᠢ ᠶᠢᠨ ᠰᠠᠬᠢᠬᠤ ᠬᠠᠤᠯᠢ ᠶᠤᠮ᠃