ᠦᠢᠯᠡᠰ ᠠᠷᠪᠠᠨ ᠭᠤᠷᠪᠠ
 ᠠᠩ᠋ᠬᠠᠨ ᠤ ᠭᠠᠳᠠᠭᠠᠳᠤ ᠠᠶᠠᠯᠠᠯ

1 ᠠᠨᠲ᠋ᠢᠶᠣᠬᠢᠶ᠎ᠠ ᠳᠠᠬᠢ ᠴᠢᠭᠤᠯᠭᠠᠨ ᠳᠤ ᠬᠡᠳᠦᠨ ᠡᠰᠢ ᠦᠵᠡᠭᠦᠯᠦᠭᠴᠢ ᠪᠠ ᠪᠠᠭᠰᠢ ᠨᠠᠷ ᠪᠠᠢᠵᠠᠢ᠃ ᠲᠡᠳᠡ ᠪᠣᠯ ᠪᠠᠷᠨᠠᠪᠠ ᠬᠢᠭᠡᠳ ᠨᠢᠭᠧᠷ 8 ᠭᠡᠭᠳᠡᠳᠡᠭ ᠰᠢᠮᠣᠨ᠂ ᠺᠦᠷᠧᠨᠠᠢ ᠬᠣᠲᠠ ᠶᠢᠨ ᠯᠦᠺᠢ ᠪᠠ ᠾᠧᠷᠣᠳ᠋ ᠬᠠᠨ ᠲᠠᠢ ᠬᠠᠮᠲᠤ ᠥᠰᠥᠭᠰᠡᠨ ᠮᠠᠨᠠᠶᠧᠨ ᠵᠢᠴᠢ ᠰᠠᠦ᠋ᠯ ᠨᠠᠷ ᠪᠣᠯᠣᠨ᠎ᠠ᠃ 2 ᠲᠡᠳᠡ ᠡᠵᠡᠨ ᠳᠦ ᠦᠢᠯᠡᠴᠢᠯᠡᠨ ᠪᠠᠴᠠᠭ ᠪᠠᠷᠢᠵᠤ ᠪᠠᠢᠬᠤ ᠳᠤᠨᠢ᠂ ᠠᠷᠢᠭᠤᠨ ᠰᠦᠨᠡᠰᠦ᠄ 《ᠪᠠᠷᠨᠠᠪᠠ ᠰᠠᠦ᠋ᠯ ᠬᠣᠶᠠᠷ ᠢ ᠨᠠᠳᠠ ᠳᠤ ᠰᠠᠯᠭᠠᠵᠤ ᠥᠭ᠂ ᠪᠢ ᠲᠡᠳᠡᠨ ᠢᠶᠡᠷ ᠠᠵᠢᠯ ᠢᠶᠠᠨ ᠬᠢᠯᠭᠡᠬᠦ ᠭᠡᠵᠦ ᠳᠠᠭᠤᠳᠠᠭᠰᠠᠨ ᠶᠤᠮ》 ᠭᠡᠵᠦ ᠬᠡᠯᠡᠭᠰᠡᠨ ᠪᠠᠢᠵᠠᠢ᠃ 3 ᠲᠡᠢᠮᠦ ᠡᠴᠡ ᠲᠡᠳᠡ ᠪᠠᠴᠠᠭ ᠪᠠᠷᠢᠨ ᠳᠠᠭᠠᠳᠬᠠᠵᠤ᠂ ᠬᠣᠶᠠᠭᠤᠯᠠ ᠶᠢᠨ ᠳᠡᠭᠡᠷ᠎ᠡ ᠭᠠᠷ ᠲᠠᠯᠪᠢᠵᠤ ᠶᠠᠪᠤᠭᠤᠯᠪᠠ᠃
 ᠰᠠᠢᠫᠷᠦ᠋ᠰ ᠠᠷᠠᠯ ᠳᠤ

4 ᠲᠡᠢᠨ ᠬᠦ ᠲᠡᠷᠡ ᠬᠣᠶᠠᠭᠤᠯᠠ ᠠᠷᠢᠭᠤᠨ ᠰᠦᠨᠡᠰᠦᠨ ᠦ ᠢᠯᠡᠭᠡᠯᠲᠡ ᠪᠡᠷ ᠰᠧᠯᠦ᠋ᠺᠢᠶ᠎ᠠ ᠬᠣᠲᠠ ᠳᠤ ᠣᠴᠢᠵᠤ᠂ ᠲᠡᠨᠳᠡ ᠡᠴᠡ ᠰᠠᠢᠫᠷᠦ᠋ᠰ ᠠᠷᠠᠯ ᠵᠦᠭ ᠣᠩ᠋ᠭᠣᠴᠠ ᠪᠠᠷ ᠶᠠᠪᠤᠯ᠎ᠠ᠃ 5 ᠲᠡᠳᠡ ᠰᠠᠯᠠᠮᠢ ᠳᠤ ᠪᠠᠢᠬᠤ ᠳᠠᠭᠠᠨ᠂ ᠶᠦᠳᠠᠢᠴᠤᠳ ᠤᠨ ᠬᠤᠷᠠᠯ ᠤᠨ ᠲᠠᠩᠬᠢᠮ ᠤᠳ ᠢᠶᠠᠷ ᠶᠠᠪᠤᠵᠤ ᠪᠤᠷᠬᠠᠨ ᠤ ᠦᠭᠡ ᠶᠢ ᠲᠤᠩ᠋ᠬᠠᠭᠯᠠᠭᠰᠠᠨ ᠪᠠᠢᠨ᠎ᠠ᠃ ᠶᠣᠬᠠᠨ ᠲᠡᠳᠡᠨ ᠦ ᠦᠢᠯᠡᠴᠢᠯᠡᠭᠴᠢ ᠪᠠᠷ ᠪᠠᠢᠵᠠᠢ᠃ 6 ᠲᠡᠳᠡ ᠠᠷᠠᠯ ᠢ ᠳᠤᠭᠤᠯᠵᠤ ᠫᠠᠹ ᠲᠤ ᠬᠦᠷᠦᠭᠡᠳ ᠪᠠᠷᠢᠰᠦ᠋ᠰ ᠬᠡᠮᠡᠭᠴᠢ ᠨᠢᠭᠡᠨ ᠶᠢᠯᠸᠢᠴᠢᠨ ᠲᠠᠢ ᠤᠴᠠᠷᠠᠵᠠᠢ᠃ ᠲᠡᠷᠡ ᠪᠣᠯ ᠬᠠᠭᠤᠷᠮᠠᠭ ᠡᠰᠢ ᠦᠵᠡᠭᠦᠯᠦᠭᠴᠢ ᠶᠦᠳᠠᠢ ᠬᠥᠮᠦᠨ ᠪᠠᠢᠪᠠ᠃ 7 ᠡᠨᠡ ᠬᠥᠮᠦᠨ ᠨᠤᠲᠤᠭ ᠤᠨ ᠵᠠᠬᠢᠷᠤᠭᠴᠢ ᠰᠧᠷᠬᠢ ᠫᠠᠦ᠋ᠯ ᠤᠨ ᠪᠠᠷ᠎ᠠ ᠪᠣᠯᠣᠭᠴᠢ ᠪᠠᠢᠵᠠᠢ᠃ ᠰᠧᠷᠬᠢ ᠫᠠᠦ᠋ᠯ ᠶᠡᠬᠡ ᠤᠬᠠᠭᠠᠨ ᠲᠠᠢ ᠬᠥᠮᠦᠨ ᠪᠠᠢᠯ᠎ᠠ᠃ ᠲᠡᠷᠡ ᠪᠠᠷᠨᠠᠪᠠ ᠰᠠᠦ᠋ᠯ ᠬᠣᠶᠠᠷ ᠢ ᠤᠷᠢᠵᠦ ᠪᠤᠷᠬᠠᠨ ᠤ ᠦᠭᠡ ᠶᠢ ᠰᠣᠨᠣᠰᠬᠤ ᠭᠡᠰᠡᠨ ᠪᠣᠯᠪᠠᠴᠤ 8 ᠧᠯᠦ᠋ᠮ᠎ᠠ (ᠶᠢᠯᠸᠢᠴᠢᠨ ᠭᠡᠰᠡᠨ ᠤᠳᠬ᠎ᠠ ᠲᠠᠢ᠃) ᠭᠡᠰᠡᠨ ᠨᠡᠷ᠎ᠡ ᠲᠠᠢ ᠥᠨᠥᠬᠢ ᠶᠢᠯᠸᠢᠴᠢᠨ ᠱᠠᠪᠢ ᠨᠠᠷ ᠢ ᠡᠰᠡᠷᠭᠦᠴᠡᠵᠦ ᠵᠠᠬᠢᠷᠤᠭᠴᠢ ᠶᠢ ᠢᠲᠡᠭᠡᠭᠦᠯᠬᠦ ᠦᠭᠡᠢ ᠬᠣᠯᠠᠳᠠᠭᠤᠯᠬᠤ ᠶᠢ ᠣᠷᠣᠯᠳᠤᠪᠠ᠃ 9 ᠫᠠᠦ᠋ᠯ ᠭᠡᠭᠳᠡᠳᠡᠭ ᠰᠠᠦ᠋ᠯ ᠠᠷᠢᠭᠤᠨ ᠰᠦᠨᠡᠰᠦ ᠪᠡᠷ ᠳᠦᠭᠦᠷᠴᠦ᠂ ᠲᠡᠭᠦᠨ ᠢ ᠰᠢᠷᠲᠡᠨ᠄ 10 《ᠵᠦᠢᠯ ᠪᠦᠷᠢ ᠶᠢᠨ ᠵᠠᠯᠢ ᠪᠠᠰᠢᠷ ᠢᠶᠠᠷ ᠳᠦᠭᠦᠷᠦᠭᠰᠡᠨ ᠰᠠᠲ᠋ᠠᠨ ᠤ ᠬᠦᠦ᠂ ᠵᠥᠪᠲᠦ ᠶᠢᠨ ᠳᠠᠢᠰᠤᠨ ᠴᠢ︕ ᠡᠵᠡᠨ ᠦ ᠰᠢᠯᠤᠭᠤᠨ ᠵᠠᠮ ᠢ ᠭᠠᠵᠢᠭᠤᠳᠠᠭᠤᠯᠬᠤ ᠪᠠᠨ ᠪᠣᠯᠢᠬᠤ ᠦᠭᠡᠢ ᠤᠤ︖ 11 ᠬᠠᠷᠠ ᠡ᠂ ᠡᠵᠡᠨ ᠦ ᠮᠤᠲᠤᠷ ᠣᠳᠣ ᠴᠢᠨᠦ ᠳᠡᠭᠡᠷ᠎ᠡ ᠪᠠᠢᠨ᠎ᠠ︕ ᠴᠢ ᠨᠠᠷᠠᠨ ᠤ ᠭᠡᠷᠡᠯ ᠢ ᠲᠦᠷ ᠵᠠᠭᠤᠷ᠎ᠠ ᠦᠵᠡᠬᠦ ᠦᠭᠡᠢ ᠰᠣᠬᠣᠷ ᠪᠣᠯᠣᠨ᠎ᠠ》 ᠭᠡᠵᠦ ᠬᠡᠯᠡᠮᠡᠭᠴᠡ ᠮᠠᠨᠠᠨ ᠪᠠ ᠬᠠᠷᠠᠩ᠋ᠭᠤᠢ ᠲᠡᠭᠦᠨ ᠢ ᠪᠦᠷᠬᠦᠭᠰᠡᠨ ᠳᠦ᠂ ᠲᠡᠷᠡ ᠲᠡᠮᠲᠡᠴᠢᠨ ᠬᠥᠲᠥᠯᠥᠭᠦᠯᠬᠦ ᠬᠥᠮᠦᠨ ᠡᠷᠢᠯ᠎ᠡ᠃ 12 ᠵᠠᠬᠢᠷᠤᠭᠴᠢ ᠪᠣᠯᠣᠭᠰᠠᠨ ᠶᠠᠪᠤᠳᠠᠯ ᠢ ᠬᠠᠷᠠᠭᠠᠳ ᠡᠵᠡᠨ ᠦ ᠰᠤᠷᠭᠠᠯ ᠳᠤ ᠭᠠᠢᠬᠠᠰᠢ ᠲᠥᠷᠥᠨ ᠢᠲᠡᠭᠡᠪᠡ᠃
 ᠫᠢᠰᠢᠳᠢᠶ᠎ᠠ ᠶᠢᠨ ᠠᠨᠲ᠋ᠢᠶᠣᠬᠢᠶ᠎ᠠ ᠳᠤ ᠪᠠᠶᠠᠷ ᠤᠨ ᠮᠡᠳᠡᠭᠡ ᠳᠡᠯᠭᠡᠷᠡᠭᠦᠯᠦᠭᠰᠡᠨ ᠨᠢ

13 ᠫᠠᠦ᠋ᠯ ᠪᠠ ᠲᠡᠭᠦᠨ ᠲᠡᠢ ᠬᠠᠮᠲᠤᠷᠠᠨ ᠠᠵᠢᠯᠯᠠᠭᠴᠢᠳ ᠫᠠᠹ ᠠᠴᠠ ᠤᠰᠤᠨ ᠵᠠᠮ ᠢᠶᠠᠷ ᠫᠠᠮᠹᠦ᠋ᠯᠢᠶ᠎ᠠ ᠶᠢᠨ ᠫᠧᠷᠭᠧ ᠳᠤ ᠬᠦᠷᠴᠦ ᠢᠷᠡᠬᠦ ᠳᠦ᠂ ᠶᠣᠬᠠᠨ ᠲᠡᠳᠡᠨ ᠡᠴᠡ ᠰᠠᠯᠵᠤ ᠶᠧᠷᠦ᠋ᠰᠠᠯᠧᠮ ᠳᠤ ᠪᠤᠴᠠᠪᠠ᠃ 14 ᠲᠡᠳᠡ ᠫᠧᠷᠭᠧ ᠡᠴᠡ ᠴᠢᠨᠠᠭᠰᠢ ᠪᠠᠨ ᠫᠢᠰᠢᠳᠢᠶ᠎ᠠ ᠶᠢᠨ ᠠᠨᠲ᠋ᠢᠶᠣᠬᠢᠶ᠎ᠠ ᠳᠤ ᠬᠦᠷᠦᠭᠡᠳ ᠠᠮᠠᠷᠠᠯ ᠤᠨ ᠡᠳᠦᠷ ᠬᠤᠷᠠᠯ ᠤᠨ ᠲᠠᠩᠬᠢᠮ ᠳᠤ ᠣᠷᠣᠵᠤ ᠰᠠᠭᠤᠪᠠ᠃ 15 ᠬᠠᠤᠯᠢ ᠪᠠ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠤᠨ ᠨᠣᠮ ᠤᠳ ᠠᠴᠠ ᠤᠩ᠋ᠰᠢᠭᠰᠠᠨ ᠤ ᠳᠠᠷᠠᠭ᠎ᠠ᠂ ᠬᠤᠷᠠᠯ ᠤᠨ ᠲᠠᠩᠬᠢᠮ ᠤᠨ ᠠᠬᠠᠯᠠᠭᠴᠢᠳ ᠲᠡᠳᠡᠨ ᠳᠦ ᠬᠡᠯᠡ ᠶᠠᠪᠤᠭᠤᠯᠵᠤ᠄ 《ᠠᠬ᠎ᠠ ᠳᠡᠭᠦᠦᠰ ᠡ᠂ ᠡᠨᠡ ᠣᠯᠠᠨ ᠬᠥᠮᠦᠰ ᠢ ᠵᠣᠷᠢᠭᠵᠢᠭᠤᠯᠬᠤ ᠦᠭᠡ ᠪᠠᠢᠪᠠᠯ ᠶᠠᠷᠢᠭᠠᠷᠠᠢ》 ᠭᠡᠵᠦ ᠬᠡᠯᠡᠭᠦᠯᠦᠭᠰᠡᠨ ᠳᠦ᠂ 16 ᠫᠠᠦ᠋ᠯ ᠪᠣᠰᠴᠤ᠂ ᠭᠠᠷ ᠢᠶᠠᠨ ᠵᠠᠩ᠋ᠭᠠᠭᠰᠠᠨ ᠤ ᠳᠠᠷᠠᠭ᠎ᠠ᠄

17 ᠢᠰᠷᠧᠯ ᠤᠨ ᠠᠷᠠᠳ ᠲᠦᠮᠡᠨ ᠦ ᠪᠤᠷᠬᠠᠨ ᠮᠠᠨ ᠤ ᠳᠡᠭᠡᠳᠦᠰ ᠢ ᠰᠣᠩ᠋ᠭᠣᠨ᠂ ᠶᠧᠵᠢᠫᠲ ᠲᠤ ᠪᠠᠢᠬᠤ ᠳᠤᠨᠢ ᠲᠡᠳᠡᠨ ᠢ ᠡᠷᠭᠦᠵᠦ᠂ ᠬᠦᠴᠦᠲᠦ ᠮᠤᠲᠤᠷ ᠢᠶᠠᠷ ᠢᠶᠠᠨ ᠲᠡᠨᠳᠡ ᠡᠴᠡ ᠤᠳᠤᠷᠢᠳᠤᠨ ᠭᠠᠷᠭᠠᠭᠰᠠᠨ ᠶᠤᠮ᠃ 18 ᠴᠥᠯ ᠳᠤ ᠳᠥᠴᠢᠭᠡᠳ ᠵᠢᠯ ᠪᠠᠢᠬᠤ ᠳᠤᠨᠢ ᠪᠤᠷᠬᠠᠨ ᠲᠡᠳᠡ ᠨᠠᠷ ᠢ ᠬᠦᠯᠢᠴᠡᠭᠰᠡᠨ ᠪᠠ 19 ᠺᠠᠨᠠᠨ ᠨᠤᠲᠤᠭ ᠤᠨ ᠳᠣᠯᠣᠭᠠᠨ ᠦᠨᠳᠦᠰᠦᠲᠡᠨ ᠢ ᠰᠥᠨᠥᠭᠡᠵᠦ᠂ ᠨᠤᠲᠤᠭ ᠢ ᠨᠢ ᠢᠰᠷᠧᠯᠴᠦᠳ ᠲᠦ ᠥᠮᠴᠢ ᠪᠣᠯᠭᠠᠨ ᠥᠭᠭᠥᠭᠰᠡᠨ ᠪᠢᠯᠡ᠃ 20 ᠡᠭᠦᠨ ᠦ ᠳᠠᠷᠠᠭ᠎ᠠ ᠪᠠᠷ ᠪᠠᠷᠤᠭ ᠳᠥᠷᠪᠡᠨ ᠵᠠᠭᠤ ᠲᠠᠪᠢᠨ ᠵᠢᠯ ᠤᠨ ᠲᠤᠷᠰᠢ ᠡᠰᠢ ᠦᠵᠡᠭᠦᠯᠦᠭᠴᠢ ᠰᠠᠮᠦ᠋ᠶᠧᠯ ᠤᠨ ᠦᠶ᠎ᠡ ᠬᠦᠷᠲᠡᠯ᠎ᠡ ᠪᠤᠷᠬᠠᠨ ᠲᠡᠳᠡᠨ ᠳᠦ ᠰᠢᠭᠦᠭᠴᠢᠳ ᠢ ᠥᠭᠪᠡ᠃ 21 ᠳᠠᠷᠠᠭ᠎ᠠ ᠨᠢ ᠲᠡᠳᠡ ᠬᠠᠭᠠᠨ ᠲᠠᠢ ᠪᠣᠯᠬᠤ ᠶᠢ ᠭᠤᠶᠤᠭᠰᠠᠨ ᠳᠤ᠂ ᠪᠤᠷᠬᠠᠨ ᠪᠢᠨᠶᠠᠮᠢᠨ ᠣᠪᠣᠭ ᠤᠨ ᠺᠢᠱ ᠤᠨ ᠬᠦᠦ ᠰᠠᠦ᠋ᠯ ᠢ ᠥᠭᠴᠡᠢ᠃ ᠳᠥᠴᠢᠨ ᠵᠢᠯ ᠤᠨ ᠳᠠᠷᠠᠭ᠎ᠠ᠂ 22 ᠲᠡᠷᠡ ᠲᠡᠭᠦᠨ ᠢ ᠵᠠᠢᠯᠠᠭᠤᠯᠤᠭᠠᠳ ᠳ᠋ᠠᠸᠢᠳ᠋ ᠢ ᠬᠠᠭᠠᠨ ᠪᠣᠯᠭᠠᠨ᠂ ᠲᠡᠭᠦᠨ ᠦ ᠲᠤᠬᠠᠢ᠄ 〈ᠰᠡᠳᠬᠢᠯ ᠳᠤ ᠮᠢᠨᠢ ᠲᠠᠭᠠᠯᠠᠭᠳᠠᠭᠰᠠᠨ ᠨᠢᠭᠡᠨ᠂ ᠢᠱᠠᠢ ᠶᠢᠨ ᠬᠦᠦ ᠳ᠋ᠠᠸᠢᠳ᠋ ᠢ ᠪᠢ ᠣᠯᠣᠯ᠎ᠠ᠃ ᠰᠠᠨᠠᠭᠰᠠᠨ ᠪᠦᠬᠦᠨ ᠢ ᠮᠢᠨᠢ ᠲᠡᠷᠡ ᠪᠡᠯᠡᠶᠡᠭᠦᠯᠦᠨ᠎ᠡ〉 ᠭᠡᠵᠦ ᠭᠡᠷᠡᠴᠢᠯᠡᠵᠡᠢ᠃ 23 ᠪᠤᠷᠬᠠᠨ ᠠᠮᠠᠯᠠᠭᠰᠠᠨ ᠶᠣᠰᠣᠭᠠᠷ ᠢᠶᠠᠨ ᠡᠨᠡ ᠬᠥᠮᠦᠨ ᠦ ᠦᠷ᠎ᠡ ᠤᠳᠤᠮ ᠠᠴᠠ ᠢᠰᠷᠧᠯ ᠳᠤ ᠠᠪᠤᠷᠠᠭᠴᠢ ᠶᠠᠪᠤᠭᠤᠯᠤᠭᠰᠠᠨ ᠨᠢ ᠢᠰᠦ᠋ᠰ ᠪᠠᠢᠵᠠᠢ᠃ 24 ᠲᠡᠷᠡ ᠢᠷᠡᠬᠦ ᠡᠴᠡ ᠡᠮᠦᠨ᠎ᠡ᠂ ᠶᠣᠬᠠᠨ ᠢᠰᠷᠧᠯ ᠤᠨ ᠠᠷᠠᠳ ᠲᠦᠮᠡᠨ ᠳᠦ ᠭᠡᠮᠰᠢᠯ ᠤᠨ ᠤᠬᠢᠶᠠᠯ ᠢ ᠲᠤᠩ᠋ᠬᠠᠭᠯᠠᠪᠠ᠃ 25 ᠶᠣᠬᠠᠨ ᠠᠵᠢᠯ ᠢᠶᠠᠨ ᠳᠠᠭᠤᠰᠬᠠᠵᠤ ᠪᠠᠢᠬᠤ ᠳᠠᠭᠠᠨ᠄ 〈ᠲᠠ ᠨᠠᠷ ᠨᠠᠮᠠᠶᠢ ᠬᠡᠨ ᠭᠡᠵᠦ ᠪᠣᠳᠣᠵᠤ ᠪᠠᠢᠨ᠎ᠠ ᠪᠤᠢ︖ ᠪᠢ ᠾᠷᠢᠰᠲ᠋ᠣᠰ ᠪᠢᠰᠢ᠂ ᠲᠡᠷᠡ ᠮᠢᠨᠦ ᠬᠣᠢᠨ᠎ᠠ ᠠᠴᠠ ᠢᠷᠡᠨ᠎ᠡ᠂ ᠪᠢ ᠲᠡᠭᠦᠨ ᠦ ᠱᠠᠬᠠᠢ ᠶᠢᠨ ᠣᠭᠣᠰᠣᠷ ᠢ ᠲᠠᠢᠯᠬᠤ ᠬᠢᠷᠢ ᠭᠡᠮ ᠴᠤ ᠦᠭᠡᠢ ᠶᠤᠮ〉 ᠭᠡᠵᠦ ᠬᠡᠯᠡᠪᠡ᠃

