ᠦᠢᠯᠡᠰ ᠨᠠᠢ᠌ᠮᠠ
ᠶᠡᠬᠡ ᠬᠠᠪᠴᠢᠯᠭᠠ ᠳᠤ ᠤᠴᠠᠷᠠᠪᠠ
1 ᠲᠡᠭᠦᠨ ᠦ ᠠᠯᠠᠭᠳᠠᠭᠰᠠᠨ ᠢ ᠰᠠᠦ᠋ᠯ ᠴᠤ ᠵᠦᠢᠲᠡᠢ ᠭᠡᠵᠦ ᠦᠵᠡᠵᠦ ᠪᠠᠢᠯᠠ᠃ ᠲᠡᠷᠡ ᠡᠳᠦᠷ ᠶᠧᠷᠦ᠋ᠰᠠᠯᠧᠮ ᠳᠠᠬᠢ ᠴᠢᠭᠤᠯᠭᠠᠨ ᠮᠠᠰᠢ ᠶᠡᠬᠡ ᠬᠠᠪᠴᠢᠯᠭᠠ ᠳᠤ ᠤᠴᠠᠷᠠᠭᠰᠠᠨ ᠲᠤᠯᠠ ᠰᠢᠳᠠᠷ ᠱᠠᠪᠢ ᠡᠴᠡ ᠪᠤᠰᠤᠳ ᠬᠥᠮᠦᠰ ᠴᠥᠮ ᠶᠦᠳᠠᠢ ᠪᠠ ᠰᠠᠮᠠᠷᠢᠶᠠ ᠳᠤ ᠵᠦᠭ ᠵᠦᠭ ᠲᠡᠭᠡᠨ ᠲᠠᠷᠬᠠᠵᠠᠢ᠃ 2 ᠪᠤᠷᠬᠠᠨ ᠠᠴᠠ ᠡᠮᠢᠶᠡᠳᠡᠭ ᠬᠥᠮᠦᠰ ᠰᠲ᠋ᠧᠹᠠᠨ ᠢ ᠣᠷᠣᠰᠢᠭᠤᠯᠤᠭᠠᠳ ᠲᠡᠭᠦᠨ ᠦ ᠬᠣᠢᠨᠠ ᠠᠴᠠ ᠶᠡᠬᠡᠳᠡ ᠭᠠᠰᠢᠭᠤᠳᠠᠪᠠ᠃ 3 ᠬᠠᠷᠢᠨ ᠰᠠᠦ᠋ᠯ ᠠᠢᠯ ᠤᠳ ᠢᠶᠠᠷ ᠣᠷᠣᠵᠤ ᠴᠢᠭᠤᠯᠭᠠᠨ ᠢ ᠬᠥᠨᠥᠭᠡᠵᠦ ᠡᠬᠢᠯᠡᠪᠡ᠂ ᠲᠡᠷᠡ ᠡᠷᠡᠭᠲᠡᠢ ᠡᠮᠡᠭᠲᠡᠢ ᠢᠯᠭᠠᠯ ᠦᠭᠡᠢ ᠴᠢᠷᠴᠦ ᠭᠠᠷᠭᠠᠨ ᠭᠢᠨᠳᠠᠨ ᠳᠤ ᠲᠤᠰᠢᠶᠠᠳᠠᠭ ᠪᠠᠢᠯᠠ᠃
ᠪᠠᠶᠠᠷ ᠤᠨ ᠮᠡᠳᠡᠭᠡ ᠰᠠᠮᠠᠷᠢᠶᠠ ᠳᠤ ᠲᠠᠷᠬᠠᠪᠠ
4 ᠲᠡᠢᠨ ᠬᠦ ᠲᠠᠷᠬᠠᠭᠰᠠᠨ ᠬᠥᠮᠦᠰ ᠪᠠᠶᠠᠷ ᠤᠨ ᠮᠡᠳᠡᠭᠡ ᠶᠢ ᠤᠯᠠᠮᠵᠢᠯᠠᠵᠤ ᠡ᠊ᠨᠳᠡ ᠲᠡᠨᠳᠡ ᠦᠭᠡᠢ ᠶᠠᠪᠤᠵᠠᠢ᠃ 5 ᠹᠢᠯᠢᠫ ᠰᠠᠮᠠᠷᠢᠶᠠ ᠬᠣᠲᠠ ᠳᠤ ᠣᠴᠢᠵᠤ᠂ ᠬᠥᠮᠦᠰ ᠲᠦ ᠾᠷᠢᠰᠲ᠋ᠣᠰ ᠢ ᠲᠤᠩ᠋ᠬᠠᠭᠯᠠᠵᠠᠢ᠃ 6 ᠣᠯᠠᠨ ᠬᠥᠮᠦᠨ ᠹᠢᠯᠢᠫ ᠤᠨ ᠦᠭᠡ ᠶᠢ ᠰᠣᠨᠣᠰᠴᠤ᠂ ᠦᠢᠯᠡᠳᠦᠭᠰᠡᠨ ᠰᠢᠳᠢ ᠲᠡᠮᠳᠡᠭ ᠤᠳ ᠢ ᠨᠢ ᠦᠵᠡᠵᠦ᠂ ᠲᠡᠭᠦᠨ ᠦ ᠶᠠᠷᠢᠬᠤ ᠵᠦᠢᠯ ᠳᠤ ᠪᠦᠭᠦᠳᠡᠭᠡᠷ ᠠᠩ᠋ᠬᠠᠷᠤᠯ ᠲᠠᠯᠪᠢᠳᠠᠭ ᠪᠠᠢᠪᠠ᠃ 7 ᠣᠯᠠᠨ ᠬᠥᠮᠦᠨ ᠳᠦ ᠣᠷᠣᠰᠢᠭᠰᠠᠨ ᠪᠤᠵᠠᠷ ᠴᠢᠳᠬᠥᠷ ᠤᠳ ᠴᠢᠩᠭ᠍ᠠ ᠳᠠᠭᠤᠨ ᠢᠶᠠᠷ ᠬᠠᠰᠬᠢᠷᠴᠤ ᠵᠠᠢᠯᠠᠭᠰᠠᠨ ᠪᠥᠭᠡᠳ ᠣᠯᠠᠨ ᠰᠠ ᠡᠪᠡᠳᠴᠢᠲᠡᠨ ᠪᠠ ᠳᠣᠭᠣᠯᠠᠩ ᠬᠥᠮᠦᠰ ᠴᠤ ᠡᠳᠡᠭᠡᠷᠡᠭᠰᠡᠨ ᠶᠤᠮ᠃ 8 ᠲᠡᠢᠨ ᠬᠦ ᠲᠡᠷᠡ ᠬᠣᠲᠠ ᠶᠢᠨ ᠬᠢᠨ ᠮᠠᠰᠢ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ ᠲᠠᠢ ᠪᠣᠯᠣᠯᠠ᠃
9 ᠲᠡᠷᠡ ᠬᠣᠲᠠ ᠳᠤ ᠰᠢᠮᠣᠨ ᠭᠡᠳᠡᠭ ᠬᠥᠮᠦᠨ ᠪᠠᠢᠵᠠᠢ᠃ ᠶᠧᠯᠸᠢ ᠭᠠᠷᠭᠠᠵᠤ ᠰᠠᠮᠠᠷᠢᠶᠠ ᠶᠢᠨ ᠠᠷᠠᠳ ᠢ ᠭᠠᠢᠬᠠᠭᠤᠯᠤᠨ᠂ ᠥᠪᠡᠷ ᠢ ᠪᠠᠨ ᠠᠭᠤᠤ ᠬᠡᠮᠡᠨ ᠬᠡᠯᠡᠳᠡᠭ ᠪᠠᠢᠵᠠᠢ᠃ 10 ᠲᠡᠳᠡ ᠶᠡᠬᠡ ᠪᠠᠭᠠ ᠢᠯᠭᠠᠯ ᠦᠭᠡᠢ ᠪᠦᠭᠦᠳᠡᠭᠡᠷ ᠢᠶᠡᠨ᠄ 《ᠡᠨᠡ ᠴᠢᠨᠢ ᠪᠤᠷᠬᠠᠨ ᠤ ᠶᠡᠬᠡ ᠴᠢᠳᠠᠯᠲᠠᠨ ᠭᠡᠭᠴᠢ ᠨᠢ ᠪᠠᠢᠨᠠ》 ᠬᠡᠮᠡᠨ ᠲᠡᠭᠦᠨ ᠤᠷᠤᠭᠤ ᠠᠩ᠋ᠬᠠᠷᠤᠯ ᠢᠶᠠᠨ ᠲᠠᠯᠪᠢᠳᠠᠭ ᠪᠠᠢᠪᠠ᠃ 11 ᠲᠡᠷᠡ ᠤᠳᠠᠭᠠᠨ ᠬᠤᠭᠤᠴᠠᠭᠠ ᠪᠠᠷ ᠤᠪᠠᠳᠢᠰ ᠦᠵᠡᠭᠦᠯᠵᠦ ᠬᠥᠮᠦᠨ ᠢ ᠭᠠᠢᠬᠠᠭᠤᠯᠳᠠᠭ ᠲᠤᠯᠠ ᠲᠡᠳᠡ ᠲᠡᠭᠦᠨ ᠢ ᠠᠩ᠋ᠬᠠᠷᠳᠠᠭ ᠪᠠᠢᠵᠠᠢ᠃ 12 ᠬᠠᠷᠢᠨ ᠣᠳᠣ ᠹᠢᠯᠢᠫ ᠪᠤᠷᠬᠠᠨ ᠤ ᠬᠠᠭᠠᠨᠴᠢᠯᠠᠯ ᠪᠠ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠤᠨ ᠨᠡᠷᠡ ᠶᠢᠨ ᠲᠤᠬᠠᠢ ᠪᠠᠶᠠᠷ ᠤᠨ ᠮᠡᠳᠡᠭᠡ ᠶᠢ ᠤᠯᠠᠮᠵᠢᠯᠠᠭᠰᠠᠨ ᠳᠤ᠂ ᠲᠡᠳᠡ ᠲᠡᠭᠦᠨ ᠤ ᠬᠢ ᠶᠢ ᠢᠲᠡᠭᠡᠵᠦ ᠡᠷᠡᠭᠲᠡᠢ ᠡᠮᠡᠭᠲᠡᠢ ᠢᠯᠭᠠᠯ ᠦᠭᠡᠢ ᠤᠬᠢᠶᠠᠯ ᠬᠦᠷᠲᠡᠵᠦ ᠡᠬᠢᠯᠡᠯᠡ᠃ 13 ᠰᠢᠮᠣᠨ ᠴᠤ ᠢᠲᠡᠭᠡᠪᠡ᠃ ᠲᠡᠷᠡ ᠤᠬᠢᠶᠠᠯ ᠬᠦᠷᠲᠡᠭᠰᠡᠨ ᠦ ᠳᠠᠷᠠᠭᠠ᠂ ᠹᠢᠯᠢᠫ ᠢ ᠳᠠᠭᠠᠭᠰᠠᠭᠠᠷ ᠪᠠᠢᠵᠤ᠂ ᠰᠢᠳᠢ ᠲᠡᠮᠳᠡᠭ ᠪᠠ ᠠᠤᠭᠠ ᠬᠦᠴᠦ ᠶᠢ ᠨᠢ ᠦᠵᠡᠭᠡᠳ ᠭᠠᠢᠬᠠᠵᠤ ᠪᠠᠢᠯᠠ᠃
14 ᠰᠠᠮᠠᠷᠢᠶᠠᠴᠤᠳ ᠪᠤᠷᠬᠠᠨ ᠤ ᠦᠭᠡ ᠶᠢ ᠬᠦᠯᠢᠶᠡᠨ ᠠᠪᠤᠭᠰᠠᠨ ᠢ ᠶᠧᠷᠦ᠋ᠰᠠᠯᠧᠮ ᠳᠤ ᠪᠠᠢᠭᠠ ᠰᠢᠳᠠᠷ ᠱᠠᠪᠢ ᠨᠠᠷ ᠰᠣᠨᠣᠰᠣᠭᠠᠳ ᠫᠧᠲ᠋ᠧᠷ᠂ ᠶᠣᠬᠠᠨ ᠬᠣᠶᠠᠷ ᠢ ᠲᠡᠰᠢ ᠢᠯᠡᠭᠡᠵᠡᠢ᠃ 15 ᠲᠡᠷᠡ ᠬᠣᠶᠠᠭᠤᠯᠠ ᠬᠦᠷᠦᠭᠡᠳ ᠠᠷᠢᠭᠤᠨ ᠰᠦᠨᠡᠰᠦ ᠬᠦᠷᠲᠡᠭᠡᠰᠡᠢ ᠭᠡᠵᠦ ᠰᠠᠮᠠᠷᠢᠶᠠᠴᠤᠳ ᠤᠨ ᠲᠥᠯᠥᠭᠡ ᠳᠠᠭᠠᠳᠬᠠᠪᠠ᠃ 16 ᠤᠴᠢᠷ ᠨᠢ᠂ ᠲᠡᠳᠡᠨ ᠦ ᠬᠡᠨ ᠳᠦᠨᠢ ᠴᠤ ᠠᠷᠢᠭᠤᠨ ᠰᠦᠨᠡᠰᠦ ᠬᠠᠷᠠᠬᠠᠨ ᠪᠠᠭᠤᠭᠠ ᠦᠭᠡᠢ᠂ ᠲᠡᠳᠡ ᠵᠥᠪᠬᠡᠨ ᠡᠵᠡᠨ ᠢᠰᠦ᠋ᠰ ᠤᠨ ᠨᠡᠷᠡ ᠪᠡᠷ 6 ᠤᠬᠢᠶᠠᠯ ᠬᠦᠷᠲᠡᠭᠰᠡᠨ ᠲᠡᠳᠦᠢ ᠪᠠᠢᠪᠠ᠃ 17 ᠲᠡᠢᠮᠦ ᠡᠴᠡ ᠬᠣᠶᠠᠷ ᠱᠠᠪᠢ ᠲᠡᠳᠡᠨ ᠦ ᠳᠡᠭᠡᠷᠡ ᠭᠠᠷ ᠢᠶᠠᠨ ᠲᠠᠯᠪᠢᠭᠰᠠᠨ ᠳᠤ᠂ ᠲᠡᠳᠡ ᠠᠷᠢᠭᠤᠨ ᠰᠦᠨᠡᠰᠦ ᠬᠦᠷᠲᠡᠵᠡᠢ᠃ 18 ᠰᠢᠳᠠᠷ ᠱᠠᠪᠢ ᠨᠠᠷ ᠭᠠᠷ ᠢᠶᠠᠨ ᠲᠠᠯᠪᠢᠩ᠋ᠭᠤᠲᠠ ᠬᠥᠮᠦᠰ ᠠᠷᠢᠭᠤᠨ ᠰᠦᠨᠡᠰᠦ ᠬᠦᠷᠲᠡᠵᠦ ᠪᠠᠢᠬᠤ ᠶᠢ ᠰᠢᠮᠣᠨ ᠦᠵᠡᠭᠡᠳ᠂ ᠲᠡᠳᠡᠨ ᠳᠦ ᠵᠣᠭᠣᠰ ᠥᠭᠴᠦ᠄ 19 《ᠨᠠᠳᠠ ᠳᠤ ᠴᠤ ᠡᠨᠡ ᠡᠷᠬᠡ ᠶᠢ ᠥᠭᠭᠥᠭᠡᠴᠢ᠃ ᠲᠡᠭᠡᠪᠡᠯ ᠨᠠᠳᠠ ᠪᠠᠷ ᠭᠠᠷ ᠲᠠᠯᠪᠢᠭᠤᠯᠤᠭᠰᠠᠨ ᠬᠥᠮᠦᠨ ᠪᠣᠯᠭᠠᠨ ᠠᠷᠢᠭᠤᠨ ᠰᠦᠨᠡᠰᠦ ᠬᠦᠷᠲᠡᠨᠡ ᠳᠠ》 ᠭᠡᠰᠡᠨ ᠳᠦ᠂ 20 ᠫᠧᠲ᠋ᠧᠷ᠄ 《ᠵᠣᠭᠣᠰ ᠴᠢᠨᠢ ᠴᠢᠮᠠ ᠲᠠᠢ ᠬᠠᠮᠲᠤ ᠮᠥᠬᠥᠭ᠃ ᠴᠢ ᠪᠤᠷᠬᠠᠨ ᠤ ᠪᠡᠯᠡᠭ ᠢ ᠵᠣᠭᠣᠰ ᠢᠶᠠᠷ ᠢᠶᠠᠨ ᠬᠤᠳᠠᠯᠳᠤᠨ ᠠᠪᠴᠢᠬᠠᠨᠠ ᠭᠡᠵᠦ ᠪᠣᠳᠣᠳᠠᠭ ᠶᠤᠮ ᠪᠠᠢᠨᠠ᠃ 21 ᠪᠤᠷᠬᠠᠨ ᠤ ᠡᠮᠦᠨᠡ ᠰᠡᠳᠬᠢᠯ ᠴᠢᠨᠢ ᠰᠢᠳᠤᠷᠭᠤ ᠪᠤᠰᠤ ᠪᠣᠯᠬᠣᠷ ᠡᠨᠡ ᠶᠠᠪᠤᠳᠠᠯ ᠳᠤ ᠴᠢᠨᠦ ᠬᠤᠪᠢ ᠬᠦᠷᠲᠡᠮᠵᠢ ᠪᠠᠢᠬᠤ ᠦᠭᠡᠢ᠃ 