ᠮᠠᠲ᠋ᠠᠢ ᠵᠢᠷᠭᠤᠭᠠ
ᠥᠭᠯᠢᠭᠡ ᠪᠠ ᠳᠠᠭᠠᠳᠬᠠᠯ ᠤᠨ ᠲᠤᠬᠠᠢ
1 ᠬᠥᠮᠦᠰ ᠲᠦ ᠦᠵᠡᠭᠦᠯᠬᠦ ᠭᠡᠵᠦ ᠲᠡᠳᠡᠨ ᠦ ᠡᠮᠦᠨᠡ 〈ᠵᠥᠪ ᠦᠢᠯᠡ〉 ᠬᠢᠬᠦ ᠡᠴᠡ ᠪᠣᠯᠭᠣᠮᠵᠢᠯᠠ᠂ ᠡᠰᠡ ᠲᠡᠭᠡᠪᠡᠯ ᠲᠩᠷᠢ ᠳᠠᠬᠢ ᠡᠴᠢᠭᠡ ᠶᠢᠨ ᠴᠢᠨᠢ ᠱᠠᠩᠨᠠᠯ ᠲᠠ ᠨᠠᠷ ᠲᠤ ᠪᠠᠢᠬᠤ ᠦᠭᠡᠢ᠃
2 ᠴᠢ ᠥᠭᠯᠢᠭᠡ ᠥᠭᠬᠦ ᠳᠡᠭᠡᠨ ᠪᠢᠲᠡᠭᠡᠢ ᠬᠣᠶᠠᠷ ᠨᠢᠭᠤᠷᠲᠠᠨ ᠮᠡᠲᠦ ᠥᠪᠡᠷ ᠦᠨ ᠢᠶᠠᠨ ᠡᠮᠦᠨᠡ ᠪᠦᠷᠢᠶᠡ ᠦᠯᠢᠶᠡᠯᠭᠡ᠂ ᠲᠡᠳᠡ ᠬᠥᠮᠦᠰ ᠲᠦ ᠮᠠᠭᠲᠠᠭᠳᠠᠭᠠᠰᠠᠢ ᠭᠡᠵᠦ ᠬᠤᠷᠠᠯ ᠤᠨ ᠲᠠᠩᠬᠢᠮ ᠪᠤᠶᠤ ᠭᠤᠳᠤᠮᠵᠢᠨ ᠳᠤ ᠪᠦᠷᠢᠶᠡ ᠦᠯᠢᠶᠡᠯᠭᠡᠳᠡᠭ᠃ ᠲᠠ ᠨᠠᠷ ᠲᠤ ᠪᠠᠲᠤᠲᠠᠢ ᠬᠡᠯᠡᠶᠡ᠂ ᠲᠡᠳᠡ ᠱᠠᠩᠨᠠᠯ ᠢᠶᠠᠨ ᠭᠦᠢᠴᠡᠳ ᠠᠪᠤᠭᠰᠠᠨ ᠶᠤᠮ᠃ 3 ᠬᠠᠷᠢᠨ ᠴᠢ ᠥᠭᠯᠢᠭᠡ ᠥᠭᠬᠦ ᠳᠦ᠂ ᠪᠠᠷᠠᠭᠤᠨ ᠭᠠᠷ ᠤᠨ ᠴᠢᠨᠢ ᠶᠠᠭᠤ ᠬᠢᠵᠦ ᠪᠤᠢ ᠶᠢ ᠵᠡᠭᠦᠨ ᠭᠠᠷ ᠴᠢᠨᠢ ᠪᠦᠦ ᠮᠡᠳᠡᠭ᠃ 4 ᠡᠢᠨ ᠬᠦ ᠥᠭᠯᠢᠭᠡ ᠴᠢᠨᠢ ᠳᠠᠯᠳᠠ ᠪᠠᠢᠬᠤ ᠪᠥᠭᠡᠳ ᠳᠠᠯᠳᠠ ᠠᠴᠠ ᠬᠠᠷᠠᠭᠴᠢ ᠴᠢᠨᠦ ᠡᠴᠢᠭᠡ ᠴᠢᠮᠠ ᠶᠢ ᠱᠠᠩᠨᠠᠨᠠ᠃
5 ᠮᠥᠨ ᠲᠠ ᠨᠠᠷ ᠳᠠᠭᠠᠳᠬᠠᠬᠤ ᠳᠠᠭᠠᠨ ᠬᠣᠶᠠᠷ ᠨᠢᠭᠤᠷᠲᠠᠨ ᠮᠡᠲᠦ ᠪᠣᠯᠣᠭᠤᠵᠠᠢ᠂ ᠲᠡᠳᠡ ᠬᠥᠮᠦᠰ ᠲᠦ ᠦᠵᠡᠭᠳᠡᠭᠡᠰᠡᠢ ᠭᠡᠵᠦ ᠬᠤᠷᠠᠯ ᠤᠨ ᠲᠠᠩᠬᠢᠮ ᠪᠣᠯᠣᠨ ᠵᠠᠮ ᠤᠨ ᠠᠭᠤᠯᠵᠠᠷ ᠲᠤ ᠵᠣᠭᠰᠣᠭᠠᠳ ᠳᠠᠭᠠᠳᠬᠠᠬᠤ ᠳᠤᠷᠠᠲᠠᠢ ᠪᠠᠢᠳᠠᠭ᠃ ᠲᠠ ᠨᠠᠷ ᠲᠤ ᠪᠠᠲᠤᠲᠠᠢ ᠬᠡᠯᠡᠶᠡ᠂ ᠲᠡᠳᠡ ᠱᠠᠩᠨᠠᠯ ᠢᠶᠠᠨ ᠭᠦᠢᠴᠡᠳ ᠠᠪᠤᠭᠰᠠᠨ ᠶᠤᠮ᠃ 6 ᠬᠠᠷᠢᠨ ᠴᠢ ᠳᠠᠭᠠᠳᠬᠠᠬᠤ ᠳᠠᠭᠠᠨ ᠥᠷᠥᠭᠡᠨ ᠳᠡᠭᠡᠨ ᠣᠷᠣᠵᠤ ᠡᠭᠦᠳᠡ ᠪᠡᠨ ᠬᠠᠭᠠᠭᠠᠳ᠂ ᠳᠠᠯᠳᠠ ᠪᠠᠢᠭᠠ ᠡᠴᠢᠭᠡ ᠳᠡᠭᠡᠨ ᠳᠠᠭᠠᠳᠬᠠ᠃ ᠳᠠᠯᠳᠠ ᠠᠴᠠ ᠬᠠᠷᠠᠭᠴᠢ ᠴᠢᠨᠦ ᠡᠴᠢᠭᠡ ᠴᠢᠮᠠ ᠶᠢ ᠭᠦᠢᠴᠡᠳ ᠱᠠᠩᠨᠠᠨᠠ᠃
7 ᠳᠠᠭᠠᠳᠬᠠᠬᠤ ᠳᠠᠭᠠᠨ ᠪᠢᠲᠡᠭᠡᠢ ᠬᠠᠷᠢᠴᠤᠳ ᠰᠢᠭ᠋ ᠨᠤᠷᠱᠢ᠂ ᠦᠭᠡ ᠣᠯᠠᠨ ᠪᠣᠯ ᠰᠣᠨᠣᠰᠣᠨᠠ ᠭᠡᠵᠦ ᠲᠡᠳᠡ ᠪᠣᠳᠣᠳᠠᠭ᠃ 8 ᠲᠡᠳᠡᠨ ᠢ ᠪᠦᠦ ᠳᠠᠭᠤᠷᠢᠶᠠ᠃ ᠲᠠ ᠨᠠᠷ ᠤᠨ ᠡᠴᠢᠭᠡ ᠲᠠ ᠨᠠᠷ ᠲᠤ ᠶᠠᠭᠤ ᠬᠡᠷᠡᠭ ᠲᠡᠢ ᠶᠢ ᠭᠤᠶᠤᠬᠤ ᠠᠴᠠ ᠴᠢᠨᠢ ᠡᠮᠦᠨᠡ ᠮᠡᠳᠡᠳᠡᠭ᠃
