ᠦᠢᠯᠡᠰ ᠬᠣᠶᠠᠷ
ᠲᠠᠪᠢᠨ ᠡᠳᠦᠷ ᠦᠨ ᠪᠠᠶᠠᠷ ᠢᠶᠠᠷ ᠠᠷᠢᠭᠤᠨ ᠰᠦᠨᠡᠰᠦ ᠪᠠᠭᠤᠭᠰᠠᠨ ᠨᠢ ᠠᠷᠢᠭᠤᠨ ᠰᠦᠨᠡᠰᠦᠨ ᠦ ᠴᠢᠳᠬᠤᠯᠲᠠ
1 ᠲᠠᠪᠢᠨ ᠡᠳᠦᠷ ᠦᠨ ᠪᠠᠶᠠᠷ ᠪᠣᠯᠣᠭᠰᠠᠨ ᠳᠤ᠂ ᠱᠠᠪᠢ ᠨᠠᠷ ᠪᠦᠭᠦᠳᠡᠭᠡᠷ ᠢᠶᠡᠨ ᠨᠢᠭᠡ ᠭᠠᠵᠠᠷ ᠲᠤ ᠪᠠᠢᠲᠠᠯᠠ 2 ᠭᠡᠨᠡᠳᠲᠡ ᠲᠩᠷᠢ ᠡᠴᠡ ᠬᠦᠴᠦᠲᠦ ᠰᠠᠯᠬᠢ ᠬᠥᠳᠡᠯᠬᠦ ᠮᠡᠲᠦ ᠳᠠᠭᠤᠨ ᠭᠠᠷᠴᠤ᠂ ᠲᠡᠳᠡᠨ ᠦ ᠰᠠᠭᠤᠭᠠ ᠭᠡᠷ ᠢ ᠳᠦᠭᠦᠷᠭᠡᠪᠡ᠃ 3 ᠲᠡᠭᠡᠲᠡᠯᠡ ᠭᠠᠯ ᠤᠨ ᠳᠥᠯᠥ ᠰᠠᠯᠠᠭᠠᠯᠠᠭᠳᠠᠭᠰᠠᠨ ᠮᠡᠲᠦ ᠬᠡᠯᠡ ᠨᠦᠭᠦᠳ ᠦᠵᠡᠭᠳᠡᠵᠦ ᠬᠥᠮᠦᠨ ᠪᠦᠷᠢ ᠶᠢᠨ ᠳᠡᠭᠡᠷᠡ ᠲᠤᠰ ᠲᠤᠰ ᠪᠠᠭᠤᠭᠰᠠᠨ ᠳᠤ᠂ 4 ᠲᠡᠳᠡ ᠪᠦᠭᠦᠳᠡᠭᠡᠷ ᠠᠷᠢᠭᠤᠨ ᠰᠦᠨᠡᠰᠦ ᠪᠡᠷ ᠳᠦᠭᠦᠷᠴᠦ᠂ ᠠᠷᠢᠭᠤᠨ ᠰᠦᠨᠡᠰᠦᠨ ᠦ ᠬᠡᠯᠡᠭᠦᠯᠦᠭᠰᠡᠨ ᠥᠭᠡᠷᠡ ᠬᠡᠯᠡ ᠨᠦᠭᠦᠳ ᠢᠶᠡᠷ ᠶᠠᠷᠢᠵᠤ ᠡᠬᠢᠯᠡᠪᠡ᠃
5 ᠲᠡᠷᠡ ᠦᠶᠡ ᠶᠢᠨ ᠶᠧᠷᠦ᠋ᠰᠠᠯᠧᠮ ᠳᠤ᠂ ᠪᠤᠷᠬᠠᠨ ᠠᠴᠠ ᠡᠮᠢᠶᠡᠳᠡᠭ ᠶᠦᠳᠠᠢᠴᠤᠳ ᠲᠩᠷᠢ ᠶᠢᠨ ᠳᠣᠣᠷᠠᠬᠢ ᠤᠯᠤᠰ ᠪᠦᠬᠦᠨ ᠡᠴᠡ ᠢᠷᠡᠭᠡᠳ ᠰᠠᠭᠤᠵᠤ ᠪᠠᠢᠭᠰᠠᠨ᠃ 6 ᠡᠨᠡ ᠳᠠᠭᠤ ᠭᠠᠷᠬᠤ ᠳᠤ ᠣᠯᠠᠨ ᠬᠥᠮᠦᠨ ᠴᠤᠭᠯᠠᠷᠠᠵᠤ ᠮᠡᠩᠳᠡᠭᠦᠷᠡᠵᠡᠭᠡᠪᠡ᠃ ᠶᠠᠭᠤ ᠭᠡᠪᠡᠯ᠂ ᠲᠡᠳᠡ ᠱᠠᠪᠢ ᠨᠠᠷ ᠤᠨ ᠶᠠᠷᠢᠬᠤ ᠶᠢ ᠲᠤᠰ ᠲᠤᠰ ᠤᠨ ᠢᠶᠠᠨ ᠨᠤᠲᠤᠭ ᠤᠨ ᠬᠡᠯᠡ ᠪᠡᠷ ᠰᠣᠨᠣᠰᠣᠭᠰᠠᠨ ᠪᠠᠢᠯᠠ᠃ 7 ᠲᠡᠳᠡ ᠮᠡᠯᠡᠷᠡᠨ ᠭᠠᠢᠬᠠᠵᠤ᠄ 《ᠦᠵᠡᠭᠡᠴᠢ︕ ᠦᠭᠡ ᠶᠠᠷᠢᠵᠤ ᠪᠠᠢᠭᠠ ᠡᠳᠡᠭᠡᠷ ᠬᠥᠮᠦᠰ ᠴᠢᠨᠢ ᠪᠦᠷ ᠭᠠᠯᠢᠯᠠᠶᠠ ᠶᠢᠨ ᠬᠢ ᠪᠢᠰᠢ ᠤᠤ︖ 8 ᠪᠢᠳᠡ ᠶᠠᠭᠠᠬᠢᠬᠤ ᠳᠠᠭᠠᠨ ᠥᠪᠡᠷ ᠥᠪᠡᠷ ᠦᠨ ᠨᠤᠲᠤᠭ ᠤᠨ ᠢᠶᠠᠨ ᠬᠡᠯᠡ ᠪᠡᠷ ᠰᠣᠨᠣᠰᠴᠤ ᠪᠠᠢᠭᠠ ᠶᠤᠮ ᠪᠤᠢ︖ 9 ᠪᠢᠳᠡᠨ ᠦ ᠳᠤᠮᠳᠠ ᠫᠠᠷᠲ᠋ᠢ ᠬᠥᠮᠦᠨ᠂ ᠮᠧᠳᠧ ᠬᠥᠮᠦᠨ᠂ ᠧᠯᠮᠢ ᠬᠥᠮᠦᠨ ᠴᠤ ᠪᠤᠢ᠂ ᠮᠧᠰᠣᠫᠣᠲ᠋ᠠᠮᠢᠶᠠ᠂ ᠶᠦᠳᠠᠢ᠂ ᠺᠠᠫᠠᠳᠣᠺᠢᠶᠠ᠂ ᠫᠣᠨᠲ᠂ ᠠᠽᠢᠶᠠ᠂ 10 ᠹᠷᠦ᠋ᠭᠢᠶᠠ᠂ ᠫᠠᠮᠹᠦ᠋ᠯᠢᠶᠠ᠂ ᠶᠧᠵᠢᠫᠲ᠂ ᠺᠦᠷᠧᠨᠠᠢ ᠶᠢᠨ ᠣᠢᠷᠠᠯᠴᠠᠭᠠᠬᠢ ᠯᠢᠪᠢᠶᠠ ᠶᠢᠨ ᠣᠯᠠᠨ ᠨᠤᠲᠤᠭ ᠲᠤ ᠰᠠᠭᠤᠭᠠ ᠬᠥᠮᠦᠰ ᠴᠤ ᠪᠤᠢ᠂ ᠷᠣᠮᠠ ᠠᠴᠠ ᠢᠷᠡᠭᠰᠡᠨ ᠠᠶᠠᠨᠴᠢᠳ ᠤᠨ ᠳᠣᠲᠣᠷᠠᠬᠢ ᠶᠦᠳᠠᠢᠴᠤᠳ᠂ ᠶᠦᠳᠠᠢ ᠱᠠᠰᠢᠨ ᠳᠤ ᠣᠷᠣᠭᠰᠠᠨ ᠬᠥᠮᠦᠰ ᠴᠤ ᠪᠤᠢ᠂ 11 ᠺᠷᠧᠲ᠋ᠠ ᠬᠥᠮᠦᠨ᠂ ᠠᠷᠠᠪ ᠬᠥᠮᠦᠨ ᠴᠤ ᠪᠤᠢ᠃ ᠪᠢᠳᠡ ᠥᠭᠡᠷᠡ ᠬᠡᠯᠡ ᠨᠦᠭᠦᠳ ᠢᠶᠡᠷ ᠪᠤᠷᠬᠠᠨ ᠤ ᠠᠤᠭᠠ ᠬᠦᠴᠦᠲᠦ ᠦᠢᠯᠡᠰ ᠢ ᠶᠠᠷᠢᠬᠤ ᠶᠢ ᠨᠢ ᠰᠣᠨᠣᠰᠴᠤ ᠪᠠᠢᠭᠠ︕》 ᠭᠡᠵᠡᠭᠡᠪᠡ᠃ 12 ᠪᠦᠭᠦᠳᠡ ᠰᠣᠴᠢᠰᠬᠢᠨ ᠮᠡᠯᠡᠷᠡᠵᠦ᠄ 《ᠶᠠᠭᠤ ᠪᠣᠯᠵᠤ ᠪᠠᠢᠭᠠ ᠨᠢ ᠡᠨᠡ ᠪᠤᠢ︖》 ᠭᠡᠯᠴᠡᠬᠦ ᠳᠦ᠂ 13 ᠪᠠᠰᠠ ᠵᠠᠷᠢᠮ ᠨᠢ ᠳᠣᠭᠣᠭᠢᠯᠠᠨ᠄ 《ᠲᠡᠳᠡ ᠨᠠᠷ ᠰᠢᠨᠡ ᠳᠠᠷᠠᠰᠤᠨ ᠳᠤ ᠰᠣᠭᠲᠣᠭᠰᠠᠨ ᠪᠠᠢᠬᠠ》 ᠭᠡᠪᠡ᠃
ᠲᠠᠪᠢᠨ ᠡᠳᠦᠷ ᠦᠨ ᠪᠠᠶᠠᠷ ᠢ ᠲᠠᠢᠯᠪᠤᠷᠢᠯᠠᠭᠰᠠᠨ ᠨᠢ
14 ᠫᠧᠲ᠋ᠧᠷ ᠠᠷᠪᠠᠨ ᠨᠢᠭᠡᠨ ᠰᠢᠳᠠᠷ ᠱᠠᠪᠢ ᠲᠠᠢ ᠬᠠᠮᠲᠤ ᠵᠣᠭᠰᠣᠵᠤ᠂ ᠥᠨᠳᠥᠷ ᠳᠠᠭᠤᠨ ᠢᠶᠠᠷ᠄ 《ᠶᠦᠳᠠᠢᠴᠤᠳ ᠡ᠂ ᠶᠧᠷᠦ᠋ᠰᠠᠯᠧᠮ ᠳᠤ ᠰᠠᠭᠤᠭᠠ ᠪᠦᠬᠦ ᠬᠥᠮᠦᠨ ᠡ︕ ᠡᠭᠦᠨ ᠢ ᠲᠠ ᠨᠠᠷ ᠲᠤ ᠮᠡᠳᠡᠭᠦᠯᠦᠶᠡ᠂ ᠮᠢᠨᠦ ᠦᠭᠡ ᠶᠢ ᠴᠢᠬᠢ ᠲᠠᠯᠪᠢᠨ ᠰᠣᠨᠣᠰᠣᠭᠠᠷᠠᠢ᠃ 15 ᠲᠠ ᠨᠠᠷ ᠤᠨ ᠪᠣᠳᠣᠭᠰᠠᠨ ᠰᠢᠭ᠋ ᠢᠶᠠᠷ ᠡᠳᠡᠭᠡᠷ ᠬᠥᠮᠦᠰ ᠰᠣᠭᠲᠣᠭᠰᠠᠨ ᠪᠢᠰᠢ᠂ ᠤᠴᠢᠷ ᠨᠢ᠂ ᠣᠳᠣ ᠦᠳᠡ ᠶᠢᠨ ᠡᠮᠦᠨᠡᠬᠢ ᠶᠢᠰᠦᠨ ᠴᠠᠭ ᠪᠣᠯᠵᠤ ᠪᠠᠢᠨᠠ᠃ 16 ᠬᠠᠷᠢᠨ ᠡᠭᠦᠨ ᠦ ᠲᠤᠬᠠᠢ ᠡᠰᠢ ᠦᠵᠡᠭᠦᠯᠦᠭᠴᠢ ᠶᠣᠶᠧᠯ ᠤᠷᠢᠳᠴᠢᠯᠠᠨ ᠶᠠᠷᠢᠭᠰᠠᠨ ᠪᠠᠢᠳᠠᠭ᠄
17 〈ᠪᠤᠷᠬᠠᠨ ᠠᠢᠯᠠᠳᠴᠤ ᠪᠠᠢᠨᠠ᠄ 〔ᠡᠴᠦᠰ ᠦᠨ ᠡᠳᠦᠷ ᠤᠳ ᠲᠤ ᠪᠢ ᠮᠢᠬᠠᠨ ᠪᠡᠶᠡᠲᠦ ᠪᠦᠬᠦᠨ ᠦ ᠳᠡᠭᠡᠷᠡ ᠰᠦᠨᠡᠰᠦ ᠪᠡᠨ ᠴᠢᠳᠬᠤᠨᠠ ᠬᠥᠪᠡᠭᠦᠳ ᠥᠬᠢᠳ ᠴᠢᠨᠢ ᠡᠰᠢ ᠦᠵᠡᠭᠦᠯᠵᠦ ᠵᠠᠯᠠᠭᠤᠰ ᠴᠢᠨᠢ ᠦᠵᠡᠭᠳᠡᠯ ᠦᠵᠡᠵᠦ ᠥᠲᠡᠭᠦᠰ ᠴᠢᠨᠢ ᠵᠡᠭᠦᠳᠦ ᠵᠡᠭᠦᠳᠦᠯᠡᠨᠡ᠃
18 ᠲᠡᠷᠡ ᠡᠳᠦᠷ ᠤᠳ ᠲᠤ ᠪᠢ ᠡᠷᠡᠭᠲᠡᠢ ᠡᠮᠡᠭᠲᠡᠢ ᠵᠠᠷᠤᠴᠠ ᠨᠠᠷ ᠳᠡᠭᠡᠷᠡ ᠪᠡᠨ ᠥᠪᠡᠷ ᠦᠨ ᠰᠦᠨᠡᠰᠦ ᠶᠢ ᠴᠢᠳᠬᠤᠬᠤ ᠲᠤᠯᠠ ᠲᠡᠳᠡ ᠡᠰᠢ ᠦᠵᠡᠭᠦᠯᠬᠦ ᠪᠣᠯᠣᠨᠠ᠃
