ᠦᠢᠯᠡᠰ ᠭᠤᠷᠪᠠ
ᠰᠠᠭᠤᠩᠭᠢ ᠬᠥᠮᠦᠨ ᠢ ᠡᠳᠡᠭᠡᠭᠡᠪᠡ
1 ᠳᠠᠭᠠᠳᠬᠠᠯ ᠤᠨ ᠴᠠᠭ ᠪᠣᠯᠬᠤ ᠦᠳᠡ ᠶᠢᠨ ᠬᠣᠢᠨᠠ ᠶᠢᠨ ᠭᠤᠷᠪᠠᠨ ᠴᠠᠭ ᠤᠨ ᠦᠶᠡ ᠪᠡᠷ ᠫᠧᠲ᠋ᠧᠷ᠂ ᠶᠣᠬᠠᠨ ᠬᠣᠶᠠᠭᠤᠯᠠ ᠠᠷᠢᠭᠤᠨ ᠣᠷᠳᠣᠨ ᠥᠭᠡᠳᠡ ᠶᠠᠪᠤᠵᠤ ᠪᠠᠢᠲᠠᠯᠠ᠂ 2 ᠬᠥᠮᠦᠰ ᠲᠥᠷᠥᠯᠬᠢ ᠲᠠᠮᠪᠠ ᠨᠢᠭᠡ ᠬᠥᠮᠦᠨ ᠢ ᠡᠭᠦᠷᠴᠦ ᠢᠷᠡᠵᠡᠢ᠃ ᠲᠡᠭᠦᠨ ᠢ ᠡᠳᠦᠷ ᠪᠦᠷᠢ ᠠᠷᠢᠭᠤᠨ ᠣᠷᠳᠣᠨ ᠤ ᠦᠵᠡᠰᠬᠦᠯᠡᠩᠲᠦ ᠬᠡᠮᠡᠬᠦ ᠬᠠᠭᠠᠯᠭᠠᠨ ᠤ ᠳᠡᠷᠭᠡᠳᠡ ᠰᠠᠭᠤᠯᠭᠠᠬᠤ ᠳᠤ᠂ ᠲᠡᠷᠡ ᠠᠷᠢᠭᠤᠨ ᠣᠷᠳᠣᠨ ᠳᠤ ᠣᠷᠣᠬᠤ ᠬᠥᠮᠦᠰ ᠡᠴᠡ ᠭᠤᠶᠤᠯᠭᠠ ᠭᠤᠶᠤᠳᠠᠭ ᠪᠠᠢᠯᠠ᠃ 3 ᠲᠡᠷᠡ ᠫᠧᠲ᠋ᠧᠷ᠂ ᠶᠣᠬᠠᠨ ᠬᠣᠶᠠᠷ ᠤᠨ ᠠᠷᠢᠭᠤᠨ ᠣᠷᠳᠣᠨ ᠳᠤ ᠣᠷᠣᠬᠤ ᠭᠡᠵᠦ ᠪᠠᠢᠭᠠ ᠶᠢ ᠦᠵᠡᠭᠡᠳ ᠭᠤᠶᠤᠯᠭᠠ ᠭᠤᠶᠤᠭᠰᠠᠨ ᠳᠤ᠂ 4 ᠫᠧᠲ᠋ᠧᠷ᠂ ᠶᠣᠬᠠᠨ ᠬᠣᠶᠠᠷ ᠲᠡᠭᠦᠨ ᠢ ᠰᠢᠷᠲᠡᠨ ᠬᠠᠷᠠᠯᠠ᠃ ᠫᠧᠲ᠋ᠧᠷ᠄ 《ᠨᠠᠰᠢ ᠪᠠᠨ ᠬᠠᠷᠠ》 ᠭᠡᠬᠦ ᠳᠦ᠂ 5 ᠲᠡᠷᠡ ᠬᠥᠮᠦᠨ ᠲᠡᠳᠡᠨ ᠡᠴᠡ ᠶᠠᠮᠠᠷ ᠨᠢᠭᠡᠨ ᠶᠠᠭᠤᠮᠠ ᠣᠯᠬᠤ ᠶᠢ ᠰᠠᠨᠠᠵᠤ᠂ ᠭᠣᠷᠢᠯᠠᠨ ᠬᠠᠷᠠᠵᠤ ᠪᠠᠢᠯᠠ᠃ 6 ᠫᠧᠲ᠋ᠧᠷ᠄ 《ᠠᠯᠲᠠ ᠮᠥᠩᠭᠥ ᠨᠠᠳᠠ ᠳᠤ ᠪᠠᠢᠬᠤ ᠦᠭᠡᠢ ᠪᠣᠯᠪᠠᠴᠤ ᠪᠠᠢᠭᠠ ᠶᠠᠭᠤᠮᠠ ᠪᠠᠨ ᠴᠢᠮᠠ ᠳᠤ ᠥᠭᠭᠥᠶᠡ᠃ ᠨᠠᠽᠠᠷᠧᠲ ᠤᠨ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠤᠨ ᠨᠡᠷᠡ ᠪᠡᠷ ᠴᠢ ᠠᠯᠬᠤᠭᠲᠤᠨ︕》 ᠭᠡᠳ᠂ 7 ᠪᠠᠷᠠᠭᠤᠨ ᠭᠠᠷ ᠠᠴᠠ ᠨᠢ ᠪᠠᠷᠢᠵᠤ ᠪᠣᠰᠬᠠᠭᠰᠠᠨ ᠳᠤ᠂ ᠲᠡᠭᠦᠨ ᠦ ᠬᠥᠯ ᠪᠠ ᠱᠠᠭᠠ ᠲᠡᠷᠡ ᠳᠠᠷᠤᠢ ᠬᠦᠴᠦ ᠣᠷᠣᠵᠤ᠂ 8 ᠦᠰᠦᠷᠦᠨ ᠪᠣᠰᠴᠤ ᠵᠣᠭᠰᠣᠭᠰᠠᠨ ᠢᠶᠠᠨ ᠠᠯᠬᠤᠵᠤ ᠡᠬᠢᠯᠡᠪᠡ᠃ ᠲᠡᠭᠡᠭᠡᠳ ᠲᠡᠷᠡ ᠳᠡᠪᠬᠡᠷᠴᠦ᠂ ᠪᠤᠷᠬᠠᠨ ᠢ ᠮᠠᠭᠲᠠᠨ ᠲᠡᠳᠡᠨ ᠲᠡᠢ ᠬᠠᠮᠲᠤ ᠣᠷᠳᠣᠨ ᠳᠤ ᠣᠷᠣᠯᠠ᠃ 9 ᠠᠷᠠᠳ ᠣᠯᠠᠨ ᠪᠦᠭᠦᠳᠡᠭᠡᠷ ᠲᠡᠭᠦᠨ ᠦ ᠠᠯᠬᠤᠨ ᠶᠠᠪᠤᠬᠤ ᠪᠠ ᠪᠤᠷᠬᠠᠨ ᠢ ᠮᠠᠭᠲᠠᠬᠤ ᠶᠢ ᠨᠢ ᠬᠠᠷᠠᠭᠠᠳ 10 ᠠᠷᠢᠭᠤᠨ ᠣᠷᠳᠣᠨ ᠤ ᠦᠵᠡᠰᠬᠦᠯᠡᠩᠲᠦ ᠬᠡᠮᠡᠬᠦ ᠬᠠᠭᠠᠯᠭᠠᠨ ᠤ ᠳᠡᠷᠭᠡᠳᠡ ᠰᠠᠭᠤᠵᠤ ᠭᠤᠶᠤᠯᠭᠠ ᠭᠤᠶᠤᠳᠠᠭ ᠬᠥᠮᠦᠨ ᠪᠠᠢᠭᠰᠠᠨ ᠢ ᠲᠠᠨᠢᠵᠤ᠂ ᠲᠣᠬᠢᠶᠠᠯᠳᠤᠭᠰᠠᠨ ᠶᠠᠪᠤᠳᠠᠯ ᠢ ᠨᠢ ᠶᠡᠬᠡᠳᠡ ᠬᠠᠴᠢᠷᠬᠠᠵᠤ ᠭᠠᠢᠬᠠᠪᠠ᠃
