ᠦᠢᠯᠡᠰ ᠬᠣᠷᠢᠨ ᠵᠢᠷᠭᠤᠭᠠ
ᠫᠠᠦ᠋ᠯ ᠠᠭᠷᠢᠫᠠ ᠬᠠᠨ ᠤ ᠡᠮᠦᠨᠡ
1 ᠠᠭᠷᠢᠫᠠ ᠫᠠᠦ᠋ᠯ ᠳᠤ᠄ 《ᠥᠪᠡᠷ ᠦᠨ ᠢᠶᠠᠨ ᠲᠥᠯᠥᠭᠡ ᠶᠠᠷᠢᠬᠤ ᠶᠢ ᠴᠢᠨᠢ ᠵᠥᠪᠰᠢᠶᠡᠷᠡᠶᠡ》 ᠭᠡᠰᠡᠨ ᠳᠦ᠂ ᠲᠡᠷᠡ ᠭᠠᠷ ᠢᠶᠠᠷ ᠢᠶᠠᠨ ᠵᠠᠩ᠋ᠭᠠᠭᠠᠳ ᠪᠡᠶᠡ ᠪᠡᠨ ᠥᠮᠥᠭᠯᠡᠵᠦ ᠡᠬᠢᠯᠡᠨ᠄
2 《ᠠᠭᠷᠢᠫᠠ ᠬᠠᠨ ᠮᠢᠨᠢ᠂ ᠶᠦᠳᠠᠢᠴᠤᠳ ᠲᠤ ᠵᠠᠭᠠᠯᠳᠤᠭᠳᠠᠭᠰᠠᠨ ᠲᠤᠬᠠᠢ ᠪᠠᠨ ᠥᠨᠥᠳᠥᠷ ᠲᠠᠨ ᠤ ᠡᠮᠦᠨᠡ ᠥᠮᠥᠭᠯᠡᠬᠦ ᠪᠡᠨ ᠪᠢ ᠠᠵᠠ ᠭᠡᠵᠦ ᠪᠣᠳᠣᠵᠤ ᠪᠠᠢᠨᠠ᠃ 3 ᠢᠯᠠᠩ᠋ᠭᠤᠶᠠ ᠲᠠ ᠶᠦᠳᠠᠢᠴᠤᠳ ᠤᠨ ᠠᠯᠢᠪᠠ ᠶᠣᠰᠣ ᠵᠠᠩᠰᠢᠯ ᠪᠠ ᠮᠠᠷᠭᠤᠭᠠᠨ ᠲᠠᠢ ᠠᠰᠠᠭᠤᠳᠠᠯ ᠤᠨ ᠲᠠᠯᠠ ᠪᠠᠷ ᠰᠠᠢᠨ ᠮᠡᠳᠡᠳᠡᠭ ᠲᠤᠯᠠ ᠪᠢ ᠠᠵᠠ ᠲᠠᠢ ᠪᠠᠢᠨᠠ᠃ ᠬᠡᠯᠡᠬᠦ ᠦᠭᠡ ᠶᠢ ᠮᠢᠨᠢ ᠬᠦᠯᠢᠴᠡᠨ ᠰᠣᠨᠣᠰᠬᠤ ᠶᠢ ᠲᠠᠨᠢ ᠭᠤᠶᠤᠶᠠ᠃
4 ᠶᠧᠷᠦ᠋ᠰᠠᠯᠧᠮ ᠳᠤ ᠠᠷᠠᠳ ᠲᠦᠮᠡᠨ ᠦ ᠪᠠᠨ ᠳᠤᠮᠳᠠ ᠠᠩ᠋ᠬᠠᠨ ᠠᠴᠠ ᠪᠠᠨ᠂ ᠬᠠᠷᠠᠬᠠᠨ ᠪᠠᠭᠠ ᠠᠴᠠ ᠪᠠᠨ ᠬᠡᠷᠬᠢᠨ ᠠᠮᠢᠳᠤᠷᠠᠵᠤ ᠪᠠᠢᠭᠰᠠᠨ ᠢ ᠮᠢᠨᠢ ᠶᠦᠳᠠᠢᠴᠤᠳ ᠪᠦᠭᠦᠳᠡᠭᠡᠷ ᠮᠡᠳᠡᠨᠡ᠃ 5 ᠨᠠᠮᠠᠶᠢ ᠡᠷᠲᠡᠨ ᠡᠴᠡ ᠮᠡᠳᠡᠳᠡᠭ ᠪᠣᠯᠬᠣᠷ ᠮᠠᠨ ᠤ ᠱᠠᠰᠢᠨ ᠤ ᠬᠠᠮᠤᠭ ᠤᠨ ᠴᠢᠩᠭ᠍ᠠ ᠪᠦᠯᠦᠭ ᠦᠨ ᠬᠢᠨ᠂ ᠲᠤᠬᠠᠢᠯᠠᠪᠠᠯ ᠹᠠᠷᠢᠰᠠᠢ ᠬᠥᠮᠦᠨ ᠪᠣᠯᠵᠤ ᠠᠮᠢᠳᠤᠷᠠᠭᠰᠠᠨ ᠢ ᠮᠢᠨᠢ ᠭᠡᠷᠡᠴᠢᠯᠡᠶᠡ ᠭᠡᠪᠡᠯ ᠲᠡᠳᠡ ᠭᠡᠷᠡᠴᠢᠯᠡᠨᠡ᠃ 6 ᠮᠠᠨ ᠤ ᠳᠡᠭᠡᠳᠦᠰ ᠲᠦ ᠥᠭᠭᠥᠭᠰᠡᠨ ᠪᠤᠷᠬᠠᠨ ᠤ ᠠᠮᠠᠯᠠᠯ ᠳᠤ ᠡᠷᠡᠮᠡᠯᠵᠡᠵᠦ ᠪᠠᠢᠭᠠ ᠤᠴᠢᠷ ᠢᠶᠠᠷ ᠡᠳᠦᠭᠡ ᠪᠢ ᠡ᠊ᠨᠳᠡ ᠰᠢᠭᠦᠭᠳᠡᠵᠦ ᠪᠠᠢᠨᠠ᠃ 7 ᠮᠠᠨ ᠤ ᠠᠷᠪᠠᠨ ᠬᠣᠶᠠᠷ ᠣᠪᠣᠭ ᠤᠨ ᠬᠢᠨ ᠪᠤᠷᠬᠠᠨ ᠳᠤ ᠡᠳᠦᠷ ᠰᠥᠨᠢ ᠦᠭᠡᠢ ᠬᠢᠴᠢᠶᠡᠩᠭᠦᠢᠯᠡᠨ ᠮᠥᠷᠭᠥᠵᠦ᠂ ᠲᠡᠷᠡ ᠠᠮᠠᠯᠠᠯᠲᠠ ᠪᠡᠶᠡᠯᠡᠭᠳᠡᠬᠦ ᠶᠢ ᠡᠷᠡᠮᠡᠯᠵᠡᠳᠡᠭ᠌᠃ ᠬᠠᠨ ᠡ᠂ ᠡᠨᠡ ᠡᠷᠡᠮᠡᠯᠵᠡᠯ ᠦᠨ ᠤᠯᠠᠮ ᠠᠴᠠ ᠶᠦᠳᠠᠢᠴᠤᠳ ᠨᠠᠮᠠᠶᠢ ᠵᠠᠭᠠᠯᠳᠤᠵᠤ ᠪᠠᠢᠨᠠ᠃ 8 ᠲᠠ ᠨᠠᠷ ᠶᠠᠭᠤᠨ ᠳᠤ ᠪᠤᠷᠬᠠᠨ ᠦᠬᠦᠭᠰᠡᠳ ᠢ ᠠᠮᠢᠯᠠᠭᠤᠯᠳᠠᠭ ᠢ ᠢᠲᠡᠭᠡᠰᠢ ᠦᠭᠡᠢ ᠭᠡᠵᠦ ᠦᠵᠡᠳᠡᠭ ᠪᠤᠢ︖
9 ᠪᠢ ᠥᠪᠡᠷ ᠢᠶᠡᠨ ᠴᠤ ᠨᠠᠽᠠᠷᠧᠲ ᠤᠨ ᠢᠰᠦ᠋ᠰ ᠤᠨ ᠨᠡᠷᠡ ᠶᠢ ᠡᠰᠡᠷᠭᠦᠴᠡᠨ ᠣᠯᠠᠨ ᠶᠠᠭᠤᠮᠠ ᠬᠢᠬᠦ ᠶᠣᠰᠣᠲᠠᠢ ᠭᠡᠵᠦ ᠪᠣᠳᠣᠭᠠᠳ 10 ᠶᠧᠷᠦ᠋ᠰᠠᠯᠧᠮ ᠳᠤ ᠶᠠᠭ ᠲᠡᠢᠨ ᠬᠦ ᠦᠢᠯᠡᠳᠦᠭᠰᠡᠨ᠃ ᠠᠬᠠᠯᠠᠬᠤ ᠲᠠᠬᠢᠯᠴᠢᠳ ᠠᠴᠠ ᠡᠷᠬᠡ ᠮᠡᠳᠡᠯ ᠣᠯᠵᠤ᠂ ᠣᠯᠠᠨ ᠠᠷᠢᠭᠤᠨ ᠬᠥᠮᠦᠰ ᠢ ᠱᠣᠷᠣᠩ ᠳᠤ ᠬᠣᠷᠢᠭᠤᠯᠬᠤ ᠪᠠᠷ ᠦᠯᠦ ᠪᠠᠷᠠᠮ ᠲᠡᠳᠡ ᠠᠯᠠᠭᠳᠠᠬᠤ ᠦᠶᠡ ᠳᠦ ᠵᠥᠪᠰᠢᠶᠡᠷᠡᠭᠰᠡᠨ ᠰᠠᠨᠠᠯ ᠢᠶᠠᠨ ᠥᠭᠭᠥᠭᠰᠡᠨ᠃ 11 ᠪᠢ ᠬᠤᠷᠠᠯ ᠤᠨ ᠲᠠᠩᠬᠢᠮ ᠤᠳ ᠢᠶᠠᠷ ᠣᠴᠢᠵᠤ᠂ ᠲᠡᠳᠡᠨ ᠢ ᠣᠯᠠᠨ ᠳᠠᠬᠢᠨ ᠵᠠᠯᠬᠠᠭᠠᠬᠤ ᠳᠠᠭᠠᠨ ᠠᠷᠢᠭᠤᠨ ᠨᠢᠭᠡᠨ ᠢ ᠬᠠᠷᠢᠶᠠᠯᠭᠠᠬᠤ ᠪᠠᠷ ᠠᠯᠪᠠᠳᠠᠳᠠᠭ ᠪᠠᠢᠯᠠ᠃ ᠪᠢ ᠬᠡᠲᠦᠷᠬᠡᠢ ᠳᠣᠭᠰᠢᠷᠠᠵᠤ᠂ ᠲᠡᠳᠡᠨ ᠢ ᠬᠠᠷᠢ ᠶᠢᠨ ᠬᠣᠲᠠᠳ ᠲᠤ ᠬᠦᠷᠲᠡᠯᠡ ᠮᠥᠰᠬᠢᠵᠦ ᠪᠠᠢᠭᠰᠠᠨ᠃
