ᠦᠢᠯᠡᠰ ᠠᠷᠪᠠᠨ ᠨᠠᠢ᠌ᠮᠠ
ᠺᠣᠷᠢᠨᠲ ᠲᠤ
1 ᠡᠭᠦᠨ ᠦ ᠳᠠᠷᠠᠭᠠ᠂ ᠫᠠᠦ᠋ᠯ ᠠᠲ᠋ᠧᠨ ᠡᠴᠡ ᠭᠠᠷᠴᠤ ᠺᠣᠷᠢᠨᠲ ᠲᠤ ᠬᠦᠷᠦᠭᠡᠳ 2 ᠫᠣᠨᠲ ᠲᠤ ᠲᠥᠷᠥᠭᠰᠡᠨ ᠠᠺᠦ᠋ᠯᠠ ᠭᠡᠳᠡᠭ ᠶᠦᠳᠠᠢ ᠬᠥᠮᠦᠨ ᠲᠡᠢ ᠠᠭᠤᠯᠵᠠᠪᠠ᠃ ᠪᠦᠬᠦ ᠶᠦᠳᠠᠢᠴᠤᠳ ᠢ ᠷᠣᠮᠠ ᠠᠴᠠ ᠭᠠᠷ ᠭᠡᠵᠦ ᠺᠯᠠᠦ᠋ᠳᠢ ᠬᠠᠭᠠᠨ ᠵᠠᠬᠢᠭᠰᠠᠨ ᠲᠤᠯᠠ ᠠᠺᠦ᠋ᠯᠠ ᠡᠬᠡᠨᠡᠷ ᠫᠷᠢᠰᠺᠢᠯᠠ ᠶᠢᠨ ᠢᠶᠠᠨ ᠬᠠᠮᠲᠤ ᠢᠲ᠋ᠠᠯᠢ ᠡᠴᠡ ᠰᠠᠶ᠋ᠢᠬᠠᠨ ᠢᠷᠡᠭᠰᠡᠨ ᠠᠵᠢ᠃ ᠫᠠᠦ᠋ᠯ ᠲᠡᠳᠡᠨ ᠦ ᠳᠦ ᠣᠴᠢᠵᠠᠢ᠃ 3 ᠫᠠᠦ᠋ᠯ ᠲᠡᠳᠡᠨ ᠲᠡᠢ ᠠᠳᠠᠯᠢᠬᠠᠨ ᠢᠶᠠᠷ ᠮᠠᠢᠬᠠᠨ ᠬᠢᠳᠡᠭ ᠮᠡᠷᠭᠡᠵᠢᠯ ᠲᠠᠢ ᠲᠤᠯᠠ ᠬᠠᠮᠲᠤ ᠰᠠᠭᠤᠵᠤ ᠠᠵᠢᠯᠯᠠᠪᠠ᠃ 4 ᠠᠮᠠᠷᠠᠯ ᠤᠨ ᠡᠳᠦᠷ ᠪᠣᠯᠭᠠᠨ ᠫᠠᠦ᠋ᠯ ᠬᠤᠷᠠᠯ ᠤᠨ ᠲᠠᠩᠬᠢᠮ ᠳᠤ ᠰᠤᠷᠭᠠᠵᠤ ᠶᠦᠳᠠᠢᠴᠤᠳ ᠪᠠ ᠭᠷᠧᠭᠴᠦᠳ ᠢ ᠢᠳᠬᠠᠳᠠᠭ ᠪᠠᠢᠯᠠ᠃
5 ᠰᠢᠯᠠ ᠪᠣᠯᠣᠨ ᠲᠢᠮᠣᠲ ᠮᠠᠺᠧᠳᠣᠨᠢᠶᠠ ᠠᠴᠠ ᠢᠷᠡᠬᠦ ᠳᠦ᠂ ᠫᠠᠦ᠋ᠯ ᠵᠥᠪᠬᠡᠨ ᠦᠭᠡᠨ ᠳᠦ ᠮᠡᠷᠡᠢᠵᠦ᠂ ᠨᠥᠭᠥᠭᠡ ᠾᠷᠢᠰᠲ᠋ᠣᠰ 18 ᠪᠣᠯ ᠢᠰᠦ᠋ᠰ ᠮᠥᠨ ᠭᠡᠵᠦ ᠶᠦᠳᠠᠢᠴᠤᠳ ᠲᠤ ᠭᠡᠷᠡᠴᠢᠯᠡᠵᠦ ᠪᠠᠢᠪᠠ᠃ 6 ᠶᠦᠳᠠᠢᠴᠤᠳ ᠲᠡᠭᠦᠨ ᠢ ᠡᠰᠡᠷᠭᠦᠴᠡᠵᠦ ᠳᠣᠷᠣᠮᠵᠢᠯᠠᠬᠤ ᠳᠤ᠂ ᠫᠠᠦ᠋ᠯ ᠬᠤᠪᠴᠠᠰᠤ ᠪᠠᠨ ᠰᠡᠭᠰᠦᠷᠦᠨ᠄ 《ᠲᠠ ᠨᠠᠷ ᠤᠨ ᠴᠢᠰᠤ ᠥᠪᠡᠷᠰᠡᠳ ᠦᠨ ᠴᠢᠨᠢ ᠲᠣᠯᠣᠭᠠᠢ ᠳᠡᠭᠡᠷᠡ ᠪᠠᠭᠤᠭ︕ ᠬᠠᠷᠢᠨ ᠪᠢ ᠴᠡᠪᠡᠷ ᠪᠠᠢᠨᠠ᠂ ᠪᠢ ᠣᠳᠣ ᠬᠠᠷᠢᠴᠤᠳ ᠤᠷᠤᠭᠤ ᠣᠴᠢᠨᠠ》 ᠭᠡᠪᠡ᠃ 7 ᠫᠠᠦ᠋ᠯ ᠲᠡᠨᠳᠡ ᠡᠴᠡ ᠭᠠᠷᠴᠤ᠂ ᠪᠤᠷᠬᠠᠨ ᠳᠤ ᠰᠦᠰᠦᠭᠯᠡᠭᠴᠢ ᠲᠢᠲ᠋ᠠᠯ ᠶᠦᠰᠲ ᠭᠡᠳᠡᠭ ᠬᠥᠮᠦᠨ ᠦ ᠭᠡᠷ ᠲᠦ ᠣᠴᠢᠵᠠᠢ᠃ ᠲᠡᠭᠦᠨ ᠦ ᠭᠡᠷ ᠬᠤᠷᠠᠯ ᠤᠨ ᠲᠠᠩᠬᠢᠮ ᠤᠨ ᠬᠠᠵᠠᠭᠤ ᠳᠤ ᠪᠠᠢᠵᠠᠢ᠃ 8 ᠬᠤᠷᠠᠯ ᠤᠨ ᠲᠠᠩᠬᠢᠮ ᠤᠨ ᠠᠬᠠᠯᠠᠭᠴᠢ ᠺᠷᠢᠰᠫ ᠪᠦᠬᠦ ᠭᠡᠷ ᠪᠦᠯᠢ ᠪᠠᠷ ᠢᠶᠠᠨ ᠡᠵᠡᠨ ᠳᠦ ᠢᠲᠡᠭᠡᠭᠰᠡᠨ ᠪᠥᠭᠡᠳ ᠺᠣᠷᠢᠨᠲ ᠤᠨ ᠣᠯᠠᠨ ᠬᠥᠮᠦᠨ ᠴᠤ ᠰᠣᠨᠣᠰᠣᠭᠠᠳ ᠢᠲᠡᠭᠡᠵᠦ ᠤᠬᠢᠶᠠᠯ ᠬᠦᠷᠲᠡᠵᠦ ᠪᠠᠢᠯᠠ᠃ 9 ᠰᠥᠨᠢ ᠨᠢ ᠡᠵᠡᠨ ᠦᠵᠡᠭᠳᠡᠯ ᠢᠶᠡᠷ ᠫᠠᠦ᠋ᠯ ᠳᠤ᠄ 《ᠪᠦᠦ ᠠᠶᠤ︕ ᠶᠠᠷᠢᠭᠠᠳ ᠪᠠᠢ︕ ᠪᠢᠲᠡᠭᠡᠢ ᠳᠤᠭᠤᠢ ᠪᠣᠯ︕ 10 ᠪᠢ ᠴᠢᠮᠠ ᠲᠠᠢ ᠬᠠᠮᠲᠤ ᠪᠠᠢᠨᠠ᠃ ᠬᠡᠨ ᠴᠤ ᠴᠢᠮᠠᠶᠢ ᠳᠠᠭᠠᠷᠢᠨ ᠬᠣᠬᠢᠷᠠᠭᠠᠬᠤ ᠦᠭᠡᠢ᠂ ᠮᠢᠨᠦ ᠠᠷᠠᠳ ᠲᠦᠮᠡᠨ ᠡᠨᠡ ᠬᠣᠲᠠ ᠳᠤ ᠣᠯᠠᠨ ᠪᠤᠢ》 ᠭᠡᠵᠡᠢ᠃ 11 ᠫᠠᠦ᠋ᠯ ᠪᠤᠷᠬᠠᠨ ᠤ ᠦᠭᠡ ᠶᠢ ᠵᠢᠭᠠᠵᠤ ᠲᠡᠳᠡᠨ ᠦ ᠳᠤᠮᠳᠠ ᠵᠢᠯ ᠬᠠᠭᠠᠰ ᠰᠠᠭᠤᠪᠠ᠃
12 ᠭᠠᠯᠢᠣ᠋ ᠠᠺᠠᠢᠶᠠ ᠶᠢᠨ ᠵᠠᠬᠢᠷᠤᠭᠴᠢ ᠪᠠᠢᠬᠤ ᠳᠤ᠂ ᠶᠦᠳᠠᠢᠴᠤᠳ ᠰᠡᠳᠬᠢᠯ ᠨᠢᠭᠡᠳᠦᠨ ᠫᠠᠦ᠋ᠯ ᠢ ᠡᠰᠡᠷᠭᠦᠴᠡᠨ ᠪᠣᠰᠴᠤ ᠰᠢᠭᠦᠬᠦ ᠭᠠᠵᠠᠷ ᠲᠤ ᠠᠪᠠᠴᠢᠭᠠᠳ᠄ 13 《ᠡᠨᠡ ᠬᠥᠮᠦᠨ ᠬᠠᠤᠯᠢ ᠡᠴᠡ ᠭᠠᠳᠠᠭᠤᠷ ᠠᠷᠭᠠ ᠪᠠᠷ ᠪᠤᠷᠬᠠᠨ ᠳᠤ ᠰᠦᠰᠦᠭᠯᠡᠬᠦ ᠶᠢ ᠬᠥᠮᠦᠰ ᠲᠦ ᠢᠳᠬᠠᠵᠤ ᠪᠠᠢᠨᠠ》 ᠭᠡᠵᠡᠢ᠃ 14 ᠫᠠᠦ᠋ᠯ ᠠᠮᠠ ᠨᠡᠭᠡᠭᠡᠬᠦ ᠭᠡᠲᠡᠯᠡ ᠭᠠᠯᠢᠣ᠋᠄ 《ᠶᠦᠳᠠᠢᠴᠤᠳ ᠡ᠂ ᠶᠠᠮᠠᠷ ᠨᠢᠭᠡ ᠭᠡᠮᠲᠦ ᠬᠡᠷᠡᠭ ᠪᠤᠶᠤ ᠵᠢᠭᠰᠢᠭᠦᠷᠢᠲᠡᠢ ᠶᠠᠪᠤᠳᠠᠯ ᠤᠨ ᠲᠠᠯᠠ ᠪᠠᠷ ᠪᠣᠯ ᠪᠢ ᠲᠠ ᠨᠠᠷ ᠤᠨ ᠬᠢ ᠶᠢ ᠰᠣᠨᠣᠰᠬᠤ ᠨᠢ ᠵᠦᠢᠲᠡᠢ᠃ 15 ᠬᠠᠷᠢᠨ ᠦᠭᠡ ᠶᠠᠷᠢᠶᠠ᠂ ᠨᠡᠷᠡ ᠲᠣᠮᠢᠶᠠ ᠪᠤᠶᠤ ᠲᠠ ᠨᠠᠷ ᠤᠨ ᠬᠠᠤᠯᠢ ᠶᠢᠨ ᠠᠰᠠᠭᠤᠳᠠᠯ ᠢᠶᠠᠷ ᠪᠣᠯ ᠲᠠ ᠨᠠᠷ ᠥᠪᠡᠷᠰᠡᠳ ᠢᠶᠡᠨ ᠰᠢᠢᠳᠦᠭᠲᠦᠨ︕ ᠪᠢ ᠡᠢᠮᠦ ᠶᠠᠪᠤᠳᠠᠯ ᠢ ᠰᠢᠭᠦᠬᠦ ᠶᠢ ᠬᠦᠰᠡᠬᠦ ᠦᠭᠡᠢ》 ᠭᠡᠳ 16 ᠲᠡᠳᠡᠨ ᠢ ᠰᠢᠭᠦᠬᠦ ᠭᠠᠵᠠᠷ ᠠᠴᠠ ᠬᠥᠭᠡᠭᠡᠪᠡ᠃ 17 ᠲᠡᠭᠡᠭᠡᠳ ᠬᠥᠮᠦᠰ ᠬᠤᠷᠠᠯ ᠤᠨ ᠲᠠᠩᠬᠢᠮ ᠤᠨ ᠠᠬᠠᠯᠠᠭᠴᠢ ᠰᠣᠰᠲ᠋ᠧᠨᠧ ᠶᠢ ᠪᠠᠷᠢᠵᠤ ᠰᠢᠭᠦᠬᠦ ᠲᠠᠢᠰᠠ ᠶᠢᠨ ᠡᠮᠦᠨᠡ ᠵᠣᠳᠣᠵᠤ ᠡᠬᠢᠯᠡᠪᠡ᠃ ᠬᠠᠷᠢᠨ ᠭᠠᠯᠢᠣ᠋ ᠡᠭᠦᠨ ᠢ ᠣᠭᠲᠣ ᠣᠢᠰᠢᠶᠠᠭᠰᠠᠨ ᠦᠭᠡᠢ᠃
18 ᠫᠠᠦ᠋ᠯ ᠲᠡᠨᠳᠡ ᠨᠡᠯᠢᠶᠡᠳ ᠡᠳᠦᠷ ᠪᠠᠢᠭᠰᠠᠨ ᠢᠶᠠᠨ ᠠᠬᠠ ᠳᠡᠭᠦᠦ ᠨᠠᠷ ᠠᠴᠠ ᠠᠶᠠᠷᠯᠠᠵᠤ ᠫᠷᠢᠰᠺᠢᠯᠠ ᠪᠣᠯᠣᠨ ᠠᠺᠦ᠋ᠯᠠ ᠲᠠᠢ ᠬᠠᠮᠲᠤ ᠣᠩ᠋ᠭᠣᠴᠠ ᠪᠠᠷ ᠰᠢᠷᠢᠶᠠ ᠤᠷᠤᠭᠤ ᠶᠠᠪᠤᠵᠠᠢ᠃ ᠫᠠᠦ᠋ᠯ ᠲᠠᠩ᠋ᠭᠠᠷᠢᠭᠯᠠᠭᠰᠠᠨ ᠤᠴᠢᠷ ᠠᠴᠠ ᠶᠠᠪᠤᠬᠤ ᠶᠢᠨ ᠢᠶᠠᠨ ᠡᠮᠦᠨᠡ ᠺᠧᠨᠬᠧᠷᠢᠶᠠ ᠳᠤ ᠦᠰᠦ ᠪᠡᠨ ᠬᠤᠰᠤᠭᠤᠯᠪᠠ᠃ 19 ᠫᠠᠦ᠋ᠯ ᠲᠡᠷᠡ ᠬᠣᠶᠠᠷ ᠲᠠᠢ ᠬᠠᠮᠲᠤ ᠧᠹᠧᠰ ᠲᠤ ᠬᠦᠷᠦᠭᠡᠳ ᠲᠡᠳᠡᠨ ᠢ ᠦᠯᠡᠳᠡᠭᠡᠵᠦ᠂ ᠬᠤᠷᠠᠯ ᠤᠨ ᠲᠠᠩᠬᠢᠮ ᠳᠤ ᠣᠴᠢᠨ ᠶᠦᠳᠠᠢᠴᠤᠳ ᠲᠤ ᠰᠤᠷᠭᠠᠵᠠᠢ᠃ 20 ᠲᠡᠨᠳᠡᠬᠢ ᠶᠢᠨ ᠬᠢᠨ ᠫᠠᠦ᠋ᠯ ᠢ ᠢᠯᠡᠬᠦᠭᠡᠨ ᠪᠠᠢᠵᠤ ᠪᠠᠢᠭᠠᠷᠠᠢ ᠭᠡᠵᠦ ᠭᠤᠶᠤᠭᠰᠠᠨ ᠳᠤ᠂ ᠲᠡᠷᠡ ᠵᠥᠪᠰᠢᠶᠡᠷᠡᠭᠰᠡᠨ ᠦᠭᠡᠢ᠃ 21 ᠬᠠᠷᠢᠨ ᠲᠡᠳᠡᠨ ᠡᠴᠡ ᠠᠶᠠᠷᠯᠠᠬᠤ ᠳᠠᠭᠠᠨ᠄ 《ᠪᠤᠷᠬᠠᠨ ᠤ ᠲᠠᠭᠠᠯᠠᠯ ᠮᠥᠨ ᠪᠣᠯ ᠪᠢ ᠲᠠᠨ ᠤ ᠡ᠊ᠨᠳᠡ ᠳᠠᠬᠢᠭᠠᠳ ᠢᠷᠡᠨᠡ》 ᠭᠡᠳ ᠣᠩ᠋ᠭᠣᠴᠠ ᠪᠠᠷ ᠧᠹᠧᠰ ᠡᠴᠡ ᠶᠠᠪᠤᠯᠠ᠃
22 ᠫᠠᠦ᠋ᠯ ᠺᠠᠶᠧᠰᠠᠷᠢᠶᠠ ᠳᠤ ᠪᠠᠭᠤᠵᠤ᠂ ᠶᠧᠷᠦ᠋ᠰᠠᠯᠧᠮ ᠳᠤ ᠣᠴᠢᠨ ᠴᠢᠭᠤᠯᠭᠠᠨ ᠤ ᠠᠮᠤᠷ ᠢ ᠡᠷᠢᠭᠡᠳ ᠠᠨᠲ᠋ᠢᠶᠣᠬᠢᠶᠠ ᠳᠤ ᠪᠤᠴᠠᠪᠠ᠃ 23 ᠬᠡᠰᠡᠭ ᠬᠤᠭᠤᠴᠠᠭᠠᠨ ᠤ ᠳᠠᠷᠠᠭᠠ ᠫᠠᠦ᠋ᠯ ᠲᠡᠨᠳᠡ ᠡᠴᠡ ᠭᠠᠷᠴᠤ᠂ ᠭᠠᠯᠠᠲ᠋ᠢᠶᠠ ᠪᠣᠯᠣᠨ ᠹᠷᠦ᠋ᠭᠢᠶᠠ ᠪᠠᠷ ᠳᠠᠷᠠᠭᠠᠯᠠᠨ ᠬᠦᠷᠦᠭᠡᠳ ᠱᠠᠪᠢ ᠨᠠᠷ ᠢ ᠪᠠᠲᠤᠳᠬᠠᠪᠠ᠃
ᠭᠤᠷᠪᠠᠳᠤᠭᠠᠷ ᠤᠳᠠᠭᠠᠨ ᠤ ᠭᠠᠳᠠᠭᠠᠳᠤ ᠠᠶᠠᠯᠠᠯ
24 ᠲᠡᠷᠡ ᠦᠶᠡ ᠳᠦ ᠠᠫᠣᠯᠣ᠋ ᠭᠡᠳᠡᠭ ᠶᠦᠳᠠᠢ ᠬᠥᠮᠦᠨ ᠧᠹᠧᠰ ᠲᠤ ᠢᠷᠡᠵᠡᠢ᠃ ᠲᠡᠷᠡ ᠠᠯᠧᠺᠰᠠᠨᠳ᠋ᠧᠷᠢᠶᠠ ᠳᠤ ᠲᠥᠷᠥᠭᠰᠡᠨ ᠪᠥᠭᠡᠳ ᠬᠡᠯᠡᠮᠡᠭᠡᠢ᠂ ᠠᠷᠢᠭᠤᠨ ᠨᠣᠮ ᠳᠤ ᠨᠡᠪᠲᠡᠷᠬᠡᠢ ᠪᠠᠢᠯᠠ᠃ 25 ᠡᠨᠡ ᠬᠥᠮᠦᠨ ᠡᠵᠡᠨ ᠦ ᠵᠠᠮ ᠢ ᠰᠤᠷᠤᠭᠠᠳ ᠬᠠᠯᠠᠭᠤᠨ ᠰᠡᠳᠬᠢᠯ ᠢᠶᠠᠷ ᠢᠰᠦ᠋ᠰ ᠤᠨ ᠲᠤᠬᠠᠢ ᠵᠥᠪ ᠵᠢᠭᠠᠳᠠᠭ ᠪᠣᠯᠪᠠᠴᠤ ᠶᠣᠬᠠᠨ ᠤ ᠤᠬᠢᠶᠠᠯ ᠢ ᠯᠠ ᠮᠡᠳᠡᠳᠡᠭ ᠪᠠᠢᠵᠠᠢ᠃ 26 ᠲᠡᠷᠡ ᠬᠤᠷᠠᠯ ᠤᠨ ᠲᠠᠩᠬᠢᠮ ᠳᠤ ᠵᠣᠷᠢᠭᠲᠠᠢ ᠶᠠᠷᠢᠵᠤ ᠡᠬᠢᠯᠡᠪᠡ᠂ ᠫᠷᠢᠰᠺᠢᠯᠠ ᠪᠣᠯᠣᠨ ᠠᠺᠦ᠋ᠯᠠ ᠰᠣᠨᠣᠰᠣᠭᠠᠳ ᠭᠡᠷ ᠲᠡᠭᠡᠨ ᠠᠪᠠᠴᠢᠵᠤ ᠪᠤᠷᠬᠠᠨ ᠤ ᠵᠠᠮ ᠢ ᠤᠯᠠᠮ ᠵᠥᠪ ᠲᠠᠢᠯᠪᠤᠷᠢᠯᠠᠵᠤ ᠥᠭᠴᠡᠢ᠃ 27 ᠠᠫᠣᠯᠣ᠋ ᠠᠺᠠᠢᠶᠠ ᠳᠤ ᠣᠴᠢᠬᠤ ᠶᠢ ᠬᠦᠰᠡᠪᠡ᠃ ᠠᠬᠠ ᠳᠡᠭᠦᠦ ᠨᠠᠷ ᠲᠡᠭᠦᠨ ᠢ ᠤᠷᠮᠠᠰᠢᠭᠤᠯᠵᠤ ᠲᠡᠨᠳᠡᠬᠢ ᠶᠢᠨ ᠱᠠᠪᠢ ᠨᠠᠷ ᠲᠤ ᠵᠠᠬᠢᠳᠠᠯ ᠪᠢᠴᠢᠨ ᠤᠭᠲᠤᠭᠤᠯᠵᠠᠢ᠃ ᠲᠡᠷᠡ ᠣᠴᠢᠭᠠᠳ ᠢᠪᠡᠭᠡᠯ ᠢᠶᠡᠷ ᠢᠲᠡᠭᠡᠭᠴᠢᠳ ᠲᠤ ᠶᠡᠬᠡ ᠲᠤᠰᠠ ᠬᠦᠷᠭᠡᠪᠡ᠃ 28 ᠤᠴᠢᠷ ᠨᠢ᠂ ᠲᠡᠷᠡ ᠪᠡᠷ ᠢᠰᠦ᠋ᠰ ᠪᠣᠯ ᠾᠷᠢᠰᠲ᠋ᠣᠰ ᠮᠥᠨ ᠭᠡᠳᠡᠭ ᠢ ᠣᠯᠠᠨ ᠤ ᠡᠮᠦᠨᠡ ᠠᠷᠢᠭᠤᠨ ᠨᠣᠮ ᠤᠨ ᠡᠰᠢᠯᠡᠯ ᠤᠳ ᠢᠶᠠᠷ ᠪᠠᠲᠤᠯᠠᠵᠤ ᠶᠦᠳᠠᠢᠴᠤᠳ ᠢ ᠬᠦᠴᠦᠲᠡᠢ ᠨᠢᠴᠤᠭᠠᠵᠤ ᠪᠠᠢᠪᠠ᠃