ᠦᠢᠯᠡᠰ ᠬᠣᠷᠢᠨ ᠳᠥᠷᠪᠡ
ᠶᠦᠳᠠᠢᠴᠤᠳ ᠤᠨ ᠪᠤᠷᠤᠭᠤᠳᠬᠠᠯ ᠪᠠ ᠫᠠᠦ᠋ᠯ ᠤᠨ ᠥᠮᠥᠭᠯᠡᠯ
1 ᠲᠠᠪᠤᠨ ᠡᠳᠦᠷ ᠦᠨ ᠳᠠᠷᠠᠭᠠ᠂ ᠲᠡᠷᠢᠭᠦᠨ ᠲᠠᠬᠢᠯᠴᠢ ᠠᠨᠠᠨᠢᠶᠠ ᠬᠡᠳᠦᠨ ᠠᠬᠠᠯᠠᠭᠴᠢ ᠪᠠ ᠲᠧᠷᠲ᠋ᠦ᠋ᠯ ᠭᠡᠭᠴᠢ ᠬᠠᠤᠯᠢᠴᠢ ᠲᠠᠢ ᠬᠠᠮᠲᠤ ᠢᠷᠡᠪᠡ᠂ ᠲᠡᠳᠡ ᠵᠠᠬᠢᠷᠤᠭᠴᠢ ᠳᠤ ᠫᠠᠦ᠋ᠯ ᠢ ᠵᠠᠭᠠᠯᠳᠤᠵᠠᠢ᠃ 2 ᠫᠠᠦ᠋ᠯ ᠢ ᠳᠠᠭᠤᠳᠠᠨ ᠠᠪᠴᠢᠷᠠᠭᠰᠠᠨ ᠳᠤ᠂ ᠲᠧᠷᠲ᠋ᠦ᠋ᠯ ᠵᠠᠭᠠᠯᠳᠤᠵᠤ ᠡᠬᠢᠯᠡᠨ᠄ 3 《ᠡᠷᠬᠢᠮ ᠬᠦᠨᠳᠦᠲᠦ ᠹᠧᠯᠢᠺᠰ ᠡ︕ ᠪᠢᠳᠡ ᠲᠠᠨ ᠤ ᠠᠴᠢ ᠪᠠᠷ ᠶᠡᠬᠡ ᠠᠮᠤᠷ ᠲᠠᠢᠪᠤᠩ ᠢ ᠡᠳ᠋ᠯᠡᠵᠦ᠂ ᠲᠠᠨ ᠤ ᠬᠣᠯᠠᠴᠢ ᠤᠬᠠᠭᠠᠨ ᠢᠶᠠᠷ ᠡᠨᠡ ᠤᠯᠤᠰ ᠠᠮᠵᠢᠯᠲᠠ ᠣᠯᠣᠭᠰᠠᠨ ᠢ ᠬᠡᠵᠢᠶᠡ ᠴᠤ ᠬᠠᠮᠢᠭᠠ ᠴᠤ ᠰᠠᠨᠠᠨ ᠲᠠᠨ ᠳᠤ ᠬᠠᠮᠤᠭ ᠲᠠᠯᠠᠷᠬᠠᠯ ᠢᠶᠠᠨ ᠢᠯᠡᠷᠬᠡᠶᠢᠯᠡᠶᠡ᠃ 4 ᠲᠠᠨ ᠳᠤ ᠰᠠᠭᠠᠳ ᠦᠯᠦ ᠤᠴᠠᠷᠠᠭᠤᠯᠬᠤ ᠶᠢᠨ ᠲᠤᠯᠠᠳᠠ ᠪᠢᠳᠡᠨ ᠦ ᠲᠣᠪᠴᠢᠯᠠᠨ ᠬᠡᠯᠡᠬᠦ ᠦᠭᠡ ᠶᠢ ᠥᠷᠥᠰᠢᠶᠡᠵᠦ ᠰᠣᠨᠣᠰᠬᠤ ᠶᠢ ᠭᠤᠶᠤᠶᠠ᠃ 5 ᠡᠨᠡ ᠬᠥᠮᠦᠨ ᠪᠣᠯ ᠬᠢᠵᠢᠭ᠂ ᠪᠦᠬᠦ ᠳᠡᠯᠡᠬᠡᠢ ᠶᠢᠨ ᠶᠦᠳᠠᠢᠴᠤᠳ ᠤᠨ ᠳᠤᠮᠳᠠ ᠪᠣᠰᠣᠯᠭᠠ ᠭᠠᠷᠭᠠᠭᠴᠢ ᠪᠥᠭᠡᠳ ᠨᠠᠽᠠᠷᠧᠲ᠋ᠴᠤᠳ ᠭᠡᠭᠴᠢ ᠲᠡᠷᠰ ᠪᠦᠯᠦᠭ ᠦᠨ ᠲᠣᠯᠣᠭᠠᠢᠯᠠᠭᠴᠢ ᠭᠡᠳᠡᠭ ᠢ ᠪᠢᠳᠡ ᠣᠯᠵᠤ ᠮᠡᠳᠡᠭᠰᠡᠨ᠃ 6 ᠲᠡᠷᠡ ᠠᠷᠢᠭᠤᠨ ᠣᠷᠳᠣᠨ ᠢ ᠬᠦᠷᠲᠡᠯᠡ ᠪᠤᠵᠠᠷᠯᠠᠬᠤ ᠭᠡᠰᠡᠨ ᠲᠤᠯᠠ ᠪᠢᠳᠡ ᠲᠡᠭᠦᠨ ᠢ ᠪᠠᠷᠢᠭᠰᠠᠨ ᠶᠤᠮ᠃ 7 24 8 ᠲᠠ ᠥᠪᠡᠷ ᠢᠶᠡᠨ ᠲᠡᠭᠦᠨ ᠢ ᠪᠠᠢᠴᠠᠭᠠᠵᠤ ᠦᠵᠡᠪᠡᠯ ᠪᠢᠳᠡᠨ ᠦ ᠵᠠᠭᠠᠯᠳᠤᠵᠤ ᠪᠠᠢᠭᠠ ᠪᠦᠬᠦ ᠤᠴᠢᠷ ᠢ ᠯᠠᠪ ᠣᠢᠯᠠᠭᠠᠬᠤ ᠪᠣᠯᠣᠨᠠ》 ᠭᠡᠯᠡ᠃
9 ᠶᠦᠳᠠᠢᠴᠤᠳ ᠴᠤ᠄ 《ᠨᠡᠭᠡᠷᠡᠨ ᠲᠡᠢᠮᠦ ᠶᠤᠮ》 ᠭᠡᠵᠦ ᠬᠣᠰᠢᠭᠤ ᠨᠡᠮᠡᠵᠦ ᠪᠠᠲᠤᠯᠠᠪᠠ᠃
10 ᠵᠠᠬᠢᠷᠤᠭᠴᠢ ᠪᠠᠷ ᠫᠠᠦ᠋ᠯ ᠢ ᠶᠠᠷᠢᠭᠤᠯᠬᠤ ᠪᠠᠷ ᠲᠣᠯᠣᠭᠠᠢ ᠳᠣᠬᠢᠭᠰᠠᠨ ᠳᠤ᠂ ᠲᠡᠷᠡ᠄ 《ᠣᠯᠠᠨ ᠵᠢᠯ ᠤᠨ ᠲᠤᠷᠰᠢ ᠲᠠ ᠡᠨᠡ ᠤᠯᠤᠰ ᠲᠤ ᠵᠠᠷᠭᠤ ᠰᠢᠭᠦᠭᠴᠢ ᠪᠠᠢᠭᠰᠠᠭᠠᠷ ᠢᠷᠡᠭᠰᠡᠨ ᠢ ᠪᠢ ᠰᠠᠨᠠᠨ᠂ ᠤᠷᠮᠠ ᠲᠠᠢ ᠪᠠᠷ ᠥᠪᠡᠷ ᠢ ᠪᠠᠨ ᠥᠮᠥᠭᠯᠡᠶᠡ᠃ 11 ᠪᠢ ᠶᠧᠷᠦ᠋ᠰᠠᠯᠧᠮ ᠳᠤ ᠮᠥᠷᠭᠥᠬᠦ ᠪᠡᠷ ᠣᠴᠢᠭᠰᠠᠨ ᠠᠴᠠ ᠨᠠᠰᠢ ᠠᠷᠪᠠᠨ ᠬᠣᠶᠠᠷ ᠠᠴᠠ ᠢᠯᠡᠭᠦᠦ ᠬᠣᠨᠣᠭᠠ ᠦᠭᠡᠢ ᠶᠢ ᠲᠠ ᠯᠠᠪᠯᠠᠪᠠᠯ ᠮᠡᠳᠡᠵᠦ ᠪᠣᠯᠣᠨᠠ᠃ 12 ᠠᠷᠢᠭᠤᠨ ᠣᠷᠳᠣᠨ ᠳᠤ ᠬᠡᠨ ᠨᠢᠭᠡᠨ ᠲᠡᠢ ᠮᠠᠷᠭᠤᠯᠳᠤᠵᠤ ᠪᠠᠢᠭᠰᠠᠨ ᠢ ᠮᠢᠨᠢ᠂ ᠬᠤᠷᠠᠯ ᠤᠨ ᠲᠠᠩᠬᠢᠮ ᠳᠤ᠂ ᠡᠰᠡᠬᠦᠯᠡ ᠬᠣᠲᠠ ᠶᠢᠨ ᠥᠭᠡᠷᠡ ᠭᠠᠵᠠᠷ ᠲᠤ᠂ ᠣᠯᠠᠨ ᠬᠥᠮᠦᠨ ᠢ ᠥᠳᠥᠭᠡᠵᠦ ᠪᠠᠢᠭᠰᠠᠨ ᠢ ᠮᠢᠨᠢ ᠴᠤ ᠲᠡᠳᠡ ᠦᠵᠡᠵᠦ ᠪᠠᠢᠭᠠ ᠦᠭᠡᠢ ᠶᠤᠮ᠃ 13 ᠲᠡᠳᠡ ᠣᠳᠣ ᠨᠠᠮᠠᠶᠢ ᠵᠠᠭᠠᠯᠳᠤᠵᠤ ᠪᠠᠢᠭᠠ ᠴᠤ᠂ ᠲᠠᠨ ᠳᠤ ᠨᠣᠲᠠᠯᠠᠬᠤ ᠪᠠᠷᠢᠮᠲᠠ ᠥᠭᠴᠦ ᠴᠢᠳᠠᠬᠤ ᠦᠭᠡᠢ ᠪᠠᠢᠨᠠ᠃ 14 ᠣᠳᠣ ᠪᠢ ᠲᠠᠨ ᠳᠤ ᠨᠢᠭᠡ ᠵᠦᠢᠯ ᠢ ᠲᠣᠳᠣᠷᠬᠠᠢᠯᠠᠶᠠ᠃ ᠲᠡᠳᠡᠨ ᠦ ᠲᠡᠷᠰ ᠪᠦᠯᠦᠭ ᠭᠡᠵᠦ ᠬᠡᠯᠡᠳᠡᠭ ᠡᠨᠡ ᠵᠠᠮ ᠢᠶᠠᠷ ᠪᠢ ᠳᠡᠭᠡᠳᠦᠰ ᠦᠨ ᠢᠶᠠᠨ ᠪᠤᠷᠬᠠᠨ ᠳᠤ ᠦᠢᠯᠡᠴᠢᠯᠡᠳᠡᠭ᠌᠂ ᠮᠥᠨ ᠴᠤ ᠬᠠᠤᠯᠢ ᠪᠠ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠤᠨ ᠨᠣᠮ ᠳᠤ ᠪᠢᠴᠢᠭᠳᠡᠭᠰᠡᠨ ᠪᠦᠬᠦᠨ ᠳᠦ ᠢᠲᠡᠭᠡᠳᠡᠭ ᠪᠥᠭᠡᠳ 15 ᠵᠥᠪᠲᠦ ᠪᠠ ᠪᠤᠷᠤᠭᠤᠲᠤ ᠬᠥᠮᠦᠰ ᠪᠦᠭᠦᠳᠡᠭᠡᠷ ᠢᠶᠡᠨ ᠠᠮᠢᠯᠠᠨᠠ ᠭᠡᠵᠦ ᠲᠡᠳᠡᠨ ᠦ ᠨᠠᠢᠳᠠᠳᠠᠭᠴᠢᠯᠠᠨ ᠪᠢ ᠴᠤ ᠪᠤᠷᠬᠠᠨ ᠳᠤ ᠡᠷᠡᠮᠡᠯᠵᠡᠯ ᠲᠠᠯᠪᠢᠳᠠᠭ᠃ 16 ᠡᠢᠮᠦ ᠡᠴᠡ ᠪᠢ ᠪᠤᠷᠬᠠᠨ ᠪᠠ ᠬᠥᠮᠦᠰ ᠦᠨ ᠡᠮᠦᠨᠡ ᠭᠡᠮ ᠵᠢᠮ ᠦᠭᠡᠢ ᠮᠥᠰᠥ ᠴᠢᠨᠠᠷ ᠲᠠᠢ ᠪᠠᠢᠬᠤ ᠶᠢ ᠦᠷᠭᠦᠯᠵᠢ ᠬᠢᠴᠢᠶᠡᠳᠡᠭ ᠪᠢᠯᠡ᠃ 17 ᠣᠯᠠᠨ ᠵᠢᠯ ᠤᠨ ᠳᠠᠷᠠᠭᠠ᠂ ᠪᠢ ᠠᠷᠠᠳ ᠲᠦᠮᠡᠨ ᠳᠡᠭᠡᠨ ᠥᠭᠯᠢᠭᠡ ᠥᠭᠴᠦ᠂ ᠪᠤᠷᠬᠠᠨ ᠳᠤ ᠡᠷᠭᠦᠯ ᠡᠷᠭᠦᠶᠡ ᠭᠡᠵᠦ ᠪᠤᠴᠠᠵᠤ ᠢᠷᠡᠭᠰᠡᠨ ᠪᠢᠯᠡ᠃ 18 ᠪᠢ ᠠᠷᠢᠭᠤᠨ ᠣᠷᠳᠣᠨ ᠤ ᠳᠣᠲᠣᠷᠠ ᠴᠡᠪᠡᠷᠰᠢᠬᠦ ᠶᠣᠰᠣᠯᠠᠯ ᠢᠶᠠᠨ ᠭᠦᠢᠴᠡᠭᠡᠭᠰᠡᠨ ᠦ ᠳᠠᠷᠠᠭᠠ᠂ ᠡᠷᠭᠦᠯ ᠡᠷᠭᠦᠵᠦ ᠪᠠᠢᠬᠤ ᠳᠤ ᠲᠡᠳᠡ ᠨᠠᠮᠠᠶᠢ ᠬᠠᠷᠠᠵᠠᠢ᠃ ᠲᠡᠨᠳᠡ ᠴᠤᠭᠯᠠᠷᠠᠭᠰᠠᠨ ᠬᠥᠮᠦᠰ ᠴᠤ ᠦᠭᠡᠢ᠂ ᠦᠢᠮᠡᠭᠡᠨ ᠴᠤ ᠦᠭᠡᠢ᠂ 19 ᠬᠠᠷᠢᠨ ᠠᠽᠢᠶᠠ ᠮᠤᠵᠢ ᠡᠴᠡ ᠢᠷᠡᠭᠰᠡᠨ ᠬᠡᠰᠡᠭ ᠶᠦᠳᠠᠢᠴᠤᠳ ᠯᠠ ᠪᠠᠢᠭᠰᠠᠨ᠃ ᠬᠡᠷᠪᠡ ᠲᠡᠳᠡᠨ ᠳᠦ ᠨᠠᠮᠠᠶᠢ ᠡᠰᠡᠷᠭᠦᠴᠡᠬᠦ ᠵᠦᠢᠯ ᠪᠠᠢᠭᠰᠠᠨ ᠪᠣᠯ ᠥᠪᠡᠷᠰᠡᠳ ᠢᠶᠡᠨ ᠲᠠᠨ ᠳᠤ ᠢᠷᠡᠵᠦ ᠵᠠᠭᠠᠯᠳᠤᠬᠤ ᠪᠠᠢᠭᠰᠠᠨ᠃ 20 ᠡᠰᠡᠬᠦᠯᠡ ᠨᠠᠮᠠᠶᠢ ᠰᠢᠭᠦᠬᠦ ᠵᠥᠪᠯᠡᠯ ᠦᠨ ᠡᠮᠦᠨᠡ ᠵᠣᠭᠰᠣᠵᠤ ᠪᠠᠢᠬᠤ ᠳᠤ᠂ ᠨᠠᠳᠠ ᠠᠴᠠ ᠶᠠᠮᠠᠷ ᠨᠢᠭᠡᠨ ᠪᠤᠷᠤᠭᠤ ᠶᠢ ᠣᠯᠣᠭᠠᠳ ᠥᠪᠡᠷᠰᠡᠳ ᠢᠶᠡᠨ ᠲᠠᠨ ᠳᠤ ᠬᠡᠯᠡᠬᠦ ᠪᠠᠢᠭᠰᠠᠨ᠃ 21 ᠪᠢ ᠲᠡᠳᠡᠨ ᠦ ᠳᠤᠮᠳᠠ ᠵᠣᠭᠰᠣᠵᠤ ᠪᠠᠢᠬᠤ ᠳᠠᠭᠠᠨ᠄ 〈ᠪᠢ ᠥᠨᠥᠳᠥᠷ ᠦᠬᠦᠭᠰᠡᠳ ᠦᠨ ᠠᠮᠢᠯᠠᠯᠲᠠ ᠶᠢᠨ ᠲᠠᠯᠠ ᠪᠠᠷ ᠲᠠ ᠨᠠᠷ ᠤᠨ ᠡᠮᠦᠨᠡ ᠰᠢᠭᠦᠭᠳᠡᠵᠦ ᠪᠠᠢᠨᠠ〉 ᠭᠡᠵᠦ ᠯᠠ ᠬᠠᠰᠬᠢᠷᠤᠭᠰᠠᠨ ᠲᠡᠳᠦᠢ ᠶᠤᠮ》 ᠭᠡᠵᠦ ᠶᠠᠷᠢᠯᠠ᠃
22 ᠡᠨᠡ ᠵᠠᠮ ᠤᠨ ᠲᠠᠯᠠ ᠪᠠᠷ ᠹᠧᠯᠢᠺᠰ ᠨᠠᠷᠢᠨ ᠮᠡᠳᠡᠳᠡᠭ ᠪᠣᠯᠪᠠᠴᠤ 《ᠮᠢᠩ᠋ᠭᠠᠲᠤ ᠶᠢᠨ ᠳᠠᠷᠤᠭᠠ ᠯᠦᠰᠢᠶᠠ ᠢᠷᠡᠪᠡᠯ ᠲᠠ ᠨᠠᠷ ᠤᠨ ᠬᠡᠷᠡᠭ ᠢ ᠰᠢᠢᠳᠪᠦᠷᠢᠯᠡᠶᠡ》 ᠬᠡᠮᠡᠨ ᠰᠢᠭᠦᠬᠦ ᠪᠡᠨ ᠬᠣᠢᠰᠢᠯᠠᠭᠤᠯᠵᠠᠢ᠃ 23 ᠲᠡᠷᠡ ᠵᠠᠭᠤᠲᠤ ᠶᠢᠨ ᠳᠠᠷᠤᠭᠠ ᠳᠤ ᠲᠤᠰᠢᠶᠠᠨ ᠫᠠᠦ᠋ᠯ ᠢ ᠬᠣᠷᠢᠬᠤ ᠳᠠᠭᠠᠨ ᠴᠢᠯᠥᠭᠡ ᠲᠠᠢ ᠪᠠᠢᠯᠭᠠᠵᠤ᠂ ᠨᠠᠢᠵᠠ ᠨᠥᠬᠥᠳ ᠨᠢ ᠢᠷᠡᠵᠦ ᠲᠤᠰᠠᠯᠠᠬᠤ ᠶᠢ ᠪᠢᠲᠡᠭᠡᠢ ᠬᠣᠷᠢᠭᠯᠠ ᠭᠡᠪᠡ᠃
24 ᠬᠡᠳᠦᠨ ᠡᠳᠦᠷ ᠦᠨ ᠳᠠᠷᠠᠭᠠ᠂ ᠹᠧᠯᠢᠺᠰ ᠥᠪᠡᠷ ᠦᠨ ᠡᠬᠡᠨᠡᠷ ᠶᠦᠳᠠᠢ ᠪᠦᠰᠡᠭᠦᠢ ᠳ᠋ᠷᠦ᠋ᠰᠢᠯᠠ ᠲᠠᠢ ᠪᠠᠨ ᠬᠠᠮᠲᠤ ᠢᠷᠡᠭᠡᠳ ᠫᠠᠦ᠋ᠯ ᠢ ᠳᠠᠭᠤᠳᠠᠭᠤᠯᠵᠤ᠂ ᠾᠷᠢᠰᠲ᠋ᠣᠰ ᠢᠰᠦ᠋ᠰ ᠲᠤ ᠢᠲᠡᠭᠡᠬᠦ ᠢᠲᠡᠭᠡᠯ ᠦᠨ ᠲᠠᠯᠠ ᠪᠠᠷ ᠰᠣᠨᠣᠰᠪᠠ᠃ 25 ᠫᠠᠦ᠋ᠯ ᠵᠥᠪᠲᠦ ᠪᠠᠢᠳᠠᠯ᠂ ᠪᠡᠶᠡ ᠪᠡᠨ ᠵᠠᠬᠢᠷᠬᠤ ᠬᠡᠷᠡᠭ ᠪᠣᠯᠣᠨ ᠬᠣᠵᠢᠮ ᠪᠣᠯᠬᠤ ᠰᠢᠭᠦᠯᠲᠡ ᠶᠢᠨ ᠲᠤᠬᠠᠢ ᠰᠤᠷᠭᠠᠮᠵᠢᠯᠠᠭᠰᠠᠨ ᠳᠤ᠂ ᠹᠧᠯᠢᠺᠰ ᠠᠶᠤᠵᠤ᠄ 《ᠣᠳᠣ ᠪᠣᠯᠣᠯᠠ︕ ᠴᠢ ᠶᠠᠪᠤᠵᠤ ᠪᠣᠯᠣᠨᠠ᠂ ᠵᠠᠪ ᠲᠠᠢ ᠦᠶᠡ ᠳᠡᠭᠡᠨ ᠪᠢ ᠴᠢᠮᠠᠶᠢ ᠳᠠᠭᠤᠳᠠᠶᠠ》 ᠭᠡᠵᠡᠢ᠃ 26 ᠹᠧᠯᠢᠺᠰ ᠪᠠᠰᠠ ᠫᠠᠦ᠋ᠯ ᠡᠴᠡ ᠵᠣᠭᠣᠰ ᠮᠥᠩᠭᠥ ᠣᠯᠬᠤ ᠶᠢ ᠭᠣᠷᠢᠳᠠᠨ ᠲᠡᠭᠦᠨ ᠢ ᠪᠠᠢᠨ ᠳᠠᠬᠢᠨ ᠳᠠᠭᠤᠳᠠᠨ ᠶᠠᠷᠢᠯᠴᠠᠳᠠᠭ ᠪᠠᠢᠯᠠ᠃ 27 ᠬᠣᠶᠠᠷ ᠵᠢᠯ ᠪᠣᠯᠣᠭᠰᠠᠨᠠ᠂ ᠹᠧᠯᠢᠺᠰ ᠤᠨ ᠲᠤᠰᠢᠶᠠᠯ ᠳᠤ ᠫᠣᠷᠺᠢᠣ᠋ ᠹᠧᠰᠲ ᠭᠠᠷᠴᠠᠢ᠃ ᠹᠧᠯᠢᠺᠰ ᠶᠦᠳᠠᠢᠴᠤᠳ ᠲᠤ ᠲᠠᠯᠠ ᠵᠠᠰᠠᠬᠤ ᠶᠢ ᠬᠦᠰᠡᠨ ᠫᠠᠦ᠋ᠯ ᠢ ᠬᠣᠷᠢᠭᠰᠠᠭᠠᠷ ᠪᠠᠢᠪᠠ᠃