ᠦᠢᠯᠡᠰ ᠠᠷᠪᠠ ᠶᠢᠰᠦ
ᠧᠹᠧᠰ ᠲᠤ ᠪᠠᠶᠠᠷ ᠤᠨ ᠮᠡᠳᠡᠭᠡ ᠲᠠᠷᠬᠠᠭᠠᠭᠰᠠᠨ ᠨᠢ
1 ᠠᠫᠣᠯᠣ᠋ ᠺᠣᠷᠢᠨᠲ ᠲᠤ ᠪᠠᠢᠬᠤ ᠳᠤ᠂ ᠫᠠᠦ᠋ᠯ ᠤᠮᠠᠷᠠᠲᠤ ᠣᠷᠣᠨ ᠢᠶᠠᠷ ᠶᠠᠪᠤᠭᠰᠠᠭᠠᠷ ᠧᠹᠧᠰ ᠲᠤ ᠬᠦᠷᠴᠦ ᠬᠡᠳᠦᠨ ᠱᠠᠪᠢ ᠲᠠᠢ ᠠᠭᠤᠯᠵᠠᠭᠠᠳ᠄ 2 《ᠲᠠ ᠨᠠᠷ ᠢᠲᠡᠭᠡᠬᠦ ᠳᠡᠭᠡᠨ 19 ᠠᠷᠢᠭᠤᠨ ᠰᠦᠨᠡᠰᠦ ᠶᠢ ᠬᠦᠷᠲᠡᠭᠰᠡᠨ ᠤᠤ︖》 ᠭᠡᠰᠡᠨ ᠳᠦ᠂ ᠲᠡᠳᠡ᠄ 《ᠦᠭᠡᠢ᠂ ᠠᠷᠢᠭᠤᠨ ᠰᠦᠨᠡᠰᠦ ᠪᠠᠢᠳᠠᠭ ᠢ ᠴᠤ ᠰᠣᠨᠣᠰᠣᠭᠠ ᠦᠭᠡᠢ》 ᠭᠡᠵᠦ ᠬᠠᠷᠢᠭᠤᠯᠪᠠ᠃ 3 ᠫᠠᠦ᠋ᠯ᠄ 《ᠲᠡᠭᠡᠪᠡᠯ ᠲᠠ ᠨᠠᠷ ᠶᠠᠮᠠᠷ ᠤᠬᠢᠶᠠᠯ ᠬᠦᠷᠲᠡᠭᠰᠡᠨ ᠪᠤᠢ︖》 ᠭᠡᠬᠦ ᠳᠦ᠂ ᠲᠡᠳᠡ᠄ 《ᠶᠣᠬᠠᠨ ᠤ ᠤᠬᠢᠶᠠᠯ》 ᠭᠡᠯᠡ᠃ 4 ᠫᠠᠦ᠋ᠯ᠄ 《ᠶᠣᠬᠠᠨ ᠭᠡᠮᠰᠢᠯ ᠤᠨ ᠤᠬᠢᠶᠠᠯ ᠬᠦᠷᠲᠡᠭᠡᠭᠰᠡᠨ᠂ ᠬᠠᠷᠢᠨ ᠲᠡᠷᠡ ᠠᠷᠠᠳ ᠲᠦᠮᠡᠨ ᠳᠦ ᠮᠢᠨᠦ ᠬᠣᠢᠨᠠ ᠠᠴᠠ ᠢᠷᠡᠭᠴᠢ ᠳᠤ ᠢᠲᠡᠭᠡᠭᠲᠦᠨ ᠭᠡᠰᠡᠨ᠂ ᠲᠡᠷᠡ ᠨᠢ ᠢᠰᠦ᠋ᠰ ᠪᠢᠯᠡ》 ᠭᠡᠵᠡᠢ᠃ 5 ᠲᠡᠳᠡ ᠡᠭᠦᠨ ᠢ ᠰᠣᠨᠣᠰᠣᠭᠠᠳ ᠡᠵᠡᠨ ᠢᠰᠦ᠋ᠰ ᠤᠨ ᠨᠡᠷᠡ ᠪᠡᠷ 20 ᠤᠬᠢᠶᠠᠯ ᠬᠦᠷᠲᠡᠪᠡ᠃ 6 ᠫᠠᠦ᠋ᠯ ᠲᠡᠳᠡᠨ ᠦ ᠳᠡᠭᠡᠷᠡ ᠭᠠᠷ ᠢᠶᠠᠨ ᠲᠠᠯᠪᠢᠬᠤ ᠳᠤ᠂ ᠠᠷᠢᠭᠤᠨ ᠰᠦᠨᠡᠰᠦ ᠲᠡᠳᠡᠨ ᠦ ᠳᠡᠭᠡᠷᠡ ᠪᠠᠭᠤᠵᠤ᠂ ᠲᠡᠳᠡ ᠥᠭᠡᠷᠡ ᠬᠡᠯᠡ ᠨᠦᠭᠦᠳ ᠢᠶᠡᠷ ᠶᠠᠷᠢᠵᠤ ᠪᠠᠰᠠ ᠡᠰᠢ ᠦᠵᠡᠭᠦᠯᠵᠦ ᠡᠬᠢᠯᠡᠯᠡ᠃ 7 ᠲᠡᠨᠳᠡ ᠠᠷᠪᠠᠨ ᠬᠣᠶᠠᠷ ᠣᠷᠴᠢᠮ ᠬᠥᠮᠦᠨ ᠪᠠᠢᠭᠰᠠᠨ᠃
8 ᠫᠠᠦ᠋ᠯ ᠬᠤᠷᠠᠯ ᠤᠨ ᠲᠠᠩᠬᠢᠮ ᠳᠤ ᠣᠷᠣᠵᠤ ᠪᠤᠷᠬᠠᠨ ᠤ ᠬᠠᠭᠠᠨᠴᠢᠯᠠᠯ ᠤᠨ ᠲᠤᠬᠠᠢ ᠰᠤᠷᠭᠠᠨ ᠢᠳᠬᠠᠵᠤ ᠭᠤᠷᠪᠠᠨ ᠰᠠᠷᠠ ᠶᠢᠨ ᠲᠤᠷᠰᠢ ᠵᠣᠷᠢᠭᠲᠠᠢ ᠶᠠᠷᠢᠵᠠᠢ᠃ 9 ᠭᠡᠪᠡᠴᠦ ᠵᠠᠷᠢᠮ ᠨᠢ ᠵᠥᠷᠢᠭᠦᠳᠯᠡᠭᠡᠳ ᠢᠳᠬᠠᠯ ᠢ ᠠᠪᠤᠭᠠ ᠦᠭᠡᠢ᠂ ᠲᠡᠳᠡ ᠣᠯᠠᠨ ᠤ ᠡᠮᠦᠨᠡ ᠡᠨᠡ ᠵᠠᠮ ᠢ ᠮᠠᠭᠤᠯᠠᠵᠠᠢ᠃ ᠫᠠᠦ᠋ᠯ ᠲᠡᠳᠡᠨ ᠡᠴᠡ ᠰᠠᠯᠵᠤ ᠱᠠᠪᠢ ᠨᠠᠷ ᠢᠶᠠᠨ ᠳᠠᠭᠠᠭᠤᠯᠤᠨ ᠲᠦᠷᠠᠨ ᠤ ᠲᠠᠩᠬᠢᠮ ᠳᠤ ᠡᠳᠦᠷ ᠪᠦᠷᠢ ᠨᠣᠮᠯᠠᠪᠠ 21 ᠃ 10 ᠢᠩᠭᠢᠵᠦ ᠬᠣᠶᠠᠷ ᠵᠢᠯ ᠪᠣᠯᠣᠭᠰᠠᠨ ᠳᠤ᠂ ᠠᠽᠢᠶᠠ ᠳᠤ ᠰᠠᠭᠤᠭᠠ ᠶᠦᠳᠠᠢᠴᠤᠳ᠂ ᠭᠷᠧᠭᠴᠦᠳ ᠭᠡᠰᠡᠨ ᠦᠭᠡᠢ ᠬᠥᠮᠦᠨ ᠪᠦᠬᠦᠨ ᠡᠵᠡᠨ ᠦ ᠦᠭᠡ ᠶᠢ ᠳᠤᠭᠤᠯᠵᠠᠢ᠃
ᠧᠹᠧᠰ ᠲᠤ ᠪᠣᠯᠣᠭᠰᠠᠨ ᠭᠠᠢᠬᠠᠮᠰᠢᠭ ᠤᠳ
