ᠯᠧᠸᠢ ᠠᠷᠪᠠ
ᠨᠠᠳᠠᠪ᠂ ᠠᠪᠢᠾᠦ᠋ ᠬᠣᠶᠠᠷ ᠤᠨ ᠦᠬᠦᠯ
1 ᠠᠷᠣᠨ ᠤ ᠬᠥᠪᠡᠭᠦᠨ ᠨᠠᠳᠠᠪ᠂ ᠠᠪᠢᠾᠦ᠋ ᠬᠣᠶᠠᠷ ᠥᠪᠡᠷᠰᠡᠳ ᠦᠨ ᠢᠶᠠᠨ ᠪᠣᠢᠫᠣᠷ ᠢ ᠠᠪᠤᠨ ᠳᠣᠲᠣᠷᠠ ᠨᠢ ᠭᠠᠯ ᠬᠢᠭᠡᠳ ᠳᠡᠭᠡᠷᠡ ᠨᠢ ᠤᠲᠤᠯᠭᠠᠲᠤ ᠲᠠᠬᠢᠯ ᠲᠠᠯᠪᠢᠵᠤ᠂ ᠶᠣᠬᠣᠸᠠ ᠶᠢᠨ ᠥᠪᠡᠷᠰᠡᠳ ᠲᠤᠨᠢ ᠲᠤᠰᠢᠶᠠᠭᠠ ᠦᠭᠡᠢ ᠶᠣᠰᠣ ᠪᠤᠰᠤ ᠭᠠᠯ ᠢ ᠲᠡᠭᠦᠨ ᠦ ᠡᠮᠦᠨᠡ ᠡᠷᠭᠦᠭᠰᠡᠨ ᠳᠦ᠂ 2 ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠡᠴᠡ ᠭᠠᠯ ᠭᠠᠷᠴᠤ ᠢᠷᠡᠭᠡᠳ ᠲᠡᠳᠡᠨ ᠢ ᠤᠰᠠᠳᠬᠠᠯᠠ᠃ ᠡᠢᠨ ᠬᠦ ᠲᠡᠳᠡ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠦᠬᠦᠵᠡᠢ᠃ 3 ᠮᠣᠰᠧ ᠠᠷᠣᠨ ᠳᠤ᠄ 《ᠶᠣᠬᠣᠸᠠ ᠠᠢᠯᠠᠳᠤᠨ᠄ 〈ᠨᠠᠳᠠ ᠳᠤ ᠣᠢᠷᠠᠲᠤᠨ ᠢᠷᠡᠭᠰᠡᠳ ᠦᠨ ᠳᠤᠮᠳᠠ ᠪᠢ ᠠᠷᠢᠭᠤᠨ ᠢᠶᠠᠨ ᠢᠯᠡᠷᠬᠡᠶᠢᠯᠡᠵᠦ ᠪᠦᠬᠦ ᠠᠷᠠᠳ ᠤᠨ ᠡᠮᠦᠨᠡ ᠪᠢ ᠴᠣᠭ ᠵᠢᠪᠬᠤᠯᠠᠩ ᠢᠶᠠᠨ ᠬᠠᠷᠠᠭᠤᠯᠤᠨᠠ〉 ᠭᠡᠰᠡᠨ ᠦᠭᠡ ᠡᠨᠡ ᠶᠤᠮ》 ᠭᠡᠬᠦ ᠳᠦ᠂ ᠠᠷᠣᠨ ᠳᠠᠭᠤ ᠦᠭᠡᠢ ᠪᠠᠢᠪᠠ᠃
