ᠦᠢᠯᠡᠰ ᠬᠣᠷᠢᠨ ᠨᠠᠢ᠌ᠮᠠ
ᠠᠷᠠᠯ ᠳᠡᠭᠡᠷᠡ ᠠᠪᠤᠷᠠᠭᠳᠠᠭᠰᠠᠨ ᠨᠢ
1 ᠪᠢᠳᠡ ᠠᠪᠤᠷᠠᠭᠳᠠᠭᠰᠠᠨ ᠤ ᠪᠠᠨ ᠳᠠᠷᠠᠭᠠ ᠯᠠ ᠮᠠᠯᠲ᠋ᠠ ᠭᠡᠳᠡᠭ ᠠᠷᠠᠯ ᠳᠤ ᠬᠦᠷᠦᠭᠰᠡᠨ ᠢᠶᠡᠨ ᠮᠡᠳᠡᠵᠡᠢ᠃ 2 ᠠᠷᠠᠯ ᠤᠨ ᠬᠢᠨ ᠪᠢᠳᠡᠨ ᠳᠦ ᠲᠤᠢᠯ ᠤᠨ ᠡᠶᠡᠯᠳᠡᠭ ᠬᠠᠨᠳᠤᠯᠠ᠃ ᠲᠡᠷᠡ ᠦᠶᠡ ᠳᠦ ᠪᠣᠷᠣᠭᠠᠨ ᠣᠷᠣᠵᠤ ᠬᠦᠢᠲᠡᠷᠡᠭᠰᠡᠨ ᠪᠣᠯᠬᠣᠷ ᠲᠡᠳᠡ ᠭᠠᠯ ᠥᠷᠳᠡᠨ ᠪᠢᠳᠡ ᠪᠦᠬᠦᠨ ᠢ ᠵᠣᠴᠢᠯᠠᠪᠠ᠃ 3 ᠫᠠᠦ᠋ᠯ ᠨᠢᠭᠡ ᠲᠡᠪᠡᠷᠢ ᠲᠦᠯᠡᠭᠡ ᠴᠤᠭᠯᠠᠭᠤᠯᠵᠤ ᠭᠠᠯ ᠳᠡᠭᠡᠷᠡ ᠲᠠᠯᠪᠢᠲᠠᠯᠠ᠂ ᠬᠠᠯᠠᠭᠤᠨ ᠠᠴᠠ ᠪᠣᠯᠵᠤ ᠬᠣᠣᠷᠲᠤ ᠮᠣᠭᠠᠢ ᠭᠠᠷᠴᠤ ᠢᠷᠡᠨ ᠲᠡᠭᠦᠨ ᠦ ᠭᠠᠷ ᠲᠤ ᠨᠠᠭᠠᠯᠳᠤᠪᠠ᠃ 4 ᠠᠷᠠᠯ ᠤᠨ ᠬᠢᠨ ᠲᠡᠭᠦᠨ ᠦ ᠭᠠᠷ ᠠᠴᠠ ᠮᠣᠭᠠᠢ ᠤᠨᠵᠢᠢᠵᠤ ᠪᠠᠢᠬᠤ ᠶᠢ ᠬᠠᠷᠠᠭᠠᠳ ᠬᠣᠭᠣᠷᠣᠨᠳᠣ ᠪᠠᠨ᠄ 《ᠡᠨᠡ ᠬᠥᠮᠦᠨ ᠯᠠᠪ ᠶᠠᠷᠭᠠᠴᠢᠨ ᠮᠥᠨ᠃ ᠲᠡᠷᠡ ᠳᠠᠯᠠᠢ ᠶᠢᠨ ᠠᠶᠤᠯ ᠠᠴᠠ ᠮᠤᠯᠲᠤᠷᠠᠭᠰᠠᠨ ᠪᠣᠯᠪᠠᠴᠤ ᠰᠢᠳᠤᠷᠭᠤ ᠶᠣᠰᠣᠨ ᠤ ᠳᠠᠭᠢᠨᠢ ᠲᠡᠭᠦᠨ ᠦ ᠠᠮᠢᠳᠤ ᠶᠠᠪᠤᠬᠤ ᠶᠢ ᠵᠥᠪᠰᠢᠶᠡᠷᠡᠭᠰᠡᠨ ᠦᠭᠡᠢ ᠶᠤᠮ ᠪᠠᠢᠨᠠ》 ᠭᠡᠵᠡᠭᠡᠪᠡ᠃ 5 ᠬᠠᠷᠢᠨ ᠫᠠᠦ᠋ᠯ ᠲᠡᠷᠡ ᠮᠣᠭᠠᠢ ᠶᠢ ᠭᠠᠯ ᠳᠤ ᠬᠠᠶᠠᠭᠰᠠᠨ ᠪᠥᠭᠡᠳ ᠥᠪᠡᠷ ᠲᠤᠨᠢ ᠥᠴᠦᠬᠡᠨ ᠴᠤ ᠬᠣᠣᠷ ᠪᠣᠯᠣᠭᠠ ᠦᠭᠡᠢ᠃ 6 ᠲᠡᠳᠡ ᠲᠡᠭᠦᠨ ᠦ ᠰᠢᠭᠤᠳ ᠬᠠᠪᠤᠩᠨᠠᠬᠤ ᠪᠤᠶᠤ ᠭᠡᠨᠡᠳᠲᠡ ᠤᠨᠠᠵᠤ ᠦᠬᠦᠬᠦ ᠶᠢ ᠤᠳᠠᠲᠠᠯᠠ ᠬᠦᠯᠢᠶᠡᠭᠰᠡᠨ ᠪᠣᠯᠪᠠᠴᠤ ᠶᠠᠮᠠᠷ ᠴᠤ ᠬᠠᠴᠢᠨ ᠰᠢᠨᠵᠢ ᠢᠯᠡᠷᠡᠭᠡ ᠦᠭᠡᠢ ᠶᠢ ᠦᠵᠡᠭᠡᠳ ᠪᠣᠳᠣᠯ ᠢᠶᠠᠨ ᠥᠭᠡᠷᠡᠴᠢᠯᠡᠵᠦ᠂ ᠲᠡᠭᠦᠨ ᠢ ᠪᠤᠷᠬᠠᠨ ᠶᠤᠮ ᠪᠠᠢᠨᠠ ᠭᠡᠵᠡᠭᠡᠪᠡ᠃
7 ᠲᠡᠷᠡ ᠬᠠᠪᠢ ᠳᠤ ᠠᠷᠠᠯ ᠤᠨ ᠲᠣᠯᠣᠭᠠᠢᠯᠠᠭᠴᠢ ᠫᠣᠫᠯᠢᠣ᠋ ᠶᠢᠨ ᠡᠳ᠋ᠯᠡᠩ ᠭᠠᠵᠠᠷ ᠪᠠᠢᠵᠠᠢ᠃ ᠲᠡᠷᠡ ᠪᠢᠳᠡᠨ ᠢ ᠬᠦᠯᠢᠶᠡᠨ ᠠᠪᠴᠤ ᠭᠤᠷᠪᠠᠨ ᠬᠣᠨᠣᠭ ᠨᠠᠢᠷᠰᠠᠭ ᠵᠣᠴᠢᠯᠠᠭᠰᠠᠨ ᠪᠢᠯᠡ᠃ 8 ᠲᠡᠷᠡ ᠦᠶᠡ ᠳᠦ᠂ ᠫᠣᠫᠯᠢᠣ᠋ ᠶᠢᠨ ᠠᠪᠤ ᠬᠠᠯᠠᠭᠤᠨ ᠡᠪᠡᠳᠴᠢᠨ ᠪᠠ ᠶᠣᠯᠬᠣᠳᠠᠰᠤ ᠣᠯᠣᠭᠠᠳ ᠬᠡᠪᠲᠡᠵᠦ ᠪᠠᠢᠪᠠ᠃ ᠫᠠᠦ᠋ᠯ ᠣᠷᠣᠵᠤ ᠣᠴᠢᠭᠠᠳ ᠳᠠᠭᠠᠳᠬᠠᠨ ᠭᠠᠷ ᠢᠶᠠᠨ ᠲᠡᠭᠦᠨ ᠦ ᠳᠡᠭᠡᠷᠡ ᠲᠠᠯᠪᠢᠭᠠᠳ ᠡᠳᠡᠭᠡᠭᠡᠵᠡᠢ᠃ 9 ᠡᠭᠦᠨ ᠡᠴᠡ ᠪᠣᠯᠣᠭᠠᠳ ᠲᠡᠷᠡ ᠠᠷᠠᠯ ᠤᠨ ᠪᠤᠰᠤᠳ ᠡᠪᠡᠳᠴᠢᠲᠡᠳ ᠴᠤ ᠢᠷᠡᠵᠦ ᠢᠯᠠᠷᠢᠰᠢᠵᠠᠢ᠃ 10 ᠲᠡᠳᠡ ᠶᠠᠩᠵᠤ ᠶᠠᠩᠵᠤ ᠪᠠᠷ ᠪᠢᠳᠡᠨ ᠢ ᠬᠦᠨᠳᠦᠳᠬᠡᠭᠰᠡᠨ ᠪᠥᠭᠡᠳ ᠪᠢᠳᠡ ᠮᠣᠷᠳᠠᠬᠤ ᠳᠤ᠂ ᠣᠩ᠋ᠭᠣᠴᠠᠨ ᠳᠤ ᠬᠡᠷᠡᠭ ᠲᠡᠢ ᠵᠦᠢᠯ ᠢ ᠮᠢᠨᠢ ᠠᠴᠢᠵᠤ ᠥᠭᠪᠡ᠃
ᠫᠠᠦ᠋ᠯ ᠷᠣᠮᠠ ᠳᠤ ᠬᠦᠷᠦᠭᠰᠡᠨ ᠨᠢ
11 ᠭᠤᠷᠪᠠᠨ ᠰᠠᠷᠠ ᠶᠢᠨ ᠳᠠᠷᠠᠭᠠ᠂ ᠪᠢᠳᠡ ᠠᠯᠧᠺᠰᠠᠨᠳ᠋ᠧᠷᠢᠶᠠ ᠶᠢᠨ ᠣᠩ᠋ᠭᠣᠴᠠ ᠪᠠᠷ ᠴᠢᠨᠠᠭᠰᠢ ᠶᠠᠪᠤᠯᠠ᠃ 《ᠽᠦᠰ ᠦᠨ ᠢᠬᠡᠷᠡ ᠬᠥᠪᠡᠭᠦᠨ》 ᠲᠡᠮᠳᠡᠭᠲᠦ ᠡᠨᠡ ᠣᠩ᠋ᠭᠣᠴᠠ ᠲᠡᠷᠡ ᠠᠷᠠᠯ ᠳᠡᠭᠡᠷᠡ ᠡᠪᠦᠯᠵᠢᠭᠰᠡᠨ ᠪᠠᠢᠵᠠᠢ᠃ 12 ᠪᠢᠳᠡ ᠰᠦᠷᠠᠺᠦ᠋ᠰᠠ ᠳᠤ ᠬᠦᠷᠴᠦ ᠭᠤᠷᠪᠠ ᠬᠣᠨᠣᠭᠠᠳ 13 ᠲᠡᠨᠳᠡ ᠡᠴᠡ ᠭᠠᠷᠴᠤ ᠷᠧᠭᠢᠶᠣᠨ ᠳᠤ ᠬᠦᠷᠪᠡ᠃ ᠨᠢᠭᠡ ᠬᠣᠨᠣᠬᠤ ᠳᠤ ᠡᠮᠦᠨᠡ ᠡᠴᠡ ᠰᠠᠯᠬᠢᠯᠠᠵᠤ᠂ ᠪᠢᠳᠡ ᠳᠠᠷᠠᠭᠠ ᠡᠳᠦᠷ ᠨᠢ ᠫᠣᠲ᠋ᠢᠶᠣᠯᠢ ᠳᠤ ᠣᠴᠢᠯᠠ᠃ 14 ᠲᠡᠨᠳᠡ ᠪᠢᠳᠡ ᠠᠬᠠ ᠳᠡᠭᠦᠦ ᠨᠠᠷ ᠲᠠᠢ ᠤᠴᠠᠷᠠᠵᠤ᠂ ᠲᠡᠳᠡᠨ ᠦ ᠬᠦᠰᠡᠭᠰᠡᠨ ᠢᠶᠡᠷ ᠳᠣᠯᠣᠭᠠᠨ ᠬᠣᠨᠣᠭ ᠰᠠᠭᠤᠭᠠᠳ ᠷᠣᠮᠠ ᠳᠤ ᠬᠦᠷᠪᠡ᠃ 15 ᠲᠡᠨᠳᠡᠬᠢ ᠶᠢᠨ ᠠᠬᠠ ᠳᠡᠭᠦᠦ ᠨᠠᠷ ᠪᠢᠳᠡᠨ ᠦ ᠲᠤᠬᠠᠢ ᠰᠣᠨᠣᠰᠣᠭᠠᠳ ᠠᠫᠢ ᠲᠠᠯᠠᠪᠠᠢ ᠪᠣᠯᠣᠨ 《ᠭᠤᠷᠪᠠᠨ ᠪᠠᠭᠤᠳᠠᠯ》 ᠳᠤ ᠪᠢᠳᠡᠨ ᠢ ᠤᠭᠲᠤᠬᠤ ᠪᠠᠷ ᠢᠷᠡᠪᠡ᠃ ᠫᠠᠦ᠋ᠯ ᠲᠡᠳᠡᠨ ᠢ ᠬᠠᠷᠠᠭᠠᠳ ᠪᠤᠷᠬᠠᠨ ᠳᠤ ᠲᠠᠯᠠᠷᠬᠠᠨ ᠵᠣᠷᠢᠭ ᠣᠷᠣᠪᠠ᠃
16 ᠪᠢᠳᠡ ᠷᠣᠮᠠ ᠳᠤ ᠬᠦᠷᠬᠦ ᠳᠦ᠂ ᠫᠠᠦ᠋ᠯ ᠰᠠᠬᠢᠭᠤᠯ ᠴᠡᠷᠢᠭ ᠲᠠᠢ ᠪᠠᠨ ᠬᠠᠮᠲᠤ ᠲᠤᠰᠠᠭᠠᠷ ᠰᠠᠭᠤᠬᠤ ᠵᠥᠪᠰᠢᠶᠡᠷᠡᠯ ᠢ ᠣᠯᠵᠠᠢ᠃
17 ᠭᠤᠷᠪᠠᠨ ᠬᠣᠨᠣᠭ ᠤᠨ ᠳᠠᠷᠠᠭᠠ᠂ ᠫᠠᠦ᠋ᠯ ᠶᠦᠳᠠᠢᠴᠤᠳ ᠤᠨ ᠠᠬᠠᠯᠠᠭᠴᠢᠳ ᠢ ᠳᠠᠭᠤᠳᠠᠨ ᠴᠤᠭᠯᠠᠭᠤᠯᠪᠠ᠃ ᠫᠠᠦ᠋ᠯ ᠲᠡᠳᠡᠨ ᠳᠦ᠄ 《ᠠᠬᠠ ᠳᠡᠭᠦᠦ ᠨᠠᠷ ᠡ︕ ᠪᠢ ᠠᠷᠠᠳ ᠲᠦᠮᠡᠨ ᠦ ᠪᠠᠨ ᠡᠰᠡᠷᠭᠦ ᠪᠤᠶᠤ ᠳᠡᠭᠡᠳᠦᠰ ᠦᠨ ᠢᠶᠠᠨ ᠶᠣᠰᠣ ᠵᠠᠩᠰᠢᠯ ᠤᠨ ᠡᠰᠡᠷᠭᠦ ᠶᠠᠭᠤ ᠴᠤ ᠦᠢᠯᠡᠳᠦᠭᠰᠡᠨ ᠦᠭᠡᠢ ᠪᠠᠢᠲᠠᠯᠠ ᠪᠠᠨ ᠶᠧᠷᠦ᠋ᠰᠠᠯᠧᠮ ᠳᠤ ᠬᠣᠷᠢᠭᠳᠠᠯ ᠪᠣᠯᠵᠤ᠂ ᠷᠣᠮᠠᠴᠤᠳ ᠤᠨ ᠭᠠᠷ ᠲᠤ ᠲᠤᠰᠢᠶᠠᠭᠳᠠᠭᠰᠠᠨ᠃ 18 ᠷᠣᠮᠠᠴᠤᠳ ᠨᠠᠮᠠᠶᠢ ᠪᠠᠢᠴᠠᠭᠠᠭᠰᠠᠨ ᠪᠣᠯᠪᠠᠴᠤ ᠦᠬᠦᠭᠦᠯᠬᠦ ᠰᠢᠯᠲᠠᠭᠠᠨ ᠦᠭᠡᠢ ᠲᠤᠯᠠ ᠨᠠᠮᠠᠶᠢ ᠰᠤᠯᠠᠯᠠᠬᠤ ᠭᠡᠰᠡᠨ᠂ 19 ᠭᠡᠪᠡᠴᠦ ᠶᠦᠳᠠᠢᠴᠤᠳ ᠡᠰᠡᠷᠭᠦᠴᠡᠭᠰᠡᠨ ᠤᠴᠢᠷ ᠠᠴᠠ ᠪᠢ ᠠᠷᠭᠠ ᠪᠤᠰᠤ ᠺᠠᠶᠧᠰᠠᠷ ᠲᠤ ᠵᠠᠭᠠᠯᠳᠤᠭᠰᠠᠨ ᠶᠤᠮ᠃ ᠬᠠᠷᠢᠨ ᠠᠷᠠᠳ ᠲᠦᠮᠡᠨ ᠢᠶᠡᠨ ᠵᠠᠭᠠᠯᠳᠤᠬᠤ ᠭᠡᠵᠦ ᠪᠠᠢᠭᠠ ᠦᠭᠡᠢ᠂ 20 ᠪᠢ ᠴᠤ ᠢᠰᠷᠧᠯ ᠤᠨ ᠡᠷᠡᠮᠡᠯᠵᠡᠯ ᠲᠡᠢ ᠪᠣᠯᠬᠣᠷ ᠢᠩᠭᠢᠵᠦ ᠬᠦᠯᠢᠭᠳᠡᠭᠰᠡᠨ᠂ ᠲᠠ ᠨᠠᠷ ᠢ ᠤᠷᠢᠭᠠᠳ ᠠᠭᠤᠯᠵᠠᠵᠤ ᠶᠠᠷᠢᠯᠴᠠᠬᠤ ᠭᠡᠰᠡᠨ ᠦ ᠮᠢᠨᠢ ᠤᠴᠢᠷ ᠨᠢ ᠡᠨᠡ ᠶᠤᠮ》 ᠭᠡᠪᠡ᠃ 21 ᠲᠡᠳᠡ ᠫᠠᠦ᠋ᠯ ᠳᠤ᠄ 《ᠪᠢᠳᠡ ᠶᠦᠳᠠᠢ ᠠᠴᠠ ᠲᠠᠨ ᠤ ᠲᠤᠬᠠᠢ ᠵᠠᠬᠢᠳᠠᠯ ᠢ ᠠᠪᠴᠤ ᠪᠠᠢᠭᠠ ᠦᠭᠡᠢ᠂ ᠪᠠᠰᠠ ᠡ᠊ᠨᠳᠡ ᠢᠷᠡᠵᠦ ᠲᠠᠨ ᠤ ᠲᠤᠬᠠᠢ ᠮᠠᠭᠤ ᠪᠠᠷ ᠶᠠᠷᠢᠭᠰᠠᠨ ᠠᠬᠠ ᠳᠡᠭᠦᠦ ᠴᠤ ᠠᠯᠠᠭᠠ᠃ 22 ᠬᠠᠷᠢᠨ ᠥᠪᠡᠷ ᠦᠨ ᠴᠢᠨᠢ ᠰᠠᠨᠠᠯ ᠢ ᠰᠣᠨᠣᠰᠬᠤ ᠨᠢ ᠵᠦᠢᠲᠡᠢ ᠭᠡᠵᠦ ᠪᠢᠳᠡ ᠦᠵᠡᠵᠦ ᠪᠠᠢᠨᠠ᠃ ᠡᠨᠡ ᠪᠦᠯᠦᠭ ᠬᠠᠮᠢᠭᠠ ᠰᠠᠢ ᠦᠭᠡᠢ ᠡᠰᠡᠷᠭᠦᠴᠡᠭᠳᠡᠳᠡᠭ᠌ ᠢ ᠪᠢᠳᠡ ᠮᠡᠳᠡᠨᠡ》 ᠭᠡᠪᠡ᠃
23 ᠲᠡᠳᠡ ᠫᠠᠦ᠋ᠯ ᠲᠠᠢ ᠡᠳᠦᠷ ᠪᠣᠯᠵᠣᠵᠤ᠂ ᠣᠯᠠᠨ ᠬᠥᠮᠦᠨ ᠢ ᠳᠠᠭᠠᠭᠤᠯᠤᠨ ᠫᠠᠦ᠋ᠯ ᠤᠨ ᠰᠠᠭᠤᠭᠠ ᠭᠠᠵᠠᠷ ᠲᠤ ᠣᠴᠢᠵᠠᠢ᠃ ᠲᠡᠷᠡ ᠪᠤᠷᠬᠠᠨ ᠤ ᠬᠠᠭᠠᠨᠴᠢᠯᠠᠯ ᠢ ᠪᠠᠲᠤ ᠭᠡᠷᠡᠴᠢᠯᠡᠨ ᠮᠣᠰᠧ ᠶᠢᠨ ᠬᠠᠤᠯᠢ ᠪᠣᠯᠣᠨ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠤᠨ ᠨᠣᠮ ᠢᠶᠠᠷ ᠢᠰᠦ᠋ᠰ ᠤᠨ ᠲᠤᠬᠠᠢ ᠢᠳᠬᠠᠭᠰᠠᠭᠠᠷ ᠥᠷᠯᠥᠭᠡ ᠡᠴᠡ ᠦᠳᠡᠰᠢ ᠪᠣᠯᠲᠠᠯᠠ ᠲᠡᠳᠡᠨ ᠳᠦ ᠲᠠᠢᠯᠪᠤᠷᠢᠯᠠᠪᠠ᠃ 24 ᠲᠡᠭᠦᠨ ᠦ ᠶᠠᠷᠢᠭᠰᠠᠨ ᠢ ᠵᠠᠷᠢᠮ ᠨᠢ ᠢᠲᠡᠭᠡᠵᠦ᠂ ᠵᠠᠷᠢᠮ ᠨᠢ ᠢᠲᠡᠭᠡᠭᠰᠡᠨ ᠦᠭᠡᠢ᠃ 25 ᠲᠡᠳᠡ ᠰᠠᠨᠠᠯ ᠵᠥᠷᠢᠯᠳᠦᠨ ᠲᠠᠷᠬᠠᠲᠠᠯᠠ ᠫᠠᠦ᠋ᠯ ᠤᠨ ᠨᠢᠭᠡ ᠦᠭᠡ ᠰᠣᠨᠣᠰᠳᠠᠪᠠ᠄ 《ᠠᠷᠢᠭᠤᠨ ᠰᠦᠨᠡᠰᠦ ᠡᠰᠢ ᠦᠵᠡᠭᠦᠯᠦᠭᠴᠢ ᠢᠰᠠᠢᠶᠠ ᠪᠠᠷ ᠳᠠᠮᠵᠢᠭᠤᠯᠤᠨ ᠲᠠ ᠨᠠᠷ ᠤᠨ ᠳᠡᠭᠡᠳᠦᠰ ᠲᠦ ᠵᠥᠪ ᠶᠠᠷᠢᠭᠰᠠᠨ ᠶᠤᠮ᠃
26 ᠲᠡᠷᠡ᠄ 〈ᠡᠨᠡ ᠠᠷᠠᠳ ᠲᠦᠮᠡᠨ ᠳᠦ ᠣᠴᠢᠵᠤ ᠬᠡᠯᠡ ᠲᠠ ᠨᠠᠷ ᠰᠣᠨᠣᠰᠣᠨ ᠰᠣᠨᠣᠰᠪᠠᠴᠤ ᠶᠡᠷᠦ ᠣᠢᠯᠠᠭᠠᠬᠤ ᠦᠭᠡᠢ ᠬᠠᠷᠠᠨ ᠬᠠᠷᠠᠪᠠᠴᠤ ᠶᠡᠷᠦ ᠦᠵᠡᠬᠦ ᠦᠭᠡᠢ᠃
