ᠦᠢᠯᠡᠰ ᠠᠷᠪᠠᠨ ᠬᠣᠶᠠᠷ
ᠶᠠᠺᠣᠪ ᠠᠯᠠᠭᠳᠠᠵᠤ ᠫᠧᠲ᠋ᠧᠷ ᠬᠡᠯᠲᠦᠷᠢᠪᠡ
1 ᠲᠡᠷᠡ ᠦᠶᠡ ᠳᠦ᠂ ᠾᠧᠷᠣᠳ᠋ ᠬᠠᠨ ᠴᠢᠭᠤᠯᠭᠠᠨ ᠤ ᠬᠡᠳᠦᠨ ᠬᠥᠮᠦᠨ ᠢ ᠬᠣᠣᠷᠯᠠᠬᠤ ᠪᠠᠷ ᠭᠠᠷ ᠬᠥᠳᠡᠯᠪᠡ᠃ 2 ᠲᠡᠷᠡ ᠶᠣᠬᠠᠨ ᠤ ᠠᠬᠠ ᠶᠠᠺᠣᠪ ᠢ ᠢᠯᠳᠦ ᠪᠡᠷ ᠠᠯᠠᠭᠤᠯᠤᠭᠰᠠᠨ ᠳᠤ᠂ 3 ᠶᠦᠳᠠᠢᠴᠤᠳ ᠪᠠᠶᠠᠷᠯᠠᠵᠤ ᠪᠠᠢᠪᠠ᠃ ᠾᠧᠷᠣᠳ᠋ ᠡᠭᠦᠨ ᠢ ᠦᠵᠡᠭᠡᠳ ᠢᠰᠭᠡᠭᠡ ᠦᠭᠡᠢ ᠪᠣᠣᠪᠣ ᠶᠢᠨ ᠪᠠᠶᠠᠷ ᠢᠶᠠᠷ ᠫᠧᠲ᠋ᠧᠷ ᠢ ᠴᠤ ᠪᠠᠷᠢᠭᠤᠯᠪᠠ᠃ 4 ᠾᠧᠷᠣᠳ᠋ ᠫᠧᠲ᠋ᠧᠷ ᠢ ᠪᠠᠷᠢᠵᠤ ᠭᠢᠨᠳᠠᠨ ᠳᠤ ᠬᠣᠷᠢᠭᠠᠳ ᠳᠥᠷᠪᠡ ᠳᠥᠷᠪᠡᠨ ᠴᠡᠷᠢᠭ ᠢᠶᠠᠷ ᠳᠥᠷᠪᠡᠨ ᠡᠭᠡᠯᠵᠢ ᠪᠣᠯᠭᠠᠨ ᠮᠠᠨᠠᠭᠤᠯᠵᠤ᠂ ᠭᠡᠲᠦᠯᠭᠡᠭᠰᠡᠨ ᠦ ᠪᠠᠶᠠᠷ ᠤᠨ ᠳᠠᠷᠠᠭᠠ᠂ ᠠᠷᠠᠳ ᠲᠦᠮᠡᠨ ᠦ ᠡᠮᠦᠨᠡ ᠠᠪᠴᠢᠷᠠᠬᠤ ᠭᠡᠰᠡᠨ ᠶᠤᠮ᠃ 5 ᠫᠧᠲ᠋ᠧᠷ ᠢᠩᠭᠢᠵᠦ ᠭᠢᠨᠳᠠᠨ ᠳᠤ ᠬᠣᠷᠢᠭᠳᠠᠭᠰᠠᠨ ᠳᠤ᠂ ᠴᠢᠭᠤᠯᠭᠠᠨ ᠲᠡᠭᠦᠨ ᠦ ᠲᠥᠯᠥᠭᠡ ᠪᠤᠷᠬᠠᠨ ᠳᠤ ᠬᠢᠴᠢᠶᠡᠩᠭᠦᠢᠯᠡᠨ ᠳᠠᠭᠠᠳᠬᠠᠭᠰᠠᠭᠠᠷ ᠪᠠᠢᠪᠠ᠃