4 ᠮᠣᠰᠧ ᠪᠠᠷ ᠠᠷᠣᠨ ᠤ ᠠᠪᠠᠭᠠ ᠦᠽᠢᠶᠧᠯ ᠤᠨ ᠬᠥᠪᠡᠭᠦᠳ ᠪᠣᠯᠬᠤ ᠮᠢᠱᠠᠶᠧᠯ᠂ ᠡᠯᠽᠠᠹᠠᠨ ᠨᠠᠷ ᠢ ᠳᠠᠭᠤᠳᠠᠵᠤ᠂ ᠲᠡᠳᠡᠨ ᠳᠦ᠄ 《ᠨᠠᠰᠢ ᠢᠷᠡ᠂ ᠥᠪᠡᠷᠰᠡᠳ ᠦᠨ ᠢᠶᠠᠨ ᠡᠨᠡ ᠬᠠᠮᠢᠶᠠᠲᠠᠳ ᠢ ᠠᠷᠢᠭᠤᠨ ᠭᠠᠵᠠᠷ ᠤᠨ ᠡᠮᠦᠨᠡ ᠡᠴᠡ ᠬᠤᠸᠠᠷᠠᠨ ᠤ ᠭᠠᠳᠠᠨᠠ ᠠᠪᠠᠴᠢᠭᠠᠷᠠᠢ》 ᠭᠡᠰᠡᠨ ᠳᠦ᠂ 5 ᠲᠡᠳᠡ ᠮᠣᠰᠧ ᠶᠢᠨ ᠬᠡᠯᠡᠭᠰᠡᠨ ᠶᠣᠰᠣᠭᠠᠷ ᠢᠷᠡᠵᠦ ᠨᠥᠭᠥᠭᠡ ᠬᠣᠶᠠᠷ ᠢ ᠴᠠᠮᠴᠠ ᠲᠠᠢ ᠨᠢ ᠬᠤᠸᠠᠷᠠᠨ ᠤ ᠭᠠᠳᠠᠨᠠ ᠠᠪᠠᠴᠢᠪᠠ᠃ 6 ᠮᠣᠰᠧ ᠪᠠᠷ ᠠᠷᠣᠨ ᠪᠣᠯᠣᠨ ᠲᠡᠭᠦᠨ ᠦ ᠬᠥᠪᠡᠭᠦᠳ ᠪᠣᠯᠬᠤ ᠡᠯᠧᠶᠠᠽᠡᠷ᠂ ᠢᠲ᠋ᠠᠮᠠᠷ ᠨᠠᠷ᠄ 《ᠲᠠ ᠨᠠᠷ ᠦᠰᠦ ᠪᠡᠨ ᠪᠦᠦ ᠰᠡᠭᠰᠡᠢᠯᠭᠡ᠂ ᠬᠤᠪᠴᠠᠰᠤ ᠪᠠᠨ ᠪᠦᠦ ᠤᠷᠠ᠃ ᠡᠰᠡ ᠲᠡᠭᠡᠪᠡᠯ ᠲᠠ ᠨᠠᠷ ᠴᠤ ᠦᠬᠦᠬᠦ ᠪᠥᠭᠡᠳ ᠪᠦᠬᠦ ᠠᠷᠠᠳ ᠣᠯᠠᠨ ᠤ ᠳᠡᠭᠡᠷᠡ ᠲᠡᠭᠦᠨ ᠦ ᠬᠢᠯᠢᠩ ᠪᠠᠭᠤᠬᠤ ᠪᠣᠯᠣᠨᠠ᠃ ᠬᠠᠷᠢᠨ ᠲᠠ ᠨᠠᠷ ᠤᠨ ᠠᠬᠠ ᠳᠡᠭᠦᠦᠰ ᠪᠣᠯᠬᠤ ᠢᠰᠷᠧᠯ ᠤᠨ ᠠᠢᠯ ᠭᠡᠷ ᠤᠳ ᠤᠨ ᠬᠤᠪᠢ ᠳᠤ᠂ ᠶᠣᠬᠣᠸᠠ ᠶᠢᠨ ᠭᠠᠯ ᠢᠶᠠᠷ ᠤᠰᠠᠳᠬᠠᠭᠰᠠᠨ ᠬᠥᠮᠦᠰ ᠦᠨ ᠬᠣᠢᠨᠠ ᠠᠴᠠ ᠤᠬᠢᠯᠠᠨ ᠭᠠᠰᠢᠭᠤᠳᠠᠵᠤ ᠪᠣᠯᠣᠨᠠ᠃ 7 ᠲᠠ ᠨᠠᠷ ᠠᠭᠤᠯᠵᠠᠯᠲᠠ ᠶᠢᠨ ᠮᠠᠢᠬᠠᠨ ᠤ ᠡᠭᠦᠳᠡᠨ ᠡᠴᠡ ᠭᠠᠳᠠᠭᠰᠢ ᠪᠦᠦ ᠭᠠᠷ᠃ ᠡᠰᠡ ᠲᠡᠭᠡᠪᠡᠯ ᠲᠠ ᠨᠠᠷ ᠴᠤ ᠦᠬᠦᠨᠡ᠃ ᠤᠴᠢᠷ ᠨᠢ ᠲᠠ ᠨᠠᠷ ᠤᠨ ᠳᠡᠭᠡᠷᠡ ᠶᠣᠬᠣᠸᠠ ᠶᠢᠨ ᠲᠣᠰᠣᠯᠠᠯᠭᠠ ᠶᠢᠨ ᠲᠣᠰᠣ ᠪᠠᠢᠨᠠ》 ᠭᠡᠬᠦ ᠳᠦ᠂ ᠲᠡᠳᠡ ᠮᠣᠰᠧ ᠶᠢᠨ ᠦᠭᠡᠨ ᠦ ᠶᠣᠰᠣᠭᠠᠷ ᠦᠢᠯᠡᠳᠪᠡ᠃
8 ᠶᠣᠬᠣᠸᠠ ᠠᠷᠣᠨ ᠳᠤ ᠠᠢᠯᠠᠳᠤᠨ᠄ 9 《ᠴᠢ ᠴᠤ᠂ ᠴᠢᠨᠦ ᠬᠥᠪᠡᠭᠦᠳ ᠴᠤ ᠠᠭᠤᠯᠵᠠᠯᠲᠠ ᠶᠢᠨ ᠮᠠᠢᠬᠠᠨ ᠳᠤ ᠢᠷᠡᠬᠦ ᠳᠡᠭᠡᠨ ᠦᠵᠦᠮ ᠦᠨ ᠳᠠᠷᠠᠰᠤ ᠴᠤ᠂ ᠠᠷᠢᠬᠢ ᠴᠤ ᠤᠤᠭᠤᠵᠤ ᠪᠣᠯᠬᠤ ᠦᠭᠡᠢ᠃ ᠡᠰᠡ ᠲᠡᠭᠡᠪᠡᠯ ᠦᠬᠦᠬᠦ ᠪᠣᠯᠣᠨᠠ᠃ ᠡᠨᠡ ᠨᠢ ᠲᠠ ᠨᠠᠷ ᠤᠨ ᠦᠶᠡ ᠤᠯᠠᠮᠵᠢᠯᠠᠨ ᠰᠠᠬᠢᠬᠤ ᠡᠭᠦᠷᠢᠳᠡ ᠶᠢᠨ ᠶᠣᠰᠣ ᠵᠢᠷᠤᠮ ᠪᠣᠯᠬᠤ ᠶᠤᠮ᠃ 10 ᠲᠠ ᠨᠠᠷ ᠡᠭᠦᠨ ᠢᠶᠡᠷ ᠠᠷᠢᠭᠤᠨ ᠬᠢᠭᠡᠳ ᠵᠢᠷ ᠤᠨ᠂ ᠪᠤᠵᠠᠷ ᠬᠢᠭᠡᠳ ᠴᠡᠪᠡᠷ ᠢ ᠢᠯᠭᠠᠬᠤ ᠪᠥᠭᠡᠳ 11 ᠮᠣᠰᠧ ᠪᠠᠷ ᠳᠠᠮᠵᠢᠭᠤᠯᠤᠨ ᠶᠣᠬᠣᠸᠠ ᠶᠢᠨ ᠠᠢᠯᠠᠳᠤᠭᠰᠠᠨ ᠪᠦᠬᠦ ᠵᠢᠷᠤᠮ ᠢ ᠢᠰᠷᠧᠯᠴᠦᠳ ᠲᠦ ᠰᠤᠷᠭᠠᠬᠤ ᠶᠣᠰᠣᠲᠠᠢ》 ᠭᠡᠯᠡ᠃
