ᠮᠠᠲ᠋ᠠᠢ ᠬᠣᠶᠠᠷ
ᠳᠣᠷᠣᠨᠠᠲᠤ ᠶᠢᠨ ᠮᠡᠷᠭᠡᠳ ᠢᠷᠡᠭᠰᠡᠨ ᠨᠢ
1 ᠾᠧᠷᠣᠳ᠋ ᠬᠠᠨ ᠤ ᠦᠶᠡ ᠳᠦ ᠢᠰᠦ᠋ᠰ ᠶᠦᠳᠠᠢ ᠶᠢᠨ ᠪᠧᠲ᠋ᠯᠧᠾᠧᠮ ᠳᠤ ᠮᠡᠨᠳᠦᠯᠡᠭᠰᠡᠨᠡ᠂ ᠮᠡᠷᠭᠡᠳ ᠳᠣᠷᠣᠨᠠ ᠵᠦᠭ ᠡᠴᠡ ᠶᠧᠷᠦ᠋ᠰᠠᠯᠧᠮ ᠳᠤ ᠢᠷᠡᠭᠡᠳ᠄ 2 《ᠶᠦᠳᠠᠢᠴᠤᠳ ᠤᠨ ᠬᠠᠭᠠᠨ ᠪᠣᠯᠬᠤ ᠪᠠᠷ ᠮᠡᠨᠳᠦᠯᠡᠭᠰᠡᠨ ᠲᠡᠷᠡ ᠬᠠᠮᠢᠭᠠ ᠪᠠᠢᠨᠠ︖ ᠪᠢᠳᠡ ᠳᠣᠷᠣᠨᠠᠲᠤ ᠳᠤ ᠪᠠᠢᠬᠤ ᠳᠠᠭᠠᠨ 4 ᠣᠳᠣ ᠶᠢ ᠨᠢ ᠦᠵᠡᠭᠡᠳ ᠲᠡᠭᠦᠨ ᠳᠦ ᠮᠥᠷᠭᠥᠬᠦ ᠪᠡᠷ ᠢᠷᠡᠯᠡ》 ᠭᠡᠪᠡ᠃ 3 ᠡᠭᠦᠨ ᠢ ᠰᠣᠨᠣᠰᠣᠭᠠᠳ ᠾᠧᠷᠣᠳ᠋ ᠬᠠᠨ ᠪᠠᠯᠠᠭᠳᠠᠵᠤ᠂ ᠪᠦᠬᠦ ᠶᠧᠷᠦ᠋ᠰᠠᠯᠧᠮ ᠬᠣᠲᠠ ᠶᠢᠨ ᠬᠢᠨ ᠴᠤ ᠪᠤᠵᠢᠭᠢᠨᠠᠯᠳᠤᠪᠠ᠃ 4 ᠾᠧᠷᠣᠳ᠋ ᠬᠠᠨ ᠠᠷᠠᠳ ᠤᠨ ᠠᠬᠠᠯᠠᠬᠤ ᠲᠠᠬᠢᠯᠴᠢᠳ ᠪᠠ ᠪᠢᠴᠢᠭᠲᠡᠳ ᠢ ᠪᠦᠬᠦᠨ ᠢ ᠴᠤᠭᠯᠠᠭᠤᠯᠵᠤ᠂ ᠾᠷᠢᠰᠲ᠋ᠣᠰ ᠤᠨ ᠬᠠᠮᠢᠭᠠ ᠲᠥᠷᠥᠬᠦ ᠶᠢ ᠯᠠᠪᠯᠠᠭᠰᠠᠨ ᠳᠤ᠂ 5 ᠲᠡᠳᠡ᠄ 《ᠶᠦᠳᠠᠢ ᠶᠢᠨ ᠪᠧᠲ᠋ᠯᠧᠾᠧᠮ ᠳᠤ ᠰᠢᠦ ᠳᠠ᠂ ᠤᠴᠢᠷ ᠨᠢ ᠡᠰᠢ ᠦᠵᠡᠭᠦᠯᠦᠭᠴᠢ᠄
6 〈ᠬᠠᠷᠢᠨ ᠶᠦᠳᠠ ᠨᠤᠲᠤᠭ ᠤᠨ ᠪᠧᠲ᠋ᠯᠧᠾᠧᠮ ᠡ ᠴᠢ ᠶᠦᠳᠠ ᠶᠢᠨ ᠵᠠᠬᠢᠷᠤᠭᠴᠢᠳ ᠠᠴᠠ ᠬᠠᠮᠤᠭ ᠤᠨ ᠥᠴᠦᠬᠡᠨ ᠨᠢ ᠬᠡᠷᠬᠢᠪᠡᠴᠦ ᠪᠢᠰᠢ ᠶᠠᠭᠤ ᠭᠡᠪᠡᠯ᠂ ᠴᠢᠮᠠ ᠠᠴᠠ ᠨᠢᠭᠡ ᠵᠠᠬᠢᠷᠤᠭᠴᠢ ᠡᠭᠦᠰᠦᠭᠡᠳ ᠮᠢᠨᠦ ᠠᠷᠠᠳ ᠲᠦᠮᠡᠨ ᠢᠰᠷᠧᠯ ᠢ ᠬᠠᠷᠢᠭᠤᠯᠬᠤ ᠪᠣᠯᠣᠨᠠ〉 ᠭᠡᠵᠦ ᠪᠢᠴᠢᠭᠰᠡᠨ ᠪᠠᠢᠳᠠᠭ》 ᠭᠡᠪᠡ᠃
7 ᠾᠧᠷᠣᠳ᠋ ᠮᠡᠷᠭᠡᠳ ᠢ ᠨᠢᠭᠤᠴᠠ ᠪᠠᠷ ᠳᠠᠭᠤᠳᠠᠵᠤ᠂ ᠣᠳᠣ ᠦᠵᠡᠭᠳᠡᠭᠰᠡᠨ ᠬᠤᠭᠤᠴᠠᠭᠠ ᠶᠢ ᠲᠡᠳᠡᠨ ᠡᠴᠡ ᠨᠠᠷᠢᠪᠴᠢᠯᠠᠨ᠂ 8 ᠪᠧᠲ᠋ᠯᠧᠾᠧᠮ ᠤᠷᠤᠭᠤ ᠢᠯᠡᠭᠡᠬᠦ ᠳᠡᠭᠡᠨ᠄ 《ᠶᠠᠪᠤ᠂ ᠲᠡᠷᠡ ᠬᠡᠦᠬᠡᠳ ᠢ ᠨᠠᠷᠢᠪᠴᠢᠯᠠᠨ ᠡᠷᠢᠵᠦ᠂ ᠲᠡᠭᠦᠨ ᠢ ᠣᠯᠪᠠᠯ ᠨᠠᠳᠠ ᠳᠤ ᠲᠤᠭᠤᠯᠭᠠ᠂ ᠪᠢ ᠪᠠᠰᠠ ᠣᠴᠢᠵᠤ ᠲᠡᠭᠦᠨ ᠳᠦ ᠮᠥᠷᠭᠥᠶᠡ》 ᠭᠡᠯᠡ᠃ 9 ᠲᠡᠳᠡ ᠬᠠᠨ ᠤ ᠦᠭᠡ ᠶᠢ ᠰᠣᠨᠣᠰᠣᠭᠠᠳ ᠶᠠᠪᠤᠯᠠ᠃ ᠠᠩ᠋ᠬᠠᠷᠤᠭᠲᠤᠨ︕ ᠳᠣᠷᠣᠨᠠᠲᠤ ᠳᠤ ᠬᠠᠷᠠᠭᠰᠠᠨ ᠥᠨᠥᠬᠢ ᠣᠳᠣ ᠲᠡᠳᠡᠨ ᠢ ᠤᠳᠤᠷᠢᠳᠤᠭᠰᠠᠭᠠᠷ ᠬᠡᠦᠬᠡᠳ ᠦᠨ ᠪᠠᠢᠭᠠ ᠭᠠᠵᠠᠷ ᠲᠤ ᠬᠦᠷᠦᠭᠡᠳ ᠳᠡᠭᠡᠷᠡ ᠨᠢ ᠲᠣᠭᠲᠠᠪᠠ᠃ 10 ᠲᠡᠳᠡ ᠣᠳᠣ ᠶᠢ ᠬᠠᠷᠠᠭᠠᠳ ᠦᠯᠡᠮᠵᠢ ᠶᠡᠬᠡ ᠪᠡᠷ ᠬᠥᠭᠰᠡᠨ ᠪᠠᠶᠠᠷᠯᠠᠵᠠᠢ᠃ 11 ᠲᠡᠳᠡ ᠭᠡᠷ ᠲᠦ ᠣᠷᠣᠵᠤ᠂ ᠡᠬᠡ ᠮᠠᠷᠢᠶᠠ ᠲᠠᠢ ᠪᠠᠨ ᠪᠠᠢᠭᠠ ᠬᠡᠦᠬᠡᠳ ᠢ ᠬᠠᠷᠠᠭᠠᠳ ᠲᠡᠭᠦᠨ ᠳᠦ ᠰᠥᠭᠥᠳᠥᠨ ᠮᠥᠷᠭᠥᠭᠰᠡᠨ ᠪᠥᠭᠡᠳ ᠡᠷᠳᠡᠨᠢᠰ ᠤᠨ ᠬᠠᠢᠷᠴᠠᠭ ᠢᠶᠠᠨ ᠨᠡᠭᠡᠭᠡᠨ ᠠᠯᠲᠠ᠂ ᠭᠦᠭᠦᠯ᠂ ᠮᠢᠷᠷᠠ ᠪᠡᠯᠡᠭᠯᠡᠨ ᠪᠠᠷᠢᠵᠠᠢ᠃ 12 ᠲᠡᠳᠡ ᠵᠡᠭᠦᠳᠦᠨ ᠳᠡᠭᠡᠨ 《ᠾᠧᠷᠣᠳ᠋ ᠤᠷᠤᠭᠤ ᠪᠢᠲᠡᠭᠡᠢ ᠪᠤᠴᠠ》 ᠭᠡᠬᠦ ᠵᠢᠭᠠᠪᠤᠷᠢ ᠠᠪᠤᠭᠠᠳ ᠣᠨᠳᠣᠣ ᠵᠠᠮ ᠢᠶᠠᠷ ᠨᠤᠲᠤᠭ ᠲᠠᠭᠠᠨ ᠬᠠᠷᠢᠪᠠ᠃
ᠶᠧᠵᠢᠫᠲ ᠤᠷᠤᠭᠤ ᠵᠠᠢᠯᠠᠭᠰᠠᠨ ᠨᠢ
13 ᠠᠩ᠋ᠬᠠᠷᠤᠭᠲᠤᠨ︕ ᠲᠡᠳᠡ ᠬᠠᠷᠢᠭᠰᠠᠨ ᠤ ᠳᠠᠷᠠᠭᠠ᠂ ᠡᠵᠡᠨ ᠦ ᠡᠯᠴᠢ ᠶᠣᠰᠧᠹ ᠤᠨ ᠵᠡᠭᠦᠳᠦᠨ ᠳᠦ ᠦᠵᠡᠭᠳᠡᠵᠦ ᠲᠡᠭᠦᠨ ᠳᠦ᠄ 《ᠪᠣᠰ᠂ ᠬᠡᠦᠬᠡᠳ ᠢ ᠡᠬᠡ ᠲᠠᠢ ᠨᠢ ᠠᠪᠴᠤ ᠶᠧᠵᠢᠫᠲ ᠤᠷᠤᠭᠤ ᠳᠤᠲᠠᠭᠠᠨ᠂ ᠴᠢᠮᠠ ᠳᠤ ᠬᠡᠯᠡ ᠥᠭᠲᠡᠯᠡ ᠮᠢᠨᠢ ᠲᠡᠨᠳᠡ ᠪᠠᠢ᠂ ᠾᠧᠷᠣᠳ᠋ ᠬᠡᠦᠬᠡᠳ ᠢ ᠡᠷᠢᠵᠦ ᠬᠥᠨᠥᠭᠡᠬᠦ ᠭᠡᠵᠦ ᠪᠠᠢᠨᠠ》 ᠭᠡᠰᠡᠨ ᠳᠦ᠂ 14 ᠶᠣᠰᠧᠹ ᠪᠣᠰᠴᠤ ᠰᠥᠨᠢ ᠳᠡᠭᠡᠨ ᠬᠡᠦᠬᠡᠳ ᠢ ᠡᠬᠡ ᠲᠠᠢ ᠨᠢ ᠠᠪᠴᠤ ᠶᠧᠵᠢᠫᠲ ᠤᠷᠤᠭᠤ ᠨᠡᠭᠦᠨ᠂ 15 ᠾᠧᠷᠣᠳ᠋ ᠦᠬᠦᠲᠡᠯᠡ ᠲᠡᠨᠳᠡ ᠪᠡᠨ ᠪᠠᠢᠪᠠ᠃ ᠡᠵᠡᠨ ᠦ ᠡᠰᠢ ᠦᠵᠡᠭᠦᠯᠦᠭᠴᠢ ᠪᠠᠷ ᠳᠠᠮᠵᠢᠭᠤᠯᠤᠨ 《ᠶᠧᠵᠢᠫᠲ ᠡᠴᠡ ᠪᠢ ᠬᠦᠦ ᠪᠡᠨ ᠳᠠᠭᠤᠳᠠᠨ ᠭᠠᠷᠭᠠᠭᠰᠠᠨ》 ᠭᠡᠰᠡᠨ ᠨᠢ ᠡᠢᠨ ᠬᠦ ᠪᠡᠶᠡᠯᠡᠭᠳᠡᠵᠡᠢ᠃
ᠾᠧᠷᠣᠳ᠋ ᠬᠥᠪᠡᠭᠦᠳ ᠢ ᠬᠥᠨᠥᠭᠡᠭᠰᠡᠨ ᠨᠢ
16 ᠾᠧᠷᠣᠳ᠋ ᠮᠡᠷᠭᠡᠳ ᠲᠦ ᠴᠢᠳᠠᠭᠳᠠᠭᠰᠠᠨ ᠢᠶᠠᠨ ᠮᠡᠳᠡᠭᠡᠳ ᠶᠡᠬᠡᠳᠡ ᠬᠢᠯᠢᠩᠨᠡᠪᠡ᠃ ᠲᠡᠷᠡ ᠪᠡᠷ ᠮᠡᠷᠭᠡᠳ ᠡᠴᠡ ᠨᠠᠷᠢᠪᠴᠢᠯᠠᠭᠰᠠᠨ ᠴᠠᠭ ᠢᠶᠠᠷ ᠮᠥᠷᠳᠡᠵᠦ᠂ ᠪᠧᠲ᠋ᠯᠧᠾᠧᠮ ᠪᠣᠯᠣᠨ ᠲᠡᠭᠦᠨ ᠦ ᠬᠠᠪᠢ ᠶᠢᠨ ᠬᠣᠶᠠᠷ ᠨᠠᠰᠤᠨ ᠠᠴᠠ ᠳᠣᠷᠣᠭᠰᠢᠬᠢ ᠬᠥᠪᠡᠭᠦᠳ ᠢ ᠴᠥᠮ ᠢ ᠨᠢ ᠠᠯᠠᠭᠤᠯᠵᠠᠢ᠃ 17 ᠡᠢᠨ ᠬᠦ ᠡᠰᠢ ᠦᠵᠡᠭᠦᠯᠦᠭᠴᠢ ᠶᠧᠷᠧᠮᠢᠶᠠ ᠪᠠᠷ
18 《ᠷᠠᠮᠠ ᠠᠴᠠ ᠤᠬᠢᠯᠠᠨ ᠭᠠᠰᠢᠭᠤᠳᠠᠬᠤ ᠴᠢᠩᠭ᠍ᠠ ᠳᠠᠭᠤ ᠰᠣᠨᠣᠰᠳᠠᠪᠠ ᠷᠠᠾᠢᠯ ᠬᠡᠦᠬᠡᠳ ᠤᠳ ᠢᠶᠠᠨ ᠰᠠᠨᠠᠨ ᠤᠬᠢᠯᠠᠵᠤ ᠪᠠᠢᠨᠠ ᠲᠡᠷᠡ ᠲᠠᠢᠳᠬᠤᠷᠠᠭᠤᠯᠤᠭᠳᠠᠬᠤ ᠶᠢ ᠬᠦᠰᠡᠭᠰᠡᠨ ᠦᠭᠡᠢ ᠲᠡᠳᠡᠨ ᠦ ᠬᠡᠦᠬᠡᠳ ᠤᠳ ᠠᠯᠠᠭᠠ ᠪᠣᠯᠴᠢᠬᠠᠭᠰᠠᠨ ᠠᠵᠢ》