22 ᠡᠢᠮᠦ ᠡᠴᠡ ᠴᠢ ᠬᠣᠷᠣᠨ ᠮᠠᠭᠤ ᠰᠠᠨᠠᠭᠠᠨ ᠳᠠᠭᠠᠨ ᠭᠡᠮᠰᠢᠵᠦ᠂ ᠡᠵᠡᠨ ᠳᠦ ᠳᠠᠭᠠᠳᠬᠠ᠃ ᠲᠡᠭᠡᠪᠡᠯ ᠳᠣᠲᠣᠷᠠᠬᠢ ᠪᠣᠳᠣᠯ ᠰᠠᠨᠠᠭᠠ ᠴᠢᠨᠢ ᠠᠭᠤᠴᠢᠯᠠᠭᠳᠠᠵᠤ ᠮᠠᠭᠠᠳ᠃ 23 ᠳᠣᠲᠣᠷᠠ ᠴᠢᠨᠢ ᠬᠣᠷᠣ ᠰᠢᠷᠠ ᠪᠠᠷ ᠳᠦᠭᠦᠷᠴᠦ᠂ ᠵᠥᠪ ᠪᠤᠰᠤ ᠶᠠᠪᠤᠳᠠᠯ ᠳᠤ ᠬᠦᠯᠢᠶᠡᠰᠦᠯᠡᠭᠳᠡᠭᠰᠡᠨ ᠢ ᠴᠢᠨᠢ ᠪᠢ ᠬᠠᠷᠠᠵᠤ ᠪᠠᠢᠨᠠ》 ᠭᠡᠰᠡᠨ ᠳᠦ᠂ 24 ᠰᠢᠮᠣᠨ᠄ 《ᠲᠠ ᠨᠠᠷ ᠤᠨ ᠬᠡᠯᠡᠭᠰᠡᠨ ᠵᠦᠢᠯ ᠨᠠᠳᠠ ᠳᠤ ᠪᠦᠦ ᠯᠠ ᠤᠴᠠᠷᠠᠭᠠᠰᠠᠢ ᠭᠡᠵᠦ ᠮᠢᠨᠦ ᠲᠥᠯᠥᠭᠡ ᠳᠠᠭᠠᠳᠬᠠᠵᠤ ᠥᠭᠭᠥᠭᠡᠴᠢ》 ᠭᠡᠵᠦ ᠬᠡᠯᠡᠪᠡ᠃
ᠪᠠᠶᠠᠷ ᠤᠨ ᠮᠡᠳᠡᠭᠡ ᠠᠹᠠᠷᠢᠺᠠ ᠬᠥᠮᠦᠨ ᠳᠦ ᠬᠦᠷᠪᠡ
25 ᠡᠢᠨ ᠬᠦ ᠬᠣᠶᠠᠷ ᠰᠢᠳᠠᠷ ᠱᠠᠪᠢ ᠡᠵᠡᠨ ᠦ ᠦᠭᠡ ᠶᠢ ᠭᠡᠷᠡᠴᠢᠯᠡᠨ ᠶᠠᠷᠢᠭᠰᠠᠨ ᠤ ᠳᠠᠷᠠᠭᠠ᠂ ᠶᠧᠷᠦ᠋ᠰᠠᠯᠧᠮ ᠤᠷᠤᠭᠤ ᠪᠤᠴᠠᠯᠠ᠃ ᠲᠡᠳᠡ ᠵᠠᠮ ᠳᠠᠭᠠᠨ ᠰᠠᠮᠠᠷᠢᠶᠠ ᠶᠢᠨ ᠣᠯᠠᠨ ᠲᠣᠰᠬᠣᠨ ᠢᠶᠠᠷ ᠪᠠᠶᠠᠷ ᠤᠨ ᠮᠡᠳᠡᠭᠡ ᠳᠡᠯᠭᠡᠷᠡᠭᠦᠯᠵᠡᠢ᠃
26 ᠡᠵᠡᠨ ᠦ ᠨᠢᠭᠡᠨ ᠡᠯᠴᠢ ᠹᠢᠯᠢᠫ ᠲᠤ᠄ 《ᠪᠣᠰ᠂ ᠶᠧᠷᠦ᠋ᠰᠠᠯᠧᠮ ᠡᠴᠡ ᠭᠠᠽᠠ ᠳᠤ ᠬᠦᠷᠬᠦ ᠴᠥᠯ ᠦᠨ ᠵᠠᠮ ᠢᠶᠠᠷ ᠡᠮᠦᠨᠡᠰᠢ ᠶᠠᠪᠤ》 ᠭᠡᠵᠦ ᠬᠡᠯᠡᠭᠰᠡᠨ ᠳᠦ᠂ 27 ᠹᠢᠯᠢᠫ ᠪᠣᠰᠣᠭᠠᠳ ᠶᠠᠪᠤᠬᠤ ᠳᠠᠭᠠᠨ ᠡᠲ᠋ᠢᠶᠤᠫᠢᠶᠠ ᠶᠢᠨ ᠨᠢᠭᠡ ᠬᠥᠮᠦᠨ ᠲᠡᠢ ᠲᠠᠭᠠᠷᠠᠯᠳᠤᠵᠠᠢ᠃ ᠲᠡᠷᠡ ᠪᠣᠯ ᠡᠲ᠋ᠢᠶᠤᠫᠢᠶᠠ ᠶᠢᠨ ᠬᠠᠲᠤᠨ ᠬᠠᠭᠠᠨ ᠺᠠᠨᠳᠠᠺᠧ ᠶᠢᠨ ᠪᠦᠬᠦ ᠬᠥᠷᠥᠩᠭᠡ ᠶᠢ ᠬᠠᠷᠢᠭᠤᠴᠠᠳᠠᠭ ᠡᠷᠬᠡ ᠮᠡᠳᠡᠯ ᠶᠡᠬᠡᠲᠡᠢ ᠲᠠᠢᠭᠠᠨ ᠲᠦᠰᠢᠮᠡᠯ ᠪᠠᠢᠵᠠᠢ᠃ ᠲᠡᠷᠡ ᠶᠧᠷᠦ᠋ᠰᠠᠯᠧᠮ ᠳᠤ ᠮᠥᠷᠭᠥᠯ ᠬᠢᠬᠦ ᠪᠡᠷ ᠣᠴᠢᠭᠠᠳ 28 ᠪᠤᠴᠠᠬᠤ ᠵᠠᠮ ᠳᠠᠭᠠᠨ ᠮᠣᠷᠢᠨ ᠲᠡᠷᠭᠡᠨ ᠳᠡᠭᠡᠷᠡ ᠪᠡᠨ ᠡᠰᠢ ᠦᠵᠡᠭᠦᠯᠦᠭᠴᠢ ᠢᠰᠠᠢᠶᠠ ᠶᠢᠨ ᠨᠣᠮ ᠢ ᠤᠩ᠋ᠰᠢᠵᠤ ᠪᠠᠢᠵᠠᠢ᠃ 29 ᠠᠷᠢᠭᠤᠨ ᠰᠦᠨᠡᠰᠦ ᠹᠢᠯᠢᠫ ᠲᠤ᠄ 《ᠲᠡᠷᠡ ᠲᠡᠷᠭᠡᠨ ᠳᠦ ᠣᠢᠷᠠᠲᠤᠵᠤ ᠣᠴᠢ》 ᠭᠡᠯᠡ᠃ 30 ᠹᠢᠯᠢᠫ ᠲᠡᠰᠢ ᠪᠠᠨ ᠭᠦᠶᠦᠬᠦ ᠳᠡᠭᠡᠨ ᠲᠠᠢᠭᠠᠨ ᠤ ᠡᠰᠢ ᠦᠵᠡᠭᠦᠯᠦᠭᠴᠢ ᠢᠰᠠᠢᠶᠠ ᠶᠢᠨ ᠨᠣᠮ ᠢ ᠤᠩ᠋ᠰᠢᠬᠤ ᠶᠢ ᠨᠢ ᠰᠣᠨᠣᠰᠴᠤ᠄ 《ᠲᠠ ᠤᠩ᠋ᠰᠢᠵᠤ ᠪᠠᠢᠭᠠ ᠪᠠᠨ ᠣᠢᠯᠠᠭᠠᠵᠤ ᠪᠠᠢᠭᠠ ᠤᠤ︖》 ᠭᠡᠵᠦ ᠠᠰᠠᠭᠤᠭᠰᠠᠨ ᠳᠤ᠂ 31 ᠲᠠᠢᠭᠠᠨ᠄ 《ᠨᠠᠳᠠ ᠳᠤ ᠲᠠᠢᠯᠪᠤᠷᠢᠯᠠᠵᠤ ᠥᠭᠬᠦ ᠬᠥᠮᠦᠨ ᠪᠠᠢᠬᠤ ᠦᠭᠡᠢ ᠶᠤᠮ ᠴᠢᠨᠢ ᠶᠠᠭᠠᠬᠢᠵᠤ ᠴᠢᠳᠠᠬᠤ ᠪᠢᠯᠡ︖》 ᠭᠡᠵᠦ ᠬᠡᠯᠡᠭᠡᠳ ᠹᠢᠯᠢᠫ ᠢ ᠬᠠᠮᠲᠤ ᠰᠠᠭᠤᠶᠠ ᠭᠡᠵᠦ ᠭᠤᠶᠤᠪᠠ᠃ 32 ᠲᠠᠢᠭᠠᠨ ᠠᠷᠢᠭᠤᠨ ᠨᠣᠮ ᠤᠨ ᠡᠨᠡ ᠬᠡᠰᠡᠭ ᠢ ᠤᠩ᠋ᠰᠢᠵᠤ ᠪᠠᠢᠵᠠᠢ᠄ 《ᠠᠯᠠᠯᠭᠠᠨ ᠳᠤ ᠠᠪᠠᠴᠢᠭᠳᠠᠬᠤ ᠬᠣᠨᠢ ᠰᠢᠭ᠋ ᠬᠢᠷᠭᠠᠭᠴᠢ ᠶᠢᠨ ᠡᠮᠦᠨᠡ ᠳᠤᠤᠭᠠᠷᠬᠤ ᠦᠭᠡᠢ ᠬᠤᠷᠠᠭᠠ ᠰᠢᠭ᠋ ᠲᠡᠷᠡ ᠠᠮᠠ ᠪᠠᠨ ᠨᠡᠭᠡᠭᠡᠭᠰᠡᠨ ᠦᠭᠡᠢ᠃
33 ᠲᠡᠷᠡ ᠪᠠᠰᠤᠮᠵᠢᠯᠠᠭᠳᠠᠵᠤ ᠲᠥᠪ ᠭᠣᠣᠯᠴᠢ ᠰᠢᠭᠦᠯᠲᠡ ᠪᠡᠨ ᠪᠤᠯᠢᠶᠠᠭᠳᠠᠵᠠᠢ ᠲᠡᠭᠦᠨ ᠦ ᠦᠶᠡ ᠶᠢᠨ ᠬᠢᠨ ᠡᠴᠡ ᠬᠡᠨ ᠨᠢ ᠡᠳᠡᠭᠡᠷ ᠢ ᠥᠭᠦᠯᠡᠬᠦ ᠪᠣᠯ︖ ᠲᠡᠭᠦᠨ ᠦ ᠠᠮᠢ ᠭᠠᠵᠠᠷ ᠠᠴᠠ ᠪᠤᠯᠢᠶᠠᠭᠳᠠᠵᠠᠢ᠃》
34 ᠲᠠᠢᠭᠠᠨ ᠹᠢᠯᠢᠫ ᠡᠴᠡ᠄ 《ᠡᠨᠡ ᠡᠰᠢ ᠦᠵᠡᠭᠦᠯᠦᠭᠴᠢ ᠬᠡᠨ ᠦ ᠲᠤᠬᠠᠢ ᠡᠭᠦᠨ ᠢ ᠶᠠᠷᠢᠵᠤ ᠪᠠᠢᠭᠠ ᠶᠤᠮ ᠪᠤᠢ︖ ᠥᠪᠡᠷ ᠦᠨ ᠢᠶᠠᠨ ᠲᠤᠬᠠᠢ ᠤᠤ︖ ᠡᠰᠡᠪᠡᠯ ᠪᠤᠰᠤᠳ ᠤᠨ ᠲᠤᠬᠠᠢ ᠤᠤ︖ ᠬᠡᠯᠡᠭᠡᠳ ᠥᠭᠭᠥᠨᠡ ᠤᠤ︖》 ᠭᠡᠵᠦ ᠠᠰᠠᠭᠤᠭᠰᠠᠨ ᠳᠤ᠂ 35 ᠹᠢᠯᠢᠫ ᠠᠮᠠ ᠨᠡᠭᠡᠭᠡᠨ ᠠᠷᠢᠭᠤᠨ ᠨᠣᠮ ᠤᠨ ᠡᠨᠡ ᠬᠡᠰᠡᠭ ᠡᠴᠡ ᠡᠬᠢᠯᠡᠵᠦ᠂ ᠢᠰᠦ᠋ᠰ ᠤᠨ ᠲᠤᠬᠠᠢ ᠪᠠᠶᠠᠷ ᠤᠨ ᠮᠡᠳᠡᠭᠡ ᠶᠢ ᠲᠡᠭᠦᠨ ᠳᠦ ᠶᠠᠷᠢᠵᠤ ᠥᠭᠭᠥᠯᠡ᠃ 36 ᠲᠡᠳᠡ ᠵᠠᠮᠨᠠᠨ ᠶᠠᠪᠤᠭᠰᠠᠭᠠᠷ ᠤᠰᠤ ᠲᠠᠢ ᠭᠠᠵᠠᠷ ᠬᠦᠷᠬᠦ ᠳᠦ᠂ ᠲᠠᠢᠭᠠᠨ᠄ 《ᠬᠠᠷᠠ ᠳᠠ᠂ ᠡ᠊ᠨᠳᠡ ᠤᠰᠤ ᠪᠠᠢᠨᠠ᠂ ᠤᠬᠢᠶᠠᠯ ᠬᠦᠷᠲᠡᠬᠦ ᠳᠦ ᠮᠢᠨᠢ ᠶᠠᠭᠤ ᠰᠠᠭᠠᠳ ᠪᠣᠯᠬᠤ ᠪᠢᠯᠡ︖》 ᠭᠡᠪᠡ᠃ 37 [ᠹᠢᠯᠢᠫ᠄ 《ᠬᠡᠷᠪᠡ ᠴᠢ ᠴᠢᠩ ᠰᠡᠳᠬᠢᠯ ᠡᠴᠡ ᠪᠡᠨ ᠢᠲᠡᠭᠡᠪᠡᠯ ᠪᠣᠯᠣᠨᠠ》 ᠭᠡᠰᠡᠨ ᠳᠦ᠂ ᠲᠡᠷᠡ᠄ 《ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠪᠣᠯ ᠪᠤᠷᠬᠠᠨ ᠤ ᠬᠦᠦ ᠮᠥᠨ ᠭᠡᠳᠡᠭ ᠢ ᠪᠢ ᠢᠲᠡᠭᠡᠵᠦ ᠪᠠᠢᠨᠠ》 ᠭᠡᠵᠦ ᠬᠠᠷᠢᠭᠤᠯᠵᠠᠢ᠃] 38 ᠲᠠᠢᠭᠠᠨ ᠲᠡᠷᠭᠡ ᠪᠡᠨ ᠵᠣᠭᠰᠣᠭᠠᠬᠤ ᠶᠢ ᠲᠤᠰᠢᠶᠠᠭᠠᠳ ᠹᠢᠯᠢᠫ ᠲᠠᠢ ᠬᠠᠮᠲᠤ ᠤᠰᠤᠨ ᠳᠤ ᠣᠷᠣᠭᠰᠠᠨ ᠪᠠ ᠹᠢᠯᠢᠫ ᠲᠡᠭᠦᠨ ᠳᠦ ᠤᠬᠢᠶᠠᠯ ᠬᠦᠷᠲᠡᠭᠡᠵᠡᠢ᠃ 39 ᠲᠡᠳᠡ ᠤᠰᠤᠨ ᠠᠴᠠ ᠭᠠᠷᠲᠠᠯᠠ᠂ ᠡᠵᠡᠨ ᠦ ᠰᠦᠨᠡᠰᠦ ᠹᠢᠯᠢᠫ ᠢ ᠠᠪᠠᠴᠢᠴᠢᠬᠠᠪᠠ᠃ ᠲᠠᠢᠭᠠᠨ ᠳᠠᠬᠢᠭᠠᠳ ᠲᠡᠭᠦᠨ ᠢ ᠣᠯᠵᠤ ᠬᠠᠷᠠᠭᠰᠠᠨ ᠦᠭᠡᠢ᠂ ᠪᠠᠶᠠᠷ ᠬᠥᠷ ᠲᠡᠢ ᠪᠠᠷ ᠠᠶᠠᠨ ᠳᠠᠭᠠᠨ ᠮᠣᠷᠳᠠᠪᠠ᠃ 40 ᠬᠠᠷᠢᠨ ᠹᠢᠯᠢᠫ ᠠᠱᠢᠳᠣᠲ ᠲᠤ ᠢᠯᠡᠷᠡᠭᠰᠡᠨ ᠪᠥᠭᠡᠳ ᠺᠠᠶᠧᠰᠠᠷᠢᠶᠠ ᠬᠦᠷᠲᠡᠯᠡ ᠲᠣᠰᠬᠣᠨ ᠨᠤᠭᠤᠳ ᠢᠶᠠᠷ ᠪᠠᠶᠠᠷ ᠤᠨ ᠮᠡᠳᠡᠭᠡ ᠤᠯᠠᠮᠵᠢᠯᠠᠭᠰᠠᠭᠠᠷ ᠶᠠᠪᠤᠵᠠᠢ᠃