12 ᠲᠡᠭᠡᠭᠡᠳ ᠮᠣᠰᠧ ᠪᠠᠷ ᠠᠷᠣᠨ ᠪᠣᠯᠣᠨ ᠲᠡᠭᠦᠨ ᠦ ᠦᠯᠡᠳᠡᠭᠰᠡᠨ ᠬᠥᠪᠡᠭᠦᠳ ᠡᠯᠧᠶᠠᠽᠡᠷ ᠢᠲ᠋ᠠᠮᠠᠷ ᠨᠠᠷ ᠲᠤ᠄ 《ᠶᠣᠬᠣᠸᠠ ᠳᠤ ᠡᠷᠭᠦᠭᠰᠡᠨ ᠭᠠᠯ ᠤᠨ ᠡᠷᠭᠦᠯ ᠤᠳ ᠠᠴᠠ ᠦᠯᠡᠳᠡᠭᠰᠡᠨ ᠢᠳᠡᠭᠡᠨ ᠲᠠᠬᠢᠯ ᠨᠢ ᠠᠷᠢᠭᠤᠨ ᠠᠴᠠ ᠠᠷᠢᠭᠤᠨ ᠪᠣᠯᠬᠣᠷ ᠲᠡᠭᠦᠨ ᠢ ᠠᠪᠴᠤ᠂ ᠢᠰᠭᠡᠭᠦᠷ ᠬᠢᠬᠦ ᠦᠭᠡᠢ ᠪᠠᠷ ᠲᠠᠬᠢᠯ ᠤᠨ ᠰᠢᠷᠡᠭᠡᠨ ᠦ ᠬᠠᠵᠠᠭᠤ ᠳᠤ ᠢᠳᠡᠬᠦ ᠶᠣᠰᠣᠲᠠᠢ᠃ 13 ᠡᠨᠡ ᠨᠢ ᠶᠣᠬᠣᠸᠠ ᠳᠤ ᠡᠷᠭᠦᠭᠰᠡᠨ ᠭᠠᠯ ᠤᠨ ᠡᠷᠭᠦᠯ ᠤᠳ ᠠᠴᠠ ᠣᠯᠣᠭᠰᠠᠨ ᠲᠠ ᠪᠣᠯᠣᠨ ᠲᠠᠨ ᠤ ᠬᠥᠪᠡᠭᠦᠳ ᠦᠨ ᠬᠤᠪᠢ ᠪᠣᠯᠬᠣᠷ ᠲᠠ ᠨᠠᠷ ᠡᠭᠦᠨ ᠢ ᠠᠷᠢᠭᠤᠨ ᠭᠠᠵᠠᠷ ᠲᠤ ᠢᠳᠡᠬᠦ ᠶᠣᠰᠣᠲᠠᠢ᠃ ᠪᠢ ᠲᠡᠢᠮᠦ ᠲᠤᠰᠢᠶᠠᠯ ᠢ ᠠᠪᠤᠭᠰᠠᠨ᠃ 14 ᠭᠡᠪᠡᠴᠦ ᠳᠠᠯᠠᠯᠤᠨ ᠡᠷᠭᠦᠭᠰᠡᠨ ᠡᠪᠴᠢᠭᠦᠦ᠂ ᠡᠰᠡᠪᠡᠯ ᠬᠠᠨᠳᠢᠪ ᠪᠣᠯᠭᠠᠭᠰᠠᠨ ᠭᠤᠶᠠ ᠶᠢᠨ ᠬᠤᠪᠢ ᠳᠤ᠂ ᠲᠠ ᠴᠤ᠂ ᠲᠠᠨ ᠲᠠᠢ ᠬᠠᠮᠲᠤ ᠪᠠᠢᠭᠠ ᠬᠥᠪᠡᠭᠦᠳ ᠥᠬᠢᠳ ᠴᠢᠨᠢ ᠴᠤ ᠴᠡᠪᠡᠷ ᠭᠠᠵᠠᠷ ᠲᠤ ᠢᠳᠡᠵᠦ ᠪᠣᠯᠣᠨᠠ᠃ ᠡᠳᠡᠭᠡᠷ ᠨᠢ ᠢᠰᠷᠧᠯᠴᠦᠳ ᠦᠨ ᠡᠷᠭᠦᠭᠰᠡᠨ ᠡᠪ ᠦᠨ ᠲᠠᠬᠢᠯ ᠤᠳ ᠤᠨ ᠳᠤᠮᠳᠠ ᠠᠴᠠ ᠠᠪᠴᠤ ᠲᠠ ᠨᠠᠷ ᠲᠤ ᠰᠣᠶᠣᠷᠬᠠᠭᠰᠠᠨ ᠲᠠ ᠪᠣᠯᠣᠨ ᠲᠠᠨ ᠤ ᠬᠥᠪᠡᠭᠦᠳ ᠦᠨ ᠬᠤᠪᠢ ᠶᠤᠮ᠃ 15 