ᠦᠢᠯᠡᠰ ᠬᠣᠷᠢᠨ ᠬᠣᠶᠠᠷ
ᠶᠦᠳᠠᠢᠴᠤᠳ ᠲᠠᠭᠠᠨ ᠭᠡᠷᠡᠴᠢᠯᠡᠭᠰᠡᠨ ᠨᠢ
1 《ᠠᠬᠠ ᠳᠡᠭᠦᠦ ᠨᠠᠷ ᠡ︕ ᠡᠳᠦᠭᠡ ᠲᠠ ᠨᠠᠷ ᠤᠨ ᠡᠮᠦᠨᠡ ᠲᠠᠢᠯᠪᠤᠷᠢᠯᠠᠬᠤ ᠶᠢ ᠮᠢᠨᠢ ᠰᠣᠨᠣᠰᠣᠭᠠᠴᠢ》 ᠭᠡᠪᠡ᠃ 2 ᠲᠡᠳᠡ ᠢᠪᠷᠠᠢ ᠬᠡᠯᠡ ᠪᠡᠷ ᠶᠠᠷᠢᠵᠤ ᠪᠠᠢᠬᠤ ᠶᠢ ᠨᠢ ᠰᠣᠨᠣᠰᠣᠭᠠᠳ ᠨᠡᠩ ᠴᠢᠮᠡᠭᠡ ᠦᠭᠡᠢ ᠪᠣᠯᠪᠠ᠃ ᠫᠠᠦ᠋ᠯ ᠴᠠᠰᠢ ᠨᠢ᠄
3 《ᠪᠢ ᠪᠣᠯ ᠶᠦᠳᠠᠢ ᠬᠥᠮᠦᠨ᠂ ᠺᠢᠯᠢᠺᠢᠶᠠ ᠶᠢᠨ ᠲᠠᠷᠰᠦ᠋ ᠬᠣᠲᠠ ᠳᠤ ᠲᠥᠷᠥᠭᠡᠳ ᠡᠨᠡ ᠬᠣᠲᠠ ᠳᠤ ᠬᠥᠮᠦᠵᠢᠵᠦ ᠭᠠᠮᠠᠯᠢᠶᠧᠯ ᠪᠠᠭᠰᠢ ᠶᠢᠨ ᠳᠣᠣᠷᠠ᠂ ᠳᠡᠭᠡᠳᠦᠰ ᠦᠨ ᠢᠶᠠᠨ ᠬᠠᠤᠯᠢ ᠪᠠᠷ ᠴᠢᠩᠭ᠍ᠠ ᠰᠤᠷᠭᠠᠭᠳᠠᠵᠤ ᠥᠨᠥᠳᠥᠷ ᠦᠨ ᠲᠠ ᠪᠦᠬᠦᠨ ᠲᠡᠢ ᠠᠳᠠᠯᠢᠬᠠᠨ ᠪᠤᠷᠬᠠᠨ ᠤ ᠲᠥᠯᠥᠭᠡ ᠵᠢᠳᠬᠦᠭᠴᠢ ᠪᠠᠢᠭᠰᠠᠨ ᠪᠢᠯᠡ᠃ 4 ᠪᠢ ᠡᠨᠡ ᠵᠠᠮ ᠤᠨ ᠬᠢᠨ ᠢ ᠦᠬᠦᠲᠡᠯᠡ ᠨᠢ ᠬᠠᠪᠴᠢᠵᠤ᠂ ᠡᠷᠡᠭᠲᠡᠢ ᠡᠮᠡᠭᠲᠡᠢ ᠢᠯᠭᠠᠯ ᠦᠭᠡᠢ ᠬᠦᠯᠢᠭᠡᠳ ᠱᠣᠷᠣᠩ ᠳᠤ ᠬᠢᠳᠡᠭ ᠪᠠᠢᠭᠰᠠᠨ᠃ 5 ᠡᠭᠦᠨ ᠢ ᠲᠡᠷᠢᠭᠦᠨ ᠲᠠᠬᠢᠯᠴᠢ ᠪᠣᠯᠣᠨ ᠪᠦᠬᠦ ᠠᠬᠠᠯᠠᠭᠴᠢᠳ ᠴᠤ ᠭᠡᠷᠡᠴᠢᠯᠡᠨᠡ᠃ ᠲᠡᠳᠡᠨ ᠦ ᠳ᠋ᠠᠮᠠᠰᠺᠦ᠋ᠰ ᠲᠤ ᠪᠠᠢᠭᠠ ᠠᠬᠠ ᠳᠡᠭᠦᠦ ᠨᠠᠷ ᠲᠡᠭᠡᠨ ᠪᠢᠴᠢᠭᠰᠡᠨ ᠵᠠᠬᠢᠳᠠᠯ ᠢ ᠪᠢ ᠠᠪᠤᠭᠠᠳ ᠲᠡᠷᠡ ᠬᠣᠲᠠ ᠶᠢ ᠵᠣᠷᠢᠯᠠ᠃ ᠲᠡᠨᠳᠡᠬᠢ ᠶᠢᠨ ᠬᠢᠨ ᠢ ᠬᠦᠷᠲᠡᠯᠡ ᠬᠦᠯᠢᠭᠡᠳ ᠶᠧᠷᠦ᠋ᠰᠠᠯᠧᠮ ᠤᠷᠤᠭᠤ ᠠᠪᠠᠴᠢᠵᠤ ᠰᠢᠳᠬᠡᠭᠦᠯᠬᠦ ᠭᠡᠰᠡᠨ ᠶᠤᠮ᠃
6 ᠦᠳᠡ ᠶᠢᠨ ᠠᠯᠲᠠ ᠪᠠᠷ ᠳ᠋ᠠᠮᠠᠰᠺᠦ᠋ᠰ ᠲᠤ ᠳᠥᠭᠥᠵᠦ ᠣᠴᠢᠳᠡᠯᠡ ᠭᠡᠨᠡᠳᠲᠡ ᠲᠩᠷᠢ ᠡᠴᠡ ᠭᠡᠷᠡᠯ ᠳᠤᠸᠠᠯᠠᠵᠤ᠂ ᠨᠠᠮᠠᠶᠢ ᠬᠦᠷᠢᠶᠡᠯᠡᠨ ᠭᠡᠶᠢᠭᠦᠯᠦᠭᠰᠡᠨ ᠳᠦ᠂ 7 ᠪᠢ ᠭᠠᠵᠠᠷ ᠲᠤ ᠤᠨᠠᠯᠠ᠃ ᠲᠡᠭᠡᠲᠡᠯᠡ᠄ 〈ᠰᠠᠦ᠋ᠯ ᠡ᠂ ᠰᠠᠦ᠋ᠯ ᠡ᠂ ᠴᠢ ᠶᠠᠭᠤᠨ ᠳᠤ ᠨᠠᠮᠠᠶᠢ ᠬᠠᠪᠴᠢᠵᠤ ᠪᠠᠢᠨᠠ ᠪᠤᠢ︖〉 ᠭᠡᠬᠦ ᠳᠠᠭᠤ ᠰᠣᠨᠣᠰᠲᠠᠯᠠ᠃ 8 ᠪᠢ᠄ 〈ᠲᠠ ᠬᠡᠨ ᠪᠤᠢ︖ ᠡᠵᠡᠨ ᠮᠢᠨᠢ〉 ᠭᠡᠵᠦ ᠠᠰᠠᠭᠤᠬᠤ ᠳᠤ᠂ ᠲᠡᠷᠡ᠄ 〈ᠪᠢ ᠪᠣᠯ ᠴᠢᠨᠦ ᠬᠠᠪᠴᠢᠵᠤ ᠪᠠᠢᠭᠠ ᠨᠠᠽᠠᠷᠧᠲ ᠤᠨ ᠢᠰᠦ᠋ᠰ ᠪᠠᠢᠨᠠ〉 ᠭᠡᠵᠦ ᠬᠠᠷᠢᠭᠤᠯᠪᠠ᠃ 9 ᠬᠠᠮᠲᠤ ᠪᠠᠢᠭᠰᠠᠳ ᠮᠠᠨᠢ ᠲᠡᠷᠡ ᠭᠡᠷᠡᠯ ᠢ ᠬᠠᠷᠠᠭᠰᠠᠨ ᠪᠣᠯᠪᠠᠴᠤ ᠨᠠᠳᠠ ᠲᠠᠢ ᠶᠠᠷᠢᠭᠴᠢ ᠶᠢᠨ ᠳᠠᠭᠤ ᠶᠢ ᠣᠢᠯᠠᠭᠠᠭᠰᠠᠨ ᠦᠭᠡᠢ᠃ 10 ᠲᠡᠭᠡᠭᠡᠳ᠄ 〈ᠪᠢ ᠶᠠᠭᠤ ᠬᠢᠬᠦ ᠶᠣᠰᠣᠲᠠᠢ ᠪᠤᠢ︖ ᠡᠵᠡᠨ〉 ᠭᠡᠬᠦ ᠳᠦ᠂ ᠲᠡᠷᠡ᠄ 〈ᠪᠣᠰ᠂ ᠳ᠋ᠠᠮᠠᠰᠺᠦ᠋ᠰ ᠤᠷᠤᠭᠤ ᠶᠠᠪᠤ᠃ ᠬᠢᠬᠦ ᠶᠣᠰᠣᠲᠠᠢ ᠪᠦᠬᠦᠨ ᠢ ᠴᠢᠨᠢ ᠬᠡᠯᠡᠵᠦ ᠥᠭᠬᠦ ᠬᠥᠮᠦᠨ ᠲᠡᠨᠳᠡ ᠪᠠᠢᠭᠠ〉 ᠭᠡᠪᠡ᠃ 11 ᠨᠥᠭᠥᠭᠡ ᠭᠡᠷᠡᠯ ᠦᠨ ᠭᠢᠯᠪᠠᠭᠠ ᠨᠠᠮᠠᠶᠢ ᠬᠠᠷᠠᠭᠠ ᠦᠭᠡᠢ ᠪᠣᠯᠭᠠᠭᠰᠠᠨ ᠲᠤᠯᠠ ᠪᠢ ᠬᠠᠮᠲᠤ ᠪᠠᠢᠭᠰᠠᠳ ᠤᠨ ᠢᠶᠠᠨ ᠭᠠᠷ ᠢᠶᠠᠷ ᠬᠥᠲᠥᠯᠥᠭᠦᠯᠦᠨ ᠳ᠋ᠠᠮᠠᠰᠺᠦ᠋ᠰ ᠣᠷᠣᠪᠠ᠃
12 ᠲᠡᠨᠳᠡ ᠠᠨᠠᠨᠢᠶᠠ ᠭᠡᠳᠡᠭ ᠬᠥᠮᠦᠨ ᠪᠠᠢᠵᠠᠢ᠃ ᠲᠡᠷᠡ ᠬᠠᠤᠯᠢ ᠶᠢᠨ ᠶᠣᠰᠣᠭᠠᠷ ᠪᠤᠷᠬᠠᠨ ᠠᠴᠠ ᠡᠮᠢᠶᠡᠳᠡᠭ ᠪᠣᠯᠬᠣᠷ ᠲᠡᠨᠳᠡ ᠰᠠᠭᠤᠭᠠ ᠪᠦᠬᠦ ᠶᠦᠳᠠᠢ ᠬᠥᠮᠦᠨ ᠦ ᠳᠤᠮᠳᠠ ᠨᠡᠷᠡ ᠬᠦᠨᠳᠦᠲᠡᠢ ᠠᠵᠢ᠃ 13 ᠲᠡᠷᠡ ᠨᠠᠳᠠ ᠤᠷᠤᠭᠤ ᠢᠷᠡᠵᠦ ᠵᠣᠭᠰᠣᠭᠠᠳ᠄ 〈ᠰᠠᠦ᠋ᠯ ᠠᠨᠳᠠ ᠡ᠂ ᠬᠠᠷᠠᠭᠠ ᠲᠠᠢ ᠪᠣᠯᠣᠭᠲᠤᠨ〉 ᠭᠡᠰᠡᠨ ᠲᠡᠷᠡ ᠬᠣᠷᠣᠮ ᠳᠤ᠂ ᠪᠢ ᠬᠠᠷᠠᠭᠠ ᠲᠠᠢ ᠪᠣᠯᠣᠭᠠᠳ ᠲᠡᠭᠦᠨ ᠢ ᠬᠠᠷᠠᠯᠠ᠃ 14 ᠲᠡᠷᠡ ᠨᠠᠳᠠ ᠳᠤ᠄ 〈ᠮᠠᠨ ᠤ ᠳᠡᠭᠡᠳᠦᠰ ᠦᠨ ᠪᠤᠷᠬᠠᠨ ᠥᠪᠡᠷ ᠦᠨ ᠢᠶᠠᠨ ᠰᠠᠨᠠᠭᠠ ᠶᠢ ᠮᠡᠳᠡᠭᠦᠯᠵᠦ ᠵᠥᠪᠲᠦ ᠨᠢᠭᠡᠨ ᠢ ᠦᠵᠡᠭᠦᠯᠦᠨ᠂ ᠮᠥᠨ ᠥᠪᠡᠷ ᠦᠨ ᠢᠶᠠᠨ ᠠᠮᠠ ᠠᠴᠠ ᠭᠠᠷᠬᠤ ᠳᠠᠭᠤ ᠪᠠᠨ ᠰᠣᠨᠣᠰᠬᠠᠬᠤ ᠭᠡᠵᠦ ᠴᠢᠮᠠᠶᠢ ᠰᠣᠩ᠋ᠭᠣᠭᠰᠠᠨ᠃ 15 ᠡᠢᠨ ᠬᠦ ᠴᠢ ᠦᠵᠡᠵᠦ ᠰᠣᠨᠣᠰᠣᠭᠰᠠᠨ ᠢᠶᠠᠨ ᠲᠡᠭᠦᠨ ᠦ ᠲᠥᠯᠥᠭᠡ ᠬᠠᠮᠤᠭ ᠬᠥᠮᠦᠨ ᠳᠦ ᠭᠡᠷᠡᠴᠢᠯᠡᠬᠦ ᠪᠣᠯᠣᠨᠠ᠃ 16 ᠣᠳᠣ ᠴᠢ ᠶᠠᠭᠤᠨ ᠳᠤ ᠤᠳᠠᠨᠠ ᠪᠤᠢ︖ ᠪᠣᠰ᠂ ᠡᠵᠡᠨ ᠦ ᠨᠡᠷᠡ ᠶᠢ ᠳᠠᠭᠤᠳᠠᠨ ᠤᠬᠢᠶᠠᠯ ᠬᠦᠷᠲᠡᠭᠡᠳ ᠭᠡᠮ ᠨᠢᠭᠦᠯ ᠢᠶᠡᠨ ᠤᠭᠢᠶᠠᠭᠲᠤᠨ〉 ᠭᠡᠯᠡ᠃
17 ᠪᠢ ᠶᠧᠷᠦ᠋ᠰᠠᠯᠧᠮ ᠳᠤ ᠪᠤᠴᠠᠵᠤ ᠢᠷᠡᠭᠡᠳ ᠠᠷᠢᠭᠤᠨ ᠣᠷᠳᠣᠨ ᠳᠤ ᠳᠠᠭᠠᠳᠬᠠᠵᠤ ᠪᠠᠢᠲᠠᠯᠠ ᠵᠥᠩ ᠢᠷᠡᠵᠦ᠂ 18 ᠪᠢ ᠡᠵᠡᠨ ᠢ ᠬᠠᠷᠠᠯᠠ᠃ ᠲᠡᠷᠡ᠄ 〈ᠲᠦᠷᠭᠡᠯᠡ︕ ᠴᠢ ᠶᠧᠷᠦ᠋ᠰᠠᠯᠧᠮ ᠡᠴᠡ ᠱᠠᠯᠠᠪᠬᠠᠨ ᠭᠠᠷ︕ ᠡ᠊ᠨᠳᠡᠬᠢ ᠶᠢᠨ ᠬᠢᠨ ᠮᠢᠨᠦ ᠲᠤᠬᠠᠢ ᠭᠡᠷᠡᠴᠢᠯᠡᠯ ᠢ ᠴᠢᠨᠢ ᠬᠦᠯᠢᠶᠡᠨ ᠠᠪᠬᠤ ᠦᠭᠡᠢ〉 ᠭᠡᠵᠦ ᠶᠠᠷᠢᠯᠠ᠃ 19 ᠲᠡᠭᠡᠬᠦ ᠳᠦᠨᠢ ᠪᠢ᠄ 〈ᠡᠵᠡᠨ᠂ ᠬᠤᠷᠠᠯ ᠤᠨ ᠲᠠᠩᠬᠢᠮ ᠤᠳ ᠢᠶᠠᠷ ᠶᠠᠪᠤᠵᠤ᠂ ᠲᠠᠨ ᠳᠤ ᠢᠲᠡᠭᠡᠭᠴᠢᠳ ᠢ ᠱᠣᠷᠣᠩ ᠳᠤ ᠬᠢᠵᠦ ᠲᠠᠰᠢᠭᠤᠷᠳᠠᠳᠠᠭ ᠪᠠᠢᠭᠰᠠᠨ ᠢ ᠮᠢᠨᠢ ᠲᠡᠳᠡ ᠥᠪᠡᠷᠰᠡᠳ ᠢᠶᠡᠨ ᠰᠠᠢᠨ ᠮᠡᠳᠡᠨᠡ᠃ 20 ᠮᠥᠨ ᠲᠠᠨ ᠤ ᠭᠡᠷᠡᠴᠢ ᠰᠲ᠋ᠧᠹᠠᠨ ᠴᠢᠰᠤ ᠪᠠᠨ ᠤᠷᠤᠰᠬᠠᠵᠤ ᠪᠠᠢᠬᠤ ᠳᠤ᠂ ᠲᠡᠨᠳᠡ ᠵᠣᠭᠰᠣᠵᠤ ᠲᠡᠭᠦᠨ ᠢ ᠬᠥᠨᠥᠭᠡᠭᠴᠢᠳ ᠲᠠᠢ ᠰᠠᠨᠠᠭᠠ ᠨᠡᠢᠯᠡᠨ ᠲᠡᠳᠡᠨ ᠦ ᠬᠤᠪᠴᠠᠰᠤ ᠶᠢ ᠰᠠᠬᠢᠵᠤ ᠪᠠᠢᠭᠰᠠᠨ ᠢ ᠮᠢᠨᠢ ᠴᠤ ᠲᠡᠳᠡ ᠮᠡᠳᠡᠨᠡ〉 ᠭᠡᠬᠦ ᠳᠦ᠂ 21 ᠲᠡᠷᠡ ᠨᠠᠳᠠ ᠳᠤ᠄ 〈ᠶᠠᠪᠤ᠂ ᠪᠢ ᠴᠢᠮᠠᠶᠢ ᠬᠠᠷᠢᠴᠤᠳ ᠤᠷᠤᠭᠤ ᠠᠯᠤᠰ ᠬᠣᠯᠠ ᠢᠯᠡᠭᠡᠶᠡ〉 ᠭᠡᠯᠡ》 ᠬᠡᠮᠡᠪᠡ᠃
ᠢᠷᠭᠡᠨ ᠦ ᠡᠷᠬᠡ ᠪᠡᠨ ᠬᠡᠷᠡᠭᠵᠢᠭᠦᠯᠦᠭᠰᠡᠨ ᠨᠢ
22 ᠲᠡᠳᠡ ᠡ᠊ᠨᠳᠡ ᠬᠦᠷᠲᠡᠯᠡ ᠶᠠᠷᠢᠬᠤ ᠶᠢ ᠨᠢ ᠰᠣᠨᠣᠰᠣᠭᠠᠳ ᠥᠨᠳᠥᠷ ᠳᠠᠭᠤᠨ ᠢᠶᠠᠷ᠄ 《ᠡᠢᠮᠦ ᠭᠠᠢᠬᠠᠯ ᠢ ᠭᠠᠵᠠᠷ ᠳᠡᠯᠡᠬᠡᠢ ᠡᠴᠡ ᠠᠷᠢᠯᠭᠠ︕ ᠠᠮᠢᠳᠤ ᠪᠠᠢᠯᠭᠠᠬᠤ ᠶᠣᠰᠣ ᠦᠭᠡᠢ︕》 ᠭᠡᠵᠦ ᠬᠠᠰᠬᠢᠷᠤᠯᠳᠤᠨ᠂ 23 ᠬᠤᠪᠴᠠᠰᠤ ᠪᠠᠨ ᠰᠢᠪᠲᠤ ᠲᠠᠲᠠᠨ ᠬᠠᠶᠠᠵᠤ᠂ ᠠᠭᠠᠷ ᠲᠤ ᠲᠣᠭᠣᠰᠣ ᠮᠠᠨᠠᠷᠠᠭᠠᠬᠤ ᠳᠤ᠂ 