26 ᠠᠬ᠎ᠠ ᠳᠡᠭᠦᠦ ᠨᠠᠷ ᠡ᠂ ᠠᠪᠷᠠᠬᠠᠮ ᠤᠨ ᠦᠷ᠎ᠡ ᠤᠳᠤᠮ ᠡ᠂ ᠪᠤᠷᠬᠠᠨ ᠠᠴᠠ ᠡᠮᠢᠶᠡᠳᠡᠭ ᠬᠥᠮᠦᠰ ᠡ᠂ ᠪᠤᠷᠬᠠᠨ ᠡᠨᠡ ᠬᠦ ᠠᠪᠤᠷᠠᠯ ᠤᠨ ᠦᠭᠡ ᠶᠢ ᠪᠢᠳᠡᠨ ᠳᠦ ᠢᠯᠡᠭᠡᠭᠰᠡᠨ ᠶᠤᠮ᠃ 27 ᠶᠧᠷᠦ᠋ᠰᠠᠯᠧᠮ ᠳᠤ ᠰᠠᠭᠤᠭᠴᠢᠳ ᠪᠠ ᠲᠡᠳᠡᠨ ᠦ ᠨᠣᠶᠠᠳ ᠢᠰᠦ᠋ᠰ ᠢ ᠣᠢᠯᠠᠭᠠᠭᠰᠠᠨ ᠦᠭᠡᠢ᠂ ᠠᠮᠠᠷᠠᠯ ᠤᠨ ᠡᠳᠦᠷ ᠪᠣᠯᠭᠠᠨ ᠤᠩ᠋ᠰᠢᠳᠠᠭ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠤᠨ ᠦᠭᠡᠰ ᠢ ᠴᠤ ᠣᠢᠯᠠᠭᠠᠭᠰᠠᠨ ᠦᠭᠡᠢ᠂ ᠬᠠᠷᠢᠨ ᠲᠡᠭᠦᠨ ᠢ ᠶᠠᠯᠠᠯᠠᠭᠰᠠᠨ ᠢᠶᠠᠷ ᠢᠶᠠᠨ ᠲᠡᠷᠡ ᠦᠭᠡᠰ ᠢ ᠪᠡᠶᠡᠯᠡᠭᠦᠯᠦᠭᠰᠡᠨ᠃ 28 ᠲᠡᠳᠡ ᠢᠰᠦ᠋ᠰ ᠢ ᠦᠬᠦᠭᠦᠯᠬᠦ ᠶᠣᠰᠣᠲᠠᠢ ᠭᠡᠰᠡᠨ ᠰᠢᠯᠲᠠᠭ ᠢ ᠶᠡᠷᠦ ᠣᠯᠣᠭ᠎ᠠ ᠦᠭᠡᠢ ᠠᠲᠠᠯ᠎ᠠ ᠪᠠᠨ ᠲᠡᠭᠦᠨ ᠢ ᠴᠠᠭᠠᠵᠠᠯᠠᠭᠤᠯᠬᠤ ᠪᠠᠷ ᠫᠢᠯᠠᠲ ᠢ ᠱᠠᠯᠠᠵᠠᠢ᠃ 29 ᠲᠡᠭᠦᠨ ᠦ ᠲᠤᠬᠠᠢ ᠨᠣᠮ ᠳᠤ ᠪᠢᠴᠢᠭᠳᠡᠭᠰᠡᠨ ᠪᠦᠬᠦᠨ ᠢ ᠭᠦᠢᠴᠡᠭᠡᠭᠰᠡᠨ ᠦ ᠳᠠᠷᠠᠭ᠎ᠠ᠂ ᠲᠡᠭᠦᠨ ᠢ ᠮᠣᠳᠣᠨ ᠠᠴᠠ ᠪᠠᠭᠤᠯᠭᠠᠵᠤ ᠪᠤᠯᠠᠰᠢᠯᠠᠭᠰᠠᠨ᠂ 30 ᠬᠠᠷᠢᠨ ᠪᠤᠷᠬᠠᠨ ᠲᠡᠭᠦᠨ ᠢ ᠦᠬᠦᠭᠰᠡᠳ ᠦᠨ ᠳᠤᠮᠳᠠ ᠠᠴᠠ ᠠᠮᠢᠯᠠᠭᠤᠯᠵᠠᠢ᠃ 31 ᠲᠡᠷᠡ ᠪᠡᠷ ᠭᠠᠯᠢᠯᠠᠶ᠎ᠠ ᠠᠴᠠ ᠶᠧᠷᠦ᠋ᠰᠠᠯᠧᠮ ᠳᠤ ᠬᠠᠮᠲᠤ ᠣᠴᠢᠭᠰᠠᠨ ᠬᠥᠮᠦᠰ ᠲᠡᠭᠡᠨ ᠣᠯᠠᠨ ᠬᠣᠨᠣᠭ ᠤᠨ ᠲᠤᠷᠰᠢ ᠦᠵᠡᠭᠳᠡᠭᠰᠡᠨ ᠪᠠ ᠲᠡᠳᠡᠭᠡᠷ ᠬᠥᠮᠦᠰ ᠨᠢ ᠣᠳᠣ ᠠᠷᠠᠳ ᠲᠦᠮᠡᠨ ᠳᠡᠭᠡᠨ ᠲᠡᠭᠦᠨ ᠢ ᠭᠡᠷᠡᠴᠢᠯᠡᠵᠦ ᠪᠠᠢᠨ᠎ᠠ᠃ 32 ᠪᠢᠳᠡ ᠴᠤ ᠲᠠ ᠨᠠᠷ ᠲᠤ ᠪᠠᠶᠠᠷ ᠤᠨ ᠮᠡᠳᠡᠭᠡ ᠶᠢ ᠮᠡᠳᠡᠭᠦᠯᠦᠶ᠎ᠡ᠃ ᠮᠠᠨ ᠤ ᠳᠡᠭᠡᠳᠦᠰ ᠲᠦ ᠥᠭᠭᠥᠭᠰᠡᠨ ᠨᠥᠭᠥᠭᠡ ᠠᠮᠠᠯᠠᠯᠲᠠ ᠪᠠᠨ 33 ᠪᠤᠷᠬᠠᠨ ᠢᠰᠦ᠋ᠰ ᠢ ᠠᠮᠢᠯᠠᠭᠤᠯᠤᠭᠰᠠᠨ ᠢᠶᠠᠷ ᠢᠶᠠᠨ ᠲᠡᠳᠡᠨ ᠦ ᠦᠷ᠎ᠡ ᠤᠳᠤᠮ ᠪᠣᠯᠣᠭᠰᠠᠨ ᠪᠢᠳᠡᠨ ᠳᠦ ᠪᠡᠶᠡᠯᠡᠭᠦᠯᠦᠭᠰᠡᠨ ᠶᠤᠮ᠃ ᠡᠨᠡ ᠨᠢ ᠳᠠᠭᠤᠯᠠᠯ ᠤᠨ ᠬᠣᠶᠠᠳᠤᠭᠠᠷ ᠪᠠᠳᠠᠭ ᠲᠤ᠄ 〈ᠴᠢ ᠮᠢᠨᠦ ᠬᠦᠦ᠂ ᠥᠨᠥᠳᠥᠷ ᠪᠢ ᠴᠢᠮ᠎ᠠ ᠶᠢ ᠲᠥᠷᠥᠭᠦᠯᠦᠯ᠎ᠡ〉 ᠭᠡᠵᠦ ᠪᠢᠴᠢᠭᠳᠡᠭᠰᠡᠨ ᠲᠡᠢ ᠠᠳᠠᠯᠢ ᠪᠢᠯᠡ᠃ 34 ᠪᠤᠷᠬᠠᠨ ᠲᠡᠭᠦᠨ ᠢ ᠢᠯᠵᠢᠷᠡᠯ ᠳᠦ ᠪᠤᠴᠠᠭᠠᠯ ᠦᠭᠡᠢ᠂ ᠦᠬᠦᠭᠰᠡᠳ ᠦᠨ ᠳᠤᠮᠳᠠ ᠠᠴᠠ ᠠᠮᠢᠯᠠᠭᠤᠯᠤᠭᠰᠠᠨ ᠲᠤᠬᠠᠢ ᠪᠠᠨ᠄ 〈ᠪᠢ ᠳ᠋ᠠᠸᠢᠳ᠋ ᠲᠤ ᠠᠮᠠᠯᠠᠭᠰᠠᠨ ᠠᠷᠢᠭᠤᠨ ᠪᠠ ᠪᠠᠲᠤ ᠢᠷᠥᠭᠡᠯ ᠢ ᠲᠠ ᠨᠠᠷ ᠲᠤ ᠥᠭᠭᠥᠨ᠎ᠡ〉 ᠭᠡᠵᠦ ᠠᠢᠯᠠᠳᠤᠭᠰᠠᠨ ᠪᠥᠭᠡᠳ 35 ᠳᠠᠭᠤᠯᠠᠯ ᠤᠨ ᠥᠭᠡᠷ᠎ᠡ ᠪᠠᠳᠠᠭ ᠲᠤ᠄ 〈ᠲᠠ ᠠᠷᠢᠭᠤᠨ ᠨᠢᠭᠡᠨ ᠳᠡᠭᠡᠨ ᠢᠯᠵᠢᠷᠡᠯ ᠢ ᠦᠵᠡᠭᠦᠯᠬᠦ ᠦᠭᠡᠢ〉 ᠭᠡᠰᠡᠨ ᠪᠠᠢᠳᠠᠭ᠃ 36 ᠳ᠋ᠠᠸᠢᠳ᠋ ᠪᠣᠯ ᠠᠮᠢᠳᠤ ᠳᠠᠭᠠᠨ ᠪᠤᠷᠬᠠᠨ ᠤ ᠰᠠᠨᠠᠭ᠎ᠠ ᠪᠠᠷ ᠦᠢᠯᠡᠴᠢᠯᠡᠭᠰᠡᠭᠡᠷ ᠨᠣᠢᠷᠰᠣᠵᠤ᠂ ᠳᠡᠭᠡᠳᠦᠰ ᠦᠨ ᠢᠶᠠᠨ ᠳᠤᠮᠳᠠ ᠪᠤᠯᠠᠰᠢᠯᠠᠭᠳᠠᠵᠤ ᠢᠯᠵᠢᠷᠡᠯ ᠢ ᠦᠵᠡᠭᠰᠡᠨ᠃ 37 ᠬᠠᠷᠢᠨ ᠪᠤᠷᠬᠠᠨ ᠤ ᠠᠮᠢᠯᠠᠭᠤᠯᠤᠭᠰᠠᠨ ᠨᠢ ᠢᠯᠵᠢᠷᠡᠯ ᠢ ᠦᠵᠡᠭᠰᠡᠨ ᠦᠭᠡᠢ ᠪᠢᠯᠡ᠃ 38 ᠲᠡᠢᠮᠦ ᠡᠴᠡ ᠠᠬ᠎ᠠ ᠳᠡᠭᠦᠦ ᠨᠠᠷ ᠡ᠂ ᠮᠡᠳᠡᠭᠲᠦᠨ᠂ ᠢᠰᠦ᠋ᠰ ᠢᠶᠠᠷ ᠳᠠᠮᠵᠢᠨ ᠲᠠ ᠨᠠᠷ ᠤᠨ ᠨᠢᠭᠦᠯ ᠠᠭᠤᠴᠢᠯᠠᠭᠳᠠᠨ᠎ᠠ ᠭᠡᠵᠦ ᠪᠢᠳᠡ ᠲᠤᠩ᠋ᠬᠠᠭᠯᠠᠵᠤ ᠪᠠᠢᠨ᠎ᠠ᠃ 39 ᠲᠠ ᠨᠠᠷ ᠮᠣᠰᠧ ᠶᠢᠨ ᠬᠠᠤᠯᠢ ᠪᠠᠷ ᠶᠠᠭᠤᠨ ᠠᠴᠠ ᠴᠤ ᠵᠥᠪᠲᠥᠭᠡᠭᠳᠡᠵᠦ ᠴᠢᠳᠠᠭᠰᠠᠨ ᠦᠭᠡᠢ᠂ ᠬᠠᠷᠢᠨ ᠢᠲᠡᠭᠡᠭᠴᠢ ᠪᠣᠯᠭᠠᠨ ᠢᠰᠦ᠋ᠰ ᠢᠶᠠᠷ ᠲᠡᠷᠡ ᠪᠦᠬᠦᠨ ᠡᠴᠡ ᠵᠥᠪᠲᠥᠭᠡᠭᠳᠡᠨ᠎ᠡ᠃ 40 ᠲᠡᠢᠮᠦ ᠡᠴᠡ ᠪᠣᠯᠭᠣᠮᠵᠢᠯᠠᠭᠲᠤᠨ᠂ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠤᠨ ᠬᠡᠯᠡᠭᠰᠡᠨ ᠦᠭᠡ ᠲᠠ ᠨᠠᠷ ᠤᠨ ᠳᠡᠭᠡᠷ᠎ᠡ ᠪᠢᠲᠡᠭᠡᠢ ᠪᠡᠶᠡᠯᠡᠭᠡᠰᠡᠢ᠃
41 〈ᠬᠠᠷᠠ᠂ ᠪᠠᠰᠤᠮᠵᠢᠯᠠᠭᠴᠢᠳ ᠡ︕ ᠭᠠᠢᠬᠠᠵᠠᠭ᠎ᠠ᠂ ᠮᠥᠬᠥᠵᠡᠭᠡ ᠲᠠ ᠨᠠᠷ ᠤᠨ ᠡᠳᠦᠷ ᠤᠳ ᠲᠤ ᠪᠢ ᠨᠢᠭᠡ ᠦᠢᠯᠡ ᠶᠢ ᠬᠢᠨ᠎ᠡ ᠲᠡᠭᠦᠨ ᠢ ᠬᠡᠨ ᠨᠢᠭᠡᠨ ᠨᠢ ᠥᠭᠦᠯᠡᠭᠰᠡᠨ ᠴᠤ ᠲᠠ ᠨᠠᠷ ᠶᠡᠷᠦ ᠢᠲᠡᠭᠡᠬᠦ ᠦᠭᠡᠢ〉》 ᠭᠡᠵᠡᠢ᠃

42 ᠫᠠᠦ᠋ᠯ᠂ ᠪᠠᠷᠨᠠᠪᠠ ᠬᠣᠶᠠᠭᠤᠯᠠ ᠲᠠᠩᠬᠢᠮ ᠠᠴᠠ ᠭᠠᠷᠬᠤ ᠦᠶ᠎ᠡ ᠳᠦ᠂ ᠬᠥᠮᠦᠰ ᠳᠠᠷᠠᠭ᠎ᠠ ᠠᠮᠠᠷᠠᠯ ᠤᠨ ᠡᠳᠦᠷ ᠲᠦ ᠴᠤ ᠡᠨᠡ ᠲᠤᠬᠠᠢ ᠪᠠᠨ ᠶᠠᠷᠢᠵᠤ ᠥᠭᠭᠥᠭᠡᠷᠡᠢ ᠭᠡᠵᠦ ᠭᠤᠶᠤᠪᠠ᠃ 43 ᠬᠤᠷᠠᠯ ᠲᠠᠷᠬᠠᠭᠰᠠᠨ ᠤ ᠳᠠᠷᠠᠭ᠎ᠠ᠂ ᠶᠦᠳᠠᠢᠴᠤᠳ ᠪᠠ ᠶᠦᠳᠠᠢ ᠱᠠᠰᠢᠨ ᠳᠤ ᠣᠷᠣᠭᠰᠠᠨ ᠰᠦᠰᠦᠭᠲᠡᠨ ᠡᠴᠡ ᠣᠯᠠᠨ ᠬᠥᠮᠦᠨ ᠫᠠᠦ᠋ᠯ ᠪᠣᠯᠣᠨ ᠪᠠᠷᠨᠠᠪᠠ ᠶᠢ ᠳᠠᠭᠠᠵᠤ ᠶᠠᠪᠤᠵᠠᠢ᠃ ᠲᠡᠷᠡ ᠬᠣᠶᠠᠭᠤᠯᠠ ᠬᠥᠮᠦᠰ ᠲᠡᠢ ᠶᠠᠷᠢᠯᠴᠠᠵᠤ ᠦᠷᠭᠦᠯᠵᠢ ᠪᠤᠷᠬᠠᠨ ᠤ ᠢᠪᠡᠭᠡᠯ ᠳᠦ ᠪᠠᠢᠭᠲᠤᠨ ᠭᠡᠵᠦ ᠢᠳᠬᠠᠪᠠ᠃

44 ᠳᠠᠷᠠᠭ᠎ᠠ ᠠᠮᠠᠷᠠᠯ ᠤᠨ ᠡᠳᠦᠷ ᠪᠣᠯᠬᠤ ᠳᠤ᠂ ᠪᠠᠷᠤᠭ ᠪᠦᠬᠦ ᠬᠣᠲᠠ ᠶᠢᠨ ᠬᠢᠨ ᠪᠤᠷᠬᠠᠨ ᠤ ᠦᠭᠡ ᠶᠢ ᠰᠣᠨᠣᠰᠬᠤ ᠪᠠᠷ ᠬᠤᠷᠠᠨ ᠴᠤᠭᠯᠠᠷᠠᠭᠰᠠᠨ ᠪᠠᠢᠨ᠎ᠠ᠃ 45 ᠶᠦᠳᠠᠢᠴᠤᠳ ᠬᠤᠷᠠᠭᠰᠠᠨ ᠣᠯᠠᠨ ᠢ ᠦᠵᠡᠭᠡᠳ ᠠᠲᠠᠭᠠᠷᠬᠠᠯ ᠢᠶᠠᠷ ᠳᠦᠭᠦᠷᠴᠦ᠂ ᠬᠠᠷᠢᠶᠠᠯ ᠲᠠᠯᠪᠢᠭᠰᠠᠭᠠᠷ ᠫᠠᠦ᠋ᠯ ᠤᠨ ᠬᠡᠯᠡᠭᠰᠡᠨ ᠢ ᠡᠰᠡᠷᠭᠦᠴᠡᠪᠡ᠃ 46 ᠫᠠᠦ᠋ᠯ ᠪᠠ ᠪᠠᠷᠨᠠᠪᠠ ᠵᠣᠷᠢᠭᠲᠠᠢ ᠪᠠᠷ᠄ 《ᠪᠢᠳᠡ ᠪᠤᠷᠬᠠᠨ ᠤ ᠦᠭᠡ ᠶᠢ ᠬᠠᠮᠤᠭ ᠤᠨ ᠲᠡᠷᠢᠭᠦᠨ ᠳᠦ ᠶᠦᠳᠠᠢᠴᠤᠳ ᠲᠠ ᠨᠠᠷ ᠲᠤ ᠬᠡᠯᠡᠬᠦ ᠶᠣᠰᠣᠲᠠᠢ ᠪᠠᠢᠭᠰᠠᠨ᠃ ᠭᠡᠪᠡᠴᠦ ᠲᠠ ᠨᠠᠷ ᠲᠡᠷᠡ ᠦᠭᠡ ᠶᠢ ᠦᠯᠦ ᠬᠦᠯᠢᠶᠡᠵᠦ᠂ ᠥᠪᠡᠷ ᠢ ᠪᠠᠨ ᠮᠥᠩᠬᠡ ᠠᠮᠢ ᠶᠢ ᠣᠯᠬᠤ ᠬᠢᠷᠢ ᠭᠡᠮ ᠦᠭᠡᠢ ᠭᠡᠵᠦ ᠦᠵᠡᠳᠡᠭ ᠪᠣᠯᠬᠣᠷ ᠪᠢᠳᠡ ᠬᠠᠷᠢᠴᠤᠳ ᠤᠷᠤᠭᠤ ᠶᠠᠪᠤᠬᠤ ᠯᠠ ᠬᠡᠷᠡᠭ᠃ 47 ᠤᠴᠢᠷ ᠨᠢ᠂ ᠡᠵᠡᠨ ᠪᠢᠳᠡᠨ ᠳᠦ ᠵᠠᠬᠢᠵᠤ᠄ 〈ᠪᠢ ᠴᠢᠮᠠᠶᠢ ᠬᠠᠷᠢᠴᠤᠳ ᠤᠨ ᠭᠡᠷᠡᠯ ᠪᠣᠯᠭᠠᠶ᠎ᠠ᠂ ᠴᠢ ᠳᠡᠯᠡᠬᠡᠢ ᠶᠢᠨ ᠬᠢᠵᠠᠭᠠᠷ ᠬᠦᠷᠲᠡᠯ᠎ᠡ ᠠᠪᠤᠷᠠᠯ ᠢ ᠬᠦᠷᠭᠡᠬᠦ ᠪᠣᠯᠣᠨ᠎ᠠ〉 ᠭᠡᠪᠡ》 ᠬᠡᠮᠡᠨ ᠶᠠᠷᠢᠪᠠ᠃

48 ᠬᠠᠷᠢᠴᠤᠳ ᠰᠣᠨᠣᠰᠣᠭᠠᠳ ᠪᠠᠶᠠᠷᠯᠠᠨ᠂ ᠡᠵᠡᠨ ᠦ ᠦᠭᠡ ᠶᠢ ᠮᠠᠭᠲᠠᠵᠤ ᠪᠠᠢᠯ᠎ᠠ᠃ ᠡᠢᠨ ᠬᠦ ᠮᠥᠩᠬᠡ ᠠᠮᠢ ᠳᠤ ᠬᠦᠷᠬᠦ ᠲᠠᠪᠢᠯᠠᠩ ᠲᠠᠢ ᠬᠥᠮᠦᠨ ᠪᠣᠯᠭᠠᠨ ᠢᠲᠡᠭᠡᠪᠡ᠃ 49 ᠡᠵᠡᠨ ᠦ ᠦᠭᠡ ᠲᠡᠷᠡ ᠨᠤᠲᠤᠭ ᠳᠠᠶᠠᠭᠠᠷ ᠳᠡᠯᠭᠡᠷᠡᠵᠡᠢ᠃ 50 ᠲᠡᠭᠡᠲᠡᠯ᠎ᠡ ᠶᠦᠳᠠᠢᠴᠤᠳ ᠲᠡᠷᠡ ᠬᠣᠲᠠ ᠶᠢᠨ ᠰᠦᠰᠦᠭ ᠲᠡᠢ ᠬᠠᠲᠤᠳ ᠪᠣᠯᠣᠨ ᠡᠷᠬᠡ ᠰᠦᠷ ᠲᠡᠢ ᠬᠥᠮᠦᠰ ᠢ ᠥᠲᠥᠭᠡᠭᠡᠳ ᠪᠠᠷᠨᠠᠪᠠ᠂ ᠫᠠᠦ᠋ᠯ ᠬᠣᠶᠠᠷ ᠤᠨ ᠡᠰᠡᠷᠭᠦ ᠬᠠᠪᠴᠢᠯᠭ᠎ᠠ ᠶᠠᠪᠤᠭᠤᠯᠤᠨ ᠨᠤᠲᠤᠭ ᠠᠴᠠ ᠪᠠᠨ ᠬᠥᠭᠡᠭᠡᠨ ᠭᠠᠷᠭᠠᠪᠠ᠃ 51 ᠲᠡᠷᠡ ᠬᠣᠶᠠᠭᠤᠯᠠ ᠪᠠᠨ ᠲᠡᠳᠡᠨ ᠦ ᠥᠭᠡᠳᠡ ᠡᠴᠡ ᠬᠥᠯ ᠦᠨ ᠢᠶᠠᠨ ᠲᠣᠭᠣᠰᠣ ᠶᠢ ᠭᠦᠪᠢᠭᠡᠳ 9 ᠢᠺᠣᠨᠢᠶᠣᠨ ᠬᠣᠲᠠ ᠤᠷᠤᠭᠤ ᠣᠳᠪᠠ᠃ 52 ᠱᠠᠪᠢ ᠨᠠᠷ ᠪᠠᠶᠠᠷ ᠪᠠᠶᠠᠰᠬᠤᠯᠠᠩ ᠬᠢᠭᠡᠳ ᠠᠷᠢᠭᠤᠨ ᠰᠦᠨᠡᠰᠦ ᠪᠡᠷ ᠳᠦᠭᠦᠷᠡᠩ ᠪᠠᠢᠯ᠎ᠠ᠃