ᠦᠢᠯᠡᠰ ᠠᠷᠪᠠᠨ ᠳᠥᠷᠪᠡ
ᠢᠺᠣᠨᠢᠶᠣᠨ ᠳᠤ
1 ᠫᠠᠦ᠋ᠯ᠂ ᠪᠠᠷᠨᠠᠪᠠ ᠬᠣᠶᠠᠭᠤᠯᠠ ᠢᠺᠣᠨᠢᠶᠣᠨ ᠳᠤ ᠴᠤ ᠵᠤᠷᠰᠢᠯ ᠶᠣᠰᠣᠭᠠᠷ ᠢᠶᠠᠨ ᠶᠦᠳᠠᠢᠴᠤᠳ ᠤᠨ ᠬᠤᠷᠠᠯ ᠤᠨ ᠲᠠᠩᠬᠢᠮ ᠳᠤ ᠣᠷᠣᠵᠤ ᠨᠣᠮᠯᠠᠭᠰᠠᠨ ᠳᠤ᠂ ᠶᠦᠳᠠᠢ ᠪᠠ ᠭᠷᠧᠭ ᠤᠨ ᠮᠠᠰᠢ ᠣᠯᠠᠨ ᠬᠥᠮᠦᠨ ᠢᠲᠡᠭᠡᠵᠡᠢ᠃ 2 ᠲᠡᠭᠡᠬᠦ ᠳᠦ ᠳᠤᠭᠤᠯᠭᠠᠪᠤᠷᠢ ᠦᠭᠡᠢ ᠶᠦᠳᠠᠢᠴᠤᠳ ᠨᠢ ᠬᠠᠷᠢᠴᠤᠳ ᠤᠨ ᠰᠡᠳᠬᠢᠯ ᠢ ᠥᠳᠥᠭᠡᠨ᠂ ᠲᠡᠳᠡᠨ ᠢ ᠠᠬᠠ ᠳᠡᠭᠦᠦ ᠨᠠᠷ ᠲᠤ ᠮᠠᠭᠤ ᠪᠠᠷ ᠬᠠᠨᠳᠤᠬᠤ ᠪᠣᠯᠭᠠᠵᠠᠢ᠃ 3 ᠲᠡᠢᠮᠦ ᠡᠴᠡ ᠲᠡᠷᠡ ᠬᠣᠶᠠᠷ ᠲᠡᠨᠳᠡ ᠤᠳᠠᠭᠠᠨ ᠪᠠᠢᠵᠤ ᠡᠵᠡᠨ ᠦ ᠲᠥᠯᠥᠭᠡ ᠵᠣᠷᠢᠭᠲᠠᠢ ᠪᠠᠷ ᠶᠠᠷᠢᠵᠤ ᠪᠠᠢᠪᠠ᠃ ᠡᠵᠡᠨ ᠲᠡᠳᠡᠨ ᠦ ᠭᠠᠷ ᠢᠶᠠᠷ ᠰᠢᠳᠢ ᠲᠡᠮᠳᠡᠭ ᠪᠠ ᠭᠠᠢᠬᠠᠮᠰᠢᠭᠲᠤ ᠵᠦᠢᠯᠡᠰ ᠢ ᠦᠢᠯᠡᠳᠦᠭᠦᠯᠦᠨ ᠢᠪᠡᠭᠡᠯ ᠦᠨ ᠦᠭᠡ ᠪᠡᠨ ᠭᠡᠷᠡᠴᠢᠯᠡᠭᠰᠡᠨ ᠪᠠᠢᠨᠠ᠃ 4 ᠲᠡᠷᠡ ᠬᠣᠲᠠ ᠶᠢᠨ ᠬᠢᠨ ᠬᠠᠭᠠᠷᠠᠯ ᠭᠠᠷᠴᠤ᠂ ᠨᠢᠭᠡ ᠪᠦᠯᠦᠭ ᠨᠢ ᠶᠦᠳᠠᠢᠴᠤᠳ ᠤᠨ ᠲᠠᠯᠠ ᠳᠤ᠂ ᠨᠥᠭᠥᠭᠡ ᠪᠦᠯᠦᠭ ᠨᠢ ᠰᠢᠳᠠᠷ ᠱᠠᠪᠢ ᠶᠢᠨ ᠲᠠᠯᠠ ᠳᠤ ᠣᠷᠣᠵᠠᠢ᠃ 5 ᠬᠠᠷᠢᠴᠤᠳ᠂ ᠶᠦᠳᠠᠢᠴᠤᠳ ᠪᠠ ᠲᠡᠳᠡᠨ ᠦ ᠤᠳᠤᠷᠢᠳᠤᠭᠴᠢᠳ ᠬᠠᠮᠲᠤ ᠪᠠᠷ ᠰᠢᠳᠠᠷ ᠱᠠᠪᠢ ᠨᠠᠷ ᠲᠠᠢ ᠬᠠᠯᠳᠠᠵᠤ᠂ ᠴᠢᠯᠠᠭᠤ ᠪᠠᠷ ᠴᠣᠬᠢᠬᠤ ᠭᠡᠵᠦ ᠣᠷᠣᠯᠳᠤᠭᠰᠠᠨ ᠢ 6 ᠲᠡᠷᠡ ᠬᠣᠶᠠᠷ ᠠᠵᠢᠭᠠᠳ ᠯᠦᠺᠠᠣᠨᠢᠶᠠ ᠨᠤᠲᠤᠭ ᠤᠨ ᠯᠦᠰᠲ᠋ᠷᠠ᠂ ᠳ᠋ᠧᠷᠪᠧ ᠬᠣᠲᠠ ᠬᠢᠭᠡᠳ ᠲᠡᠷᠡ ᠬᠠᠪᠢ ᠶᠢᠨ ᠭᠠᠵᠠᠷ ᠢᠶᠠᠷ ᠵᠢᠭᠤᠲᠠᠵᠤ᠂ 7 ᠲᠡᠨᠳᠡ ᠪᠠᠶᠠᠷ ᠤᠨ ᠮᠡᠳᠡᠭᠡ ᠤᠯᠠᠮᠵᠢᠯᠠᠭᠰᠠᠭᠠᠷ ᠪᠠᠢᠪᠠ᠃
ᠯᠦᠰᠲ᠋ᠷᠠ ᠳᠤ
8 ᠯᠦᠰᠲ᠋ᠷᠠ ᠳᠤ ᠬᠥᠯ ᠮᠠᠭᠤᠲᠠᠢ ᠨᠢᠭᠡᠨ ᠬᠥᠮᠦᠨ ᠪᠠᠢᠵᠠᠢ᠃ ᠲᠥᠷᠥᠯᠬᠢ ᠰᠠᠭᠤᠩᠭᠢ ᠳᠣᠭᠣᠯᠠᠩ ᠲᠡᠷᠡ ᠶᠡᠷᠦ ᠡᠴᠡ ᠠᠯᠬᠤᠵᠤ ᠦᠵᠡᠭᠡ ᠦᠭᠡᠢ ᠶᠤᠮ᠃ 9 ᠲᠡᠷᠡ ᠫᠠᠦ᠋ᠯ ᠤᠨ ᠶᠠᠷᠢᠶᠠ ᠶᠢ ᠰᠣᠨᠣᠰᠴᠤ ᠪᠠᠢᠬᠤ ᠳᠤ᠂ ᠫᠠᠦ᠋ᠯ ᠲᠡᠭᠦᠨ ᠢ ᠰᠢᠷᠲᠡᠭᠡᠳ ᠡᠳᠡᠭᠡᠷᠡᠨᠡ ᠭᠡᠰᠡᠨ ᠢᠲᠡᠭᠡᠯ ᠲᠡᠢ ᠶᠢ ᠨᠢ ᠮᠡᠳᠡᠵᠦ᠂ 10 ᠴᠢᠩᠭ᠍ᠠ ᠳᠠᠭᠤᠨ ᠢᠶᠠᠷ᠄ 《ᠪᠣᠰᠴᠤ ᠴᠢᠬᠡ ᠵᠣᠭᠰᠣ》 ᠭᠡᠰᠡᠨ ᠳᠦ᠂ ᠲᠡᠷᠡ ᠦᠰᠦᠷᠦᠨ ᠪᠣᠰᠣᠭᠠᠳ ᠠᠯᠬᠤᠵᠤ ᠡᠬᠢᠯᠡᠯᠡ᠃ 11 ᠫᠠᠦ᠋ᠯ ᠤᠨ ᠡᠢᠨ ᠬᠦ ᠦᠢᠯᠡᠳᠦᠭᠰᠡᠨ ᠢ ᠣᠯᠠᠨ ᠬᠥᠮᠦᠨ ᠦᠵᠡᠭᠡᠳ᠂ ᠯᠦᠺᠠᠣᠨᠢᠶᠠ ᠬᠡᠯᠡ ᠪᠡᠷ᠄ 《ᠪᠤᠷᠬᠠᠳ ᠬᠥᠮᠦᠨ ᠦ ᠲᠥᠷᠬᠥ ᠪᠡᠷ ᠪᠢᠳᠡᠨ ᠦ ᠳᠤᠮᠳᠠ ᠪᠠᠭᠤᠵᠤ ᠢᠷᠡᠯᠡ》 ᠭᠡᠵᠦ ᠬᠠᠰᠬᠢᠷᠤᠯᠳᠤᠪᠠ᠃ 12 ᠲᠡᠳᠡ ᠪᠠᠷᠨᠠᠪᠠ ᠶᠢ ᠽᠦᠰ ᠪᠤᠷᠬᠠᠨ 10 ᠭᠡᠵᠦ᠂ ᠭᠣᠣᠯᠯᠠᠨ ᠶᠠᠷᠢᠭᠴᠢ ᠫᠠᠦ᠋ᠯ ᠢ ᠾᠧᠷᠮᠧ ᠪᠤᠷᠬᠠᠨ 11 ᠬᠡᠮᠡᠨ ᠨᠡᠷᠡᠯᠡᠵᠡᠢ᠃ 13 ᠽᠦᠰ ᠪᠤᠷᠬᠠᠨ ᠤ ᠣᠷᠳᠣᠨ ᠬᠣᠲᠠ ᠶᠢᠨ ᠭᠠᠳᠠᠨᠠ ᠪᠠᠢᠳᠠᠭ ᠠᠵᠢ᠃ ᠲᠡᠷᠡ ᠣᠷᠳᠣᠨ ᠤ ᠲᠠᠬᠢᠯᠴᠢ ᠪᠤᠬᠠ ᠨᠤᠭᠤᠳ ᠪᠠ ᠴᠡᠴᠡᠭ ᠦᠨ ᠴᠠᠭᠠᠷᠢᠭ ᠢᠶᠠᠨ ᠬᠣᠲᠠ ᠶᠢᠨ ᠬᠠᠭᠠᠯᠭᠠᠨ ᠤ ᠡᠮᠦᠨᠡ ᠠᠪᠴᠢᠷᠠᠭᠠᠳ ᠣᠯᠠᠨ ᠲᠠᠢ ᠬᠠᠮᠲᠤ ᠲᠡᠷᠡ ᠬᠣᠶᠠᠷ ᠲᠤ ᠲᠠᠬᠢᠯ ᠡᠷᠭᠦᠬᠦ ᠭᠡᠪᠡ᠃ 14 ᠡᠭᠦᠨ ᠢ ᠰᠢᠳᠠᠷ ᠱᠠᠪᠢ ᠪᠠᠷᠨᠠᠪᠠ ᠪᠣᠯᠣᠨ ᠫᠠᠦ᠋ᠯ ᠰᠣᠨᠣᠰᠣᠭᠠᠳ ᠬᠤᠪᠴᠠᠰᠤ ᠪᠠᠨ ᠤᠷᠠᠵᠤ᠂ ᠣᠯᠠᠨ ᠤ ᠳᠤᠮᠳᠠ ᠭᠦᠶᠦᠨ ᠣᠷᠣᠭᠠᠳ ᠴᠢᠩᠭ᠍ᠠ ᠳᠠᠭᠤᠨ ᠢᠶᠠᠷ᠄ 15 《ᠬᠥᠮᠦᠰ ᠡ᠂ ᠲᠠ ᠨᠠᠷ ᠶᠠᠭᠤᠨ ᠳᠤ ᠢᠩᠭᠢᠨᠡ ᠪᠤᠢ︖ ᠪᠢᠳᠡ ᠴᠤ ᠲᠠ ᠨᠠᠷ ᠲᠠᠢ ᠴᠢᠨᠠᠷ ᠢᠶᠠᠷ ᠢᠶᠠᠨ ᠠᠳᠠᠯᠢᠬᠠᠨ ᠬᠥᠮᠦᠨ ᠰᠢᠦ ᠳᠠ᠂ ᠲᠠ ᠨᠠᠷ ᠢ ᠡᠨᠡ ᠬᠣᠭᠣᠰᠣᠨ ᠶᠠᠪᠤᠳᠠᠯ ᠠᠴᠠ ᠰᠠᠯᠵᠤ᠂ ᠠᠮᠢᠳᠤ ᠪᠤᠷᠬᠠᠨ ᠤᠷᠤᠭᠤ ᠡᠷᠭᠢᠭᠡᠰᠡᠢ ᠭᠡᠵᠦ ᠪᠢᠳᠡ ᠪᠠᠶᠠᠷ ᠤᠨ ᠮᠡᠳᠡᠭᠡ ᠶᠢ ᠲᠠ ᠨᠠᠷ ᠲᠤ ᠲᠤᠩ᠋ᠬᠠᠭᠯᠠᠵᠤ ᠪᠠᠢᠨᠠ᠃ ᠲᠡᠷᠡ ᠪᠤᠷᠬᠠᠨ ᠲᠩᠷᠢ᠂ ᠭᠠᠵᠠᠷ᠂ ᠳᠠᠯᠠᠢ ᠪᠣᠯᠣᠨ ᠲᠡᠳᠡᠭᠡᠷ ᠦᠨ ᠳᠣᠲᠣᠷᠠᠬᠢ ᠪᠦᠬᠦ ᠶᠠᠭᠤᠮᠠ ᠶᠢ ᠪᠦᠲᠦᠭᠡᠭᠰᠡᠨ ᠪᠢᠯᠡ᠃ 16 ᠥᠩᠭᠡᠷᠡᠭᠰᠡᠨ ᠦᠶᠡ ᠨᠦᠭᠦᠳ ᠲᠦ᠂ ᠪᠤᠷᠬᠠᠨ ᠪᠦᠬᠦ ᠦᠨᠳᠦᠰᠦᠲᠡᠨ ᠳᠦ ᠥᠪᠡᠷ ᠥᠪᠡᠷ ᠦᠨ ᠢᠶᠠᠨ ᠵᠠᠮ ᠢᠶᠠᠷ ᠶᠠᠪᠤᠬᠤ ᠶᠢ ᠨᠢ ᠵᠥᠪᠰᠢᠶᠡᠷᠡᠳᠡᠭ᠌ ᠪᠠᠢᠵᠠᠢ᠃ 17 ᠭᠡᠬᠦ ᠳᠡᠭᠡᠨ ᠥᠪᠡᠷ ᠢ ᠪᠠᠨ ᠭᠡᠷᠡᠴᠢᠯᠡᠭᠡ ᠦᠭᠡᠢ ᠪᠠᠷ ᠣᠷᠬᠢᠭᠰᠠᠨ ᠪᠢᠰᠢ᠂ ᠰᠠᠢᠨ ᠢ ᠦᠢᠯᠡᠳᠳᠡᠭ ᠪᠠᠢᠪᠠ᠃ ᠲᠡᠷᠡ ᠲᠠ ᠨᠠᠷ ᠤᠨ ᠲᠥᠯᠥᠭᠡ ᠲᠩᠷᠢ ᠡᠴᠡ ᠬᠤᠷᠠ ᠪᠣᠷᠣᠭᠠ ᠣᠷᠣᠭᠤᠯᠤᠨ᠂ ᠦᠩᠰᠢᠭ ᠤᠯᠠᠷᠢᠯ ᠢ ᠬᠠᠢᠷᠠᠯᠠᠵᠤ᠂ ᠬᠣᠭᠣᠯᠠ ᠬᠦᠨᠡᠰᠦ ᠪᠠ ᠪᠠᠶᠠᠷ ᠬᠥᠷ ᠢᠶᠡᠷ ᠰᠡᠳᠬᠢᠯ ᠢ ᠴᠢᠨᠢ ᠪᠢᠯᠬᠠᠭᠤᠯᠤᠨ ᠬᠠᠩ᠋ᠭᠠᠭᠰᠠᠨ》 ᠭᠡᠵᠡᠢ᠃ 18 ᠲᠡᠷᠡ ᠬᠣᠶᠠᠷ ᠥᠪᠡᠷᠰᠡᠳ ᠲᠤᠨᠢ ᠲᠠᠬᠢᠯ ᠡᠷᠭᠦᠬᠦ ᠭᠡᠰᠡᠨ ᠣᠯᠠᠨ ᠢ ᠡᠢᠮᠦ ᠦᠭᠡ ᠪᠡᠷ ᠠᠷᠠᠢ ᠭᠡᠵᠦ ᠬᠣᠷᠢᠭᠯᠠᠪᠠ᠃
ᠰᠢᠷᠢᠶᠠ ᠶᠢᠨ ᠠᠨᠲ᠋ᠢᠶᠣᠬᠢᠶᠠ ᠤᠷᠤᠭᠤ ᠪᠤᠴᠠᠬᠤ ᠵᠠᠮ ᠳᠤ
19 ᠬᠠᠷᠢᠨ ᠶᠦᠳᠠᠢᠴᠤᠳ ᠠᠨᠲ᠋ᠢᠶᠣᠬᠢᠶᠠ ᠪᠠ ᠢᠺᠣᠨᠢᠶᠣᠨ ᠠᠴᠠ ᠢᠷᠡᠵᠦ ᠣᠯᠠᠨ ᠢ ᠥᠲᠥᠭᠡᠵᠡᠢ᠃ ᠲᠡᠳᠡ ᠫᠠᠦ᠋ᠯ ᠢ ᠴᠢᠯᠠᠭᠤ ᠪᠠᠷ ᠴᠣᠬᠢᠭᠰᠠᠨ ᠤ ᠳᠠᠷᠠᠭᠠ ᠲᠡᠭᠦᠨ ᠢ ᠦᠬᠦᠭᠰᠡᠨ ᠭᠡᠵᠦ ᠪᠣᠳᠣᠭᠠᠳ ᠬᠣᠲᠠ ᠶᠢᠨ ᠭᠠᠳᠠᠨᠠ ᠴᠢᠷᠴᠦ ᠭᠠᠷᠭᠠᠪᠠ᠃ 20 ᠱᠠᠪᠢ ᠨᠠᠷ ᠲᠡᠭᠦᠨ ᠢ ᠲᠣᠭᠣᠷᠢᠨ ᠵᠣᠭᠰᠣᠵᠤ ᠪᠠᠢᠲᠠᠯᠠ ᠫᠠᠦ᠋ᠯ ᠪᠣᠰᠴᠤ ᠬᠣᠲᠠ ᠳᠤ ᠣᠷᠣᠪᠠ᠃ ᠮᠠᠷᠭᠠᠰᠢ ᠨᠢ ᠲᠡᠷᠡ ᠪᠠᠷᠨᠠᠪᠠ ᠲᠠᠢ ᠬᠠᠮᠲᠤ ᠳ᠋ᠧᠷᠪᠧ ᠬᠣᠲᠠ ᠤᠷᠤᠭᠤ ᠶᠠᠪᠤᠭᠰᠠᠨ ᠪᠠᠢᠨᠠ᠃
21 ᠲᠡᠳᠡ ᠲᠡᠷᠡ ᠬᠣᠲᠠ ᠳᠤ ᠪᠠᠶᠠᠷ ᠤᠨ ᠮᠡᠳᠡᠭᠡ ᠳᠡᠯᠭᠡᠷᠡᠭᠦᠯᠦᠨ ᠣᠯᠠᠨ ᠬᠥᠮᠦᠨ ᠢ ᠱᠠᠪᠢ ᠪᠣᠯᠭᠠᠵᠤ᠂ ᠯᠦᠰᠲ᠋ᠷᠠ᠂ ᠢᠺᠣᠨᠢᠶᠣᠨ᠂ ᠠᠨᠲ᠋ᠢᠶᠣᠬᠢᠶᠠ ᠳᠤ ᠡᠷᠭᠢᠵᠦ ᠣᠴᠢᠪᠠ᠃ 22 ᠲᠡᠳᠡ ᠱᠠᠪᠢ ᠨᠠᠷ ᠤᠨ ᠰᠡᠳᠬᠢᠯ ᠢ ᠪᠠᠲᠤᠵᠢᠭᠤᠯᠵᠤ᠂ ᠦᠷᠭᠦᠯᠵᠢᠳᠡ ᠢᠲᠡᠭᠡᠯ ᠲᠡᠢ ᠪᠠᠢᠭᠠᠷᠠᠢ ᠭᠡᠵᠦ ᠵᠣᠷᠢᠭᠵᠢᠭᠤᠯᠵᠤ ᠶᠠᠪᠤᠬᠤ ᠳᠠᠭᠠᠨ᠄ 《ᠪᠢᠳᠡ ᠪᠤᠷᠬᠠᠨ ᠤ ᠬᠠᠭᠠᠨᠴᠢᠯᠠᠯ ᠳᠤ ᠣᠷᠣᠬᠤ ᠳᠠᠭᠠᠨ ᠣᠯᠠᠨ ᠵᠣᠪᠠᠯᠠᠩ ᠢ ᠲᠤᠭᠤᠯᠬᠤ ᠶᠣᠰᠣᠲᠠᠢ》 ᠭᠡᠳ 23 ᠴᠢᠭᠤᠯᠭᠠᠨ ᠪᠦᠷᠢ ᠳᠤ ᠠᠬᠠᠯᠠᠭᠴᠢᠳ ᠢ ᠲᠣᠮᠢᠯᠠᠵᠤ᠂ ᠪᠠᠴᠠᠭ ᠪᠠᠷᠢᠨ ᠳᠠᠭᠠᠳᠬᠠᠭᠠᠳ ᠲᠡᠳᠡᠨ ᠢ ᠥᠪᠡᠷᠰᠡᠳ ᠦᠨ ᠬᠢᠨᠢ ᠢᠲᠡᠭᠡᠳᠡᠭ ᠡᠵᠡᠨ ᠳᠦ ᠲᠤᠰᠢᠶᠠᠳᠠᠭ ᠪᠠᠢᠵᠠᠢ᠃
24 ᠲᠡᠭᠡᠭᠡᠳ ᠲᠡᠷᠡ ᠬᠣᠶᠠᠷ ᠫᠢᠰᠢᠳᠢᠶᠠ ᠨᠤᠲᠤᠭ ᠢᠶᠠᠷ ᠳᠠᠭᠠᠷᠢᠵᠤ ᠫᠠᠮᠹᠦ᠋ᠯᠢᠶᠠ ᠨᠤᠲᠤᠭ ᠲᠤ ᠬᠦᠷᠦᠭᠡᠳ 25 ᠫᠧᠷᠭᠧ ᠬᠣᠲᠠ ᠳᠤ ᠦᠭᠡ ᠶᠢ ᠤᠯᠠᠮᠵᠢᠯᠠᠭᠰᠠᠨ ᠤ ᠳᠠᠷᠠᠭᠠ᠂ ᠠᠲ᠋ᠠᠯᠢᠶᠠ ᠬᠣᠲᠠ ᠳᠤ ᠣᠴᠢᠵᠤ᠂ 26 ᠲᠡᠨᠳᠡ ᠡᠴᠡ ᠣᠩ᠋ᠭᠣᠴᠠ ᠪᠠᠷ ᠠᠨᠲ᠋ᠢᠶᠣᠬᠢᠶᠠ ᠶᠢ ᠵᠣᠷᠢᠪᠠ᠃ ᠲᠡᠨᠳᠡᠬᠢ ᠶᠢᠨ ᠬᠢᠨ ᠤᠷᠢᠳᠤ ᠨᠢ ᠲᠡᠷᠡ ᠬᠣᠶᠠᠷ ᠢ ᠠᠵᠢᠯ ᠤᠨ ᠬᠢᠨᠢ ᠲᠥᠯᠥᠭᠡ ᠪᠤᠷᠬᠠᠨ ᠤ ᠢᠪᠡᠭᠡᠯ ᠳᠦ ᠲᠤᠰᠢᠶᠠᠭᠰᠠᠨ ᠪᠢᠯᠡ᠂ ᠡᠳᠦᠭᠡ ᠲᠡᠳᠡ ᠠᠵᠢᠯ ᠢᠶᠠᠨ ᠨᠢᠭᠡᠨᠲᠡ ᠪᠡᠶᠡᠯᠡᠭᠦᠯᠵᠡᠢ᠃ 27 ᠲᠡᠷᠡ ᠬᠣᠶᠠᠷ ᠬᠦᠷᠴᠦ ᠢᠷᠡᠭᠰᠡᠨ ᠤ ᠳᠠᠷᠠᠭᠠ ᠴᠢᠭᠤᠯᠭᠠᠨ ᠤ ᠬᠢᠨ ᠢ ᠴᠤᠭᠯᠠᠭᠤᠯᠵᠤ᠂ ᠪᠤᠷᠬᠠᠨ ᠥᠪᠡᠷᠰᠡᠳ ᠢᠶᠡᠷ ᠨᠢ ᠳᠠᠮᠵᠢᠭᠤᠯᠤᠨ ᠶᠠᠭᠤ ᠶᠠᠭᠤ ᠦᠢᠯᠡᠳᠦᠭᠰᠡᠨ ᠪᠠ ᠬᠠᠷᠢᠴᠤᠳ ᠲᠤ ᠢᠲᠡᠭᠡᠯ ᠦᠨ ᠡᠭᠦᠳᠡ ᠶᠢ ᠶᠠᠭᠠᠬᠢᠵᠤ ᠨᠡᠭᠡᠭᠡᠭᠰᠡᠨ ᠢ ᠳᠤᠭᠤᠯᠭᠠᠭᠠᠳ 28 ᠱᠠᠪᠢ ᠨᠠᠷ ᠲᠠᠢ ᠬᠠᠮᠲᠤ ᠲᠡᠨᠳᠡ ᠤᠳᠠᠲᠠᠯᠠ ᠰᠠᠭᠤᠵᠠᠢ᠃