11 ᠪᠤᠷᠬᠠᠨ ᠫᠠᠦ᠋ᠯ ᠤᠨ ᠭᠠᠷ ᠢᠶᠠᠷ ᠳᠠᠮᠵᠢᠭᠤᠯᠤᠨ ᠶᠡᠷᠦ ᠪᠤᠰᠤ ᠶᠢᠨ ᠰᠢᠳᠢ ᠲᠡᠮᠳᠡᠭ ᠤᠳ ᠢ ᠦᠢᠯᠡᠳᠴᠦ ᠪᠠᠢᠪᠠ᠃ 12 ᠬᠥᠮᠦᠰ ᠫᠠᠦ᠋ᠯ ᠤᠨ ᠠᠷᠠᠰᠤᠨ ᠳᠤ ᠬᠦᠷᠦᠭᠰᠡᠨ ᠠᠯᠴᠢᠭᠤᠷ ᠪᠤᠶᠤ ᠬᠣᠷᠮᠣᠢᠪᠴᠢ ᠶᠢ ᠠᠪᠤᠭᠠᠳ ᠡᠪᠡᠳᠴᠢᠲᠡᠨ ᠦ ᠳᠡᠭᠡᠷᠡ ᠲᠠᠯᠪᠢᠬᠤ ᠳᠤ᠂ ᠡᠪᠡᠳᠴᠢᠨ ᠨᠢ ᠠᠷᠢᠯᠵᠤ ᠮᠠᠭᠤ ᠴᠢᠳᠬᠥᠷ ᠤᠳ ᠴᠤ ᠵᠠᠢᠯᠠᠵᠤ ᠪᠠᠢᠯᠠ᠃ 13 ᠲᠡᠷᠡ ᠦᠶᠡ ᠳᠦ᠂ ᠵᠣᠷᠴᠢᠨ ᠶᠠᠪᠤᠵᠤ ᠴᠢᠳᠬᠥᠷ ᠵᠠᠢᠯᠠᠭᠤᠯᠤᠭᠴᠢ ᠬᠡᠰᠡᠭ ᠶᠦᠳᠠᠢᠴᠤᠳ ᠴᠤ ᠴᠢᠳᠬᠥᠷ ᠣᠷᠣᠰᠢᠭᠰᠠᠨ ᠬᠥᠮᠦᠰ ᠳᠡᠭᠡᠷᠡ᠄ 《ᠫᠠᠦ᠋ᠯ ᠤᠨ ᠲᠤᠩ᠋ᠬᠠᠭᠯᠠᠳᠠᠭ ᠢᠰᠦ᠋ᠰ ᠢᠶᠠᠷ ᠪᠢ ᠲᠠ ᠨᠠᠷ ᠲᠤ ᠲᠤᠰᠢᠶᠠᠶᠠ︕》 ᠭᠡᠵᠦ ᠡᠵᠡᠨ ᠢᠰᠦ᠋ᠰ ᠤᠨ ᠨᠡᠷᠡ ᠶᠢ ᠳᠠᠭᠤᠳᠠᠬᠤ ᠪᠠᠷ ᠣᠷᠣᠯᠳᠤᠪᠠ᠃ 14 ᠡᠢᠨ ᠬᠦ ᠦᠢᠯᠡᠳᠦᠭᠰᠡᠳ ᠨᠢ ᠶᠦᠳᠠᠢ ᠶᠢᠨ ᠲᠡᠷᠢᠭᠦᠨ ᠲᠠᠬᠢᠯᠴᠢ ᠰᠧᠺᠦ᠋ᠶᠠ ᠶᠢᠨ ᠳᠣᠯᠣᠭᠠᠨ ᠬᠦᠦ ᠪᠠᠢᠪᠠ᠃ 15 ᠨᠢᠭᠡᠨ ᠡᠳᠦᠷ᠂ ᠴᠢᠳᠬᠥᠷ᠄ 《ᠪᠢ ᠢᠰᠦ᠋ᠰ ᠢ ᠮᠡᠳᠡᠨᠡ᠂ ᠫᠠᠦ᠋ᠯ ᠢ ᠴᠤ ᠲᠠᠨᠢᠨᠠ᠃ ᠬᠠᠷᠢᠨ ᠲᠠ ᠨᠠᠷ ᠬᠡᠨ ᠪᠤᠢ︖》 ᠭᠡᠵᠦ ᠬᠠᠷᠢᠭᠤᠯᠤᠩ᠋ᠭᠤᠲᠠ 16 ᠴᠢᠳᠬᠥᠷ ᠣᠷᠣᠰᠢᠭᠰᠠᠨ ᠬᠥᠮᠦᠨ ᠲᠡᠳᠡᠨ ᠤᠷᠤᠭᠤ ᠦᠰᠦᠷᠦᠨ ᠡᠵᠡᠮᠳᠡᠵᠦ᠂ ᠬᠦᠴᠦ ᠪᠡᠷ ᠢᠶᠠᠨ ᠲᠠᠢᠯᠵᠠᠢ᠃ ᠴᠠᠭᠠᠳᠤᠭᠤᠯᠠ ᠨᠢ ᠰᠢᠷᠬᠠᠲᠤᠵᠤ ᠲᠡᠷᠡ ᠭᠡᠷ ᠡᠴᠡ ᠨᠢᠴᠦᠭᠦᠨ ᠵᠢᠭᠤᠲᠠᠪᠠ᠃ 17 ᠧᠹᠧᠰ ᠲᠤ ᠰᠠᠭᠤᠭᠠ ᠶᠦᠳᠠᠢᠴᠤᠳ ᠪᠠ ᠭᠷᠧᠭᠴᠦᠳ ᠡᠭᠦᠨ ᠢ ᠰᠣᠨᠣᠰᠣᠭᠠᠳ ᠪᠦᠭᠦᠳᠡᠭᠡᠷ ᠠᠶᠤᠵᠤ᠂ ᠡᠵᠡᠨ ᠢᠰᠦ᠋ᠰ ᠤᠨ ᠨᠡᠷᠡ ᠶᠢ ᠮᠠᠨᠳᠤᠭᠤᠯᠪᠠ᠃ 18 ᠣᠯᠠᠨ ᠬᠥᠮᠦᠨ ᠢᠲᠡᠭᠡᠭᠰᠡᠨ ᠦ ᠪᠠᠨ ᠳᠠᠷᠠᠭᠠ ᠢᠷᠡᠵᠦ᠂ ᠬᠢᠭᠰᠡᠨ ᠬᠡᠷᠡᠭ ᠢᠶᠡᠨ ᠬᠦᠯᠢᠶᠡᠨ ᠥᠴᠢᠵᠡᠢ᠃ 19 ᠣᠯᠠᠨ ᠶᠢᠯᠸᠢᠴᠢᠨ ᠨᠣᠮ ᠢᠶᠠᠨ ᠴᠤᠭᠯᠠᠭᠤᠯᠵᠤ ᠪᠦᠭᠦᠳᠡ ᠶᠢᠨ ᠡᠮᠦᠨᠡ ᠰᠢᠲᠠᠭᠠᠪᠠ᠃ ᠨᠣᠮ ᠤᠨ ᠦᠨᠡ ᠶᠢ ᠲᠣᠭᠠᠴᠠᠯᠠᠪᠠᠯ ᠨᠡᠢᠲᠡ ᠲᠠᠪᠤᠨ ᠲᠦᠮᠡᠨ ᠮᠥᠩᠭᠥᠨ ᠵᠣᠭᠣᠰ 22 ᠪᠠᠢᠯᠠ᠃ 20 ᠡᠢᠨ ᠬᠦ ᠡᠵᠡᠨ ᠦ ᠦᠭᠡ ᠬᠦᠴᠦᠲᠡᠢ ᠳᠡᠯᠭᠡᠷᠡᠵᠦ ᠪᠡᠬᠢᠵᠢᠪᠡ᠃
21 ᠡᠳᠡᠭᠡᠷ ᠶᠠᠪᠤᠳᠠᠯ ᠤᠨ ᠳᠠᠷᠠᠭᠠ᠂ ᠫᠠᠦ᠋ᠯ ᠮᠠᠺᠧᠳᠣᠨᠢᠶᠠ ᠪᠣᠯᠣᠨ ᠠᠺᠠᠢᠶᠠ ᠪᠠᠷ ᠳᠠᠭᠠᠷᠢᠨ ᠶᠧᠷᠦ᠋ᠰᠠᠯᠧᠮ ᠳᠤ ᠣᠴᠢᠬᠤ ᠪᠠᠷ ᠰᠡᠳᠬᠢᠯ ᠰᠢᠭᠤᠳᠤᠨ᠄ 《ᠪᠢ ᠲᠡᠨᠳᠡ ᠬᠦᠷᠦᠭᠰᠡᠨ ᠦ ᠳᠠᠷᠠᠭᠠ᠂ ᠷᠣᠮᠠ ᠶᠢ ᠴᠤ ᠦᠵᠡᠬᠦ ᠶᠣᠰᠣᠲᠠᠢ》 ᠭᠡᠯᠡ᠃ 22 ᠲᠡᠷᠡ ᠥᠪᠡᠷ ᠢ ᠨᠢ ᠲᠤᠰᠠᠯᠠᠭᠴᠢᠳ ᠤᠨ ᠳᠤᠮᠳᠠ ᠠᠴᠠ ᠲᠢᠮᠣᠲ᠂ ᠧᠷᠠᠰᠲ ᠬᠣᠶᠠᠷ ᠢ ᠮᠠᠺᠧᠳᠣᠨᠢᠶᠠ ᠳᠤ ᠶᠠᠪᠤᠭᠤᠯᠵᠤ᠂ ᠥᠪᠡᠷ ᠢᠶᠡᠨ ᠠᠽᠢᠶᠠ ᠮᠤᠵᠢ ᠳᠤ ᠲᠦᠷ ᠰᠠᠭᠤᠪᠠ᠃