9 ᠲᠡᠢᠮᠦ ᠡᠴᠡ ᠲᠠ ᠨᠠᠷ ᠢᠩᠭᠢᠵᠦ ᠳᠠᠭᠠᠳᠬᠠᠭᠠᠷᠠᠢ᠄ 〈ᠲᠩᠷᠢ ᠳᠠᠬᠢ ᠪᠢᠳᠡᠨ ᠦ ᠠᠪᠤ ᠡ ᠲᠠᠨ ᠤ ᠨᠡᠷᠡ ᠠᠷᠢᠭᠤᠨ ᠢᠶᠠᠷ ᠬᠦᠨᠳᠦᠯᠡᠭᠳᠡᠬᠦ ᠪᠣᠯᠲᠤᠭᠠᠢ᠃
10 ᠲᠠᠨ ᠤ ᠬᠠᠭᠠᠨᠴᠢᠯᠠᠯ ᠢᠷᠡᠬᠦ ᠪᠣᠯᠲᠤᠭᠠᠢ ᠲᠠᠨ ᠤ ᠰᠠᠨᠠᠭᠠ ᠲᠩᠷᠢ ᠳᠡᠭᠡᠷᠡ ᠪᠡᠶᠡᠯᠡᠭᠳᠡᠭᠰᠡᠨ ᠮᠡᠲᠦ ᠭᠠᠵᠠᠷ ᠳᠡᠭᠡᠷᠡ ᠴᠤ ᠪᠡᠶᠡᠯᠡᠭᠳᠡᠬᠦ ᠪᠣᠯᠲᠤᠭᠠᠢ᠃
11 ᠪᠢᠳᠡᠨ ᠦ ᠡᠳᠦᠷ ᠲᠤᠲᠤᠮ ᠤᠨ ᠬᠦᠨᠡᠰᠦ ᠶᠢ ᠥᠨᠥᠳᠥᠷ ᠰᠣᠶᠣᠷᠬᠠᠭᠠᠴᠢ
12 ᠪᠢᠳᠡ ᠭᠡᠮ ᠨᠢᠭᠦᠯᠲᠡᠨ 8 ᠢᠶᠠᠨ ᠠᠭᠤᠴᠢᠯᠠᠭᠰᠠᠨ ᠮᠡᠲᠦ ᠪᠢᠳᠡᠨ ᠦ ᠭᠡᠮ ᠨᠢᠭᠦᠯ 9 ᠢ ᠠᠭᠤᠴᠢᠯᠠᠭᠠᠴᠢ᠃
13 ᠪᠢᠳᠡᠨ ᠢ ᠲᠡᠩᠰᠡᠯᠲᠡ ᠳᠦ ᠣᠷᠣᠬᠤ ᠠᠴᠠ ᠵᠠᠢᠯᠠᠭᠤᠯᠤᠨ ᠮᠠᠭᠤ 10 ᠡᠴᠡ ᠭᠡᠲᠦᠯᠭᠡᠭᠡᠴᠢ᠃ [ᠤᠴᠢᠷ ᠨᠢ ᠬᠠᠭᠠᠨᠴᠢᠯᠠᠯ᠂ ᠬᠦᠴᠦ ᠴᠢᠳᠠᠯ᠂ ᠠᠯᠳᠠᠷ ᠰᠤᠤ ᠮᠥᠩᠬᠡᠳᠡ ᠲᠠᠨ ᠤ ᠬᠢ᠂ ᠠᠮᠧᠨ︕]〉
14 ᠬᠡᠷᠪᠡ ᠲᠠ ᠨᠠᠷ ᠬᠥᠮᠦᠨ ᠦ ᠪᠤᠷᠤᠭᠤ ᠶᠢ ᠠᠭᠤᠴᠢᠯᠠᠪᠠᠯ᠂ ᠲᠠ ᠨᠠᠷ ᠤᠨ ᠲᠩᠷᠢᠯᠢᠭ ᠡᠴᠢᠭᠡ ᠴᠤ ᠲᠠ ᠨᠠᠷ ᠢ ᠠᠭᠤᠴᠢᠯᠠᠨᠠ᠃ 15 ᠬᠠᠷᠢᠨ ᠲᠠ ᠨᠠᠷ ᠬᠥᠮᠦᠨ ᠢ ᠠᠭᠤᠴᠢᠯᠠᠬᠤ ᠦᠭᠡᠢ ᠪᠣᠯ ᠲᠠ ᠨᠠᠷ ᠤᠨ ᠡᠴᠢᠭᠡ ᠴᠤ ᠲᠠ ᠨᠠᠷ ᠢ ᠠᠭᠤᠴᠢᠯᠠᠬᠤ ᠦᠭᠡᠢ᠃
ᠪᠠᠴᠠᠭ ᠪᠠ ᠵᠢᠩᠬᠢᠨᠢ ᠡᠷᠳᠡᠨᠢᠰ ᠤᠨ ᠲᠤᠬᠠᠢ
16 ᠲᠠ ᠨᠠᠷ ᠪᠠᠴᠠᠭ ᠪᠠᠷᠢᠬᠤ ᠳᠠᠭᠠᠨ ᠪᠢᠲᠡᠭᠡᠢ ᠬᠣᠶᠠᠷ ᠨᠢᠭᠤᠷᠲᠠᠨ ᠰᠢᠭ᠋ ᠭᠤᠨᠢᠭᠲᠠᠢ ᠴᠢᠷᠠᠢᠯᠠ᠃ ᠲᠡᠳᠡ ᠪᠠᠴᠠᠭ ᠪᠠᠷᠢᠵᠤ ᠪᠠᠢᠬᠤ ᠳᠠᠭᠠᠨ ᠬᠥᠮᠦᠰ ᠲᠦ ᠦᠵᠡᠭᠦᠯᠬᠦ ᠭᠡᠵᠦ ᠮᠠᠭᠤᠬᠠᠢ ᠴᠢᠷᠠᠢ ᠭᠠᠷᠭᠠᠳᠠᠭ᠃ ᠴᠢᠮᠠ ᠳᠤ ᠪᠠᠲᠤᠲᠠᠢ ᠬᠡᠯᠡᠶᠡ᠂ ᠲᠡᠳᠡ ᠱᠠᠩᠨᠠᠯ ᠢᠶᠠᠨ ᠭᠦᠢᠴᠡᠳ ᠠᠪᠤᠭᠰᠠᠨ ᠶᠤᠮ᠃ 17 ᠬᠠᠷᠢᠨ ᠴᠢ ᠪᠠᠴᠠᠭ ᠪᠠᠷᠢᠬᠤ ᠳᠠᠭᠠᠨ ᠲᠣᠯᠣᠭᠠᠢ ᠪᠠᠨ ᠲᠣᠰᠣᠯᠠᠵᠤ᠂ ᠨᠢᠭᠤᠷ ᠢᠶᠠᠨ ᠤᠬᠢᠶᠠ᠃ 18 ᠲᠡᠭᠡᠭᠡᠳ ᠪᠠᠴᠠᠭ ᠪᠠᠷᠢᠬᠤ ᠪᠠᠨ ᠬᠥᠮᠦᠰ ᠲᠦ ᠦᠵᠡᠭᠦᠯᠬᠦ ᠪᠢᠰᠢ᠂ ᠳᠠᠯᠳᠠ ᠠᠴᠠ ᠬᠠᠷᠠᠭᠴᠢ ᠡᠴᠢᠭᠡ ᠳᠡᠭᠡᠨ ᠯᠠ ᠦᠵᠡᠭᠦᠯᠦᠨᠡ᠃ ᠳᠠᠯᠳᠠ ᠠᠴᠠ ᠬᠠᠷᠠᠭᠴᠢ ᠴᠢᠨᠦ ᠡᠴᠢᠭᠡ ᠴᠢᠮᠠᠶᠢ ᠱᠠᠩᠨᠠᠨᠠ᠃
19 ᠭᠠᠵᠠᠷ ᠳᠡᠭᠡᠷᠡ ᠥᠪᠡᠷᠰᠡᠳ ᠲᠡᠭᠡᠨ ᠡᠳ᠋ ᠡᠷᠳᠡᠨᠢᠰ ᠪᠦᠦ ᠬᠤᠷᠢᠶᠠ᠃ ᠲᠡᠨᠳᠡ ᠬᠣᠷᠣᠬᠠᠢ ᠢᠳᠡᠵᠦ᠂ ᠵᠢᠪᠡᠷᠡᠵᠦ᠂ ᠬᠤᠯᠠᠭᠠᠢᠴᠢ ᠨᠦᠬᠡᠯᠡᠵᠦ ᠬᠤᠯᠠᠭᠠᠢᠯᠠᠨᠠ᠃ 20 ᠬᠠᠷᠢᠨ ᠲᠩᠷᠢ ᠳᠤ ᠥᠪᠡᠷᠰᠡᠳ ᠲᠡᠭᠡᠨ ᠡᠳ᠋ ᠡᠷᠳᠡᠨᠢᠰ ᠢ ᠬᠤᠷᠢᠶᠠ᠃ ᠲᠡᠨᠳᠡ ᠬᠣᠷᠣᠬᠠᠢ ᠢᠳᠡᠬᠦ ᠦᠭᠡᠢ᠂ ᠵᠢᠪᠡᠷᠡᠬᠦ ᠦᠭᠡᠢ᠂ ᠬᠤᠯᠠᠭᠠᠢᠴᠢ ᠨᠦᠬᠡᠯᠡᠵᠦ ᠬᠤᠯᠠᠭᠠᠢᠯᠠᠬᠤ ᠦᠭᠡᠢ᠃ 21 ᠡᠳ᠋ ᠡᠷᠳᠡᠨᠢᠰ ᠴᠢᠨᠢ ᠬᠠᠮᠢᠭᠠ ᠪᠠᠢᠪᠠᠯ᠂ ᠰᠡᠳᠬᠢᠯ ᠴᠢᠨᠢ ᠴᠤ ᠲᠡᠨᠳᠡ ᠪᠠᠢᠬᠤ ᠪᠣᠯᠣᠨᠠ᠃
22 ᠨᠢᠳᠦ ᠪᠣᠯ ᠪᠡᠶᠡ ᠶᠢᠨ ᠳ᠋ᠧᠩ ᠮᠥᠨ᠂ ᠨᠢᠳᠦ ᠴᠢᠨᠢ ᠡᠷᠡᠭᠦᠯ 11 ᠪᠣᠯ ᠪᠦᠬᠦ ᠪᠡᠶᠡ ᠴᠢᠨᠢ ᠭᠡᠷᠡᠯ ᠲᠡᠢ᠃ 23 ᠬᠠᠷᠢᠨ ᠨᠢᠳᠦ ᠴᠢᠨᠢ ᠮᠠᠭᠤ 12 ᠪᠣᠯ᠂ ᠪᠦᠲᠦᠨ ᠪᠡᠶᠡ ᠴᠢᠨᠢ ᠬᠠᠪ ᠬᠠᠷᠠᠩ᠋ᠭᠤᠢ ᠪᠣᠯᠣᠨᠠ᠂ ᠳᠣᠲᠣᠷᠠᠬᠢ ᠭᠡᠷᠡᠯ ᠴᠢᠨᠢ ᠬᠠᠷᠠᠩ᠋ᠭᠤᠢ ᠪᠣᠯ ᠲᠡᠷᠡ ᠬᠠᠷᠠᠩ᠋ᠭᠤᠢ ᠨᠢ ᠬᠡᠴᠢᠨᠡᠨ ᠶᠡᠬᠡ ᠠᠵᠢ︕