12 ᠡᠢᠨ ᠬᠦ ᠪᠢ ᠠᠬᠠᠯᠠᠬᠤ ᠲᠠᠬᠢᠯᠴᠢᠳ ᠠᠴᠠ ᠡᠷᠬᠡ ᠮᠡᠳᠡᠯ ᠪᠠ ᠵᠠᠷᠯᠢᠭ ᠠᠪᠤᠭᠠᠳ ᠳ᠋ᠠᠮᠠᠰᠺᠦ᠋ᠰ ᠤᠷᠤᠭᠤ ᠶᠠᠪᠤᠵᠤ ᠪᠠᠢᠲᠠᠯᠠ᠂ 13 ᠬᠠᠨ ᠮᠢᠨᠢ︕ ᠦᠳᠡ ᠶᠢᠨ ᠬᠢᠷᠢ ᠳᠤ ᠪᠢ ᠵᠠᠮ ᠳᠠᠭᠠᠨ ᠨᠠᠷᠠᠨ ᠤ ᠬᠢ ᠡᠴᠡ ᠢᠯᠡᠭᠦᠦ ᠬᠤᠷᠴᠠ ᠭᠡᠷᠡᠯ ᠢ ᠦᠵᠡᠯᠡ᠃ ᠲᠡᠷᠡ ᠭᠡᠷᠡᠯ ᠲᠩᠷᠢ ᠡᠴᠡ ᠭᠡᠷᠡᠯᠲᠦᠵᠦ ᠨᠠᠮᠠᠶᠢ ᠪᠣᠯᠣᠨ ᠨᠠᠳᠠ ᠲᠠᠢ ᠬᠠᠮᠲᠤ ᠶᠠᠪᠤᠭᠰᠠᠳ ᠢ ᠬᠦᠷᠢᠶᠡᠯᠡᠪᠡ᠃ 14 ᠪᠢᠳᠡ ᠪᠦᠭᠦᠳᠡᠭᠡᠷ ᠢᠶᠡᠨ ᠭᠠᠵᠠᠷ ᠲᠤ ᠤᠨᠠᠭᠰᠠᠨ ᠳᠤ᠄ 〈ᠰᠠᠦ᠋ᠯ ᠡ᠂ ᠰᠠᠦ᠋ᠯ ᠡ᠂ ᠴᠢ ᠶᠠᠭᠤᠨ ᠳᠤ ᠨᠠᠮᠠᠶᠢ ᠬᠠᠪᠴᠢᠵᠤ ᠪᠠᠢᠨᠠ ᠪᠤᠢ︖ ᠥᠷᠭᠡᠰᠦ ᠶᠢ ᠢᠰᠬᠦᠯᠪᠡᠯ ᠴᠢᠮᠠ ᠳᠤ ᠯᠠ ᠬᠡᠴᠡᠭᠦᠦ ᠰᠢᠦ〉 ᠭᠡᠵᠦ ᠢᠪᠷᠠᠢ ᠬᠡᠯᠡ ᠪᠡᠷ ᠬᠡᠯᠡᠬᠦ ᠳᠠᠭᠤ ᠨᠠᠳᠠ ᠳᠤ ᠰᠣᠨᠣᠰᠲᠠᠯᠠ᠃ 15 ᠲᠡᠭᠡᠬᠦ ᠳᠦ ᠪᠢ᠄ 〈ᠲᠠ ᠬᠡᠨ ᠪᠤᠢ︖ ᠡᠵᠡᠨ ᠡ〉 ᠭᠡᠬᠦ ᠳᠦ᠂ ᠡᠵᠡᠨ᠄ 〈ᠪᠢ ᠪᠣᠯ ᠴᠢᠨᠦ ᠬᠠᠪᠴᠢᠵᠤ ᠪᠠᠢᠭᠠ ᠢᠰᠦ᠋ᠰ ᠪᠠᠢᠨᠠ᠃ 16 ᠪᠣᠰᠴᠤ ᠵᠣᠭᠰᠣ᠂ ᠪᠢ ᠴᠢᠮᠠ ᠶᠢ ᠦᠢᠯᠡᠴᠢᠯᠡᠭᠴᠢ ᠪᠣᠯᠭᠠᠨ ᠲᠣᠮᠢᠯᠠᠵᠤ ᠴᠢᠨᠦ ᠦᠵᠡᠭᠰᠡᠨ ᠵᠦᠢᠯᠡᠰ ᠪᠠ ᠮᠢᠨᠦ ᠦᠵᠡᠭᠦᠯᠬᠦ ᠵᠦᠢᠯᠡᠰ ᠢ ᠭᠡᠷᠡᠴᠢᠯᠡᠭᠦᠯᠬᠦ ᠶᠢᠨ ᠲᠤᠯᠠᠳᠠ ᠴᠢᠮᠠᠳᠤ ᠦᠵᠡᠭᠳᠡᠭᠰᠡᠨ ᠶᠤᠮ᠃ 17 ᠪᠢ ᠴᠢᠮᠠ ᠶᠢ ᠡᠨᠡ ᠠᠷᠠᠳ ᠲᠦᠮᠡᠨ ᠪᠣᠯᠣᠨ ᠬᠠᠷᠢᠴᠤᠳ ᠠᠴᠠ ᠠᠪᠤᠷᠠᠶᠠ᠃ ᠪᠢ ᠴᠢᠮᠠ ᠶᠢ ᠲᠡᠳᠡᠨ ᠤᠷᠤᠭᠤ ᠢᠯᠡᠭᠡᠵᠦ᠂ 18 ᠲᠡᠳᠡᠨ ᠦ ᠨᠢᠳᠦ ᠶᠢ ᠨᠡᠭᠡᠭᠡᠨ ᠬᠠᠷᠠᠩ᠋ᠭᠤᠢ ᠠᠴᠠ ᠭᠡᠷᠡᠯ ᠤᠷᠤᠭᠤ᠂ ᠰᠠᠲ᠋ᠠᠨ ᠤ ᠮᠡᠳᠡᠯ ᠡᠴᠡ ᠪᠤᠷᠬᠠᠨ ᠤᠷᠤᠭᠤ ᠡᠷᠭᠢᠭᠦᠯᠦᠨᠡ᠃ ᠡᠢᠨ ᠬᠦ ᠲᠡᠳᠡᠨ ᠦ ᠨᠢᠭᠦᠯ ᠥᠷᠥᠰᠢᠶᠡᠭᠳᠡᠬᠦ ᠪᠥᠭᠡᠳ ᠨᠠᠳᠠ ᠳᠤ ᠢᠲᠡᠭᠡᠵᠦ ᠠᠷᠢᠭᠤᠰᠬᠠᠭᠳᠠᠭᠰᠠᠨ ᠬᠥᠮᠦᠰ ᠦᠨ ᠳᠤᠮᠳᠠ ᠥᠮᠴᠢ ᠬᠦᠷᠲᠡᠬᠦ ᠪᠣᠯᠣᠨᠠ〉 ᠭᠡᠪᠡ᠃
19 ᠠᠭᠷᠢᠫᠠ ᠬᠠᠨ ᠡ᠂ ᠲᠡᠢᠮᠦ ᠡᠴᠡ ᠪᠢ ᠲᠩᠷᠢᠯᠢᠭ ᠦᠵᠡᠭᠳᠡᠯ ᠢ ᠰᠥᠷᠬᠦ ᠦᠭᠡᠢ ᠪᠠᠷ 20 ᠲᠡᠷᠢᠭᠦᠨ ᠳᠦᠨᠢ ᠳ᠋ᠠᠮᠠᠰᠺᠦ᠋ᠰ ᠤᠨ ᠬᠢᠨ ᠳᠤ᠂ ᠳᠠᠷᠠᠭᠠ ᠨᠢ ᠶᠧᠷᠦ᠋ᠰᠠᠯᠧᠮ ᠤᠨ ᠬᠢᠨ ᠪᠠ ᠶᠦᠳᠠᠢ ᠶᠢᠨ ᠪᠦᠬᠦ ᠨᠤᠲᠤᠭ ᠤᠨ ᠬᠢᠨ ᠳᠤ᠂ ᠴᠢᠨᠠᠭᠰᠢᠳᠠ ᠬᠠᠷᠢᠴᠤᠳ ᠲᠤ ᠬᠦᠷᠲᠡᠯᠡ 〈ᠪᠤᠷᠬᠠᠨ ᠤᠷᠤᠭᠤ ᠭᠡᠮᠰᠢᠨ ᠡᠷᠭᠢᠵᠦ᠂ ᠭᠡᠮᠰᠢᠭᠰᠡᠨ ᠢᠶᠡᠨ ᠦᠢᠯᠡᠰ ᠢᠶᠡᠷ ᠢᠶᠠᠨ ᠬᠠᠷᠠᠭᠤᠯ〉 ᠭᠡᠵᠦ ᠲᠤᠩ᠋ᠬᠠᠭᠯᠠᠳᠠᠭ ᠪᠠᠢᠭᠰᠠᠨ᠃ 21 ᠲᠡᠢᠮᠦ ᠤᠴᠢᠷ ᠠᠴᠠ ᠶᠦᠳᠠᠢᠴᠤᠳ ᠠᠷᠢᠭᠤᠨ ᠣᠷᠳᠣᠨ ᠳᠤ ᠨᠠᠮᠠᠶᠢ ᠪᠠᠷᠢᠵᠤ᠂ ᠠᠯᠠᠬᠤ ᠪᠠᠷ ᠣᠷᠣᠯᠳᠤᠭᠰᠠᠨ ᠪᠠᠢᠨᠠ᠃ 22 ᠭᠡᠲᠡᠯᠡ ᠪᠢ ᠪᠤᠷᠬᠠᠨ ᠤ ᠲᠤᠰᠠᠯᠠᠮᠵᠢ ᠪᠠᠷ ᠥᠨᠥ ᠬᠦᠷᠲᠡᠯᠡ ᠡ᠊ᠨᠳᠡ ᠵᠣᠭᠰᠣᠵᠤ᠂ ᠡᠷᠬᠢᠮ ᠳᠣᠣᠷᠠᠳᠤᠰ ᠪᠦᠬᠦᠨ ᠳᠦ ᠭᠡᠷᠡᠴᠢᠯᠡᠭᠰᠡᠭᠡᠷ ᠪᠠᠢᠨᠠ᠃ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠪᠣᠯᠣᠨ ᠮᠣᠰᠧ ᠶᠢᠨ ᠦᠭᠡᠰ ᠵᠠᠪᠠᠯ ᠪᠡᠶᠡᠯᠡᠨᠡ ᠭᠡᠰᠡᠨ ᠡᠴᠡ ᠥᠭᠡᠷᠡ ᠶᠠᠭᠤᠮᠠ ᠶᠢ ᠪᠢ ᠶᠠᠷᠢᠭᠰᠠᠨ ᠦᠭᠡᠢ᠃ 23 ᠥᠭᠡᠷᠡ ᠪᠡᠷ ᠬᠡᠯᠡᠪᠡᠯ᠂ ᠾᠷᠢᠰᠲ᠋ᠣᠰ ᠵᠣᠪᠠᠯᠠᠩ ᠠᠮᠰᠠᠵᠤ᠂ ᠦᠬᠦᠭᠰᠡᠳ ᠦᠨ ᠳᠤᠮᠳᠠ ᠠᠴᠠ ᠠᠩᠬᠠ ᠠᠮᠢᠯᠠᠭᠠᠳ ᠡᠨᠡ ᠠᠷᠠᠳ ᠲᠦᠮᠡᠨ ᠪᠠ ᠬᠠᠷᠢᠴᠤᠳ ᠲᠤ ᠭᠡᠷᠡᠯ ᠢ ᠲᠤᠩ᠋ᠬᠠᠭᠯᠠᠨᠠ ᠭᠡᠰᠡᠨ》 ᠭᠡᠯᠡ᠃
24 ᠫᠠᠦ᠋ᠯ ᠥᠪᠡᠷ ᠢ ᠪᠠᠨ ᠡᠢᠨ ᠬᠦ ᠥᠮᠥᠭᠯᠡᠭᠰᠡᠨ ᠳᠦ᠂ ᠹᠧᠰᠲ ᠴᠢᠩᠭ᠍ᠠ ᠳᠠᠭᠤᠨ ᠢᠶᠠᠷ᠄ 《ᠫᠠᠦ᠋ᠯ ᠡ᠂ ᠴᠢ ᠰᠣᠯᠢᠶᠠᠷᠠᠴᠢᠬᠠᠵᠠᠢ᠃ ᠶᠡᠬᠡ ᠡᠷᠳᠡᠮ ᠨᠣᠮ ᠴᠢᠨᠢ ᠴᠢᠮᠠ ᠶᠢ ᠰᠣᠯᠢᠶᠠᠷᠠᠭᠤᠯᠤᠭᠰᠠᠨ ᠶᠤᠮ ᠪᠠᠢᠨᠠ》 ᠭᠡᠬᠦ ᠳᠦ᠂ 25 ᠫᠠᠦ᠋ᠯ᠄ 《ᠪᠢ ᠰᠣᠯᠢᠶᠠᠷᠠᠭᠰᠠᠨ ᠪᠢᠰᠢ᠂ ᠬᠦᠨᠳᠦᠲᠦ ᠹᠧᠰᠲ ᠡ︕ ᠬᠠᠷᠢᠨ ᠦᠨᠡᠨ ᠦᠭᠡ ᠶᠢ ᠡᠷᠡᠭᠦᠯ ᠤᠬᠠᠭᠠᠨ ᠢᠶᠠᠷ ᠬᠡᠯᠡᠵᠦ ᠪᠠᠢᠨᠠ᠃ 26 ᠬᠠᠨ ᠴᠤ ᠡᠳᠡᠭᠡᠷ ᠢ ᠮᠡᠳᠡᠳᠡᠭ ᠲᠤᠯᠠ ᠪᠢ ᠰᠢᠭᠤᠳ ᠶᠠᠷᠢᠵᠤ ᠪᠤᠢ᠃ ᠡᠳᠡᠭᠡᠷ ᠨᠢ ᠬᠥᠮᠦᠨ ᠡᠴᠡ ᠳᠠᠯᠳᠠ ᠦᠢᠯᠡᠳᠦᠭᠳᠡᠭᠰᠡᠨ ᠪᠢᠰᠢ ᠪᠣᠯᠬᠣᠷ ᠠᠯᠢ ᠨᠢ ᠴᠤ ᠲᠡᠭᠦᠨ ᠦ ᠠᠩ᠋ᠬᠠᠷᠤᠯ ᠠᠴᠠ ᠪᠤᠯᠲᠠᠭᠠ ᠦᠭᠡᠢ ᠭᠡᠳᠡᠭ ᠲᠦ ᠪᠢ ᠢᠲᠡᠭᠡᠵᠦ ᠪᠠᠢᠨᠠ᠃ 27 ᠠᠭᠷᠢᠫᠠ ᠬᠠᠨ ᠡ᠂ ᠲᠠ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠲᠤ ᠢᠲᠡᠭᠡᠳᠡᠭ ᠤᠤ︖ ᠢᠲᠡᠭᠡᠳᠡᠭ ᠢ ᠴᠢᠨᠢ ᠪᠢ ᠮᠡᠳᠡᠨᠡ》 ᠭᠡᠰᠡᠨ ᠳᠦ᠂ 28 ᠠᠭᠷᠢᠫᠠ ᠫᠠᠦ᠋ᠯ ᠳᠤ᠄ 《ᠤᠳᠠᠬᠤ ᠦᠭᠡᠢ ᠴᠢ ᠨᠠᠮᠠᠶᠢ ᠾᠷᠢᠰᠲ᠋ᠣᠰᠲᠠᠨ ᠪᠣᠯᠭᠠᠬᠤ ᠪᠠᠷ ᠢᠳᠬᠠᠬᠤ ᠨᠢ ᠡ》 ᠭᠡᠵᠡᠢ᠃ 29 ᠫᠠᠦ᠋ᠯ᠄ 《ᠤᠳᠠᠭᠰᠠᠨ ᠴᠤ᠂ ᠤᠳᠠᠭᠰᠠᠨ ᠦᠭᠡᠢ ᠴᠤ᠂ ᠵᠥᠪᠬᠡᠨ ᠲᠠ ᠪᠢᠰᠢ᠂ ᠬᠠᠷᠢᠨ ᠮᠢᠨᠦ ᠦᠭᠡ ᠶᠢ ᠰᠣᠨᠣᠰᠣᠭᠰᠠᠨ ᠪᠦᠬᠦᠨ ᠡᠨᠡ ᠬᠦᠯᠢᠶᠡᠰᠦ ᠡᠴᠡ ᠥᠭᠡᠷᠡ ᠲᠠᠯᠠ ᠪᠠᠷ ᠨᠠᠳᠠ ᠲᠠᠢ ᠠᠳᠠᠯᠢ ᠪᠣᠯᠣᠭᠠᠰᠠᠢ ᠭᠡᠵᠦ ᠪᠢ ᠪᠤᠷᠬᠠᠨ ᠠᠴᠠ ᠭᠤᠶᠤᠶᠠ》 ᠭᠡᠪᠡ᠃
30 ᠢᠩᠭᠢᠬᠦ ᠳᠦ ᠬᠠᠨ᠂ ᠵᠠᠬᠢᠷᠤᠭᠴᠢ᠂ ᠪᠧᠷᠨᠢᠺᠧ ᠪᠠ ᠲᠡᠳᠡᠨ ᠲᠡᠢ ᠬᠠᠮᠲᠤ ᠰᠠᠭᠤᠭᠴᠢᠳ ᠪᠣᠰᠴᠠᠭᠠᠵᠤ 31 ᠵᠠᠢᠯᠠᠵᠤ ᠶᠠᠪᠤᠭᠠᠳ᠄ 《ᠡᠨᠡ ᠬᠥᠮᠦᠨ ᠠᠯᠠᠭᠳᠠᠬᠤ ᠪᠤᠶᠤ ᠬᠣᠷᠢᠭᠳᠠᠬᠤ ᠬᠡᠷᠡᠭ ᠬᠢᠭᠰᠡᠨ ᠦᠭᠡᠢ ᠶᠤᠮ ᠪᠠᠢᠨᠠ》 ᠬᠡᠮᠡᠨ ᠥᠪᠡᠷ ᠬᠣᠭᠣᠷᠣᠨᠳᠣ ᠪᠠᠨ ᠶᠠᠷᠢᠯᠴᠠᠵᠠᠢ᠃ 32 ᠠᠭᠷᠢᠫᠠ ᠹᠧᠰᠲ ᠲᠤ᠄ 《ᠡᠨᠡ ᠬᠥᠮᠦᠨ ᠺᠠᠶᠧᠰᠠᠷ ᠲᠤ ᠵᠠᠭᠠᠯᠳᠤᠭᠠ ᠦᠭᠡᠢ ᠪᠣᠯ ᠰᠤᠯᠠᠯᠠᠭᠳᠠᠵᠤ ᠪᠣᠯᠬᠤ ᠯᠠ ᠪᠠᠢᠵᠠᠢ》 ᠭᠡᠪᠡ᠃