19 ᠪᠢ ᠪᠠᠰᠠ ᠳᠡᠭᠡᠷᠡ ᠲᠩᠷᠢ ᠳᠤ ᠭᠠᠢᠬᠠᠮᠰᠢᠭ ᠤᠳ ᠢ ᠳᠣᠣᠷᠠ ᠭᠠᠵᠠᠷ ᠲᠤ ᠲᠡᠮᠳᠡᠭ ᠤᠳ ᠢ ᠥᠭᠴᠦ ᠴᠢᠰᠤ᠂ ᠭᠠᠯ᠂ ᠤᠲᠤᠭᠠᠨ ᠪᠠᠭᠠᠨᠠ ᠨᠤᠭᠤᠳ ᠢ ᠦᠵᠡᠭᠦᠯᠦᠨᠡ᠃
20 ᠨᠠᠷᠠ ᠬᠠᠷᠠᠩ᠋ᠭᠤᠢ ᠪᠣᠯᠵᠤ᠂ ᠰᠠᠷᠠ ᠬᠤᠪᠢᠷᠠᠨ ᠴᠢᠰᠤ ᠪᠣᠯᠣᠭᠰᠠᠨ ᠤ ᠳᠠᠷᠠᠭᠠ ᠡᠵᠡᠨ ᠦ ᠠᠭᠤᠤ᠂ ᠰᠦᠷ ᠲᠡᠢ ᠡᠳᠦᠷ ᠢᠷᠡᠨᠡ᠂
21 ᠡᠵᠡᠨ ᠦ ᠨᠡᠷᠡ ᠶᠢ ᠳᠠᠭᠤᠳᠠᠭᠴᠢ ᠪᠣᠯᠭᠠᠨ ᠠᠪᠤᠷᠠᠭᠳᠠᠨᠠ᠃〕〉
22 ᠢᠰᠷᠧᠯᠴᠦᠳ ᠡ᠂ ᠡᠨᠡ ᠦᠭᠡ ᠶᠢ ᠰᠣᠨᠣᠰᠣᠭᠲᠤᠨ︕ ᠪᠤᠷᠬᠠᠨ ᠨᠠᠽᠠᠷᠧᠲ ᠤᠨ ᠢᠰᠦ᠋ᠰ ᠢᠶᠠᠷ ᠳᠠᠮᠵᠢᠭᠤᠯᠤᠨ ᠲᠠ ᠨᠠᠷ ᠤᠨ ᠳᠤᠮᠳᠠ ᠶᠡᠬᠡ ᠬᠦᠴᠦ᠂ ᠰᠣᠳᠣᠨ ᠵᠦᠢᠯ᠂ ᠰᠢᠳᠢ ᠲᠡᠮᠳᠡᠭ ᠦᠢᠯᠡᠳᠴᠦ᠂ ᠲᠡᠭᠦᠨ ᠢ ᠭᠡᠷᠡᠴᠢᠯᠡᠭᠰᠡᠨ ᠢ ᠲᠠ ᠨᠠᠷ ᠮᠡᠳᠡᠨᠡ᠃ 23 ᠪᠤᠷᠬᠠᠨ ᠤ ᠤᠷᠢᠳᠴᠢᠯᠠᠨ ᠮᠡᠳᠡᠵᠦ ᠲᠣᠭᠲᠠᠭᠠᠭᠰᠠᠨ ᠲᠥᠯᠥᠪᠯᠡᠭᠡᠨ ᠦ ᠶᠣᠰᠣᠭᠠᠷ ᠲᠤᠰᠢᠶᠠᠭᠳᠠᠭᠰᠠᠨ ᠲᠡᠭᠦᠨ ᠢ ᠲᠠ ᠨᠠᠷ ᠬᠠᠤᠯᠢ ᠦᠭᠡᠢ ᠬᠥᠮᠦᠰ 4 ᠤᠨ ᠭᠠᠷ ᠢᠶᠠᠷ ᠴᠣᠪᠳᠣᠯᠠᠵᠤ ᠠᠯᠠᠵᠠᠢ᠃ 24 ᠬᠠᠷᠢᠨ ᠪᠤᠷᠬᠠᠨ ᠲᠡᠭᠦᠨ ᠢ ᠦᠬᠦᠯ ᠦᠨ ᠵᠣᠪᠠᠯᠠᠩ ᠠᠴᠠ ᠭᠠᠷᠭᠠᠵᠤ ᠠᠮᠢᠯᠠᠭᠤᠯᠤᠭᠰᠠᠨ ᠶᠤᠮ᠂ ᠦᠬᠦᠯ ᠦᠨ ᠬᠦᠴᠦ ᠲᠡᠭᠦᠨ ᠢ ᠡᠵᠡᠮᠳᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ᠃ 