ᠦᠢᠯᠡᠰ ᠵᠢᠷᠭᠤᠭᠠ
ᠳᠣᠯᠣᠭᠠᠨ ᠦᠢᠯᠡᠴᠢᠯᠡᠭᠴᠢ ᠰᠣᠩ᠋ᠭᠣᠭᠰᠠᠨ ᠨᠢ
1 ᠲᠡᠷᠡ ᠦᠶᠡ ᠳᠦ ᠱᠠᠪᠢ ᠨᠠᠷ ᠣᠯᠠᠰᠢᠷᠠᠵᠤ ᠪᠠᠢᠭᠰᠠᠨ᠃ ᠭᠷᠧᠭ ᠬᠡᠯᠡ ᠲᠠᠢ ᠶᠦᠳᠠᠢᠴᠤᠳ ᠡᠳᠦᠷ ᠪᠦᠷᠢ ᠶᠢᠨ ᠬᠦᠨᠡᠰᠦᠨ ᠦ ᠬᠠᠩ᠋ᠭᠠᠮᠵᠢ ᠳᠤ ᠲᠡᠳᠡᠨ ᠦ ᠪᠡᠯᠪᠡᠰᠦᠨ ᠡᠬᠡᠨᠡᠷ ᠤᠳ ᠭᠠᠳᠠᠭᠤᠷᠴᠢᠯᠠᠭᠳᠠᠳᠠᠭ ᠭᠡᠵᠦ ᠢᠪᠷᠠᠢ ᠬᠡᠯᠡ ᠲᠠᠢ ᠶᠦᠳᠠᠢᠴᠤᠳ ᠲᠤ ᠭᠣᠮᠣᠳᠠᠯ ᠭᠠᠷᠭᠠᠪᠠ᠃ 2 ᠠᠷᠪᠠᠨ ᠬᠣᠶᠠᠷ ᠰᠢᠳᠠᠷ ᠱᠠᠪᠢ ᠪᠦᠬᠦ ᠱᠠᠪᠢ ᠶᠢ ᠳᠠᠭᠤᠳᠠᠨ ᠴᠤᠭᠯᠠᠭᠤᠯᠵᠤ᠄ 《ᠪᠢᠳᠡ ᠪᠤᠷᠬᠠᠨ ᠤ ᠦᠭᠡ ᠶᠢ ᠳᠡᠯᠭᠡᠷᠡᠭᠦᠯᠬᠦ ᠠᠵᠢᠯ ᠢ ᠬᠣᠢᠰᠢ ᠲᠠᠯᠪᠢᠭᠠᠳ ᠬᠣᠭᠣᠯᠠ ᠤᠮᠳᠠᠭᠠᠨ ᠳᠤ ᠦᠢᠯᠡᠴᠢᠯᠡᠬᠦ ᠨᠢ ᠵᠣᠬᠢᠰ ᠦᠭᠡᠢ᠃ 3 ᠲᠡᠢᠮᠦ ᠡᠴᠡ ᠠᠬᠠ ᠳᠡᠭᠦᠦ ᠨᠠᠷ ᠡ︕ ᠠᠷᠢᠭᠤᠨ ᠰᠦᠨᠡᠰᠦ ᠪᠠ ᠮᠡᠷᠭᠡᠨ ᠤᠬᠠᠭᠠᠨ ᠢᠶᠠᠷ ᠳᠦᠭᠦᠷᠡᠩ᠂ ᠨᠡᠷᠡ ᠬᠦᠨᠳᠦᠲᠡᠢ ᠳᠣᠯᠣᠭᠠᠨ ᠬᠥᠮᠦᠨ ᠢ ᠳᠤᠮᠳᠠ ᠠᠴᠠ ᠪᠠᠨ ᠰᠣᠩ᠋ᠭᠣᠭᠠᠷᠠᠢ᠃ ᠪᠢᠳᠡ ᠡᠨᠡ ᠠᠵᠢᠯ ᠢ ᠲᠡᠳᠡ ᠨᠠᠷ ᠢᠶᠠᠷ ᠬᠠᠷᠢᠭᠤᠴᠠᠭᠤᠯᠵᠤ᠂ 4 ᠥᠪᠡᠷᠰᠡᠳ ᠢᠶᠡᠨ ᠳᠠᠭᠠᠳᠬᠠᠯ ᠪᠠ ᠦᠭᠡ ᠶᠢᠨ ᠠᠵᠢᠯ ᠢᠶᠠᠨ ᠪᠠᠷᠢᠮᠲᠠᠯᠠᠶᠠ》 ᠭᠡᠪᠡ᠃ 5 ᠪᠦᠬᠦ ᠬᠥᠮᠦᠨ ᠲᠡᠷᠡ ᠦᠭᠡᠨ ᠳᠦ ᠪᠠᠶᠠᠷᠯᠠᠵᠤ᠂ ᠢᠲᠡᠭᠡᠯ ᠪᠠ ᠠᠷᠢᠭᠤᠨ ᠰᠦᠨᠡᠰᠦ ᠪᠡᠷ ᠳᠦᠭᠦᠷᠡᠩ ᠰᠲ᠋ᠧᠹᠠᠨ ᠪᠠ ᠹᠢᠯᠢᠫ᠂ ᠫᠷᠦᠬᠣᠷ᠂ ᠨᠢᠺᠠᠨᠣᠷ᠂ ᠲᠢᠮᠣᠨ᠂ ᠫᠠᠷᠮᠧᠨᠠ ᠪᠣᠯᠣᠨ ᠶᠦᠳᠠᠢ ᠱᠠᠰᠢᠨ ᠳᠤ ᠣᠷᠣᠭᠠᠳ ᠪᠠᠢᠭᠰᠠᠨ ᠠᠨᠲ᠋ᠢᠶᠣᠬᠢᠶᠠ ᠶᠢᠨ ᠨᠢᠺᠠᠨᠣᠷ ᠢ ᠰᠣᠩ᠋ᠭᠣᠵᠤ᠂ 6 ᠰᠢᠳᠠᠷ ᠱᠠᠪᠢ ᠨᠠᠷ ᠤᠨ ᠡᠮᠦᠨᠡ ᠵᠣᠭᠰᠣᠭᠠᠬᠤ ᠳᠤ᠂ ᠰᠢᠳᠠᠷ ᠱᠠᠪᠢ ᠨᠠᠷ ᠳᠠᠭᠠᠳᠬᠠᠵᠤ ᠲᠡᠳᠡᠨ ᠦ ᠳᠡᠭᠡᠷᠡ ᠭᠠᠷ ᠢᠶᠠᠨ ᠲᠠᠯᠪᠢᠪᠠ᠃
7 ᠪᠤᠷᠬᠠᠨ ᠤ ᠦᠭᠡ ᠳᠡᠯᠭᠡᠷᠡᠭᠰᠡᠭᠡᠷ᠂ ᠶᠧᠷᠦ᠋ᠰᠠᠯᠧᠮ ᠳᠤ ᠱᠠᠪᠢ ᠨᠠᠷ ᠤᠨ ᠲᠣᠭᠠ ᠶᠡᠬᠡ ᠪᠡᠷ ᠣᠯᠠᠰᠢᠷᠠᠵᠤ᠂ ᠣᠯᠠᠨ ᠲᠠᠬᠢᠯᠴᠢ ᠴᠤ ᠡᠨᠡ ᠢᠲᠡᠭᠡᠯ ᠢ ᠳᠠᠭᠠᠬᠤ ᠪᠣᠯᠵᠠᠢ᠃
ᠠᠲᠠᠭᠠᠷᠬᠠᠭᠴᠢᠳ ᠲᠤ ᠪᠠᠷᠢᠪᠴᠢᠯᠠᠭᠳᠠᠭᠰᠠᠨ ᠨᠢ
8 ᠢᠪᠡᠭᠡᠯ ᠪᠠ ᠬᠦᠴᠦ ᠪᠡᠷ ᠲᠡᠭᠦᠯᠳᠡᠷᠵᠢᠭᠰᠡᠨ ᠰᠲ᠋ᠧᠹᠠᠨ ᠠᠷᠠᠳ ᠤᠨ ᠳᠤᠮᠳᠠ ᠠᠭᠤᠤ ᠶᠡᠬᠡ ᠰᠣᠳᠣᠨ ᠵᠦᠢᠯ ᠪᠠ ᠰᠢᠳᠢ ᠲᠡᠮᠳᠡᠭ ᠢ ᠦᠢᠯᠡᠳᠴᠦ ᠪᠠᠢᠯᠠ᠃ 9 ᠲᠡᠷᠡ ᠦᠶᠡ ᠳᠦ᠂ ᠴᠢᠯᠥᠭᠡᠲᠦ ᠬᠥᠮᠦᠰ 5 ᠬᠡᠮᠡᠬᠦ ᠬᠤᠷᠠᠯ ᠤᠨ ᠲᠠᠩᠬᠢᠮ ᠤᠨ ᠬᠡᠳᠦᠨ ᠬᠥᠮᠦᠨ ᠪᠣᠰᠴᠤ ᠰᠲ᠋ᠧᠹᠠᠨ ᠲᠠᠢ ᠮᠠᠷᠭᠤᠯᠳᠤᠪᠠ᠃ ᠲᠡᠳᠡ ᠨᠠᠷ ᠪᠣᠯ ᠺᠦᠷᠧᠨᠠᠢ᠂ ᠠᠯᠧᠺᠰᠠᠨᠳᠧᠷ᠂ ᠺᠢᠯᠢᠺᠢᠶᠠ᠂ ᠠᠽᠢᠶᠠ ᠵᠡᠷᠭᠡ ᠮᠤᠵᠢ ᠡᠴᠡ ᠢᠷᠡᠭᠰᠡᠨ ᠶᠦᠳᠠᠢᠴᠤᠳ ᠪᠠᠢᠵᠠᠢ᠃ 10 ᠭᠡᠪᠡᠴᠦ ᠲᠡᠳᠡ ᠮᠡᠷᠭᠡᠨ ᠤᠬᠠᠭᠠᠨ ᠪᠠ ᠠᠷᠢᠭᠤᠨ ᠰᠦᠨᠡᠰᠦ ᠪᠡᠷ ᠶᠠᠷᠢᠳᠠᠭ ᠰᠲ᠋ᠧᠹᠠᠨ ᠲᠠᠢ ᠮᠥᠴᠡᠭᠡᠷᠬᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ ᠪᠣᠯᠬᠣᠷ 11 ᠬᠥᠮᠦᠰ ᠢ ᠨᠢᠭᠤᠴᠠ ᠪᠠᠷ ᠢᠳᠬᠠᠵᠤ᠄ 《ᠮᠣᠰᠧ ᠪᠠ ᠪᠤᠷᠬᠠᠨ ᠢ ᠳᠣᠷᠣᠮᠵᠢᠯᠠᠭᠰᠠᠨ ᠲᠡᠭᠦᠨ ᠦ ᠦᠭᠡ ᠶᠢ ᠪᠢᠳᠡ ᠰᠣᠨᠣᠰᠣᠯᠠ》 ᠭᠡᠵᠦ ᠬᠡᠯᠡᠭᠦᠯᠦᠨ 12 ᠠᠷᠠᠳ ᠣᠯᠠᠨ᠂ ᠠᠬᠠᠯᠠᠭᠴᠢᠳ ᠪᠠ ᠪᠢᠴᠢᠭᠲᠡᠨ ᠢ ᠥᠳᠥᠭᠡᠵᠦ᠂ ᠰᠲ᠋ᠧᠹᠠᠨ ᠢ ᠪᠠᠷᠢᠭᠤᠯᠤᠭᠠᠳ ᠰᠢᠭᠦᠬᠦ ᠵᠥᠪᠯᠡᠯ ᠳᠦ ᠠᠪᠴᠢᠷᠠᠵᠠᠢ᠃ 13 ᠲᠡᠭᠡᠭᠡᠳ ᠬᠠᠭᠤᠷᠮᠠᠭ ᠢᠶᠠᠷ ᠭᠡᠷᠡᠴᠢᠯᠡᠭᠴᠢᠳ ᠢ ᠭᠠᠷᠭᠠᠭᠰᠠᠨ ᠳᠤ᠂ ᠲᠡᠳᠡ ᠨᠠᠷ ᠨᠢ᠄ 《ᠡᠨᠡ ᠬᠥᠮᠦᠨ ᠠᠷᠢᠭᠤᠨ ᠭᠠᠵᠠᠷ ᠪᠠ ᠬᠠᠤᠯᠢ ᠶᠢ ᠵᠣᠭᠰᠣᠯ ᠦᠭᠡᠢ ᠡᠰᠡᠷᠭᠦᠴᠡᠨ ᠶᠠᠷᠢᠳᠠᠭ᠂ 14 〈ᠨᠠᠽᠠᠷᠧᠲ ᠤᠨ ᠢᠰᠦ᠋ᠰ ᠡᠨᠡ ᠭᠠᠵᠠᠷ ᠢ ᠨᠤᠷᠠᠭᠠᠵᠤ᠂ ᠮᠣᠰᠧ ᠶᠢᠨ ᠪᠢᠳᠡᠨ ᠳᠦ ᠤᠯᠠᠮᠵᠢᠯᠠᠭᠰᠠᠨ ᠶᠣᠰᠣ ᠵᠠᠩᠰᠢᠯ ᠢ ᠴᠤ ᠬᠤᠪᠢᠷᠠᠭᠠᠬᠤ ᠪᠣᠯᠣᠨᠠ〉 ᠬᠡᠮᠡᠨ ᠶᠠᠷᠢᠬᠤ ᠶᠢ ᠨᠢ ᠪᠢᠳᠡ ᠰᠣᠨᠣᠰᠣᠭᠰᠠᠨ》 ᠭᠡᠵᠡᠢ᠃ 15 ᠰᠢᠭᠦᠬᠦ ᠵᠥᠪᠯᠡᠯ ᠳᠦ ᠰᠠᠭᠤᠭᠠ ᠬᠥᠮᠦᠰ ᠪᠦᠭᠦᠳᠡᠭᠡᠷ ᠰᠲ᠋ᠧᠹᠠᠨ ᠢ ᠰᠢᠷᠲᠡᠬᠦ ᠳᠦ᠂ ᠲᠡᠭᠦᠨ ᠦ ᠴᠢᠷᠠᠢ ᠡᠭᠡᠭᠡ ᠯᠠ ᠲᠩᠷᠢ ᠶᠢᠨ ᠡᠯᠴᠢ ᠶᠢᠨ ᠴᠢᠷᠠᠢ ᠰᠢᠭ᠋ ᠬᠠᠷᠠᠭᠳᠠᠵᠠᠢ᠃