27 ᠡᠨᠡ ᠠᠷᠠᠳ ᠲᠦᠮᠡᠨ ᠦ ᠵᠢᠷᠦᠬᠡ ᠨᠢ ᠬᠠᠲᠠᠭᠤᠷᠠᠵᠤ ᠴᠢᠬᠢ ᠨᠢ ᠰᠣᠨᠣᠰᠴᠤ ᠶᠠᠳᠠᠨ᠂ ᠨᠢᠳᠦ ᠨᠢ ᠠᠨᠢᠵᠠᠢ ᠲᠡᠳᠡ ᠨᠢᠳᠦ ᠪᠡᠷ ᠢᠶᠠᠨ ᠬᠠᠷᠠᠬᠤ᠂ ᠴᠢᠬᠢ ᠪᠠᠷ ᠢᠶᠠᠨ ᠰᠣᠨᠣᠰᠬᠤ᠂ ᠵᠢᠷᠦᠬᠡ ᠪᠡᠷ ᠢᠶᠠᠨ ᠣᠢᠯᠠᠭᠠᠬᠤ᠂ ᠡᠷᠭᠢᠵᠦ ᠢᠷᠡᠬᠦ ᠤᠴᠢᠷ ᠦᠭᠡᠢ᠂ ᠪᠢ ᠲᠡᠳᠡᠨ ᠢ ᠡᠳᠡᠭᠡᠭᠡᠬᠦ ᠦᠭᠡᠢ〉 ᠭᠡᠰᠡᠨ᠃
28 ᠲᠡᠢᠮᠦ ᠡᠴᠡ ᠪᠤᠷᠬᠠᠨ ᠤ ᠡᠨᠡ ᠬᠦ ᠠᠪᠤᠷᠠᠯ ᠬᠠᠷᠢᠴᠤᠳ ᠤᠷᠤᠭᠤ ᠢᠯᠡᠭᠡᠭᠳᠡᠭᠰᠡᠨ ᠭᠡᠳᠡᠭ ᠢ ᠲᠠ ᠨᠠᠷ ᠮᠡᠳᠡᠭᠲᠦᠨ᠃ ᠲᠡᠳᠡ ᠰᠣᠨᠣᠰᠣᠨᠠ》 ᠭᠡᠪᠡ᠃ 29 〔ᠫᠠᠦ᠋ᠯ ᠡᠳᠡᠭᠡᠷ ᠢ ᠬᠡᠯᠡᠭᠰᠡᠨ ᠳᠦ᠂ ᠶᠦᠳᠠᠢᠴᠤᠳ ᠬᠣᠭᠣᠷᠣᠨᠳᠣ ᠪᠠᠨ ᠶᠡᠬᠡᠳᠡ ᠮᠠᠷᠭᠤᠯᠳᠤᠭᠰᠠᠭᠠᠷ ᠶᠠᠪᠤᠵᠠᠭᠠᠪᠠ᠃〕
30 ᠫᠠᠦ᠋ᠯ ᠲᠦᠷᠢᠶᠡᠰᠦᠯᠡᠭᠰᠡᠨ ᠪᠠᠢᠷᠢ ᠳᠠᠭᠠᠨ ᠪᠦᠲᠦᠨ ᠬᠣᠶᠠᠷ ᠵᠢᠯ ᠰᠠᠭᠤᠭᠰᠠᠨ ᠪᠥᠭᠡᠳ ᠲᠡᠭᠦᠨ ᠲᠡᠢ ᠠᠭᠤᠯᠵᠠᠬᠤ ᠪᠠᠷ ᠢᠷᠡᠭᠰᠡᠨ ᠬᠥᠮᠦᠨ ᠪᠣᠯᠭᠠᠨ ᠢ ᠬᠦᠯᠢᠶᠡᠨ ᠠᠪᠴᠤ᠂ 31 ᠪᠤᠷᠬᠠᠨ ᠤ ᠬᠠᠭᠠᠨᠴᠢᠯᠠᠯ ᠢ ᠲᠤᠩ᠋ᠬᠠᠭᠯᠠᠨ᠂ ᠡᠵᠡᠨ ᠢᠰᠦ᠋ᠰ ᠾᠷᠢᠰᠲ᠋ᠣᠰ ᠤᠨ ᠲᠤᠬᠠᠢ ᠮᠠᠰᠢ ᠵᠣᠷᠢᠭᠲᠠᠢ ᠪᠠᠷ ᠬᠣᠷᠢᠭᠠ ᠰᠠᠭᠠᠳ ᠦᠭᠡᠢ ᠪᠠᠷ ᠰᠤᠷᠭᠠᠪᠠ᠃