ᠯᠧᠸᠢ ᠬᠣᠷᠢᠨ ᠨᠢᠭᠡ
ᠲᠠᠬᠢᠯᠴᠢ ᠶᠢᠨ ᠴᠡᠭᠡᠷ
1 ᠶᠣᠬᠣᠸᠠ ᠮᠣᠰᠧ ᠳᠤ ᠠᠢᠯᠠᠳᠤᠨ᠄ 《ᠠᠷᠣᠨ ᠤ ᠬᠥᠪᠡᠭᠦᠳ ᠪᠣᠯᠬᠤ ᠲᠠᠬᠢᠯᠴᠢᠳ ᠲᠤ ᠵᠠᠬᠢ᠄
2 ᠭᠡᠪᠡᠴᠦ ᠥᠪᠡᠷ ᠦᠨ ᠣᠢᠷᠠ ᠶᠢᠨ ᠲᠥᠷᠥᠯ᠂ ᠲᠤᠬᠠᠢᠯᠠᠪᠠᠯ ᠡᠴᠢᠭᠡ ᠡᠬᠡ᠂ ᠬᠦᠦ ᠥᠬᠢᠨ᠂ ᠠᠬᠠ ᠳᠡᠭᠦᠦ ᠪᠡᠨ᠂ 3 ᠮᠥᠨ ᠨᠥᠬᠥᠷ ᠲᠦ ᠭᠠᠷᠤᠭᠠ ᠦᠭᠡᠢ᠂ ᠬᠠᠮᠲᠤ ᠠᠮᠢᠳᠤᠷᠠᠵᠤ ᠪᠠᠢᠭᠠ ᠣᠩ᠋ᠭᠣᠨ ᠡᠭᠡᠴᠢ ᠳᠡᠭᠦᠦ ᠪᠡᠨ ᠦᠬᠦᠭᠰᠡᠨ ᠲᠣᠬᠢᠶᠠᠯᠳᠤᠯ ᠳᠤ᠂ ᠲᠡᠭᠦᠨ ᠦ ᠪᠠᠨ ᠲᠥᠯᠥᠭᠡ ᠪᠤᠵᠠᠷᠲᠤᠵᠤ ᠪᠣᠯᠣᠨᠠ᠃ 4 ᠬᠠᠷᠢᠨ ᠡᠬᠡᠨᠡᠷ ᠦᠨ ᠢᠶᠠᠨ ᠬᠠᠮᠢᠶᠠᠲᠠᠨ ᠤ ᠤᠴᠢᠷ ᠢᠶᠠᠷ ᠪᠡᠶᠡ ᠪᠡᠨ ᠪᠤᠵᠠᠷᠯᠠᠨ ᠭᠤᠲᠤᠭᠠᠵᠤ ᠦᠯᠦ ᠪᠣᠯᠣᠨᠠ᠃ 5 ᠲᠠᠬᠢᠯᠴᠢᠳ ᠲᠣᠯᠣᠭᠠᠢ ᠪᠠᠨ ᠬᠠᠯᠵᠠᠨ ᠪᠣᠯᠭᠠᠨ ᠬᠤᠰᠤᠬᠤ᠂ ᠡᠰᠡᠪᠡᠯ ᠰᠢᠨᠠ ᠶᠢᠨ ᠦᠰᠦ ᠪᠡᠨ ᠬᠤᠰᠤᠬᠤ ᠪᠤᠶᠤ ᠪᠡᠶᠡ ᠪᠡᠨ ᠵᠦᠰᠦᠵᠦ ᠪᠣᠯᠬᠤ ᠦᠭᠡᠢ᠃ 6 ᠲᠠᠬᠢᠯᠴᠢᠳ ᠪᠤᠷᠬᠠᠨ ᠳᠠᠭᠠᠨ ᠠᠷᠢᠭᠤᠨ ᠪᠠᠢᠬᠤ ᠶᠣᠰᠣᠲᠠᠢ᠂ ᠪᠤᠷᠬᠠᠨ ᠤ ᠪᠠᠨ ᠨᠡᠷᠡ ᠶᠢ ᠭᠤᠲᠤᠭᠠᠵᠤ ᠪᠣᠯᠬᠤ ᠦᠭᠡᠢ᠃ ᠲᠡᠳᠡ ᠶᠣᠬᠣᠸᠠ ᠶᠢᠨ ᠭᠠᠯ ᠤᠨ ᠲᠠᠬᠢᠯ ᠬᠢᠭᠡᠳ ᠪᠤᠷᠬᠠᠨ ᠤ ᠪᠠᠨ ᠬᠦᠨᠡᠰᠦ ᠶᠢ ᠡᠷᠭᠦᠳᠡᠭ ᠲᠤᠯᠠ ᠠᠷᠢᠭᠤᠨ ᠪᠠᠢᠬᠤ ᠶᠣᠰᠣᠲᠠᠢ᠃ 7 ᠲᠠᠬᠢᠯᠴᠢᠳ ᠶᠠᠩ᠋ᠬᠠᠨ ᠲᠠᠢ ᠴᠤ᠂ ᠪᠤᠵᠠᠷᠯᠠᠭᠳᠠᠭᠰᠠᠨ ᠡᠮᠡᠭᠲᠡᠢ ᠲᠡᠢ ᠴᠤ᠂ ᠨᠥᠬᠥᠷ ᠡᠴᠡ ᠪᠡᠨ ᠰᠠᠯᠤᠭᠰᠠᠨ ᠡᠮᠡᠭᠲᠡᠢ ᠲᠡᠢ ᠴᠤ ᠭᠡᠷᠯᠡᠵᠦ ᠪᠣᠯᠬᠤ ᠦᠭᠡᠢ᠃ ᠤᠴᠢᠷ ᠨᠢ ᠲᠠᠬᠢᠯᠴᠢ ᠪᠤᠷᠬᠠᠨ ᠳᠠᠭᠠᠨ ᠠᠷᠢᠭᠤᠨ ᠪᠠᠢᠬᠤ ᠪᠠᠷ ᠲᠤᠰᠠᠭᠠᠷᠯᠠᠭᠳᠠᠭᠰᠠᠨ ᠶᠤᠮ᠃ 8 ᠲᠠᠬᠢᠯᠴᠢ ᠶᠢ ᠠᠷᠢᠭᠤᠨ ᠭᠡᠵᠦ ᠦᠵᠡ᠃ ᠪᠤᠷᠬᠠᠨ ᠤ ᠴᠢᠨᠢ ᠬᠦᠨᠡᠰᠦ ᠶᠢ ᠡᠷᠭᠦᠭᠴᠢ ᠨᠢ ᠲᠡᠷᠡ ᠶᠤᠮ᠃ ᠲᠠ ᠨᠠᠷ ᠤᠨ ᠲᠥᠯᠥᠭᠡ ᠴᠤ ᠲᠡᠷᠡ ᠠᠷᠢᠭᠤᠨ ᠪᠠᠢᠬᠤ ᠶᠣᠰᠣᠲᠠᠢ᠃ ᠤᠴᠢᠷ ᠨᠢ ᠶᠣᠬᠣᠸᠠ ᠪᠢ ᠠᠷᠢᠭᠤᠨ ᠪᠥᠭᠡᠳ ᠲᠠ ᠨᠠᠷ ᠢ ᠠᠷᠢᠭᠤᠨ ᠪᠠᠢᠯᠭᠠᠬᠤ ᠪᠠᠷ ᠲᠤᠰᠠᠭᠠᠷᠯᠠᠭᠰᠠᠨ ᠶᠤᠮ᠃ 9 ᠬᠡᠷᠪᠡ ᠲᠠᠬᠢᠯᠴᠢ ᠶᠢᠨ ᠥᠬᠢᠨ ᠶᠠᠩ᠋ᠬᠠᠨ ᠪᠣᠯᠣᠭᠰᠠᠨ ᠢᠶᠠᠷ ᠢᠶᠠᠨ ᠥᠪᠡᠷ ᠢ ᠪᠠᠨ ᠭᠤᠲᠤᠭᠠᠪᠠᠯ ᠡᠴᠢᠭᠡ ᠪᠡᠨ ᠭᠤᠲᠤᠭᠠᠭᠰᠠᠨ ᠬᠡᠷᠡᠭ ᠪᠥᠭᠡᠳ ᠭᠠᠯ ᠳᠤ ᠰᠢᠲᠠᠭᠠᠭᠳᠠᠬᠤ ᠶᠣᠰᠣᠲᠠᠢ᠃
10 ᠲᠠᠬᠢᠯᠴᠢ ᠠᠬᠠ ᠳᠡᠭᠦᠦ ᠨᠠᠷ ᠤᠨ ᠢᠶᠠᠨ ᠳᠤᠮᠳᠠ ᠠᠴᠠ ᠡᠷᠭᠦᠮᠵᠢᠯᠡᠭᠳᠡᠭᠰᠡᠨ ᠲᠡᠷᠢᠭᠦᠨ ᠲᠠᠬᠢᠯᠴᠢ ᠨᠢ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠡᠨ ᠲᠣᠰᠣᠯᠠᠯᠭᠠᠨ ᠤ ᠲᠣᠰᠣ ᠶᠢ ᠴᠢᠳᠬᠤᠭᠤᠯᠵᠤ᠂ ᠲᠠᠬᠢᠯᠴᠢ ᠶᠢᠨ ᠬᠤᠪᠴᠠᠰᠤ ᠡᠮᠦᠰᠬᠦ ᠪᠡᠷ ᠲᠣᠮᠢᠯᠠᠭᠳᠠᠭᠰᠠᠨ ᠲᠤᠯᠠ ᠦᠰᠦ ᠪᠡᠨ ᠰᠡᠭᠰᠡᠢᠯᠭᠡᠬᠦ ᠪᠤᠶᠤ ᠬᠤᠪᠴᠠᠰᠤ ᠪᠠᠨ ᠤᠷᠠᠵᠤ ᠪᠣᠯᠬᠤ ᠦᠭᠡᠢ᠂ 11 ᠲᠡᠭᠦᠨᠴᠢᠯᠡᠨ ᠶᠠᠮᠠᠷ ᠨᠢᠭᠡᠨ ᠬᠡᠭᠦᠷ ᠲᠦ ᠣᠢᠷᠠᠲᠤᠵᠤ ᠪᠣᠯᠬᠤ ᠦᠭᠡᠢ᠂ ᠡᠴᠢᠭᠡ ᠡᠬᠡ ᠶᠢᠨ ᠢᠶᠠᠨ ᠤᠯᠠᠮ ᠢᠶᠠᠷ ᠴᠤ ᠥᠪᠡᠷ ᠢ ᠪᠠᠨ ᠪᠤᠵᠠᠷᠯᠠᠵᠤ ᠪᠣᠯᠬᠤ ᠦᠭᠡᠢ᠃ 12 ᠲᠡᠷᠡ ᠪᠡᠷ ᠠᠷᠢᠭᠤᠨ ᠭᠠᠵᠠᠷ ᠠᠴᠠ ᠭᠠᠳᠠᠭᠰᠢ ᠭᠠᠷᠴᠤ ᠪᠣᠯᠬᠤ ᠦᠭᠡᠢ᠂ ᠮᠥᠨ ᠪᠤᠷᠬᠠᠨ ᠤ ᠪᠠᠨ ᠠᠷᠢᠭᠤᠨ ᠭᠠᠵᠠᠷ ᠢ ᠭᠤᠲᠤᠭᠠᠵᠤ ᠪᠣᠯᠬᠤ ᠦᠭᠡᠢ᠃ ᠤᠴᠢᠷ ᠨᠢ ᠲᠡᠭᠦᠨ ᠦ ᠪᠤᠷᠬᠠᠨ ᠲᠣᠰᠣᠯᠠᠯᠭᠠᠨ ᠤ ᠲᠣᠰᠣ ᠪᠠᠷ ᠲᠡᠭᠦᠨ ᠢ ᠠᠷᠢᠭᠤᠨ ᠲᠤᠰᠢᠶᠠᠯ ᠳᠤ ᠲᠣᠮᠢᠯᠠᠭᠰᠠᠨ ᠶᠤᠮ᠃ ᠪᠢ ᠪᠣᠯ ᠶᠣᠬᠣᠸᠠ᠃ 13 ᠡᠢᠮᠦ ᠡᠴᠡ ᠲᠡᠷᠡ ᠣᠩ᠋ᠭᠣᠨ ᠥᠬᠢᠨ ᠢ ᠯᠠ ᠡᠬᠡᠨᠡᠷ ᠪᠣᠯᠭᠠᠨ ᠠᠪᠴᠤ ᠪᠣᠯᠣᠨᠠ᠃ 14 ᠬᠠᠷᠢᠨ ᠲᠡᠷᠡ ᠪᠡᠯᠪᠡᠰᠦᠨ ᠡᠬᠡᠨᠡᠷ᠂ ᠰᠠᠯᠤᠭᠰᠠᠨ ᠡᠮᠡᠭᠲᠡᠢ᠂ ᠪᠤᠵᠠᠷᠯᠠᠭᠳᠠᠭᠰᠠᠨ ᠡᠮᠡᠭᠲᠡᠢ᠂ ᠡᠰᠡᠪᠡᠯ ᠶᠠᠩ᠋ᠬᠠᠨ ᠡᠮᠡᠭᠲᠡᠢ ᠶᠢ ᠠᠪᠴᠤ ᠪᠣᠯᠬᠤ ᠦᠭᠡᠢ᠃ ᠲᠡᠷᠡ ᠠᠷᠠᠳ ᠲᠦᠮᠡᠨ ᠦ ᠪᠠᠨ ᠳᠤᠮᠳᠠ ᠠᠴᠠ ᠣᠩ᠋ᠭᠣᠨ ᠥᠬᠢᠨ ᠢ ᠯᠠ ᠡᠬᠡᠨᠡᠷ ᠪᠣᠯᠭᠠᠨ ᠠᠪᠬᠤ ᠶᠣᠰᠣᠲᠠᠢ᠃ 15 ᠡᠰᠡ ᠪᠥᠭᠡᠰᠦ ᠠᠷᠠᠳ ᠲᠦᠮᠡᠨ ᠦ ᠪᠠᠨ ᠳᠤᠮᠳᠠ ᠦᠷᠡ ᠤᠳᠤᠮ ᠢᠶᠠᠨ ᠭᠤᠲᠤᠭᠠᠬᠤ ᠪᠣᠯᠣᠨᠠ᠃ ᠶᠣᠬᠣᠸᠠ ᠪᠢ ᠲᠡᠭᠦᠨ ᠢ ᠠᠷᠢᠭᠤᠨ ᠪᠠᠢᠯᠭᠠᠬᠤ ᠪᠠᠷ ᠲᠤᠰᠠᠭᠠᠷᠯᠠᠭᠰᠠᠨ ᠶᠤᠮ〉》 ᠭᠡᠪᠡ᠃
16 ᠶᠣᠬᠣᠸᠠ ᠮᠣᠰᠧ ᠳᠤ ᠠᠢᠯᠠᠳᠤᠨ᠄ 17 《ᠠᠷᠣᠨ ᠳᠤ ᠵᠠᠬᠢ᠄ ᠴᠢᠨᠦ ᠬᠣᠢᠴᠢ ᠦᠶᠡ ᠶᠢᠨ ᠦᠷᠡ ᠤᠳᠤᠮ ᠠᠴᠠ ᠰᠣᠭᠣᠭ ᠲᠠᠢ ᠨᠢ ᠪᠤᠷᠬᠠᠨ ᠤ ᠪᠠᠨ ᠬᠦᠨᠡᠰᠦ ᠶᠢ ᠡᠷᠭᠦᠬᠦ ᠪᠡᠷ ᠣᠢᠷᠠᠲᠤᠨ ᠢᠷᠡᠵᠦ ᠦᠯᠦ ᠪᠣᠯᠣᠨᠠ᠃ 18 ᠰᠣᠭᠣᠭ ᠲᠠᠢ᠂ ᠣᠢᠷᠠᠲᠤᠨ ᠢᠷᠡᠵᠦ ᠪᠣᠯᠬᠤ ᠦᠭᠡᠢ ᠬᠥᠮᠦᠨ ᠳᠦ᠄ ᠰᠣᠬᠣᠷ᠂ ᠳᠣᠭᠣᠯᠠᠩ᠂ ᠡᠰᠡᠪᠡᠯ ᠰᠡᠲᠡᠷᠬᠡᠢ ᠬᠠᠮᠠᠷ ᠲᠠᠢ᠂ ᠡᠰᠡᠪᠡᠯ ᠢᠯᠡᠭᠦᠦ ᠮᠥᠴᠢ ᠲᠠᠢ᠂ 19 ᠡᠰᠡᠪᠡᠯ ᠬᠤᠭᠤᠷᠠᠭᠰᠠᠨ ᠬᠥᠯ ᠲᠡᠢ ᠪᠤᠶᠤ ᠬᠤᠭᠤᠷᠠᠭᠰᠠᠨ ᠭᠠᠷ ᠲᠠᠢ ᠬᠥᠮᠦᠨ᠂ 20 ᠡᠰᠡᠪᠡᠯ ᠪᠥᠭᠲᠥᠷ᠂ ᠡᠰᠡᠪᠡᠯ ᠣᠳᠣᠢ᠂ ᠡᠰᠡᠪᠡᠯ ᠨᠢᠳᠦᠨ ᠳᠡᠭᠡᠨ ᠴᠠᠭᠠ ᠲᠠᠢ᠂ ᠡᠰᠡᠪᠡᠯ ᠮᠠᠭᠠᠵᠢᠭᠤᠷ ᠲᠠᠢ᠂ ᠡᠰᠡᠪᠡᠯ ᠶᠠᠷᠠ ᠲᠠᠢ᠂ ᠡᠰᠡᠪᠡᠯ ᠭᠡᠮᠲᠦᠭᠰᠡᠨ ᠲᠥᠮᠥᠰᠥᠭ ᠲᠡᠢ ᠬᠥᠮᠦᠨ ᠪᠠᠭᠲᠠᠨᠠ᠃ 21 ᠲᠠᠬᠢᠯᠴᠢ ᠠᠷᠣᠨ ᠤ ᠦᠷᠡ ᠤᠳᠤᠮ ᠠᠴᠠ ᠰᠣᠭᠣᠭ ᠲᠠᠢ ᠬᠥᠮᠦᠨ ᠪᠦᠷᠢ ᠶᠣᠬᠣᠸᠠ ᠳᠤ ᠭᠠᠯ ᠤᠨ ᠲᠠᠬᠢᠯ ᠡᠷᠭᠦᠬᠦ ᠪᠡᠷ ᠣᠢᠷᠠᠲᠤᠨ ᠢᠷᠡᠵᠦ ᠦᠯᠦ ᠪᠣᠯᠣᠨᠠ᠃ ᠰᠣᠭᠣᠭ ᠲᠠᠢ ᠪᠣᠯᠬᠣᠷ ᠪᠤᠷᠬᠠᠨ ᠤ ᠪᠠᠨ ᠬᠦᠨᠡᠰᠦ ᠶᠢ ᠡᠷᠭᠦᠬᠦ ᠪᠡᠷ ᠣᠢᠷᠠᠲᠤᠨ ᠢᠷᠡᠵᠦ ᠪᠣᠯᠬᠤ ᠦᠭᠡᠢ᠃ 22 ᠬᠠᠷᠢᠨ ᠪᠤᠷᠬᠠᠨ ᠤ ᠪᠠᠨ ᠬᠦᠨᠡᠰᠦᠨ ᠦ ᠬᠤᠪᠢ ᠳᠤ ᠠᠷᠢᠭᠤᠨ ᠠᠴᠠ ᠠᠷᠢᠭᠤᠨ ᠪᠣᠯᠣᠨ ᠠᠷᠢᠭᠤᠨ ᠤ ᠠᠯᠢ ᠠᠯᠢ ᠶᠢ ᠨᠢ ᠴᠤ ᠢᠳᠡᠵᠦ ᠪᠣᠯᠣᠨᠠ᠃ 23 ᠭᠠᠭᠴᠠ ᠬᠦ ᠬᠥᠰᠢᠭᠡ ᠶᠢᠨ ᠳᠣᠲᠣᠷᠠ ᠣᠷᠣᠬᠤ ᠪᠤᠶᠤ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠳᠦ ᠣᠢᠷᠠᠲᠤᠵᠤ ᠪᠣᠯᠬᠤ ᠦᠭᠡᠢ᠃ ᠤᠴᠢᠷ ᠨᠢ ᠲᠡᠷᠡ ᠪᠡᠷ ᠰᠣᠭᠣᠭ ᠲᠠᠢ᠃ ᠲᠡᠷᠡ ᠪᠡᠷ ᠠᠷᠢᠭᠤᠨ ᠭᠠᠵᠠᠷ ᠢ ᠮᠢᠨᠢ ᠭᠤᠲᠤᠭᠠᠵᠤ ᠪᠣᠯᠬᠤ ᠦᠭᠡᠢ᠃ ᠶᠣᠬᠣᠸᠠ ᠪᠢ ᠡᠭᠦᠨ ᠢ ᠠᠷᠢᠭᠤᠨ ᠪᠠᠢᠯᠭᠠᠬᠤ ᠪᠠᠷ ᠲᠤᠰᠠᠭᠠᠷᠯᠠᠭᠰᠠᠨ ᠶᠤᠮ〉》 ᠭᠡᠯᠡ᠃ 24 ᠡᠢᠨ ᠬᠦ ᠮᠣᠰᠧ ᠪᠠᠷ ᠠᠷᠣᠨ᠂ ᠲᠡᠭᠦᠨ ᠦ ᠬᠥᠪᠡᠭᠦᠳ ᠪᠣᠯᠣᠨ ᠢᠰᠷᠧᠯᠴᠦᠳ ᠪᠦᠭᠦᠳᠡ ᠳᠦ ᠵᠠᠬᠢᠪᠠ᠃