ᠭᠡᠵᠦ ᠬᠡᠯᠭᠦᠯᠦᠭᠰᠡᠨ ᠦᠭᠡ ᠲᠡᠷᠡ ᠴᠠᠭ ᠲᠤ ᠪᠡᠶᠡᠯᠡᠭᠳᠡᠵᠡᠢ᠃
19 ᠾᠧᠷᠣᠳ᠋ ᠦᠬᠦᠪᠡ᠃ ᠡᠵᠡᠨ ᠦ ᠡᠯᠴᠢ ᠶᠧᠵᠢᠫᠲ ᠲᠤ ᠪᠠᠢᠭᠠ ᠶᠣᠰᠧᠹ ᠤᠨ ᠵᠡᠭᠦᠳᠦᠨ ᠳᠦ ᠦᠵᠡᠭᠳᠡᠵᠦ᠄ 20 《ᠪᠣᠰ᠂ ᠬᠡᠦᠬᠡᠳ ᠢ ᠡᠬᠡ ᠲᠠᠢ ᠨᠢ ᠠᠪᠴᠤ ᠢᠰᠷᠧᠯ ᠨᠤᠲᠤᠭ ᠤᠷᠤᠭᠤ ᠶᠠᠪᠤ᠂ ᠬᠡᠦᠬᠡᠳ ᠦᠨ ᠠᠮᠢ ᠶᠢ ᠨᠡᠬᠡᠭᠴᠢᠳ ᠦᠬᠦᠵᠡᠢ》 ᠭᠡᠬᠦ ᠳᠦ᠂ 21 ᠲᠡᠷᠡ ᠪᠣᠰᠴᠤ ᠬᠦᠦ ᠶᠢ ᠡᠬᠡ ᠲᠠᠢ ᠨᠢ ᠠᠪᠴᠤ᠂ ᠢᠰᠷᠧᠯ ᠨᠤᠲᠤᠭ ᠲᠤ ᠣᠷᠣᠪᠠ᠃ 22 ᠬᠠᠷᠢᠨ ᠠᠷᠬᠧᠯᠡ ᠶᠢᠨ ᠡᠴᠢᠭᠡ ᠾᠧᠷᠣᠳ᠋ ᠢᠶᠠᠨ ᠣᠷᠣᠯᠠᠨ ᠶᠦᠳᠠᠢ ᠶᠢᠨ ᠬᠠᠨ ᠪᠣᠯᠣᠭᠰᠠᠨ ᠢ ᠰᠣᠨᠣᠰᠣᠭᠠᠳ ᠲᠡᠰᠢ ᠬᠥᠳᠡᠯᠬᠦ ᠡᠴᠡ ᠠᠶᠤᠭᠰᠠᠨ ᠪᠣᠯᠪᠠᠴᠤ᠂ ᠵᠡᠭᠦᠳᠦᠨ ᠳᠡᠭᠡᠨ ᠵᠢᠭᠠᠪᠤᠷᠢ ᠠᠪᠤᠭᠠᠳ ᠭᠠᠯᠢᠯᠠᠶᠠ ᠨᠤᠲᠤᠭ ᠤᠷᠤᠭᠤ ᠨᠡᠭᠦᠭᠰᠡᠨ ᠪᠥᠭᠡᠳ 23 ᠨᠠᠽᠠᠷᠧᠲ ᠬᠡᠮᠡᠬᠦ ᠲᠣᠰᠬᠣᠨ ᠳᠤ ᠬᠦᠷᠴᠦ ᠰᠠᠭᠤᠷᠢᠰᠢᠪᠠ᠃ ᠡᠢᠨ ᠬᠦ 《ᠨᠠᠽᠠᠷᠧᠲ ᠤᠨ ᠬᠢ ᠭᠡᠵᠦ ᠳᠠᠭᠤᠳᠠᠭᠳᠠᠨᠠ》 ᠬᠡᠮᠡᠨ ᠡᠰᠢ ᠦᠵᠡᠭᠦᠯᠦᠭᠴᠢᠳ ᠢᠶᠠᠷ ᠬᠡᠯᠡᠭᠦᠯᠦᠭᠰᠡᠨ ᠦᠭᠡ ᠪᠡᠶᠡᠯᠡᠭᠳᠡᠵᠡᠢ᠃