24 ᠮᠢᠩ᠋ᠭᠠᠲᠤ ᠶᠢᠨ ᠳᠠᠷᠤᠭᠠ ᠫᠠᠦ᠋ᠯ ᠢ ᠬᠤᠸᠠᠷᠠᠨ ᠳᠤ ᠠᠪᠠᠴᠢᠬᠤ ᠶᠢ ᠲᠤᠰᠢᠶᠠᠯᠠ᠃ ᠲᠡᠭᠡᠭᠡᠳ ᠲᠡᠷᠡ ᠬᠥᠮᠦᠰ ᠦᠨ ᠫᠠᠦ᠋ᠯ ᠤᠷᠤᠭᠤ ᠲᠡᠭᠡᠵᠦ ᠬᠠᠰᠬᠢᠷᠤᠯᠳᠤᠵᠤ ᠪᠤᠢ ᠶᠢᠨ ᠤᠴᠢᠷ ᠢ ᠣᠯᠬᠤ ᠶᠢᠨ ᠲᠤᠯᠠᠳᠠ ᠫᠠᠦ᠋ᠯ ᠢ ᠲᠠᠰᠢᠭᠤᠷᠳᠠᠨ᠂ ᠪᠠᠢᠴᠠᠭᠠ ᠭᠡᠵᠦ ᠬᠡᠯᠡᠵᠡᠢ᠃ 25 ᠲᠡᠳᠡ ᠫᠠᠦ᠋ᠯ ᠤᠨ ᠪᠡᠶᠡ ᠶᠢ ᠲᠠᠯᠠᠵᠤ ᠬᠦᠯᠢᠬᠦ ᠳᠦ᠂ ᠫᠠᠦ᠋ᠯ ᠲᠡᠨᠳᠡ ᠵᠣᠭᠰᠣᠵᠤ ᠪᠠᠢᠭᠠ ᠵᠠᠭᠤᠲᠤ ᠶᠢᠨ ᠳᠠᠷᠤᠭᠠ ᠳᠤ᠄ 《ᠷᠣᠮᠠ ᠶᠢᠨ ᠢᠷᠭᠡᠨ ᠢ ᠶᠠᠯᠠ ᠲᠣᠭᠲᠠᠭᠠᠭᠠ ᠦᠭᠡᠢ ᠪᠠᠷ ᠲᠠᠰᠢᠭᠤᠷᠳᠠᠵᠤ ᠪᠣᠯᠳᠠᠭ ᠶᠤᠮ ᠤᠤ︖》 ᠭᠡᠵᠦ ᠬᠡᠯᠡᠪᠡ᠃ 26 ᠵᠠᠭᠤᠲᠤ ᠶᠢᠨ ᠳᠠᠷᠤᠭᠠ ᠡᠭᠦᠨ ᠢ ᠰᠣᠨᠣᠰᠣᠭᠠᠳ ᠮᠢᠩ᠋ᠭᠠᠲᠤ ᠶᠢᠨ ᠳᠠᠷᠤᠭᠠ ᠳᠠᠭᠠᠨ ᠳᠤᠭᠤᠯᠭᠠᠨ᠄ 《ᠲᠠ ᠶᠠᠭᠠᠬᠢᠬᠤ ᠪᠤᠢ︖ ᠡᠨᠡ ᠬᠥᠮᠦᠨ ᠴᠢᠨᠢ ᠷᠣᠮᠠ ᠶᠢᠨ ᠢᠷᠭᠡᠨ ᠶᠤᠮ ᠪᠠᠢᠨᠠ》 ᠭᠡᠪᠡ᠃ 27 ᠮᠢᠩ᠋ᠭᠠᠲᠤ ᠶᠢᠨ ᠳᠠᠷᠤᠭᠠ ᠫᠠᠦ᠋ᠯ ᠤᠷᠤᠭᠤ ᠢᠷᠡᠭᠡᠳ᠄ 《ᠴᠢ ᠷᠣᠮᠠ ᠶᠢᠨ ᠢᠷᠭᠡᠨ ᠶᠤᠮ ᠤᠤ︖ ᠨᠠᠳᠠ ᠳᠤ ᠬᠡᠯᠡ》 ᠭᠡᠰᠡᠨ ᠳᠦ᠂ ᠲᠡᠷᠡ᠄ 