6 ᠾᠧᠷᠣᠳ᠋ ᠫᠧᠲ᠋ᠧᠷ ᠢ ᠠᠪᠠᠴᠢᠬᠤ ᠶᠢᠨ ᠤᠷᠢᠳᠤ ᠰᠥᠨᠢ ᠫᠧᠲ᠋ᠧᠷ ᠳᠠᠪᠬᠤᠷ ᠭᠢᠨᠵᠢ ᠪᠠᠷ ᠭᠢᠨᠵᠢᠯᠡᠭᠳᠡᠵᠦ᠂ ᠬᠣᠶᠠᠷ ᠴᠡᠷᠢᠭ ᠤᠨ ᠳᠤᠮᠳᠠ ᠤᠨᠲᠠᠵᠤ ᠪᠠᠢᠭᠰᠠᠨ ᠪᠥᠭᠡᠳ ᠬᠠᠷᠠᠭᠤᠯ ᠤᠳ ᠭᠢᠨᠳᠠᠨ ᠤ ᠡᠭᠦᠳᠡ ᠶᠢ ᠮᠠᠨᠠᠵᠤ ᠪᠠᠢᠵᠠᠢ᠃ 7 ᠭᠡᠨᠡᠳᠲᠡ ᠡᠵᠡᠨ ᠦ ᠡᠯᠴᠢ ᠢᠯᠡᠷᠡᠭᠰᠡᠨ ᠪᠥᠭᠡᠳ ᠭᠢᠨᠳᠠᠨ ᠤ ᠥᠷᠥᠭᠡᠨ ᠳᠦ ᠭᠡᠷᠡᠯ ᠰᠠᠴᠤᠷᠠᠪᠠ᠃ ᠲᠡᠷᠡ ᠫᠧᠲ᠋ᠧᠷ ᠢ ᠰᠦᠪᠡᠭᠡ ᠤᠷᠤᠭᠤ ᠨᠢ ᠶᠣᠪᠣᠷᠣᠨ ᠰᠡᠷᠢᠭᠡᠭᠡᠳ᠄ 《ᠬᠤᠷᠳᠤᠨ ᠪᠣᠰ︕》 ᠭᠡᠬᠦ ᠳᠦ᠂ ᠭᠢᠨᠵᠢ ᠨᠢ ᠭᠠᠷ ᠠᠴᠠ ᠨᠢ ᠮᠤᠯᠲᠤᠷᠠᠨ ᠤᠨᠠᠯᠠ᠃ 8 ᠲᠩᠷᠢ ᠡᠯᠴᠢ᠄ 《ᠪᠦᠰᠡ ᠪᠡᠨ ᠪᠦᠰᠡᠯᠡᠵᠦ᠂ ᠱᠠᠬᠠᠢ ᠪᠠᠨ ᠡᠮᠦᠰ》 ᠭᠡᠬᠦ ᠳᠦ᠂ ᠫᠧᠲ᠋ᠧᠷ ᠬᠡᠯᠡᠭᠰᠡᠨ ᠢᠶᠡᠷ ᠨᠢ ᠬᠢᠪᠡ᠃ ᠪᠠᠰᠠ᠄ 《ᠭᠠᠳᠠᠷ ᠬᠤᠪᠴᠠᠰᠤ ᠪᠠᠨ ᠡᠮᠦᠰᠦᠭᠡᠳ ᠨᠠᠮᠠᠶᠢ ᠳᠠᠭᠠᠭᠠᠷᠠᠢ》 ᠭᠡᠰᠡᠨ ᠳᠦ᠂ 9 ᠫᠧᠲ᠋ᠧᠷ ᠭᠠᠷᠴᠤ᠂ ᠳᠠᠭᠠᠵᠤ ᠶᠠᠪᠤᠭᠰᠠᠭᠠᠷ ᠪᠠᠢᠭᠰᠠᠨ ᠬᠢᠷᠢ ᠨᠢ ᠲᠩᠷᠢ ᠡᠯᠴᠢ ᠶᠢᠨ ᠬᠢᠵᠦ ᠪᠠᠢᠭᠠ ᠪᠦᠬᠦᠨ ᠢ ᠪᠣᠳᠠᠲᠠᠢ ᠭᠡᠵᠦ ᠮᠡᠳᠡᠭᠰᠡᠨ ᠦᠭᠡᠢ᠂ ᠬᠠᠷᠢᠨ ᠦᠵᠡᠭᠳᠡᠯ ᠬᠡᠮᠡᠨ ᠪᠣᠳᠣᠭᠰᠠᠨ ᠪᠠᠢᠨᠠ᠃ 10 ᠨᠢᠭᠡ᠂ ᠬᠣᠶᠠᠳᠤᠭᠠᠷ ᠬᠠᠷᠠᠭᠤᠯ ᠢ ᠥᠩᠭᠡᠷᠡᠭᠡᠭᠡᠳ ᠬᠣᠲᠠ ᠣᠷᠣᠬᠤ ᠲᠡᠮᠦᠷ ᠬᠠᠭᠠᠯᠭᠠᠨ ᠳᠤ ᠬᠦᠷᠴᠦ ᠢᠷᠡᠬᠦ ᠳᠦ᠂ ᠬᠠᠭᠠᠯᠭᠠ ᠠᠶᠠᠨᠳᠠᠭᠠᠨ ᠨᠡᠭᠡᠭᠡᠭᠳᠡᠪᠡ᠃ ᠲᠡᠷᠡ ᠬᠣᠶᠠᠭᠤᠯᠠ ᠭᠠᠷᠤᠭᠠᠳ ᠨᠢᠭᠡ ᠭᠤᠳᠤᠮᠵᠢ ᠥᠩᠭᠡᠷᠡᠬᠦ ᠳᠦ᠂ ᠲᠩᠷᠢ ᠡᠯᠴᠢ ᠭᠡᠨᠡᠳᠲᠡ ᠰᠠᠯᠵᠤ ᠣᠳᠪᠠ᠃ 11 ᠫᠧᠲ᠋ᠧᠷ ᠰᠡᠬᠡᠰᠬᠢᠵᠦ᠄ 《ᠪᠢ ᠣᠳᠣ ᠶᠠᠭ ᠣᠢᠯᠠᠭᠠᠯᠠ᠂ ᠡᠵᠡᠨ ᠨᠠᠳᠠ ᠤᠷᠤᠭᠤ ᠡᠯᠴᠢ ᠪᠠᠨ ᠢᠯᠡᠭᠡᠵᠦ᠂ ᠨᠠᠮᠠᠶᠢ ᠾᠧᠷᠣᠳ᠋ ᠤᠨ ᠭᠠᠷ ᠪᠠ ᠶᠦᠳᠠᠢᠴᠤᠳ ᠤᠨ ᠠᠯᠢᠪᠠ ᠭᠣᠷᠢᠳᠠᠯᠭᠠ ᠠᠴᠠ ᠮᠤᠯᠲᠤᠷᠠᠭᠤᠯᠵᠠᠢ》 ᠭᠡᠪᠡ᠃
12 ᠫᠧᠲ᠋ᠧᠷ ᠡᠢᠨ ᠬᠦ ᠤᠬᠠᠭᠠᠷᠠᠭᠰᠠᠨ ᠤ ᠳᠠᠷᠠᠭᠠ᠂ ᠮᠠᠷᠺ ᠭᠡᠭᠳᠡᠳᠡᠭ ᠶᠣᠬᠠᠨ ᠤ ᠡᠬᠡ ᠮᠠᠷᠢᠶᠠ ᠶᠢᠨ ᠭᠡᠷ ᠢ ᠵᠣᠷᠢᠯᠠ᠃ ᠲᠡᠨᠳᠡ ᠣᠯᠠᠨ ᠬᠥᠮᠦᠨ ᠴᠤᠭᠯᠠᠷᠠᠭᠠᠳ ᠳᠠᠭᠠᠳᠬᠠᠵᠤ ᠪᠠᠢᠪᠠ᠃ 13 ᠫᠧᠲ᠋ᠧᠷ ᠬᠠᠭᠠᠯᠭᠠ ᠶᠢ ᠨᠢ ᠲᠣᠭᠰᠢᠬᠤ ᠳᠤ᠂ ᠷᠣᠳᠧ ᠭᠡᠭᠴᠢ ᠥᠬᠢᠨ ᠭᠠᠷᠴᠤ ᠢᠷᠡᠭᠡᠳ 14 ᠫᠧᠲ᠋ᠧᠷ ᠤᠨ ᠳᠠᠭᠤ ᠶᠢ ᠲᠠᠨᠢᠵᠤ ᠪᠠᠶᠠᠷᠯᠠᠭᠰᠠᠨ ᠳᠠᠭᠠᠨ ᠬᠠᠭᠠᠯᠭᠠ ᠪᠠᠨ ᠴᠤ ᠨᠡᠭᠡᠭᠡᠯ ᠦᠭᠡᠢ ᠪᠠᠷ ᠡᠷᠭᠢᠨ ᠭᠦᠶᠦᠭᠡᠳ᠄ 《ᠫᠧᠲ᠋ᠧᠷ ᠡᠭᠦᠳᠡᠨ ᠳᠦ ᠵᠣᠭᠰᠣᠵᠤ ᠪᠠᠢᠨᠠ》 ᠭᠡᠵᠦ ᠳᠤᠭᠤᠯᠭᠠᠭᠰᠠᠨ ᠳᠤ᠂ 15 ᠬᠥᠮᠦᠰ᠄ 《ᠰᠣᠯᠢᠶᠠᠷᠠᠪᠠ ᠤᠤ︖ ᠴᠢ》 ᠭᠡᠯᠴᠡᠪᠡ᠃ ᠷᠣᠳᠧ᠄ 《ᠦᠨᠡᠬᠡᠷ ᠲᠡᠷᠡ ᠮᠥᠨ》 ᠭᠡᠵᠦ ᠪᠠᠲᠤᠯᠠᠨ ᠬᠡᠯᠡᠬᠦ ᠳᠦ᠂ 《ᠲᠡᠭᠡᠪᠡᠯ ᠲᠡᠭᠦᠨ ᠦ ᠲᠩᠷᠢ ᠡᠯᠴᠢ ᠪᠢᠵᠡ ᠳᠠ》 ᠭᠡᠵᠡᠭᠡᠪᠡ᠃ 16 ᠫᠧᠲ᠋ᠧᠷ ᠬᠠᠭᠠᠯᠭᠠ ᠶᠢ ᠲᠣᠭᠰᠢᠭᠠᠳ ᠪᠠᠢᠭᠰᠠᠨ ᠳᠤ᠂ ᠲᠡᠳᠡ ᠡᠭᠦᠳᠡ ᠪᠡᠨ ᠨᠡᠭᠡᠭᠡᠵᠦ ᠫᠧᠲ᠋ᠧᠷ ᠢ ᠬᠠᠷᠠᠭᠰᠠᠨ ᠢᠶᠠᠨ ᠭᠠᠢᠬᠠᠵᠠᠭᠠᠯᠠ᠃ 17 ᠫᠧᠲ᠋ᠧᠷ ᠲᠡᠳᠡᠨ ᠢ ᠴᠢᠮᠡᠭᠡ ᠦᠭᠡᠢ ᠪᠠᠢᠭᠠᠷᠠᠢ ᠭᠡᠵᠦ ᠭᠠᠷ ᠢᠶᠠᠷ ᠢᠶᠠᠨ ᠳᠣᠬᠢᠭᠰᠠᠨ ᠤ ᠳᠠᠷᠠᠭᠠ᠂ ᠡᠵᠡᠨ ᠥᠪᠡᠷ ᠢ ᠨᠢ ᠭᠢᠨᠳᠠᠨ ᠠᠴᠠ ᠬᠡᠷᠬᠢᠨ ᠭᠠᠷᠭᠠᠭᠰᠠᠨ ᠲᠤᠬᠠᠢ ᠲᠠᠢᠯᠪᠤᠷᠢᠯᠠᠵᠤ ᠥᠭᠪᠡ᠃ ᠲᠡᠷᠡ᠄ 《ᠡᠭᠦᠨ ᠢ ᠶᠠᠺᠣᠪ ᠪᠠ ᠪᠤᠰᠤᠳ ᠠᠬᠠ ᠳᠡᠭᠦᠦ ᠨᠠᠷ ᠲᠤ ᠳᠤᠭᠤᠯᠭᠠᠭᠠᠷᠠᠢ》 ᠬᠡᠮᠡᠨ ᠬᠡᠯᠡᠭᠡᠳ ᠲᠡᠨᠳᠡ ᠡᠴᠡ ᠥᠭᠡᠷᠡ ᠭᠠᠵᠠᠷ ᠲᠤ ᠣᠳᠪᠠ᠃
18 ᠥᠷᠯᠥᠭᠡ ᠪᠣᠯᠬᠤ ᠳᠤ᠂ ᠫᠧᠲ᠋ᠧᠷ ᠶᠠᠭᠠᠬᠢᠴᠢᠬᠠᠪᠠ ᠭᠡᠰᠡᠨ ᠶᠡᠬᠡ ᠦᠢᠮᠡᠭᠡᠨ ᠴᠡᠷᠢᠭ ᠤᠳ ᠤᠨ ᠳᠤᠮᠳᠠ ᠭᠠᠷᠴᠠᠢ᠃ 19 ᠾᠧᠷᠣᠳ᠋ ᠲᠡᠭᠦᠨ ᠢ ᠮᠣᠬᠣᠲᠠᠯᠠ ᠡᠷᠢᠭᠡᠳ ᠣᠯᠣᠭᠰᠠᠨ ᠦᠭᠡᠢ ᠪᠣᠯᠬᠣᠷ ᠬᠠᠷᠠᠭᠤᠯ ᠤᠳ ᠢ ᠪᠠᠢᠴᠠᠭᠠᠭᠠᠳ ᠴᠠᠭᠠᠵᠠᠯᠠ ᠭᠡᠵᠦ ᠲᠤᠰᠢᠶᠠᠪᠠ᠃ ᠳᠠᠷᠠᠭᠠ ᠨᠢ ᠾᠧᠷᠣᠳ᠋ ᠶᠦᠳᠠᠢ ᠨᠤᠲᠤᠭ ᠠᠴᠠ ᠰᠠᠯᠵᠤ ᠺᠠᠶᠧᠰᠠᠷᠢᠶᠠ ᠬᠣᠲᠠ ᠳᠤ ᠣᠴᠢᠨ ᠲᠦᠷ ᠰᠠᠭᠤᠵᠠᠢ᠃
ᠾᠧᠷᠣᠳ᠋ ᠠᠭᠷᠢᠫᠠ ᠰᠥᠨᠥᠭᠡᠭᠳᠡᠪᠡ
20 ᠲᠢᠷ ᠪᠣᠯᠣᠨ ᠰᠢᠢᠳᠣᠨ ᠬᠣᠲᠠ ᠶᠢᠨ ᠬᠥᠮᠦᠰ ᠾᠧᠷᠣᠳ᠋ ᠤᠷᠤᠭᠤ ᠰᠠᠨᠠᠭᠠ ᠨᠢᠭᠡᠲᠡᠢ ᠪᠠᠷ ᠣᠴᠢᠪᠠ᠃ ᠶᠠᠭᠠᠬᠢᠭᠠᠳ ᠭᠡᠪᠡᠯ᠂ ᠲᠡᠷᠡ ᠲᠡᠳᠡᠨ ᠳᠦ ᠶᠡᠬᠡ ᠬᠢᠯᠢᠩᠨᠡᠵᠦ ᠪᠠᠢᠯᠠ᠃ ᠲᠡᠳᠡᠨ ᠦ ᠬᠢᠨ ᠬᠠᠨ ᠤ ᠨᠤᠲᠤᠭ ᠠᠴᠠ ᠬᠦᠨᠡᠰᠦ ᠠᠪᠳᠠᠭ ᠲᠤᠯᠠ ᠬᠠᠨ ᠤ ᠠᠰᠠᠷᠠᠭᠴᠢ ᠲᠦᠰᠢᠮᠡᠯ ᠪᠯᠠᠰᠲ ᠢ ᠢᠳᠬᠠᠨ᠂ ᠬᠠᠨ ᠲᠠᠢ ᠨᠠᠢᠷᠠᠮᠳᠠᠬᠤ ᠶᠢ ᠭᠤᠶᠤᠵᠠᠢ᠃ 21 ᠾᠧᠷᠣᠳ᠋ ᠲᠣᠭᠲᠠᠭᠰᠠᠨ ᠡᠳᠦᠷ ᠲᠡᠭᠡᠨ ᠬᠠᠨ ᠤ ᠬᠤᠪᠴᠠᠰᠤ ᠪᠠᠨ ᠡᠮᠦᠰᠦᠨ ᠰᠠᠭᠤᠷᠢᠨ ᠳᠠᠭᠠᠨ ᠰᠠᠭᠤᠵᠤ ᠶᠠᠷᠢᠶᠠ ᠲᠠᠯᠪᠢᠵᠤ ᠪᠠᠢᠬᠤ ᠳᠤ᠂ 22 ᠠᠷᠠᠳ ᠣᠯᠠᠨ᠄ 《ᠡᠨᠡ ᠴᠢᠨᠢ ᠬᠥᠮᠦᠨ ᠦ ᠳᠠᠭᠤ ᠪᠢᠰᠢ᠂ ᠬᠠᠷᠢᠨ ᠪᠤᠷᠬᠠᠨ ᠤ ᠳᠠᠭᠤ ᠪᠠᠢᠨᠠ》 ᠭᠡᠵᠦ ᠬᠠᠰᠬᠢᠷᠤᠯᠳᠤᠯᠠ᠃ 23 ᠲᠡᠷᠡ ᠳᠠᠷᠤᠢ ᠡᠵᠡᠨ ᠦ ᠡᠯᠴᠢ ᠾᠧᠷᠣᠳ᠋ ᠢ ᠳᠠᠭᠠᠷᠢᠭᠰᠠᠨ ᠳᠤ᠂ ᠲᠡᠷᠡ ᠬᠣᠷᠣᠬᠠᠢ ᠳᠤ ᠢᠳᠡᠭᠳᠡᠨ ᠠᠮᠢᠰᠬᠤᠯ ᠬᠤᠷᠢᠶᠠᠭᠰᠠᠨ ᠪᠠᠢᠨᠠ᠃ ᠤᠴᠢᠷ ᠨᠢ᠂ ᠲᠡᠷᠡ ᠪᠤᠷᠬᠠᠨ ᠢ ᠠᠯᠳᠠᠷᠰᠢᠭᠤᠯᠤᠭᠰᠠᠨ ᠦᠭᠡᠢ᠃
24 ᠪᠤᠷᠬᠠᠨ ᠤ ᠦᠭᠡ ᠮᠠᠨᠳᠤᠭᠰᠠᠭᠠᠷ᠂ ᠲᠠᠷᠬᠠᠭᠰᠠᠭᠠᠷ ᠪᠠᠢᠪᠠ᠃ 25 ᠪᠠᠷᠨᠠᠪᠠ ᠰᠠᠦ᠋ᠯ ᠬᠣᠶᠠᠷ ᠠᠵᠢᠯ ᠢᠶᠠᠨ ᠪᠡᠶᠡᠯᠡᠭᠦᠯᠦᠭᠡᠳ ᠮᠠᠷᠺ ᠭᠡᠭᠳᠡᠳᠡᠭ ᠶᠣᠬᠠᠨ ᠢ ᠳᠠᠭᠠᠭᠤᠯᠤᠨ ᠶᠧᠷᠦ᠋ᠰᠠᠯᠧᠮ ᠡᠴᠡ ᠪᠤᠴᠠᠨ ᠢᠷᠡᠵᠡᠢ᠃