24 ᠬᠡᠨ ᠴᠤ ᠬᠣᠶᠠᠷ ᠡᠵᠡᠨ ᠳᠦ ᠵᠠᠷᠤᠭᠳᠠᠵᠤ ᠴᠢᠳᠠᠬᠤ ᠦᠭᠡᠢ᠃ ᠤᠴᠢᠷ ᠨᠢ ᠨᠢᠭᠡ ᠶᠢ ᠨᠢ ᠦᠵᠡᠨ ᠶᠠᠳᠠᠵᠤ᠂ ᠨᠥᠭᠥᠭᠡ ᠶᠢ ᠨᠢ ᠬᠠᠢᠷᠠᠯᠠᠬᠤ᠂ ᠡᠰᠡᠪᠡᠯ ᠨᠢᠭᠡ ᠶᠢ ᠨᠢ ᠬᠦᠨᠳᠦᠯᠡᠵᠦ᠂ ᠨᠥᠭᠥᠭᠡ ᠶᠢ ᠨᠢ ᠬᠥᠩᠭᠡᠪᠴᠢᠯᠡᠬᠦ ᠪᠣᠯᠣᠨᠠ᠃ ᠲᠠ ᠨᠠᠷ ᠪᠤᠷᠬᠠᠨ ᠪᠠ ᠵᠣᠭᠣᠰᠣᠨ ᠳᠤ ᠵᠡᠷᠭᠡ ᠪᠡᠷ ᠦᠢᠯᠡᠴᠢᠯᠡᠵᠦ ᠴᠢᠳᠠᠬᠤ ᠦᠭᠡᠢ᠃
ᠪᠦᠦ ᠰᠠᠨᠠᠭᠠ ᠵᠣᠪᠠ
25 ᠲᠡᠢᠮᠦ ᠡᠴᠡ ᠲᠠ ᠨᠠᠷ ᠲᠤ ᠬᠡᠯᠡᠶᠡ᠄ 〈ᠶᠠᠭᠤ ᠢᠳᠡᠬᠦ ᠪᠢᠯᠡ︖ [ᠶᠠᠭᠤ ᠤᠤᠭᠤᠬᠤ ᠪᠢᠯᠡ︖]〉 ᠭᠡᠵᠦ ᠠᠮᠢ ᠶᠢᠨ ᠢᠶᠠᠨ ᠲᠥᠯᠥᠭᠡ ᠪᠦᠦ ᠵᠣᠪᠠ᠂ 〈ᠶᠠᠭᠤ ᠡᠮᠦᠰᠬᠦ ᠪᠢᠯᠡ︖〉 ᠭᠡᠵᠦ ᠪᠡᠶᠡ ᠶᠢᠨ ᠢᠶᠠᠨ ᠲᠥᠯᠥᠭᠡ ᠪᠦᠦ ᠵᠣᠪᠠ᠂ ᠬᠦᠨᠡᠰᠦᠨ ᠡᠴᠡ ᠠᠮᠢ ᠴᠢᠬᠤᠯᠠ᠂ ᠬᠤᠪᠴᠠᠰᠤᠨ ᠠᠴᠠ ᠪᠡᠶᠡ ᠴᠢᠬᠤᠯᠠ ᠪᠢᠰᠢ ᠤᠤ︖ 26 ᠣᠭᠲᠠᠷᠭᠤᠢ ᠳᠠᠬᠢ ᠰᠢᠪᠠᠭᠤᠳ ᠢ ᠬᠠᠷᠠ᠂ ᠲᠡᠳᠡ ᠲᠠᠷᠢᠬᠤ ᠦᠭᠡᠢ᠂ ᠬᠤᠷᠢᠶᠠᠬᠤ ᠦᠭᠡᠢ᠂ ᠬᠥᠮᠥᠷᠭᠡᠯᠡᠬᠦ ᠴᠤ ᠦᠭᠡᠢ ᠪᠣᠯᠪᠠᠴᠤ ᠲᠩᠷᠢᠯᠢᠭ ᠡᠴᠢᠭᠡ ᠴᠢᠨᠢ ᠲᠡᠳᠡᠨ ᠢ ᠲᠡᠵᠢᠭᠡᠳᠡᠭ᠃ ᠲᠠ ᠨᠠᠷ ᠲᠡᠳᠡᠨ ᠡᠴᠡ ᠬᠣᠯᠠ ᠢᠯᠡᠭᠦᠦ ᠡᠷᠬᠢᠮ ᠪᠢᠰᠢ ᠤᠤ︖ 27 ᠲᠠ ᠨᠠᠷ ᠤᠨ ᠬᠡᠨ ᠨᠢ ᠰᠠᠨᠠᠭᠠ ᠵᠣᠪᠠᠭᠰᠠᠨ ᠢᠶᠠᠷ ᠢᠶᠠᠨ ᠨᠠᠰᠤᠨ ᠤ ᠲᠣᠭᠠᠨ ᠳᠠᠭᠠᠨ ᠨᠢᠭᠡ ᠮᠥᠴᠡ ᠶᠢ 13 ᠨᠡᠮᠡᠵᠦ ᠴᠢᠳᠠᠬᠤ ᠪᠢᠯᠡ︖ 28 ᠲᠠ ᠨᠠᠷ ᠬᠤᠪᠴᠠᠰᠤᠨ ᠤ ᠲᠥᠯᠥᠭᠡ ᠶᠠᠭᠤᠨ ᠳᠤ ᠵᠣᠪᠠᠨᠠ ᠪᠤᠢ︖ ᠰᠠᠷᠠᠨᠠ ᠴᠡᠴᠡᠭ ᠬᠡᠷᠬᠢᠨ ᠤᠷᠭᠤᠳᠠᠭ ᠢ ᠦᠵᠡ᠂ ᠲᠡᠳᠡ ᠵᠦᠳᠡᠷᠡᠳᠡᠭ ᠦᠭᠡᠢ᠂ ᠡᠭᠡᠷᠡᠳᠡᠭ ᠦᠭᠡᠢ᠃ 29 ᠭᠡᠪᠡᠴᠦ ᠲᠠ ᠨᠠᠷ ᠲᠤ ᠬᠡᠯᠡᠶᠡ᠂ ᠬᠠᠮᠤᠭ ᠰᠦᠷ ᠵᠢᠪᠬᠤᠯᠠᠩ ᠲᠠᠢ ᠰᠣᠯᠣᠮᠣᠨ 14 ᠴᠤ ᠡᠳᠡᠭᠡᠷ ᠴᠡᠴᠡᠭ ᠦᠨ ᠨᠢᠭᠡ ᠨᠢ ᠰᠢᠭ ᠬᠤᠪᠴᠠᠰᠤᠯᠠᠭᠰᠠᠨ ᠦᠭᠡᠢ᠃ 30 ᠥᠨᠥᠳᠥᠷ ᠪᠠᠢᠭᠰᠠᠨ ᠢᠶᠠᠨ ᠮᠠᠷᠭᠠᠰᠢ ᠵᠤᠤᠬᠠᠨ ᠳᠤ ᠬᠠᠶᠠᠭᠳᠠᠬᠤ ᠬᠡᠭᠡᠷᠡ ᠶᠢᠨ ᠡᠪᠡᠰᠦ ᠶᠢ ᠬᠦᠷᠲᠡᠯᠡ ᠪᠤᠷᠬᠠᠨ ᠢᠩᠭᠢᠲᠡᠯᠡ ᠪᠡᠨ ᠴᠢᠮᠡᠳᠡᠭ ᠪᠠᠢᠬᠤ ᠳᠤ᠂ ᠲᠠ ᠨᠠᠷ ᠲᠤ ᠢᠯᠡᠭᠦᠦ ᠰᠠᠢᠨ ᠢ ᠬᠢᠬᠦ ᠪᠢᠰᠢ ᠤᠤ︖ ᠢᠲᠡᠭᠡᠯ ᠪᠠᠭᠠ ᠲᠠᠢ ᠬᠥᠮᠦᠰ ᠡ᠂ 31 ᠲᠡᠢᠮᠦ ᠡᠴᠡ ᠲᠠ ᠨᠠᠷ᠄ 〈ᠶᠠᠭᠤ ᠢᠳᠡᠬᠦ ᠪᠢᠯᠡ︖〉᠂ 〈ᠶᠠᠭᠤ ᠤᠤᠭᠤᠬᠤ ᠪᠢᠯᠡ︖〉᠂ ᠡᠰᠡᠪᠡᠯ᠄ 〈ᠶᠠᠭᠤ ᠡᠮᠦᠰᠬᠦ ᠪᠢᠯᠡ︖〉 ᠭᠡᠵᠦ ᠪᠦᠦ ᠰᠠᠨᠠᠭᠠ ᠵᠣᠪᠠ᠃ 32 ᠡᠨᠡ ᠪᠦᠬᠦᠨ ᠢ ᠬᠠᠷᠢᠴᠤᠳ ᠡᠷᠢᠯᠬᠢᠯᠡᠳᠡᠭ᠂ ᠡᠨᠡ ᠪᠦᠬᠦᠨ ᠨᠢ ᠲᠠ ᠨᠠᠷ ᠲᠤ ᠬᠡᠷᠡᠭ ᠲᠡᠢ ᠶᠢ ᠲᠠ ᠨᠠᠷ ᠤᠨ ᠲᠩᠷᠢᠯᠢᠭ ᠡᠴᠢᠭᠡ ᠮᠡᠳᠡᠨᠡ᠃ 33 ᠬᠠᠷᠢᠨ ᠲᠠ ᠨᠠᠷ ᠤᠷᠢᠳᠠᠪᠠᠷ ᠪᠤᠷᠬᠠᠨ ᠤ ᠬᠠᠭᠠᠨᠴᠢᠯᠠᠯ ᠪᠣᠯᠣᠨ ᠲᠡᠭᠦᠨ ᠦ ᠭᠣᠣᠯᠴᠢ ᠶᠣᠰᠣ ᠶᠢ ᠬᠠᠢᠭᠲᠤᠨ᠂ ᠲᠡᠭᠡᠪᠡᠯ ᠡᠨᠡ ᠪᠦᠬᠦᠨ ᠨᠢ ᠴᠤ ᠲᠠ ᠨᠠᠷ ᠲᠤ ᠨᠡᠮᠡᠭᠳᠡᠬᠦ ᠪᠣᠯᠣᠨᠠ᠃
34 ᠲᠡᠢᠮᠦ ᠡᠴᠡ ᠮᠠᠷᠭᠠᠰᠢ ᠶᠢᠨ ᠲᠥᠯᠥᠭᠡ ᠪᠦᠦ ᠰᠠᠨᠠᠭᠠ ᠵᠣᠪᠠ᠃ ᠤᠴᠢᠷ ᠨᠢ ᠮᠠᠷᠭᠠᠰᠢ ᠳᠤ ᠮᠠᠷᠭᠠᠰᠢ ᠶᠢᠨ ᠵᠣᠪᠠᠨᠢᠯ ᠪᠤᠢ᠃ ᠥᠨᠥᠳᠥᠷ ᠦᠨ ᠵᠣᠪᠠᠯᠠᠩ ᠨᠢ ᠥᠨᠥᠳᠥᠷ ᠲᠡᠭᠡᠨ ᠬᠠᠩ᠋ᠭᠠᠯᠲᠠᠲᠠᠢ᠃