《ᠲᠡᠢᠮᠦ ᠡ》 ᠭᠡᠪᠡ᠃ 28 ᠮᠢᠩ᠋ᠭᠠᠲᠤ ᠶᠢᠨ ᠳᠠᠷᠤᠭᠠ᠄ 《ᠪᠢ ᠢᠷᠭᠡᠨ ᠦ ᠡᠷᠬᠡ ᠪᠡᠨ ᠶᠡᠬᠡ ᠮᠥᠩᠭᠥ ᠪᠡᠷ ᠣᠯᠵᠤ ᠠᠪᠤᠭᠰᠠᠨ》 ᠭᠡᠬᠦ ᠳᠦ᠂ ᠫᠠᠦ᠋ᠯ᠄ 《ᠪᠢ ᠪᠣᠯ ᠲᠥᠷᠥᠬᠦ ᠳᠡᠭᠡᠨ ᠯᠠ ᠢᠷᠭᠡᠨ ᠨᠢ ᠪᠠᠢᠭᠰᠠᠨ ᠶᠤᠮ》 ᠭᠡᠪᠡ᠃ 29 ᠲᠡᠭᠦᠨ ᠢ ᠪᠠᠢᠴᠠᠭᠠᠬᠤ ᠭᠡᠵᠦ ᠪᠠᠢᠭᠰᠠᠨ ᠬᠥᠮᠦᠰ ᠲᠡᠷᠡ ᠳᠠᠷᠤᠢ ᠵᠠᠢᠯᠠᠨ ᠶᠠᠪᠤᠪᠠ᠃ ᠮᠢᠩ᠋ᠭᠠᠲᠤ ᠶᠢᠨ ᠳᠠᠷᠤᠭᠠ ᠫᠠᠦ᠋ᠯ ᠢ ᠷᠣᠮᠠ ᠶᠢᠨ ᠢᠷᠭᠡᠨ ᠭᠡᠵᠦ ᠮᠡᠳᠡᠭᠡᠳ ᠲᠡᠭᠦᠨ ᠢ ᠬᠦᠯᠢᠭᠰᠡᠨ ᠳᠡᠭᠡᠨ ᠠᠶᠤᠯᠠ᠃
ᠶᠦᠳᠠᠢᠴᠤᠳ ᠤᠨ ᠰᠢᠭᠦᠯᠲᠡ ᠳᠡᠭᠡᠷᠡ
30 ᠮᠠᠷᠭᠠᠰᠢ ᠨᠢ ᠮᠢᠩ᠋ᠭᠠᠲᠤ ᠶᠢᠨ ᠳᠠᠷᠤᠭᠠ ᠶᠦᠳᠠᠢᠴᠤᠳ ᠤᠨ ᠶᠠᠭᠤᠨ ᠤ ᠤᠴᠢᠷ ᠠᠴᠠ ᠫᠠᠦ᠋ᠯ ᠢ ᠵᠠᠭᠠᠯᠳᠤᠵᠤ ᠪᠤᠢ ᠶᠢ ᠲᠣᠳᠣᠷᠬᠠᠢ ᠮᠡᠳᠡᠬᠦ ᠶᠢᠨ ᠲᠤᠯᠠᠳᠠ ᠫᠠᠦ᠋ᠯ ᠢ ᠰᠤᠯᠠᠯᠠᠭᠰᠠᠨ ᠪᠠ ᠠᠬᠠᠯᠠᠬᠤ ᠲᠠᠬᠢᠯᠴᠢᠳ ᠪᠣᠯᠣᠨ ᠰᠢᠭᠦᠬᠦ ᠵᠥᠪᠯᠡᠯ ᠦᠨ ᠪᠦᠬᠦ ᠬᠥᠮᠦᠨ ᠢ ᠴᠤᠭᠯᠠᠭᠤᠯᠤᠭᠰᠠᠨ ᠤ ᠳᠠᠷᠠᠭᠠ᠂ ᠫᠠᠦ᠋ᠯ ᠢ ᠳᠠᠭᠠᠭᠤᠯᠤᠨ ᠠᠪᠠᠴᠢᠵᠤ ᠲᠡᠳᠡᠨ ᠦ ᠡᠮᠦᠨᠡ ᠵᠣᠭᠰᠣᠭᠠᠯᠠ᠃