11 ᠲᠡᠷᠡ ᠡᠳᠡᠭᠡᠷᠡᠭᠰᠡᠨ ᠬᠥᠮᠦᠨ ᠰᠣᠯᠣᠮᠣᠨ ᠤ ᠬᠣᠩᠭᠢᠯ ᠭᠡᠭᠳᠡᠳᠡᠭ ᠭᠠᠵᠠᠷ ᠫᠧᠲ᠋ᠧᠷ᠂ ᠶᠣᠬᠠᠨ ᠬᠣᠶᠠᠷ ᠢ ᠰᠠᠯᠤᠯ ᠦᠭᠡᠢ ᠳᠠᠭᠠᠵᠤ ᠪᠠᠢᠬᠤ ᠳᠤ᠂ ᠭᠠᠢᠬᠠᠭᠰᠠᠨ ᠪᠦᠬᠦ ᠠᠷᠠᠳ ᠭᠦᠶᠦᠯᠳᠦᠨ ᠣᠴᠢᠯᠠ᠃ 12 ᠫᠧᠲ᠋ᠧᠷ ᠡᠭᠦᠨ ᠢ ᠬᠠᠷᠠᠭᠠᠳ᠂ ᠠᠷᠠᠳ ᠣᠯᠠᠨ ᠳᠤ᠄ 《ᠢᠰᠷᠧᠯᠴᠦᠳ ᠡ᠂ ᠶᠠᠭᠤᠨ ᠳᠤ ᠡᠭᠦᠨ ᠢ ᠭᠠᠢᠬᠠᠨᠠ ᠪᠤᠢ︖ ᠶᠠᠭᠤᠨ ᠳᠤ ᠪᠢᠳᠡᠨ ᠢ ᠰᠢᠷᠲᠡᠨᠡ ᠪᠤᠢ︖ ᠪᠢᠳᠡᠨ ᠢ ᠥᠪᠡᠷᠰᠡᠳ ᠦᠨ ᠢᠶᠠᠨ ᠴᠢᠳᠠᠯ ᠪᠠ ᠰᠦᠰᠦᠭ ᠢᠶᠡᠷ ᠡᠨᠡ ᠬᠥᠮᠦᠨ ᠢ ᠠᠯᠬᠤᠭᠤᠯᠤᠭᠰᠠᠨ ᠭᠡᠵᠦ ᠪᠣᠳᠣᠭᠠ ᠤᠤ︖ 13 ᠠᠪᠷᠠᠬᠠᠮ᠂ ᠢᠰᠠᠺ᠂ ᠶᠠᠺᠣᠪ ᠤᠨ ᠪᠤᠷᠬᠠᠨ᠂ ᠪᠢᠳᠡᠨ ᠦ ᠳᠡᠭᠡᠳᠦᠰ ᠦᠨ ᠪᠤᠷᠬᠠᠨ ᠥᠪᠡᠷ ᠦᠨ ᠵᠠᠷᠤᠴᠠ ᠢᠰᠦ᠋ᠰ ᠢ ᠠᠯᠳᠠᠷᠰᠢᠭᠤᠯᠤᠭᠰᠠᠨ ᠶᠤᠮ᠃ ᠲᠠ ᠨᠠᠷ ᠲᠡᠭᠦᠨ ᠢ ᠫᠢᠯᠠᠲ ᠲᠤ ᠲᠤᠰᠢᠶᠠᠵᠤ ᠥᠭᠭᠥᠭᠰᠡᠨ᠃ ᠫᠢᠯᠠᠲ ᠲᠡᠭᠦᠨ ᠢ ᠰᠤᠯᠠᠯᠠᠬᠤ ᠪᠠᠷ ᠰᠢᠢᠳᠦᠭᠰᠡᠨ ᠠᠲᠠᠯᠠ᠂ ᠲᠠ ᠨᠠᠷ ᠫᠢᠯᠠᠲ ᠤᠨ ᠡᠮᠦᠨᠡ ᠲᠡᠭᠦᠨ ᠢ ᠦᠭᠡᠶᠢᠰᠬᠡᠭᠰᠡᠨ᠂ 14 ᠲᠠ ᠨᠠᠷ ᠠᠷᠢᠭᠤᠨ᠂ ᠵᠥᠪᠲᠦ ᠨᠢᠭᠡᠨ ᠢ ᠦᠭᠡᠶᠢᠰᠬᠡᠵᠦ ᠶᠠᠷᠭᠠᠴᠢᠨ ᠢ ᠥᠷᠥᠰᠢᠶᠡᠬᠦ ᠶᠢ ᠭᠤᠶᠤᠭᠠᠳ 15 ᠠᠮᠢ ᠶᠢᠨ ᠡᠭᠦᠳᠦᠭᠴᠢ ᠶᠢ ᠠᠯᠠᠭᠰᠠᠨ ᠪᠢᠯᠡ᠃ ᠬᠠᠷᠢᠨ ᠪᠤᠷᠬᠠᠨ ᠲᠡᠭᠦᠨ ᠢ ᠦᠬᠦᠭᠰᠡᠳ ᠦᠨ ᠳᠤᠮᠳᠠ ᠠᠴᠠ ᠠᠮᠢᠯᠠᠭᠤᠯᠵᠠᠢ᠃ ᠪᠢᠳᠡ ᠨᠠᠷ ᠲᠡᠭᠦᠨ ᠦ ᠭᠡᠷᠡᠴᠢ ᠶᠤᠮ᠃ 16 ᠲᠠ ᠨᠠᠷ ᠤᠨ ᠣᠳᠣ ᠦᠵᠡᠵᠦ ᠪᠠᠢᠭᠠ ᠲᠠᠨᠢᠯ ᠬᠥᠮᠦᠨ ᠴᠢᠨᠢ ᠢᠰᠦ᠋ᠰ ᠤᠨ ᠨᠡᠷᠡ ᠳᠦ ᠢᠲᠡᠭᠡᠭᠰᠡᠨ ᠪᠥᠭᠡᠳ ᠢᠰᠦ᠋ᠰ ᠤᠨ ᠨᠡᠷᠡ ᠲᠡᠭᠦᠨ ᠢ ᠡᠳᠡᠭᠡᠭᠡᠭᠰᠡᠨ ᠶᠤᠮ᠃ ᠲᠡᠢᠮᠦ ᠡ᠂ ᠲᠠ ᠪᠦᠭᠦᠳᠡ ᠶᠢᠨ ᠦᠵᠡᠭᠰᠡᠨ ᠲᠡᠢ ᠠᠳᠠᠯᠢ ᠪᠠᠷ ᠢᠰᠦ᠋ᠰ ᠢᠶᠠᠷ ᠳᠠᠮᠵᠢᠨ ᠢᠷᠡᠭᠰᠡᠨ ᠢᠲᠡᠭᠡᠯ ᠡᠨᠡ ᠬᠥᠮᠦᠨ ᠳᠦ ᠡᠳᠡᠭᠡᠷᠡᠯ ᠢ ᠥᠭᠴᠡᠢ᠃
17 ᠠᠬᠠ ᠳᠡᠭᠦᠦ ᠨᠠᠷ ᠡ︕ ᠪᠢ ᠡᠭᠦᠨ ᠢ ᠮᠡᠳᠡᠨᠡ᠃ ᠲᠠ ᠨᠠᠷ ᠴᠤ᠂ ᠨᠣᠶᠠᠳ ᠴᠢᠨᠢ ᠴᠤ ᠮᠡᠳᠡᠭᠰᠡᠨ ᠦᠭᠡᠢ ᠪᠠᠷ ᠢᠩᠭᠢᠵᠦ ᠦᠢᠯᠡᠳᠦᠭᠰᠡᠨ᠂ 18 ᠬᠠᠷᠢᠨ ᠪᠤᠷᠬᠠᠨ ᠾᠷᠢᠰᠲ᠋ᠣᠰ ᠤᠨ ᠢᠶᠠᠨ ᠵᠣᠪᠠᠯᠠᠩ ᠠᠮᠰᠠᠬᠤ ᠶᠢ ᠪᠦᠬᠦ ᠡᠰᠢ ᠦᠵᠡᠭᠦᠯᠦᠭᠴᠢ ᠶᠢᠨ ᠠᠮᠠ ᠪᠠᠷ ᠤᠷᠢᠳᠴᠢᠯᠠᠨ ᠲᠤᠩ᠋ᠬᠠᠯᠠᠭᠰᠠᠨ ᠢᠶᠠᠨ ᠢᠩᠭᠢᠵᠦ ᠪᠡᠶᠡᠯᠡᠭᠦᠯᠦᠭᠰᠡᠨ ᠪᠠᠢᠨᠠ᠃ 19 ᠲᠠ ᠨᠠᠷ ᠣᠳᠣ ᠭᠡᠮᠰᠢᠵᠦ᠂ ᠪᠤᠷᠬᠠᠨ ᠤᠷᠤᠭᠤ ᠡᠷᠭᠢᠭᠡᠳ ᠭᠡᠮ ᠨᠢᠭᠦᠯ ᠢᠶᠡᠨ ᠤᠬᠢᠶᠠᠯᠭᠠ᠃ 20 ᠢᠩᠭᠢᠪᠡᠯ ᠰᠢᠨᠡᠴᠢᠯᠡᠭᠳᠡᠬᠦ ᠴᠠᠭ ᠡᠵᠡᠨ ᠦ ᠲᠡᠨᠳᠡ ᠡᠴᠡ ᠢᠷᠡᠵᠦ᠂ ᠡᠵᠡᠨ ᠲᠠ ᠨᠠᠷ ᠤᠨ ᠲᠥᠯᠥᠭᠡ ᠲᠣᠮᠢᠯᠠᠭᠰᠠᠨ ᠾᠷᠢᠰᠲ᠋ᠣᠰ ᠢᠰᠦ᠋ᠰ ᠢᠶᠠᠨ ᠢᠯᠡᠭᠡᠨᠡ᠃ 21 ᠭᠡᠬᠦ ᠳᠡᠭᠡᠨ ᠪᠤᠷᠬᠠᠨ ᠤ ᠬᠡᠴᠢᠨᠡᠨ ᠵᠢᠯ ᠤᠨ ᠡᠮᠦᠨᠡ ᠡᠴᠡ ᠡᠬᠢᠯᠡᠨ ᠠᠷᠢᠭᠤᠨ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠤᠨ ᠢᠶᠠᠨ ᠠᠮᠠ ᠪᠠᠷ ᠶᠠᠷᠢᠭᠰᠠᠨᠴᠢᠯᠠᠨ ᠠᠯᠢᠪᠠ ᠶᠢ ᠰᠡᠷᠭᠦᠭᠡᠬᠦ ᠪᠣᠯᠲᠠᠯᠠ ᠢᠰᠦ᠋ᠰ ᠲᠩᠷᠢ ᠳᠤ ᠪᠠᠢᠬᠤ ᠶᠣᠰᠣᠲᠠᠢ᠃ 22 ᠮᠣᠰᠧ ᠬᠡᠯᠡᠬᠦ ᠳᠡᠭᠡᠨ᠄ 〈ᠡᠵᠡᠨ ᠪᠤᠷᠬᠠᠨ ᠲᠠ ᠨᠠᠷ ᠤᠨ ᠲᠥᠯᠥᠭᠡ ᠨᠠᠳᠠ ᠰᠢᠭ᠋ ᠡᠰᠢ ᠦᠵᠡᠭᠦᠯᠦᠭᠴᠢ ᠶᠢ ᠠᠬᠠ ᠳᠡᠭᠦᠦᠰ ᠦᠨ ᠴᠢᠨᠢ ᠳᠤᠮᠳᠠ ᠠᠴᠠ ᠪᠣᠰᠬᠠᠨᠠ᠃ ᠲᠡᠭᠦᠨ ᠦ ᠬᠡᠯᠡᠬᠦ ᠪᠦᠬᠦᠨ ᠢ ᠲᠠ ᠨᠠᠷ ᠰᠣᠨᠣᠰᠬᠤ ᠤᠴᠢᠷᠲᠠᠢ᠃ 23 ᠡᠨᠡ ᠡᠰᠢ ᠦᠵᠡᠭᠦᠯᠦᠭᠴᠢ ᠶᠢᠨ ᠦᠭᠡ ᠶᠢ ᠰᠣᠨᠣᠰᠬᠤ ᠦᠭᠡᠢ ᠬᠥᠮᠦᠨ ᠪᠦᠷᠢ ᠠᠷᠠᠳ ᠲᠦᠮᠡᠨ ᠦ ᠪᠠᠨ ᠳᠤᠮᠳᠠ ᠠᠴᠠ ᠲᠠᠰᠤᠯᠤᠭᠳᠠᠬᠤ ᠪᠣᠯᠣᠨᠠ〉 ᠭᠡᠵᠡᠢ᠃ 24 ᠮᠥᠨ ᠰᠠᠮᠦ᠋ᠶᠧᠯ ᠡᠴᠡ ᠠᠪᠤᠭᠠᠳ ᠲᠡᠭᠦᠨ ᠡᠴᠡ ᠬᠣᠢᠰᠢᠬᠢ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠪᠦᠭᠦᠳᠡᠭᠡᠷ ᠡᠨᠡ ᠦᠶᠡ ᠶᠢ ᠤᠷᠢᠳᠴᠢᠯᠠᠨ ᠲᠤᠩ᠋ᠬᠠᠭᠯᠠᠭᠰᠠᠨ ᠶᠤᠮ᠃ 25 ᠲᠠ ᠨᠠᠷ ᠪᠣᠯ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠤᠨ ᠦᠷᠡ ᠬᠡᠦᠬᠡᠳ᠂ ᠪᠤᠷᠬᠠᠨ ᠤ ᠲᠠ ᠨᠠᠷ ᠤᠨ ᠳᠡᠭᠡᠳᠦᠰ ᠯᠦᠭᠡ ᠲᠠᠯᠪᠢᠭᠰᠠᠨ ᠭᠡᠷᠡ ᠶᠢᠨ ᠦᠷᠡ ᠬᠡᠦᠬᠡᠳ ᠮᠥᠨ᠃ ᠪᠤᠷᠬᠠᠨ ᠠᠪᠷᠠᠬᠠᠮ ᠳᠤ᠄ 〈ᠴᠢᠨᠦ ᠦᠷᠡ ᠤᠳᠤᠮ ᠢᠶᠠᠷ ᠳᠠᠮᠵᠢᠨ ᠭᠠᠵᠠᠷ ᠤᠨ ᠪᠦᠬᠦ ᠦᠨᠳᠦᠰᠦᠲᠡᠨ ᠢᠪᠡᠭᠡᠭᠳᠡᠨᠡ〉 ᠬᠡᠮᠡᠭᠰᠡᠨ ᠪᠠᠢᠳᠠᠭ᠃ 26 ᠪᠤᠷᠬᠠᠨ ᠬᠥᠮᠦᠨ ᠨᠢᠭᠡ ᠪᠦᠷᠢ ᠶᠢ ᠴᠢᠨᠢ ᠮᠠᠭᠤ ᠵᠠᠮ ᠠᠴᠠ ᠡᠷᠭᠢᠭᠦᠯᠵᠦ ᠲᠠ ᠨᠠᠷ ᠢ ᠢᠷᠥᠭᠡᠬᠦ ᠶᠢᠨ ᠲᠥᠯᠥᠭᠡ᠂ ᠥᠪᠡᠷ ᠦᠨ ᠢᠶᠠᠨ ᠵᠠᠷᠤᠴᠠ ᠢᠰᠦ᠋ᠰ ᠢ ᠡᠷᠭᠦᠵᠦ᠂ ᠡᠩ ᠲᠡᠷᠢᠭᠦᠨ ᠳᠦ ᠲᠠ ᠨᠠᠷ ᠲᠤ ᠢᠯᠡᠭᠡᠭᠰᠡᠨ》 ᠭᠡᠪᠡ᠃