25 ᠳ᠋ᠠᠸᠢᠳ᠋ ᠲᠡᠭᠦᠨ ᠦ ᠲᠤᠬᠠᠢ᠄ 〈ᠡᠵᠡᠨ ᠦᠷᠭᠦᠯᠵᠢ ᠮᠢᠨᠦ ᠡᠮᠦᠨᠡ ᠪᠠᠢᠭᠠ ᠶᠢ ᠪᠢ ᠬᠠᠷᠠᠭᠰᠠᠨ ᠲᠡᠷᠡ ᠮᠢᠨᠦ ᠪᠠᠷᠠᠭᠤᠨ ᠲᠠᠯᠠ ᠳᠤ ᠪᠠᠢᠳᠠᠭ ᠤᠴᠢᠷ ᠠᠴᠠ ᠪᠢ ᠭᠠᠩ᠋ᠬᠤᠬᠤ ᠦᠭᠡᠢ᠃
26 ᠡᠢᠮᠦ ᠡᠴᠡ ᠵᠢᠷᠦᠬᠡ ᠮᠢᠨᠢ ᠪᠠᠶᠠᠷᠯᠠᠨ᠂ ᠬᠡᠯᠡ ᠮᠢᠨᠢ ᠪᠠᠶᠠᠰᠴᠤ ᠪᠡᠶᠡ ᠮᠢᠨᠢ ᠴᠤ ᠨᠠᠢᠳᠠᠪᠤᠷᠢ ᠳᠣᠲᠣᠷᠠ ᠠᠮᠠᠷᠠᠨᠠ᠃
27 ᠤᠴᠢᠷ ᠨᠢ ᠲᠠ ᠠᠮᠢ ᠶᠢ ᠮᠢᠨᠢ ᠦᠬᠦᠭᠰᠡᠳ ᠦᠨ ᠣᠷᠣᠨ ᠳᠤ ᠣᠷᠬᠢᠬᠤ ᠦᠭᠡᠢ ᠠᠷᠢᠭᠤᠨ ᠨᠢᠭᠡᠨ ᠳᠡᠭᠡᠨ ᠢᠯᠵᠢᠷᠡᠯ ᠢ ᠦᠵᠡᠭᠦᠯᠬᠦ ᠦᠭᠡᠢ᠃
28 ᠲᠠ ᠠᠮᠢ ᠶᠢᠨ ᠵᠠᠮ ᠢ ᠨᠠᠳᠠ ᠳᠤ ᠮᠡᠳᠡᠭᠦᠯᠦᠭᠰᠡᠨ ᠲᠠ ᠣᠷᠣᠰᠢᠬᠤᠢ ᠶᠢᠨ ᠢᠶᠠᠨ ᠪᠠᠶᠠᠷ ᠢᠶᠠᠷ ᠨᠠᠮᠠᠶᠢ ᠳᠦᠭᠦᠷᠭᠡᠨᠡ〉 ᠭᠡᠰᠡᠨ
ᠪᠢᠯᠡ᠃
29 ᠠᠬᠠ ᠳᠡᠭᠦᠦ ᠨᠠᠷ ᠡ᠂ ᠡᠪᠦᠭᠡ ᠳᠡᠭᠡᠳᠦ ᠳ᠋ᠠᠸᠢᠳ᠋ ᠤᠨ ᠲᠤᠬᠠᠢ ᠪᠢ ᠪᠠᠲᠤᠲᠠᠢ ᠬᠡᠯᠡᠵᠦ ᠴᠢᠳᠠᠨᠠ᠃ ᠲᠡᠷᠡ ᠨᠥᠭᠴᠢᠵᠦ ᠪᠤᠯᠠᠰᠢᠯᠠᠭᠳᠠᠭᠰᠠᠨ ᠪᠥᠭᠡᠳ ᠪᠤᠯᠠᠰᠢ ᠨᠢ ᠥᠨᠥ ᠪᠣᠯᠲᠠᠯᠠ ᠮᠠᠨ ᠤ ᠡ᠊ᠨᠳᠡ ᠪᠠᠢᠭᠰᠠᠭᠠᠷ᠃ 30 ᠬᠠᠷᠢᠨ ᠲᠡᠷᠡ ᠡᠰᠢ ᠦᠵᠡᠭᠦᠯᠦᠭᠴᠢ ᠪᠣᠯᠬᠣᠷ ᠪᠤᠷᠬᠠᠨ ᠥᠪᠡᠷ ᠲᠤᠨᠢ ᠠᠮᠠᠯᠠᠭᠰᠠᠨ ᠶᠣᠰᠣᠭᠠᠷ ᠢᠶᠠᠨ ᠪᠡᠶᠡ ᠡᠴᠡ ᠨᠢ ᠭᠠᠷᠬᠤ ᠦᠷᠡ ᠬᠣᠢᠴᠢ ᠶᠢ ᠨᠢ ᠥᠪᠡᠷ ᠦᠨ ᠬᠢᠨᠢ ᠰᠡᠨᠲᠢ ᠳᠤ ᠰᠠᠭᠤᠯᠭᠠᠬᠤ ᠶᠢ ᠮᠡᠳᠡᠵᠦ ᠪᠠᠢᠭᠰᠠᠨ ᠪᠥᠭᠡᠳ 31 ᠾᠷᠢᠰᠲ᠋ᠣᠰ ᠤᠨ ᠠᠮᠢᠯᠠᠯᠲᠠ ᠶᠢ ᠤᠭᠲᠤᠨ ᠬᠠᠷᠠᠵᠤ᠂ ᠡᠭᠦᠨ ᠦ ᠲᠤᠬᠠᠢ᠄ 〈ᠲᠡᠷᠡ ᠦᠬᠦᠭᠰᠡᠳ ᠦᠨ ᠣᠷᠣᠨ ᠳᠤ ᠣᠷᠬᠢᠭᠳᠠᠭᠰᠠᠨ ᠦᠭᠡᠢ᠂ ᠮᠢᠬᠠᠨ ᠪᠡᠶᠡ ᠨᠢ ᠢᠯᠵᠢᠷᠡᠭᠰᠡᠨ ᠦᠭᠡᠢ〉 ᠭᠡᠰᠡᠨ ᠶᠤᠮ᠃ 32 ᠡᠨᠡ ᠢᠰᠦ᠋ᠰ ᠢ ᠪᠤᠷᠬᠠᠨ ᠠᠮᠢᠯᠠᠭᠤᠯᠤᠭᠰᠠᠨ ᠪᠥᠭᠡᠳ ᠪᠢᠳᠡ ᠪᠦᠬᠦᠨ ᠲᠡᠷᠡ ᠶᠠᠪᠤᠳᠠᠯ ᠤᠨ ᠭᠡᠷᠡᠴᠢ ᠮᠥᠨ᠃ 33 ᠲᠡᠷᠡ ᠪᠤᠷᠬᠠᠨ ᠤ ᠪᠠᠷᠠᠭᠤᠨ ᠭᠠᠷ ᠲᠤ ᠡᠷᠭᠦᠭᠳᠡᠵᠦ᠂ ᠠᠷᠢᠭᠤᠨ ᠰᠦᠨᠡᠰᠦᠨ ᠦ ᠲᠤᠬᠠᠢ ᠠᠮᠠᠯᠠᠯᠲᠠ ᠶᠢ ᠡᠴᠢᠭᠡ ᠡᠴᠡ ᠪᠡᠨ ᠠᠪᠤᠭᠠᠳ ᠲᠠ ᠨᠠᠷ ᠤᠨ ᠦᠵᠡᠵᠦ ᠰᠣᠨᠣᠰᠴᠤ ᠪᠠᠢᠭᠠ ᠰᠢᠭ᠋ ᠢᠶᠠᠷ ᠠᠷᠢᠭᠤᠨ ᠰᠦᠨᠡᠰᠦ ᠶᠢ ᠪᠠᠭᠤᠯᠭᠠᠭᠰᠠᠨ ᠶᠤᠮ᠃ 34 ᠳ᠋ᠠᠸᠢᠳ᠋ ᠥᠪᠡᠷ ᠢᠶᠡᠨ ᠲᠩᠷᠢ ᠥᠭᠡᠳᠡ ᠭᠠᠷᠤᠭᠠ ᠦᠭᠡᠢ ᠪᠣᠯᠪᠠᠴᠤ ᠶᠠᠷᠢᠬᠤ ᠳᠠᠭᠠᠨ᠄ 〈ᠡᠵᠡᠨ ᠮᠢᠨᠦ ᠡᠵᠡᠨ ᠳᠦ 35 〔ᠪᠢ ᠴᠢᠨᠦ ᠳᠠᠢᠰᠤᠨ ᠨᠤᠭᠤᠳ ᠢ ᠬᠥᠯ ᠦᠨ ᠴᠢᠨᠢ ᠭᠢᠰᠬᠢᠭᠦᠷ ᠪᠣᠯᠭᠠᠬᠤ ᠬᠦᠷᠲᠡᠯᠡ ᠴᠢ ᠮᠢᠨᠦ ᠪᠠᠷᠠᠭᠤᠨ ᠲᠠᠯᠠ ᠳᠤ ᠰᠠᠭᠤᠵᠤ ᠪᠠᠢ〕 ᠭᠡᠵᠦ ᠬᠡᠯᠡᠭᠰᠡᠨ〉 ᠭᠡᠪᠡ᠃ 36 ᠣᠳᠣ ᠪᠦᠬᠦ ᠢᠰᠷᠧᠯ ᠤᠨ ᠬᠢᠨ ᠪᠠᠲᠤᠲᠠᠢ ᠮᠡᠳᠡᠭᠲᠦᠨ᠃ ᠪᠤᠷᠬᠠᠨ ᠲᠠ ᠨᠠᠷ ᠤᠨ ᠵᠠᠭᠠᠯᠮᠠᠢ ᠳᠤ ᠴᠣᠪᠳᠣᠯᠠᠭᠰᠠᠨ ᠲᠡᠷᠡ ᠢᠰᠦ᠋ᠰ ᠢ ᠡᠵᠡᠨ ᠪᠠ ᠾᠷᠢᠰᠲ᠋ᠣᠰ ᠪᠣᠯᠭᠠᠭᠰᠠᠨ ᠶᠤᠮ》 ᠭᠡᠰᠡᠨ ᠪᠠᠢᠨᠠ᠃
ᠠᠩ᠋ᠬᠠᠨ ᠤ ᠴᠢᠭᠤᠯᠭᠠᠨ
37 ᠲᠡᠳᠡ ᠡᠭᠦᠨ ᠢ ᠰᠣᠨᠣᠰᠣᠭᠠᠳ ᠰᠡᠳᠬᠢᠯ ᠡᠮᠵᠡᠭᠯᠡᠵᠦ᠂ ᠫᠧᠲ᠋ᠧᠷ ᠪᠠ ᠪᠤᠰᠤᠳ ᠰᠢᠳᠠᠷ ᠱᠠᠪᠢ ᠨᠠᠷ ᠠᠴᠠ᠄ 《ᠠᠬᠠ ᠳᠡᠭᠦᠦ ᠨᠠᠷ ᠡ᠂ ᠪᠢᠳᠡ ᠶᠠᠭᠠᠬᠢᠬᠤ ᠶᠣᠰᠣᠲᠠᠢ ᠪᠤᠢ︖》 ᠭᠡᠵᠦ ᠠᠰᠠᠭᠤᠭᠰᠠᠨ ᠳᠤ᠂ 38 ᠫᠧᠲ᠋ᠧᠷ᠄ 《ᠭᠡᠮᠰᠢᠵᠡᠭᠡ᠂ ᠬᠥᠮᠦᠨ ᠪᠦᠬᠦᠨ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠤᠨ ᠨᠡᠷᠡ ᠪᠡᠷ ᠤᠬᠢᠶᠠᠯ ᠬᠦᠷᠲᠡᠭᠡᠳ ᠭᠡᠮ ᠨᠢᠭᠦᠯ ᠢᠶᠡᠨ ᠠᠭᠤᠴᠢᠯᠠᠭᠤᠯᠤᠭᠠᠷᠠᠢ᠂ ᠲᠡᠭᠡᠪᠡᠯ ᠲᠠ ᠨᠠᠷ ᠠᠷᠢᠭᠤᠨ ᠰᠦᠨᠡᠰᠦᠨ ᠦ ᠪᠡᠯᠡᠭ ᠢ ᠬᠦᠷᠲᠡᠬᠦ ᠪᠣᠯᠣᠨᠠ᠃ 39 ᠡᠨᠡ ᠠᠮᠠᠯᠠᠯᠲᠠ ᠪᠣᠯ ᠲᠠ ᠨᠠᠷ ᠤᠨ᠂ ᠲᠠ ᠨᠠᠷ ᠤᠨ ᠬᠡᠦᠬᠡᠳ ᠤᠳ ᠪᠠ ᠬᠣᠯᠠ ᠶᠢᠨ ᠪᠦᠬᠦ ᠬᠥᠮᠦᠨ᠂ ᠲᠤᠬᠠᠢᠯᠠᠪᠠᠯ ᠡᠵᠡᠨ ᠪᠤᠷᠬᠠᠨ ᠤ ᠳᠠᠭᠤᠳᠠᠭᠰᠠᠨ ᠬᠥᠮᠦᠨ ᠪᠦᠬᠦᠨ ᠦ ᠬᠢ ᠶᠤᠮ》 ᠭᠡᠵᠡᠢ᠃ 40 ᠡᠭᠦᠨ ᠡᠴᠡ ᠭᠠᠳᠠᠨᠠ᠂ ᠫᠧᠲ᠋ᠧᠷ ᠪᠠᠰᠠ ᠣᠯᠠᠨ ᠦᠭᠡ ᠪᠡᠷ ᠭᠡᠷᠡᠴᠢᠯᠡᠨ ᠢᠳᠬᠠᠵᠤ᠄ 《ᠲᠠ ᠨᠠᠷ ᠡᠨᠡ ᠬᠦ ᠢᠯᠵᠢᠷᠡᠮᠡᠯ ᠦᠶᠡ ᠶᠢᠨ ᠬᠢᠨ ᠡᠴᠡ ᠠᠪᠤᠷᠠᠭᠳᠠᠲᠤᠭᠠᠢ》 ᠭᠡᠯᠡ᠃ 41 ᠡᠢᠨ ᠬᠦ ᠲᠡᠭᠦᠨ ᠦ ᠦᠭᠡ ᠶᠢ ᠬᠦᠯᠢᠶᠡᠨ ᠠᠪᠤᠭᠰᠠᠨ ᠬᠥᠮᠦᠰ ᠤᠬᠢᠶᠠᠯ ᠬᠦᠷᠲᠡᠵᠡᠢ᠃ ᠲᠡᠷᠡ ᠡᠳᠦᠷ ᠭᠤᠷᠪᠠᠨ ᠮᠢᠩ᠋ᠭᠠ ᠭᠠᠷᠤᠢ ᠬᠥᠮᠦᠨ ᠨᠡᠮᠡᠭᠳᠡᠭᠰᠡᠨ ᠪᠠᠢᠯᠠ᠃ 42 ᠲᠡᠳᠡ ᠰᠢᠳᠠᠷ ᠱᠠᠪᠢ ᠨᠠᠷ ᠤᠨ ᠰᠤᠷᠭᠠᠯ᠂ ᠨᠥᠬᠥᠷᠯᠡᠯ᠂ ᠪᠣᠣᠪᠣ ᠬᠤᠪᠢᠶᠠᠯᠴᠠᠬᠤ ᠶᠣᠰᠣ᠂ ᠳᠠᠭᠠᠳᠬᠠᠯ ᠢ ᠪᠠᠷᠢᠮᠲᠠᠯᠠᠭᠰᠠᠭᠠᠷ ᠪᠠᠢᠪᠠ᠃
43 ᠰᠢᠳᠠᠷ ᠱᠠᠪᠢ ᠨᠠᠷ ᠢᠶᠠᠷ ᠳᠠᠮᠵᠢᠨ ᠣᠯᠠᠨ ᠰᠣᠳᠣᠨ ᠵᠦᠢᠯ ᠪᠠ ᠰᠢᠳᠢ ᠲᠡᠮᠳᠡᠭ ᠦᠢᠯᠡᠳᠦᠭᠳᠡᠵᠦ ᠪᠠᠢᠭᠰᠠᠨ ᠲᠤᠯᠠ ᠬᠥᠮᠦᠨ ᠪᠦᠬᠦᠨ ᠠᠢᠳᠠᠰ ᠬᠦᠷᠪᠡ᠃ 44 ᠢᠲᠡᠭᠡᠭᠴᠢᠳ ᠪᠦᠭᠦᠳᠡᠭᠡᠷ ᠬᠠᠮᠲᠤ ᠪᠠᠢᠯᠴᠠᠵᠤ᠂ ᠪᠦᠬᠦ ᠶᠠᠭᠤᠮᠠ ᠪᠠᠨ ᠬᠠᠮᠲᠤ ᠪᠠᠷ ᠡᠵᠡᠮᠰᠢᠵᠦ᠂ 45 ᠡᠳ᠋ ᠬᠥᠷᠥᠩᠭᠡ᠂ ᠪᠠᠢᠭᠠ ᠪᠦᠬᠦᠨ ᠢᠶᠡᠨ ᠬᠤᠳᠠᠯᠳᠤᠭᠠᠳ ᠬᠥᠮᠦᠨ ᠪᠦᠷᠢ ᠶᠢᠨ ᠬᠡᠷᠡᠭᠴᠡᠭᠡᠨ ᠦ ᠬᠢᠨᠢ ᠬᠢᠷᠢ ᠪᠠᠷ ᠬᠤᠪᠢᠶᠠᠵᠤ ᠥᠭᠪᠡ᠃ 46 ᠲᠡᠳᠡ ᠰᠡᠳᠬᠢᠯ ᠨᠢᠭᠡᠳᠦᠨ ᠠᠷᠢᠭᠤᠨ ᠣᠷᠳᠣᠨ ᠳᠤ ᠡᠳᠦᠷ ᠪᠦᠷᠢ ᠪᠠᠢᠩ᠋ᠭᠤ ᠴᠤᠭᠯᠠᠷᠠᠵᠤ᠂ ᠭᠡᠷ ᠭᠡᠷ ᠲᠡᠭᠡᠨ ᠪᠣᠣᠪᠣ ᠬᠤᠪᠢᠶᠠᠯᠴᠠᠨ ᠪᠠᠶᠠᠷ ᠲᠠᠢ᠂ ᠭᠬᠢᠷ ᠦᠭᠡᠢ ᠰᠡᠳᠬᠢᠯ ᠢᠶᠠᠷ ᠬᠣᠭᠣᠯᠠ ᠪᠠᠨ ᠢᠳᠡᠵᠡᠭᠡᠨ᠂ 47 ᠪᠤᠷᠬᠠᠨ ᠢ ᠮᠠᠭᠲᠠᠵᠤ ᠪᠦᠬᠦ ᠠᠷᠠᠳ ᠲᠦᠮᠡᠨ ᠦ ᠰᠠᠢᠰᠢᠶᠠᠯ ᠢ ᠬᠦᠷᠲᠡᠵᠡᠢ᠃ ᠡᠵᠡᠨ ᠠᠪᠤᠷᠠᠭᠳᠠᠭᠰᠠᠳ ᠤᠨ ᠲᠣᠭᠠ ᠶᠢ ᠡᠳᠦᠷ ᠪᠦᠷᠢ ᠨᠡᠮᠡᠭᠳᠡᠭᠦᠯᠦᠭᠰᠡᠭᠡᠷ ᠪᠠᠢᠪᠠ᠃