ᠬᠢᠮᠡᠯ ᠰᠢᠲᠦᠭᠡᠨ ᠪᠠ ᠦᠢᠮᠡᠭᠡᠨ
23 ᠲᠡᠷᠡ ᠦᠶᠡ ᠳᠦ᠂ ᠡᠨᠡ ᠵᠠᠮ ᠠᠴᠠ ᠪᠣᠯᠵᠤ ᠪᠠᠭᠠ ᠦᠭᠡᠢ ᠦᠢᠮᠡᠭᠡᠨ ᠪᠣᠯᠵᠠᠢ᠃ 24 ᠳ᠋ᠧᠮᠧᠲ᠋ᠷᠢ ᠭᠡᠳᠡᠭ ᠮᠥᠩᠭᠥᠨ ᠳᠠᠷᠬᠠᠨ ᠠᠷᠲ᠋ᠧᠮᠢ 23 ᠳᠠᠭᠢᠨᠢ ᠶᠢᠨ ᠭᠦᠩ᠋ᠭᠠᠷᠪᠠ ᠨᠦᠭᠦᠳ ᠢ ᠮᠥᠩᠭᠥ ᠪᠡᠷ ᠬᠢᠵᠦ ᠤᠷᠠᠴᠤᠳ ᠲᠠᠭᠠᠨ ᠪᠠᠭᠠ ᠦᠭᠡᠢ ᠣᠷᠣᠯᠭᠠ ᠠᠪᠴᠢᠷᠠᠳᠠᠭ ᠪᠠᠢᠪᠠ᠃ 25 ᠲᠡᠷᠡ ᠠᠵᠢᠯᠴᠢᠳ ᠪᠠ ᠮᠡᠷᠭᠡᠵᠢᠯ ᠨᠢᠭᠡᠲᠡᠳ ᠢᠶᠡᠨ ᠴᠤᠭᠯᠠᠭᠤᠯᠤᠭᠠᠳ᠄ 《ᠬᠥᠮᠦᠰ ᠡ᠂ ᠪᠢᠳᠡ ᠡᠨᠡ ᠠᠵᠢᠯ ᠤᠨ ᠠᠴᠢ ᠪᠠᠷ ᠪᠠᠶᠠᠨ ᠠᠮᠢᠳᠤᠷᠠᠵᠤ ᠪᠠᠢᠭᠠ ᠶᠢ ᠲᠠ ᠨᠠᠷ ᠮᠡᠳᠡᠨᠡ᠃ 26 ᠭᠡᠲᠡᠯᠡ ᠡᠨᠡ ᠫᠠᠦ᠋ᠯ ᠬᠡᠮᠡᠭᠴᠢ᠄ 〈ᠬᠥᠮᠦᠨ ᠦ ᠭᠠᠷ ᠢᠶᠠᠷ ᠬᠢᠭᠰᠡᠨ ᠨᠢ ᠴᠥᠮ ᠪᠤᠷᠬᠠᠨ ᠪᠢᠰᠢ〉 ᠭᠡᠵᠦ ᠧᠹᠧᠰ ᠲᠡᠳᠦᠢ ᠦᠭᠡᠢ᠂ ᠠᠽᠢᠶᠠ ᠮᠤᠵᠢ ᠳᠠᠶᠠᠭᠠᠷ ᠤᠨ ᠣᠯᠠᠨ ᠲᠦᠮᠡᠨ ᠢ ᠢᠳᠬᠠᠨ ᠬᠣᠯᠠᠳᠠᠭᠤᠯᠤᠭᠰᠠᠨ ᠢ ᠲᠠ ᠨᠠᠷ ᠴᠤ ᠦᠵᠡᠵᠦ ᠰᠣᠨᠣᠰᠣᠭᠰᠠᠨ ᠰᠢᠦ ᠳᠠ᠃ 27 ᠡᠭᠦᠨ ᠡᠴᠡ ᠪᠣᠯᠵᠤ ᠪᠢᠳᠡᠨ ᠦ ᠮᠡᠷᠭᠡᠵᠢᠯ ᠬᠥᠩᠭᠡᠪᠴᠢᠯᠡᠭᠳᠡᠬᠦ ᠲᠡᠳᠦᠢ ᠦᠭᠡᠢ᠂ ᠶᠡᠬᠡ ᠳᠠᠭᠢᠨᠢ ᠠᠷᠲ᠋ᠧᠮᠢ ᠶᠢᠨ ᠰᠦᠮᠡ ᠦᠯᠦ ᠲᠣᠭᠣᠮᠰᠠᠷᠯᠠᠭᠳᠠᠵᠤ᠂ ᠠᠽᠢᠶᠠ ᠮᠤᠵᠢ ᠪᠠ ᠳᠡᠯᠡᠬᠡᠢ ᠳᠠᠶᠠᠭᠠᠷ ᠤᠨ ᠰᠦᠰᠦᠭᠯᠡᠳᠡᠭ ᠳᠠᠭᠢᠨᠢ ᠶᠢᠨ ᠰᠦᠷ ᠵᠢᠪᠬᠤᠯᠠᠩ ᠴᠤ ᠠᠯᠠᠭᠠ ᠪᠣᠯᠬᠤ ᠠᠶᠤᠯ ᠲᠠᠢ ᠪᠠᠢᠨᠠ》 ᠭᠡᠵᠦ ᠬᠡᠯᠡᠭᠰᠡᠨ ᠪᠠᠢᠯᠠ᠃
28 ᠲᠡᠳᠡ ᠨᠠᠷ ᠡᠭᠦᠨ ᠢ ᠰᠣᠨᠣᠰᠣᠭᠠᠳ ᠪᠠᠭᠲᠠᠷᠠᠲᠠᠯᠠ ᠠᠭᠤᠷᠯᠠᠵᠤ᠄ 《ᠧᠹᠧᠰ ᠤᠨ ᠠᠷᠲ᠋ᠧᠮᠢ ᠠᠭᠤᠤ ᠶᠡᠬᠡ︕》 ᠭᠡᠵᠦ ᠬᠠᠰᠬᠢᠷᠴᠤ ᠭᠠᠷᠪᠠ᠃ 29 ᠪᠦᠬᠦ ᠬᠣᠲᠠ ᠪᠤᠵᠢᠭᠢᠨᠠᠭᠠᠨ ᠢᠶᠠᠷ ᠳᠦᠭᠦᠷᠴᠡᠢ᠃ ᠬᠥᠮᠦᠰ ᠫᠠᠦ᠋ᠯ ᠲᠠᠢ ᠬᠠᠮᠲᠤ ᠠᠶᠠᠯᠠᠭᠴᠢ ᠮᠠᠺᠧᠳᠣᠨᠢᠶᠠ ᠶᠢᠨ ᠭᠠᠢᠶᠣ᠋ ᠪᠠ ᠠᠷᠢᠰᠲ᠋ᠠᠷᠺ ᠢ ᠪᠠᠷᠢᠪᠴᠢᠯᠠᠨ ᠵᠦᠴᠦᠭᠡ ᠶᠢᠨ ᠬᠦᠷᠢᠶᠡᠯᠡᠩ ᠳᠤ ᠵᠡᠷᠭᠡ ᠪᠡᠷ ᠢᠪᠡᠷᠡᠨ ᠣᠷᠣᠵᠠᠭᠠᠪᠠ᠃ 30 ᠫᠠᠦ᠋ᠯ ᠴᠤᠭᠯᠠᠷᠠᠭᠰᠠᠨ ᠣᠯᠠᠨ ᠤ ᠳᠤᠮᠳᠠ ᠣᠷᠣᠬᠤ ᠭᠡᠰᠡᠨ ᠳᠦ᠂ ᠱᠠᠪᠢ ᠨᠠᠷ ᠨᠢ ᠵᠥᠪᠰᠢᠶᠡᠷᠡᠬᠦ ᠦᠭᠡᠢ ᠪᠠᠢᠯᠠ᠃ 31 ᠮᠥᠨ ᠠᠽᠢᠶᠠ ᠮᠤᠵᠢ ᠶᠢᠨ ᠨᠣᠶᠠᠳ ᠤᠨ ᠳᠤᠮᠳᠠ ᠠᠴᠠ ᠫᠠᠦ᠋ᠯ ᠤᠨ ᠬᠡᠳᠦᠨ ᠨᠠᠢᠵᠠ ᠲᠡᠭᠦᠨ ᠳᠦ ᠬᠡᠯᠡ ᠶᠠᠪᠤᠭᠤᠯᠵᠤ᠂ ᠵᠦᠴᠦᠭᠡ ᠶᠢᠨ ᠬᠦᠷᠢᠶᠡᠯᠡᠩ ᠳᠤ ᠪᠦᠦ ᠣᠷᠣ ᠭᠡᠵᠦ ᠢᠳᠬᠠᠵᠠᠢ᠃ 32 ᠴᠤᠭᠯᠠᠷᠠᠭᠰᠠᠳ ᠪᠤᠵᠢᠭᠢᠨᠠᠯᠳᠤᠨ ᠵᠠᠷᠢᠮ ᠨᠢ ᠡᠢᠮᠦ᠂ ᠵᠠᠷᠢᠮ ᠨᠢ ᠲᠡᠢᠮᠦ ᠭᠡᠵᠦ ᠬᠠᠰᠬᠢᠷᠤᠯᠳᠤᠭᠰᠠᠭᠠᠷ ᠣᠯᠠᠩᠬᠢ ᠨᠢ ᠶᠠᠭᠤᠨ ᠳᠤ ᠴᠤᠭᠯᠠᠷᠠᠭᠰᠠᠨ ᠢᠶᠠᠨ ᠴᠤ ᠮᠡᠳᠡᠬᠦ ᠦᠭᠡᠢ ᠪᠠᠢᠯᠠ᠃ 33 ᠶᠦᠳᠠᠢᠴᠤᠳ ᠠᠯᠧᠺᠰᠠᠨᠳᠧᠷ ᠭᠡᠭᠴᠢ ᠶᠢ ᠤᠷᠤᠭᠰᠢ ᠲᠦᠯᠬᠢᠭᠰᠡᠨ ᠳᠦ᠂ ᠵᠠᠷᠢᠮ ᠨᠢ ᠲᠡᠭᠦᠨ ᠢ ᠴᠤᠭᠯᠠᠷᠠᠭᠰᠠᠳ ᠤᠨ ᠡᠮᠦᠨᠡ ᠭᠠᠷᠭᠠᠪᠠ᠃ ᠠᠯᠧᠺᠰᠠᠨᠳᠧᠷ ᠭᠠᠷ ᠢᠶᠠᠷ ᠢᠶᠠᠨ ᠳᠣᠬᠢᠭᠠᠳ ᠣᠯᠠᠨ ᠳᠤ ᠤᠴᠢᠷᠯᠠᠬᠤ ᠭᠡᠲᠡᠯᠡ 34 ᠬᠥᠮᠦᠰ ᠲᠡᠭᠦᠨ ᠢ ᠶᠦᠳᠠᠢ ᠬᠥᠮᠦᠨ ᠭᠡᠵᠦ ᠲᠠᠨᠢᠭᠠᠳ ᠴᠥᠮ ᠢᠶᠡᠷ ᠢᠶᠠᠨ ᠳᠠᠭᠤ ᠨᠡᠢᠯᠡᠭᠦᠯᠦᠨ᠄ 《ᠧᠹᠧᠰ ᠤᠨ ᠠᠷᠲ᠋ᠧᠮᠢ ᠠᠭᠤᠤ ᠶᠡᠬᠡ︕》 ᠭᠡᠵᠦ ᠬᠣᠶᠠᠷ ᠴᠠᠭ ᠬᠢᠷᠢ ᠲᠠᠢ ᠬᠠᠰᠬᠢᠷᠤᠯᠳᠤᠭᠰᠠᠭᠠᠷ ᠪᠠᠢᠯᠠ᠃ 35 ᠬᠣᠲᠠ ᠶᠢᠨ ᠵᠠᠬᠢᠷᠤᠭᠴᠢ ᠠᠷᠠᠳ ᠣᠯᠠᠨ ᠢ ᠨᠠᠮᠳᠠᠭᠠᠵᠤ᠄ 《ᠧᠹᠧᠰᠴᠤᠳ ᠡ︕ ᠧᠹᠧᠰ ᠪᠣᠯ ᠠᠭᠤᠤ ᠶᠡᠬᠡ ᠠᠷᠲ᠋ᠧᠮᠢ ᠶᠢᠨ ᠰᠦᠮᠡ ᠪᠣᠯᠣᠨ ᠲᠩᠷᠢ ᠡᠴᠡ ᠪᠠᠭᠤᠭᠰᠠᠨ ᠴᠠᠯᠢᠭ ᠤᠨ ᠬᠢᠨᠢ ᠬᠠᠮᠠᠭᠠᠯᠠᠭᠴᠢ ᠬᠣᠲᠠ ᠮᠥᠨ ᠭᠡᠳᠡᠭ ᠢ ᠬᠡᠨ ᠮᠡᠳᠡᠬᠦ ᠦᠭᠡᠢ ᠪᠤᠢ︖ 36 ᠡᠨᠡ ᠪᠣᠯ ᠨᠢᠴᠤᠭᠠᠭᠳᠠᠰᠢ ᠦᠭᠡᠢ ᠦᠨᠡᠨ᠂ ᠲᠡᠢᠮᠦ ᠡᠴᠡ ᠲᠠ ᠨᠠᠷ ᠲᠠᠢᠪᠤᠰᠢᠷᠠ᠂ ᠬᠠᠭᠤᠮᠠᠭᠠᠢ ᠶᠠᠭᠤᠮᠠ ᠪᠢᠲᠡᠭᠡᠢ ᠬᠢ᠃ 37 ᠲᠠ ᠨᠠᠷ ᠤᠨ ᠠᠪᠴᠢᠷᠠᠭᠰᠠᠨ ᠬᠥᠮᠦᠰ ᠴᠢᠨᠢ ᠰᠦᠮᠡ ᠶᠢ ᠲᠣᠨᠣᠭᠠ ᠦᠭᠡᠢ᠂ ᠪᠢᠳᠡᠨ ᠦ ᠳᠠᠭᠢᠨᠢ ᠶᠢ ᠴᠤ ᠳᠣᠷᠣᠮᠵᠢᠯᠠᠭᠠ ᠦᠭᠡᠢ᠃ 38 ᠬᠡᠷᠪᠡ ᠳ᠋ᠧᠮᠧᠲ᠋ᠷᠢ ᠪᠣᠯᠣᠨ ᠲᠡᠭᠦᠨ ᠲᠡᠢ ᠬᠠᠮᠲᠤᠷᠠᠭᠴᠢ ᠤᠷᠠᠴᠤᠳ ᠬᠡᠨ ᠢ ᠵᠠᠭᠠᠯᠳᠤᠬᠤ ᠬᠡᠷᠡᠭ ᠲᠡᠢ ᠪᠠᠢᠪᠠᠯ ᠵᠠᠭᠠᠯᠳᠤᠭ᠂ ᠰᠢᠭᠦᠬᠦ ᠭᠠᠵᠠᠷ ᠨᠡᠭᠡᠭᠡᠯᠲᠡ ᠲᠠᠢ ᠪᠥᠭᠡᠳ ᠨᠤᠲᠤᠭ ᠤᠨ ᠵᠠᠬᠢᠷᠤᠭᠴᠢᠳ ᠴᠤ ᠪᠠᠢᠵᠤ ᠪᠠᠢᠭᠠ᠃ 39 ᠲᠠ ᠨᠠᠷ ᠡᠭᠦᠨ ᠡᠴᠡ ᠢᠯᠡᠭᠦᠦ ᠶᠢ ᠬᠦᠰᠡᠪᠡᠯ ᠲᠡᠭᠦᠨ ᠢ ᠬᠠᠤᠯᠢ ᠶᠣᠰᠣᠨ ᠤ ᠴᠢᠭᠤᠯᠭᠠᠨ ᠢᠶᠠᠷ ᠰᠢᠢᠳᠪᠦᠷᠢᠯᠡᠭᠦᠯᠬᠦ ᠪᠣᠯᠣᠨᠠ᠃ 40 ᠥᠨᠥᠳᠥᠷ ᠪᠢᠳᠡ ᠪᠣᠰᠣᠯᠭᠠ ᠶᠢᠨ ᠬᠡᠷᠡᠭ ᠢᠶᠡᠷ ᠪᠤᠷᠤᠭᠤᠳᠬᠠᠭᠳᠠᠬᠤ ᠠᠶᠤᠯ ᠲᠠᠢ ᠪᠣᠯᠵᠤ ᠪᠠᠢᠨᠠ᠃ ᠡᠨᠡ ᠦᠢᠮᠡᠭᠡᠨ ᠢ ᠵᠥᠪᠲᠥᠭᠡᠬᠦ ᠰᠢᠯᠲᠠᠭ ᠴᠤ ᠪᠢᠳᠡᠨ ᠳᠦ ᠠᠯᠠᠭᠠ ᠪᠠᠢᠨᠠ》 ᠭᠡᠳ 41 ᠴᠤᠭᠯᠠᠷᠠᠭᠰᠠᠳ ᠢ ᠲᠠᠷᠬᠠᠭᠠᠪᠠ᠃