ᠢᠰᠷᠧᠯᠴᠦᠳ ᠬᠠᠨᠳᠢᠪ ᠤᠨ ᠭᠤᠶᠠ᠂ ᠳᠠᠯᠠᠯᠤᠨ ᠡᠷᠭᠦᠬᠦ ᠡᠪᠴᠢᠭᠦᠦ ᠶᠢ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠤᠨ ᠥᠭᠡᠬᠦᠨ ᠦ ᠬᠠᠮᠲᠤ ᠠᠪᠴᠢᠷᠠᠭᠠᠳ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠳᠠᠯᠠᠯᠬᠤ ᠲᠠᠬᠢᠯ ᠪᠣᠯᠭᠠᠨ ᠳᠠᠯᠠᠯᠬᠤ ᠪᠥᠭᠡᠳ ᠲᠡᠳᠡᠭᠡᠷ ᠨᠢ ᠶᠣᠬᠣᠸᠠ ᠶᠢᠨ ᠲᠤᠰᠢᠶᠠᠭᠰᠠᠨ ᠶᠣᠰᠣᠭᠠᠷ ᠲᠠ ᠪᠣᠯᠣᠨ ᠲᠠᠨ ᠲᠠᠢ ᠬᠠᠮᠲᠤ ᠪᠠᠢᠭᠠ ᠲᠠᠨ ᠤ ᠬᠥᠪᠡᠭᠦᠳ ᠦᠨ ᠪᠠᠢᠩ᠋ᠭᠤ ᠶᠢᠨ ᠬᠤᠪᠢ ᠪᠣᠯᠣᠨᠠ》 ᠭᠡᠪᠡ᠃
16 ᠡᠭᠦᠨ ᠦ ᠳᠠᠷᠠᠭᠠ ᠮᠣᠰᠧ ᠥᠨᠥᠬᠢ ᠨᠢᠭᠦᠯ ᠦᠨ ᠲᠠᠬᠢᠯ ᠤᠨ ᠢᠮᠠᠭᠠ ᠶᠢ ᠬᠢᠴᠢᠶᠡᠩᠭᠦᠢᠯᠡᠨ ᠬᠠᠢᠬᠤ ᠳᠤ᠂ ᠲᠡᠷᠡ ᠨᠢ ᠰᠢᠲᠠᠭᠠᠭᠳᠠᠭᠰᠠᠨ ᠪᠠᠢᠯᠠ︕ ᠲᠡᠢᠮᠦ ᠡᠴᠡ ᠠᠷᠣᠨ ᠤ ᠦᠯᠡᠳᠡᠭᠰᠡᠨ ᠬᠥᠪᠡᠭᠦᠳ ᠡᠯᠧᠶᠠᠽᠡᠷ᠂ ᠢᠲ᠋ᠠᠮᠠᠷ ᠲᠤ ᠠᠭᠤᠷᠯᠠᠨ᠄ 17 《ᠲᠠ ᠨᠠᠷ ᠶᠠᠭᠤᠨ ᠳᠤ ᠥᠨᠥᠬᠢ ᠨᠢᠭᠦᠯ ᠦᠨ ᠲᠠᠬᠢᠯ ᠢ ᠠᠷᠢᠭᠤᠨ ᠭᠠᠵᠠᠷ ᠳᠡᠭᠡᠷᠡ ᠢᠳᠡᠭᠰᠡᠨ ᠦᠭᠡᠢ ᠪᠤᠢ︖ ᠲᠡᠷᠡ ᠪᠣᠯ ᠠᠷᠢᠭᠤᠨ ᠠᠴᠠ ᠠᠷᠢᠭᠤᠨ︕ ᠲᠡᠭᠦᠨ ᠳᠦ ᠨᠡᠢᠲᠡ ᠴᠢᠭᠤᠯᠭᠠᠨ ᠤ ᠭᠡᠮ ᠢ ᠡᠭᠦᠷᠦᠭᠦᠯᠵᠦ᠂ ᠲᠡᠳᠡᠨ ᠦ ᠲᠥᠯᠥᠭᠡ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠭᠡᠮ ᠦᠨ ᠬᠡᠯᠲᠦᠷᠢᠭᠦᠯᠦᠯᠭᠡ ᠶᠢ ᠬᠢᠯᠭᠡᠬᠦ ᠪᠡᠷ ᠪᠤᠷᠬᠠᠨ ᠲᠡᠭᠦᠨ ᠢ ᠲᠠ ᠨᠠᠷ ᠲᠤ ᠰᠣᠶᠣᠷᠬᠠᠭᠰᠠᠨ᠃ 18 ᠬᠠᠷᠠ᠂ ᠲᠡᠭᠦᠨ ᠦ ᠴᠢᠰᠤ ᠶᠢ ᠠᠷᠢᠭᠤᠨ ᠭᠠᠵᠠᠷ ᠤᠨ ᠳᠣᠲᠣᠷᠠ ᠣᠷᠣᠭᠤᠯᠬᠤ ᠦᠭᠡᠢ ᠤᠴᠢᠷ ᠡᠭᠦᠨ ᠢ ᠲᠠ ᠨᠠᠷ ᠮᠢᠨᠦ ᠲᠤᠰᠢᠶᠠᠭᠰᠠᠨ ᠶᠣᠰᠣᠭᠠᠷ ᠠᠷᠢᠭᠤᠨ ᠭᠠᠵᠠᠷ ᠳᠡᠭᠡᠷᠡ ᠵᠠᠪᠠᠯ ᠢᠳᠡᠬᠦ ᠶᠣᠰᠣᠲᠠᠢ ᠪᠠᠢᠭᠰᠠᠨ》 ᠭᠡᠯᠡ᠃ 19 ᠭᠡᠪᠡᠴᠦ ᠠᠷᠣᠨ ᠮᠣᠰᠧ ᠳᠤ᠄ 《ᠬᠠᠷᠠ᠂ ᠶᠠᠭ ᠡᠨᠡ ᠡᠳᠦᠷ ᠯᠠ ᠶᠣᠬᠣᠸᠠ ᠶᠢᠨ ᠡᠮᠦᠨᠡ ᠲᠡᠳᠡ ᠨᠢᠭᠦᠯ ᠦᠨ ᠲᠠᠬᠢᠯ ᠪᠣᠯᠣᠨ ᠰᠢᠲᠠᠭᠠᠯᠭᠠᠲᠤ ᠲᠠᠬᠢᠯ ᠢᠶᠠᠨ ᠡᠷᠭᠦᠬᠦ ᠳᠦ ᠨᠠᠳᠠ ᠳᠤ ᠡᠢᠮᠦ ᠵᠦᠢᠯ ᠲᠣᠬᠢᠶᠠᠯᠳᠤᠭᠰᠠᠨ︕ ᠬᠠᠷᠢᠨ ᠥᠨᠥᠳᠥᠷ ᠪᠢ ᠨᠢᠭᠦᠯ ᠦᠨ ᠲᠠᠬᠢᠯ ᠢ ᠢᠳᠡᠭᠰᠡᠨ ᠢᠶᠡᠷ ᠯᠠ ᠶᠣᠬᠣᠸᠠ ᠶᠢᠨ ᠮᠡᠯᠮᠡᠢ ᠳᠦ ᠲᠠᠭᠠᠯᠠᠯ ᠢ ᠣᠯᠬᠤ ᠪᠠᠢᠭᠰᠠᠨ ᠭᠡᠵᠢ ᠤᠤ︖》 ᠭᠡᠯᠡ᠃ 20 ᠡᠨᠡ ᠨᠢ ᠮᠣᠰᠧ ᠶᠢᠨ ᠰᠣᠨᠣᠷ ᠲᠤ ᠲᠠᠭᠠᠯᠠᠯ ᠢ ᠣᠯᠪᠠ᠃